Стихи́:

Зве́ря го́рькаго угрызе́нием Гликерия,

Я́ко сладка́ су́щи и́стинны и бя́ше мед:

В тринадеся́тый угрызе́нием уби́ зверь Глике́рию.

Сия́ бя́ше во времена́ Анто́ния царя́, и Сави́на иге́мона, в Трая́не гра́де. Жру́щу у́бо иге́мону и́долом: сия́ написа́вши на челе́ свое́м честны́й Крест, изы́де пред иге́мона, и христиа́ну себе́ и рабу́ Бо́жию именова́вши. Иге́мону же моля́щуся ей пожре́ти и́долом. Вше́дши же ей в це́рковь, и помо́льшися Бо́гу, низложи́ Ди́ево тре́бище и сотре́. Бы́вшии же та́мо е́ллини, ка́мение поверго́ша на ню, и я́ша ю́. И пове́шена у́бо за власы́, и стро́гана. Та́же в темни́цу вве́ржена, и не да́ти ей я́сти за мно́ги дни повеле́но бысть. Иде́же от а́нгела приима́ше пи́щу, ника́коже страда́ше, я́ко мне́тися иге́мону гла́дом ея́ осла́бити. Чу́до же прия́т иге́мона и су́щых с ним, обре́тше в темни́це пред не́ю опани́цу со млеко́м, и хлеб, и во́ду, тве́рде узи́льнице затворе́не. Посе́м в пещь о́гненую вве́ржена. Сше́дшу же свы́ше дождю́, и угасе́ огнь, и изы́де из пещи́ невреди́ма. К си́мже, одра́ша ко́жу ей главну́ю да́же и до чела́, и связа́вши ей ру́це и но́зе, и ка́мению в темни́це подсы́пану, и на нем просте́рта бы́вши. Иде́же а́нгельским явле́нием от уз разреши́вшися, и глава́ ей оздраве́, я́ко ужаси́ти и темни́чнаго стра́жника: и́же и Христа́ испове́дав, главу́ ему́ отсеко́ша. Свята́я же к иге́мону приведена́ бы́вши, и звере́м вдана́ бысть, и́же еди́ному косну́вшуся ей, я́ко нико́ему нагрызе́нию бы́ти ни ра́ны ни я́звы. И та́ко Бо́гу дух предаде́, и положена́ бысть во Иракли́и Фраки́йстей.

Стихи́:

И́же к Павсика́ковем моще́м притече́т,

Страсте́й злых поко́й обрета́ет безстра́стен.

Сей блаже́нный оте́чество имя́ше Апами́ю. Роди́теля же от наро́читых и благоро́дных, и и́стинней ве́ре христиа́ньстей прилежа́щих. В воспита́нии же едина́чее юн сый, посту́ си́лному, и моли́тве, и про́чему жесто́кому житию́ себе́ вдав. Тем и по́стническое житие́ восприе́м, и пита́емь хле́бом ма́лым и водо́ю, и к начина́нию враче́вствия прише́д. Телеса́ же ку́пно и ду́ши уврачева́я, и на бесы́ себе́ вво́инив, отдале́че их отгоня́я, слепы́я просвеща́я, слуки́я исправля́я, и и́ная пресла́вная соверша́я чудеса́. И явле́наго ра́ди слу́ха су́щаго, первопресто́лнику Константи́ня гра́да опове́дан быв, подви́жник ди́вный. И́же а́бие того́ Це́ркви сина́дстей вручи́в и посла́ его́. Он же слове́сною праще́ю во́лки церко́вныя отгна́в, и слове́сным сече́нием, я́ко гни́ла удеса́ ссек, и вон измета́я, а́ки не́кий вред здра́вому исхода́таившу. Сей та́ко о свое́й па́стве тве́рдо прилежа́, и спасе́ния пода́в врачевство́. В Константи́нь град прише́д, и Маврики́ю царю́ от содержа́щия его́ страсти́ целбу́ пода́в. Умоле́ную дань е́же есть зла́то ли́тра еди́на, ко́ граду его́ с печа́тию злато́ю посла́вшу. Иду́щу же свято́му к Сина́ду, и в Сило́не бы́вшу, воде́ моли́твою искипе́ти сотвори́, жа́жду со путь ше́ствующым утоли́в. Та́ко до́бре у́бо и боголюбе́зне пожи́в, и мно́гим во спасе́ние быв пре́йде от жития́, и к возлю́бленному от него́ Бо́гу отъи́де.

Стихи́:

Се́ргие, ка́ко изы́де от жития́?

Лю́тою кончи́ною умро́х и и́сполу жив есмь.

Гео́ргий во святы́х му́ченик и испове́дник Христо́в, в Константи́не гра́де роди́ся. И бе у́бо, покланя́яся честны́м ико́нам и почита́я я. И ят быв от иконобо́рец. И предста́ беззако́нному царю́ Фео́филу. И ну́димь бе отврещи́ся Христа́ и святы́х ико́н покланя́ния, о́во преще́нием, о́во ласка́нием, и не повину́яся. Зане́ внима́я си, я́ко ме́рзска суть, и бляди́ва словеса́ мучи́телева. И рече́, подоба́ет кла́нятися честны́м ико́нам и чти́ти я вся́кому християни́ну ве́рну. Я́ко честь их прехо́дит на пе́рвый о́браз. И возложи́ша у́же на ши́ю его́, и влачи́мь бе по у́лицам я́ко злоде́й. Посе́м вве́ржен бысть в темни́цу, и обнаже́н и разгра́блен всего́ бога́тьства, и с жено́ю свое́ю Ири́ною и со ча́ды поточе́н бысть, иде́же мно́ги ско́рби претерпе́, ра́дуяся ко Го́споду отъи́де.

Стихи́:

Ра́вно твое́ страда́ние, Иракли́е,

К мечу ́стра́сти покрыв́ает вся Иракли́еви:

Виждь Венеди́ме своего́ Павли́на посе́чена,

И ты с ним ку́пно посе́чен быв.

Си́и святи́и му́ченицы Иракли́й, и Павли́н и Венеди́м, во афини́йстем бы́ша гра́де су́ще христия́не. И Христа́ пропове́даху со дерзнове́нием, и идолослужи́телем у́бо повелева́юще крести́тися, во и́мя Отца́ и Сы́на и Свята́го Ду́ха. И того́ ра́ди я́ты бы́шя и пре́дани кня́зю афини́йскому. И пред ним испове́дашя Бо́га и́стиннаго и Творца́ тва́рем. И́долы же, ка́мение и дре́во хи́тростию сотворены́. И му́чени бы́шя разли́чными му́ками. Последи́ же со ученики́ свои́ми в пещь о́гнену вве́ржени бы́шя и сконча́шася, восприя́шя венцы́ нетле́нныя. И та́ко пострада́ша за Христа́ Бо́га на́шего.

Стихи́:

Низложи́в Ники́фор бесо́вския полки́,

Изы́де де́лом к Бо́гу Ники́фор.

Стихи́:

Му́жу святи́телю мече́м главу́ отсече́,

Страждбу́ сопря́гшу ку́пно со святи́тельским.

Стихи́:

Наскоре́е Дух, и возможе́нию, явля́ет естество́,

Го́лубь дре́вле ни е́же огнь ви́ден бысть.

Страх Бо́жий отго́нит вся́ку зло́бу, а ле́ность отго́нит страх Бо́жий. Плене́ние же грехо́вное отго́нит лу́чшыя нра́вы и до́брыя.

Четы́ре нра́вы добры́ ко спасе́нию суть: е́же храни́ти за́поведи Бо́жия, смире́ние уму́, боя́знь язы́ка своего́, те́сность жития́. Четы́ре суть нра́вы и́же снабдя́т ду́шу: ми́лость е́же ко всем: негне́ватися от забве́ния: терпе́нию внима́ти, и не осужда́ти никого́же: моли́тися на всяк час припа́дая к Бо́гу, безпреста́ни в се́рдцы свое́м, и твори́тися гре́шну па́че всех. Четы́ре нра́вы помога́ют но́вому подви́жнику: поуче́ние по вся часы́, бде́ние без ле́ности, послуша́ние ко всем, и молча́ние. Четы́рми де́лы душа́ оскверня́ется: грехи́ ме́рзскими: и любосла́вных любле́нием: изли́шним яде́нием, и мно́гим сном: ри́зным украше́нием. Четы́рми де́лы те́мен быва́ет и́ноку ум: не́навистию к дру́гу, рве́нием, похуле́нием, злосло́вием. Четы́рми делесы́ воздви́жется блуд и́ноку: яде́нием до сы́тости, несы́тостным спа́нием, пра́здными бесе́дами, и е́же уче́нием многосло́вным твори́тися му́дру. Четы́рми делесы́ воздви́гнется и́ноку гнев: и́же в ми́ре живу́щым дая́ти и взима́ти, сотворе́нием своея́ во́ли: и и́же учи́ти всех: и мне́тися самому́ му́дру: и е́же люби́ти сла́витися от челове́к. Четы́рьми делесы́ пуста́ быва́ет душа́ и́ноку: немолча́нием, труда́ нелюбле́нием, хоте́нием плотски́м, и ску́постию. Четы́ри суть нра́вы, и́же снабдя́т ду́шу челове́ку: ми́лость ко всем, не гне́ватися, терпе́ти, и не осужда́ти никого́же. По четы́рем образо́м всяк грех быва́ет: пе́рвое по неве́жеству, второ́е по напра́сньству, тре́тие по ну́жди, четве́ртое по любви́.

Толкова́ние: Пе́рвое по неве́жеству, е́же от просты́ни неуче́ный отню́д челове́к за ме́лину ума́ его́, а́ще сотвори́т грех, и поразуме́ти о нем. Второ́е же по напра́снству, ре́кше в часе́ вре́менне: внеза́пу а́ще сотвори́т челове́к грех, а пре́жде ни по́мыслом не проуча́лся, сему́ суд и ми́лость. Тре́тие же и́же по ну́жди, и́же бедо́ю нево́льною приклеще́н, а́ще сотвори́т грех, сему́ казнь с ми́лостию. Четве́ртое же по любви́, а́ще сотвори́т грех, а пре́жде греха́ хоте́л во уме́ и прои́скивал, и сотвори́л его́ с любо́вию, и по гресе́ то же па́ки мы́слит, и коли́ко вре́мя а́ще та́ко пребу́дет нека́яся, се есть тя́жкий сме́ртный грех. Сему́ по пра́вилом церко́вным казнь, ре́кше епитемия́.

Мно́гих бо ра́ди вин быва́ет се искуше́ние от дия́вола во сне. Пе́рвое, от е́же осужда́ти бра́та своего́, се есть грешно́ вельми́. Второ́е, е́же от го́рдости и от высокоу́мия, и то та́коже грешно́. Тре́тие от объяде́ния и пия́нства. Четве́ртое от естества́, е́же есть безгре́шно у́бо, но оба́че скве́рна имену́ется, или́ ве́щию излива́ется без двиза́ния и без мечта́ния. Пя́тое же от сла́бости теле́сныя и боле́зни не́кия. Шесто́е от за́висти бесо́вския.

И сия́ у́бо разделя́ются разсуди́тельными святы́ми отцы́, пе́рвое у́бо, преста́ти от осужде́ния и ине́х злых дел, и пока́ятися со испове́данием и слеза́ми, и не вы́ситися в не́коих исправле́ниих, ни го́рдостию взима́тися: зло бо се есть вельми́, поне́же и бес высокоу́мия ра́ди отпаде́ сла́вы Бо́жия. А е́же объяда́тися и упива́тися и́ноку, и по мирски́м ча́сто ходи́ти без чи́на, и спа́ти дово́льно, вели́к студ прино́сит. Но подоба́ет ему́ не преслуша́тися наста́вника своего́, и скве́рныя своя́ по́мыслы испове́довати отцу́ своему́ духо́вному, и со стра́хом Бо́жиим смотри́ти свои́х грехо́в, и име́ти пред очи́ма смерть. Коне́ц же всему́ тому́, а́ще о ком очи́ма что ви́диши, и уши́ма слы́шиши, рцы: Чему́ то мне е́же суди́ти бра́ту, я́ко аз бо́ле всех гре́шен есмь. Бо́гу на́шему сла́ва, ны́не и при́сно и во ве́ки веко́в. Ами́нь.