Стихи́:

Не во́ду Евдоки́я, но кровь Тебе́ Спа́се от ши́и прино́сит:

Ма́рта в пе́рвый Евдоки́я мечь подъя́.

Та бя́ше от со́лнечнаго гра́да о́бласти Лива́нии, от Самари́и Палести́нския, во времена́ Трая́на царя́, в блуде́ пе́рвие живу́щия. И мно́ги рачи́тели красото́ю лица́ своего́ привле́кши, и бога́тство мно́го собра́вши. Пото́м же прии́де ко Христу́ от не́коего Ге́рмана мни́ха о благоче́стии, и, о покая́нии словеса́ слы́шавши, крести́ся у́бо Феодо́том епи́скопом, боже́ственным открове́нием повину́вшияся: И́бо во у́жасе ви́девши а́нгелом на не́бо приводи́ме, и а́нгелом сра́дующимся тоя́ обраще́нию, и не́коего вельми́ че́рна лице́м рыда́юща и пла́чуща я́ко оби́дима. Она́ же все бога́тство ни́щим разда́вши, отъи́де в монасты́рь. И до́бре ше́ствие по́стническое проходя́щи, и приведена́ бысть Аврилиану царю́, оклевета́на бы́вши свои́ми рачи́тели. Чудоде́йствовавши же и царе́ва о́трочища уме́рша воздви́же и ко Христо́ве ве́ре царя́ привлече́. Пото́м же му́чена бы́вши Диоге́ном иге́моном, и та́мо чудоде́йствовавши, пуще́на бысть и Вике́нтием мече́м посечена́ бысть.

Стихи́:

И́же ши́ю Не́сторе пода́в мечу́,

Я́зву подаде́ Триви́мию:

Не́стора не погреши́ мечь, посе́к во вторы́й.

В ца́рство нечести́ваго Де́кия, бе́ста свята́я Не́стор и Триви́мий, от гра́да Перги́я, от страны́ Киприо́тски. И поне́же христиа́на су́ща, и Христа пропове́даста не обину́ющася. И возвеще́но бысть о нею́ от идолослужи́тель страны́ тоя́ кня́зю. Он же а́бие посла́ мно́жество во́ин, и приведе́ я́ свя́заны: и поста́ви я́ на суди́щи, и предложи́ пред ни́ма вся мучи́тельныя сосу́ды. Она же преще́ния ви́деста, вели́ким гла́сом Христа́ пропове́даста. И обнажи́в я́, без пощаде́ния жи́лами говя́жиими сухи́ми бия́ше. И посе́м строга́ху те́ло ею́, до́ндеже яви́стася утро́бе ею́. Ви́дев же я́ непрело́жен ра́зум иму́ща ко Го́споду Бо́гу на́шему Иису́су Христу́, снем я́ с дре́ва, и повеле́ слуга́м главы́ ею́ уре́зати ножи́. И та́ко благода́рне сконча́стася. И прия́т я́ Христо́с Бог в Ца́рство Свое́.

Стихи́:

Черто́г, море, неве́стничь бу́ди,

Антони́ну кры́ющи, неве́сту Госпо́дню.

Та бя́ше от града Нике́йскаго, в ца́рство Максимиа́ново. И́же и пред ним ста́вши, и Христа́ со дерзнове́нием испове́давши. Пе́рвие разли́чными му́ками му́чена бы́вши, и в темни́цу всажде́на ,и изведе́на не покори́ся пожре́ти и́долом. Пове́шена и по ре́бром стро́гана. Она́ же укаря́ше бо́ги и пре́лесть царе́ву. Сего́ ра́ди слуга́м вдана́ бысть я́ко совлещи́ ю́, и вельми́ би́ти. О́нем же той хотя́щим прикосну́тися, а́нгели с небесе́ сше́дше и слу́ги му́чивше вельми́, отри́нуша. Сию́ же без вре́да сохрани́ша. Та же просте́рта бы́вши по сковраде́ ражже́не, и па́ки невреди́ма пребы́вши. Вложена́ во вре́тище, и во е́зеро Нике́йское вве́ржена, и та́ко сконча́ся.