Стихи́:

Те́ло пове́рг я́ко ко́жу Артем́он,

Бежа́в, ничто́ име́я, преходя́ к небе́сным.

Сей блаже́нный, Селевки́ю оте́чество и град име́яше, в не́мже и роди́вся и воспита́вся. Блаже́нному же апо́столу Па́влу доше́дшу та́мо, не бе бо мо́щно свети́льник под спу́дом кры́тися, сего́ апо́стол па́стыря и учи́теля лю́дем поста́ви. Он же до́бре и богоуго́дне вруче́нную ему́ па́ству упра́вив, бысть все тре́бующым приста́нище спасе́ния. Вдов же и сиро́т, и ни́щих промысли́тель: и душ и теле́с врачь. В сих до́бре жи́тельствовав в ста́рости до́брей скончава́ет житие́.

Стихи́:

Всу́е храни́ши ка́мень, кустоди́е

Не и́мать содержа́ти гроб Саможиво́тнаго.

Не́кий презви́тер, прише́дый от острова Ки́прскаго, пове́да нам не́что сицево́ глаго́ля: Я́ко жена́ не́кая на волхвова́ния, и чародея́ния упражня́ющися, и от не́коего иного умолена бы́вши, е́же сотвори́ти свою́ хи́трость о не́коем, за е́же привлещи́ его́ к того́ во́ли. На зло же упражня́ющаяся она́, а́бие посла́ два бе́са к нему́, хотя́щи де́йствовати. Тии же скве́рнии бе́си ше́дше, па́ки возврати́шася безде́льни. Вопроша́еми же от на зло упражня́емыя рещи́ вину́. Они́ же ре́ша: я́ко под за́поведию такова́го обре́тше, ниже́ прибли́житися сме́юще. Бя́ше бо он испове́дався к предрече́нному презви́теру, и от него́ за́поведь запреще́ния прия́т, я́коже боже́ственная веля́т пра́вила. Та́же вопроша́ше от них жена́, во всех ли у́бо за́поведь иму́щих си́це случа́ется вам? Они́ же к ней реко́ша: Ни, но во о́нех то́чию, и́мже той презви́тер дае́т за́поведи, я́ко от Зако́на Бо́жия учи́т, и от писа́ний, и от них запове́дует: и сего́ ра́ди не сме́ем та́мо прибли́житися, но бои́мся Бо́жиих зако́н. Ели́цы же от себе́ уча́т, или́ за́поведи подаю́т, таковы́х не бои́мся ниже́ отбега́ем отню́д. Сия́ же от нечи́стых бесо́в жена́ слы́шавши, и наде́явшися на презви́терево учи́тельство, ско́ро прите́кши приступи́ к нему́, и я́же о себе́ вся испове́давши, взыска́ за́поведь. Презви́тер же я́коже се ми́луя ту, не возложи́ ей, я́же по зако́нех досто́йную за́поведь и пра́ведную. Она́ же моля́шеся глаго́ля: Не ми́луй мя отню́д, но по зако́ну Бо́жию суди́ ми, и боже́ственых писа́ний: сих бо испове́даша боя́тися бе́сове. Даде́ же ей за́поведь презви́тер, и отто́ле уцелому́дрися Христо́вою благода́тию. Сия́ пове́да той презви́тер, и́же о таковы́х иску́с прие́мый. Отто́ле у́бо презви́тер наде́явся и извести́в си, вку́пе же мно́жае и убоя́вся, опа́снейше от боже́ственых Писа́ний уча́ше же и запове́даше, а не по свое́й во́ли. Сия́ глави́зна согласу́ет и́же в патерице́ пи́саному о о́ном ста́рце, име́вшему отца́ иере́я и́дольскаго, и́же слы́шавшу от бесо́в, и от самого́ кня́зя их, о высоте́ и́ноческаго жи́тельства, и́же отто́ле наде́явся приступи́ ко и́ноческому житию́.

Благослове́н Бог Оте́ц, Госпо́дь Вседержи́тель, Творе́ц небесе́ и земли́, ви́димых же всех и неви́димых. Благослове́н Единоро́дный Сын и Сло́во Бо́жие, Безнача́лен же и Безле́тен от Отца́ роди́выйся: Бог от Бо́га: Мудрость О́тчая Ипоста́сная, и содержа́щая Си́ла, вся сотво́ршая. Благослове́н Уте́шитель Святы́й Животворя́щий Дух, от Отца́ исходя́й, и чрез Сы́на явле́ный челове́ком: Триипоста́сная ку́пно Единосу́щная Свята́я Тро́ица. И́же Сло́вом Свои́м сотвори́ всю тварь, и Ду́хом уст Свои́х всю си́лу их. То́йже и пе́рваго челове́ка от земли́ созда́, по Своему́ о́бразу сотвори́ его́, и сла́вою венча́в его́. И рай на восто́це насади́, и челове́ка в него́ введе́, поста́вив его́ царя́ всей тва́ри: и самовла́стием почте́ и́. И еди́ну за́поведь повеле́ храни́ти ему́. Да а́ще соблюде́т, жив бу́дет во ве́ки сла́вя Бо́га со а́нгелы: или́ преступи́в, сме́рти и тли преда́стся. Сове́тник же всему́ злу диа́вол, и зави́стник всему́ добру́, возревнова́в ему́ свои́м неи́стовством, научи́ его́ преступи́ти за́поведь Бо́жию. Да того́ ра́ди изри́ну его́ Бог из рая́: рек ему́: де́лай зе́млю, и в по́те лица́ твоего́ да я́си хлеб твой, и сме́ртию у́мреши, я́ко земля́ еси́, и в зе́млю па́ки по́йдеши. И отто́ле бра́тие вни́де в ны печа́ль и смерть. Да того́ ра́ди сни́де к нам Госпо́дь Бог наш Иису́с Христо́с, того́ о́браз обнови́ти хотя́ истле́вший преступле́нием, плоть на́шу на ся восприи́м. Показа́ нам путь к первой жи́зни, по нему́же иду́ще вни́де в ту́южде поро́ду. Се же есть пока́заный путь нам: чистота́, кротость, смире́ние, любо́вь, пра́вда, ми́лостыня, воздержа́ние, покая́ние, и поще́ние. Покая́нием бо и поще́нием и ми́лостынею, отъи́мутся вси греси́.

Потре́бно же есть ве́дати и сие́: я́ко в сий день, предпра́зднство Благове́щения Влады́чицы на́шея Богоро́дицы, и при́сно Де́вы Мари́и. Да собере́теся в це́рковь на у́треню, а в шесты́й час на Литурги́ю, и потщи́теся до́брыя де́тели твори́ти: па́че же в сия́ дни святы́я. Си́и бо суть дни, Бо́́гом уста́влени, на очище́ние душа́м и телесе́м: да не подоба́ет их ле́ностию, или́ злы́ми де́лы провожда́ти. Зла́то бо а́ще погуби́т челове́к, или́ и́но что, па́ки то́чно тому́ обря́щет: вре́мя же сие́ погуби́вше, ина́го не обря́щем, тле́нно бо есть. Те́мже да не мо́жем его́ жестосе́рдием провожда́ти: но со тща́нием подви́гнемся, и вся убеди́м на моли́тву. Ле́ность оттрясе́м, и по́хоти умертви́м, за́висть попре́м, гнев отве́ржем, мир же во́змем. Да и к нам рече́т Человеколю́бец Госпо́дь: по ве́ре ва́шей бу́ди вам. И вся до́брая проше́ния прии́мем, моля́щеся Христу́ Бо́гу на́шему. Ами́нь.

Землена́я вся отве́ргше зла́я смышле́ния, прииди́те услы́шим духо́вная уче́ния: и размы́слите ка́ко зло твори́м? Христо́с бо со́зданы, и хоте́ а́нгелы сотвори́ти ны, но мы са́ми в зве́ри прелага́емся. Е́же бо безчи́нно жи́ти, и рабо́тати мамо́не непра́ведному, ре́кше мно́гая име́ния собира́ти, то звере́й безсы́тство. А е́же велича́тися, и ино́го укаря́ти, и оби́дети, и кра́сти, и лга́ти, то не челове́ческо, ниже́ зве́рско, но бесо́вско де́ло и хоте́ние: ти́и бо соблажня́ют, да бы им не еди́нем му́чимым бы́ти. Ино́го повожда́ют на клевету́, а ино́го на за́висть: иного на блуд ласка́ют, и на я́рость уча́т, и на гнев и на го́рдость. А ино́го ску́постию помрача́ют, и на грабле́ние и на разбо́й и на пия́нство устреля́ют. А ино́го на кощу́ны и пе́сни сатанины́, на плеска́ние и на гуде́ние, и на пляса́ние уча́т, е́же всех игра́ний прокля́тее есть, многоверти́мое пляса́ние, зане́ отлуча́ет челове́ки от Бо́га, и во дно а́дово сво́дит: Пля́шущая бо жена́ неве́ста нарица́ется сатанина́, и любоде́йца диа́воля, и супру́га бе́сова: не то́кмо бо сама́ бу́дет сведена́ во дно а́дово пля́шущая, но и ти́и и́же ея́ с любо́вию позо́руют, и в сласте́х разжиза́ются на ню с по́хотию, прельща́ющи и святы́я му́жи пляса́нием, я́коже Ироди́я И́рода. Пля́шущая бо жена́, мно́гим муже́м жена́ есть, и то́ю диа́вол мно́ги прельсти́т во сне и на я́ве. Вси лю́бящии пляса́ние, со Ироди́ею в негаси́мый огнь осудятся. Гре́шно бо есть и скве́рно и ска́редно и своему́ му́жу с таково́ю жено́ю совокупля́тися. Я́коже и пи́шет: седо́ша бо рече́ лю́дие я́сти и пи́ти, и бы́ша сы́ти и пия́ни, и воста́ша играти пляса́нием. И по пляса́нии блуд нача́ша твори́ти с чужи́ми жена́ми и с сестра́ми. И пото́м прситупи́ша ко и́долом, и нача́ша же́ртву приноси́ти им. И в том часе́ разсту́пльшися земля́, пожре́ их две тме, и три ты́сящи. Се о́браз муче́ния показа́ всем согреша́ющым, и не творя́щым во́ли Божии. Того́ ра́ди бра́тие и сестры́ блюди́теся, и не люби́те беззако́нных игра́ний бесо́вских. Па́че же удаля́йтеся пляса́ния, да не зле в му́ку ве́чную осужде́ни бу́дете. Бо́гу на́шему сла́ва, ны́не и при́сно, и во ве́ки веко́в. Ами́нь.