Стихи́:

Иоанни́кия от земли́ восприе́млет

И́же сло́вом зе́млю утверди́вый Бо́жие Сло́во.

Зна́мения ти в четве́ртый Иоанни́кие потеко́ша.

Сий блажен́ный роди́вся в два́десять четве́ртое ле́то Копрони́мово ца́рства Льва мучи́теля от страны́ Вифи́нския, отца́ име́я не́коего и́менем Мирици́кия, ма́тере же Анастаси́и. Сий в ме́ру во́зраста дости́г, четы́редесять лет имы́й, воева́ с царе́м на болга́ры и вельми́ храбру́я, мно́гих от болга́р в ра́ти ссек и свою́ дружи́ну пред царе́м спасы́й. Отри́ну же хотя́щую ему́ сла́ву и честь бы́ти от царя́ и взы́де на го́ру, поне́же боже́ственный глас сам слы́шав, и на верх горы́ вшед, обре́те та́мо два мни́ха, и́же никы́м ви́дена бы́ста никогда́же, одея́нии власяны́ми и бы́лии ди́виими пита́емы. И о вся́ких, е́же вопроси́, слы́ша, и прии́м от них одея́ние благослове́ния де́ля. И отту́ду исше́д, дости́же го́ру Трихали́кову, та́же Кундури́йска пого́рия. И научи́вся три́десяти псалмы́, поя́ше с ко́имждо тропаре́м слага́я: «Упова́ние ми Бог и прибе́жище ми Христо́с, покро́в же мне Дух Святы́й». Сей блаже́нный мно́га ме́ста обше́д и ве́лия соде́лав чудеса́ и о бу́дущих проре́к, испо́лнь днем быв сый и ле́том девяти́десять и четыре́м, почи́ о Го́споде.

Стихи́:

Христа́ лю́бяще Жи́ва о́ба му́ченика,

Жи́вы вас погреба́ют во гро́бе го́рько.

Си́и святи́и мно́гих от и́дол истерза́юще, и Христу приводя́ще, обо́лгани быша гра́дскому коми́ту Лива́нию. Он же к бо́рзым свои́м ко́нем привяза́в сих, и гоня́ му́чаше тещи́. И влеко́ма у́бо святая́ на мно́зе, телеса́́ ею́ ссе́чена бы́ста, я́ко кро́вию земли́ обагри́тися. Та́же па́ки повеле́ пове́сив строга́ти, и во о́гненную пещь ври́нути: Бо́жиею же во́лею невреди́ма пребы́ста. И повеле́ су́етный по се́рдцу ею́, и по глава́х, и по чре́ву гво́здие вонзи́ти. И еще́ ды́шущыма и́ма, затвори́ти ею́ во гро́бе, и пе́рстию посы́пати. И та́ко жестоко́ю ну́ждею, преда́ста своя́ ду́шы Го́сподеви.

Стихи́:

Порфи́рие бла́го оболче́н свы́ше:

Све́тлою оде́явся багряни́цею от кро́ви.

Сей святы́й бысть при цари́ Аврелиа́не, и от ма́лаго во́зраста и́грищем [1] себе́ уча́ и пита́я, и́же такова́го ра́ди обхожде́ния коми́ту Александри́йскому сопроти́влься [2], в Кесари́ю веде́н бысть. Сей христиа́нским обы́чаем пону́дився [3] не́когда епи́скопу от не́коего подо́бия, па́че же лжа́щу [4], креща́емь быва́ет. Игра́ющим же и руга́ющимся на́шим, и сему́ же бы́вшу, во оде́жду бе́лу обо́лкся, сам [ми́лостию Бо́жиею] соверше́ное христиа́нство восприи́м. А́нгели же яви́шася предъиду́ще ему́, [держа́ свети́льницы], и́же и к восто́ку моли́тися сего́ научи́ша, на челе́ же и по всему́ те́лу крест написа́ша [5]. Тем мно́зи приидо́ша ко Христо́ве ве́ре, и́же и боже́ственым о́блаком креще́ни бы́ша и к собо́рней це́ркви приидо́ша. Та́же коми́ту свята́го призва́вшу, и поне́же с христиа́ны ходя́ща сего́ понахо́дит [и не отврещи́ся ему́ Христа́], мече́м главу́ ему́ отсече́.

Пове́даше не́кто от оте́ц: я́ко не́кий схола́стик антиохи́анин, прии́де к не́коему затво́рнику, и моля́ше и́, дабы́ прия́л его́, и сотвори́л мона́ха. И глаго́ла ему́ ста́рец: А́ще хо́щеши да тя прииму́, прода́ждь все име́ние свое́, и даждь ни́щым, и по за́поведи Госпо́дни прииму́ тя. Шед же и сотвори́ та́ко. Посе́м па́ки глаго́ла и́ну за́поведь: Мо́жеши ли сохрани́ти, е́же да не глаго́леши. Он же обеща́ся сотвори́ти та́ко, и пребы́сть пять лет не глаѓоля. Нача́ша же и не́цыи сла́вити. И глаго́ла ему́ оте́ц его́: Не́си ми тре́бе, но отпущу́ тя в кинови́ю во Еги́пет. И пусти́ и́, я́ко глаго́лати ли на́чнет или́ не глаго́лати. То́йже соверша́я за́поведь, ничто́же глаго́ла. Хотя́ше же искуси́ти и оте́ц прии́мый его́, а́ще нем есть, или́ ни: пусти́ его́ отве́та ра́ди в пово́нну реку́, да пону́жди рече́, я́ко не могу́ прейти́. И пусти́ бра́та в след его́, да ви́дит что сотвори́т. Я́коже прии́де на реку́, и не моги́й прейти́, преклони́ коле́на своя́. И се прии́де коркоди́л и взят и́, и пренесе́ и́ на он пол. И я́коже сотвори́ повеле́нное, прии́де на реку́, и па́ки взят и́ коркоди́л, и пренесе́ и на он пол. И по́сланный брат, в след его́ прии́де, и сие́ пове́да отцу́ и бра́тии, и почуди́шася. Случи́жеся по вре́мени усну́ти ему. И посла́ оте́ц к посла́вшему и глаго́ля: аще и не́ма посла́л еси, но оба́че а́нгела Бо́жия. Тогда́ пусти́ и́ затво́рник глаго́ля: не нем, но зело́ глаго́лив, и соблюда́я за́поведь, ю́же бе испе́рва дал ему́, пребы́сть та́ко. И вси почуди́шася.