Стихи́:

Ве́лие уме́ние о́ко Го́ртуни

Всекро́ткое ви́де о́ко Госпо́дне

Во осмы́й на́десять у́мре Евме́ние велеглаго́ливый.

Сей измла́да мно́гим жесто́ким и посто́м себе́ утруди́в, соверше́ное смире́ние стяжа́. Тем и корми́ла Го́ртунския це́ркви упра́вль, и лю́таго зми́я устреми́вшагося нань, свеща́ми опали́. И отту́деже Ри́ма дости́г, я́коже не́кое свети́ло боже́ствеными уче́нии просвети́ зна́мении и чудесы́ мно́гих удиви́в. И отту́де Вифаи́ду дости́г, и не хотя́ бездо́ждию су́щу раста́я. Де́ти же Фиве́йския оте́честву и па́стве по сконча́нии его́, те́ло его́ отсла́ша. Ра́ксо се и́мя ме́сту, иде́же [и] Кири́лово честно́е лежи́т те́ло.

Стихи́:

Спасе́ Ариа́дну разсе́дыйся ка́мень

Бог тя покрыва́ше живо́тным ка́менем.

От че́тьих мине́й: Свята́я Ариа́дна му́ченица ве́ровавши во Христа́ и чту́щи И́, бе же раба́ Тере́нтила не́коего старе́йшины Примеси́йскаго гра́да, страны́ Фриги́йския. Во еди́н же от дний рождеству́ твори́му сы́ну господи́на ея́. Пону́ждена бысть в тре́бище и́дольское вни́ти и спра́здновати с ни́ми. Не покори́вши же ся, бие́на бысть. И вве́ржена бысть в темницу, и гладом уморя́ема кре́пко. Посе́м ведена́ бысть ко кня́зю страны́ тоя́. И пове́шена бы́вши, стро́гана бысть. И пу́щена бы́вши от му́ки на го́ру тече́. Хотя́щим же гоня́щим пости́гнути ю́. Помоли́ся изба́витися от них, и разсе́дшуся ка́мене. Повеле́нием Бо́жиим вни́де вонь. И па́ки соступи́ся, бысть неви́дима. И та́ко скры́ся.

От проло́га: Та пострада́ при Андреа́ни, и Антони́не цари. Раба́ бы́вши не́коего Ферти́ла старе́йшаго Примиси́йскаго гра́да Фриги́е, Салута́рие. И зане́же не восхоте́вши ей спра́здновати о рожде́нии отроча́ти господи́на своего́ в це́ркви и́дольстей, стро́гана бысть вельми́ и отпу́щена, па́ки же иге́моном гони́ма бы́вши. И ка́мени не́которому прибли́жившися и помоли́ся изба́влена быти. И боже́ственым манове́нием ка́мени разсе́дшуся, и вни́де внутрь. И па́ки состу́пльшуся ему́. Гони́телие же явле́нием а́нгельским, свои́ми копии́ сва́дишася, са́ми ся избодо́ша и погибо́ша.

Святы́й священному́ченик Христо́в Симео́н бе в ца́рство Троя́на, вторы́й бысть епи́скоп Иерусали́мский, по Иа́кове бра́те Госпо́дни, сын быв Клео́пин и Мари́ин. Клео́па бо брат быв Ио́сифу е́же глаго́лемаго по пло́ти оте́ц Госпо́день. Си у́бо бе́ста бра́та себе́. Той у́бо Симео́н оклеве́тан бысть от ерети́к и ят бысть от е́ллинских князь, и мно́гими му́ками томи́мь быв, и посе́м на кресте́ пригвожде́н, и ну́ждию житие́ оста́ви. Бы́вый лет сто и два́десять. Честно́е же и свято́е те́ло его́, погребено́ бысть от сро́дник его́, а блаже́нная его́ душа́ взы́де на небеса́, и прия́т ве́чная блага́я, в безконе́чнем Ца́рствии Го́спода на́шего Иису́с Христа́.

Сей блаже́нный оте́ц наш Арка́дий бе нищь, юн во́зрастом оста́ви роди́теля и возлюби́ мни́шеское житие́. И и́де в монасты́рь свята́го Гео́ргия, и, в благогове́нии же и целому́дрии живу́щу ему́, поста́влен бысть от игу́мена своего́ диа́коном, та́же презви́тером. И не по коли́це лет поста́влен бысть игу́меном. Па́ки же от за́висти и наважде́ния диа́воля, изгна́н бысть от монастыря́. Прише́дшу же из Руси́ кня́зю Изясла́ву и возлюби́вшу житие́ его́, и поручи́ ему́ ме́сто свята́го Пантелеи́мона. И пото́м изы́де на пу́сто ме́сто, и созда́ це́рковь Святы́я Богоро́дицы, я́же стои́т и до сего́ дни. По изволе́нию же Бо́жию изведе́н бысть отту́ду на епископи́ю, и поста́влен бысть епи́скопом от митрополи́та Константи́на всея́ Руси́, при кня́зи Святосла́ве, ме́сяца а́вгуста в шесты́й. И пожи́ о Христе́ лет о́семь во епископи́и, в до́бре испове́дании и целому́дрии, мно́ги утверди́в и наста́вив на ра́зум. И посе́м сконча́ся в ле́то шесть ты́сящь шестьсо́т се́дмьдесять пе́рвое, инди́кта втора́го, ме́сяца септе́мврия в осемьна́десятый, в сре́ду по вече́рнии. А зау́тра в девятна́десятый погребено́ бысть те́ло его́ честно́е с фимиа́ном и канди́лы, со свеща́ми и людми́ со всем при́чтом при кня́зи Святосла́ве, на па́мять ве́рным челове́ком. Да моли́твами его́ получи́м оставле́ние грехо́в. Ами́нь.

Брат обле́кся во о́браз мона́шеский, и шед всели́ся в го́ру Нитри́йскую. Бе же ке́ллия его́ близ бра́та ино́го, и слы́ша его́ по вся дни пла́чуща грехо́в свои́х. И егда́ у́бо во мно́гое вре́мя не прихожда́ху ему́ сле́зы, облича́ше ду́шу свою́ глаго́ля: «Не пла́чеши ли окая́нная, и не рыда́еши ли? Ве́ру ими́ мне, а́ще не хо́щеши пла́кати»: и взем лозу́, бия́ше себе́ по на́гу те́лу, до́ндеже прихожда́ху ему́ сле́зы. Чуди́жеся а́бие живы́й близ его́ брат, и моли́ Бо́га, да яви́т ему́, а́ще добро́ твори́т му́ча себе́. И во еди́ну у́бо нощь ви́де во сне бра́та нося́ща вене́ц, и стоя́ща в лице́ му́ченик, и некоего смотря́ше му́жа, глаго́люща: «Виждь до́браго му́ченика. И ты му́чися Христа́ ра́ди, я́ко и сей: и с му́ченики венча́н бу́деши».

Челове́к не́кто в Константи́не гра́де, зело́ бе ми́лостив, я́ко и по ул́ицам гра́дским ходя́щу ему́, и по нем хожда́ше мно́жество ни́щих. Он же яко отгоня́я их и отрева́я, но в ру́ки их влага́ше ми́лостыню. Се же творя́, хотя́ше утаи́тися от челове́к. Не́коему же дру́гу его́ верну́ вопроси́вшу его́, ка́ко бысть ми́лостив? И пове́да ему́ глаго́ля: Егда́ рече́ мал бех, я́ко десяти́ лет, и внидо́х в це́рковь помолит́ися, и ви́дех старца духовна уча́ща лю́ди, и глаго́люща о ми́лостыни: И́же, рече, дает ни́щему, Самому́ Христу́ в ру́це влага́ет. Аз же слы́шах, и не ве́ровах уча́щему, помышля́х бо глаго́ля: Аз слы́шах Христа́ на небеси́ седя́ща одесну́ю Отца́, да ка́ко на земли́ обрета́ется, я́коже глаго́лет, да взима́ет, еже ни́щым даю́т. И сия́ мы́сля идо́х в дом мой, и ви́дех ни́ща в ру́бех иду́ща и над главо́ю его́ стоя́ше обли́чие Го́спода на́шего Иису́са Христа́. И я́ко ни́щий той идя́ше путе́м свои́м, не́кто ми́лостив сре́те и́, и даде́ ему хлеб, Да я́ко простре́ ру́ку дая́й хлеб, и се о́браз Спа́сов простре́ ру́це Свои́ к руце даю́щаго, и прия́т от руки́ его́ хлеб, и даде́ проти́ву тому́ благослове́ние. И то ви́дев аз, ве́ру ях, я́ко дяй ни́щему, пои́стинне Христу́ дае́т. Аз же и ны́не ви́жу то́йже о́браз над главо́ю ни́щих стоя́щь, да того́ ра́ди обдержи́мь быва́ю стра́хом, и творю́ ми́лостыню по си́ле, коли́ко могу́.