Наста́, празднолю́бцы, пресве́тлое торжество́ безпло́тных сил, преспева́я весь ум и ра́зум, пресве́тлыми заря́ми весь мир озаря́я. Не в естестве́ бо пло́тне су́ще, но в естестве́ неосяза́еме и разу́мне, от самого́ Божества́ заре́ю светя́щеся и о́крест Престо́ла Бо́жия тре́петно предстоя́ще, кри́лы тре́петно покрыва́юще ли́ца си́и, и непреста́нным гла́сом трисвяту́ю песнь Бо́гу возсыла́юще, глаго́лют: «Свят, Свят, Свят, Госпо́дь Савао́ф, испо́лнь вся земля́ сла́вы Его́» (Ис. 6:3).

В той бо ра́дости и све́тлостию боже́ственою почте́ни су́ще, о́вии Престо́ли нарица́ются, на ни́хже почива́ет тресо́бнаго Божества́ си́ла и власть, а друзи́и Херуви́мы и Серафи́мы, шестокри́льнии и четверозра́чнии и многоочи́ти су́ще. А друзи́и Си́лы и Вла́сти, а друзи́и Госпо́дьства и Нача́тцы, а друзи́и А́нгели и Арха́нгели: безчи́слена во́инства, вси во уста́ве свое́м ко́ждо предстоя́ще и над ко́еюждо рабо́тою свой чин иму́ще.

О́ви вы́ну предстоя́т сла́ве Бо́жии, а друзи́и на слу́жбу сле́ми к земны́м, о́ви на казнь и месть нечести́вым, а друзи́и на спасе́ние и на ра́дость, ве́рныя наставля́юще, я́коже пре́жде показа́ся а́нгелом богови́дцу Моисе́ю в горе́ Сина́йстем о́браз Пресвяты́я Богоро́дицы купино́ю и огне́м горя́щею и не опале́вшею, и па́ки тому́же Моисе́ю о́браз се́ни в горе́ показа́я а́нгелом, изве́стно сотвори́ и херуви́м о́ба по́ла олтаря́ осеня́юща яви́. И па́ки тому́же моля́щуся к Бо́гу и глаго́лющу: «Го́споди! А́ще обре́т благода́ть пред Тобо́ю, то яви́ ми ся Сам разу́мно, да ви́жду тя и разуме́ю, я́ко обре́т благода́ть пред Тобо́ю». (Исх. 33:13) Рече́ же Госпо́дь к нему́: «И се ти е́же рече́ сотворю́, я́ко обре́те благода́ть пре́до Мно́ю». (Исх. 33:17) Рече́ же Моисе́й: «Покажи́ ми, Го́споди, сла́ву Свою́, да ви́жду а́ще обрето́х благода́ть пред Тобо́ю». (Исх. 33:17-18) И рече́ ему́ Госпо́дь: «Не мо́жеши ви́дети лица́ Моего́, не мо́жет бо челове́к, ви́дев лице́ Мое́, жив бы́ти, но и се ме́сто у Мене́, и ста́неши при ка́мени, и покры́ю тя руко́ю Мое́ю, до́ндеже ми́мо иду́, и тогда́ за́дняя Ми ви́диши, лице́ же Мое́ не яви́т ти ся» (Исх. 33:20-23), и внегда́ же ви́де Моисе́й за́дняя сла́вы Бо́жия, просвети́ся лице́ его́ па́че сия́ния со́лнечнаго и покры́в лице́ свое́ убру́сом, ти та́ко к лю́дем глаго́лаше, не можа́ху бо зре́ти на лице́ Его́ све́тлости ра́ди. И па́ки вели́кий проро́к Иса́ия рече́: «Ви́дех Го́спода на Престо́ле высо́це и превознесе́не, и Серафи́мы стоя́ху о́крест Его́, и шесть крыл еди́ному и шесть друго́му, и вопия́ху Трисвяту́ю песнь глаго́люще: «Свят, Свят, Свят, Госпо́дь Савао́ф, испо́лнь вся земля́ сла́вы Его́»» (Ис. 6:1-3). И па́ки то́жде Иса́ия сказа́я рече́: «Егда́ боле́ Иезеки́я царь Иуде́йск, прии́де нань царь Сири́йск я́ко прия́ти град, и печа́лен бысть царь бра́ни ра́ди, належа́щия на град, и помоли́ся ко Го́споду Бо́гу, глаго́ля: «Помяни́, Го́споди, я́ко ходи́х пред Тобо́ю со и́стинною и се́рдцем соверше́нным и уго́дная пред Тобо́ю сотвори́х» (по Ис. 38:1,3). И рече́ ему́ Госпо́дь: «Не бо́йся, не и́мать вни́ти в град твой, ниже́ и́мать положи́ти в нем стрелы́ ни щита́, защищу́ бо Аз град той и спасу́ и Мене́ ра́ди, и Дави́да раба́ Моего́». И соше́д а́нгел Госпо́день, уби́ от полка́ си́рских сто и о́семьдесять и пять ты́сящь, и воста́вше заутра, обрето́ша вся тру́пия ме́ртва» (Ис. 37:33,35-36): та́ко бо есть си́ла тех безпло́тных и боже́ственых слуг, и́мже свем су́ща поко́нника и архистрати́га вели́каго Михаи́ла и Гаврии́ла, воево́де су́ща безпло́тным си́лам. От них а́нгел еди́н бе власть прия́л строе́нию и блюде́нию земно́му чи́ну, и не лука́вен ни злосотворе́н от Бо́га, но благ и бла́гостию почте́н быв, преврасти́ся от бла́гости на зло́бу, и го́рдостию испо́лнься, помышля́ше проти́витсия Творцу́ своему́ и Бо́гу, его́же горды́ня и велича́ния нетерпя́ архистрати́г Михаи́л, и со все́ми безпло́тными чи́нми сто́ргну и́ на землю и со отсту́пными с ним: нарече́нными под ни́м а́ггелы, и бысть тме нача́льник, све́та боже́ственнаго лиши́вся зло́бою свое́ю, и кля́тве пови́нен, бе́сом преме́нься от а́нгельския су́щия красоты́, и му́це ве́чней пови́нен ся сотвори́. Не примеша́ет бо ся зло́ба к боже́ственней бла́гости, я́ко Иоа́нн Евангели́ст в виде́нии свое́м рече́: «Брань бысть на небесе́, а́нгел бо Михаи́л и вси во́и его́ брань сотвори́ша со зми́ем и сверго́ша и отчи́ну его́» (Откр. 12:7,9). Та́коже Иу́да святы́й апо́стол брат Иа́ковль: «Вели́кий бо арха́нгел Михаи́л егда́ с неприя́знию расужда́шеся, не сме суда́ ху́льна навести́ нань, но рече́: да запрети́т ти Госпо́дь о том проти́вне, таково́ бо подоба́ет рве́ние име́ти по Го́споде и Творце́ свое́м» (Иуд. 1:9).

В чи́не бо стоя́ще ко́ждо и во уста́ве свое́м неизрече́нна све́та и красоты́ боже́ственныя наслажда́ются вели́чия, в себе́ ника́кого же ни зло́бия иму́ще, еди́ну во́лю и хоте́ние в себе́ иму́ще, е́же бла́гостию соблюда́ти уста́в свой, в не́мже ко́ждо их учине́н стои́т. Вся же чудеса́ и благода́ти си́ма вели́кима архистрати́гома даны́ бы́ша от Бо́га ро́ду челове́чу – о́вем побе́да на проти́вныя, а други́м благове́щение на ра́дость земно́му составле́нию, ею́же похвалы́ ни язы́к изрещи́, ни ум пости́гнет подо́бно хвали́ти, но проти́ву не́мощи свое́й ели́ко возмо́жем пости́гнути, наде́жду свою́ к ни́ма возлага́юще, да изрече́м неизрече́нную ею́ ми́лость и заступле́ние от всех напа́стий.

Си́ма бо архистрати́гома небе́сный круг чудесы́ испо́лнь Госпо́дь и земно́е основа́ние пресве́тло украси́. Си́ма небе́сная во́инства во уста́вех свои́х тре́петно стоя́ще соблюда́ются. Си́ма бо четвероча́стнии концы́ земли́ недви́жими сохраня́ются. Си́ма морска́я широта́ повеле́нием Бо́жиим неизли́вно чин свой сохраня́ющи, и преде́ла своего́ не преступа́ет. Си́ма челове́че естество́ от всех страсте́й неврежде́но пребыва́ет, си́ма бесо́встии полцы́ прогони́ми исчеза́ют. Си́ма и́дольская лесть из ко́рене разруши́ся, си́ма це́ркви све́тло украша́емы правове́рно и единогла́сно Трисвято́е пе́ние Бо́гу возсыла́ют. Си́ма вся ересь потреби́ся и правове́рие процвете́, венчева́я правосла́вно испове́дники. Си́ма вся напа́сти и стра́сти отго́нятся и боле́зни исцеля́ются.

К ни́маже единогла́сно припа́дающе, ра́достно с похвало́ю возопие́м реку́ще: Ра́дуйся, архистрати́же Михаи́ле, старе́йшеством сый пе́рвый воевод́а безпло́тным си́лам! Ра́дуйся, архистрати́же Гаврии́ле, пе́рвый благове́стниче всем ра́дость! Ра́дуйся, архистрати́же Михаи́ле, Единосу́щныя и Неразде́льныя Тро́ицы пе́рвый скипетроно́сче! Ра́дуйся, архистрати́же Гаврии́ле, Пребезнача́льнаго Све́та и́стый служи́телю! Ра́дуйся, архистрати́же Михаи́ле, заре́ю Све́та Неизрече́ннаго светя́ся и весь мир све́том озари́в! Ра́дуйся, ра́достная похвало́, Гаврии́ле, ра́достию вселе́нную украси́в и ста́рость Заха́риину венча́в благове́щением Иоа́нна Крести́теля и непло́дно естество́ плодоно́сно сотво́рь! Ра́дуйся, архистрати́же Михаи́ле, попра́вый тме поко́нника и престо́лу Бо́жию досто́йно предстоя́! Ра́дуйся, архистрати́же Гаврии́ле, воплоще́нию Бо́жию досто́йный благове́стниче! Ра́дуйся, архистрати́же Михаи́ле, светя́йся при́сно трисо́лнечнаго Божества́ неприкоснове́нным Све́том! Ра́дуйся, архистрати́же Гаврии́ле, безнача́льну Словеси́ О́тча заре́ния пресве́тлый по́вестниче! Твои́м бо гла́сом вся земля́ ра́достию просвети́ся, твои́м веща́нием Пречи́стая и Непоро́чная Богоро́дица ра́достию испо́лньшися, без се́мене О́тчу Зарю́ неизрече́нно зача́т.

Ра́дуйтася, согла́сная те́плая засту́пника всем прибега́ющим в кров ва́ю. Вы бо сокруши́ста предте́кша во ад, сме́ртныя вереи́ и закле́пы гро́бныя сотро́ста, воскресе́ния ра́дость мироно́сицам благовести́ста пе́рвее, во гро́бе а́довныя си́лы сокруши́ша: «Возми́те врата́, кня́зи, ва́ша и да вни́дет Царь сла́вы». Они́ же от стра́ха оцепе́вше и лежа́ще я́ко ме́ртви, глаго́лаху: «Кто сей есть Царь славы?» (Пс. 23:7) Па́ки же сия́ вели́кая архистрати́га с безпло́тными си́лами отвеща́ста к ним: «Госпо́дь Кре́пок и Си́лен – Той есть Царь сла́вы». (Пс. 23:10) Всю́ду же на слу́жбе Бо́жии ско́ростию я́ко мо́лнии обрета́етася, проти́вныя сокруша́юща и ве́рныя возвеселя́ща. Па́ки бо во гро́бе я́вльшася, честь показа́ста своего́ Го́спода ученико́м Его́, еди́н седя́ у главы́, а друго́й у ногу́, иде́же бе лежа́ло те́ло Го́спода Иису́са, и ре́ста: «Что и́щете Жива́го с ме́ртвыми? Несть зде, воста́ бо, я́коже рече́». (Лк. 24:5-6) И па́ки, восходя́щу Иису́су на не́бо, ста́вша в ли́це апо́стольсте, реко́ста: «Му́жие галиле́йстии, что стоите́ зря́ще на не́бо? Се Иису́с, восше́дый от вас на не́бо, та́кожде прии́дет па́ки, я́коже ви́десте Его́ иду́ща на не́бо» (Деян. 1:11). Та́ко бо подоба́ет честь твори́ти Го́споду и Бо́гу и Творцу́ своему́.

Те́ма бо вся вселе́нная просвети́ся Те́ма бо проро́ческий лик духо́вныя благода́ти испо́лнися, проро́чество свое́ све́тло сверши́. Те́ма бо патриа́рси и пра́ведницы вси све́тло венча́шася. Те́ма бо апо́стольский лик, согла́сно Трисвяту́ю песнь Бо́гу возсыла́я, венча́ся. Те́ма му́ченик мно́жество прекра́сными венцы́ увязо́шася. Те́ма архиере́йская похвала́ нетле́нней ра́дости сподо́бися. Те́ма пустынножи́теле жите́йския стра́сти и сла́сти умертви́вше, тече́ние свое́ сконча́ша. Те́ма же и в после́дний день гро́би отве́рзутся и уме́рших телеса́, пресвяты́м гла́сом ею́же, ожи́вша, воста́нут. Те́ма и отсту́пный диа́вол и с бе́сы свои́ми свя́зан бу́дет и вве́ржен в му́ку ве́чную, от нея́же да изба́вит ны моли́твами ею́ Ми́лостивый Бог наш, Ему́же есть сла́ва со Безнача́льным Его́ Отце́м и Пресвяты́м, Благи́м и Животворя́щим Его́ Ду́хом и ны́не и при́сно и во ве́ки веко́в. Ами́нь.

Стихи́:

Хоте́х тебе Михаи́ле песнь побе́дную воспева́ти ле́потную,

Но согла́сия сопль не име́ю:

В осмы́й на небесе́х облада́я чино́м.

В то́йже день собра́ние девяти́м чино́м: Серафи́ми, Херуви́ми, Престо́ли, Госпо́дьствия, Вла́сти, Нача́ла, Си́лы, Арха́нгели и А́нгели.

Михаи́л подобноле́пный нача́льник вы́шним си́лам по ве́тхому заве́ту, в но́вей же благода́ти и мно́гаго благоде́йствия и ра́дования ро́ду челове́ческому показа́ся я́ве же. Зане́же спасе́нию на́шему сопроти́вник и ра́тник, на Зижди́теля разгорде́в, и «Престо́л мой на о́блацех положу́» не сумне́вся рещи́, и «Вы́шнему подо́бен бу́ду» похвали́вся, арха́нгельския испаде́ вла́сти, я́коже рече́ Госпо́дь: «Ви́дех сатану́, я́ко мо́лнию с небесе́ спа́дшася». Ближа́йшая же сих и е́же под ним чи́ну презо́рствовав, пострада́. Сей же всеси́льный Михаи́л, и́же ко Влады́це благоразу́мие и я́ко слу́га ве́рный сохраня́я, арха́нгельскый мы́сленым старе́йшинствуя учине́н быв от Вседержи́теля. И ви́дев отсту́пника спа́дшася, собра́в арха́нгельския ли́ки и рече́: «Во́нмем, мы созда́ни бы́вше и Вели́кому Бо́гу предстоя́ще, что пострада́ша и́же с на́ми да́же и досе́ле свет су́щии, ны́не бы́ша тма». Таково́е бо совокупле́ние именова́ся собра́ние а́нгельское, е́же есть внима́ние и соедине́ние. Сей вели́кий засту́пник, на́шего спасе́ния и благоде́йствия мно́гаго изоби́льствуя и простира́я ко всем, и мно́гим явля́яся виде́нием, яви́ся Авраа́му и Ло́ту о возвраще́нии содо́мстем, я́ви же ся Иа́кову бе́гающему от своего́ бра́та. Предъидя́ше пред сына́ми Изра́илевыми, свобожде́ным бы́вшим им от еги́петскаго озлобле́ния. Я́ви же ся Валаа́му, иду́щу прокля́ти Изра́иля. Я́ко и [ко Иису́су На́вину] рече́ вопроша́емь: «Аз архистрати́г Госпо́день ны́не приидо́х». Сей ре́ки [в Хо́нах], злочести́вым на святы́ню его́ свя́заным и пу́щеным, коне́чней про́пасти просади́. И и́на мно́гая суть в благодухнове́ннем писа́нии напи́сано о нем. Сего́ ра́ди и мы и засту́пника того́, и храни́теля живота́ на́шего иму́ще, всечестно́е торжество́ его́ ны́не пра́зднуем, моли́твами его́ и заступле́нием прося́ще е́же в ны́нешнем ве́це от злых обрести́ избавле́ние. В бу́дущем же небе́сней ра́дости и Ца́рствию сподо́битися нам.