Стихи́:

Мечь сконча́ет Гу́рия и Само́на:

И пла́мень Ави́ва, на сковраде́ огне́ный мечь:

В пя́тый на деся́тый Ави́ва умори́ ме́дяное ору́жие.

В сих у́бо Само́н и Гу́рий пострада́ша при Диоклитиа́не цари́ и Анто́нии ду́ксе. И оболга́ни бы́вше, я́ко препира́ют челове́ки, е́же не пожре́ти и́долом, и а́бие пове́шени бы́вше по еди́ной ко́ждо ру́це, нога́м их отягче́ным долу́. И пребы́ша вы́ше ви́сяще от тре́тияго часа́ да́же до девятаго . Та́же сведе́ни бы́вше и в те́мне ме́сте в темни́це ввержени бы́вше, в дре́вех но́зе их заби́вше. И пребы́ша та́мо томи́мы гла́дом и жа́ждею четвероме́сячное вре́мя. По сих же святы́й Само́н пове́шен бысть за еди́ну но́гу, и изви́ша коле́но его́, и ви́сяше от втора́го часа́ да́же и до девя́таго. Гу́рий же изнемо́г, от слуг му́чен, и та́ко с Само́ном ме́чную прия́ша кончи́ну. А Ави́в же, иже диа́кон быв чи́ном, ят быв при Ликине́и цари́, и обе́шен бысть и бие́н, и сведе́н вопроше́н бысть, а́ще пожре́т и́долом. И не повину́вся, огню́ пре́дан бысть, и та́ко сверши́ся муче́ние его́.

Стихи́:

Огнь Елпи́дие с обои́ми прии́мь дру́ги,

Возда́нием наде́жды возбужда́ше.

Блаже́нный Елпи́дий, от боля́рскаго сове́та сый, в ца́рство Иулиа́на престу́пника. И та́йными ве́щьми уверя́емь, и зако́ны пиша́, христиани́н вменя́емь бя́ше. Предста́в у́бо престу́пнику Иулиа́ну: и во власяну́ю ри́зу облачи́тся, желе́зными гвоздьми́ нани́зану су́щу, и смоло́ю вря́щею све́рху ма́жему. Та́же бие́н быв по всех удесе́х теле́сных и гвоздны́я пя́ты (верхи́) в те́ло его́ вхожда́ху. И в ров вве́ржен, вря́щею водо́ю облива́емь быва́ет, я́ко пло́ти его́ горе́ти. И па́ки смоло́ю, и ло́ем, и ины́ми такове́йшими, пролива́юще жгу́щими бы́лии, во еди́но слия́в беззако́нный пес, зело́ разже́г возлива́ти на согни́вшыя его́ ра́ны повеле́. И па́ки сия́ люте́йшая, жу́пел мног с се́рою слия́в влива́ти во уста́ его повелева́ет. Та́же к ко́нем и юнце́м ди́виим, ку́пно со Евсто́хием, и Марке́ллом привяза́емь быва́ет на растерза́ние. И о́нем же ника́ко поступи́вшым. Посе́м па́лицами су́рово удеса́ их сокруши́ша, и во огнь вве́ржени бы́ша. И та́ко преда́ша своя́ ду́шы в ру́це Бо́га Жи́ва. Глаго́лется же о сих: в Карми́льстей горе́ погребе́ным бы́ти телесе́м их. Гро́мом же и мо́лниям внеза́пу бы́вшым, Христу́ со а́нгельскими си́лами прише́дшу, и му́ченики целова́ти. Евстохия же и Марке́лла преложи́в иде́же изво́ли им ме́сто. Елпи́дия же ди́внаго а́бие оживи́в, и укрепи́в, ко вторы́м подвиго́м па́ки посла́. Его́же узре́в Иулиа́н, на че́тверо протя́гнути его́ повеле́, и неми́лостивно би́ти, и о́цет с со́лию полива́ти по ра́нам, и о́стрыми пила́ми я́звы его́ те́рти. И по у́глию горя́щу просте́рти, и у́глие жгу́щи по главе́ его́ посы́пати, и на дре́во мучи́тельное обе́сити. И щит желе́зен разжже́гше, созади́ ему́ да́же и до плещу́ приложи́ша, пос́ыпавше жера́тком жгу́щим по щиту́, доне́леже вну́тренняя ему́ запали́шася: и мла́том по главе́ бие́мь быв. И сему́ бы́вшу, чу́до зря́щым ве́лие сотвори́. И ве́роваша в Го́спода муже́й я́ко шесть ты́сящь. И моли́твою и́долы стер. И по всех сих святы́й в пещь о́гненную вве́ржен сконча́ся. Святу́ю же свою́ ду́шу в ру́це Бо́гу предаде́.

В ца́рство Ликини́я нечести́ваго, святы́й Ави́в диа́кон бе, и учи́тель Христо́вы Це́ркве, я́же во Ед́есе. И вся приходя́щыя к нему́ уча́ше ве́ровати во Христа́. И сие́ уве́дев царь разгне́вася, и посла́в ят его́, и мно́го му́чив его́. Последи́ же разже́гше пещь в Филисе́ле, вверго́ша его́ в ню: в не́йже поя́ и благодаря́ Бо́га, прия́т вене́ц. Егоже взе́мше христиа́не, ми́ром пома́завше, с кади́лы, и пе́сньми духо́вными положи́ша во Еде́се, со святы́м Гу́рием и Само́ном, сотво́ршима чу́до о деви́це, ю́же го́тфин прельсти́, кля́твы ра́ди. И поя́т от Еде́са хотя́ име́ти ю в жену́: и приве́д в свою́ зе́млю, сотвори́ ю́ рабу́. И посе́м затвори́ ю́ во гро́бе жи́ву. Но та свята́я му́ченика, поне́же от свята́го ею́ гро́ба поя́л ю́ бе, избависта ю́ от сме́рти, и в це́рковь свою́ принесо́ста. И прия́т ю́ ма́ти ея́ в свою́ оби́тель.

Му́ченик Дими́трий бе при Максимиа́не царе́, от села́ Дао́да, та́ко нарица́ема. Оклевета́н же бысть от идолослужи́телей, я́ко христиани́н: ят бысть иге́моном Пу́мплием. И вопроше́н быв, пропове́да Христа́ Бо́га на́шего, в ве́ру от Свята́го Ду́ха поспеша́емь. И уча́ше та́мо предстоя́щыя о вочелове́чении Го́спода на́шего Иису́са Христа, неизрече́ннаго ра́ди смотре́ния Его́, и всея́ бла́гости и человеколю́бия. Посе́м и́дол душегу́бную пре́лесть изобличи́, я́ко глу́си, и не́ми, и сле́пи: и и́же и чтут я́. Сего́ ради на я́рость подви́же иге́мона. И вско́ре мече́м главу его́ отсеко́ша. И та́ко сконча́ся, прии́мь небесный вене́ц. Честны́я же его́ мо́щи погребены́ бы́ша ве́рными, и богобоя́знивыми му́жи.

Ве́домо бу́ди: и́же ми́лостыню твори́т кто от пра́веднаго име́ния, и богоуго́дно живе́т, и вся́ку доброде́тель исправля́я, сей ве́лий во Ца́рствии Небе́снем. Стра́сти же и беды́ и вся́кия напа́сти не хотя́й терпе́ти, мал есть пред Бо́гом. А и́же, па́ки реку́, в ве́ре и доброде́тели живя́, страсти и беды и вся́кия напа́сти прие́млет с ра́достию, непреврати́мо, ни отска́ча, той есть бо́лий пред Бо́гом. А и́же в ве́ре и доброде́тели живя́ и в челове́цех есть целому́др, и во а́нгелех есть сла́вимь. А и́же зде согреша́юще, и бед не прие́млюще ника́цех же, бо́льшу муче́нию сподо́бятся. А и́же зде а́ще и согреши́ша, ти с покая́нием и беды́ прие́млюще терпя́т до́бре, хва́ляще Бо́га и за творя́щая беды́ молящеся, ти со святы́ми ра́вно прии́мут жре́бий. А́ще ли кому́ неве́рно сло́во се, да помы́сли беды́ И́ововы и стра́сти апо́стольския, па́че же Па́вловы. Егда бо И́ов ми́лостыню творя́ше и богоуго́дно живя́ше, тогда́ мал бя́ше пред Бо́гом, а пред челове́ки сла́вен. А егда́ беды́ прия́, тогда́ бысть вели́к пред Бо́гом и сл́авен во всех святы́х бысть. Та́коже и апо́столи, а́ще чудеса́ творя́ху и и́ну доброде́тель, не сл́авни бя́ху. А егда́ же мно́ги беды́ и стра́сти подъя́ша, тогда́ бы́ша просла́влени вельми́. И Па́вел бо всех бо́ле беды́ подъя́, бо́ле всех и вене́ц прия́: той бо во всех избра́нний есть, да о том избра́нем вси избра́ннии спасе́ние улуча́т, и друзи́и улучи́ша. Я́коже бо зла́то огне́м искуша́емо, та́коже и святи́и стра́сти. А гре́шнии во льго́те: проти́ву изволе́нию их Бог им попусти́, зане́же не изво́лиша ве́чныя пи́щи, но жи́зни сей вре́менней привяза́шася. Да тем и́мемся о́ноя, и оби́льно пода́ст нам Бог блага́я. О́ноя же не и́мут прия́ти, сию́ жизнь гоня́щии и лю́бящии ю́.