Стихи́:

Опря́тан быв Амфило́хие ме́ртвеными воня́ми,

Ла́яния разаря́юще и мертв вмени́мь,

В два́десять тре́тий смерть похи́ти Амфило́хия.

Сий, из мла́да во́зраста вся́кого степе́ни церко́внаго вня, поще́нием и боже́ственым ра́зумом сия́я, судо́м о́бщим вруча́ется епи́скопом Икони́йскаго гра́да, в ле́та Уалентиа́на и Уа́лента царе́ма, проба́вив ся живото́м да́же и до Феодосия Великаго и сыно́в его́. Учи́тель правосла́вней ве́ре быв и А́риеву умовре́дию проти́влься, гоне́ния же мно́га и ско́рби претерпе́в от нечести́вых, сподви́жник быв сый отце́м блаже́ным, и на Евно́миево злохуле́ние. Сий на вторе́м собо́ре быв, мно́жайшее подви́гся на Македо́ния духобо́рца и на А́риевы сра́сленики. По е́же удержа́ти ца́рствие Феодо́сию Вели́кому, и Уа́лента низложи́в и победи́в, прише́д же святы́й крамоля́ше царя́ отри́нути ариа́ны. Царь же не хотя́ше. И обре́те не́которое худо́жество ди́вный сей: и вшед в пола́ту царе́ву, целова́ царя́ Феодо́сия, сы́на же его́, Арка́дия, презре́в не целова́. Царь у́бо Феодо́сий опусне́в, не моги́й терпе́ти сыно́вня безче́стия. И му́дрый же явля́ет при́тчу и рече́: «Ви́диши ли, царю́, ка́ко не терпи́ши сынов́ня безче́стия, но дряхлу́еши? Ве́руй у́бо, я́ко, и ху́лящи Сы́на Бо́жия, та́коже и Бог отвраща́ется от них и ненави́дит». Тогда́ позна́ царь бы́вшее: и кни́ги зако́нныя написа и распусти́, и я́ко и ерети́ческая сосло́вия, и бесе́ды преще́нием отгоня́ти. Сий же присновоспомина́емый мужь, и́же мно́гими ле́ты пасы́й Христо́во ста́до и словеса́ правосла́вная учини́в, и глубо́кую ста́рость дости́г, с ми́ром ко Го́споду отъи́де.

Стихи́:

Акрага́нта к Бо́гу вмеща́еши сло́во,

И́же конце́м земли́ Судящему, всеблаже́ный о́тче:

В два́десять тре́тий Григо́рия сме́ртный о́блак прия́т.

Сий бе́яше в ца́рство Иустиа́на Корноно́саго: от гра́да Акрага́нтскаго, Сикели́нския епа́рхии, рожде́ние Харито́ново и Феодо́тиино, роди́телю благочести́вых изоби́тельствующих и вся́кими доброде́тельми укра́шеных. Бы́вшу же отроча́ти осмы́м ле́том, преда́ша его́ учи́тися свяще́ным кни́гам. Отроча́ же бысть весма тщашеся без ле́ности ко свяще́нным пи́сменем уче́нию, я́ко и всем диви́тися. Бы́вшу же ему́ ле́том осмина́десятим, поста́влен бысть кли́рик от и́же во святы́х Потапио́на. Та́же, боже́ственым явле́нием, по́йде во Иерусали́м поклони́тися святы́м ме́стом: поста́влен бысть диа́коном, Мака́рием, епи́скопом Иерусали́мским. Та́же в Византи́ю возврати́ся, пото́м же в Рим, в не́мже вруче́н бысть епи́скоп Акраганти́йскому гра́ду. Ему́же позави́девше Сави́н и Криксе́нтин, и мно́ги напа́сти ему́ наведо́ша: и, боже́ственою благода́тию чудоде́йствовав, посрами́ их и мра́чны их сотвори́, и́же и до сего́ дни явля́тися по ро́ду. И, прии́м це́рковь и мно́гая чудеса́ соде́лав, в глубо́це ста́рости житие́ оста́вив.

Стихи́:

Мно́гия беды́ подъя́т в житии́ пе́рвие,

Пре́йде Сиси́ние ну́жду жити́йскую.

Сей бя́ше в ца́рство Диоклитиа́ново, и Алекса́ндра иге́мона: от гра́да Ки́зика. И Христо́ва ра́ди испове́дания, к ко́нем ди́виим привя́зан бысть, и тещи́ пону́жден быв, и без ми́лости бие́н, и в но́здри ему́ о́цет лют влия́ша. И и́ны мно́ги му́ки претерпе́в, и чудеса́ ве́лия среде́ собо́ра показа́в, и тве́рдыми свои́ми уче́нии А́рия посрами́. И Единосу́щна Сы́на Отцу́ испове́дав, и та́ко до́бре и боголюбе́зне пожи́в, и зако́нно пострада́в, ко Го́споду отъид́е.

Сей бя́ше от гра́да Антиохи́и, и ят бысть по повеле́нию царя́ Иулиа́на отсту́пника, Салусти́ном епа́рхом от купи́лища. Зане́же слы́шавшу Иулиа́ну, во вре́мя преложе́ния е́же в Да́фнии лежа́щих моще́й святы́х муч́еник Вави́лы и и́же с ним: и пою́щымся у них дави́дским пе́снем от христиа́н несу́щих честны́я мо́щи, да постыдя́тся вси кла́няющиися истука́нным. От ни́хже бя́ше еди́н му́ченик Фео́дор, и́же на дре́ве пове́шен, и волу́ями жи́лами по плеще́ма бие́н: и у́дицами ре́бра его́ растерза́ша: и узами желе́зными обложе́н, и в темни́це затворе́н бысть. Нау́трия же нака́зан быв Иулиа́н от епа́рха, я́ко ю́наго терпе́ние, е́же за Христа́ стра́ждущих непокоре́ния, даже и до конца на уко́р гоня́ вменя́ется ти, в сла́ву же и ра́дость гони́мым. Повину́вжеся благоненави́стник, не повеле́ Фео́дора пусти́ти из темни́цы. Сей же до́блий и́стинный подви́жник, горя́щым не́ким о ни́хже терпя́ше боле́знех, го́рьких о́нех мук, изнача́ла бо, рече́, ма́лыя боле́зни ощути́ти. Та́же я́вльшися ему́ не́коей плащани́це. Мя́кце и студене́, отира́юще ему́ лице́, и крова́выя ри́зы, и укрепля́ющи дерза́ти ему́. И слуга́м уже́ предста́вшым, и беззако́нному Иулиа́ну на пе́рсы ше́дшу, и та́мо зле живо́т свой сконча́вшу. Святы́й же Фео́дор почи́ о Го́споде ра́дуяся.