Стихи́:

Опаля́емь Ники́та бы́вый победоно́сец:

Или́ па́че рещи́ огнено́сный победоно́сец:

В пятна́десятый в сковраду́ Ники́та вве́ржен

Святы́й му́ченик Христо́в Ники́та бе в ца́рство вели́каго царя́ Константи́на. Ро́дом же бе го́тфин, об он пол живу́щих реки́ Дуна́йския. Благоверен же сый и боя́ся Бо́га, в Гата́не гра́де живы́й, научен быв ве́ре христиа́нстей Фео́филом епи́скопом преподо́бным Го́тфским. Го́тфом же на две ча́сти раздели́вшимся, еди́на часть имя́ше в себе́ кня́зя Фанари́ха, а друга́я Афритиге́на. Бы́вши кото́ри между́ и́ма, отбеже́ Афритиге́н в Рим к цареви Уале́нту, и той посла́ с ним во́я на Фанари́ха и победи́ и́. И отто́ле умно́жися в Го́тфех род христиа́нский, в ни́хже бе Ники́та. Того́ ра́ди Фанари́х дви́же гоне́ние на христиа́ны с вели́ким гне́вом и мно́ги уму́чи разли́чными си́лами. Свята́го же Ники́ту по мно́гих му́ках огне́м сожже́.

Стихи́:

Пожи́ Филофе́е, и я́ко Бо́га любя́,

Живо́т непремен́ен обре́те с Бо́жиими дру́ги.

Сей бысть от села́ нарица́емаго Мра́вино, ма́терним и́менем нарица́емь. Феофи́лия бо ма́ти его́ нарица́шеся. То́йже бра́ку приобщи́вся, и дете́й оте́ц быв, и святи́тельству сподо́бися. И от тогда́ бя́ше постя́ся, и к моли́тве прилежа́, чудесе́м вели́ким самоде́йствен быв, от пусто́шных удали́ся, а́лчущым хлеб пода́в, и теку́щую во́ду в вино́ преложи́. И ка́мень велик сло́вом преложи́. По успе́нии же его́ ле́ту еди́ному мимоше́дшу, преложи́ти его хотя́щым на и́но ме́сто: ру́це свои́ я́коже и жив просте́р, и за плещи́ я́тся двема́ иере́ома хотя́щема его́ пренести́, воста́, и три́жды поступи́в, положе́н бысть на ме́сте па́ки иде́же лежа́, точа́ исто́чник ми́ра приснотеку́щаго. Чу́до стра́нно и ди́вно житию́ своему́ пода́в виде́нием.

Стихи́:

Креще́нием преложи́ся поигра́в,

Игра́л еси́, пресели́ся креще́ния ра́ди:

Порфи́рие во главу́ посе́чен [в пятнадеся́тый].

Иулиа́ню рожде́нию соверша́ему, повеле́но бысть Порфи́рию, укори́ти и поруга́ти игра́нием христиа́ны. И внегда́ тому́ в во́ду вни́ти хотя́щу, и погрузи́тися, тогда́ возопи́: Креща́ется Порфи́рий во и́мя Отца́, и Сы́на, и Свята́го Ду́ха. И изше́д из воды́, и наложи́ ри́зы бе́лы, и христиани́на себе́ испове́дав. И му́чимь, посе́чен бысть мече́м.

Брат еди́н живы́й в пусты́ни му́чимь бе от по́мысла блу́днаго на похоте́ние же́нско. И прии́де к отцу́ Пахо́ну, пове́да ему́ брань. Он же отвеща́в, рече́: «Не диви́ся де́лу тому́. Не бо́ его́ от ле́ности стра́ждеши, сведе́тельствует бо ти и ме́сто и ску́дость, и́же на тре́бование пло́ти. И́же несть зде бесе́ды же́нския. Но па́че от добродея́ния случа́ет ти ся от неприя́зни, на труд бо есть рать любодея́ния: овогда́ бо плоть на́ша свере́па быва́ет от жи́зни до́брыя, овогда́ же страсть нахо́дит на вы по́мыслми, овогда́ же сам бес па́кости де́ет за́вистию. Аз бо мно́гажды смотри́в, обрето́хся: се бо ви́диши мене́ ста́ра челове́ка, четы́редесять лет имы́й в ке́лии и пеки́йся свои́м спасе́нием. И толми́ стар сый, и до ны́нешняго дне па́кость ми есть».

А́ще тя кто по́прище по́ймет, иди́ с ним две. Ви́де ли превзы́тие любому́дрия? По отда́тии бо ри́зы и оде́жды, ни на телесе́ хо́щет та́ко враг, я́коже моле́нию и трудо́м. Ни та́ко тому́ подоба́ет брани́ти, рече́: Вся бо нам вели́т пода́ти досажда́ющим, о́во у́бо пода́ти му́жества, о́во человеколю́бия есть. Почто́ сеѓо я́коже призва́х, я́коже преиме́нии сим, в тех повеле́ние твори́т. Что бо глаго́лю, рече́: А́ще и само́ те́ло хо́щет на труды́ приима́ти на де́ло? И без пра́вды па́ки победи́, превзы́ди оби́дящаго жела́ние о́ного. Е́же ная́ти? есть се, е́же без пра́вды влещи́ и без вины́ ко́ея напа́сть наводя́щи. Но оба́че и проти́ву сему́ бу́ди ополчи́вся, я́коже бо́ле страда́ти, ни е́же ели́ко хо́щет створи́ти. И е́же а́ще хо́щет вели́к быти в вас, да бу́дет вам слуга́. И и́же а́ще хо́щет в вас старе́й бы́ти, да бу́дет я́ко раб, я́ко Сын Челове́чь не приде́ть да ему́ послу́жат, но да послу́жит, и да́ти ду́шу Свою́ за избавле́ние за мно́ги.