Стихи́:

Ма́ло утаи́ся и ми́мо и́де нас, Плато́н:

Плато́н он, его́ широ́к мечь посече́,

В осемна́десятый Плато́н у́мре мече́м.

Сий бя́ше от страны́ Галати́йския, гра́да Анки́рскаго, брат свята́го му́ченика Антио́ха. И Христо́ва ра́ди испове́дания, приведе́н бысть Агрипи́ну иге́мону, юн сый во́зрастом. Бие́н бысть двана́десять во́ины, и на одре́ ме́дне и раждеже́не положе́н, и верху́ же́злием бие́н. И млаты́ раждеже́гше, под мы́шцы его́ положи́ша и по ре́бром. И на ремение кожу его́ скрои́ша: и́же исто́рг святы́й, еди́н реме́нь ве́рже на лице́ Агрипи́ну, облича́я суровство́ его́. Тогда́, повеле́нием Агрипи́новым, и мече́м главу́ ему́ отсеко́ша.

Стихи́:

Терпеливому́дреному Рома́ну всяк да удиви́тся:

С ра́достию бо удавле́ние терпя́ше.

Стихи́ младе́нцу:

Ло́но Авраа́мле младе́нец получи́ мече́м:

Вифлее́мским приседя́ младе́нцем, показа́ся.

Сий бя́ше при Максимиа́не цари́. Любве́ ра́ди Христо́вы, хотя́щу вни́ти Асклипиа́ду епа́рху в це́рковь и́дольскую, удержа́ его́ и глаго́ла: «Не суть и́доли бо́зи, Еди́н Бог есть Христо́с». Бие́н бысть по усто́м и пове́шен, стро́ган быв по лани́тома. И приведено́ же бысть отроча́ и вопроше́но бысть епа́рхом: «Ко́его Бо́га чте́ши», и оно́ рече́: «Христа́», мече́м посе́чено бысть. Свято́му же Рома́ну язы́к уре́заша: и пото́м пресла́внейше веща́ша, благодаря́ Бо́га. Пове́дано же бысть о пресла́внем чудеси́ и царю́ Максимиа́ну. И повеле́нием его́, в темни́цы уда́влен бысть и, вре́меннаго живота́ лише́н, венце́м муче́ния увязе́ся.

Стихи́:

Закхе́й пол бога́тства и́мать пе́рваго,

Ны́не Спа́се кровь излива́ет от меча́:

Алфе́й пожида́я и главу́ подая́й,

И жре́бий и́маши ‐ непресеко́мое бога́тство.

Сей Закхе́й приведе́н бысть на суди́ще, желе́зо тя́жко на вы́и нося́. Вопроше́н же, и Христа испове́да: лю́то и безчелове́чно му́чен быв. И в кла́де но́зе его́ кли́ны заби́ша, и четы́ре дни муче́ние до́блественно терпя́ше. Посе́м приведе́н бысть Алфе́й, испо́лнен Ду́ха Свята́го. И я́звами все те́ло его́ обра́нено, и ре́бром сожже́нным: И той приведе́н в темни́цу, и с подвижником Закхе́ем в то́йже кла́де но́зе его́ заби́ша, и нощь и день пострада́ша. И посе́м о́ба изведе́на, и ме́чную кончи́ну прия́ста о Го́споде.

Бе не́кий муж во Еги́пте, старе́йшина в лю́дех: и в того́ дщерь впал бя́ше бес лют, и м́учаше ю́. Имя́ше же оте́ц ея любо́вь к не́коему мона́ху, и той рече́ к нему́: Ничто́же мо́жет исцели́ти дщерь твою́, то́кмо я́же аз зна́ю отше́льники. А́ще я́ и умо́лиши, не хотя́т сотвори́ти за смире́ние. Но си́це да сотвори́ им: Егда́ прии́дут на торг продая́ти рукоде́лие свое́, купи́ у них. Да егда́ вни́дут взя́ти це́ну, глаго́ли им: Да сотворя́т моли́тву, и ве́рую, я́ко избе́гнет от нея́ бес. И шед, обре́те еди́наго ученика́ Мака́риева стоя́ща на торгу́, и сосу́ды иму́ща, и купи́в у него́, поя́т его́ в дом, взя́ти це́ну ко́шниц. И егда́ вни́де мона́х он в храм, бесну́ющяся уда́ри его́ за у́хо. Он же обрати́ другу́ю ланиту по за́поведи. И му́чима бя́ше де́ва де́моном, рече́: О́ ну́жда, за́поведь сего́ изгоня́ет мя. И а́бие исцеле́ де́ва. И я́ко прии́де к ста́рцем, испове́да бывшая. И ти́и просла́виша Бо́га глаго́люще: Обы́чай есть горды́ни неприя́знстей, па́дати от смире́ния, и от за́поведи Христо́вы ско́ро избе́гати. Ему́же сла́ва, ны́не и при́сно, и во ве́ки веко́в. Аминь.