Стихи́:

Земну́ю пи́щу попра́в Харито́н,

А пита́емь есть ны́не в небе́сных благ:

В два́десять осмы́й Харито́н у́мре в ста́рости долголе́тней.

Сий бе́яше при Аврилиа́не цари́, гра́да Икони́йскаго, Ликао́ньския епа́рхии, и́же и приведе́н бысть ипа́тику, и дерзнове́нно Христа́ пропове́да. И в пусты́ни в разбо́йники впад и свя́зан изба́вися сих пра́вом таковы́м: змии́ припо́лзшей, яд свой изблева́вшей в сосу́д, и́же с вино́м бя́ше, от него́же вси испи́вше и издхо́ша. Святы́й же раздре́шься, верте́п той це́рковь створи́в и мно́жество и́нок собра́в и оби́тель [ю́же зове́му ны́не Фара́нскую] соста́ви. Из несеко́маго ка́мени во́ду изве́д и врачь всяким неду́гом я́влься, в глубо́це ста́рости житие́ оста́вль.

Стихи́:

Проро́ческая изве́стная диопе́тра,

Иереми́ево дыха́ние и поко́ище:

Впосле́дствуя бе Иереми́ю учи́телю.

Веде́н у́бо бя́ше седми́десять лет Иереми́я в Вавило́н, я́ко пле́нник. Варух же учи́телю приседя́. И я́ко ви́де его́ Иерусали́мова разнобы́тия пла́чуща, в верте́пе себе́ затвори́в, о разлуче́нии плакаше учи́теля Иереми́и, недомы́слием себе́ сматря́я, даже и до возвраще́ния людска́го. Внегда́ же лю́дие ко Иерусали́му возврати́шася, тогда́ и Вару́ху из верте́па изше́дшу. Па́ки я́же о Иереми́и во у́жасе ви́димая, внегда́ ка́мением побива́емь быва́ше со Авимеле́хом, слы́ша яко во двою́ телесе́х еди́на душа́ вку́пе сказа́емо бя́ше проро́ком, зане́же во еди́ного чинонача́льника боже́ственным Ду́хом о́ба писа́ста. Ясне́йши же Вару́х, я́же о Христо́ве сни́тии возопи́ глаго́ля: «Сей Бог наш, и не вмени́тся ин к Нему́», и про́чая. Обре́т же не́которыя мно́жайшыя в труде́х любе́зных проро́ческия кни́ги проходя́, и разсужда́я я́же о Христе́. И о Иерусали́ме провозвеща́я приле́жно. И Иереми́ю погребе́, и е́же о Го́споде преставле́ние его́ всем просла́ви. Не по мно́зе же и сам от жития́ сего́ пре́йде.

Стихи́:

Припа́дше к земли́ трие́ Госпо́дни му́ченицы,

И та́мо припадо́сте к боже́ственей росе́:

Па́стырь сый Ма́рко,

Его́же уби́ мечь остр:

Па́стыри овца́м, я́ко и по писа́нию А́вель: Илиодо́р, Ни́кон и Не́он,

По Христе́ на враги́ мече́м но́вая побе́да:

Посе́чени бы́ша де́тий и жен мно́жество,

Взира́ния жена́м мно́жества приими́ Го́споди.

Ти́и святи́и му́ченицы бя́ху при Диоклитиа́не царе́, во гра́де Антиохи́и Писиди́йстей, от страны́ Фриги́и Гала́тския, при иге́моне Ма́гне. То́йже Магн повеле́ во́ином лови́ти зве́ри. И возше́дше на го́ру лови́ти, обрето́ша свята́го Ма́рка пасу́ща о́вцы. И ви́девше зве́ря гони́ма и́ми, па́дша на ногу́ свята́го, и ли́жуща и́. Слы́шав же Магн сие, посла́ три́десять во́ин привести́ его́. По́сланнии же науче́ни от него́ бы́ша, и ве́роваша во Христа́. И повеле́ их привести́ пред ся, и связа́. Про́чыя же посла́ в Ники́ю, и усе́кну я́. Удержа́ же Ма́рка Магн, и взыска́ ковача́ сотвори́ти мученыя сосу́ды. И обрето́шася три бра́тия, Алфе́й, и Алекса́ндр, и Зоси́ма, и́же ве́роваша Христо́ви. И пригвожде́н бысть Ма́рко с треми́ святы́ми, и посе́чен бысть. И посла́ главу́ Ма́ркову Магн в тре́бище Артеми́дино, и сокруши́шася вси и́доли. Ви́дев же Ни́кон, и Не́он, Илиодо́р, и ве́роваша Христо́ви. И заколе́ни бы́ша и ти́и.

Подо́бно есть ве́дати пре́жде оте́чество и стол свята́го му́ченика Вячесла́ва. Сей бы сын Вратисла́вль, Че́шскаго кня́зя, име́я по собе́ два бра́та, Болесла́ва и Спытигне́ва. У́мершу же отцу́ их, прия́ Вячесла́в стол отчь. Тогда́ злура́ди боя́ре нача́ша сва́живати бра́тию: пе́рвое же наусти́ша Вячесла́ва да отжене́т ма́терь свою́, реку́ще: хо́щет тя уби́ти с бра́тома; та бо пре́жде уби́ла есть и ба́бу твою́ Людми́лу, и отгна́ ма́терь свою́ в Бу́дочь; и пома́ле пока́явся, приведе́ ю́ к себе́. Боля́ре же посла́ша к бра́ту его́, реку́ще: а́ще нас не послу́шаеши, не упереди́ уби́ти бра́та своего́, то тебе́ хо́щет уби́ти. Мы тобе́ прия́ем и тебе́ па́че сего́ хо́щем. И сотвори́ с ни́ми сове́т Болесла́в. Умоли́ же бра́та Вячесла́ва приити́ на освяще́ние це́ркви. И прише́д Вячесла́в, любе́зно пребы́ста в день свяще́ния. Восхоте́ же Вячесла́в отъити́ от гра́да, и умоли́ его́ Болесла́в, да во у́трий день повесели́тася: бе бо язы́ком льсти́вым па́че своего́ живота́ любя́й, на се́рдцы же свое́м о уби́йстве его́ мы́сля. И я́коже облеже́ Вячесла́в во гра́ди, той но́щи утверди́ сове́т с боя́ры его́ Болесла́в о убие́нии бра́тни. И у́тро иду́щу ему́ в це́рковь на зау́треню, пости́же и́ с боя́ры Болесла́в, и уда́ри и́ во главу́ мече́м. И побеже́ Вячесла́в к це́ркве. И постиго́ста и́ два боля́рина и разсеко́ста и во две́рех церко́вных, ин же прободе́ ему́ ре́бра мече́м. И преда́сть святы́й Вячесла́в блаже́нную свою́ ду́шу в ру́це Бо́жии, понеде́льнику свита́ющу. Кро́ве же его́ не отте́рти по три дни со стен церко́вных: вопияше бо а́ки А́вель к Бо́гу на Болесла́ва. По не́колицех же ле́тех принесены́ бы́ша мо́щи его́ в сла́вный град Пра́гу и положены́ бы́ша у свята́го Ви́та.