Стихи́:

Несумне́нная супру́га мече́м убива́ется,

Душь на сопряже́ния возлю́бльших:

Усече́ние прие́мши Еписти́мия с Галактио́ном в пя́тый.

Галактио́н и Еписти́мия в ца́рство Да́киево и Секу́нда иге́мона. И у́бо Галактио́н сын бе́яше Колитофо́нтов и Елевкипи́н, е́ллином су́щим, и́же и науче́ни бы́ша благоче́стию от не́коего мни́ха, Ону́фрия и́менем, и свято́е креще́ние восприи́мшим. И сопряго́ша Галактио́ну жену́ красну́ зело́ и ле́пу, и́менем Еписти́мию, и той су́щи от е́ллин и некреще́не. Входя́щу же Галактио́ну, не целова́ше Еписти́мию. О́ной же воспроси́вши его́: Почто́ та́ко твори́ши? И рече́ Галактио́н: Поне́же не си христиа́на. Она́ же ра́да бысть, и не бы́вшу гоне́ния ра́ди епи́скопу, крещена́ бысть Галактио́ном, и совеща́вшеся сохрани́ти ку́пно де́вство без поро́ка. Прия́ша же она́ мни́шеский о́браз, вся́кое же́стокое житие́ живу́ща. Я́ты же бы́вше У́рсом кня́зем и вопроше́ни бы́вше, и испове́даша себе́ христиа́ни, бие́ни бы́ша вельми́ и тро́стие же о́строе вонзи́ша за но́гти им, и ру́це и но́зе и́ма отсеко́ша, и наконе́ц ме́чную кончи́ну прия́ша. Бе́яше же Галактио́н ле́том три́десятым, Еписти́мия же ле́том шестьна́десятым.

Стихи́:

Е́рма, Патро́в и Га́ие, трие́ ку́пно апо́столи,

Умира́ют я́ко Тро́ицы дру́зи:

Пода́в Иису́с боже́ственный ра́зум Ли́ну,

Уловля́ет тебе́, Ли́не, и прославля́ет от жития́:

Филоло́г дру́га Тебе́ творя́ Бо́жия,

Исполня́я словеса́ Твоя́, и не у́мер, сопредстои́т Ти.

Си́и вси бя́ху от седми́десять учени́к Христо́вых. И у́бо Патро́в его́же боже́ственный апо́стол помина́ет в свои́х посла́ниих, епи́скоп Потио́льский быв: и мно́гия крести́в приведе́ Христу́. Ерм же его́же в ри́мстей еписто́лии помина́ет апо́стол, епи́скоп в Филиппу́се быв. Ли́н же по Петре́ Верхо́внем, Ри́мский епи́скоп быв. Га́ий же, его́же апо́стол помина́ет, по святе́м Тимофе́и, епи́скоп Ефе́сский быв. Филоло́г же, егоже помина́ет апо́стол, Андре́ем Первозва́нным, епи́скоп Синопи́йский быв. И́же и епи́скопствовавше в нарече́нных свои́х гра́дех, и мно́гия напа́сти и ско́рби благочести́ваго ра́ди сло́ва претерпе́вше. И мно́гих научи́вше, и Христу́ приве́дше, с ми́ром сконча́шася.

Сей святы́й оте́ц наш Григо́рий, из мла́да во́зраста Христа́ возлюби́в, и украси́ себе́ вся́кими доброде́тельми Бо́жиими. Тем по сконча́нии свята́го па́пы Александри́йскаго, боже́ственною вла́стию поста́влен быва́ет, от тогда́ сше́дшихся епи́скопов: и христолюби́вых люде́й, архиепи́скоп Александри́йский. И бысть учи́тель правосла́вия дово́лен, кро́ток, смире́н, ми́лостив. Си́рым оте́ц, вдови́цам засту́пник, наста́вник заблу́ждьшым, врачь боля́щым, уте́ха тре́бующым: и бя́ше хотя́ всех ви́дети ра́достны и ве́селы. Но соблазноде́латель диа́вол внуши́в тогда́ ца́рствующу Льву иконобо́рцу, повеле́ свята́го Григо́рия посла́ти свя́зана в Константи́нь град. И сему́ бы́вшу, предста́, и обличи́ его́ пред всем сигкли́том, и еретика́ его́ и нечести́ва наре́к. Он же нетерпя́ доса́ды, волу́ями жи́лами повеле́ би́ти его́, и в темни́це гла́дом замори́ти и́. Святы́й же благода́рствуя вся терпя́ше, и глаго́лаше ко всем: Христа́ Бо́га моего́ о святе́й ико́не, гото́в есмь на удеса́ ссече́н бы́ти. Сия́ уве́дев мучи́тель, и непра́ведный царь он, изгна́ти в заточе́ние сего́ повеле́. Шед же в заточе́ние блаже́нный, и три ле́та пожи́в, в ру́це Бо́гу дух предаде́.

Сей у́бо Иоа́нн прему́дрый роди́ся в Антиохи́и Си́рьстей от бога́ту роди́телю: отца́ – Секу́нда воево́ды и ма́тери Анфу́сы. Меле́нтий же патриа́рх Антиохи́йский крести́ пе́рвое Иоа́нна, и пото́м роди́телю его́. Не попусти́ бо Бог тако́го со́лнца и церко́внаго учи́теля да ли́ха бу́дета ве́ры Бо́жия роди́теля его́. И да́ста же и́ на уче́ние гра́моте и приста́виста к нему́ пе́стуна со слуга́ми, да хо́дят с ним, самому́ же на ко́ни е́здити. Иоа́нн же не тре́боваше ничто́же: ни слуг, ни ко́ний. Но смире́нием прилежа́ше уче́нию. И всели́ся вонь прему́дрость Бо́жия. Бе́ше же ему́ учи́тель Лива́ний филосо́ф и Оннадрага́т. И преста́вльшуся отцу́ его́, и оста́вши сирото́ю ма́тери – сего́ же ма́ти обвдове́ отрокови́цею но́во, и из о́тча до́му изше́дши. Иоа́нн же шед во Афи́ны, та́мо до конца́ извы́че вся кни́ги, и Анфи́мия филосо́фа препре́ и в креще́ние введе́, и Анфи́ну боги́ню сокру́шьшу, и ка́пища испрове́рже, и вся куми́ры попра́, и введ вся Афи́ны во креще́ние. И возврати́ся во Антиохи́ю, и хотя́ше чернори́зческое житие́ восприя́ти. Ма́ти же его́, и́мши за десну́ю ру́ку, введе́ и́ в ло́жницу свою́, и се́дши вскрай одра́, на не́мже бе и́ родила́, река́ми сле́зы лию́щи, и тех слез миле́йши словеса́ прилага́ющи и вопию́ще, глаго́лаше к нему́: «Аз, о́ ча́до, не нара́довася с твои́м отце́м до́лго, Бо́гу та́ко веле́вшу: тобе́ си́ротство, а мне вдовство́, сотво́ршися сме́рти отца́ твоего́. Оба́че ни еди́на мя прилу́чшее ми ся зло не мо́же прину́дити вторе́м бра́це, ни ино́го му́жа привести́ в дом отца́ твоего́, но пребы́х в бу́ри, ли я́ко в пе́щни огни́ вдо́вственем, терпя́щи Бо́жиим про́мыслом, и твое́ лице́ ча́сто ви́дящи, отца твоего́ подо́бно обли́чие душе́вное и́стое снабдя́щи, и вели́к уве́т и утеше́ние творя́щи. К сему́ же ни име́ния отца́ твоего́ погуби́х бедо́ю вдо́вственою и тре́бования мно́га ра́ди, но и то це́ло снабде́х, и́же есть тре́бе на твое́ му́жество. И егда́ мя земли́ преда́си, тогда́ свою́ мысль испо́лниши, е́же хо́щеши». Иоа́нн же, послу́шав мольбы́ ея́, дожда́ сме́рти ея́, и погре́б ю́ сам, раздая́ бога́тство свое́, и че́лядь свою́ всю пусти́ на вол́ю, и шед в монасты́рь постриже́ся, и нача́т чудеса́ мно́га твори́ти. Мы же вои́стину рече́м: «Блаже́на еси́ ты в жена́х, тако́го д́етища роди́вши! Блажи́м вдовство́ твое́, блажи́м терпе́ние твое́! Тем вои́стину не нарече́м тя жену́, но му́жа, я́ко му́жески до конца́ стерпе́. Те́мже и вы, жены́ до́брыя, слы́шаще оста́нетеся от злоб ва́ших. Та́ко ти си ма́ла ко́рене восприи́мши, о еди́ной ве́тви безпреста́ни моли́ся Бо́гу. Жена́ добра́ и по сме́рти му́жа спасе́т».