Стихи́:

Страстну́ю пучи́ну преплы́вши Пелаги́я,

И си сугу́бь пла́ванию, те́ло вда́вши огню́.

Сия́ бя́ше при Диоклитиа́не царе́, и слы́шавши е́же о Христо́ве ве́ре, и и́щуши уве́дети какова́ есть. И ви́де во сне епи́скопа креща́юща. Пущена́ же бы́вши е́же ити́ к пита́тельнице. Она́ же по́йде к епи́скопу, и́же и боже́ственым манове́нием прия́т, и крести́ ю́. Да я́ко услы́ша обру́чник ея́ сын царе́в, вся́кою стра́стию обло́жься, рачи́тельства и любве́ де́ля, сам себе́ уби́. Оте́ц же его́ Диоклитиа́н приведе́ к себе́ Пелаги́ю, и невозмо́г преложи́ти ю́ от ве́ры Христо́вы. И пото́м юне́ц ме́дян разже́г, и вонь святу́ю повеле́ воврещи́, иде́же ку́пно кончи́ну и вене́ц испове́данию восприя́т. Соверша́етжеся муче́ние ея́ и собра́ние об он пол близ свята́го му́ченика Ко́нона.

Ера́зм блаже́нный, измла́да Христа́ возлюби́в и за́поведи Его́ храня́. И поста́влен бысть епи́скопом во гра́де Фермиа́се. Нечести́вый же царь Диоклитиа́н, смяте́ гра́ды му́ча христиа́ны. Святы́й же Ера́зм оста́вль престо́л, и бежа́ в го́ру Лива́н, и пребы́сть седмь лет кры́яся. И бысть ему́ с небесе́ глас а́нгельский: «О́ Ера́зме, никто́ же спя победи́т враги́. Иди́ во град свой, и до́бре подвиза́йся, и прии́меши вене́ц». Иду́щу же ему́, усрето́ша его́ во́ини, и вопроси́ша его́: «Ко́его бо́га чте́ши?». Ера́зм же христиа́на себе́ испове́да. Тогда́ е́мше и́, приведо́ша его́ во Антиохи́ю к Диоклитиа́ну. И вопроше́н быв, и христиа́на себе́ испове́да. И повеле́ царь би́ти его́ же́злием. Святы́й же укори́ его́. Посе́м повеле́ би́ти его́ шелы́гами оловя́ными. И я́ко не покори́ся, скобелми́ желе́зными острога́ша все те́ло его́. Посе́м развари́ша смолу́ и се́ру, и возлия́ша на те́ло свята́го, и ника́коже прикосну́ся ему́. Мучи́тель же повеле́ его́ воврещи́ в темни́цу обложи́в желе́зы тя́жкими. А́нгел же Госпо́день отве́рзе ему́ темни́цу, и разреши́ свята́го, и рече́ ему́: «Восле́дуй ми, да веду́ тя во Иттали́ю, да и та́мо мно́ги спасе́ши». И приве́д его́ во град Лики́й, и оста́ви его́ ту. И уча́ вся крести́тися, и чудеса́ творя́ше вели́ка. Воскреси́ же ту сы́на Анаста́сиева му́жа сла́вна. И крести́шася от него́ де́сять ты́сящь люде́й. И слы́ша о нем Максимиа́н, посла́в приведе́ его́ во Иттали́ю, и повеле́ би́ти его́ по лани́тома, и преща́ше ему́ распя́тием, а́ще не пожре́т бого́м. И рече́ Ера́зм: «Где суть бо́ги твои́, да пожру́ им?». И ведо́ша его́ во храм Ди́ев. Святы́й же моли́твою сокруши́ вся и́долы. И изы́де из ка́пища огнь и попаля́я неве́рныя. И бежа́ от гра́да Максимия́н. И мно́ги крести́в ту святы́й, и отъи́де во град Фирми́йский. И та́мо ят его́ Максимиа́н, и повеле́ его́ облещи́ во броня́ ме́дяны, и посади́ти его́ на одре́ разже́не. И пригвозди́ша но́ги его́ к земли́, и окладо́ша дро́вы его́ до верха́, и заже́гше дрова́, и возлива́ху смолу́ и ма́сло, и разгоре́шася дрова́ и изгоре́ша. Святы́й же неврежде́н бысть. И убоя́ся Максимиа́н люде́й, бежа́ в пола́ту. А́нгел же Госпо́день пое́м Ера́зма, и приведе́ его́ во град Фермиа́н. И моли́тву сотвори́ за вся, предаде́ ду́шу свою́ в ру́це Бо́жии. И погребе́н бысть че́стно правове́рными.