Стихи́:

Плоды́ принесы́й Ка́рпе прия́тныя Бо́гови,

Прине́сл еси́ во вре́мя кончи́ну я́ко жа́тву:

В два́десять шесты́й Ка́рпе преста́вися.

Святы́й апо́стол Карп, бе у́бо еди́н от седми́десяти. Научи́жеся от свята́го Па́вла апо́стола, после́дуя ему́ и служа́, и с ним пропове́дая благовествова́ше ве́рное сло́во Христо́во. И мно́ги претерпе́ напа́сти. И та́ко подвиза́ся с вели́ким учи́телем и пропове́дником И́стины. Последи́ же поста́влен бысть от него́ епи́скопом во Африки́и. Иде́же мно́ги е́ллины от идолослужи́тель обрати́, иуде́ов же обличи́в и научи́, я́ко распя́тый от них Христо́с Бог есть И́стинный Творе́ц всех, от них же су́рово и не ми́лостиво убие́н бысть, и та́ко предаде́ ду́шу свою́ в ру́це Го́сподеви. Честны́я же его́ мо́щи положены́ бы́ша в то́мже гра́де ве́рными и богобоя́знивыми му́жи, мно́га исцеле́ния творя́т и до сего́ дне.

Бя́ше ста́рец прозорли́в ду́хом в пече́рском монастыри́, и́менем Матфе́й. Еди́ною бо стоя́щу ему́ в це́ркви на ме́сте свои́м, и возве́д о́чи свои́ и позре́ по бра́тии, и́же стоя́ху на пе́нии в це́ркви по обе́ма страна́ма: и ви́де обходя́ща бе́са во о́бразе ля́ха в лу́де, нося́ща в припо́ле цветки́, и́же глаго́лются ли́пки. И обходя́ по́дле бра́тию и взима́я зло на цвето́к, вержа́ше на еди́наго кого́ждо. И а́ще к кому́ прилепля́шеся цвето́к пою́щим от бра́тии, ма́ло постоя́в разсла́блен умо́м, вину́ сотво́рь какову́ лю́бо, из це́ркве исхожда́ше в ке́лию и спа́ше. А и́же не прилепля́шеся к коему́ждо цвето́к, сей стоя́ше кре́пко в пе́нии до́ндеже отпоя́ху у́тренюю, и тогда́ исхожда́ше из це́ркве в ке́лию свою́. И се ви́дев ста́рец пове́дая бра́тии свое́й. Да се слы́шавше утверди́шася мы́слию не исходи́ти из це́ркве до отпу́ста. Бо́гу на́шему сла́ва, ны́не и при́сно и во ве́ки веко́в. Ами́нь.