Стихи́:

Пахо́мие истончи́ страсть плотску́ю,

Душе́вный тук собра́ преди́ ше́ствия:

В пятнадеся́тый Пахо́мия ме́ртва поя́ша.

Преподо́бный оте́ц наш Пахо́мий, бя́ше от Еги́пта, Фиваи́ды до́льния, во времена́ Константи́на вели́каго царя́. Бя́ше же сын роди́телей кла́няющыхся и чту́щых и́долы. С ни́миже иды́й в це́рковь и́дольскую, слы́ша ю́ношу к роди́телем его́ ре́кша: «Возми́те бого́в на́шых врага́ отсю́де, и прожени́те и́». И бе́су же у́бо я́коже обы́чай бя́ше ему́же же́ртвы приноша́ху, проуве́девшу бу́дущую свято́му доброде́тель. И егда́ от вина́ же́ртвенаго пив преподо́бный, а́бие изблева́ его́. Приспе́вшу же к во́зрасту, вои́нскому сослове́сию учине́н быв. И вма́ле во́инство оста́вль, отъи́де в го́рнюю Фиваи́ду. И а́бие тогда́ восприя́т и́же во Христа́ креще́ние. И во и́ноческое житие́ облече́ся, и к пусты́ни потече́, иде́же по не́которому воображе́нию совхо́дному, свы́ше ему́ глас до́йде, иде́же пребыва́лищу ме́сто объяви́. И мно́жеству и́нок к нему́ сше́дшымся, потче́ монасты́рь. В то же вре́мя я́ко мно́гим сте́кшымся, прии́де и Фео́дор Освяще́нный, и бысть ему́ учени́к: и поревнова́ е́же по доброде́тели житию́ его́, и в чудесе́х его́ просия́. И толи́ко в безстра́стие возведе́ себе́ к боговиде́нию, я́ко и возше́ствия блаже́нных душа́ мы́слено прозира́я, и да́льняя я́ко бли́жняя ви́дети, и о бу́дущых веща́ти. Пре́жде же отше́ствия его́ от жития́, число́ мних мно́жество иму́щу ему́, и́же прише́дше к нему́ в пусты́ни бы́ти муже́й я́ко ты́сяща и четы́ре ста. И́же и я́ве я́ко боже́ственый не́кто бя́ше, и в доброде́телех несведо́мь, не о пи́щи внима́я, ниже́ о телеси́ пеки́йся. К нему́ же мно́зи с ра́достию прихожа́ху оставля́юще своя́. Но воздержа́нию и кре́пости трудо́в и нра́ву му́жа дивля́хуся, и во пло́ти а́нгельскому житию́. Я́коже рещи́ ревнова́ти и о́нем, и подо́битися любви́ его́. Сконча́вжеся о Христе́, и в той оби́тели положи́ся.

Стихи́:

Пропове́дует Лари́са рече́нная ти стра́нная,

И по́мен иму́щи по твое́й сме́рти о́тче.

Сей бя́ше в ца́рство Константи́на вели́каго благочести́ву роди́телю о́трасль. И́же и вдав себе́ благочести́вому и благоче́стному соверше́нию, со вне́шними уче́нми и вы́шнему мудролю́бию себе́ наказа́в. Вся́кими е́же по Бо́зе жи́тельствы себе́ украси́в, и архиере́й вторы́я Фетали́и и лариси́йския, е́же о всей Елла́де живу́щых поста́влен бысть. И в Нике́и вели́цем собо́ре быв, А́рия и и́же с ним низложи́в. И па́ки в Лари́су прии́де, и це́рькви мно́ги и́дольския разори́в, и бе́сы от челове́к прогна́, и ина́я премно́гая соде́ла чудеса́. И церко́вныя до́мы от основа́ния воздви́г, и вся́чески украси́в. И с ми́ром житие́ оста́ви.

Стихи́:

Привя́зан Петр посреде́ колеси́,

Живот́ная мимои́де колесе́ непостоя́ннаго.

Стихи́:

Три сокруши́ша вереи́ тве́рдо и ка́мение,

Па́вла, Диони́сия, Андре́я, ка́мением.

Сей у́бо блаже́нный Иса́ия бя́ше от земли́ Ру́сския, от о́бласти Ки́евския рожде́ние и воспита́ние име́. От ю́ныже версты́ мир оста́ви, и Христа́ возлюби́. И прии́де в Пече́рский монасты́рь и́же в Ки́еве, и та́мо прия́ и́ноческое житие́. И всех до́лу влеку́щых и тле́нных страсте́й ми́ра сего́ отве́ржеся. И сожи́тель бысть, и во всех подража́тель преподо́бному Феодо́сию. И превосхо́дит всех ту посто́м и моли́твою и все́ми доброде́тельми. И в телеси́ у́бо я́ко а́нгел явля́ется терпе́нием му́жества своего́. И стра́сти теле́сныя победи́в мно́гим воздержа́нием. И небе́сному Царю́ Христу́ во́ин непобеди́м яви́ся. Посе́м блаже́нный оте́ц нашь Феодо́сий Пече́рский по проше́нию благове́рнаго кня́зя Изясла́ва, сы́на вели́каго кня́зя Яросла́ва посла́ на игу́меньство в монасты́рь свята́го Дими́трия, в ме́сто Варла́ма игу́мена. Варла́му же игу́мену тогда́ ко Го́споду отше́дшу. Святы́й же Иса́ия прии́де в монасты́рь свята́го Дими́трия на игу́меньство, и вда себе́ на бо́лший по́двиг, и бра́тии быва́ет и́стинный па́стырь и наста́вник во всем. И посе́м избра́нием Свята́го Ду́ха, поста́влен бысть гра́ду Росто́ву епи́скоп от митрополи́та Иоа́нна, в ле́то шестьты́сящь пятьсо́т о́смьдесят пя́тое. И прии́де на свой престо́л блаже́нный Иса́ия в Росто́в, и та́мо ви́де лю́ди новокреще́ны еще́ и не утверже́ны в ве́ре, и безпреста́нно уча́ше лю́ди ве́ре Христо́ве, и про́чим доброде́телем. И па́ки же обходя́ и про́чыя гра́ды и ме́ста и́же в росто́встей и су́ждальстей земли́, и неве́рных приводя́ к ве́ре Христо́ве, и креща́ше я во и́мя Отца́ и Сы́на и Свята́го Ду́ха. А иде́же обрета́ше и́долы, то вся огню́ предава́ше. Ни́щим же и вдови́цам и бе́дным засту́пник и пита́тель бя́ше. Посе́м прии́де святы́й из Росто́ва на освяще́ние це́ркви пече́рския Пречи́стыя Богоро́дицы, честна́го Ея́ успе́ния а́нгелом зван бысть. Иоа́нну бо свято́му митрополи́ту в вели́це печа́ли бы́вшу, я́ко приспе́ вре́мя освяще́нию це́ркве пече́рския, и не бя́ше с ним ни еди́наго епи́скопа на освяще́ние, поне́же разстоя́ние ме́стом су́що на дале́че. И бысть я́коже на погребе́нии святы́я Богоро́дицы апо́столи на о́блацех соноси́ми бя́ху, та́коже и на освяще́ние це́ркве пече́рския, снидо́шася вси епи́скопи я́ко на о́блацех. Митрополи́т же Иоа́нн почуди́ся вельми́ о сем чудеси́, я́ко николи́же посла́л бя́ше по епи́скопы. И посе́м митрополи́т и вси епи́скопи вку́пе освяти́шя це́рковь, и Литурги́ю соверши́вше, и разыдо́шася вси ко́ждо во своя́ си. И до́бре упасе́ ста́до Христо́во святы́й слове́сных ове́ц поруче́нное ему́. И к Бо́гу преста́вися Его́же и́змлада возлюби́ в ве́чный поко́й, в ле́то шестьты́сящь пятьсо́т де́вять десят седмо́е. На второ́е ле́то по освяще́нии це́ркви пече́рския, ме́сяца ма́ия, в 15 день. И погребе́но бысть честно́е те́ло его́ в це́ркви святы́я Богоро́дицы во гра́де Росто́ве.

Бысть у́бо сей блаже́нный о́трок Елеаза́р, от вели́каго о́строва Руси́и, ме́жду се́вера и за́пада, в ча́сти афе́тове, от полуно́щныя страны́, от богохрани́маго и вели́каго гра́да Пско́ва. Рожде́ние и воспита́ние име́, ве́си виделе́бския, я́же у́бо разстоя́ние иму́щи три́десять по́прищь от гра́да Пско́ва. А от ки́хже по пло́ти роди́тель роди́ся, не свем; Но еди́но вем, я́ко от благочести́ву роди́телю роди́ся духо́вным рожде́нием. Отца́ у́бо и́мя Бо́га И́же водо́ю и Ду́хом породи́ того́. Ма́терь же правове́рну, Це́рковь о́тчу. Тем и воспита́н бысть в до́бром испове́дании и наказа́нии. Та́же по вре́мени вдан быва́ет роди́телема свои́ма учи́тися боже́ственым кни́гам. И вско́ре не́како я́сно извы́че боже́ственая писа́ния, ели́ко мощи́ ему́ и толкова́нием глаго́лати, и ине́ми писа́нии боже́ствеными. И филосо́фскую му́дрость извы́че, я́ко и многоле́тным ра́зуму его́ диви́тися и похваля́ти. Не уклоня́шежеся на игра́ния ни на позо́ры, но па́че на прочита́ние боже́ственых писа́ний, и на церко́вное пе́ние. И нача́т воздержа́тися весма́, сла́дких отню́д не я́сти. Роди́теля же его́ ви́девша таково́е воздержа́ние о́трока, и глаго́лавша ему́, О ча́до на́ю, почто́ плоть свою́ оскорбля́еши таковы́м жесто́ким пребыва́нием, а на́ма печа́ль ве́лию твори́ши. О́трок же рече́, пи́сано бо есть роди́теля моя́, бра́шно у́бо и питие́ не предпоста́вит нас пред Бо́гом, но то́кмо пост и моли́тва и чистота́ теле́сная и воздержа́ние, то поста́вит пред Бо́гом. Посе́мже роди́теля его́ восхоте́ста бра́ку сочта́ти его́. Он же доброразсу́дный о́трок отто́ргнуся от роди́телю своею́ я́ко се́рна от тенета́. Роди́теля же его́ сотвори́ста мно́го взыска́ние о нем повсю́ду, с рыда́нием, и не обрето́ста сего́ блаже́ннаго нигде́же, но Бо́жия благода́ть храня́ше его́. Пома́леже отцу́ его́ преста́вльшуся от жития́ сего́. Ма́ти же его́ оста́ вдо́вьствующи. Но ми́лостивый Бог хотя́й всем челове́ком спасти́ся и в ра́зум и́стинный приити́, вложи́ и сему́ блаже́нному о́троку Елеаза́ру помышле́ние бла́го в се́рдце его́, ка́ко бы мо́щно спасти́ся и уедини́тися ми́ра. И в помышле́нии де́ло бысть, па́ки отхо́дит в монасты́рь, к рожеству́ Святы́я Богоро́дицы на сне́тную го́ру. Та́ко бо зово́мо ме́сто то, отстоя́ние иму́що от гра́да Пско́ва три по́прища, над вели́кою реко́ю. И от та́мо су́щаго игу́мена остриза́ет власы́ главы́ своея́. Вку́пе и до́лу влеку́щая мудрова́ния отве́рг, и а́нгельскому о́бразу сочета́ется. И нарече́но же бысть и́мя его́ Евфроси́н. Нача́т же воздержа́тися зело́ посто́м и бде́нием и моли́твами, и всено́щным стоя́нием. И бра́тии служа́ без ле́ности в пова́рни и в пека́рни, и во всех слу́жбах монасты́рьских, я́коже обы́чай име́яху. И всем на успе́х бысть и́же ту су́щей бра́тии. И пе́рвие всех обрета́шеся на пе́нии церко́внем, по́слеже исхожда́ше. Сла́ва же прохожда́ше о нем повсю́ду, доброде́телнаго его́ ра́ди жития́. Он же тя́жко си внят о сем, зане́ ненави́дя сла́вы от челове́к, и вменя́ше се бы́ти грех и студ. Попече́ние же имы́й е́же бежа́ти сла́вы, и пусты́нное и безмо́лвное житие́ обрести́, и еди́ному Бо́гу рабо́тати. Тем же и яви́ по́мысл свой отцу́ своему́ духо́вному. Оте́ц же ви́дев свята́го в доброде́телех цвету́ща, благослови́ его́, и рек ему́, иди́ ча́до с ми́ром, Госпо́дь да бу́дет с тобо́ю, и вразуми́т тя и наста́вит тя на благу́ю де́тель я́коже изво́ли. Блаже́нный же взем благослове́ние у отца́ духо́внаго, и отъи́де от оби́тели Пречи́стыя. И обхожда́ше ме́ста мно́га, иде́же бы мо́щно тому́ на еди́не безмо́лвствовати. Но па́че Бо́гу наставля́ющу его́, слы́ша о ме́сте том и́же над Та́лвою реко́ю, отстоя́ние иму́щи от гра́да Пско́ва два́десять пять по́прищь, иде́же ны́не монасты́рь стои́т благода́тию Христо́вою. И не́кими христолю́бцы от владе́тель ме́ста того́ зван бысть, па́чеже Бо́гу изво́лившу на ме́сте том просла́витися и́мени Его́ свято́му. И ту блаже́нный оте́ц всели́ся безмо́лвствовати на еди́не, я́коже рече́ боже́ственный проро́к, се удали́хся бе́гая, и водвори́хся в пусты́ню. Ча́ях Бо́га спаса́ющаго мя от малоду́шия и бу́ри. И на ме́сте том коли́бу себе́ водрузи́, и трудолю́бне в ней подвиза́ся посто́м и бде́нием и моли́твами, и всено́щным стоя́нием и на земли́ лега́нием, проти́ву неви́димаго врага́ ко́знем. И не́когда же свято́му отцу́ изше́дшу из коли́бы в год зно́я, и возле́гшу на земли́ хотя́ ма́ло почи́ти от трудо́в, и а́бие в то́нок сон преложи́ся святы́й, и ту яви́шася свято́му вселе́нстии учи́тели, Васи́лий Вели́кий, Григо́рий Богосло́в, и Иоа́нн Златоу́стый, указу́юще ме́сто свято́му воздви́гнути храм во и́мя их на ме́сте том иде́же святы́й живя́ше. Свято́му же воспряну́вшу от сна, и не ви́де никого́же. И в недоуме́нии бы́вшу ему́ о необы́чном виде́нии. Вре́мени же мно́гу мину́вшу, проуве́да о нем ма́ти его́ от не́ких челове́к, и взя потре́бная, до́йде ме́ста иде́же живя́ше блаже́нный над Та́лвою реко́ю. И прише́д к нему́, и нача́ моле́бныя гла́сы простира́ти глаго́ля, ча́до мое́ драго́е, уте́ши ста́рость ма́тере своея́, яви́ лице́ свое́ а́нгельское мне, да не сни́ду с печа́лию во гроб, иде́же и отцы́ на́шы. Святы́й же с ква́жнею уви́де ма́терь свою́, и позна́ ю, и глаго́ла к ней, О ма́ти моя́, не скорби́ отъи́ди отсю́ду, и не тружа́я ста́рости своея́. А́ще хо́щеши ви́дети зде, и ты во о́ном ве́це не у́зриши мене́. Но иди́ в мона́стырь, и спаса́я спаси́ ду́шу свою́. И та́ко не улучи́ жела́ния своего́, отъи́де от него́ скорбна́. И вни́де во еди́н от монастыре́й, и проводи́ дни своя́ в до́бром испове́дании и до исхо́да души́ своея́. Преподо́бный же оте́ц наш Евфроси́н до́бре и зело́ изря́дне житие́ поживе́, и преста́вися о Го́споде.

Сей благове́рный царе́вич Дими́трий, роди́ся от благочести́ваго ко́рене царя́ Иоа́нна, содержа́теля Ру́сския земли́, и́же от А́вгуста Ри́мскаго ке́саря ко́рене изше́дша. И ца́рствовавшу ему́ в пе́рвом сте осмори́чныя ты́сящи лет, от созда́ния ми́ра. И дово́льна ле́та жи́вшу, и ски́петры вели́каго господа́рства держа́вшу. И по Бо́жию изволе́нию, по о́бщему естеству́ челове́чу от жития́ сего́ преста́вльшуся, и в ве́чныя оби́тели отше́дшу. Сему́ же сы́ну его́ царе́вичу Дими́трию, по́сле отца́ своего́ ма́лу су́щу оста́вшуся, от рожде́ния своего́, ле́та еди́наго и пол. И прие́млет ца́рство по отце́ свое́м царе́ Иоа́нне сре́дний сын его́ царе́вич Фео́дор. И бысть царь кро́ток, и благочести́в и тепл ве́рою к Бо́гу, и вы́ну к Нему́ моли́твы своя́ творя́, о душе́вном свое́м спасе́нии, и о земно́м строе́нии, дабы́ душе́вное его́ благоро́дство бы́ло неповре́дно и ца́рство его́ ми́рно, и безмяте́жно, и по рече́нному вся такова́я соде́яшася. И даде́ бра́ту своему́ царе́вичу Дими́трию, во уде́л град У́глеч, да пребыва́ет та́мо и с ро́ждшею свое́ю: я́коже и бысть. И пребыва́ющу ему́ та́мо, в том уде́льном свое́м гра́де У́глече по осмоле́тному во́зрасту. И за́висти ра́ди сопроти́внаго, и властолю́бия челове́ческаго злохи́трым умышле́нием, и повеле́нием убие́н быва́ет от раба́ своего́, и властолю́бца Бори́са. И́же у́бо и сам пострада́, и всем лю́дем вели́ку тщету́ припода́. Но́ваго же сего́ вене́чника, и непови́ннаго страда́льца, царе́вича Дими́трия, не заба́ви его́ от благи́х, напра́сное то, и ра́бское убие́ние, но и па́че введе́ его́ в ве́чное селе́ние, и вме́сто земна́го ца́рствия, дарова́ся ему́ от Бо́га небе́сное. Убие́н же бысть но́вый вене́чник, непови́нный страда́лец царе́вич Дими́трий, в ле́то седмь ты́сящь девятьсо́т девя́тое. Ме́сяца ма́ия в пятьнадеся́тый день. На па́мять преподо́бнаго отца́ на́шего Пахо́мия вели́каго, а от рожде́ния своего́ во осмо́е ле́то.

Прославля́ет у́бо Бог Свои́х уго́дников, преподо́бных и богоно́сных оте́ц на́шых, и му́чеников. И дае́т им проти́ву трудо́в их и муче́ния мздовозда́ние, и дар исцеле́ния. Та́коже и сего́ но́ваго вене́чника, и непови́ннаго страда́льца, царе́вича Дими́трия просла́ви и́ Свои́м милосе́рдием, за непови́нное его́ убие́ние. Пра́ведная у́бо душа́ его́ взы́де на небеса́, и получи́ со а́нгелы ликова́ние, с му́ченики же ра́дование. Те́ло же его́ обре́теся це́ло и нетле́нно. Положе́ну же у́бо бы́вшу честно́му телеси́ его́ в том же уде́льном его́ гра́де У́глече в ца́рственем дворе́ его́, в честне́м хра́ме, боголе́пнаго Преображе́ния, Го́спода Бо́га и Спа́са на́шего Иису́са Христа́. И пребыва́ющим та́мо честны́м моще́м его́, лет пятьна́десять, или́ вя́щше. В та́ же у́бо ле́та и бра́ту его́, благочести́вому царю́ Фео́дору случи́ся ко Го́споду отъити́, и с пра́ведными почи́ти. И по нем о́ному Бори́су ца́рство прия́ти. По царе́ же Бори́се наре́кшемуся тезоиме́нством, царе́вича Дими́трия, Ростри́ге. По Ростри́ге же в ле́то тоя́же осмы́я ты́сящи втора́го ста четвери́ца на деся́тницу прия́т ски́петры всея́ вели́кия Руси́и, благочести́вый царь Васи́лий. И бы́вшу Ермоге́ну патриа́рху, тому́ тогда́ па́стырский жезл держа́щу на́до все́ю же Руси́ею. И вложи́ и́ма Бог во ум благу́ю мысль, во е́же посла́ти во град У́глечь по пра́веднаго мо́щи, и взя́ти я́, и принести́ их во оте́чество его́, в ца́рствующий град Москву́, да положа́тся со отце́м его́ и де́дом, и с про́чими прароди́тели его́, с благочести́выми цари́ и с вели́кими кня́зи. Еще́ же на устраше́ние, и на посрамле́ние и ины́м мно́гим злым, и наве́тным челове́ком смуща́ющым держа́ву оте́чествия его́, та́коже ло́жно нарица́ющимся, я́коже и вы́ше рече́нный он Ростри́га, и́менем его́ царе́ва сы́на Дими́трия. Мно́гу у́бо тогда́ смуще́нию бы́вшу в ру́сстей земли́, от о́ных злых и ви́димых враго́в. По́слан же бысть по честны́я мо́щи от архиере́йска чи́на, преосвяще́нный Филаре́т митрополи́т, Росто́вский и Яросла́вльский, и́же по́слежде, по благода́ти Свята́го Ду́ха патриа́рх бысть во всей вели́цей Руси́и. И с ним у́бо и от архиепи́скоп и епи́скоп, та́же от архимандри́тов, и игу́менов, и от про́чих свяще́ннаго чи́на. И от ца́рска сигкли́та боля́рин князь Ива́н Вороты́нской, и про́чии с ним. И прише́дше во град У́глечь, и внидо́ша в це́рковь, иде́же пребыва́ху но́ваго страда́льца мо́щи. И откры́ша гроб, и обрето́ша я́ це́лы и нетле́нны, я́ко днесь положены́. И срачи́ца его́ в не́йже закла́н бысть и положе́н, та́коже цела́ и нетле́нна. И я́ко но́во непови́нною то́ю кро́вию обагрена́ бысть. И благоуха́нию нема́лу от моще́й изше́дшу. По́сланнии же они́ лю́дие, и вси живу́щии та́мо гра́ждане воздиви́шася, о такове́й вели́цей боже́ственей благода́ти бы́вшей, на непови́ннем сем страда́льце. И я́ко в толи́ка ле́та все це́ло бысть от телесе́ и от оде́жды, и ничто́же истле́. Еще́ же и доброво́ние изы́де. И та́ко понесо́ша честны́я его́ мо́щи, с досто́йною че́стию, к ца́рствующему гра́ду Москве́. И егда́ у́бо близ бы́вше самого́ гра́да, тогда́ царь Васи́лий, и с ро́ждшею ма́терию царе́вича Дими́трия, со и́нокою Ма́рфою, и со всем свои́м ца́рским сигкли́том, и со мно́жеством наро́да, и Ермоге́н патриа́рх с митрополи́ты, и со архиепи́скопы, и епи́скопы, и с про́чим свяще́нным чи́ном, с честны́ми ико́нами, и со свеща́ми и с канди́лы, стрето́ша я́ че́стне. И егда́ внесены́ бы́ша честны́я его́ мо́щи, внутрь самого́ ца́рствующаго гра́да Москвы́, в собо́рную це́рковь, небе́сных сил вое́воды архистрати́га Миха́йла, я́же и ны́не зри́тся близ двора́ царе́ва. Иде́же почива́ют вси роди́телие его́, и прароди́телие, цари́ и вели́цыи кня́зи. И поста́влены бы́ша на ме́сте, я́коже подоба́ет. И нача́шася моле́бная соверша́ти. И тогда́ у́бо в ты дни мно́зи боля́щии очесми́, и ины́ми теле́сными немощьми́ нача́ху прихожда́ти, и моля́щеся пра́ведному, исцеле́ние получа́ху, и здра́вы в до́мы своя́ отхожда́ху. Четы́редесять у́бо и пять чуде́с, но́вый сей вене́чник сотвори́, от му́жеска у́бо по́лу и же́нска разли́чными те́ми боле́зньми исцели́. И па́ки всем бысть чу́до зри́мо и удивле́нию досто́йно, я́коже и пре́жде вари́в рех, я́ко в толи́цех ле́тех ничто́же от телесе́ и от оде́жды истле́, но все це́ло и неруши́мо. И па́ки чуде́сная от моще́й соде́яшася. И пребыва́ющим им до трею́ дней неопря́таным, чудотво́рнаго ра́ди дея́ния, и виде́ния. И пото́м патриа́рх собо́рне досто́йная над мощьми́ пра́веднаго отпе́в, и вку́пе с царе́м повеле́ста че́стне и благогове́йне, на угото́ваннем ме́сте, во угото́ванную же ра́ку сла́вне, и благоле́пне святы́я мо́щи положи́ти, и покры́ти я́, я́коже подоба́ет, и све́щи уста́вити. И па́ки повеле́ царь, и патриа́рх, стихе́ры и кано́н пра́ведному соста́вити, и пра́зднество уста́вити. И по три кра́ты в ле́те пра́здновати, на сла́ву и хвалу́, даю́щему благода́ть Бо́гу, и на па́мять но́вому сему́ венцено́сцу, да не забве́на бу́дет, толи́кая благода́ть Бо́жия, на такове́м непови́ннем страда́льце, и в ве́чныя ро́ды на сла́ву же и хвалу́ всему́ оте́честву его́ и сро́дству, и на утверже́ние ма́тере градо́в Москве́. И па́ки на хвалу́ же и на удивле́ние всему́ правосла́вному христиа́нству, я́ко в после́дняя сия́ времена́, просла́ви Бог Свои́м милосе́рдием непови́ннаго сего́ страда́льца. Самого́ ру́сскаго самоде́ржца о́трасль, даде́ ему́ телесе́ нетле́ние, и дар исцеле́ния. Крамо́льницы же и мяте́жницы ца́рства, пра́ведными его́ моли́твами вси погибо́ша, и без ве́сти бы́ша. По́слежде же сро́дник его́ благочести́вый царь и господа́рь и вели́кий князь, Миха́ил Фео́дорович, всея́ Руси́и самоде́ржец, повеле́ ме́сто но́во соде́лати, и мно́гою ле́потою укра́сити. И ра́ку от сребра́ и зла́та учини́ти, и ту святы́я мо́щи преложи́ти. И па́ки покры́ти е́, багры́ ца́рскими, и лампа́дию запали́ти, я́же и доны́не всем зри́мо есть. Принесены́ же бы́ша пра́веднаго мо́щи от гра́да У́глеча, в ца́рствующий град Москву́, в ле́та седмь ты́сящь сто пятнадеся́тое. Ме́сяца ию́ня в тре́тий день, на па́мять свята́го му́ченика Лукиа́на, а по убие́нии его́ в шестнадеся́тое ле́то.

Или́й град есть Ливаниси́и фини́ческия, в не́мже скомра́х бе́яше не́кто и́менем Аи́н. И на всех ме́стех Святу́ю Богоро́дицу руга́яся ху́ляше Ю. И яви́ся ему́ Свята́я Богоро́дица глаго́лющи, что ти зла сотвори́х, я́ко при сели́це наро́де повлачи́ши Мя и зле глаго́леши. Он же воста́в не то́кмо не упра́влен, но и па́че хулу́ веща́ше. Па́ки же яви́ся ему́ Свята́я Богоро́дица увещава́ющи и глаго́лющи, ни Мою́ та́ко врежа́еши ду́шу, я́коже свою́. Сей же па́ки зле́е ху́ляше Ю. И па́ки трети́цею яви́ся ему́ то́же веща́ющи и глаго́лющи. И я́коже не испра́ви себе́ но па́че мно́жае ху́ляше. В еди́н же от дней паде́ на земли́. И я́ко лежа́ше, яви́ся ему́ Свята́я Богоро́дица, и ничто́же ре́кши то́кмо персто́м Свои́м наче́рта о́бе ру́це и о́бе но́зе его́. И возбуди́вся, обре́теся отсе́чене имы́й ру́це и но́зе о́бе, и труп лежа́щь осо́бь. И та́ко же зло́бный испове́даше всем о себе́, я́ве себе́ творя́ я́же в похуле́ниих свои́х пострада́, и я́же Пресвяты́я Богоро́дицы ми́лость к нему́. Бо́гу на́шему сла́ва.