Стихи́:

Стихи́:

И́же в земли́ Изра́илеве воспе́вый стра́сти,

Прише́д от земли́ в ме́сто стра́стий лу́чших.

Сей сказа́ется «Любо́вь Бо́жия», или́ «Нача́ток» или́ «Нача́ло Б́ожие». Бысть же от се́мени Руви́мля, села́ Мефомо́рова. И проро́чествова о гла́де и исче́знутию же́ртвам, и о стра́сти пра́веднаго проро́ка, его́же ра́ди обновля́ется во спасе́ние вся земля́. И у́мре, и погребе́н бысть во свое́й ему́ земли́.

Стихи́:

Уа́р, сла́вный му́ченик,

В седме́м у́бо седмы́й причте́ся,

Осма́го и́стиннаго живота́ насле́дник показа́ся.

Уа́р сла́вный му́ченик, живя́ше во Еги́пте, ту бо име́я оте́чество и род, от пе́рвых и санови́тых муж бе. Почте́н же бе в ти́ронский сан, и име́яше под собо́ю во́ины. Егда́ же повеле́ Максимиа́н изби́ти христиа́ны, и я́ти бы́ша во Еги́пте, седмь муже́й учи́телей христиа́нских, и вве́ржени бы́ша в темни́цу. К ним же прише́д но́щию Уа́р, в сл́адость послу́шаше уче́ния их: и нужда́шеся сам пострада́ти за Христа́. У́тро же иге́мон повеле́ привести́ му́ченики, и еди́ному оста́вшу в темни́цу, от ран изнемо́гшу, и рече́ к ним князь: се шесть, и где седмы́й? Тогда́ Уа́р разгоре́вся Ду́хом Святы́м, ста пред кня́зем, и рече́: той у́бо у́мерл есть, аз же в его́ ме́сто хощу́ пострада́ти за Христа́. И рече́ князь: Не прельща́йся, Уа́ре. А́ще ли [ни], то мно́гими му́ками живота́ гонзне́ши. И рече́ Уа́р: Твори́ е́же хо́щеши. Разгне́вався же князь, повеле́ на дре́ве пове́сити и́: и бия́ху его́ по всему́ те́лу па́лицами. Посе́м ногты́ желе́зны дра́ху те́ло его́ по ре́бром. И посе́м повеле стремгла́в пригвозди́ти его́ на дре́ве, и содра́ти ко́жу с хрепта́ его́. И повеле́ сукова́тыми дре́вы би́ти его́, и проби́ти утро́бу его́, до́ндеже испадо́ша вся вну́тренняя его́ на зе́млю. И воззре́в на святы́я, и рече́: Благода́ть вам я́ко поучи́сте мя в ве́чную жизнь: и помоли́вся Бо́гу, испусти́ ду́шу. И повеле́ мучи́тель, те́ло его́ поврещи́ псом. И извле́кше во́ини, поверго́ша е́ вне гра́да, о́тай от христиа́н. Ве́рными же погребе́н бысть на ме́сте зна́емем. Про́чыя же святы́я му́ченики повеле́ посещи́ мече́м. И та́ко за Христа́ сконча́шася, в 19 день, окто́врия ме́сяца.

Сия́ бе от Фиваи́ды гра́да, живу́щи в селе́ и́менем Си́ре. Му́жу ея́ ти́рону су́щу, и та́мо в Еги́пте уме́ршу ему́. Во вре́мя же свята́го Уа́ра муче́ния, та бе пришла́, хотя́щи пренести́ мощи му́жа своего́. И повеле́но ей бысть. Она́ же усмотри́ ме́сто, иде́же бе святы́й Уа́р погребе́н: и искупи́вши ри́зы че́стны, оста́вивши му́жа, и взя те́ло свята́го Уа́ра, и прине́сши на свое́ село́, положи́ е́ в де́дне гро́бе: и по вся дни кадя́ше о́крест гро́ба. Мно́зи же неду́жнии ту приходя́ще, исцелева́хуся. И созда́ Клеопа́тра це́рковь свята́го Уа́ра. И егда́ восхоте́ в це́рковь принести́ его́, призва́ епи́скопа того́ ме́ста, и вся попы́, и лю́ди христиа́нския, и сотво́рши пра́здник че́стен, служа́ше всем. Имя́ше же сы́на двоюна́десяти лет, его́же хотя́ше посла́ти в во́инство царе́ви. И помоли́ся свято́му Уа́ру, да бу́дет помо́щник сы́ну ея́. Повеле́ же сы́ну своему́ ничтоже вкуси́ти, но от избы́тков по́слежде насы́титися. Слу́жбе же сконча́не, и мо́щи свята́го положены́ бы́ша, де́тище в боле́знь впаде́: и наста́вши но́щи, у́мре о́трок. Ма́ти же оста́вльши сы́на, припаде́ ко гро́бу Уа́рову, два дни невскло́нно вопия́ше, поймы́ де́ющи свято́му: Я́ко толи́ко ми труди́вшейся о тебе́, и му́жа презре́вшей, а тебе́ с че́стию пренесо́х, и по́мощи от тебе́ ча́ющей, ты же ны́не и сы́на моего́ умори́л еси. Яви́жеся святы́й Уа́р, держа́ за ру́ку сы́на ея́, и рече́: Почто́ на мя вопие́ши, о́ же́но, или́ забы́л есмь добродея́ний твои́х? Ны́не у́бо сы́на твоего́ к Небе́сному Царю́ в во́инство поя́л. И рече́ ей сын: Что та́ко вопиеши, о́ ма́ти? Аз у Царя́ Христа́ в во́инство вчине́н есмь, и со а́нгелы на небеси́ предстою́ Ему́. Ты же ны́не от Ца́рства во убо́жество про́сиши мя. Ви́девши же Клеопа́тра сы́на своего́, во а́нгельский сан облече́на, и рече́: Поими́та и мене́, да буд́у с ва́ма. Уа́р же повеле́ возврати́тися ей, и устро́ити име́ние я́ко Го́сподеви го́де, и по ле́те поити́ в ве́чная жили́ща. У́тро же возвести́ Клеопа́тра виде́ние, и с ра́достию погребе́ сы́на своего́: и раздая́ ни́щым име́ние свое. И по вся неде́ли ви́дяше сы́на своего́ со Уа́ром во а́нгельстей оде́жди. Сконча́вши же ле́то еди́но, преста́вися угоди́вши Бо́гу: И положена́ бысть в це́ркви свята́го Уа́ра.

Па́ки шепотни́к и клеве́тник, обе́щника еста́ сра́мному ею́ злодея́нию, и́бо еди́но есть обою́ де́лание, в путь поги́бельный водя́. Ме́рзка пои́стинне Бо́гу и челове́ком гну́сно клеветника́ и шепотника́. Живу́щим с ни́ма скверне́но и нечи́сто житие́ сотворя́ется, не пребыва́ем у́бо в отрече́ном сем житии́, да не обря́щемся врагу́ ко единоплемене́нию. Запове́дает зако́н не приима́ти слу́ха су́етна: не ся́ди с непра́вым свиде́телем, всегда́ бо злоглаго́ливый ме́рзостив есть. Прему́дрый же Соломо́н рече́: «Шепотника́ и двоязы́чника кля́ти досто́ит, мно́ги бо погуби́л живу́щая с ним». И па́ки: «Язы́к объя́тив мно́гими подвиза́л и слу́шая его́ не обря́щет поко́я». И па́ки: «Я́зва язы́чная сокруша́ет ко́сти, смерть бо люта́ его́». Проро́к же Авваку́м: «Му́жи ми́рнице твои́ положи́ша сеть под тобо́ю». Иереме́я рече́: «Стрела́, язвя́щи язы́к их». Дави́д же, уста́вити хотя́ от враждова́ния сего́, запреща́ет, глаго́ля: «Удержи́ язы́к свой от зла и устне́ твои́ не глаго́лати льсти». Ве́дый же зло́бу во́льную, и приво́дит: «Гроб отве́рст горта́нь их и язы́ки свои́ми льща́ху: суди́ им Бог, зане́ яд а́спиден под устна́ма их: на мя бо шепта́ху, вси вразе́ мои́, на мя помышля́ху зла́я мне. Сло́во законопресту́пно возложи́ша на мя, но да облеку́тся облыга́ющии мя в срам и оде́жутся я́ко оде́ждею студо́м свои́м». И мо́лит, глаго́ля: «Го́споди, изба́ви ду́шу мою́ от усте́н непра́веден и от язы́ка льсти́ва, от та́йных мои́х пощади́ раба́ твоего́, да непоро́чен бу́ду». И При́точник глаго́лет: «Муж скороречи́в впа́дает во зло». И па́ки: «Смерть и живо́т в ру́це язы́ка; держа́щии же его́ снедя́т плоды́ его́». И: «А́ще мни́тся в вас ве́рен сый, не восхлаща́я язы́ка своего́, но льстя се́рдце свое́, сего́ су́етна ве́ра», и приво́дит: «Се коль мал огнь коли́ку грома́ду сожига́ет и язы́к утваря́ется в удо́лех на́ших, скверня́ все те́ло и паля́ колоро́дства на́шего, житие́ бо челове́че ко́ло есть, обраща́яся и опаля́емо от гее́ны».

Бежи́м у́бо, бра́тие, шепта́ния, да не лиши́т нас поро́ды Госпо́дь наш Человеколю́бец и препрова́дит ны в гее́ну о́гненую. Пошепта́вши бо змия́, изгна́ Е́ву из поро́ды, я́коже е́тер прему́др рече́: «Блаже́н и́же язы́ком не попо́лзнется». И Па́вел: «Егда́ ка́ко рве́ние в вас зави́ды и я́рости, ре́ти, клеветы́, ше́пти, горды́ни и про́чая». Госпо́дь же рече́: «До́брый челове́к от до́браго сокро́вища изно́сит до́брое, и злый челове́к от зла́го сокро́вища се́рдца своего́ излага́ет зла́я, от избы́тка бо се́рдца уста́ глаго́лют».