Стихи́:

Содержа́й Али́пие столп пра́вый,

К небесе́м иду́ща взы́ти, иде́же пребыва́ет:

В два́десять шесты́й в нескорбя́щий Али́пие вни́де дом.

Сий бе́яше при Ира́клии цари́ от Пефлаго́нския страны́. И пре́жде рожде́ния ма́терня не́коего ро́да десна́го зна́мения ка́ко бе хотя́ше показа́тися, и по рождестве́ и́же тогда́, и досе́ле, виде́нием и слу́хом ужаси́в и терпе́нием. И́бо прилучи́ся ма́тери его́ непра́здне ей су́щи, во сне ви́де а́гня красно́ на руку́ ей носи́ти, име́я на рожцу́ свое́ю све́тлы свещи́ зажже́ны, и́же зна́мение бысть после́днее све́тлости доброде́тели му́жа. Сий у́бо святы́й вся́ким поще́нием подвиза́вся, я́ко и чудеса́ соде́ловати. И терпе́нием всех пре́йде, на столп бо вшед и прав стоя́ за пятьдеся́ть и три ле́та, поне́же и я́звой того́ лука́вый враг я́коже и И́ова уязви́, и на том столпе́ на еди́ных ре́брех лежа́ и на и́ну страну́ не обрати́тися, до́ндеже честну́ю свою́ ду́шу в ру́це Бо́гу преда́сть.

Блаже́нный сей Иа́ков, доше́д горы́, и́же три́десять по́прищ от Высо́каго де́ла, ни посте́ли име́я, ни се́ни, ни коли́бы, е́же си́ми ну́жди есте́ственныя отража́ти. И сия́ глаго́лю не от ино́го уве́дев, но самови́дец быв. Чре́вный неду́г тому́ напа́д, едва́ оста́ви приближа́тися приходя́щым. И па́ки егда́ приходи́ти о́нем, бя́ше поуча́я их е́же о благоче́стии сло́вом. Но и па́ки о́нем отходя́щым, доне́леже ве́черу доспе́вшу, сам себе́ му́чаше, не бо имя́ше кров, вся́кия же стра́сти терпя́ бя́ше, я́ко в чужде́м подвиза́яся телеси́. Желе́зы бо те́ло обложи́в, окрест себ́е основа́ния положи́в вла́сяна, и два заве́са отпреди́ и созади́. Пи́ща же ему́ бя́ше к ве́черу, ля́ща ква́шена. Си́ми же труды́ и боле́зньми, боже́ственных даро́в восприи́м благода́ть: Я́ко отроча́ти уме́ршу, и отцу́ его́ рыда́ющу, и глаго́лющу ко свято́му: Вем ра́бе Бо́жий, я́ко возмо́жно ти есть, то́чию да не облени́шися е́же помоли́тися. Ви́дев же святыя о́тчия сле́зы, прекло́нь коле́на, и Бо́га призва́в, воскреси отроча́, и предаде́ е́ отцу́ его́ здра́во. Мно́га же свята́го сего́ дея́ния, но мно́жества ра́ди мно́гая оста́вльше, еди́но воспомя́нем: Сей мно́го искусився от бесо́в, моли́твою точию сих отража́ше. Приноша́ше же ему́ не́который во́ду издале́ча, два́жды в седми́це, и преобрази́в себе́ диа́вол в подо́бие свята́го, и усрета́ше служа́щаго среде́ пути́, и взима́ше во́ду, возвраща́ше его́ во своя́ си. И сие́ творя́, тща́шеся безво́дием умори́ти свята́го. И во вре́мя не́кое прише́д служа́й, утаи́вся от зла́го делателя, и до́йде да́же до ста́рца. Ви́дев же святы́й его́, и принесе́ную во́ду, и глаго́ла: Что сие́ ча́до? Мно́го вре́мя ми́мо и́де, отне́леже во́ду не прине́сл еси́, и в ну́жду мно́гу от безво́дия доидо́хом. Он же рече́: Вы́ну о́тче в нарече́нное вре́мя, и день, во́ду приноша́х, и усрета́я мя не́кто, когда́ в сем ме́сте, когда́ ли во ино́м, не оставля́ше до зде доити́. Святы́й же рече́ к нему́: Отсе́ле а́ще кто и тма́ми тебе́ усря́щет, и возбраня́я тебе́, или запрещая, да не пода́си сосу́да, доне́леже на сие́ ме́сто до́йдеши. И та́ко до́бре подви́гся, и вели́к чудотво́рец быв, отъи́де ко Го́споду неоску́дно веселя́ся.

Блаже́ный приснопа́мятный и всея́ Ру́сския земли́ князь Яросла́в, нарече́ный во свято́м креще́нии Гео́ргий, сын Володи́мирь, крести́вшаго Ру́сскую зе́млю, брат же свято́ю му́ченику Бори́са и Гле́ба, и восхоте́ созда́ти це́рковь во и́мя свое́, свята́го Гео́ргия. Да ему́же восхоте́, то и сотвори́. И я́ко нача́ша зда́ти ю́, и не бе у нея́ мно́го де́латель, и се ви́дев князь, призва́ тиу́на, и рече́: «Почто́ не мно́го у це́ркве де́латель?». Тиу́н же рече́: «Господи́не, поне́же де́ло вла́стельско есть, и боя́тся лю́дие да труд подъи́мше и на́йма лише́ни бу́дут». И рече́ князь: «А́ще та́ко есть, то аз си́це створю́…». И повеле́ ку́ны вози́ти на во́зех в кома́ры Златы́х врат, и возвести́ша на торгу́ лю́дем, да во́змет ко́ждо по нога́те на день. И бысть мно́жество де́лающих, и та́ко вско́ре сконча́ це́рковь и святи́ ю́ Иларио́ном митрополи́том ме́сяца ное́мврия в два́десять шесты́й, и сотвори́ в ней на столова́ние новоста́вимым епи́скопом, и запове́да по всей Руси́ твори́ти пра́здник свята́го Гео́ргия ме́сяца ное́мврия в два́десять шесты́й день.