Отне́лиже сни́де и́же от высоты́ превы́шних небе́с к земны́м ме́ртвеному существу́ Сын и Сло́во Бо́жие, «и́мже вся́ческая» бы́ша, ущедря́я па́дший о́браз от высоты́ блаже́ныя сла́вы боже́ственаго рая́ и до́лу пони́кших окая́нне сове́том зми́я, избавля́я же того́, не устыде́ся и до преиспо́дних сни́ти: и свои́м соше́ствием дарова́ от преиспо́дняя глубины́ зло́бы к неизрече́нней высоте́ небе́сныя доброде́тели челове́ческому естеству́ восходи́ти. И се я́ве есть от веще́й, е́же сло́во предста́вити хо́щет.

В сочита́нии у́бо зло́бнем ничто́же и́но таково́ тя́жестно есть и удо́бь могу́ще потопля́ти челове́ком души́ свобо́дное, я́коже похище́ние и непра́вда, и от мыта́рства стяжа́нное име́ние. Мыта́рское бо име́ние всей непра́вде и всем злым глава́ есть: все у́бо таково́е приобре́тение от слез ни́щих есть. И сим непра́ведным собра́ние отягча́емы ду́ши я́коже тя́жестию ка́мене, в тех слезах я́ко в преиспо́дней бе́здне погружа́еми потопля́ются. От таковы́я у́бо глубины́ дарова́ челове́ком Госпо́дне вочелове́чение, я́коже рече́ся, оре́льски возлете́ти к со́лнцу боже́ственых добродете́лей. Сие́ у́бо и соше́ствие того́ хотя́ше, е́же «гре́шники спасти́»: и́хже и не гнуша́шеся, но с те́ми возлежаше и с мытари́ ядя́ше, и с блудни́цами бесе́доваше, в гре́шных же до́мы входя́ яко во гра́ды сопроти́вных, исхища́я плене́ныя зло́бою врага́, восхища́я же сосу́ды непра́ведныя зло́бы и сотворя́я тех сосу́ды боже́ственей пра́вде и доброде́тели. По такове́х же пребыва́лищих ше́ствуя не́когда, и «узре́ Леви́ю Алфе́ова, седя́ща на мы́тницы». Узре́ того́, богате́юща зело́ таковы́м приобре́тением зло́бы: узре́ его́ тщету́, я́коже приобре́тение ку́пльствующа себе́: узре́ того́, я́коже до́бре пла́вающа в пучи́не непра́вды и спеша́ща на погруже́ние свое́, и не познава́юща таково́е потопле́ние. Узре́ боже́ственыма очи́ма чистоту́ души́ его́, я́коже би́сер в ка́ле непра́вды погружаемь, я́ко зла́то тиме́нием скве́рны лихои́мства покрыва́емо. Возгласи́в боже́ственым гла́сом, рече́ ему́: «Гряди́ по Мне!». Облегчи́ся от таковы́я тя́жести и непра́вды, и взыди к высоте боже́ственаго ми ра́зума: облегчи́ся и не бу́ди тя́жек нра́вом по жестосе́рдию злых фарисе́й, да не с ни́ми погру́зишися в пучи́не неве́рия: обегчи́ся от таковы́я тя́жести кри́лы боже́ственаго ми повеле́ния и возлети́ к высоте́ боже́ственыя пра́вды. Оста́ви непра́вды мре́жею лови́ти челове́ки и «гряди́ по Мне, и сотворю́ тя ловца́ челове́ком» мре́жею боже́ственаго Ми разума. Оста́ви мыта́рское нарица́ние и «гряди́ по Мне, и сотворю́ тя» нарица́тися апо́стола и пропове́дника боже́ственаго Ми прише́ствия. Оста́ви провозвеще́ние и написа́ние непра́вде, и «гряди по Мне и сотворю́ тя» благове́стника и списа́теля божественаго Ми, е́же во пло́ти, смотре́ния. О́ле всемо́щныя си́лы боже́ственаго гла́са! О́ле вседе́тельнаго повеле́ния! Восхоте́в у́бо, возмо́же, и свои́м возглаше́нием, я́коже у́дицею, извлече́ того́ от таковыя зло́бы. Егда́ бо услы́ша, он, благи́м изволе́нием души́ в той час воста́в, облегчи́вся и воздви́гся ле́гце кри́лы жела́ния: изреши́вся от содержа́ний таковы́х, во след Его́ и́де и с моле́нием убеди́ Влады́ку, е́же сни́ти в дом его́. Сотвори́ же Ему чрежден́ие ве́лие в день той: сотвори́ чрежде́ние пита́ющему «вся́ко дыха́ние благоволе́нием» и даю́щаго «пи́щу птенце́м вра́новым»: сотвори́ чрежде́ние да́вшаго земли́ в себе́ плоди́ти пре́жде траву́ и пото́м клас, во угото́вание пи́щи челове́ком: сотвори́ чрежде́ние ве́лие и любоче́стно просте́ршему поля́ ското́м трапе́зу и повеле́вшему израща́ти зе́лие и злак: сотвори́ чрежде́ние со мно́гим услугова́нием зело́ Влады́це вся́ческаго дыха́ния в дому свое́м, и́же бе той пре́жде вся́кия непра́вды жили́ще. С ним возлежа́ху мы́тарие и гре́шницы. О́ле благодат́и Влады́чни! И́же собезнача́льный Отцу Сын и горе́ с Ним на престо́ле, по боже́ственому естеству́, от а́нгел прославля́емый, до́ле, спасе́ния ра́ди челове́к, изво́ли с такове́м свечеря́ти. И сего́ ра́ди не то́чию не возбрани́ Матфе́я, е́же возврати́тися в дом, я́коже о́ного, и́же рече́ Ему́: Го́споди! Повели́ ми е́же завеща́ти ми ся в дому́ моему́, но и сам с ним прихо́дит, я́ко ве́дый вся е́же на по́льзу, попуща́я в ма́ле во́ли его́, да не пе́рваго обы́чая неустрое́ние прето́ргнет благо́е изволе́ние его́. И́бо [тако] и иску́снии ловцы́ творя́т: е(г)да ощутя́т великотеле́сну ры́бу, поглоти́вшу у́дицу, не а́бие извлача́т, да не прето́ргнет вервь и отщетя́тся такова́го приобре́тения, но попуща́ют во́ли ея́, до́ндеже сконча́ется есте́ственая си́ла и тогда́ удобь ея́ извлачат. Си́це и Госпо́дь, такова́го ра́ди ослабле́ния во́ли его́ и схожде́ния, к сим же и сугу́баго ра́ди поуче́ния и сла́дости боже́ственых слове́с, соверше́не сотвори́ того́ совзя́тися к высоте́ своея́ любве́. И оставля́ет не мыта́рство то́чию, но и сро́дник и любе́зных друго́в сла́дкую любо́вь, стяжа́ния же мно́жество и и́на вся: и пожира́ется ме́ртвеное мудрова́ние то жела́нием боже́ственыя любве́. И после́дова Го́сподеви невозвра́тным по́мыслом: после́дова любо́вию души́ прише́дшему на взыска́ние его́: после́дова, я́ко стрело́ю уя́звен любве́, кра́йняго ра́ди ми́лости соверше́не возлюби́вшему того́: после́дова, я́ко плене́н весь сла́достию жела́ния Его. И не труди́ся, после́дуя Ему́, дне и поко́я челове́ческа не вожделе: оставля́ет и́го непра́вде и пра́ведное и́го лобза́ет: учинева́ется с верхо́вными богопропове́дники и двана́десятем причита́ется. И, по вознесе́нии Госпо́днем, наше́ствием Свята́го Ду́ха соверше́не отъя́тся тому́ покрыва́ло страсте́й, и просвеща́ется сугу́бо боже́ственым свет́ом: весь благови́ден показу́ется, де́йством Свята́го Ду́ха. О́ле веры! О́ле вели́кия любве́ богопропове́дника! От каковы́х в какову́ дости́же высоту́! Пои́стине ключи́ся и зде рече́нное: «Иде́же умно́жися грех, преизоби́лова благода́ть» (Рим. 5:20), и толи́ко, я́ко ко всем ине́м пе́рвее всех и благове́стие написа́, е́же о пло́тстем смотре́нии Единоро́днаго. Пе́рвее всех водружа́ет столп богосло́вия на утвержде́ние вселе́нней ве́рным: пе́рвее испуща́ет ре́ку богосло́вия во вселе́нныя концы́, напая́я не то́чию от иуде́й, но и от всех язык ве́рующих: пе́рвее возгреме́ богосло́вия гром, устраша́я и потребля́я ерети́ческия полки́: пе́рвее воструби та́инство Госпо́дня вочелове́чения и стра́шных чуде́с, оглаша́я ве́рных слу́хи: пе́рвее возгласи́, я́ко орга́н Ду́ха, Госпо́дня за́поведи и второ́е прише́ствие Его́, услажда́я ду́ши и приводя́ к покая́нию. Излага́ет же таково́е та́инство благослове́снейшаго благове́стия по осми́х ле́тех Госпо́дня вознесе́ния, еврейскаго гла́са писа́нием слове́с, ве́рующим от иуде́й, и́мже довле́ет, я́ко от Авраа́ма и Дави́да роди́ся Христо́с: в не́мже, помина́я, написа́ше апо́столом имена́ и, егда́ прии́де до себе́, не рече́ не́ких высо́ких или́ про́сто та́ко Матфе́й, но приложи́ «Матфе́й мыта́рь». О́ле вели́каго смире́ния богопропове́дника! А́ще бо и вели́ким сподо́бися, но помина́ет свое́ пе́рвое неустрое́ние, рече́: «мыта́рь». Сим нарица́ем, все пре́жнее соплете́ние непра́вде объявля́я: но, по Па́влу, ра́зум дая́, я́ко сего́ ра́ди, рече́, поми́лован бых, я́ко неве́дый сотвори́х.

Проходя́ же Госпо́день апо́стол вруче́ныя тому́ страны́ и пропове́дуя, па́рфяны бо и ми́дяны, мно́гая же соде́яв чудеса́, низлага́я прельсти́ и́дольския хра́мы и в Госпо́дне и́мя боже́ственыя це́ркви воздвиза́я, в ни́хже полага́я свяще́нное свое́ благове́стие, я́ко основа́ние и «утверже́ние» непоколеби́мо, и я́ко «ка́мень че́стен и краеуго́лен», содержа́ «основа́ние» ве́рных: я́ко «хлеб живота́» и нетле́ния: я́ко пото́к, напая́я присноживо́тнаго безсме́ртия: я́ко сокро́вище ве́чныя жи́зни. Пропове́дая же, уча́ и чудоде́йствуя, мно́гия обрати́ ко и́стинней ве́ре и просвети́ све́том богоразу́мия. Ели́цы же неприя́зненыя ча́сти, же́стоцы и непокори́ви и неве́рни: от них же у́бо мно́гия претерпе́ ско́рби, бие́мь и уничижа́емь, и ка́мением мета́емь, и в темни́цы затворя́емь. Претерпе́ же и о́гненая опале́ния, и ме́чное осужде́ние: и такове́м у́бо страда́нием отхо́дит ко Учи́телю своему́ и Влады́це всех Христу́. Сотвори́ша убо тому́ умолча́ти богослове́сный, е́же в пло́ти, язы́к: но, вме́сто того́, возглаша́ет во вселе́нную прему́дрое начерта́ние того́ благове́стия. Умолча́ти у́бо сотворя́ют тому́ теле́снаго горта́ни орга́н: но ду́хом изло́женая слове́с писа́нием при́сно [пребыва́ют]. Поража́ют у́бо уби́йствен апо́стольскаго те́ла верх, но блаже́нною душе́ю восхо́дит на небе́сный верх: и во мно́зе дерзнове́нии предста́, со все́ми а́нгелы, стра́шному престо́лу всех Влады́ки и Учи́теля своего́ Христа́. Предста́ и яви́ся Пречи́стому Его́ Лицу́ «не чу́ждею», но «свое́ю кро́вию» очище́н и укра́шен, и просвето́ван: предста́ и яви́ся Того́ неизрече́нней сла́ве, я́ко «благи́й ве́рный раб»: до́бре усугу́би вруче́нный тому́ благода́ти тала́нт, и со мн́огим дерзнове́нием «вни́де в ра́дость Го́спода своего́»: предста́ и яви́ся Того́ боже́ственей вла́сти, и я́ко прему́дрый купе́ц со мно́жайши приобре́тением, я́коже да́ры че́стны принося́ Ему́ – спаса́емых ду́ши. Предста́ и узре́ жела́емых конец, узре́ и прият стори́цею сокр́овище ве́чных благ, иде́же есть ве́чный живо́т и пи́ща, и наслажде́ние, и приснотеку́щий пото́к безсме́ртия: иде́же пе́рвенец жили́ще и све́тлость ве́чная, е́же со а́нгелы ликова́ние, арха́нгельское торжество́ о́крест престо́ла сла́вы боже́ственыя: моле́ние принося́ о су́щих в правосла́вней ве́ре, еже пребыва́ти тем во благоче́стия догма́тех, и́хже он пропове́да, яко Госпо́день и́стинный пропове́дник и апо́стол: прося́ же посрами́ти и разори́ти вся́ко стремле́ние противных, е́же по души́ и те́лу тех находя́щее ви́диме и неви́диме, и́же ве́рою пра́зднующим святу́ю и благонаро́читую па́мять его́ и, жела́нием любве́ в све́тлости души́, того́ ублажа́ющих си́це.

Блаже́н еси́, о́ Госпо́день апо́столе и благове́стниче Матфе́е! Не я́ко Алфе́ев сын, но, по благода́ти, Бо́жий сын был еси, пропове́дник и служи́тель и́стиннаго естество́м Сы́на Бо́жия, е́же во пло́ти Того́ смотре́ния. Блаже́н еси́: я́ко бысть небе́снаго та́инства пропове́дник и непоро́чныя ве́ры наста́вник и́стинный. Блаже́н еси: я́ко и́дольския пре́лести возвыше́ние низложи́, и вся́ко нечестие потреби́, и благоче́стия се́мена насади́л еси́. Блаже́н еси: я́ко всем нам предста́тель и засту́пник показа́ся. Мы же, земни́и, ку́ю похвалу́ тебе́ принесе́м, богогла́се? Не мо́жем у́бо сла́вныя ти благода́ти сло́вом изрещи́, пречу́дне. Блаже́н еси: я́ко сый подо́бник страсте́м Госпо́дним и за и́мя Его́ бие́мь и уничижа́емь, и ка́мениемь побива́емь, и изгони́мь от гра́да в град, «а́лча и жа́ждя, и наготу́я» (1Кор. 4:11). Блаже́н еси́: я́ко вся́ко оста́вив стяжа́ние тле́нных сокро́вищь по за́поведи Госпо́дни и не имы́й ничто́же – «ни сапо́г, ни жезл, ни двою́ ри́зу» (Мф. 10:10). Блаже́н еси́, я́ко ко всем сим и ду́шу свою́ положи́ за любо́вь Учи́теля своего́, Го́спода на́шего Иису́са Христа́: к Нему́же отше́д со мно́гим дароноше́нием, с Ним и у Него́ всели́ся и зри́ши сла́ву Его́ во Ца́рствии небеснем, и сла́ву Пречи́стаго Отца́, и сла́ву Свята́го Духа, Еди́наго Трисоста́внаго Бо́га, Ему́же подоба́ет вся́ка сла́ва, честь и держа́ва, и покланя́ние, хвала́ же и велеле́пие, в ве́ки и на ве́ки и еще́, ны́не и при́сно, и в безконе́чный день ве́ка. Ами́нь.

Све́тлое и пресла́вное настоя́щее торжество́ и любопразднственых любо́вь к пе́нию воздви́же, Присноде́вы в це́рковь вхожде́ние: днесь бо не́бо и земля́, о́бщий пра́здник соверша́ющи, обоя́ Соде́теля сла́вят, и́же от земна́го естества́ Богоотрокови́цу Де́ву избра́вшаго во Свое селе́ние. Днесь Я́же пре́жде всех век проуста́вленое та́инство и напосле́док яви́тися хотя́щее украша́ется в жили́ще пресла́вное. Днесь Я́же от обетова́ния ро́ждьшися, от Иоаки́ма и А́нны, прино́сится те́ма, честны́й Дар И́же по сих из Тоя́ роди́тися благоизво́лившему. Днесь благода́ти нача́ло в це́рковь введена́ бысть, триле́тна су́щи, и де́вы Ю́ со свеща́ми провожда́ют. Днесь разреше́ние непло́дныя кля́твы, дар благослове́ния, во свята́я святы́х вво́дится. Днесь проро́ческое пропове́дание от первосвяще́нника и проро́ка Заха́рии в неви́димая неви́димых вво́дится: иде́же сам еди́ною ле́та со благогове́нием вхо́дит, и сия́ све́тло с невозбране́нием день и нощь седя́ше.

Кто не диви́тся пресла́вному чудеси́? Кто не чуди́тся, зря во святи́лищи приседя́щую свяще́нником бы́вшую непристу́пну Мари́ю небла́знену? Сия́ же к нам совокупле́ния Госпо́дня зача́ло! Сия́ же а́нгел с челове́ки смеше́нию предначерта́ние! Сия́ на́шего воззва́ния зна́мение! Сия́ терноно́снаго жития́ на́шего осужде́ния пе́рваго, е́же «проклята́ земля́ в де́лех твои́х, те́рние и волче́ц да прозя́бнет тебе́» (Быт, 3:17) и е́же «В по́те лица́ твоего́ да я́си хлеб твой» изменя́я! Се е́же «умноже́ния печа́лий твои́х и воздыха́ния твоего́» (Быт. 3:19), «в печа́лех роди́ши ча́да» (Быт. 3:16), изве́стное отверже́ние. Сий, ве́рнии, да пра́зднуем всечестны́й пра́здник, све́тлое торжество́, божестве́ныя блиста́юща зари́, у́мными освеща́емь светлостьми́, боже́ствеными осия́ющи мир богоразуме́ньми, е́же в трех Ли́цех Еди́ному Божеству́, Отца́ и Сы́на и Свята́го Духа, научава́ют вседержа́вие. Те́мже, сия́ вины́ возогла́вивше, зача́ло прие́мше – в це́рковь Де́выя провожде́ние, да начне́м: и зако́нное исполне́ние указа́вше, благода́ти возраще́ние и плододая́ния нарече́м. Сия́ бо Я́же святы́х Свята́я, нескве́рный Сло́ва Черто́г, де́вственое Цвете́ние, Ковче́г свяще́ния, Гора́ свята́я, боговмести́мая Сень, неопали́мая Купин́а, огнеобра́зная Колесни́ца Бо́жия, Голуби́ца нескве́рная, простра́нное Боже́ственому Сло́ву Вмести́лище, богопросвеще́нный О́блак, прукра́шеная Цари́ца, от се́мени Дави́да восходя́щи, Дави́довем Созда́телем и Бо́гом сохранена́ бысть во Свое́ Тому́ жили́ще.

Иоаки́м бо, в двана́десятном коле́не Изра́илеве богат сый и пра́веден, приноша́ше да́ры своя́ пе́рвее Бо́гу. Те́мже, яко неимущу се́мени, но су́щу тому́ безча́дну, свяще́нницы отрева́ху от хра́ма Господня, глаго́люще: «Несть тебе́ леть сия́ приноси́ти Бо́гови, понеже се́мени не́си сотвори́л во Изра́или». И той дряхл сни́де от хра́ма Госпо́дня, печа́лию одержи́мь. И а́бие в горе́ един Бо́гу помоли́вся, сокруше́ным се́рдцем и боле́зненою душе́ю, возопи́, глаго́ля: «Го́споди, Ты, Сердцеве́дче, И́же ви́димых и неви́димых Зижди́телю, И́же «Не́бо распростры́й я́ко ко́жу» (Пс. 103:2), И́же со́лнце в просвеще́ние дне́ви вчинивый и луну в озаре́ние нощи со зве́здами сотвори́вый, И́же облако́м возду́х одождева́ти повеле́вый и дыха́ния ве́тром собирая, И́же мо́ре обузда́вый песко́м и се ро́дом рыб напо́лнив, И́же су́шу ро́дом безслове́сных испо́лнивый [и звере́й и птиц мно́жество] и сия́ пита́я хоте́нием и веле́нием, И́же лицу́ земно́му прозяба́яй траву́ и всех древе́с вид удобри́вый! Услы́ши мя, Милосе́рде, и да́руй ми ча́до! Даждь ми плодоро́дия зало́г, я́ко да заградя́тся «устны́ льсти́выя, глаго́лющии на мя, раба́ Твоего́, беззако́ние горды́нею и уничиже́нием» (Пс, 30:19). Си́и пра́веднаго глаго́ли, си́и пра́отца мольбы́, сия́ Иоаки́мова боле́зненыя души́ воздыха́ния.

Что же и А́нна? Добро бо и сея́ глаго́лы воспомяну́ти. Сия́ бо, му́жеви целому́дрено сожи́тельствовавше и ю́ностный цвет в старость преве́дши, непло́дна пребы́сть все вре́мя свое́: про́чее же и яже жен испо́лнивши, есте́ственым завеща́нием безча́дна познава́ется. Темже, оше́льство супру́га ви́девши, я́ко го́рлица пустынолю́бная и единомужная, во свое́м ово́щнице мольба́ми приле́жными Творцу́ и Созда́телю взыва́ющи и глаго́лаше: «О́ Пра́ведный Го́споди Савао́ф, «Седя́й на херуви́мех» (Дан. 3:54) и сла́вимь от серафи́м, И́же «тма́ми тем а́нгел Служи́мый и ты́сящами ты́сящь» (Дан. 7:10) во́инств славослов́имь и покланя́емый, И́же Ада́ма созда́вый руко́ю Свое́ю и живо́т вонь вложи́вый, И́же живоно́сным Свои́м повеле́нием от ре́бра его́ назда́в жену́, Иже му́дрым Твои́м благоволе́нием «сотвори́в помо́щника ему́» (Быт. 2:18), обою́ во еди́но два совокупи́в, [рече́ бо: «бу́дета о́ба во еди́ну плоть» (Быт. 2:24)], И́же Авраа́му, Твоему́ уго́днику и патриа́рху, дарова́вый сы́на Исаа́ка по ста́рости и непло́дстве Са́ррине и сотвори́вый того́ мно́гим язы́ком отца́, И́же сродной и вкупоиме́нной ми А́нне дарова́вый до́браго о́трока и свяще́нника Саму́ила, я́ко богода́ннаго моли́тве сы́на и лжи и не́нависти обличи́теля! «При́зри от свята́го жили́ща Своего́» (Вар. 2:16), Вы́шний, и отве́рзи ми ложесна́ к детотворе́нию, и отжени́ от мене́ печа́ль непло́дства, и расто́ргни у́зы чадоро́дия: я́ко да рожде́нная от рабы́ Твоея́ о́трасль, лю́бо му́жеск пол, лю́бо же́неск пол, да́ное принесу́ Тебе́, я́ко кади́ло благово́нно, я́ко чи́стое приноше́ние, я́ко че́стное дарова́ние, я́ко свяще́нное возложе́ние, я́ко боже́ственое селе́ние, я́ко нескве́рненую а́гницу, я́ко перворо́днаго а́гнца, я́ко но́ваго Исаа́ка».

Си́ма же обои́ма призыва́ющима, яви́ся им а́нгел Госпо́день, благовеству́я Всечи́стыя зач́ати и глаго́ля: «Услы́ша ва́ше Вы́шний моле́ние и в ма́ле вре́мени родите дщерь, избранную в Божие жили́ще». Сия́ а́нгелу ра́достне благовести́вшу, и сше́дшу Иоаки́му с горы́ с ра́достию серде́чною и весе́лием: из непло́дныя и невозде́ланныя утро́бы, без наде́жднаго чадоно́сия явле́нием, «от по́хоти же плотски́я и от се́мени му́жеска», и вре́мя девятоме́сячнаго возраще́ния утро́ба А́ннина позна́вши, роди́ Пречи́стую Де́ву и Богоро́дицу Мари́ю, ра́дость всеми́рную.

Никто́же от церко́вных учи́тель да прии́мет се рече́ние, я́ко седмоме́сячна Де́ва рождена́ бысть. И́бо мно́гих безу́мных слы́шах, си́цева любопря́щихся и бляду́щих: и неве́рных си ху́ждьше бы́ти мню́. Сия́ церко́вная согреше́ния, сия́ це́ркве правосла́вных чу́жда! Де́ва бо и Богоотрокови́ца Мари́я до девятоме́сячнаго вре́мени во чре́ве А́ннине снизведеся, я́коже естество́ явля́ет челове́ческое: но безу́мных уста́, никоего́же порока обрести́ могу́ще, сие́ сло́во Писа́нию наложи́ша, не пра́во му́дрствующии. И никто́же да прии́мет от про́стейших се. Благоразу́мным же мы́слию и ве́рою я́ко [мню] николи́же сей глаго́л в слух их вни́де, зане́, е́же писа́ния посре́д прочита́ющи, разуме́ньми боже́ствеными сия́ сказу́ют: егда в писа́нии обря́щут волче́ц, от враг всева́емь, я́ко ча́да церко́вная, соверше́нне изсеца́ют.

Но на предлежа́щее да прии́дем, и путе́м по́вести и рождества́ ше́ствующе и сказа́юще. Глаго́лом бо и веще́м во явле́ние прише́дшим, и непоро́чней Присноде́вей Отрокови́це от пра́ведных Иоаки́ма и А́нны рожде́нной, и обе́ты своя́ испо́лнити тща́щимся, и бе ви́дети богому́дреную А́нну, ра́дующуся и игра́ющу и ра́достно ко младе́нечной Де́ве глаго́лющи: «Кто глаго́лаше из мене́, дщи, проити́ тебе́, еди́ной в ро́де родо́в блаже́ной я́вльшейся? Кто в на́дрех мои́х ви́дев тя, млеком доиму, не сла́вит и́же Тебе́ мне Дарова́вшаго, непло́дней и безча́дней? Кто сосца́, не у млеко́ точа́ща, ви́де млеко́ источа́юща, не велича́ет и́же от краесеко́маго ка́меня Источи́вшаго во́ду жа́ждущим лю́дем? Но гряди́, дщи, ко И́же Тебе́ мне Дарова́вшему! Гряди́, ковче́же освяще́ния, ко благоутро́бному Влады́це! Гряди́, две́ри жи́зни, к милосе́рдому Да́телю! Гряди, ковчеже Сло́ва, ко хра́му Госпо́дню! Вни́ди в це́рковь Госпо́дню, ми́рови ра́дости и весе́лия! Наслади́ся сего́ красоты́, его́же по ма́ле родиши яко челове́ка! Блажена есмь, я́ко таковы́я дще́ри ма́ти нари́чуся! Сра́дуйте ми ся, коле́на Изра́илева, я́ко по непло́дстве мати яви́хся, и млеко́м пита́ю отроча́, е́же яви́тся Ма́ти Вы́шняго! Начне́те, де́вы свещено́сныя, и предше́ствуйте пре́до мно́ю и Богоотрокови́цею! Воспо́йте сию́ восхвале́нием, по́йте ей в гу́слех, воскли́кнете ей с песнию духо́вною, возвели́чите сию́ во псалти́ри десятостру́нней! Дави́де, восхвали́, я́ко богооте́ц, от пле́мене твоего́ я́вльшуюся, отрокови́цу, песносло́вя великогла́сне и глаго́ля: «Слы́ши дщи и виждь, и приклони́ у́хо твое́, и забу́ди лю́ди твоя́, и дом отца́ твоего́: вожделе́ет царь добро́те твое́й».

Сия́ и сим подо́бная радостноиме́нная А́нна ре́кши, тро́ичное сокро́вище нося́щи пло́тию, триле́тну су́щу Де́ву и Богоро́дицу, в це́рковь Госпо́дню привожда́ше: и со Иоаки́мом пе́сни благода́рственыя возсыла́ющи: и лик дев свещено́сных созва́вши, достиго́ша свята́я святы́х. И Заха́рий, ра́достными устна́ми и обра́дованными усты, зане́же проро́ку и свяще́ннику и сро́днику и служи́телю зако́нному заве́ту, с весе́лием зва́ше честна́я дво́ица родитель, вопию́щи: «Приими́, Заха́рие, сень нескверне́ную! Приими́, свяще́нниче, небла́зненый ковче́г! Приими́, проро́че, кади́льницу невеще́ственаго у́гля! Приими́, пра́ведниче, кади́ло духо́вное! Приими́, всечестны́й, огнеобра́зную колесни́цу Бо́га Вы́шняго! Приими́, непоро́чный, кра́сную лозу́, я́же возрасти́т грезн присноживо́тный! Введи́ сию́ в нутренюю храма Госпо́дня! Принеси́ сию́ на ме́сто освяще́ния, егоже содела Вы́шний во Свое́ жили́ще! Возведи́ сию́ в незаходи́мая, ю́же Неви́димаго Бо́га во чре́ве поноси́ти хотя́щую! Ублаж́и сию́, блаже́ны земны́х показа́вшую! Возвели́чи сию́, вели́ких дел Бо́жиих я́вльшуюся кни́гу богопи́санную! Восприими́ сию́, от кля́твы прама́тере Е́вы нас премени́вшую! Лобза́й сию́, ко Го́споду любле́нием нас связа́вшую и вражды́ змии́ныя нас отто́ргшую! Прорцы́ о сей, проро́к я́вльшуюся исполне́ние и обетова́ния Бо́жия к челове́ком возглавле́ние! Трапе́зу боже́ственаго хле́ба, вино́ весе́лия, пита́ние неизнуря́емое, голуби́цу це́лую, небо одушевле́ное, многосве́тлый све́щник, богонапи́санную ма́слину, боже́ственую колесни́цу Христо́ва смотре́ния, сень святу́ю, свети́льник богокова́нный а́гницу слове́сную, очисти́лище Бо́жие, сосу́д нескверне́н, сокро́вище пресла́вное, трубу́ богогла́сную, ту́чную го́ру и усыре́нную, боже́ственое руно́, о́блак богото́чный, оде́жду честну́ю, заве́су у́мную, богосече́нный ка́мень, колесни́цу царе́ву, ле́ствицу, по нейже Зда́тель земны́м яви́тся, одр святый, прия́телище бла́гости, чуде́с бе́здну, исто́чник благи́х, приснотеку́щее бога́тство, многоиме́нную и многообра́зную и Присноде́ву Отрокови́цу. Сию́ введи́ во свята́я святы́х, сию́ приведи́ царе́ви, я́ко дар многоце́нный: и сию́ воспо́й, я́ко цари́цу тва́рем: сию́ песносло́ви, всех дев храни́тельницу некра́домую: сию́ всели́ во храм рукотворе́нный, быва́емый храм одушевле́ный и́же сло́вом вся Соде́лавшему».

Сия́ Иоаки́мова и А́ннина ра́достная славосло́вия: сия́ благодаре́ния песносла́вная боговеща́ния: сия́ ко проро́ку Заха́рии необинове́нная сведете́льствия. Те́мже свяще́нник, я́ко проро́к Бо́жий и святы́м святы́х в приобще́нии прича́стную зря де́вственую красоту́, лица́ добро́тно, язы́ка хва́льное, души́ благоро́дие, жития́ непоро́чное, ног ше́ствие, удобре́ние нра́ва, о́браза ле́потное, Ду́хом Святы́м испо́лнився, возопи́: «О́ Отрокови́ца нескрне́ная! О́ Де́во небла́зненая! О́ Деви́це прекрасная! О́ жена́м украше́ние! О́ дще́рем удобре́ние! Ты благослове́нная в жена́х: ты препросла́вленая чистото́ю: ты запечатле́нна де́вством: ты Ада́мове кля́тве разреше́ние: Ты А́велево чисте́йшее приноше́ние: Ты пе́рваго жреца́ незло́бивая жертва: Ты Си́фово украше́ние и сыно́в Бо́жиих быва́ющи неболе́зненое зача́тие: Ты Но́ево о Бо́зе упова́ние непосты́дное: Ты Ено́хово угожде́ние и к невеще́ственому житию́ преставле́ние: Ты Но́ев слове́сный ковче́г и втора́го пакибытия́ к Бо́гу присвое́ние: Ты Мелхиседе́кову ца́рствия свяще́нию украше́ние всесве́тлое: Ты Авраа́му увере́ние, и обетова́ния, и чадоро́дия послушли́во покоре́ние: Ты Исаа́ку но́вая же́ртва и слове́сное всесожже́ние: Ты Иа́кову ле́ствичнаго восхо́да вина́ и благослове́нием дванадесятеколе́ннаго чадорожде́ния назна́менание: Ты Иу́дина коле́на дщи: Ты Ио́сифово целому́дрие: Ты ветхаго Еги́пта, ре́кше иуде́йскаго со́нмища, низложе́ние, Пречи́стая: Ты И́ову во искуше́ниих терпели́вое возгражде́ние и име́нием его́ сугу́бное прида́ние же и богатотвореное бытие: ты Моисе́ю законода́телю богоде́ланная кни́га, в не́йже мирово́ния по́весть напи́сана бысть и пе́рсты богоначерта́ными на скрижа́лех узаконоположи́ся, я́коже в Сина́йстей горе́, в не́йже Изра́иль новоявле́нный от рабо́ты Еги́петския свободи́тися, я́коже пре́жде в пусты́ни лю́дие насы́тишася ма́нны и воды́ от ка́мене краесеко́маго («Ка́мень же бе Христо́с», хотяй из Твоего́ чре́ва произы́ти, я́ко от черто́га жени́х): Ты Ааро́нов прозябла́ еси́ жезл: Ты еси́ Иису́са Навви́на просла́вльши посре́д проти́вных: Ты еси́ Дави́да дщи «преиспещре́на ря́сны златы́ми и преоде́янна», Ты еси́ Соломо́нов одр златотворе́нный, его́же «си́льнии шестьдеся́ть обхо́дят», боготворе́нных писа́нии я́же о Бо́зе прегу́дническия гла́сы трубя́ще: Ты еси́ Илиина́ вознесе́ния восхо́д и у́мныя Иезаве́ли низложе́ние бысть: Ты Елисе́овы сугу́бныя ми́лоти благослове́ние, е́юже, Иорда́нская тече́ния разсеки́й, преи́де немо́крено и, непло́дную во́ду исцели́в, пие́мую показа́: Ты Ио́нино в ки́те спасе́ние, и ниневи́тяном покая́ние и проще́ние оби́льное: Ты еси́ проро́ком зерца́ло, и глаго́лом их исполне́ние яви́ся: Тебе́ бо Иезекеи́ль наре́кл есть врата́ затворе́на, и́миже никто́же от челове́к проити́ мо́жет, то́чию Бог еди́н и врата́ и врата́ заключе́на соблюде́т: Тебе́ Иса́ия великогла́сный жезл Иесе́ов пронаписа́л есть, от него́же цвет Христо́с изы́дет, и сады зло́бныя из ко́рене изсек, богоразу́мия насади́т ни́ву : Тебе́ Иереми́я испове́дал есть, я́ко «се день гряде́т, и завеща́ю до́му Изра́илеву и до́му Иу́дову заве́т нов, его́же не завеща́х отце́м их», Сы́на Твоего́ рождества́ пришествие назна́менуя и и́же от язы́к лю́дий призыв́ая в покланя́ние от коне́ц земли́: Тебе́ и и́же «жела́нии муж Дании́л» пропове́дал есть го́ру вели́кую, и от нея́же Христо́с краеуго́льный ка́мень отсече́тся и о́браз многообразнаго зми́я погуби́т и истни́т: Тебе́ в Вавило́не трие́ о́троцы о́браз иму́ще и Сы́на Твоего́ прише́ствие разуме́вше, пещи́, седмосугу́бне разжже́ныя, избежа́ша и я́ко в черто́зе посреде́ ликова́ху: Тебе́ Авваку́м ю́жную го́ру имену́ет, от нея́же ца́рствия ски́петра держа́вне возсия́ют, от нея́же села́ Ефиопская убоя́тся и кро́вы земли́ Мадиа́мския. Тебе́ сла́влю, нескверне́ную Де́ву: Тебе́ воспева́ю обра́дованную: Тебе́ воспева́ю, от всех родо́в я́вльшуюся неве́сту: Тебе́ пою́, но́вое не́бо хотя́щее яви́тися: Тебе́ приноша́ю, я́ко сокро́вище чи́стое, в це́рковь Госпо́дню. Тебе́ велича́ю, но́вый заве́т, его́же Меси́я Христо́с напи́шет: пи́смена бо зако́на упраздня́тся, благода́ти же зва́ние креще́ние возсия́ет: И у́бо обре́зания сень преста́нет, Ду́ха же прише́ствие су́щим на земли́ оста́вится».

Си́ми свяще́нными словесы́ проро́к украси́в Блаже́нную, возве́д ту в же́ртвеник, Го́сподеви Бо́гу предложи́. Те́мже Сея́ отцы́, Иоаки́м и А́нна, в ра́дости серде́чной от хра́ма возвра́щшеся, чужда́хуся ра́зуму и кро́тости и ти́хости. Те́мже си, я́же младе́нечная преше́дши ре́чи и проначерта́ния, Вседержи́телю наеди́не служа́ше и, пи́щу с небе́с прие́млющи а́нгелом, челове́ческия пи́щи гнуша́шеся: и це́ркви всегда́ приседя́щи, мирски́й о́браз я́ко паучи́ну вменя́ше: и, бога́тство небе́сное жела́ющи, земна́го бога́тства отве́ржеся: и, ра́дость а́нгельскую всегда́ ви́дящи, жити́йскаго попече́ния вы́шши явля́шеся: и, Дух Святы́й при́сно зря́щи, духо́вныя полки́ неви́димо отгоня́ше.

Что бо творя́ше Де́ва, во святы́х свята́я вита́ющи, пи́щу а́нгельскую прие́млет и, я́коже голуби́ца це́ла, де́вство храня́щи, хра́му небеси́ и земли Зда́теля, со благодаре́нием в дерзнове́нии се́рдца моля́ще, глаголаше: «Пою́ Тебе́, Вседержи́телю вы́шний, я́ко отъя́л еси́ поноше́ние праматере моея́ Е́вы и, Твоего́ ра́ди неизрече́ннаго благоутро́бия, Единоро́днаго Ти Сы́на хо́щеши посла́ти на зе́млю и с челове́ки пожи́ти: сего́ ра́ди селе́ние бу́ду чи́стое и небла́зненое». «Иде́же бо грех умно́жися, преизоби́лует благода́ть». Жены́ бо ра́ди смерть приобрето́хом, жены́ же ра́ди па́ки обнови́ши вся́ческая: змии́ным го́рьким вку́сом прия́хом снедь, Тобо́ю же па́ки пи́щи безсме́ртныя насы́тимся: пра́баба Е́ва Ка́ина роди́, уби́йству и зло́бе нача́льника. Единоро́дный же Сын жи́зни, воскресе́ния бу́дет пе́рвенец. О́ преславнаго чудеси́! О́ но́ваго удивле́ния! О́ неизречен́ныя му́дрости!

Что у́бо нарече́м Мари́ю? Не́бо ли? И́бо небеси́ и земли́ Творца́ во чре́ве вмести́. Солнце ли? Си бо, со́лнца седми́ седми́цею светле́йши су́щи, «со́лнца пра́вды» прия́т. Луну́ ли? Си бо, добро́ту нессуженную иму́щи, кра́снаго добро́тою Христа́ родила́ еси́. О́блак ли? Ибо на о́блацех седя́щаго на руку́ понесла́ еси́. Све́щник ли? И́бо «Свет су́щим во тме и се́ни сме́ртней седя́щим» возсия́л есть. Престо́л? И́же бо на престо́ле Оте́ческом неви́димо соца́рствуема в Ду́се Свя́те вмести́ма прия́т. Би́сер ли? И́бо многоце́нный би́сер земны́м сниска́ла есть. Рай ли? И́бо, Еде́м осужде́нным отве́рзи, к ца́рствию отсла́. Ковче́г ли? И́бо вся́ческая нам дарова́вшаго в на́дрех Твои́х обита́ет. Го́ру ли? И́бо гора́м творя́щаго дыми́тися нете́сно вмести́ла есть. Зе́млю ли? И́бо зе́млю творя́щаго трясти́ся неболезнено понесл́а есть. Храм? И́бо на херуви́мех почива́ющаго рука́ма Свои́ма носи́ла еси́. Море? И́бо собира́ющаго во́ды в совокупле́ние еди́но устна́ма Ея́ лобыза́ла есть. Трапе́зу ли? И́бо пи́щу нам даю́щаго матероле́пне млеко́м напит́ала есть.

Кто не диви́тся? Кто не чуди́тся? Кто не сла́вит та́инства вели́чество? А́ще боя же пре́жде благода́ти бы́вшая такова́я, и ум и мысль превосходя́ща: я́же по благода́ти явля́емая, кто сказа́ти мо́жет? А́ще я́же се́ни и зако́на обветша́вшаго пресла́вная, я́же по сих возсиявшая какова́? Да посрамя́тся ерети́к де́ти, и́же на Де́ву ху́льными усты́ и устна́ми скверне́ными ху́ляще и язы́ки ядови́тно дви́жуще: пресла́вная бо Мари́я Богоро́дица я́вльшися, и Творца́ и Го́спода пло́тски вме́щши и зра́ком челове́ческим Того ро́ждьши. Сие́ честно́е начерта́ние самоизволене лобызуем, и сию́ я́ко Ма́тере бы́вшую и́же во пло́ти нам бесе́довавшему. Сей о́бразу покланя́емся, не ве́щи покланя́ние принося́ще, отступи́! Но, ко первообра́зному честь возсыла́юще, боже́ствене ве́руем. Ниже́ бо Божества́ зрак напису́ем, я́коже вы глаго́лете, сле́пи и безако́нни: но иже пло́тию бесе́довавый нам зрак и пострада́вый, и от ме́ртвых воскресы́й пе́рвенец начерта́ем, [а чрез Него́, И́же плоть заня́ше у нас, по досто́инству чтем и о́браз Того́ роди́вшей я́коже Всечи́стую]. А́ще бо Бог Авраа́му прости́, [повеле́в принести́] ю́ницу триле́тну су́щу и козу́ триле́тну ко очище́нию плотско́му – Де́ва, преуста́влена бы́вши от созда́ния ми́ру и от всех родо́в избра́нна в жили́ще нескверне́ное и приведена́ в храм свят Вседержи́телю, не честна́ ли и чи́ста и нескверне́на бысть, и приноше́ние непоро́чно челове́ческаго естества́?

О́ иуде́йское собо́рище, ю́же от коле́на ва́шего возсия́вшую Деву неприи́мше(и)и Богоро́дицу, но и ху́ляще недосто́йными и нече́стными глаго́ланьми, завистию дви́жими оклевета́юще, ка́ко Сы́на ея́, приносу́щаго Отце́ви, рожде́ннаго из нея́, прии́мете? Но и тоя сла́вы, и рожде́наго из Нея́ неприча́стни бысть: не прише́дшему на вас за́висть иму́щу, но, зло́бою отри́нувшеся и лука́вством суеты́ ва́шея обезу́млени бы́вше, обою сла́вы отпадо́сте: ка́ко вои́стину су́ще неблагода́рни пе́рвее, и по сих я́же бо неи́стовства ва́шего ла́яния всему́ ми́ру явле́на бы́ша, И Сло́во О́тчее, я́же о вас изъявля́е: «Ами́нь, ами́нь глаго́лю вам: А́ще ча́да Авраа́мля бы́сте бы́ли, дела́ Авраа́мова твори́ли бы́сте у́бо (той бо о Мне глаго́лал есть), ны́не же от отца́ ва́шего диа́вола есте́ и по́хоти его́ хо́щете твори́ти». И и́нде глаѓолет: «Егда́ мни́те, я́ко Аз реку́ на вы ко Отцу́? Есть глаголяй на вы Моисе́й, на́ньже вы наде́ястеся».

Мы же, лю́дие Бо́жии, язы́к свят, бога́тное сриста́ние, лик правосла́вный, сы́нове ба́ни, ча́да благода́ти, и́же вхо́дом Девыя в це́рковь пра́зднующии душами чи́стыми и нескверне́ными устна́ми и язы́ки многовеща́нными, сей(?) торжеству́ псало́мски воскли́кнем, све́тлому пра́зднику, а́нгельскому весе́лию и челове́ческому хвале́нию: и е́же «Ра́дуйся!» Гаврии́лово со стра́хом и ра́достию той возопие́м:

Ра́дуйся, О́тчее благоволе́ние, и́мже в конца́х позна́ся богоразу́мие! Ра́дуйся, Сыно́внее жили́ще, ея́же Плотоно́сец про́йде! Ра́дуйся, Свята́го Ду́ха пребыва́лище неразори́мое! Ра́дуйся, безпло́тным многослову́щее слы́шание! Ра́дуйся, херуви́м сла́внейши! Ра́дуйся, небе́с ши́ршая! Ра́дуйся, со́лнца светле́йшая! Ра́дуйся, луны́ сия́тельнейшая! Ра́дуйся, звездо́ многочи́сленых зарь! Ра́дуйся, о́блаче ле́гкый, и́же дождь небе́сный су́щим на земли́ оброша́я! Ра́дуйся, мо́лние, зра́ки ве́рных ти́хо просвеща́ющи! Ра́дуйся, гро́ме духо́вный, и́же бе(з?) щу́ка оглаша́ай земны́х ушеса́! Ра́дуйся, дыха́ние свято́е, иже духи зло́бныя от земли́ потребля́я! Ра́дуйся, проро́ком пресла́вное пропове́дание! Ра́дуйся, апо́столом всеми́рное оглаше́ние! Ра́дуйся, му́чеником пречестно́е испове́дание! Ра́дуйся, патриа́рхом многохва́льное славосло́вие! Ра́дуйся, преподо́бным превосходи́мая похвало́! Ра́дуйся, пра́ведных и́стиннейшее наслаждение! Ра́дуйся, де́вам многобога́тное хвале́ние! Ра́дуйся, царе́м ски́петре и держа́во! Ра́дуйся, первосвяще́нником служе́ние вели́кое! Ра́дуйся, грешным прибе́жище необори́мое! Ра́дуйся, пла́вающим корми́ло нерастерза́емое! Ра́дуйся, па́дающим воздви́жение! Ра́дуйся, неду́гующим врачева́ние безме́здное! Ра́дуйся, па́дших изве́стное во(з)ста́ние! Ра́дуйся, вина́ всех спасе́ния! Ра́дуйся, ми́ру ра́дости(е) неизглаго́ланная! Ра́дуйся, смире́нию хода́таице, цари́це! Ра́дуйся, матерем украше́ние пречи́стое! Ра́дуйся, Сло́ва вмести́лище простра́нное! Ра́дуйся, ста́рым держа́вная предста́тельница! Ра́дуйся, млады́м боже́ственое пе́стунство! Ра́дуйся, младе́нцем све́тлое храни́ло! Ра́дуйся, поднебе́сным всем хода́таице! Ра́дуйся, вселе́нней все воззва́ние! Ра́дуйся, небеси́ и земли́ торжество́ пресла́вное! «Ра́дуйся, обра́дованная, Госпо́дь с Тобо́ю», И́же пре́жде Тебе́ и из Тебе́ и с на́ми воспева́емый, со Отце́м и Ду́хом Святы́м, ны́не и при́сно и во ве́ки веко́в. Ами́нь.

В Константи́не гра́де, муж не́кто санови́т оба́жен бысть зави́стники к царю́, и изгна́н бысть из пала́ты, и из са́на своего́ изве́ржен. В печа́ли же сый и́де ко Иоа́нну Златоу́сту, су́щу ему́ патриа́рху в Константи́не гра́де, о́тай, дабы́ его́ никто́же ви́дел от оба́дивших к царю́. И моли́ блаже́ннаго Иоа́нна, да изба́вит и от гне́ва царе́ва. Иоанн же призва́в Про́кла на то отлуче́на, да помина́ет глаго́лы ему, и рече: Помяни́ ми в нощь егда́ сей прии́дет. Обы́чай же бе Иоа́нну в нощь писа́ти. И в ту нощь взем трость, нача́ писа́ти Па́вла апо́стола сказа́ние. Прии́де же оба́женный мужь, я́коже бе повеле́но ему́. Прокл же приступи́ к две́рем, и призре́в сква́жнею, ви́дев Иоа́нна седя́ща и пи́шуща, и некоего бесе́дующа созади́ ко у́ху. Бя́ше же о́браз его́ взлыс, брада́ сверше́на и пло́ска. И отше́д рече́ челове́ку тому́: Потерпи́ ма́ло, ин бо пре́жде тебе́ вшел есть к нему́. Ма́ло же преме́длив, воста́ Прокл, и ви́де та́коже пи́шуща Иоа́нна, и о́ного ше́пчуща. Си́це сотвори́ и тре́тие. И начаша клепа́ти у́треннюю. Тогда́ Прокл рече́: Воста́в иди́ в дом твой, отсе́ле не бесе́дует ни с ки́мже. И с вели́кою печа́лию отъи́де. Сие́ же сотвори́ и во втору́ю нощь, и в тре́тию та́коже ви́де. Ктому́ Прокл не отъи́де от две́рий. По обы́чаю же прии́де челове́к той па́ки. И воста́в Прокл прибли́жися к две́рем, и прини́к ви́де я́ бесе́дующа к себе́. Тогда́ рече́ к челове́ку: Воста́в иди́ в дом твой, и бу́ди моля́ Бо́га, да помо́жет ти Бог: ви́жу бо и́же прихо́дит к патриа́рху, от Бо́га посыла́емь есть, зане́ неви́димо вхо́дит к нему́. У́тру же бы́вшу, воспомяну́ блаже́нный Иоа́нн о му́же том, и призва́в Про́кла рече́ ему́: Не прии́де ли се́мо он, и́же бе возвести́л ми, его́же ра́ди хоте́ приити́ к нам? Той же отвеща́в рече́ ему́: Ей, пои́стинне о́тче, се тре́тию нощь и́мать приходя́ се́мо. Он же реч́е: Чесо́ ра́ди не́си мне помянул́ о нем? Отвеща́в же Прокл рече́: Со ине́м бесе́довал еси́ ты еди́н, того́ ра́ди не смех дерзну́ти вни́ти к тебе́. Сей же рече́: С ким? Несть был никто́же у мене́ в сию́ нощь. Тогда́ Прокл испове́да лице́ и о́браз яви́вшагося ему́. И ка́ко уста́ его́ бя́ху до́ле при ушеси́, и о́тай ти глаго́лаше шепча́ во у́хо, тебе́ же пи́шущу. Блаже́нный же Иоа́нн чудя́шеся сие́ слы́шав от него. И я́ко умолче́ Прокл бесе́дуя, воззре́ на ико́ну свята́го апо́стола Па́вла, и ви́дев о́браз его́ тако́в же, я́коже яви́вшагося ему́, и поклони́ся Иоа́нну рече́: [пе́рстом показу́я на об́раз], прости́ мя о́тче, его́же ви́дех глаго́люща к тебе́, подо́бен есть сему́ я́коже мню, той есть сей. Тогда́ разуме́в прему́дрый Иоа́нн, я́ко Бог его́ послу́шал есть, и извести́л ему́ есть, я́ко прия́тно де́ло его́ есть, е́же писа́ше Па́вла апо́стола посла́ние, яко самому́ апо́столу пове́дающу ему́, воста́в на моли́тву, помоли́ся Го́сподеви, яко не презре́ моли́твы его́. И посе́м шед к царю́ умоли́ челове́ка того́ су́щаго в беде́ той, и в свой сан возврати́ его́ царь.

А́вва Па́мво, посла́ ученика́ своего́ во Александри́ю град, потре́бы ра́ди не́кия, и прода́ти ручно́е его́ де́ло. Сотвори́ же дний пятна́десять во гра́де, я́коже глаго́лаше нам: я́ко в нощи́ седя́ше в па́перте церко́вней свята́го Ма́рка, и ви́дев чин церко́вный, и возврати́ся к ста́рцу, изучи́ же и тропари́. Рече́ же ста́рец ему́: Ви́жу тя ча́до смуще́на, еда́ кая напа́сть прилучи́ся ти во гра́де? И глаго́ла брат ста́рцу: Естество́м о́тче в небреже́нии конча́емь дни своя́ в пусты́ни сей, да ни кано́ном учи́мся, ни тропаре́м. Ше́дшу ми убо во Александри́ю, ви́дех чин церко́вный ка́ко пою́т, и в печа́ли бых вели́цей, чесо́ ра́ди и мы не пое́м кано́на, или́ тропаре́й? Глаго́ла ста́рец ему́: Го́ре нам ча́до, я́ко приспе́ют дни́е, егда́ оста́вят мона́си тве́рдую пи́щу, рече́нную Святы́м Ду́хом, и восле́дуют пе́нием и гла́сом. Ко́е у́бо умиле́ние, или́ сле́зы ражда́ются от тропаре́й? Кое у́бо умиле́ние мона́хом, егда́ стоя́т в ке́ллии, или́ в це́ркви, и возвыша́ют гла́сы своя́ а́ки воло́ве? Но а́ще пред Бо́гом стои́м, во мно́зе умиле́нии подоба́ет нам стоя́ти, а не глумя́щымся. И́бо не изыдо́ша мона́си из ми́ра, да глумя́тся и крася́т пе́ние, и состроя́ют гла́сы, и трясу́т рука́ми, и митуша́ют нога́ми. Но подоба́ет нам во стра́се мно́зе и тре́пете, со слеза́ми Бо́га моли́ти, и со умиле́нием, с воздыха́нием же и со благобоя́зньством, ти́хим и смире́ным гла́сом, моли́твы Бо́гу приноси́ти. Се у́бо глаго́лю ча́до: Я́ко прии́дут дни́е, и расказя́т мона́си кни́ги, загла́дят оте́ческая жития́, и преподо́бных муже́й преда́ния, пи́шуще тропари́, и еллинская писа́ния. Сего ра́ди отцы́ на́ши ре́ша: Не пиши́те до́брою гра́мотою в пусты́ни живу́щии слове́с на ко́жаных ха́ртиях. Хо́щет бо после́дний род гла́дити жития́ святы́х оте́ц, и писа́ти по хоте́нию своему́. Рече́ ему́ брат: Что у́бо а́ще пременя́тся обы́чаи, и преда́ния христиа́нская? Не бу́дут ли иере́и в це́рквах, да сия́ бу́дут? И рече́ ста́рец: В такова́я времена́ изся́кнет любы́ мно́гих. И бу́дет скорбь нема́ла, пога́ных наше́ствие: па́губная я́зя: царе́м неустрое́ние: князе́м неуправле́ние, и безчи́ние: святи́телем ласкосе́рдие: мона́хом небреже́ние. Игу́мени небрещи́ имут своего спасе́ния, ни ста́да своего́. Любе́зниви вси и тщи́ви на пиры́, и сварли́вы, и лени́вы на моли́тву, гото́вы на оклевета́ние, и е́же осужда́ти. Житию́ ста́рец и слове́с, не уподобятся, ни послу́шают. Но па́че бляду́ще глаго́лати имут: А́ще бы́хом и мы во дни тех бы́ли, подвиза́лися бы́хом. Епи́скопи же време́н тех бу́дут, стыдя́щеся лиц си́льных, и судя́ще суды́ по мзде, не заступающе убо́гих на суде́, оскорбля́юще вдови́ц, и наси́лие де́юще сирота́м. К сему́ же вни́дет в лю́ди безве́рие, и не́нависть, за́висть, и вражда́, реть, татбы́, и и́гры, пия́нства, и хище́ния. И рече́ у́бо брат: Что сотвори́т кто в такова́я ле́та? И рече́ ста́рец: В та времена́ и ле́та, спаса́яй спасе́т ду́шу свою́, вели́к бу́дет во Ца́рствии небе́снем. Бо́гу на́шему сла́ва, ны́не и пр́исно, и во ве́ки веко́в. Ами́нь.