Стихи́:

Патриа́рху патриа́рх ближа́йший,

Боже́ственаго ста́рца Авраа́ма Ники́фор:

Во вторы́й Ники́фор честь обре́те.

Ники́фор блаже́нный святи́тель бе в Константи́не гра́де рожде́йся и воспита́н, в ца́рство нечести́ваго Костанти́на иконобо́рца. Сын Фео́доров и [ма́тери] Евдоки́и. Фео́дор же той писе́ц бе царе́в. И бысть оба́жен я́ко покло́нник святы́х ико́н, бие́н бысть и заточе́н в Мила́с. Посе́м в Ники́ю прии́де и у́мре. Того́ же сын писе́ц сый Ники́фор, и той оста́вив сан и бога́тство и сла́ву, и́де на край гра́да, иде́же есть глубина́. И ту Бо́гу рабо́тая и себе́ внима́я вели́ку же доброде́тель стяжа́. И по успе́нии вели́каго Тара́сия патриа́рха поста́влен бысть патриа́рхом в Костанти́не гра́де Ники́фором царе́м, отце́м Ставра́киевом, и пребы́сть до ца́рства Льва иконобо́рца, и от него́ заточе́н быв и в темни́цу поверже́н быв. Ко Го́споду отъи́де сый лет седми́десяти, от ни́хже де́вять во святи́тельстве пребы́сть, а трина́десять в заточе́нии.

P.S. Существует и иной проложный текст.

А́ще нау́к и́маши о гресе́х, наложи́ на ся страх Бо́жий, и му́ки ве́чныя, и одоле́еши вся́ко. Я́ко несть труда́ оста́вити гнев опеча́лившему тя. Ка́я боле́знь моли́тися даю́щему Богу, и проси́ти тмы благи́х со усе́рдием? Ка́я боле́знь, е́же зла никому́же рещи́? Ка́я спо́на, отврещи́ ре́вность и за́висть? Кий труд, е́же люби́ти бли́жняго? Ка́я страсть не веща́ти сра́мных слове́с, ни клевета́ти, ни досажда́ти? Ка́я беда́ не кля́тися? Ка́я спо́на поми́ловати? А́ще бо а́лчеши, покажи́ саме́ми де́лы: а́ще вид́иши убо́гаго, поми́луй: а́ще и́маши врага́, смири́ся с ним: а́ще и́маши дру́га до́бре спе́юща, не зави́ди ему́: а́ще ви́диши жену́ доброли́чну, премини́ ю́. Да не уста́ а́лчут то́кмо, но и о́ко и слух, и но́зе и ру́це, и вси те́ла твоего́ у́дове. Ве́домо же бу́ди, я́ко не пыта́емо есть моли́твенное ме́сто, но нрав. Иереми́я у́бо в ро́ве бе, но Бо́га умоли́. Даниил в я́ме льво́ве, но Бо́га призва́. Трие́ о́троцы в пещи́, но Бо́га призва́ша. И́ов на гно́ищи седя́ше, но Го́спода ви́де. Моисе́й на мо́ри бе, и глаго́ла ему́ Бог: Что вопие́ши ко Мне? Разбо́йник на кресте́, но рай отве́рзе. Да и ты гделю́бо еси́, или́ на пути, или́ на мо́ри, или́ на торгу́, или́ в ко́ем хра́ме и ме́сте, моли́ся в чи́стей со́вести, и Бог послу́шает тебе́: Того́ бо есть земля́, и концы́ ея́, и на вся́ком ме́сте влады́чествия Его́.