По шестой песни:
И поется кондак и икос (или мученичен, аще несть).Стихи́:
Бо́га ра́ди убие́ную медве́жиими зубы́
Хвала́ми тебе́ подоба́ет венча́ти Евфи́мие:
В шестнадеся́тый Евфи́мию уби́ медве́дь.
Та бя́ше во времена́ Диоклитиа́на царя́: и Христо́ва ра́ди испове́дания я́та бы́вши, и со огне́м и колесе́м бра́вшися. Еще́ же бе томи́ма муче́нием и про́чими му́ками. И на коне́ц в снедь львом вдана́ бысть, и от всех благода́тию Бо́жиею невреди́ма пребы́вши. И на том само́м позо́рищи, предаде́ ду́шу Го́сподеви.
В то́йже день свята́го священному́ченика Ма́ртина па́пы Ри́мскаго
Стихи́:
В Херио́нскую зе́млю прогна́н быв Ма́ртине
Христо́вым повеле́нием от земли́ вышезва́н еси́ был.
Сий бе́яше при Константи́не Брада́тем. И́же в Дафи́нстей ба́ни, Никели́йстей прободе́н быв ноже́м. Зане́же, минофели́тскую пагубную волю царь держати хотя. Зане́же блаже́ному, не престаю́щу проти́вящуся неистовле́нию его́. Прогна́ свята́го из Ри́ма, и́же в корабли́ пловы́й, мно́га зла претерпе́вшу. Я́ко не́коему злоде́ю желе́за тя́жка наложи́в и в Херо́н прогна́, иде́же про́чее житие́ препроводи́в ко Го́споду отъи́де.
В то́йже день па́мять святы́я му́ченицы Севастиа́ны
Стихи́:
Севастиа́на посе́чена мече́м и то́чит млеко́,
Ни кровь ни плоть я́коже су́щая к мечу́.
Сия́ свята́я бя́ше при Дометиа́не царе́, учени́ца бы́вши Па́вла апо́стола. Я́та же бы́вши в Маркиа́не гра́де, Гео́ргием иге́моном, и бие́на бы́вши, и в пещь вве́ржена, и пребы́сть невреди́ма. Ведена́ же бы́вши во Арка́диев град Фраки́йский. И во Ира́клии пове́шена бысть на дре́ве: и звере́м предана́ бы́вши, и от всех вы́шши бысть. И на коне́ц ме́чное прия́т посече́ние, излия́вшуся от нея́ в кро́ви ме́сто млеку́.
В то́йже день сло́во Иоа́нна Златоу́стаго, ка́ко подоба́ет чте́ния святы́х книг послу́шати и с прилежа́нием чести́ и внима́ти
Рече́ блаже́нный Иоа́нн Златоу́стый: седя́щу ти в почита́нии слове́с Бо́жиих, пре́жде моли́ся Бо́гу да отве́рзет ти о́чи серде́чнеи. Да не то́кмо чте́ши напи́саных, но да и твори́ши, да не в грех себе́ святы́х жития́ и словеса́ чтем. Егда́ же чте́ши приле́жно и всем се́рдцем, со мно́гим прилежа́нием прочита́й словеса́, а не тщи́ся листы́ то́кмо обраща́ти. А́ще ти есть тре́бе, не лени́ся, но и двокра́ты прочита́й словеса́, да разуме́еши си́лу их. Егда́ же хо́щеши чести́ или́ послу́шати ино́го чту́ща, то помоли́ся Бо́гу си́це глаго́ля: «Го́споди Иису́се Христе́, отве́рзи ми о́чи серде́чнеи услы́шати сло́во Твое́ и разуме́ти е́ и твори́ти во́лю Твою́, я́ко пришле́ц есмь аз на земли́. Не скрый от мене́ за́поведей Твои́х, но откры́й о́чи мои́ да разуме́ю чудеса́ зако́на Твоего́. Скажи́ ми безве́стная и та́йная прему́дрости Твоея́, на Тя упова́ю, Бо́же мой. Да те́ми просвети́ши ум и смысл све́том ра́зума Твоего́, не то́кмо чести́ напи́саных, но и твори́ти. Да не во грех себе́ святы́х жития́ и словеса́ почита́ю, но во обновле́ние и просвеще́ние, и во святы́ню, и во спасе́ние души́ мое́й, и в провожде́ние жи́зни ве́чныя. Я́ко Ты еси́ Просвеще́ние лежа́щим во тме, и от Тебе́ есть вся́ко дая́ние бла́го и всяк дар соверше́н. [Ами́нь.]»