Стихи́:

Акепси́ма же́злием бие́н быва́ет:

Акепси́ма друго́в от ка́меннаго побие́ния:

Бие́н быв Акепси́ма в тре́тий, сострада́льники и́ ви́жду.

Си́и бе́ша при Саво́рии цари́ Пе́рсстем. И́же я́ти бы́вше предста́ша Андрахосха́ру, старе́йшим волхво́м на испыта́ние. И а́бие бие́н быва́ет Акепси́ма же́злием сукова́тым. Святы́й же Ио́сиф растяжемь и той бие́н, яко отступи́ти ко́жи его́ да́же и до косте́й, и свя́зан вве́ржен бысть в темни́цу. Святы́й же и Аифа́ла свя́зан бысть ру́це под коле́ни и изви́ша ста́ви его́ бию́ще, и в темни́цы затвори́ша. Посе́м святы́й Акепси́м трию́десятию во́ины бие́мь сконча́ся и преда́сть ду́шу. Ио́сиф стремгла́в пове́шен и ка́мением побие́н. Святы́й же Аифа́ла, [рястя́жемь четы́редесятию во́ины] и той пове́шен стремгла́в, бие́н бысть и преда́сть дух Го́сподеви.

Стихи́:

Труды́ Акепси́ма пре́йде без труда́.

Сей бя́ше при Феодо́сии вели́цем царе́, и́же в ма́ле хи́жице затвори́в себе́, и соверши́в шестьдеся́т лет, ни ви́димь, ни бесе́дуя: но себе́ внима́я, и Бо́гу моля́ся, вся́ку сту́день, и вар терпя́ше. Ибо хлеви́на его́ бя́ше вельми́ в земли́ иско́пана, и нужна́ сотворена́. Пи́ща же ему́ бя́ше, ля́ща ква́шена с водо́ю, яды́й в неде́лю. Но́щию исходя́, дово́льную во́ду о́ну от бли́жняго взима́ше источника, ни от кого́же ви́димь. И мно́га чудеса́ сотвори́в, и святи́тельский чин ну́ждею восприи́м, в ми́ре глубо́це Бо́гу дух предаде́.

Святый му́ченик Атти́к, и Евдо́ксий во́ина бе́ста, во гра́де Сева́нстем, при Де́кии царе́, с Кате́рием и Истука́рием: и си́и уча́ху ве́ровати во Христа́. И я́ти бы́вше Марке́лом ду́ксом, и мно́го му́чени бы́вше. Посе́м вве́ржени бы́ша в темни́цу, и ту бие́ни бы́ша по плеще́ма, и по чре́ву жи́лами говя́жиими: посе́м исторго́ша зубы́ и́ма. Му́чимым же им, глаго́лаше дукс свято́му Кате́рию: Я́ко ты еси́ отста́вил лю́ди от царе́ва повеле́ния: Он же рече́: Я́ко не совеща́х с людьми́ проти́витися царе́ви, но научи́х ве́ровати Безсме́ртному Царю́ Христу́. Посе́м приведе́н бысть святы́й Истука́рий, и Пакто́вий, и Никтополио́н и Христа́ Бо́га испове́давше. Посе́м осужде́ни бы́ша, и дреко́лием бие́ни бы́ша: и по той му́це, и и́на мно́жайшая претерпе́вше. И со ины́ми мно́жайшими ве́ровавшими во Христа́, на коне́ц осужде́ние прия́ша огне́м. И та́ко успе́шно сконча́шася о Христе́.

Пове́даше епи́скоп гра́да Сухе́нска о сем епи́скопе, его́же обре́те в пусты́ни: Егда́, рече́, бех в пусты́ни, мних сый, и тогда́ восхоте́ ми ся ити́ в да́льнюю пусты́ню, а́ще обря́щу та́мо кого́ служа́ща Влады́це Христу́. И взем на четы́ри дни хле́ба и воды́, идо́х в путь. И я́коже преидо́х дни четы́ре, и не доста́ ми пи́щи, и дерзну́х други́е четы́ри дни да́лей ити́, и изнемо́гся от жа́жды и труда́. И уже́ наконе́ц па́дся лежа́х на земли́. И се не́кто прише́д косну́ся во устне́ мои́ персто́м, та́коже осяза́ мя, и а́бие укрепи́хся, и я́ко мне́ти ми ся на пути́ де́явшу, ни алка́вшу, ни жада́вшу. И воста́в, прохожда́х пусты́ню, и я́ко друзи́е четы́ри дни мину́ша па́ки, утруди́хся и возде́х ру́це на не́бо, и се то́йже мужь укреплей мя пе́рвее, и па́ки пома́зав персто́м устне́ мои́, и утверди мя, и идох дний седмьна́десять. И пото́м обрето́х хи́жу и фи́ник и во́ду и му́жа стоя́ща, ему́же власи́ главни́и бя́ху ему́ оде́ние, и бя́ху седы́. Сам же стр́ашен лице́м. И я́ко уви́де мя и ста на моли́тве рек: «Ами́нь», и разуме́ я́ко челове́к есмь, и прии́м мя за ру́ку вопраша́ше глаго́ля: «Ка́ко се́мо прии́де и ка́ко стои́т ли мир во вселе́нней и еще́ ли го́нят мучи́тели христиа́ны?» Аз же рех: «Моли́твою ва́шею аз сию́ пусты́ню прохожу́. А муче́ния преста́ша си́лою Христо́вою. Рцы же ми ты, отку́ду еси́ и ка́ко прии́де се́мо?». Он же востена́в и пла́чася, нача́ глаго́лати: «Аз епи́скоп бех, и бы́вшу муче́нию, мно́ги му́ки подъя́х, и не моги́й терпе́ти мук, последи́ пожро́х, и посе́м разуме́х безако́ние свое́, и вдах себе́ умре́ти в пусты́ни сей, и есть ми зде лет три́десять и де́вять. Испове́даяся, молю́ся Бо́гу, не ли ми оста́вил грех и дасть ми пи́щу от сего́ фи́ника, а утеше́ния отда́ния не прия́х». И се глаго́ля воста́в и тече́ вон, и ста на мол́итве на мног час. Я́ко сконча́ моляся, прии́де ко мне. Видев же лице его, ужасохся. И рече́ ми: «Не бо́йся, и́бо Госпо́дь посла́ тя погрести́ те́ло мое́ и у́бо мне уже́ отпусти́ грех». И се рек, просте́р но́зе, кончи́ну прия́т животу́. И раздра́в ри́зу мою́, пол себе́ оста́вих, а полови́ною покры́х те́ло свята́го, и погребо́х, и а́бие фи́ник у́спе и хи́жа паде́ся. Аз же со слеза́ми Бо́га моли́х, да бы ми фи́ник дал, да бых ту был. И я́ко не послу́ша мене́ Бог, возврати́хся в мир. И се он же яви́ся челове́к укрепля́яй ми, и та́ко приидо́х ко бра́тии, пове́дах все, и молю́ никому́же не отда́ти себе́ в отча́яние грех ра́ди, но терпе́нием обрести́ от Бога ми́лость.