Стихи́:

По́мощь о́крест твоего́ жития́ и по конце́ живота́

Жива́го Бо́га благода́ть, Григо́рие:

В двадеся́тый Григо́рий погреба́ется, к возду́ху обре́теся.

[Григо́рий, преподо́бный оте́ц наш, бе епа́рхии Иса́врьския от гра́да Декаполи́та близ Иринопо́ля,] роди́выйся от роди́телю Се́ргия и Ма́рфы, в ле́та иконобо́рец. Осмы́м же ле́том быв, ко уче́нию свяще́нным кни́гам вдае́тся. И си́ми испо́лнен быв, к це́рквам упражня́яся. И ко и́ноческому во́зрасту дости́гшу, помы́слиша бо роди́тели его́ сочета́ти его́ бра́ку. Он же тай бежа́в, [бысть мних], па́чеже и обдержа́ния ра́ди иконобо́рней е́реси, преходя́ от ме́ста на ме́сто и му́ченики приве́тствуя и поле́зная в себе́ сбира́я и воздержа́нием, жесто́ким житие́м себе́ облага́я, мно́гия ко́зни бесо́вския победи́ и вели́кий чудотво́рец показа́ся. Той во Аси́ю дости́же и к Византи́и прии́де, име́я жела́ние получи́ти испове́дание. И отту́ду к Ри́му отплы́в и, вся́кое предстоя́ На́вечерие (си́есть За́пад), чудесы́ и зна́мении мно́гих ужаси́в. [И прии́де в Сираку́с, град Сикили́йский, и влез во еди́н градны́й столп, и в нем творя́ше мно́га чудеса́]. И па́ки в Византи́ю до́йде. Та́же к Оли́мбстей горе́ пресели́ся, иде́же разболе́вся и иста́яв, по гласу́ того́ ви́дящим познава́емь бя́ше. И па́ки же с горы́ соше́д и Солу́ня дости́г, отту́ду к Византи́и пресели́ся. Симео́на, не́тия своего́, богоно́снаго испове́дника святы́х ра́ди честны́х ико́н, обре́те затворе́на и, пожи́в с ним ма́ло, мно́го помоли́вся и му́дрствовав о души́ и прекло́нься, с ми́ром у́спе о Го́споде.

Святы́й оте́ц наш Прокл, благогове́ин сый, и доброде́телен бе. И поста́влен бысть епи́скоп в Ки́зице, Сиси́нием патриа́рхом Константи́ня гра́да. Шед же, и не прия́т быв от та́мошних кли́рик, зане́ им еретико́м су́щым, возврати́ся в Константи́нь град, и та́мо упражня́яся ле́то еди́но. У́мершу же патриа́рху, и еще́ моще́м его́ лежа́щым во святи́тельстве Вели́кия це́ркве, постав́лен бысть Прокл патриа́рх Константи́ня гра́да. И освяще́н быв во святе́й Вели́цей це́ркви, вели́кия недел́и, во святы́й вели́кий четверто́к, спаси́тельныя стра́сти Го́спода на́шего Иису́са Христа́. И до́бре пасе́ ста́до Христо́во двана́десять лет, и пять ме́сяц: и с ми́ром ко Го́споду отъи́де.

Стихи́:

Хотя́ше и Да́сие пострада́ти мече́м:

Страда́льческий вене́ц мече́м обре́те, му́чениче Христо́в.

Сий бе при Максимиа́не цари́, от гра́да Доросто́ла, и близ реки́ И́строса [1]. Пра́зднику же во гра́де быва́ющу Кро́ну и челове́ку нарече́ну бы́ти закла́ну, в честь бесо́вскую пожира́ему, тем сий святы́й о Христе́ хотя́ше пострада́ти и дерзнове́нно Христа́ испове́да. И приведе́н же бысть царю́ Максимиа́ну, и главу́ ему́ отсеко́ша.

Стихи́:

Главы́ усека́ют трем уме́ршим лестцы́:

Ника́ко ми́лость показа́вше, лестцы́ над уме́ршими.

Си́и святи́и бе́яху в ца́рство Максимиа́ново, Филофе́я и Евсе́вии су́ще ча́да: и́мже оте́ц бя́ше от гала́т, ма́ти же от Никомиди́и, и о́ба во и́дольстей су́ще слу́жбе. Роди́вшимся де́тем и до́бре воспита́вшимся, Евста́фий же пи́сменем дерза́ше, Феспеси́е же и Ана́толие оте́ческому повину́яся начина́нию. Филофи́й же с сы́ном свои́м Анато́лием ше́ствие же творя́ше в Никомиди́ю: и Лукиа́ну презви́теру, учи́телю, на пути́ ше́ствовавше. И его́ наказа́нию повину́вшеся, ве́роваша и крести́шася. Дости́гше же Никомиди́ю и к бесе́де блаже́ннаго Анфи́ма бы́вше, Евста́фие же и Феспеси́е крести́шася. Филофе́й же, оте́ц ею́, презви́тер поста́влен бысть: сын же его́ Евста́фие – диа́кон. И уже́ не по мно́зе, роди́телем их от жития́ отше́дшим, оболга́ни бы́ша Максимиа́ну, я́ко христиа́ни: и приведе́ни, вопроше́ни бы́вше, и Христа́ испове́даша. Бие́ни быша па́лицами и в темни́цу вверже́ние бы́вше, к ней же а́нгел, боже́ственым наве́том, у́зы им разреши́, и пи́щи причасти́шася. Нау́трия же звере́м разли́чным вдава́ются и пребыва́юще невреди́ми: те́́мже вда́ни бы́вше Анто́нию коми́ту. И в Никодимию сих приве́д, и разли́чны му́ки наложи́ на них: и пове́сиша их на дре́ве, и желе́зными у́дицами расте́рзани бы́ша, я́ко и земли́ обагри́тися от кр́ови. И па́ки в темни́цу вве́ржени бы́ша: а́нгел же Госпо́день па́ки боле́зни я́звам исцели́ и телеса́ им здра́ва соста́вив. Сия́ ви́дев, кровоя́дец он мече́м глав́ы им повеле́ отсещи́. Святи́и же, иду́ще на коне́чное ме́сто, внеза́пу ду́ши своя Бо́гу преда́ша с ми́ром. И слуги́ же, боя́щеся мучи́теля, ме́ртвым о́нем лежа́щим, главы́ им отсеко́ша.

Си́и святии му́ченицы, в Пе́рсех живу́ще, я́ти бы́ша и приведе́ни ко и́дольстей це́ркви беззако́нными пе́рсы. Воифаза́т же, измла́да христиани́н сый, не покори́ся пожре́ти со́лнцу и огне́ви: повеле́нием пе́рсскаго царя́, ку́пно со святы́м Сасо́ном и с про́чими, по мно́гих му́ках убие́ни быша: с ни́ми же и жены́ по́стницы, Фе́кла и А́нна и и́ны мно́ги, по Христе́ пострада́ша и, кре́пко ополчи́вшеся, обличи́вше суровство́ нечести́ваго царя́, мече́м изсе́чени бы́ша. Та́коже и три де́вы ножи́ изре́заны бы́ша. Иде́же истече́ кровь их, смо́квы возра́стьши и исцеле́ния да́ры ве́рным подава́ющи, исцеля́ше же всяк неду́г и вся́ку страсть: я́же по́слежде погублена́ бысть от безбо́жных Манихи́и, зави́девшем боже́ственых чуде́с де́тели.

Та свята́я живя́ста в Пе́рсех и, я́ко Христо́ва ученика́, прилежа́ста мно́зе доброде́тели, боя́щася Бо́га, Сотво́ршаго н́ебо и зе́млю, и мо́ре, и вся, я́же в них, и ходя́ща по за́поведем Его́. Ни́рса же, быв епи́скоп, уча́ше лю́ди благоче́стию и многи научи́ во Христа́ ве́ровати: в ни́хже бе Ио́сиф, и́же по́следи (мно́гия того́ ра́ди доброде́тели) поста́влен бысть от Ни́рсы епи́скопом. Егда́ же, обраще́ния ра́ди лю́дий е́же от льсти ко и́стине, ята́ бысть о безбо́жных перс, бя́ше бо Ни́рса лет пяти́десять, а Ио́сиф лет осми́десять и пяти́. Предста́вша же царе́ви, ре́ста ему́, я́ко, а́ще мо́жеши, царю, по уме́ртвии на́ю седмь кра́ты воскреси́ти, ни та́ко отлучиши наю от любве́ Христо́ве. И сие́ слы́шав, царь повеле́ мече́м главы́ ею́ отсещи́. И та́ко за Христа́ сконча́стася.

Ти́и святи́и в Пе́рсех бя́ху, епи́скопы су́ще гра́да Вифсахо́я. Поне́же уча́ху лю́ди, пр́елести пе́рсския разори́ти тща́щеся, словесы́ святы́м наказу́ющии – ни во что́же су́ща и́долы мне́ти: ни со́лнце же, ни огнь бо́ги су́ща, тварь, рабо́тна не то́чию Бо́гу, но и челове́ком: на́шея бо ра́ди слу́жбы, глаго́ласта, повеле́ Бог сим бы́ти: еди́н бо Бог сия Сотвори́вый, оба́жени бы́ша к царе́ви. Он же с я́ростию вели́кою и сгневом посла во́ины я́ти я́. Си́и же свя́зани предста́ша суди́щу его́ и обнаже́ни быша, разли́чно бие́ми и стру́жеми. Зане не отвергошася Христа И́стиннаго Бо́га су́ща, и пе́рсския ле́сти Разруши́теля исповедаху, повеле́нием же мучи́теля вне гра́да, со святе́м Иоа́нном по́стником, ка́мением побие́ни бы́ша.