Стихи́:

Ви́дети приобре́тель от тала́нта принося́

В ра́дость, Кири́лле, Го́спода своего́:

В осемьна́десятый сме́ртная нощь прия́т Кири́лла.

Сей бя́ше сын роди́телю благочести́ву, и пра́вую ве́ру держа́щу. В подо́бных же наказа́ниих учи́мь бя́ше, в ца́рство Константи́ново. И поне́же Иерусали́мский епи́скоп, к нестаре́ющему животу́ пре́йде, блаже́нный сей Кири́лл по пра́вилом Иерусали́мстей це́ркви епи́скопскому да́ру сподо́бися, и апо́стольским повеле́нием жела́тельно спосо́бствуя. Ака́кию же и́же Кесари́и Палести́нския престо́л иму́щу, ему́же в Сардики́и от соше́дшагося собо́ра обличе́ну бы́вшу о сем, яко не име́ти Отцу́ Сы́на глаго́лющу. И е́же наведе́наго на нем низложе́нию суда́ небре́г, но еще́ престо́л мучи́тельски держа́, зане́же зна́емь царю́ бя́ше: и от него́ имы́й о́бласть, блаже́ннаго Кири́лла сведе́ с престо́ла и от Иерусали́ма того́ изгна́. Кири́ллу же в Тарс иду́щу, еже тамо с дивным Силва́ном пребыва́ти. И уже́ в Селевки́и собрану бывшу собо́ру. Сего́ ра́ди Ака́кий удали́вся, и к Константи́ню граду шед, и нава́ди ре́чи к царю́ на Кири́лла. Царь же на изгна́ние его́ осуди́. Конста́нтию же от живо́т исче́зшу, Иулиа́н ца́рство восприе́м, во благосбы́тие всех влеки́й, и́же Конста́нтием от це́ркве изгна́ным епи́скопом, и на свой кому́ждо церко́вный престо́л взы́ти повеле́. Со все́ми у́бо и сей свой престо́л восприя́т. До́бре же и богоуго́дне вруче́ную ему́ о Христе́ па́ству упасы́й, и приводи́мых к нему́ и во́лею приходя́щих огласи́в, и крести́в. Воспомянове́ние це́ркви оста́вив, осмьна́десять слов на иуде́й списа́. И мал год пожи́в по возвраще́нии, почи́ о Го́споде. Бя́ше же по теле́сному воображе́нию, виде́нием смире́н, блед, убели́знен, леп лице́м, бро́ви пра́вы и черны́, брада́ о че́люстех бе́ла су́густа, и разсоха́та. И обы́чаем приве́тен.

Сей бе от Халкидо́на, от благове́рну роди́телю. И научи́ся боже́ственым кни́гам. Кро́ток име́яше смысл. Мал же сый те́лом, а́ки дре́вний Закхе́й, но вели́ка себе́ сосу́да сотвори Свято́му Дух на прия́тие. И егда́ бысть пятина́десяти лет во́зрастом, отве́ржеся ми́ра и жите́йских печа́лей. И вни́де во еди́н от святы́х монастыре́й, и прии́м а́нгельский о́браз, и не изво́ли жития́ тамо устав́ити, но отъи́де в да́льнюю пусты́ню, иде́же бе Ефра́т река́ разделя́ющи от перс. И обре́те ту ста́рца в пеще́ре, и ту с ним пребыва́ше, посто́м удруча́я те́ло свое́. Мно́гажды вели́кий пост до Па́схи не вкуша́я ничто́же пребыва́ше, я́ко диви́тися ста́рцу пребыва́ющему с ним в пеще́ре. Не беже́ воды́, иде́же живя́ста: Ефра́т бо бе четы́ри по́прища в да́лее: и отту́ду Ани́н ноша́ше во опани́це во́ду ста́рцу, не изво́ли бо сосу́да вели́ка на приноше́ние. Еди́ною же иду́щу ему́ от пеще́ры, влия́ ему́ а́нгел во́ду во опани́цу, и возврати́ вся даде́ ста́рцу. Помы́сли же ста́рец я́ко не бе ту ины́я воды́, и разуме́ Бо́жию благода́ть на Ани́не. И хотя́ше его́ име́ти учи́теля себе́, но не мог увеща́ти его́, да бы ему́ не служи́л, и убоя́вся отъи́де в монасты́рь и́же бе на Ефра́те реце́, пове́да о Ани́не. Посла́ же Бог льва и служа́ше ему́. Уве́дан же бысть в монастыре́ от бра́тий, прихожда́ху бо к нему́ мона́си мно́зи иму́ще неду́жныя. Он же исцеля́ше я́, бе́сы изгоня́ше, и разсла́бленыя возставля́ше. Толи́ку же благода́ть даде́ ему́ Бог, я́ко ве́дати и помышле́ния челове́ческая. Уве́дав бо еди́наго сто́лпника, я́ко хо́щет сле́зти со столпа́, и труд свой погуби́ти, и написа́ к нему́ гра́моту и посла́ со львом. Лев же прине́с на столп вскочи́в, пове́рже пред ним гра́моту. И та́ко утверди́ся не ле́зти со столпа́ до конца́. Святы́й же Ани́н мно́га чудеса́ сотвори́, преста́вися к Богу в ве́чный поко́й.

Гоне́нию у́бо подви́гшуся на христиа́ны в Никомиди́и, вся христиа́ны хвата́юще, держа́ху в темни́цах. Та́же судя́ще их со мно́гими испыта́ньми, и разли́чными му́ками, пребыва́ющих во испове́дании Христа́ Бо́га на́шего, живота́ лиша́ху. Во вре́мя же о́но сия́ свята́я м́ученика Трофи́м и Евка́рпий си́льнейша су́ща, и дерзне́йша в во́инстве, того́ ра́ди и соверше́на врага́ Христо́ви обрето́стася, е́млюща христиа́ны, и в темни́цах затворя́ста, я́ко вся́ку власть над ни́ми прия́ста, и я́же хотя́ста му́часта, ине́х же оставля́юща. Не́когда же си́ма иду́щима, не́которыя хвата́юща, ви́деста огня́ горе́ние ве́лие вкорене́но сходя́щее с небесе́ к ни́ма. И глас слы́шашеся та́мо глаго́лющь: Почто́ тщи́тася претя́ще Мои́м рабо́м? Не льсти́тася, не и́мать кто возмощи́ е́же облада́ти в Мя ве́рующым: но па́че у́бо прилепи́тася им, и приобре́сти и́мата Ца́рство небе́сное. Таковы́й у́бо глас я́ко услы́шаста свире́пая и суро́вая е́же на Христо́вы рабы́ наска́кающа, и падо́ста по земли́, ниже́ виде́ния могу́ща зре́ти, ниже́ гро́мнаго о́ного гласа могу́ща терпе́ти. Сия́ же то́чию лежа́ща глаго́ласта: Пои́стинне вели́к есть Бог явле́йся нам днесь. Блаже́нна у́бо будема а́ще раба́ Его́ обря́щемася. И я́ко такова́я со стра́хом глаго́ласта, раздели́ся о́блак он, и ста сю́ду и сю́ду. И а́бие други́й от него́ изы́де глас глаго́лющь: Воста́нита и пока́йтася, и оста́вятся вам прегреше́ния ва́ю. И воста́ста ви́деста посреде́ о́блака не́коего белообра́зна седя́ща, зело́ ле́па, и мно́го мно́жество тому́ предстоя́ща, и о взо́ре удиви́стася. И реко́ста я́ко еди́нема уста́ма: Приими́ на́ю, я́ко лука́ва суть на́ю прегреше́ния и неизрече́нна. И несть ино́го бо́га, ра́зве Тебе́ Соде́теля Еди́наго Бо́га су́ща И́стиннаго: и Твоя́ рабы́ не у́ позна́хома. Такова́ убо си́ма ре́кшима, а́бие о́блак во еди́но соступи́вся, взы́де на не́бо. Сия́ же мно́го пла́каста, и Богу помоли́стася, возврати́стася. И ели́цех име́яста в темн́ице, всех со стра́хом осла́биста, я́ко бра́тию целу́юща и поклоня́ющася им: и у́зы им реша́ста, и провожа́ста я́, и идя́ху ко́ждо во своя́. Сия́ же уве́дав князь, нема́ле яря́шеся на нею́. И поста́ви я́ пред собо́ю, вопроша́ше вину́ уве́дети хотя́. Да я́коже си[я́] ви́деста виде́ние, вся́ко пото́нку испове́даста, повеле́ же я́ пове́сити на дре́ве, и ре́бра ею́ строга́ти: та́же власяны́ми у́жы те́рти ею́ по ра́нам. Свята́я же до́блествено му́ки терпя́ста, и моля́стася веселя́щася и благодаря́ща Бо́га. Тем и кня́зя в вели́кую вражду́ подвиго́ста. И повеле́ огнь вели́к вжещи́, и та́мо святу́ю воврещи́: и тому́ бы́вшу, во огнь свята́я вше́дша, и свята́я своя́ душа́, в ру́це Бо́жии преда́ста, сла́вяща Бо́га. И та́ко муче́нию коне́ц восприя́ста.

Стихи́:

В Вы́шних Тебе́ я́дра Оте́ческая но́сят,

До́лу же жребя́. О́ коли́ко и ка́ко!

Ко́ея де́ля вины́ бы́хом самовла́стни, слы́шите: И́мже то Влады́це Христу́ лю́бо есть, да бы́хом Его́ изволе́нием на́шим люби́ли, и во́лю Его́ твори́ли, а не ну́ждею. И ты бо не тогда́ раба́ тебе́ прия́тна твори́ши, егда́ его́ связа́в во око́вех держи́ши, но егда́ он свое́ю во́лею прия́ет, и лю́бит тя. И сам бы не хоте́л ты, да раба́ связа́в держи́ши, но сам он зло себе́ твори́т безу́мием свои́м. То кольми́ па́че Бог не хо́щет на́шея зло́бы, и не престае́т уча́ нас святы́ми кни́гами и проро́ки. Поне́же и Сам Единоро́дный Сын Бо́жий воплоти́ся, могл бы у́бо вся погуби́ти согреша́ющыя к Нему́, и уклоня́ющыяся от Него́. Но то Ему́ в любо́вь есть, е́же во́лею коему́ждо нас прилепля́тися Ему́. Того ра́ди и му́ку пропове́дал, и ца́рство обеща́л, да е́же изво́лим себе́, или́ рай, или́ му́ку: самовла́стни бо Бо́гом сотворе́ни есмы́, или́ спасе́мся, или́ поги́бнем во́лею на́шею. Мно́зи бо глаго́лют: ро́дом есмы́ гневли́ви, или́ блу́дни, да не мо́жем удержа́ти себе́ в сих. Рцы ми у́бо: А́ще бу́деши кра́дяй, или́ блуд творя́й, и у́зриши кого́ иду́ща, не рече́ши: Ро́дом есмь тако́в, но вско́ре отбе́гнеши, и преста́неши зло́е творя́. Где у́бо есть, и́же от обы́чая изве́т предлага́ющий? Страх бо челове́ческ премени́ бытие́, кольми́ па́че Хотя́щаго суди́ти живы́я и ме́ртвыя Бо́га на́шего. Ини́и же глаголют: Я́ко ро́дом гневли́ви есмы́, и не мо́жем удержа́тися. Рцы ми, егда́ на раба́ госпо́дие гне́ваются, и бию́т, и словеса́ зла даю́т ему́, почто́ раб терпи́т и не отмщева́ет? Он убо человеку пови́нен терпи́т, мы же пови́нни Бо́гу. Да того́ ра́ди терпи́ бра́те доса́ды и укори́зны, а не отмщева́й себе́ возлюбленне. Преда́й Бо́гу оби́дящаго тя, и благо́е дей бию́щему тя, и Бо́га моли́ за него́. Разу́мный бо челове́к, а́ще ему́ случи́тся беда́, воспомина́я грехи́ кается, и Бо́гу мо́лится о них. Несмы́сленный же челове́к наказу́емь, не разуме́ет, и на Бо́га хулу́ прино́сит, свои́х не воспомина́ет злоб: и и́ны вино́вны твори́т, а сам не твори́тся что зло сотвори́в. А́ще у́бо ве́руете Бо́гу бра́тие, потщи́теся уго́дная Ему́ сотвори́ти: Ум бо коего́ждо, аще предста́нет к Бо́гу, раба́ и́мать те́ло: А́ще же кто лю́бит плоть, вся во́ли ея́ твори́т, и не насле́дит таковы́й Ца́рства небе́снаго, и не мо́жет спасти́ся. Нас же да сподо́бит Бог вся до́брая твори́ти дела́, и ми́лость получи́ти от Него́. Ему́же сла́ва, ны́не и при́сно, и во ве́ки веко́в. Ами́нь.