Я́коже пи́шет проро́к Дави́д: «Бла́го мне, я́ко смири́л мя еси́, да научу́ся оправда́нием Твои́м. Благ мне зако́н уст Твои́х па́че ты́сящь зла́та и сребра́».

Ви́дим, возлю́бленнии, я́ко на святы́я Своя уго́дники при́сно попуща́ет Бог напа́стем приходи́ти: пра́веднии у́бо просветя́тся терпе́нием в ско́рбех, яко злато во огни, и при́снии раби́ и дру́зи Бо́жии нарица́ются. Слабо же и лениво живу́щих о Бо́жиих повеле́ниих, прише́дши же беде́, па́че погиба́ют отча́янием и неве́рствием, якоже пи́шется: «Мно́ги ра́ны гре́шному, упова́ющаго же на Го́спода ми́лость обы́дет». И па́ки: «Наде́ющиися на Го́спода, я́ко гора́ Сио́н, не подви́жится». Я́коже и сия́ пра́ведника: непло́дством вред прие́млюща и уничиже́на, и укоре́на бы́вша безча́дием, ко Творцу́ Зижди́телю своему́ прибего́ста: на пост и на моли́тву вда́стася: и приле́жно тру́ждьшася, прия́ста плод пра́вды. Еда́ ли у́бо не можа́ше пре́жде проше́ния дарова́ти пра́ведникома чад? Но, да яви́тся любы́ ею́ и наде́жда к Бо́гу. Я́ко бо во чте́ных слы́шахом, возлю́бленнии, и ны́не па́ки помяне́м та же. Вчера́ рождество́ Богоро́дицы сла́вихом: яко исто́чник на́шему спасе́нию, чи́стыя воды́ ве́рных сердца́ напои́ша. Ны́не же, роди́телема тоя́ почуди́вшеся, песнь возсле́м те́ма, ве́рное стадо, ка́ко поноше́ние приима́ше та и печа́лию не отпадо́ста, не отступи́ста ве́ры, не взыска́ста вра́чев, не призва́ста волхв, ни обяза́ния, ни чароде́и взыска́ста, ни бы́лия смеше́нию испи́ста. Но что? И́бо рече́: «Иоаки́м бога́т зело́» - бога́т бе не толма́ име́нием, я́коже бе ве́рою, и я́коже «принесо́ста да́ры своя́ к Бо́гу» пра́ведника. Повеле́но бо бе в зако́не деся́тое Бо́гови отдая́ти, си́речь це́ркви Бо́жии, рабо́тником и слуга́м хра́ма Бо́жия: да безпреста́ни славосло́вие Бо́жие и слу́жба церко́вная пребыва́ет.

«Прибли́жи бо ся день Госпо́день вели́кий, и приноша́ху сы́нове Изра́илевы да́ры своя́». Иоаки́м же принесе́ не то́кмо уро́к, но сугу́бо. «И ста пред ним Руви́м, глаго́ля: не подоба́ет ти пре́жде принести́ даро́в свои́х, елма́ не́си плода́ сотвори́л во Изра́или. И опеча́лися Иоаки́м зело́», но не отча́яся, ни прекосло́ви. Но прия́т поноше́ние и уничиже́ние претерпе́, и не сжа́ли си, поне́же дарова́ его́ неприя́тни бы́ша: не отрече́ ничто́же укаря́ющему его́, но оскорбе́, и наде́жды не отпаде́: но изыска́ сове́тника до́бра и дру́га ве́рна – моли́тву и пост, и та бы́ста дово́льна хода́тая к Бо́гу. «И помяну́ша патриа́рха Авраа́ма, я́ко в после́дняя его́ дни дасть ему́ Бог сы́на Исаа́ка. Не яви́жеся жене́ свое́й А́нне [а́ще зело́ и та пра́ведна бе и боя́щися Бо́га], но вда́ся сам в пусты́ню и потче́ ку́щу свою́ та́мо», да безмяте́жно и без пли́ща помо́лится Богови, ве́дый, я́ко мно́га молва́ есть в дому́ и мно́зи па́костящии и не даду́ще моли́твы чи́сты возсыла́ти к Бо́гу: тем, утаився супру́ги своея́ А́нны, бежа́ в пу́сто ме́сто. «И алка́ дний четы́редесять и но́щий четы́редесять, глаго́ля в себе́: не сни́ду ни на бра́шно, ни на питие́, доне́леже присети́т мене́ Госпо́дь Бог мой: и бу́дет ми моли́тва бра́шно и питие́».

Жена́ же его́ А́нна два пла́ча творя́ше, и глаго́лаше: да желе́ю о вдовстве́ мое́м и пла́чу о безча́дии мое́м. И рече ей Иуди́фь, раба́ ея́: «Доко́ле смиря́еши ду́шу свою́? Се бо прибли́жися день Госпо́день вели́кий и не подоба́ет ти желе́ти». О́ вели́кое доброразу́мие рабы́ни! Где ны́не бога́тии? Потщи́теся таки́я рабы́ни себе́ стяжа́ти, таковы́ сове́тники, таковы́ уте́шители: не потако́вы творя́щая, не ласка́тели, но и́стинныя прия́тели! «И оскорбе́ А́нна», но оба́че послу́ша гла́са рабы́ни своея́: «и совлече ризы своя желе́твеныя». Виждь ми ве́ру, ю́же име́ к Бо́гу! Слы́шавши праздник Господень, све́рже же́лю, а́ки уже́ прии́мши ра́дость. «Измы́ главу́ и облече́ся в ри́зы своя́ посаже́ныя, и исше́дши в огра́д, и се́дши под да́фниею, моля́шеся Бо́гу, глаго́люще: Го́споди, Бо́же оте́ц мои́х! Благослови́ мя и услы́ши моле́ния моего́, я́коже благослови́ Са́рру и дасть ей плод – Исаа́ка».

«И возре́вши на не́бо и ви́девши гнездо́ пти́че на да́фнии, сотвори́ плачь в себе́ глаго́лющи: го́ре мне, яко не подо́бна есмь ни пти́цам небе́сным, ни звере́м земны́м: яко аз кля́тва бых пред сы́ны Изра́илевы и поруга́ша ми ся и изгна́ша мя из це́ркви Го́спода Бо́га моеѓо».

«И се а́нгел Госпо́день ста пред не́ю глаго́ля и рече́: А́нно, А́нно! Послу́ша Госпо́дь Бог моли́твы твоея́: зачне́ши бо и роди́ши, и пропове́сться твой плод по всей земли́. И рече́ А́нна: Жив Госпо́дь Бог мой! А́ще рожу́ му́жеск пол, ли же́неск, принесу́ е́ дар Го́споду, Бо́гу моем́у. Си́це же Иоаки́му яви́ся а́нгел Госпо́день, глаго́ля: Послу́ша Госпо́дь Бог моли́твы твоея́. Сни́ди отту́ду: Се бо А́нна, жена́ твоя́, зачне́т». Ви́десте ли, коли́ко добро́ прия́ти уко́р и поноше́ние претерпе́ти, и упова́ти на Бо́га Всеви́дящаго: «Близ бо есть Госпо́дь сокруше́ных се́рдцем и смире́ныя ду́хом спасе́т». Тому́ поревну́йте му́жу, ка́ко не поноси́ жене́ свое́й безча́дия ра́ди: ка́ко не изгна́, ни отпусти́, я́коже ны́не мно́зи бу́яцы творя́т, не боя́щеся Бо́га. Сея́ да подража́ют жены́, ка́ко не потече́ к волхво́м: како не призва́ чароде́ивых баб, да я пома́жут зло́ю тою ма́стию, плода́ ра́ди. Опеча́лися, но ве́ры и наде́жды, я́же к Богу, не отступи́ и прия́ плод пра́вды, я́же и сподо́бися бы́ти Ма́ти Госпо́дня, Творца́ всея́ тва́ри.

Бысть же пе́рвое ле́то отрокови́цы: и сотвори́ обе́д вели́к Иоаки́м. И призва́ иере́и и ста́рцы, и кни́жники, и весь Изра́иль. И принесе́ открови́цу Иоаки́м иере́ом, и благослови́ша ю́, глаго́люще: Бо́же оте́ц на́ших! Благослови́ отрокови́цу сию́ и даждь ей и́мя имени́то, ве́чно во всех ро́дех. И реко́ша вси лю́дие: Бу́ди, бу́ди! Ами́нь. И принес́о́ша ю́ ко архиере́ом, и ти́и благослови́ша ю́, глаго́люще: Бо́же высо́там! При́зри на де́тищь сий и благослови́ ю́ святы́м благослове́нием, е́же преме́ны не и́мать. И восхи́ти ю́ ма́ти ея́ во свяще́ние лега́льницы ея́, и дасть де́тищу сосе́ц». Где убо суть ны́не жены́, и́же свои́х чад небрегу́ще дои́ти и даром Бо́жиим ме́щущися, но рабы́ни млеко́м пита́юще я́? Но оле безсту́дия того́ и величания, и неи́стовства, и немилосе́рдия! К ни́мже рече́м: «Безу́мныя в жена́х, пове́ждьте нам: ќая мати во святы́х жена́х свой де́тищь рабыни млеко́м воспита́? Кий зверь си́це свой поро́д возненави́де и отве́рже от себе́, я́коже вы? Но отсе́ле постыди́теся, облича́емы от святы́х жен всех: я́ко, си́це творя́ще, явля́етеся не иму́ще утро́бы милосе́рдия ко свои́м ча́дом.

«Бы́вшу же де́тищу двою́ лет, рече́ ма́ти А́нна к му́жу своему́ Иоаки́му: Да совершу́ у́бо свой обе́т, е́же обеща́х к Го́сподеви, Бо́гу моему́: ве́деве отрокови́цу в дом Госпо́день. И рече́ Иоаки́м: по́ждеве отрокови́цы до трий лет, еда́ ка́ко де́тищь взы́щет роди́телю. Бы́вши же трею́ лет, ведо́ста ю́ роди́теле в це́рковь со сла́вою, и отрокови́цы чи́сты провожда́юще де́тищь в це́рковь Госпо́дню: и не взыска́ роди́телю, ни возопи́ по ма́тери». Кому́ ся почужду́? Роди́телема ли, я́ко не сжа́листа си отходя́ща своего́ младе́нца единоча́да во хра́ме Господни? «И прия́т ю́ иере́й и лобза́в посади́ ю́ на вы́шнем степе́ни внутреней заве́се, во свята́я святы́х. И не взыска́ ма́тере своея́ Мари́я, но потрепа́ нога́ма свои́ма». И ужаса́хуся, и чужда́хуся вси лю́дие, ка́ко Заха́рия введ отрокови́цу во свята́я святы́х, иде́же бе ковче́г заве́та и в нем ру́чка злата́, иму́щия ма́нну, и жезл Ааро́нь прозя́бший, и богопи́санныя скрижа́ли. Се же все о́браз бя́ше отрокови́цы Святе́й и Присноде́вей Мари́и, Я́же сподо́бися Богоро́дица нарещи́ся у́бо и бы́ти Храм Бо́жий и Жили́ще Свята́го Ду́ха. Иде́же бо повеле́но и взако́нено от Бога еди́ною лет еди́ному жерцу́ со стра́хом во свято́е место внити и покади́ти, о́ чу́до!, та́мо, иде́же бе му́жем возбранено входа, па́чеже ни возре́ти дерзня́ху: ту же́неск пол, Мари́я, без сумне́ния посажде́на бысть, иде́же живя́ше и хожда́ше, а́нгелом пита́ема, а́ки го́лубь, в безмяте́жне ме́сте святе́м блюдо́ма же Иису́су. О́ вели́кое та́инство! О́ смотре́ние Бо́жие! Где суть ны́не неразу́мнии жи́дове и окамене́нии се́рдцем, да реку́т нам: ка́ко, иде́же иере́и не дерзну́т вни́ти, ту и ны́не Мари́я без стра́ха, а́ки в черто́зе све́тле, лику́ет и со а́нгелы бесе́дует? Но не и́мут, что рещи́, непокори́вии и неве́рнии: «о́чи имут и не видят» и уши́ма проро́к свои́х не слы́шат, врази́ су́ще своему́ спасе́нию. Мы же, ра́дующеся, рцем с Заха́риею к Де́тищу: «Вни́де, Госпоже́ всея́ тва́ри, во свята́я святы́х водворя́ющися! Ты бо еси́ киво́т святы́ни по проро́честву Дави́дову: ты бо еси́ ру́чка злата́я, иму́щая ма́нну: ты бо еси́ жезл Ааро́нов, прозя́бший красны́й цвете́ц Христа́: ты бо еси́ кади́льница, накади́вшая до́брыя воня́ храм Бо́жий: в Тя бо всели́ся Сло́во Бо́жие и яви́ся Челове́к миру: Сын Бо́жий изба́ви челове́ки от льсти и от рабо́ты диа́воли, Сам за ны му́ку прии́м, да позна́им своего́ Творца́. Того́ моли́, Влады́чице всея́ тва́ри, Сы́на Своего́ и Бо́га на́шего, я́коже пре́жде рече́ проро́к: «Бог от ю́га прии́дет и Святы́й от горы́ се́нныя ча́щи», и па́ки: «Бог на земли́ яви́ся и с челове́ки поживе́»! Не про́сто у́бо яви́ся, но от девственыя утро́бы плоть заи́м роди́ся, я́коже Сам весть, деви́ческая зна́мения це́ла сохра́нь, к не́йже рече́ предста́в арха́нгел Гаврии́л: «Ра́дуйся, обра́дованная, Госпо́дь с Тобо́ю». Тому́ сла́ва, честь и держа́ва Отцу́ и Сы́ну и Свято́му Ду́ху ны́не и при́сно и во ве́ки веко́в. Ами́нь.

Све́тлое и пресла́вное настоя́щее торжество́ и любопразднственых любо́вь к пе́нию воздви́же, Присноде́вы в це́рковь вхожде́ние: днесь бо не́бо и земля́, о́бщий пра́здник соверша́ющи, обоя́ Соде́теля сла́вят, и́же от земна́го естества́ Богоотрокови́цу Де́ву избра́вшаго во Свое селе́ние. Днесь Я́же пре́жде всех век проуста́вленое та́инство и напосле́док яви́тися хотя́щее украша́ется в жили́ще пресла́вное. Днесь Я́же от обетова́ния ро́ждьшися, от Иоаки́ма и А́нны, прино́сится те́ма, честны́й Дар И́же по сих из Тоя́ роди́тися благоизво́лившему. Днесь благода́ти нача́ло в це́рковь введена́ бысть, триле́тна су́щи, и де́вы Ю́ со свеща́ми провожда́ют. Днесь разреше́ние непло́дныя кля́твы, дар благослове́ния, во свята́я святы́х вво́дится. Днесь проро́ческое пропове́дание от первосвяще́нника и проро́ка Заха́рии в неви́димая неви́димых вво́дится: иде́же сам еди́ною ле́та со благогове́нием вхо́дит, и сия́ све́тло с невозбране́нием день и нощь седя́ше.

Кто не диви́тся пресла́вному чудеси́? Кто не чуди́тся, зря во святи́лищи приседя́щую свяще́нником бы́вшую непристу́пну Мари́ю небла́знену? Сия́ же к нам совокупле́ния Госпо́дня зача́ло! Сия́ же а́нгел с челове́ки смеше́нию предначерта́ние! Сия́ на́шего воззва́ния зна́мение! Сия́ терноно́снаго жития́ на́шего осужде́ния пе́рваго, е́же «проклята́ земля́ в де́лех твои́х, те́рние и волче́ц да прозя́бнет тебе́» (Быт, 3:17) и е́же «В по́те лица́ твоего́ да я́си хлеб твой» изменя́я! Се е́же «умноже́ния печа́лий твои́х и воздыха́ния твоего́» (Быт. 3:19), «в печа́лех роди́ши ча́да» (Быт. 3:16), изве́стное отверже́ние. Сий, ве́рнии, да пра́зднуем всечестны́й пра́здник, све́тлое торжество́, божестве́ныя блиста́юща зари́, у́мными освеща́емь светлостьми́, боже́ствеными осия́ющи мир богоразуме́ньми, е́же в трех Ли́цех Еди́ному Божеству́, Отца́ и Сы́на и Свята́го Духа, научава́ют вседержа́вие. Те́мже, сия́ вины́ возогла́вивше, зача́ло прие́мше – в це́рковь Де́выя провожде́ние, да начне́м: и зако́нное исполне́ние указа́вше, благода́ти возраще́ние и плододая́ния нарече́м. Сия́ бо Я́же святы́х Свята́я, нескве́рный Сло́ва Черто́г, де́вственое Цвете́ние, Ковче́г свяще́ния, Гора́ свята́я, боговмести́мая Сень, неопали́мая Купин́а, огнеобра́зная Колесни́ца Бо́жия, Голуби́ца нескве́рная, простра́нное Боже́ственому Сло́ву Вмести́лище, богопросвеще́нный О́блак, прукра́шеная Цари́ца, от се́мени Дави́да восходя́щи, Дави́довем Созда́телем и Бо́гом сохранена́ бысть во Свое́ Тому́ жили́ще.

Иоаки́м бо, в двана́десятном коле́не Изра́илеве богат сый и пра́веден, приноша́ше да́ры своя́ пе́рвее Бо́гу. Те́мже, яко неимущу се́мени, но су́щу тому́ безча́дну, свяще́нницы отрева́ху от хра́ма Господня, глаго́люще: «Несть тебе́ леть сия́ приноси́ти Бо́гови, понеже се́мени не́си сотвори́л во Изра́или». И той дряхл сни́де от хра́ма Госпо́дня, печа́лию одержи́мь. И а́бие в горе́ един Бо́гу помоли́вся, сокруше́ным се́рдцем и боле́зненою душе́ю, возопи́, глаго́ля: «Го́споди, Ты, Сердцеве́дче, И́же ви́димых и неви́димых Зижди́телю, И́же «Не́бо распростры́й я́ко ко́жу» (Пс. 103:2), И́же со́лнце в просвеще́ние дне́ви вчинивый и луну в озаре́ние нощи со зве́здами сотвори́вый, И́же облако́м возду́х одождева́ти повеле́вый и дыха́ния ве́тром собирая, И́же мо́ре обузда́вый песко́м и се ро́дом рыб напо́лнив, И́же су́шу ро́дом безслове́сных испо́лнивый [и звере́й и птиц мно́жество] и сия́ пита́я хоте́нием и веле́нием, И́же лицу́ земно́му прозяба́яй траву́ и всех древе́с вид удобри́вый! Услы́ши мя, Милосе́рде, и да́руй ми ча́до! Даждь ми плодоро́дия зало́г, я́ко да заградя́тся «устны́ льсти́выя, глаго́лющии на мя, раба́ Твоего́, беззако́ние горды́нею и уничиже́нием» (Пс, 30:19). Си́и пра́веднаго глаго́ли, си́и пра́отца мольбы́, сия́ Иоаки́мова боле́зненыя души́ воздыха́ния.

Что же и А́нна? Добро бо и сея́ глаго́лы воспомяну́ти. Сия́ бо, му́жеви целому́дрено сожи́тельствовавше и ю́ностный цвет в старость преве́дши, непло́дна пребы́сть все вре́мя свое́: про́чее же и яже жен испо́лнивши, есте́ственым завеща́нием безча́дна познава́ется. Темже, оше́льство супру́га ви́девши, я́ко го́рлица пустынолю́бная и единомужная, во свое́м ово́щнице мольба́ми приле́жными Творцу́ и Созда́телю взыва́ющи и глаго́лаше: «О́ Пра́ведный Го́споди Савао́ф, «Седя́й на херуви́мех» (Дан. 3:54) и сла́вимь от серафи́м, И́же «тма́ми тем а́нгел Служи́мый и ты́сящами ты́сящь» (Дан. 7:10) во́инств славослов́имь и покланя́емый, И́же Ада́ма созда́вый руко́ю Свое́ю и живо́т вонь вложи́вый, И́же живоно́сным Свои́м повеле́нием от ре́бра его́ назда́в жену́, Иже му́дрым Твои́м благоволе́нием «сотвори́в помо́щника ему́» (Быт. 2:18), обою́ во еди́но два совокупи́в, [рече́ бо: «бу́дета о́ба во еди́ну плоть» (Быт. 2:24)], И́же Авраа́му, Твоему́ уго́днику и патриа́рху, дарова́вый сы́на Исаа́ка по ста́рости и непло́дстве Са́ррине и сотвори́вый того́ мно́гим язы́ком отца́, И́же сродной и вкупоиме́нной ми А́нне дарова́вый до́браго о́трока и свяще́нника Саму́ила, я́ко богода́ннаго моли́тве сы́на и лжи и не́нависти обличи́теля! «При́зри от свята́го жили́ща Своего́» (Вар. 2:16), Вы́шний, и отве́рзи ми ложесна́ к детотворе́нию, и отжени́ от мене́ печа́ль непло́дства, и расто́ргни у́зы чадоро́дия: я́ко да рожде́нная от рабы́ Твоея́ о́трасль, лю́бо му́жеск пол, лю́бо же́неск пол, да́ное принесу́ Тебе́, я́ко кади́ло благово́нно, я́ко чи́стое приноше́ние, я́ко че́стное дарова́ние, я́ко свяще́нное возложе́ние, я́ко боже́ственое селе́ние, я́ко нескве́рненую а́гницу, я́ко перворо́днаго а́гнца, я́ко но́ваго Исаа́ка».

Си́ма же обои́ма призыва́ющима, яви́ся им а́нгел Госпо́день, благовеству́я Всечи́стыя зач́ати и глаго́ля: «Услы́ша ва́ше Вы́шний моле́ние и в ма́ле вре́мени родите дщерь, избранную в Божие жили́ще». Сия́ а́нгелу ра́достне благовести́вшу, и сше́дшу Иоаки́му с горы́ с ра́достию серде́чною и весе́лием: из непло́дныя и невозде́ланныя утро́бы, без наде́жднаго чадоно́сия явле́нием, «от по́хоти же плотски́я и от се́мени му́жеска», и вре́мя девятоме́сячнаго возраще́ния утро́ба А́ннина позна́вши, роди́ Пречи́стую Де́ву и Богоро́дицу Мари́ю, ра́дость всеми́рную.

Никто́же от церко́вных учи́тель да прии́мет се рече́ние, я́ко седмоме́сячна Де́ва рождена́ бысть. И́бо мно́гих безу́мных слы́шах, си́цева любопря́щихся и бляду́щих: и неве́рных си ху́ждьше бы́ти мню́. Сия́ церко́вная согреше́ния, сия́ це́ркве правосла́вных чу́жда! Де́ва бо и Богоотрокови́ца Мари́я до девятоме́сячнаго вре́мени во чре́ве А́ннине снизведеся, я́коже естество́ явля́ет челове́ческое: но безу́мных уста́, никоего́же порока обрести́ могу́ще, сие́ сло́во Писа́нию наложи́ша, не пра́во му́дрствующии. И никто́же да прии́мет от про́стейших се. Благоразу́мным же мы́слию и ве́рою я́ко [мню] николи́же сей глаго́л в слух их вни́де, зане́, е́же писа́ния посре́д прочита́ющи, разуме́ньми боже́ствеными сия́ сказу́ют: егда в писа́нии обря́щут волче́ц, от враг всева́емь, я́ко ча́да церко́вная, соверше́нне изсеца́ют.

Но на предлежа́щее да прии́дем, и путе́м по́вести и рождества́ ше́ствующе и сказа́юще. Глаго́лом бо и веще́м во явле́ние прише́дшим, и непоро́чней Присноде́вей Отрокови́це от пра́ведных Иоаки́ма и А́нны рожде́нной, и обе́ты своя́ испо́лнити тща́щимся, и бе ви́дети богому́дреную А́нну, ра́дующуся и игра́ющу и ра́достно ко младе́нечной Де́ве глаго́лющи: «Кто глаго́лаше из мене́, дщи, проити́ тебе́, еди́ной в ро́де родо́в блаже́ной я́вльшейся? Кто в на́дрех мои́х ви́дев тя, млеком доиму, не сла́вит и́же Тебе́ мне Дарова́вшаго, непло́дней и безча́дней? Кто сосца́, не у млеко́ точа́ща, ви́де млеко́ источа́юща, не велича́ет и́же от краесеко́маго ка́меня Источи́вшаго во́ду жа́ждущим лю́дем? Но гряди́, дщи, ко И́же Тебе́ мне Дарова́вшему! Гряди́, ковче́же освяще́ния, ко благоутро́бному Влады́це! Гряди́, две́ри жи́зни, к милосе́рдому Да́телю! Гряди, ковчеже Сло́ва, ко хра́му Госпо́дню! Вни́ди в це́рковь Госпо́дню, ми́рови ра́дости и весе́лия! Наслади́ся сего́ красоты́, его́же по ма́ле родиши яко челове́ка! Блажена есмь, я́ко таковы́я дще́ри ма́ти нари́чуся! Сра́дуйте ми ся, коле́на Изра́илева, я́ко по непло́дстве мати яви́хся, и млеко́м пита́ю отроча́, е́же яви́тся Ма́ти Вы́шняго! Начне́те, де́вы свещено́сныя, и предше́ствуйте пре́до мно́ю и Богоотрокови́цею! Воспо́йте сию́ восхвале́нием, по́йте ей в гу́слех, воскли́кнете ей с песнию духо́вною, возвели́чите сию́ во псалти́ри десятостру́нней! Дави́де, восхвали́, я́ко богооте́ц, от пле́мене твоего́ я́вльшуюся, отрокови́цу, песносло́вя великогла́сне и глаго́ля: «Слы́ши дщи и виждь, и приклони́ у́хо твое́, и забу́ди лю́ди твоя́, и дом отца́ твоего́: вожделе́ет царь добро́те твое́й».

Сия́ и сим подо́бная радостноиме́нная А́нна ре́кши, тро́ичное сокро́вище нося́щи пло́тию, триле́тну су́щу Де́ву и Богоро́дицу, в це́рковь Госпо́дню привожда́ше: и со Иоаки́мом пе́сни благода́рственыя возсыла́ющи: и лик дев свещено́сных созва́вши, достиго́ша свята́я святы́х. И Заха́рий, ра́достными устна́ми и обра́дованными усты, зане́же проро́ку и свяще́ннику и сро́днику и служи́телю зако́нному заве́ту, с весе́лием зва́ше честна́я дво́ица родитель, вопию́щи: «Приими́, Заха́рие, сень нескверне́ную! Приими́, свяще́нниче, небла́зненый ковче́г! Приими́, проро́че, кади́льницу невеще́ственаго у́гля! Приими́, пра́ведниче, кади́ло духо́вное! Приими́, всечестны́й, огнеобра́зную колесни́цу Бо́га Вы́шняго! Приими́, непоро́чный, кра́сную лозу́, я́же возрасти́т грезн присноживо́тный! Введи́ сию́ в нутренюю храма Госпо́дня! Принеси́ сию́ на ме́сто освяще́ния, егоже содела Вы́шний во Свое́ жили́ще! Возведи́ сию́ в незаходи́мая, ю́же Неви́димаго Бо́га во чре́ве поноси́ти хотя́щую! Ублаж́и сию́, блаже́ны земны́х показа́вшую! Возвели́чи сию́, вели́ких дел Бо́жиих я́вльшуюся кни́гу богопи́санную! Восприими́ сию́, от кля́твы прама́тере Е́вы нас премени́вшую! Лобза́й сию́, ко Го́споду любле́нием нас связа́вшую и вражды́ змии́ныя нас отто́ргшую! Прорцы́ о сей, проро́к я́вльшуюся исполне́ние и обетова́ния Бо́жия к челове́ком возглавле́ние! Трапе́зу боже́ственаго хле́ба, вино́ весе́лия, пита́ние неизнуря́емое, голуби́цу це́лую, небо одушевле́ное, многосве́тлый све́щник, богонапи́санную ма́слину, боже́ственую колесни́цу Христо́ва смотре́ния, сень святу́ю, свети́льник богокова́нный а́гницу слове́сную, очисти́лище Бо́жие, сосу́д нескверне́н, сокро́вище пресла́вное, трубу́ богогла́сную, ту́чную го́ру и усыре́нную, боже́ственое руно́, о́блак богото́чный, оде́жду честну́ю, заве́су у́мную, богосече́нный ка́мень, колесни́цу царе́ву, ле́ствицу, по нейже Зда́тель земны́м яви́тся, одр святый, прия́телище бла́гости, чуде́с бе́здну, исто́чник благи́х, приснотеку́щее бога́тство, многоиме́нную и многообра́зную и Присноде́ву Отрокови́цу. Сию́ введи́ во свята́я святы́х, сию́ приведи́ царе́ви, я́ко дар многоце́нный: и сию́ воспо́й, я́ко цари́цу тва́рем: сию́ песносло́ви, всех дев храни́тельницу некра́домую: сию́ всели́ во храм рукотворе́нный, быва́емый храм одушевле́ный и́же сло́вом вся Соде́лавшему».

Сия́ Иоаки́мова и А́ннина ра́достная славосло́вия: сия́ благодаре́ния песносла́вная боговеща́ния: сия́ ко проро́ку Заха́рии необинове́нная сведете́льствия. Те́мже свяще́нник, я́ко проро́к Бо́жий и святы́м святы́х в приобще́нии прича́стную зря де́вственую красоту́, лица́ добро́тно, язы́ка хва́льное, души́ благоро́дие, жития́ непоро́чное, ног ше́ствие, удобре́ние нра́ва, о́браза ле́потное, Ду́хом Святы́м испо́лнився, возопи́: «О́ Отрокови́ца нескрне́ная! О́ Де́во небла́зненая! О́ Деви́це прекрасная! О́ жена́м украше́ние! О́ дще́рем удобре́ние! Ты благослове́нная в жена́х: ты препросла́вленая чистото́ю: ты запечатле́нна де́вством: ты Ада́мове кля́тве разреше́ние: Ты А́велево чисте́йшее приноше́ние: Ты пе́рваго жреца́ незло́бивая жертва: Ты Си́фово украше́ние и сыно́в Бо́жиих быва́ющи неболе́зненое зача́тие: Ты Но́ево о Бо́зе упова́ние непосты́дное: Ты Ено́хово угожде́ние и к невеще́ственому житию́ преставле́ние: Ты Но́ев слове́сный ковче́г и втора́го пакибытия́ к Бо́гу присвое́ние: Ты Мелхиседе́кову ца́рствия свяще́нию украше́ние всесве́тлое: Ты Авраа́му увере́ние, и обетова́ния, и чадоро́дия послушли́во покоре́ние: Ты Исаа́ку но́вая же́ртва и слове́сное всесожже́ние: Ты Иа́кову ле́ствичнаго восхо́да вина́ и благослове́нием дванадесятеколе́ннаго чадорожде́ния назна́менание: Ты Иу́дина коле́на дщи: Ты Ио́сифово целому́дрие: Ты ветхаго Еги́пта, ре́кше иуде́йскаго со́нмища, низложе́ние, Пречи́стая: Ты И́ову во искуше́ниих терпели́вое возгражде́ние и име́нием его́ сугу́бное прида́ние же и богатотвореное бытие: ты Моисе́ю законода́телю богоде́ланная кни́га, в не́йже мирово́ния по́весть напи́сана бысть и пе́рсты богоначерта́ными на скрижа́лех узаконоположи́ся, я́коже в Сина́йстей горе́, в не́йже Изра́иль новоявле́нный от рабо́ты Еги́петския свободи́тися, я́коже пре́жде в пусты́ни лю́дие насы́тишася ма́нны и воды́ от ка́мене краесеко́маго («Ка́мень же бе Христо́с», хотяй из Твоего́ чре́ва произы́ти, я́ко от черто́га жени́х): Ты Ааро́нов прозябла́ еси́ жезл: Ты еси́ Иису́са Навви́на просла́вльши посре́д проти́вных: Ты еси́ Дави́да дщи «преиспещре́на ря́сны златы́ми и преоде́янна», Ты еси́ Соломо́нов одр златотворе́нный, его́же «си́льнии шестьдеся́ть обхо́дят», боготворе́нных писа́нии я́же о Бо́зе прегу́дническия гла́сы трубя́ще: Ты еси́ Илиина́ вознесе́ния восхо́д и у́мныя Иезаве́ли низложе́ние бысть: Ты Елисе́овы сугу́бныя ми́лоти благослове́ние, е́юже, Иорда́нская тече́ния разсеки́й, преи́де немо́крено и, непло́дную во́ду исцели́в, пие́мую показа́: Ты Ио́нино в ки́те спасе́ние, и ниневи́тяном покая́ние и проще́ние оби́льное: Ты еси́ проро́ком зерца́ло, и глаго́лом их исполне́ние яви́ся: Тебе́ бо Иезекеи́ль наре́кл есть врата́ затворе́на, и́миже никто́же от челове́к проити́ мо́жет, то́чию Бог еди́н и врата́ и врата́ заключе́на соблюде́т: Тебе́ Иса́ия великогла́сный жезл Иесе́ов пронаписа́л есть, от него́же цвет Христо́с изы́дет, и сады зло́бныя из ко́рене изсек, богоразу́мия насади́т ни́ву : Тебе́ Иереми́я испове́дал есть, я́ко «се день гряде́т, и завеща́ю до́му Изра́илеву и до́му Иу́дову заве́т нов, его́же не завеща́х отце́м их», Сы́на Твоего́ рождества́ пришествие назна́менуя и и́же от язы́к лю́дий призыв́ая в покланя́ние от коне́ц земли́: Тебе́ и и́же «жела́нии муж Дании́л» пропове́дал есть го́ру вели́кую, и от нея́же Христо́с краеуго́льный ка́мень отсече́тся и о́браз многообразнаго зми́я погуби́т и истни́т: Тебе́ в Вавило́не трие́ о́троцы о́браз иму́ще и Сы́на Твоего́ прише́ствие разуме́вше, пещи́, седмосугу́бне разжже́ныя, избежа́ша и я́ко в черто́зе посреде́ ликова́ху: Тебе́ Авваку́м ю́жную го́ру имену́ет, от нея́же ца́рствия ски́петра держа́вне возсия́ют, от нея́же села́ Ефиопская убоя́тся и кро́вы земли́ Мадиа́мския. Тебе́ сла́влю, нескверне́ную Де́ву: Тебе́ воспева́ю обра́дованную: Тебе́ воспева́ю, от всех родо́в я́вльшуюся неве́сту: Тебе́ пою́, но́вое не́бо хотя́щее яви́тися: Тебе́ приноша́ю, я́ко сокро́вище чи́стое, в це́рковь Госпо́дню. Тебе́ велича́ю, но́вый заве́т, его́же Меси́я Христо́с напи́шет: пи́смена бо зако́на упраздня́тся, благода́ти же зва́ние креще́ние возсия́ет: И у́бо обре́зания сень преста́нет, Ду́ха же прише́ствие су́щим на земли́ оста́вится».

Си́ми свяще́нными словесы́ проро́к украси́в Блаже́нную, возве́д ту в же́ртвеник, Го́сподеви Бо́гу предложи́. Те́мже Сея́ отцы́, Иоаки́м и А́нна, в ра́дости серде́чной от хра́ма возвра́щшеся, чужда́хуся ра́зуму и кро́тости и ти́хости. Те́мже си, я́же младе́нечная преше́дши ре́чи и проначерта́ния, Вседержи́телю наеди́не служа́ше и, пи́щу с небе́с прие́млющи а́нгелом, челове́ческия пи́щи гнуша́шеся: и це́ркви всегда́ приседя́щи, мирски́й о́браз я́ко паучи́ну вменя́ше: и, бога́тство небе́сное жела́ющи, земна́го бога́тства отве́ржеся: и, ра́дость а́нгельскую всегда́ ви́дящи, жити́йскаго попече́ния вы́шши явля́шеся: и, Дух Святы́й при́сно зря́щи, духо́вныя полки́ неви́димо отгоня́ше.

Что бо творя́ше Де́ва, во святы́х свята́я вита́ющи, пи́щу а́нгельскую прие́млет и, я́коже голуби́ца це́ла, де́вство храня́щи, хра́му небеси́ и земли Зда́теля, со благодаре́нием в дерзнове́нии се́рдца моля́ще, глаголаше: «Пою́ Тебе́, Вседержи́телю вы́шний, я́ко отъя́л еси́ поноше́ние праматере моея́ Е́вы и, Твоего́ ра́ди неизрече́ннаго благоутро́бия, Единоро́днаго Ти Сы́на хо́щеши посла́ти на зе́млю и с челове́ки пожи́ти: сего́ ра́ди селе́ние бу́ду чи́стое и небла́зненое». «Иде́же бо грех умно́жися, преизоби́лует благода́ть». Жены́ бо ра́ди смерть приобрето́хом, жены́ же ра́ди па́ки обнови́ши вся́ческая: змии́ным го́рьким вку́сом прия́хом снедь, Тобо́ю же па́ки пи́щи безсме́ртныя насы́тимся: пра́баба Е́ва Ка́ина роди́, уби́йству и зло́бе нача́льника. Единоро́дный же Сын жи́зни, воскресе́ния бу́дет пе́рвенец. О́ преславнаго чудеси́! О́ но́ваго удивле́ния! О́ неизречен́ныя му́дрости!

Что у́бо нарече́м Мари́ю? Не́бо ли? И́бо небеси́ и земли́ Творца́ во чре́ве вмести́. Солнце ли? Си бо, со́лнца седми́ седми́цею светле́йши су́щи, «со́лнца пра́вды» прия́т. Луну́ ли? Си бо, добро́ту нессуженную иму́щи, кра́снаго добро́тою Христа́ родила́ еси́. О́блак ли? Ибо на о́блацех седя́щаго на руку́ понесла́ еси́. Све́щник ли? И́бо «Свет су́щим во тме и се́ни сме́ртней седя́щим» возсия́л есть. Престо́л? И́же бо на престо́ле Оте́ческом неви́димо соца́рствуема в Ду́се Свя́те вмести́ма прия́т. Би́сер ли? И́бо многоце́нный би́сер земны́м сниска́ла есть. Рай ли? И́бо, Еде́м осужде́нным отве́рзи, к ца́рствию отсла́. Ковче́г ли? И́бо вся́ческая нам дарова́вшаго в на́дрех Твои́х обита́ет. Го́ру ли? И́бо гора́м творя́щаго дыми́тися нете́сно вмести́ла есть. Зе́млю ли? И́бо зе́млю творя́щаго трясти́ся неболезнено понесл́а есть. Храм? И́бо на херуви́мех почива́ющаго рука́ма Свои́ма носи́ла еси́. Море? И́бо собира́ющаго во́ды в совокупле́ние еди́но устна́ма Ея́ лобыза́ла есть. Трапе́зу ли? И́бо пи́щу нам даю́щаго матероле́пне млеко́м напит́ала есть.

Кто не диви́тся? Кто не чуди́тся? Кто не сла́вит та́инства вели́чество? А́ще боя же пре́жде благода́ти бы́вшая такова́я, и ум и мысль превосходя́ща: я́же по благода́ти явля́емая, кто сказа́ти мо́жет? А́ще я́же се́ни и зако́на обветша́вшаго пресла́вная, я́же по сих возсиявшая какова́? Да посрамя́тся ерети́к де́ти, и́же на Де́ву ху́льными усты́ и устна́ми скверне́ными ху́ляще и язы́ки ядови́тно дви́жуще: пресла́вная бо Мари́я Богоро́дица я́вльшися, и Творца́ и Го́спода пло́тски вме́щши и зра́ком челове́ческим Того ро́ждьши. Сие́ честно́е начерта́ние самоизволене лобызуем, и сию́ я́ко Ма́тере бы́вшую и́же во пло́ти нам бесе́довавшему. Сей о́бразу покланя́емся, не ве́щи покланя́ние принося́ще, отступи́! Но, ко первообра́зному честь возсыла́юще, боже́ствене ве́руем. Ниже́ бо Божества́ зрак напису́ем, я́коже вы глаго́лете, сле́пи и безако́нни: но иже пло́тию бесе́довавый нам зрак и пострада́вый, и от ме́ртвых воскресы́й пе́рвенец начерта́ем, [а чрез Него́, И́же плоть заня́ше у нас, по досто́инству чтем и о́браз Того́ роди́вшей я́коже Всечи́стую]. А́ще бо Бог Авраа́му прости́, [повеле́в принести́] ю́ницу триле́тну су́щу и козу́ триле́тну ко очище́нию плотско́му – Де́ва, преуста́влена бы́вши от созда́ния ми́ру и от всех родо́в избра́нна в жили́ще нескверне́ное и приведена́ в храм свят Вседержи́телю, не честна́ ли и чи́ста и нескверне́на бысть, и приноше́ние непоро́чно челове́ческаго естества́?

О́ иуде́йское собо́рище, ю́же от коле́на ва́шего возсия́вшую Деву неприи́мше(и)и Богоро́дицу, но и ху́ляще недосто́йными и нече́стными глаго́ланьми, завистию дви́жими оклевета́юще, ка́ко Сы́на ея́, приносу́щаго Отце́ви, рожде́ннаго из нея́, прии́мете? Но и тоя сла́вы, и рожде́наго из Нея́ неприча́стни бысть: не прише́дшему на вас за́висть иму́щу, но, зло́бою отри́нувшеся и лука́вством суеты́ ва́шея обезу́млени бы́вше, обою сла́вы отпадо́сте: ка́ко вои́стину су́ще неблагода́рни пе́рвее, и по сих я́же бо неи́стовства ва́шего ла́яния всему́ ми́ру явле́на бы́ша, И Сло́во О́тчее, я́же о вас изъявля́е: «Ами́нь, ами́нь глаго́лю вам: А́ще ча́да Авраа́мля бы́сте бы́ли, дела́ Авраа́мова твори́ли бы́сте у́бо (той бо о Мне глаго́лал есть), ны́не же от отца́ ва́шего диа́вола есте́ и по́хоти его́ хо́щете твори́ти». И и́нде глаѓолет: «Егда́ мни́те, я́ко Аз реку́ на вы ко Отцу́? Есть глаголяй на вы Моисе́й, на́ньже вы наде́ястеся».

Мы же, лю́дие Бо́жии, язы́к свят, бога́тное сриста́ние, лик правосла́вный, сы́нове ба́ни, ча́да благода́ти, и́же вхо́дом Девыя в це́рковь пра́зднующии душами чи́стыми и нескверне́ными устна́ми и язы́ки многовеща́нными, сей(?) торжеству́ псало́мски воскли́кнем, све́тлому пра́зднику, а́нгельскому весе́лию и челове́ческому хвале́нию: и е́же «Ра́дуйся!» Гаврии́лово со стра́хом и ра́достию той возопие́м:

Ра́дуйся, О́тчее благоволе́ние, и́мже в конца́х позна́ся богоразу́мие! Ра́дуйся, Сыно́внее жили́ще, ея́же Плотоно́сец про́йде! Ра́дуйся, Свята́го Ду́ха пребыва́лище неразори́мое! Ра́дуйся, безпло́тным многослову́щее слы́шание! Ра́дуйся, херуви́м сла́внейши! Ра́дуйся, небе́с ши́ршая! Ра́дуйся, со́лнца светле́йшая! Ра́дуйся, луны́ сия́тельнейшая! Ра́дуйся, звездо́ многочи́сленых зарь! Ра́дуйся, о́блаче ле́гкый, и́же дождь небе́сный су́щим на земли́ оброша́я! Ра́дуйся, мо́лние, зра́ки ве́рных ти́хо просвеща́ющи! Ра́дуйся, гро́ме духо́вный, и́же бе(з?) щу́ка оглаша́ай земны́х ушеса́! Ра́дуйся, дыха́ние свято́е, иже духи зло́бныя от земли́ потребля́я! Ра́дуйся, проро́ком пресла́вное пропове́дание! Ра́дуйся, апо́столом всеми́рное оглаше́ние! Ра́дуйся, му́чеником пречестно́е испове́дание! Ра́дуйся, патриа́рхом многохва́льное славосло́вие! Ра́дуйся, преподо́бным превосходи́мая похвало́! Ра́дуйся, пра́ведных и́стиннейшее наслаждение! Ра́дуйся, де́вам многобога́тное хвале́ние! Ра́дуйся, царе́м ски́петре и держа́во! Ра́дуйся, первосвяще́нником служе́ние вели́кое! Ра́дуйся, грешным прибе́жище необори́мое! Ра́дуйся, пла́вающим корми́ло нерастерза́емое! Ра́дуйся, па́дающим воздви́жение! Ра́дуйся, неду́гующим врачева́ние безме́здное! Ра́дуйся, па́дших изве́стное во(з)ста́ние! Ра́дуйся, вина́ всех спасе́ния! Ра́дуйся, ми́ру ра́дости(е) неизглаго́ланная! Ра́дуйся, смире́нию хода́таице, цари́це! Ра́дуйся, матерем украше́ние пречи́стое! Ра́дуйся, Сло́ва вмести́лище простра́нное! Ра́дуйся, ста́рым держа́вная предста́тельница! Ра́дуйся, млады́м боже́ственое пе́стунство! Ра́дуйся, младе́нцем све́тлое храни́ло! Ра́дуйся, поднебе́сным всем хода́таице! Ра́дуйся, вселе́нней все воззва́ние! Ра́дуйся, небеси́ и земли́ торжество́ пресла́вное! «Ра́дуйся, обра́дованная, Госпо́дь с Тобо́ю», И́же пре́жде Тебе́ и из Тебе́ и с на́ми воспева́емый, со Отце́м и Ду́хом Святы́м, ны́не и при́сно и во ве́ки веко́в. Ами́нь.

Стихи́:

Внутрь це́ркве Тебе́ вита́ет Гаврии́л, Отрокови́це,

Пребу́деши вма́ле, ра́дуйся!, рече́т Ти:

Сни́де же́ртва Мари́я в це́рковь в два́десять пе́рвый.

И́же в це́рковь Богома́тере вход, пра́здник богочести́вым соде́ла чу́ден и всеми́рен, от такова́го сло́га прии́мши при́тчу: И́бо приснопомина́емая А́нна, я́ко в ма́ле житии́ безча́дна пребыва́ше, Влады́ку естества́ со Иоаки́мом му́жем свои́м моля́ше, е́же пода́ти и́ма отроча́. И а́ще проше́ние получа́т, рожде́ное Отроча́ им а́бие возложи́ти Е́ Бо́гу. Те́мже и Хода́тайцу спасе́ния челове́ческаго ро́да, Мари́ю Богоро́дицу породи́ша. Сию́ тре́тиему ле́ту от рожде́ния Ея́, по обеща́нию приведо́ша во святи́лище, святи́телю преда́ша: Ю́же святи́тель прии́м, во вну́трешняя це́ркве вво́дит, иде́же еди́ницею ле́то входи́ти святи́телем, возложена́ бы́вши. Те́мже и пи́щею небе́сною а́нгелом пита́ема бя́ше, да́же и до боже́ственнаго Благове́щения, и преесте́ственнаго возвеще́ния, е́же Бо́гу воплоти́тися человеколюбе́зно, благоволи́вшему спасти́ мир поги́бшаго. И в це́ркви пребыва́ше и водворя́шеся, боже́ственнаго явле́ния сподо́бившися. А́нгелу же Ей служа́щу, в сла́ву и́же из Нея́ ро́ждшемуся Бо́гу.

Бя́ше не́кий отхо́дник черне́ц, испо́лнен вся́кия доброде́тели, и моля́шеся Го́сподеви, глаго́ля си́це: Го́споди даждь ми да уве́м что суть су́дове Твои́ разли́чнии? И сотвори́ пост вели́к тоя́ ра́ди вины́: и не прояви́ ему́ Бог, поне́же немо́щно есть челове́ку ве́дати того́, он же па́ки томя́шеся моля́ Бо́га о том. Хотя́й же извести́ти ему́ Бог, да не томи́тся без ума́, вложи́ ему́ такову́ мысль, ити́ посети́ти ве́тхаго де́ньми ста́рца, дале́че су́ща от него́, да вопроси́т его́, устро́ив же пи́щу, и пойде к ста́рцу. И посла́ ему́ Бог а́нгела во о́бразе чернори́зца, и срет ста́рца, рече́ ему́: где и́деши ра́бе Христо́в? Он же отвеща́в: ко о́нсему отхо́днику. И той рече́: И аз у́бо с тобо́ю хощу́ ити́ к нему́. И рад быв ста́рец по́другу, и поидо́ста о́ба вку́пе. И пе́рвый день ше́дша, обита́ста у боголюби́ва не́коего му́жа, и той прии́м я́, почти́ я́ вельми́: я́доста же на сре́брене блю́де. И по отъиде́нии же взем а́нгел блю́до, заве́рже е́ в мо́ре: и печа́лен бысть ста́рец о том вельм́и. И отто́ле ше́дша во вторы́й день, и обита́ста у странноприи́мца му́жа, и́же и но́зе им умы́в, и до́бре я́ почти́. И у́тро хотя́щым им отъити́, и той муж приведе́ к ним единоча́даго сы́на своего́, да благословя́т его́. А́нгел же ем отроча́ за горта́нь, и удави́ е́. Ста́рец же от у́жасти ничто́же рече́ ему́. И отпусти́ я́ странноприи́мец, ничто́же зла сотвори́ им, поне́же боя́шеся Бо́га, да чернце́в не озло́бит. И в тре́тий день ше́дше, и не обрето́ста и́же бы я́ прия́л: еди́но же обрето́ста пу́сто дво́рище ве́тхо, и се́дше под се́нию пала́ты, я́сти нача́ша, е́же ноша́ше босма́ны ста́рец. Та́же седя́щым им, воста́в а́нгел препоя́сася, и нача́ разруша́ти пала́ту, и па́ки зда́ти ю́. Тогда́ ста́рец нача́ поноша́ти ему́ со гне́вом, и заклина́я глаго́лаше си́це: а́нгел ли еси́, или́ бес, пове́ждь ми, я́ко не Бо́жия дела́ твори́ши? И рече́ а́нгел: Да что сотвори́х? И рече́ старец: Вчера́, и о́ного дне, я́же поя́ша ны боголю́бцы они, да о́вого блю́до утопи́л еси́, а о́вого сы́на удави́л еси: а зде ничто́же обрето́хом, ни есть люде́й, да кому́ стро́иши пала́ту сию́? Тогда́ рече́ ему́ а́нгел: не диви́ся ста́рче сему́, ни блазни́ся о мне: но послу́шай, да ти пове́м. Пе́рвый и́же нас прия́т муж, во всем богоуго́дно живе́т: но блю́до е́же заверго́х, от непра́вды до́шло бе ему́, да не того́ ра́ди блю́да мзду свою́ погуби́т, и заверго́х е́ в мо́ре, да ты не диви́ся о том. А вторы́й муж тако́же уго́ден Бо́гу: и а́ще бы жив был ма́лый сын его́, то ве́лиему бы злу хотя́ше вино́вен бы́ти, и сосу́д неприя́знен, того́ ра́ди задави́х его́, и изъя́х ду́шу его́ за благи́ню отца́ его́, да той спасе́тся: да ни о сем блазни́ся о́тче. Рече́ же ста́рец, а зде в пусто́м ме́сте, что твори́ши, разруша́я пала́ту сию́, и па́ки созида́я ю́? И рече́ а́нгел: двора́ сего́ муж губи́тель есть был, и обнища́в отъи́де. Дед же его́ зи́жда пала́ту сию́, в стене́ зла́то зазда́, да того ра́ди разори́х ю́, да никт́оже зде ища́ зла́та того́, поги́бнет не Бо́га ра́ди, и душа́ та осу́дится. И сия́ изглаго́лав а́нгел к ста́рцу, и рече́ ему́: Иди́ ты ста́рче в ке́ллию твою́ вспять, а не тружда́йся без ума́. Глаго́лет бо Дух Святы́й: су́дове Госпо́дни глубина́ мно́га неиспыта́ема, и недове́дома челове́ком: да ты их не пыта́й, несть бо ти на по́льзу. И сия́ рек а́нгел ста́рцу: в том часе́ неви́димь бысть. Тогда́ ста́рец убоя́ся вельми́, и пока́яся е́же не пыта́ти ктому́ о суде́х Бо́жиих неиспыта́емых: и о сих пове́дая всем. И та́ко спасе́ ду́шу свою́, о Го́споде Бо́зе Спа́се на́шем Иису́се Христе́.