Стихи́:

Вве́ржен бысть Кли́ментие во глубину́ с желе́зом:

Ко Христу́ прии́де, Держа́ве и Кре́пости после́дней.

Кли́мент прему́дрый, ри́млянин бе́яше ро́дом, ца́рска ро́да сый, Фа́уста и Матфе́и сын. Вся́кое уче́ние е́ллинское проше́д, от истопле́ния не́когда сохране́н бысть пресла́вно. И прише́д ко свято́му Петру́ апо́столу, и, науче́н бысть от него́, Христо́ве и́стине пропове́дник благове́стию быв. И апо́стольская уче́ния написа́в, поста́влен бысть в Ри́ме епи́скоп. Ят бысть при Доментиа́не цари́ и, му́чен, не покори́ся. Изгна́н бысть в Херсо́н, и отту́ду же па́ки приведе́н. И привяза́ша на вы́ю его́ желе́зо кора́бленое, и вве́ржен бысть во глубину́ морску́ю, и та́ко сконча́ся.

Стихи́:

Неруши́мь бе́яше ве́рою:

Посе́чен Петр, и́же оде́жду Христо́ву расте́рзаную ви́дев.

Святы́й Петр Алекса́ндрьский епи́скоп бысть при Максимиа́не царе́, учи́тель благоче́стию и правосла́вным уче́нием показа́тель. Сий внегда́ хотя́ху главу́ ему́ отсещи́ повеле́нием царе́вым, уве́дев сие́ А́рие, и проще́ние проси́в, и всем лю́дем моля́щимся. И не дасть ему́ просты́ню, но отсла́ его́ и закля́т я́ко отлуче́ну тому́ бы́ти и на сем ве́це и бу́дущем от сла́вы Христо́вы. Рече́ бо: «Го́спода ви́дех во сне ко отроча́ти ю́ну па́че со́лнца блиста́ющася обложе́на ри́зою раздра́ною, от главы́ да́же и до ногу́. И вопроси́вшу его́: «Ри́зу кто ти, Спа́се, раздра́?» И рече́: «А́рие безу́мный», но того́ не приима́й ко обще́нию явля́я е́же на Отца́ и Сы́на по единосу́щному разделе́нию и про́чия ху́льныя глаго́лы е́же на благоче́стие». Та́ко у́бо святы́й и сконча́ся, по повеле́нию царе́ву главе́ отсе́чене бы́вши.

Сей святы́й оте́ц наш Петр, в По́нте роди́ся от роди́телю благочести́ву: седмь лет с роди́тельми пожи́в. Про́чее живота́ своего в любому́дрии жив. В Гала́тии же пе́рвее пострада́. Пото́м же написа́ния ра́ди Палести́ну дости́же, и та́мо повсю́ду помоли́вся, во Антиохи́ю сведе́ся. И затвори́в себе́ в не́коей хлеви́не, вни́мше вы́ну себе́, и к Бо́гу поя́. И и́но никаково́ вкуша́я бо́льше, ра́зве то́кмо ма́ло хле́ба, за два, или́ за три дни, и ма́ло воды́. Сей же и над бе́сы прия́т о́бласть. И́бо не́коего Дании́ла и́менем от бе́са свободи́в, и того́ наказа́в и поучи́в, единоревни́теля и спо́стника себе́ сотвори́. И о́чи слепы́м уврачева́, и неду́ги разли́чныя устра́бив. Мно́гая же сего́ исправле́ния бы́ша, о́ва писа́нием, а и́на слу́хом: Сей вели́к и высо́к быв житие́м, по всему́ гра́ду Антиохи́йскому и в преде́лех его́. Де́вятьдесять лет дово́льствовав, и та́ко пре́йде к ве́чным оби́телем.

Во инди́йстей стране́, воста́ не́кто царь бога́т зело́, и вельми́ сла́вен, и́менем Авени́р. Сей воздви́же гоне́ние на христиа́ны, и изгоня́ше мона́хи из градов свои́х, и из пусты́нь, еще́ не христиа́н сый. Иду́щу же ему́ на лови́тву звери́ную, и ви́де два мона́ха в пусты́ни ше́ствующа, и́хже я́ти повеле́, и к престо́лу своему привести́. И со гне́вом воззре́ на ня, сло́вом же я́ко огне́м дхнув, рече́: Не́сте ли слы́шали, о́ блазни́тели и преле́стницы, пропове́дником вопию́щым: да не обря́щется кто ва́шего чи́на, и злобесо́встия, за три дни, или́ в стране́ мое́й, или́ во о́бласти. А́ще ли обря́щется, отню́д огне́м сожгу́. Мона́хи же отвеща́ста: я́коже повеле́л еси́ исходи́хом от твое́й страны, и от града, далече жили́ще творя́ще: ны́не же путь нам предлежи́т, да до́йдем к бра́тии свое́й: тре́буют бо пи́щи. И се у́бо доно́сим, да и́мут пи́щу, да не гла́дни бу́дут. Царь же рече́: сме́рти боя́йся, или преще́ния, не тре́бует на отше́ствие пи́щи. До́бре рекл еси́ царю́, я́ко сме́рти боя́щиися, в печа́ли суть, но мимотеку́щаго сего́ жития́ предстоя́щым, ни тем ужаса́ющымся: Сим у́бо бла́га ничто́же обрести́ та́мо, ни удо́бь отторгнове́ния и́мут от ви́димых: и сего́ ра́ди боя́тся сме́рти. Мы же оста́вивше сей мир, и су́щая в ми́ре, у́зкий и приско́рбный путь ше́ствующе Христа́ ра́ди, ни сме́рти бои́мся, ни су́щих зде лю́бим, но бу́дущих жела́ем: зане́ ва́ми приноси́мая нам смерть, преи́тие быва́ет к ве́чней жи́зни, и лу́чшей. И рече́ царь: Веща́йта, чесо́ ра́ди за ма́ло отъидо́ста, я́коже повеле́х? И а́ще не бои́тася сме́рти, ка́ко избе́гнути хоте́ста, тем всу́е хвали́тася лжуще. Отвеща́ша мона́си: Не тоя́ сме́рти прети́мыя тобо́ю бе́гаем, но ми́лующа тя, да не бо́льшу ти осужде́нию вина́ бу́дем, замы́слихом отъити́. А́ще ли еси́ на сие́ прише́л, то прещения твоего́ николи́же устраша́емся. Сего ра́ди царь разгне́вася, и повеле́ я́ огне́м сожещи. Смерть же прия́ша Христо́вы уго́дники огне́м, му́ченический по́двиг и венцы́ получи́ша. Но оба́че прия́ посе́м крещение Авени́р царь, со смире́нным сы́ном свои́м Иоаса́фом, и в покая́ние прии́де.