Стихи́:

Ка́ко Ие́рон ника́ко в благодерзнове́нии

Без дерзнове́ния не ви́де ника́коже к мечу́:

Мече́м поби́ша му́жии три́десять три,

Му́жие лука́вии версту́ еди́ну.

Си́и святи́и пострада́ша при Диоклитиа́не и Максимиа́не царе́ма. Бе́яше же сей Ие́рон храбр те́лом и благочести́в душе́ю, земледе́лец начина́нием. Сего́ в не́коем ме́сте обрето́ша и́дольстии уго́дницы и совеща́вшеся того́ я́ти подихы́бно, и не возмого́ша. Сам же волею прише́д к кня́зю и от него́ вопроше́н быв, испове́да себе́ христиани́на. Тем от самого́ лактя́ десну́ю ему́ ру́ку отсеко́ша, про́чих же по земли́ пове́ргше и волу́ями жи́лами би́вше и вне гра́да Мелети́йскаго главы́ им отсеко́ша число́м три́десять и трие́х святы́х му́ченик.

Стихи́:

Не пло́ти бы́ша, но пло́тским естество́м:

Меласи́пп к строга́нию и Каси́ния.

[Стихи́ Анто́нию:

Получи́ше Анто́ние благи́й жре́бий,

И прия́т бы́ше той в боже́ственном ме́сте ра́дости.]

Си́и пострада́ша при Иулиа́не престу́пнице, во Агки́рстем гра́де, ве́рою су́ще христиа́не. И у́бо Антони́н вве́ржен бысть в темни́цу. Меласи́пп же и Каси́ния, повешени бы́вше и стро́гани, и огне́м подпале́ни бы́ша. Та́же Каси́нии сосцы́ отре́заша. И Меласи́ппу отсеко́ша но́зе по коле́ну. Антони́н же изведе́н бысть, и ви́де роди́тели своя́ та́ко му́чимы, ублажи́ их. И прии́м отсе́ченая удеса́ роди́тельная облобыза́ше, и еще́ о́нем ви́сящым, Го́сподеви ду́шы своя́ преда́ста. Антони́н же плю́нув на лице́ Иулиа́ново, пове́шен и стро́ган бысть. И гле́зне ему́ проверте́ша, и ка́мень тя́жек на ногу́ ему́ обе́сиша. И на столе́ желе́зне разжже́не поста́влен быв, и главу́ его́ остриго́ша. И по гра́ду води́мь, име́я ка́мень привя́зан на вы́и свое́й. Посе́м по́слан бысть ко Агрипи́ну ду́ксу, и от него́ в пещь разжже́ну вве́ржен быв, и звере́м в снедь вдан, и от всех сих без вре́да соблюде́н быв. Его́же ви́девше четы́редесять детей, ве́роваша во Христа́, и́хже и главы́ отсеко́ша. Пото́м на желе́зне одре́ разжже́не полага́емь, и с верху́ же́злием бие́мь, без вре́да сохране́н быв. И чудесы́ мно́гих к ве́ре приве́д. И главу́ его́ отсеко́ша.

Му́ченица Фессалоники́я бя́ше дщи Клео́на не́коего и́дольскаго жерца́, и научи́ся Христо́вы ве́ры и крести́ся. И пону́ждена бысть отце́м свои́м отврещися Христа́, и поклони́тися и́долом и не послу́ша. И обнажена́ бы́вши бие́на бысть зело́, и ко́лием изби́ша ея́ ре́бра. Посе́м изгна́на бысть из до́му, и неприча́стна бысть о́тча име́ния: взят же ма́ло притяжа́ния ма́терня, и живя́ше вне гра́да. Уве́девше же о ней два му́жа, Авкт и Таврио́н, и поноси́ста Клео́ну отцу́ ея́: и той шед оклевета́ я́ кня́зю страны́ тоя́. И я́та бы́ста, и испове́даста Христа́. Посе́м ка́мением бие́на бы́ста. Та́же во огнь вве́ржена, и изыдо́ста здра́ва. И свя́зана бы́ста, и в е́зеро вве́ржена, и от него́ изше́дша, и усе́чена бы́ста. Фессалоники́я же Христа́ испове́дающи я́та бысть, и в му́ках сконча́ся. И положена́ бысть со святы́ма в Самфоли́и че́стно и великоле́пно.

Подоба́ет епи́скопу непоро́чну бы́ти, еди́ныя жены́ му́жу, чи́сту, не пиянчи́ву, кро́тку, нелюби́ву зла́ту, свой дом до́бре стро́ящу. А́ще бо своего́ до́му не уме́ет стро́ити, то ка́ко це́рковию Бо́жиею попече́тся? Да а́ще епи́скопом та рече́на суть, кольми́ па́че тебе́. А́ще бо суть дни́е рабо́тни от земны́х вла́стель, я́коже ты глаго́леши, или́ не оставля́ет тя от моли́твы Бо́жия, или́ нищета́, или́ строе́ния ка́я челове́ческа, не тужи́ тем, но па́че пра́ви пору́ченая ти до́бре, ча́я от Бо́га за пору́ченое ти мзду прия́ти проти́ву труду́ своему́, я́коже то и вы́ше глаго́лахом от святы́х книг. И еще́ же и́маши в нощи́ час ели́ко и в день, раздели́ я́ по си́ле: о́во на поко́й те́лу отлучи́, о́во же Бо́гу на слу́жбу. Не в ме́сте бо Бог опи́сается, но я́коже рече́ боже́ственный Дави́д: «на вся́ком ме́сте влады́чествия Его́, благослови́ душе́ моя́ Го́спода». И а́ще кем возненави́ден бу́деши, та́ко си не тужи́. Бо́гу на́шему сла́ва, ны́не и при́сно и во ве́ки веко́в. Ами́нь.