По шестой песни:
И поется кондак и икос (или мученичен, аще несть).Стихи́:
Во́инство собра́ся добропобе́дных му́ченик:
И посе́чен бысть Калистра́т мече́м в вы́ю:
Десятери́ца четверосугу́бная му́ченик вку́пе мече́м страда́ние пострада́ша честно́е.
Си́и святи́и бе́яху при Диоклитиа́не цари́. Ят же быв святы́й Калистра́т Персенити́ном стратила́том и Христа́ испове́да Бо́га И́стиннаго бы́ти, бие́н бысть крепко. Таже полага́ется по чрепи́нах и влаче́н по них. И посе́м вложе́н быв во вре́тище и вве́ржен в мо́ре. и растерза́вшуся вре́тищу, изы́де здрав. И ви́девше бы́вшее четы́редесять и де́вять во́ин, ве́роваша во Христа́, и́хже и бив Персенити́н, пове́рже Калистра́та в темни́цу, и учи́ми бе́ху в темни́цы о суде́ и о воскресе́нии души́. Та́же изведе́н из темни́цы с наречеными во́ины, и помоли́вся, пове́рже вся и́долы. И ви́девше друзи́и во́ини сто и се́дмьдесять и де́вять и еди́нем стра́жником, ве́роваша и ти. И всем главы́ отсеко́ша, и та́ко сконча́ся муче́ние их.
В то́йже день па́мять святы́я му́ченицы Епихари́и
Стихи́:
Помо́щника стяжа́вши, боже́ственную благода́ть,
В два́десять седмы́й Епихари́я ме́чным острие́м уя́звена бысть.
Епихари́я Христо́ва му́ченица бя́ше в Ри́ме, при Диоклитиа́не царе́. Я́та бы́вши Кеса́рием епа́рхом, испове́давши дерзнове́нно и́мя Христо́во. Того ра́ди пове́шена бы́вши, и стро́гана. Та́же бие́на млаты́ оловя́ными, от четы́редесяти во́ин: и моли́твами ея́ а́нгелом побие́ны бы́ша. Прии́мши же и та мечное осужде́ние. Ка́мень и́же бе́яше под нога́ма ея́, мно́жество воды́ от него́ искипе́. Уя́звлена же бы́вши мече́м от слуги́ мучи́телева, и предаде́ Бо́гу блаже́нную свою́ ду́шу.
В то́йже день, наказа́ние Григо́рия Чернори́зца
Не мо́зем у́бо лени́тися, бра́тие, о свое́м спасе́нии. Не пре́зрим вре́мене, да́ннаго нам на покая́ние, его́же па́ки получи́ти не возмо́жем. Вельми́ бе́дно ны́не не ка́ющимся, да́же не пости́гнет смерть: отту́ду бо не мо́жем па́ки возврати́тися, но по́йдем в зе́млю мра́чну ве́чныя тмы, иде́же несть све́та, ни жития́ гре́шником, Тем ны́не подви́гнемся, бра́тие, да Бо́га Ми́лостива сотвори́м себе́, де́лы до́брыми угоди́м Ему́, посто́м и моли́твою, ми́лостынею, смире́нием, чистото́ю, братолю́бием, покая́нием, не оплета́ющеся ве́ка сего́ су́етами. Отве́рзем мирски́я зло́бы, не оплете́мся плотски́ми страстьми́, объяде́нием, пия́нством и похотьми́ блу́дными, тля́щими ду́шу и те́ло, ма́ло бо вре́мя на́ше зде, попеце́мся душа́ми на́шими, пои́щем своего́ спасе́ния, потруди́мся грех ра́ди на́ших, не днесь ка́ющеся и смиря́ющеся, а у́тро го́ршая творя́ща. А́ки умыва́яся от мертвеца́ и па́ки прикаса́яся ем[у́]: та́коже и челове́к, ка́яся грех свои́х и па́ки то́жде творя́, что успе́ет в покая́нии свое́м, возвраща́яся от пра́вды на грех? Ка́ко ли моли́тва его́ услы́шана бу́дет? Но Госпо́дь угото́вает нань гнев Свой. Я́коже мно́га ми́лость Его́, та́ко мно́го преще́ние Его. Кому́ждо по дело́м су́дит, и ко́ждо по дело́м свои́м обря́щет. Блажен челове́к, и́же моги́й створи́ти, и не створи́т греха́. Го́ре же се́рдцу на́двое мы́слящу и гре́шнику в два пути́ ходя́щу: Госпо́дь бо вселя́ет единомы́сленыя в дом.