Преполовение Пятидесятницы

Сия́ рек им, пребы́сть в Галиле́и, егда́ же взыдо́ша бра́тия Его́. Тогда́ и Сам взы́де в пра́здник не я́вствене, но в та́йне.

Я́же челове́чески от Христа́ устро́ена, не сего́ ра́ди то́кмо устро́ишася, да воплоще́ние утверди́тся, но да и нас нака́жет к доброде́тели. А́ще бо вся я́ко Бог де́йствовал бы, отку́ды могли́ бы́хом мы ве́дети подаю́ще челове́чески, что подоба́ет твори́ти? Я́коже что глаго́лю, и в сем саме́м ме́сте Сый, убива́ющих иуде́и, а́бие на среду́ прише́д, спря́та стремле́ние. А́ще бо сие́ твори́л бы вы́ну, мы, не могу́ще сие́ твори́ти, па́дающе же, отку́ду у́бо уве́дели бы́хом, ка́ко подоба́ет ве́щию де́йствовати? Подоба́ет ли а́бие умре́ти, или́ не́что устро́ити, я́ко бы предвмести́ти сло́во ? Отку́ду у́бо навы́кли бы мы немогу́щии, преше́дше на среду́, что подоба́ет твори́ти?

Сего́ ра́ди и сия́ от Него́ наказу́емся:

Ева́нгелие: Сия́ бо, рече́, рек Иису́с, пребы́сть в Галиле́и. Егда́ же взыдо́ша бра́тия Его́, тогда́ взы́де и Сам, не я́вствене, но в та́йне,

Толкова́ние: Е́же рещи́ я́ко взыдо́ша бра́тия Его́, явля́ющаго бе, я́ко не хотя́ше со оне́ми взы́ти, и сего́ ра́ди ожида́ше.

Ниже́ я́вствена устро́ил есть Себе́, оне́м ка́ко тща́щимся сие́ сотвори́ти. Что у́бо, в дерзнове́нии бесе́дуя при́сно, а́ки в та́йне сие́ твори́т? Не рече́ о́тай но я́ко в та́йне. Си́це бо ви́дешеся, е́же рех, наказу́я нас ве́щи устро́яти. И кроме́ же сего́, не бе ра́вно, горя́щим им и раздража́ющимся впа́сти, и по сих, пра́знику разреши́шуся.

Ева́нгелие: Иуде́и у́бо иска́ху Его́ и глаго́лаху: Где есть Он?

Толкова́ние: Добра́ у́бо их я́же в пра́зницех исправле́ния! На уби́йство устремля́хуся при́сно, и от сих тща́хуся улови́ти Его́. Си́це у́бо и и́нде глаго́лют: «Мни́те ли, я́ко не при́дет в пра́здник?» И глаго́лаху: «Где есть Он?». От мно́гия не́нависти и вражды́ ниже́ и́менем Его́ нарица́ти хотя́ху. Мно́го е́же в пра́здник стыде́ние, вели́ко благогове́ние! От пра́здника бо улови́ти Его́ тща́хуся. «И ропта́ние бе о Нем в наро́дех». Аз же мню и от ме́ста раздража́тися им, иде́же зна́мение бысть, и наипа́че свере́пети и боя́тися, не си́це о преше́дшем гне́вающимся, я́ко же боя́щимся да не па́ки соде́лает не́что таково́. Разска́зываху же о Нем, и не хотя́ще, я́вствена Его́ творя́ху.

«И о́ви у́бо глаго́лаху, я́ко благ есть. О́ви же, я́ко льстит наро́да». О́во у́бо - мню непщева́ние мно́гих бы́ти, сие́ же - князе́й и свяще́нников. Е́же бо глаго́лати «ни, но льстит наро́да», сие́ явля́ет. Льстя́ше же, что творя́, рцы ми? Еда́ мечта́я и не де́йствуя зна́мения? И у́бо сопроти́вное иску́с показа́. «Никто́же у́бо дерзнове́нием глаго́лаше о нем стра́ха ра́ди иуде́йска». Зри́ши ли, везде́ нача́льственое у́бо растле́нно, нача́льствуемых, здра́вствующих у́бо судо́м, не име́ющих же му́жество подоба́ющее, е́же наипа́че мно́жества де́ло есть?

«Уже́ же пра́зднику преполовля́ющуся, взы́де Иису́с и уча́ше». Отложе́нием внима́тельнейшых их сотвори́. И́же бо дней и́щуще пра́здника пе́рвых, внеза́пу Предстоя́ща ви́девше, хотя́ху належа́ти глаго́лющу, и́же и благоглаго́люще, и лука́ва: о́ни у́бо я́ко бы приобрести́ что и почуди́тися, си́и же я́ко бы зазре́ти и я́ти. Е́же бо льсти́ти наро́да - от уче́ния глаго́лаху, не разумева́юще глаго́лемая, а е́же благ - от зна́мений. Осла́бив у́бо их я́рость, си́це надста́, я́ко бы со упражне́нием послу́шати глаго́лемых, не ктому́ гне́ву загража́ющу ушеса́. Что у́бо уча́ше не рече́: а я́ко чу́дне, сие́ то́кмо глаго́лет, и я́ко ят их и преложи́ - толи́ко глаго́лемых бе си́ла. Глаго́лющии бо, я́ко льстит наро́да, прелага́еми чудя́хуся: «Ка́ко писа́ния весть, не учи́вся?» Зри́ши ли и зде лука́вства по́лно чу́до их? Не рече́ бо, я́ко уче́нию чудя́хуся или́ я́ко приима́ху глаго́лемая, но что во и́но ужасе́ние испада́ху и недоуме́яху глаго́люще: «Отку́ду весть сия́?». Потре́бно бе от недоуме́ния сего́ све́дети, я́ко ничто́же челове́ческо бе в Нем. Но поне́же его́ они́ не хотя́ху откры́ти, но до е́же почуди́тися стоя́ху то́кмо, услы́ши, что рече́ Сам: «Мое́ уче́ние несть Мое́» . Па́ки к непщева́нию их отвещева́ет, ко Отцу́ их приводя́ и отту́ду заусти́ти хотя́. «Творя́й во́лю Его́, сей позна́ет о уче́нии, еда́ от Бо́га есть, или́ Аз о Себе́ глаго́лю» . Что же ли есть е́же рече́? Недоуме́ние сие́ отъя́ти, и гнев, и за́висть, и не́нависть ту́не ко Мне быва́емую и ничто́же возбраня́ющее вас разуме́ти, я́ко Бо́жии вои́стинну суть глаго́лы Мои́.

Ны́не у́бо вам сия́ отемня́ют и пра́вый растлева́ют суд сия́ющь: а́ще же сия́ отъи́мете, ни ктому́ сие́ постра́жете. Но си́це у́бо не рече́, ужаси́л бо бы их зе́льне; вся же сия́ назна́мена за е́же рещи́: «Творя́й во́лю Его́ позна́ет о уче́нии, еда́ от Бо́га есть, или́ Аз о Себе́ глаго́лю», е́же есть: или́ Аз чу́жде не́что и стра́нно и сопроти́вно веща́ю, е́же бо от себе́ - при́сно о сем лежи́т.

Я́ко ничто́же вне уго́дных Ему́ глаго́лю, но вся я́же Оте́ц хо́щет, сия́ и глаго́лю. «А́ще кто во́лю Его́ твори́т, позна́ет о уче́нии». Что есть «а́ще кто во́лю Его́ твори́т»? А́ще кто рачи́тель бу́дет жития́, е́же по доброде́тели, уве́сть глаго́лемых си́лу, а́ще кто хо́щет внима́ти проро́ком, еда́ по сих глаго́лю, ка́ко же Свое́ и не Свое́.

Не рече́ бо «уче́ние сие́ несть Мое́», но пе́рвее рек я́ко «Мое́ есть». И усво́ив е́, тогда́ наведе́: «Несть Мое́». Ка́ко у́бо то́же мо́жет бы́ти: и Его́, и не Его́. Его́ у́бо, я́ко не науча́емь глаго́лаше. Не Его́же, зане́ О́тче бе уче́ние.

Ка́ко у́бо глаго́лет, я́ко вся я́же О́тча Моя́ суть, и Моя́ – Его́? А́ще бо поне́же О́тча суть, сего́ ра́ди не суть Твоя́, ло́жно о́но: сего́ бо ра́ди до́лжно бы́ти Твое́. Но е́же не Мое́, е́же зе́льно Его́ и О́тче - еди́но бы́ти явля́ет уче́ние. А́ки бы глаго́лал: «Ничто́же и́мать пременно, я́ко ина́го су́ще». А́ще бо и ипоста́сь ина́, но си́це глаго́лю и де́йствую, я́ко не непщева́тися и́но что па́че Отца́, но то́же е́же Оте́ц рече́ или́ соде́я. Та́же и и́но наво́дит смышле́ние не сопротиворе́чно, челове́ческое же приводя́ на среду́ и от су́щых во обы́чаи наказу́я. Что же ли сие́ есть? [«Глаго́ляй о себе сла́вы своея́ и́щет» , е́же есть] хотя́й и осо́бное не́кое поста́вити уче́ние - ни зачто́же и́но хо́щет, рече́, но я́ко бы сла́ву свою́ обоима́ти. А́щеже Аз не хощу́ обоима́ти сла́ву, что ра́ди осо́бно не́кое поста́вити хощу́ уче́ние? «Глаго́ляй от себе́», си́речь, осо́бно не́что и разлуче́но. Сего́ ра́ди глаго́лет, да сла́ву свою́ поста́вит. А́ще же Аз сла́ву посла́вшаго Мя ищу́, что ра́ди хощу ина́я учи́ти? Зри́ши ли, я́ко вина́ не́кая бе, ея́же ра́ди и о́на глаго́лаше, и ея́же ра́ди глаго́лаше ничто́же от Себе́ твори́ти? Да́же ве́руют, я́ко не сла́вы жела́ет, ниже́ бо любонача́льствия.

Сего́ ра́ди, егда́ у́бо смире́нная глаго́лет: «Аз сла́ву О́тчу ищу́» рече́, везде́ увеща́ти хотя́ их, я́ко не сла́вы жела́ет. Е́же бо смире́нная веща́ти, мно́ги вины́: е́же не нерожде́нна непщева́ти, е́же не богопроти́вна, е́же пло́тию обложи́тися, [е́же сни́ти на] немо́щное слы́шащых, е́же учи́ти челове́ков смиря́тися и ничто́же саме́м от себе́ глаго́лати ве́лие. А е́же высо́кая веща́ти, еди́ну обря́щет кто вину́ - естества́ вели́чество. А́ще бо поне́же рече́ пре́жде Авраа́ма бы́ти соблазни́шася, что не бы у́бо пострада́ли, при́сно глаго́л высо́кых слы́шаще?

«Не Моисе́й ли даде́ вам зако́на? И никто́же от вас твори́т зако́на. Что Мя и́щете уби́ти?» . Кое́ после́дование име́ет сие́, что же о́бще к рече́нным пе́рвее? Два согреше́ния наведо́ша: еди́но я́ко суббо́ту разоря́ше, и́но же, я́ко Отца́ глаго́лаше Бо́га, ра́вна себе́ творя́ Бо́гу. Я́ко бо не оне́х непщева́ния бе, но Его́ ра́зума и зане́ не я́ко мно́зии, но изря́дне и осо́бне глаго́лаше, я́вствено отту́ду. Мно́зи мно́жицею Отца́ ре́ша Бо́га себе́, си́речь, «я́ко Бог Еди́н созда́ нас и Оте́ц Еди́н всех нас» . Но не от сего́ ра́вни бе́ша лю́дие Бо́гу. Те́мже ниже́ соблажня́хуся слы́шаще. Я́коже у́бо, я́ко несть от Бо́га глаго́лаху, и исцели́ их мно́жицею, и о разреше́нии суббо́ты отвещева́ше, си́це и сие́, а́ще оне́х непщева́ния бы́ло бы, а не Его́ ра́зума, испра́вил бы у́бо и рекл: «Что Мя непщу́ете ра́вна Бо́гу, несмь ра́вен», но ничто́же таково́ рече́, но и сопроти́вное. И показа́, я́ко ра́вен есть и су́щими по сих, е́же бо: «я́коже Оте́ц воздвиза́ет ме́ртвых животвори́т» , и «да вси почита́ют Сы́на, я́коже почита́ют Отца́» , и «дела́ я́же у́бо Он твори́т…» , сия́ вся ра́вности суть состави́тельна. И о зако́нех глаго́лет: «Не мни́те, я́ко приидо́х разори́ти Зако́н и проро́ков» . Си́це весть и я́же в мы́сли лука́вая зазре́ния изъима́ти. Зде же ра́внаго непщева́ние, не то́кмо не отъе́млет, но и утвержа́ет. Те́мже и и́нде ре́кшим им «я́ко твори́ши себе́ Бо́га» , не отъя́т непщева́ние, но и утверди́ рек: «Да́же уве́сте я́ко о́бласть име́ет Сын Челове́чь оставля́ти грехи́ на земли́, глаго́ла разсла́бленному: Возми́ одр свой и ходи́» . О́но у́бо е́же пе́рвее простре́, е́же ра́вна себе́ твори́ти Бо́гу, показу́я, я́ко несть богопроти́вен, но и та́яже глаго́лет, и та́я же О́ному учи́т. Про́чее к разреше́нию суббо́ты стои́т глаго́ля: «Не Моисе́й ли даде́ вам зако́на? И никто́ от вас соблюда́ет зако́на». Что же ра́ди рече́ никто́же? Зане́ вси иска́ху Его́ уби́ти. Аз бо а́ще и разреши́х зако́на рече́, но челове́ка спас, вы же преступа́ете о зле. Мое́, а́ще и преступле́ние бе, но о спасе́нии, и не подоба́ше от вас, вели́кая преступа́ющих, Мне суди́тися. Ва́ше бо - превраще́ние зако́на всего́. Та́же и подвиза́ется; и́бо мно́га и дре́вле бесе́довав, но тогда́ у́бо высоча́йше и по досто́инству Своему́, ны́не же смире́ннейши.

Что у́бо? Я́ко не хотя́ше ча́сте ухапля́ти их. Ны́не же я́же гне́ва простира́хуся и во уби́йство произыдо́ша. Те́мже пребыва́ет, двема́ си́ми спря́туя их: тем е́же обличи́ти их де́рзость и рещи́ «что Мя и́щете уби́ти?», и тем е́же с ти́хостию рещи́ «я́ко Челове́к, И́же и́стинну глаго́лах» , и тем е́же показа́ти я́ко убива́юще, не суть досто́йни суди́ти ина́го. Ты же смотри́ и вопроше́ния смире́нное Христо́во, и отвеща́ния оне́х де́рзностное: «Бе́са име́еши, кто Тебе́ и́щет уби́ти?» . Гне́ва глаго́л, и я́рости, и ду́ши безсту́дствующия, о е́же пресла́вне рещи́ и предъуязви́вшия его́, я́коже мня́ху. Я́коже бо разбо́йницы не́цыи пою́ще о наве́те сих, та́же хотя́ще не сохра́нна соде́лати наве́туемаго, отмета́нием сие́ творя́т - си́це и си́и. То́йже оста́вль обличи́ти сие́, я́кобы не бесту́днейших сотвори́ти, па́ки отве́та каса́ется, е́же о суббо́те от зако́на собира́я их. И зри, ка́ко разу́мне! Ничто́же чу́дно рече́, а́ще Мене́ преслу́шаете . Иде́же зако́на, его́же мне́те послу́шаете, его́же непщу́ете от Моисе́я да́тися, преслу́шаете. Ничто́же у́бо но́во, а́ще Мои́м не внима́ете словесе́м. Поне́же у́бо глаго́лаху, «я́ко Моисе́ю глаго́ла Бог. Сего́ же не ве́мы отку́ду есть» , показу́ет, я́ко в Него́ досажда́ху: и́бо зако́на Он даде́ и не послу́шасте: «Еди́но де́ло сотвори́х и чудите́ся» .

Сего́ ра́ди, иде́же у́бо отвеща́ти подоба́ше и я́ко согреше́ние приима́ет , бы́вшее бо не помина́ет О́тче, но Свое́ лице́ вво́дит. «Еди́но де́ло сотвори́х», хо́щет показа́ти, я́ко е́же не сотвори́ти - разори́ти зако́на бе, и я́ко суть мно́га зако́на госпо́дственнейша, и я́ко за́поведь претерпе́ прия́ти Моисе́й по зако́ну и зако́на госпо́дственейшу. Су́бботы бо обре́зание госпо́дственейше, а́ще и несть зако́на, но оте́ц. Аз же и обре́зание - госпо́дственейше за́поведи зако́нныя, си́речь, я́ко свяще́нницы суббо́ту скверня́т я́коже у́же рече́, но от бо́льшаго преизли́шества. А е́же «чудите́ся», сие́ есть, мо́лвствуете, смуща́етеся. А́ще бо подоба́ло бы изве́стну бы́ти зако́ну, не бы у́бо обре́зание госпо́дственейше его́ бы́ло.

И не рече́, «я́ко бо́льша сотвори́х обре́зания», но назна́мена тем е́же глаго́лати: «А́ще обре́зание челове́к прие́млет» . Зри́ши ли я́ко тогда́ наипа́че стои́т зако́н, егда́ его́ разруша́ет? Зри́ши ли я́ко суббо́ты разреше́ние, соблюде́ние есть зако́на, я́ко а́ще не разреше́на бысть суббо́та, ну́жда зако́ну [бысть] разруши́тися. Те́мже и Аз поста́вих его́. И не рече́, «я́ко на Мя ли кручи́нитеся, зане́ бо́льше обре́зания соде́лах?», но бы́вшее то́кмо рек им, суд повеле́, а́ще не обре́зания ну́жнейше всеце́ло здра́вие. Да зна́мение прии́мет челове́к, ничто́же к здра́вию поспеша́я, разреша́ется зако́н. Да неду́га ли толи́ка свобожде́ние стужа́ете и неду́гуете? «Не суди́те на лице́» . Что есть на лице́? Не поне́же у́бо Моисе́й бо́льшую от вас име́ет сла́ву. Не от лиц досто́инства избира́й суд, но отвеще́н естества́: сие́ бо есть е́же пра́ведне суди́ти. Что бо ра́ди никто́же порече́ Моисе́ови? Что ра́ди никто́же покори́ся суббо́те разреша́тися повелева́ющу, от за́поведи отвне́ прине́сшияся зако́ну? Но он у́бо своего́ зако́на терпи́т за́поведь бы́ти госпо́дственейшу, за́поведь, ю́же не от зако́на вне́сшуюся, но отвне́, е́же есть наипа́че чу́дно. Вы же, и́же не законополо́жницы, да́ле ме́ры отмща́ете зако́на и вражду́ете о нем. Но достове́рнейшь вас есть Моисе́й, повелева́я и разреша́тися зако́ну от за́поведи неузако́неныя. А е́же рещи́ всего́ челове́ка, показу́ет уча́стное здра́вие су́ще обре́зание. И кое́ ли здра́вие обре́зание? Душа́ рече́ челове́ка, я́же а́ще не обре́жется, потреби́тся . Аз же не от ча́сти озло́бленнаго, но всего́ растле́нна воста́вих. Не суди́те у́бо на лице́.

Нравоуче́ние четы́редесять девя́тое: о пра́вде, и я́ко непра́веднаго ничто́же по́льзует е́же пра́ведных име́ти роди́тели:

Сие́ же не су́щым тогда́ рече́ся то́кмо, но и нам, я́кобы ни еди́ноюже ве́щию растлева́ти пра́ведное, но вся о сем твори́ти. А́ще и нищь, а́ще и бога́т бу́дет кто - не лице́м внима́ти, но ве́щи истяза́ти: «Не поми́луеши бо ни́щаго на суде́» .

Что же ли есть глаго́лемое? Да не сломи́шися, ниже́ преклони́шися рече́, а́ще нищь оби́дяй бу́дет. А́ще же ни́щему обра́доватися не подоба́ет, мно́го па́че богатя́щемуся. Сия́ же глаго́лю не ко осужда́ющим то́кмо, но и ко всем челове́ком, я́ко бы нигде́же растлева́ти пра́ведное, но везде́ це́лое сохраня́ти. Лю́бит бо пра́вду Госпо́дь, любя́й же непра́вду ненави́дит свою́ ду́шу .

Да не у́бо возненави́дим свои́х душ, ниже́ да возлю́бим непра́вду, коли́ко бо ея́ приобре́тение есть ма́ло и ничто́же, по́слеже поги́бнем зле. Пачеже ниже зде ея́ наслади́мся: егда́ бо со́вестию лука́вою наслажда́емся, еда́ не му́ка и томле́ние сие́? Да возлюби́м у́бо пра́ведное и нигде́же да пре́зрим сего́ зако́на. Что бо возмо́жем от настоя́щаго припло́дити жития́, а́ще не взе́мше доброде́тель отъи́дем?

Что же та́мо нам предста́нет дру́жба и сро́дство и я́же о́нсицы благода́ть? И что глаго́лю я́же о́нсицы благода́ть? А́ще бо и Но́я, а́ще и Ио́ва, а́ще и Дани́ла име́ем отца́, ничи́м же нас по́льзует сие́, егда́ от свои́х дел бу́дем пре́дани. Но еди́ного нам тре́ба есть токмо, доброде́тели душе́вныя: сия́ нас соблюсти́ мо́жет и свободи́ти ве́чнаго огня́, сия́ препо́слет в Ца́рствие небе́сное, Его́же бу́ди всем нам получи́ти благода́тию и человеколю́бием Го́спода на́шего Иису́са Христа́, И́мже и с Ни́мже Отцу́ сла́ва, со Пресвяты́м и Благи́м и Животворя́щим Ду́хом, ны́не и при́сно и во ве́ки веко́в. Ами́нь.

Глаго́лаху у́бо не́цыи от иерусали́млян: Не Сей ли есть, Его́же и́щут уби́ти? И се со дерзнове́нием глаго́лет, и ничто́же Ему́ глаго́лют: еда́ не что вои́стинну позна́ша кня́зи, я́ко Сей есть вои́стинну Христо́с? Но Сего́ ве́мы, отку́ду есть.

Ничто́же про́сте в боже́ственых писа́ниих лежи́т, Ду́хом бо рече́на суть Святы́м. Те́мже вся со опасе́нием да истязу́ем. И́бо [и] от еди́наго рече́ния есть обрести́ все це́ла ума́, яково́ у́бо и ны́не нам есть предлежа́щее. «Мно́зи бо от иерусали́млян глаго́лаху: Не Сей ли есть, Его́же и́щут уби́ти? И се со дерзнове́нием глаго́лет, и ничто́же Ему́ глаго́лют». Что у́бо предлежи́т «от иерусали́млян»? Показу́ет евангели́ст, я́ко и́же наипа́че вели́ких наслади́вшеся зна́мений, си́и всех бе́ша окая́ннейшии.

И́же божества́ Его́ зна́мение ви́девше велича́йша, все суду́ нача́льников попуща́ху растле́нных. Или́ не ве́лие зна́мение: неи́стовящихся, и убива́ющых, и обходя́щих, и и́щущих уби́ти и держа́щых в рука́х - безмо́лствовати внеза́пу? Кто бо сие́ сотвори́л есть? Кто все це́ло неи́стовство си́це угаси́?

Но оба́че по толи́ких зна́мениих, зри безу́мие и неи́стовство. «Не Сей ли есть, Его́же и́щут уби́ти?». Зри, ка́ко са́ми себе́ осужда́ют. «Его́же и́щут рече́ уби́ти» и «ничто́же Ему́ глаго́лют», и не про́сте ничто́же Ему́ глаго́лют, но дерза́ющу: со дерзнове́нием бо глаго́ляй и со свобо́дою вся́кою, па́че у́бо их раздражи́л бы - но ничто́же творя́ху. «Да не когда́ вои́стинну позна́ша, я́ко сей есть Христо́с?». Вам же что мни́тся? Которы́й о Нем носи́те суд? Сопроти́вный, рече́. Сего́ ра́ди глаго́лаху: «Но Сего́ ве́мы, отку́ду есть». О́ лука́вства, о́ сопротивосло́вия! Ниже́ нача́льников после́дуют судо́м, но ин изно́сят растле́н и своего́ безу́мия досто́ин. Ве́мы Его́, глаго́лют, отку́ду есть. Христо́с же егда́ прихо́дит, никто́же весть отку́ду есть, и у́бо нача́льницы ва́ши вопраша́еми, глаго́лаху, я́ко во Вифле́еме ражда́ется. И па́кы и́ни не́цыи: «Мы ве́мы, я́ко Моисе́ю глаго́ла Бог. Сего́ же не ве́мы, отку́ду есть». Ве́мы отку́ду есть и не ве́мы отку́ду есть. Зри пия́нствующых глаго́лы! И па́ки: «Еда́ от Галиле́и прихо́дит Христо́с, не от Вифлее́мския ли ве́си?». Ви́дел ли еси́ бе́сящихся суд? Ве́мы и не ве́мы. «От Вифлее́ма прихо́дит Христо́с», «Христо́с же егда́ прихо́дит никто́же весть отку́ду есть». Что сего́ неи́стовства я́вственнейше? Ко еди́ному бо то́кмо зря́ху е́же не уве́ритися.

Что бо к сим Христо́с? «И Мене́ ве́сте, отку́ду есмь. И от Себе́ не приидо́х, но есть и́стинен Посла́вый Мя, Его́же вы не ве́сте». И па́ки: «А́ще Мене́ ве́дали бы́сте, и Отца́ Моего́ ве́дели у́бо бы́сте». Ка́ко у́бо рече́ им, и ве́дети Его́ отку́ду есть, и па́ки ниже́ Его́ ве́дети им, ниже́ Отца́? Несопротивосло́вя не бу́ди, но и зело́ Себе́ после́дуя. И́нже глаго́лет ра́зум, егда́ глаго́лет не ве́сте. Я́коже егда́ глаго́лет: «Сы́нове Илиины́, сы́нове губи́тельни, и не ве́дяще Го́спода». И па́ки: «Изра́иль же Мене́ не позна́». Я́коже и Па́вел рече́: «Бо́га испове́дуют ве́дети, де́лы же отме́щутся». Есть у́бо [и] не ве́дети ве́дящу. Сие́ у́бо рече́: А́ще Мене́ ве́сте, ве́дите, я́ко Бо́жий Сын есмь. Е́же бо отку́ду есмь, не ме́сто зде рече́, и я́вствено от наведе́ния: «И о Себе́ не приидо́х, но есть посла́вый Мя, Его́же вы не ве́сте». Неве́дение зде глаго́ля, е́же де́лы, я́коже Па́вел рече́: «Бо́га испове́дуют ве́дети, де́лы же отме́щутся». Ниже́ бо неве́дения бе согреше́ние, но зло́бы и лука́ваго изволе́ния. И сие́ ве́дяще, не ве́дети хотя́т. Оба́че кое́ после́дование сия́? Ка́ко бо, облича́я их, я́же их веща́ет? Ре́кшим бо о Нем: «Сего́ же ве́мы, отку́ду есть», наведе́: «И Мене́ ве́сте». Что бо реша́ они, я́ко не ве́мы, и они́ у́бо сие́ я́ко ве́мы [глаго́лаху]? Но они́ у́бо е́же «ве́мы, отку́д есть» глаго́люще, ничто́же и́но изъявля́ху, но ра́зве я́ко от земли́ есть и я́ко текто́нов есть сын. Той же их возвыша́ше на не́бо, глаго́ля: «ве́сте отку́ду есмь», си́речь отсю́ду, не отню́дуже непщу́ете, но иде́же Посла́вый Мя. Е́же бо рещи́ «я́ко о Себе́ не приидо́х», сие́ гада́тельствует, зане́ ве́дяху, я́ко от Отца́ посла́ся, а́ще и не открыва́ху. Сугу́бым у́бо их облича́ет. И пре́жде у́бо я́же осо́бь глаго́лаху, сия́ на среду́ приведе́, зовы́й, якобы́ их обрати́ти. Пото́м же и я́же в мы́сли откры́л есть, а́ки бы глаго́лал: Несть от отве́рженных, ниже́ про́сте прише́дших, «но есть и́стинен Посла́вый Мя, Его́же вы не ве́сте». Что есть и́стинен Посла́вый Мя? А́ще и́стинен есть, о и́стинне посла́. А́ще и́стинен есть, и По́сланному ле́по и́стинну бы́ти.

И и́накоже сие́ состроя́ет, от свои́х их е́мля слове́с. Поне́же бо глаго́лаху: «Егда́ Христо́с прихо́дит, никто́же весть, отку́ду есть», показу́ет и отсю́ду себе́ бы́ти Христа́. И́бо они́ «е́же никто́же весть» - к противоразделе́нию ме́стнаго не́коего глаго́лаху разделе́ния, и отсю́ду показу́ет себе́ су́ща Христа́, я́ко от Отца́ прии́де, и везде́ позна́ние Себе́ сведе́тельствует еди́ному Отца́, глаго́ля: «Не я́ко Отца́ кто ви́де, ра́зве Сый от Отца́». И раздражи́ша их глаго́лемая. Е́же бо рещи́ «я́ко не ве́сте Его́» - и е́же обличи́ти, зане́же ве́дяще притворя́ются не ве́дети, дово́льно уха́пити и косну́тися: «Иска́ху у́бо Его́ поима́ти, и никто́же возложи́ Нань ру́ку, я́ко не у́ прии́де час Его́».

Зри́ши ли их, неви́диме держи́мых и я́рость их обуздава́ему? Что же ра́ди не рече́ «я́ко держа́ше их неви́диме», но я́ко не у́ прии́де час Его́? Челове́чнейше восхоте́ веща́ти и смире́ннейше евангели́ст, я́ко бы Ему́ и челове́ку непщева́тися. Поне́же бо везде́ высо́кая глаго́лет, сего́ ра́ди сия́ привсева́ет. Егда́ же глаго́лет, я́ко от Него́ есмь, не я́ко проро́к науча́я глаго́лет, но я́ко зря Его́ и с Ним Сый: «Вем бо Его́, рече́, зане́ Аз от Него́ есмь». Зри́ши ли, ка́ко горе́ и до́лу состроя́ет: «Е́же о Себе́ не приидо́х», и «Посла́вый Мя и́стинен есть», ко о́ному пря́ся е́же не непщева́тися чу́жду Бо́га. И смотри́, коли́ко смире́ния глаго́л приобре́тение.

По сих бо мно́зи рече́ глаго́лаху: «Христо́с егда́ прии́дет, еда́ мно́жайша зна́мения сотвори́т, и́хже сей сотвори́л есть?» Коли́ка зна́мения? И у́бо три бе́ша зна́мения: е́же вина́, и разсла́бленнаго, и сы́на царе́ва челове́ка. И ничто́же пове́да вя́щше евангели́ст, отню́ду же я́вствено есть, е́же мно́жицею рех, я́ко мно́гая претека́ют и о сих нам бесе́дуют, о ни́хже нача́льницы злоде́йствоваху. «Иска́ху у́бо Его́ я́ти» и уби́ти. [Кто иска́ше?] Не мно́жество , нача́льства не жела́ющее, ниже́ за́вистию я́тися могу́щее, но свяще́нницы. Су́щии бо от мно́жества глаго́лаху: «Христо́с егда́ прии́дет, еда́ мно́жайша зна́мения сотвори́т?». Оба́че, но ниже́ сия́ бе здра́ва ве́ра, но я́ко мно́жества про́стаго. Е́же бо глаго́лати егда́ прии́дет, не зело́ уве́рено бе сего́ бы́ти Христа́. Или́ сие́ у́бо есть рещи́, или́ я́ко по стече́нию рече́ся от наро́дов.

Я́ко бо нача́льником горе́ и до́лу тща́щимся показа́ти не су́ща Его́ Христа́, положи́м ниже́ бы́ти Ему́ Христу́, [рече́, но] еда́ Сего́ бо́льши бу́дет Он? Е́же при́сно глаго́лю, я́ко дебеле́йшии, не от уче́ния, ниже́ от наказа́ния, но от зна́мений возво́дятся. «Слы́шаша фарисе́и наро́ду ро́пщущу, и посла́ша слуг, да и́мут Его́».

Зри́ши ли, я́ко суббо́ты разреше́ние притворе́ние бе? А е́же наипа́че их ухапля́ше, сие́ бе . Зде бо ничто́же име́юще порица́ти: ниже́ рече́нным, ниже́ соде́янным, - наро́да ра́ди хотя́ху я́ти Его́, и са́ми у́бо не сме́яху, беды́ боя́щеся , служи́телей же посла́ша преда́нных. О́ томи́тельства и неи́стовства! Па́чеже о́ безу́мия! Са́ми мно́жицею наче́нше и не возмо́гше, слуга́м вещь повеле́ша про́сте, я́рость свою́ преупокоя́юще. И́бо мно́га бесе́дова и в купе́ли, и ничто́же таково́ сотвори́ша; но взыска́ша, у́бо не я́ша же.

Зде не ктому́ терпя́т наро́да, хотя́щаго к Нему́ притека́ти. Что у́бо Христо́с? «Еще́ ма́ло вре́мя с ва́ми есмь». Моги́й и преклони́ти и устраши́ти слы́шащых, глаго́лы веща́ет смиреному́дрия испо́лнены, а́ки бы глаго́лал: Что тщите́ся Мя гони́ти и уби́ти? Ма́ло пожди́те вре́мя, и ниже́ тща́щимся Мене́ удержа́ти попущу́. Та́же, да не кто смерть о́бщу вознепщу́ет, е́же еще́ ма́ло с ва́ми есмь, и́бо и сие́ непщева́ша; да́же у́бо не сие́ кто вознепщу́ет, и я́ко ничто́же соде́ет по сконча́нии, наведе́: «И иде́же есмь Аз, вы не мо́жете приити́». А́ще же име́л бы пребы́ти в сме́рти, можа́ху приити́: та́мо бо вси отъи́дем». Просте́йшее у́бо мно́жество преклони́ша глаго́лемая, де́рзостнейшая же устраши́ша, любоумне́йшая же спеши́ти творя́ху к послуша́нию, я́ко ма́лу про́чее остаю́щуся вре́мени, и не леть при́сно сего́ наслажда́тися уче́ния. И не рече́ про́сте зде есмь, но с ва́ми есмь, си́речь, а́ще и го́ните, а́ще изгоня́сте, ма́ло вре́мя с ва́ми есмь. И не преста́ну я́же о вас устроя́я, и я́же ко спасе́нию глаго́ля, и наказу́я вас, и иду́ к Посла́вшему Мя. Устраши́ти сие́ бе дово́льно и в боя́знь вложи́ти.

И́бо я́ко в потре́бе Его́ устро́ятся, явля́ется: «Взы́щете бо Мене́», рече́. Не то́кмо не забу́дете, но и «взы́щете Мене́, и не обря́щете». И где взыска́ша Его́ иуде́и? Глаго́лет Лука́, яќо пла́каху жены́ о Нем. Ле́по же и ины́м мно́гим. И а́бие и гра́ду пленя́ему помина́тися Христу́ и чудесе́м Его́, и прише́ствие иска́ти Его́. Сия́ же вся наведе́, хотя́ их привлещи́. И́бо ма́ло вре́мя бы́ти остаю́щеся, и е́же по разлуче́нии жела́тельно бы́ти и е́же не мощи про́чее Его́ обрести́ - дово́льна вся увеща́ти приступи́ти.

А́ще бо не име́ло бы жела́нно бы́ти прише́ствие, ничто́же ве́лие им мне́лся бы глаго́лати. Па́ки же, а́ще име́ло бы жела́нно бы́ти, мо́щно же бы́ло бы обрести́, не бы у́бо си́це их смути́л. Па́ки же, а́ще мно́го хоте́л бы вре́мя близ бы́ти, и си́це взна́цы бы у́бо бы́ли. Ны́не же отвсю́ду их спогоня́ет и страши́т.

А е́же «иду́ к Посла́вшему Мя», показа́ющаго есть, ниже́ еди́н Ему́ быва́ющь вред от наве́та их, и страсть во́лная. Два у́бо прорече́ прорече́ния: я́ко пома́ле отъи́дет вре́мени, и я́ко не прии́дут к Нему́, - е́же не бе челове́ческия мы́сли, е́же свое сконча́ние прорещи́.

Зри у́бо и Дави́да глаго́люща: «Скажи́ ми Го́споди кончи́ну мою́, и число́ дний мои́х, кое́ есть, да разуме́ю, что лиша́юся аз». И отню́д никто́же есть уве́дый сие́. От еди́ного же и друго́е уверя́ет. Аз же мню и ко слуга́м сие́ гада́тельствовати, и к ним сло́во простира́ти, и́мже наипа́че их привлече́, показа́в Себе́ ве́дяща достиже́ния вину́, а́ки бы глаго́ла: «Пожди́те ма́ло, и отъиду́».

«Глаго́лаху у́бо иуде́и к себе́: Ка́мо Сей хо́щет поити́?». И [в ле́поту] у́бо, жела́ющых свободи́тися , и́же вся де́йствующих, я́ко бы не ви́дети Его́, не подоба́ше сие́ иска́ти, но рещи́: «Я́ко и обра́дуемся, и когда́ сие́ бу́дет?». Но постра́даша не́что ко глаго́ланным, и взыску́ют са́ми к себе́, несмы́сленне непщу́юще: «Ка́мо хо́щет поити́? Еда́ в рассе́яние е́линнское?». Си́це бо язы́ков нарица́ху иуде́и, за е́же всю́ду разсе́ятися и безстра́шне межь собо́ю смеша́тися. Сие́ же и са́ми про́чее поноше́ние пострада́ша, разсе́яни бо бе́ша и са́ми. Дре́вле бо, весь язы́к во еди́но собира́шеся, и не бе и́нде иуде́янина обрести́, но ра́зве в Палести́не еди́ной. К сему́ же у́бо, разсе́яние е́ллин нарица́ху, поноша́юще и велича́ющеся о себе́. Что у́бо есть: «Иде́же Аз иду́, вы не мо́жете приити́»? О́нем же, вси смеша́хуся тогда́, и всю́ду вселе́нныя бе́ша иуде́и: не у́бо бы, а́ще е́ллинов явля́л, рекл: «Иде́же не мо́жете приити́». Ре́кше же: «Еда́ в разсе́яние е́ллинское хо́щет поити́», не ре́ша «и вреди́ти их», но учи́ти. Си́це уже́ упусти́ша гне́ва, и рече́нным ве́роваша: не у́бо же, а́ще не ве́ровали бы, взыска́ли бы к себе́: «Что есть сло́во?».

Нравоуче́ние пятидеся́тое: о пра́вде:

Но сия́ у́бо реко́шася ко оне́м. Страх же, да не и к вам вре́мя име́ют глаго́лемая, я́ко иде́же есть, не мо́жем отъити́, жития́ ра́ди на́шего, грехо́в по́лнаго. О ученице́х бо рече́: «Хощу́, да иде́же есмь Аз, и они́ бу́дут со Мно́ю». О нас же бою́ся, да не сопроти́вное рече́тся: «Я́ко иде́же есмь Аз, вы не мо́жете приити́».

Егда́ бо сопроти́вная повеле́ния де́йствуем, ка́ко возмо́жем отъити́ та́мо? И́бо и в настоя́щем житии́, а́ще кто от во́инствующих недосто́йная де́йствует царе́ви, не мо́жет царя́ уви́дети: но нача́льству разру́щшуся , после́днюю постра́ждет му́ку. Егда́ у́бо похища́ем, лихои́мствуем, егда́ оби́дим, уязвля́ем, егда́ ми́лостыню не соде́лаем, не мо́жем отъити́ та́мо, но и постра́ждем, е́же бысть де́вам. Иде́же бо бе , не возмого́ша вни́ти, но отъидо́ша, угаше́нным их свети́льником, си́речь, дарова́нию их оста́вльшу. Пла́мень бо он, его́же а́бие прия́хом Ду́ха благода́тию, а́ще у́бо хо́щем, зельне́йшь соде́лаем, а́ще же не восхо́щем, вско́ре его́ погуби́м: угаше́нну же о́ному, ничто́же и́но, но ра́зве тма в на́шых бу́дет душа́х.

Я́коже бо горя́щу свети́льнику, мног свет, си́це разре́шшуся, ничто́же и́но, но ра́зве мрак бу́дет. Те́мже рече́: «Духа́ не угаша́йте». Угаша́етжеся, егда́ ма́сла не име́ет, егда́ ве́тра зе́льно не́кое прираже́ние бу́дет, егда́ содержи́тся и стесня́ется. И́бо си́це угаша́ется огнь: содержи́тбося от печа́лей жите́йских, и погаша́ется от вожделе́ния лука́ваго. Но ничто́же его́ от рече́нных си́це погаша́ет, я́коже безчелове́чие, и лю́тость, и хище́ние.

Егда́ бо, ктому́ е́же еле́я не име́ти, и во́ду вложи́м студе́ну, - сие́ бо есть лихоима́ние, простужа́юще печа́лию оби́димых ду́шы, - отку́ду мо́жет воспали́тися про́чее? Отъи́дем у́бо, пе́пел же и прах нося́щь, и мног име́юще дым, осужда́ющь нас, я́ко свети́льникы име́юще угаси́хом. Иде́же бо а́ще бу́дет дым, ну́жда огню́ бы́ти угаше́ну. Но не бу́ди кому́ сего́ услы́шати гла́са, и́же не вем вас. Отку́ду же сего́ есть услы́шати гла́са, ра́зве егда́ ни́ща ви́девше, я́ко не ви́девше его́ пребыва́ем? Егда́ мы не познае́м а́лчуща Христа́, не позна́ет нас и Той, ми́лости тре́бующых. И в пра́вду: презре́вый бо стужа́емаго и не дав от свои́х, ка́ко взы́щет прия́ти от су́щых не его́. Те́мже молю́, вся да твори́м и да промышля́ем, я́ко бы не оскуде́ти на́шему ма́слу, но украси́ти свети́льникы и совни́ти Жениху́ в неве́стник, его́же бу́ди всем нам получи́ти благода́тию и человеколю́бием Го́спода на́шего Иису́са Христа́, И́мже и с Ни́мже Отцу́ сла́ва со Святы́м Ду́хом, ны́не и при́сно и во ве́ки веко́в. Ами́нь.

Тріе́ вели́цыи бы́ша пра́здницы жидо́встіи: Па́сха, Пятьдеся́тница, и Преполове́ніе, въ ни́хъ же содѣ́яшася пресла́вная Госпо́дня чудеса́. Госпо́дьскій бо пра́здникъ ны́нѣшній, сугу́бу Воскресе́нію благода́ть сотвори́: отъ Воскресе́нія бо до Пентико́стія Преполове́ніе имену́ется, въ то́ бо, я́ко и въ Па́сху, собира́хуся жи́дове. Слы́ши евангели́ста глаго́люща: /л. 221/ Преполови́вшуся пра́зднику, вни́де Іису́съ въ це́рковь и уча́ше. Дивля́хужеся жи́дове, глаго́люще: ка́ко Се́й вѣ́сть кни́ги, не учи́вся? О, беззако́нніи! Тре́буетъ ли кни́гамъ Творе́цъ, ко учи́телю приходи́ти, Иже не́бо и зе́млю сотвори́ и человѣ́ка му́дростію созда́? Ко́знію ли хо́щете умудри́ти, Иже смы́слъ и у́мъ Даю́щаго всѣ́мъ? О, зло́бніи и жестосе́рдіи! Рцы́те, кто́ отъ рожде́нія слѣпа́го воочи́, или́ бы́ліе приложи́, или́ бѣльмо́ сострога́? Бре́ніемъ пома́за о́чи слѣпо́му и безъ враче́бныхъ хи́тростей исцѣли́, Боже́ственную си́лу Свою́ явля́я, я́ко отъ земли́ Ада́ма сотвори́, да позна́ютъ И [Его] Сы́на Бо́жія. Что́ же Госпо́дь къ жидо́мъ рече́: почто́ и́щете Мя́ уби́ти? не Моѵсе́й ли даде́ ва́мъ Зако́нъ, и никто́ же отъ ва́съ Зако́на твори́тъ? Жи́дове же реко́ша: Ты́ субо́ты разоря́еши, осла́бленныя возставля́я и слѣпы́я просвѣща́я, и глаго́леши: не твори́мъ зако́на. Рече́ же Госпо́дь: о жи́дове, что́ въ субо́ту лу́чше сотвори́ти: ду́шу спасти́, или́ погуби́ти? пло́ть ли обрѣ́зати, или́ осла́блена возста́вити? ору́жіе ли остри́ти, или́ слѣпа́го просвѣти́ти? /л. 221 об./ на зло́ ли собра́тися, или́ благода́ть вселе́ннѣй умно́жити? Аще ли человѣ́ка обрѣ́заете въ субо́ту, да ся́ Зако́нъ не разори́тъ, на Мя́ почто́ гнѣ́ваетеся, я́ко здра́вы человѣ́ки творю́ въ субо́ту? Не на лица́ суди́те, глаго́лю ва́мъ, но пра́вду твори́те въ судѣ́. О, преди́вное смире́ніе Госпо́дне! Своя́ враги́ судія́ми нарече́, глаго́ля и́мъ: не на лица́ суди́те, и не я́ко при Суса́ннѣ вино́вныя оправди́сте. Азъ бо Даніи́ла возста́вихъ, да злы́я сме́рти преда́стъ, а непови́нную изба́витъ. Не суди́те на лица́, но пра́ведно суди́те, а не я́ко при Навуѳе́и, и мзды́, я́ко Аха́въ, не пріима́йте непра́вдою. Не ва́съ ли проро́къ ху́ля, глаго́лаше: посреди́ непра́веднаго и непови́ннаго не отдѣля́ху? Не суди́те по мздѣ́, ни стыди́теся си́льныхъ, а́ще непра́вду дѣ́ютъ, но суди́те пра́ведно, су́дъ бо Бо́жій пра́веденъ е́сть. Что́ же Мене́ и́щете уби́ти? Вотще́ мяте́теся! Азъ во́лею хощу́ Стра́сть прія́ти, никому́же ну́дящу Мене́, но Са́мъ Ся смири́хъ, да мíръ спасе́нъ бу́детъ Мно́ю. О, зло́бѣ жидо́встѣй! О, Влады́ки Христа́ милосе́рдію и безчи́сленному человѣколю́бію! Яко бо грѣ́шникъ оболга́емь, /л. 222/ терпи́тъ, безче́ствуемь, не мща́етъ. Тѣ́мъ же и мы́ до́лжни есмы́, бра́тіе, смире́ніе имѣ́ти и не велича́тися, оби́ду и уко́ръ терпѣ́ти, зла́ за зло́ не воздава́ти, да съ Го́сподемъ Бо́гомъ просла́вимся. Слы́шите, что́ евангели́стъ о преполове́ніи пра́здника рече́: Въ преполове́ніе пра́здника вни́де Іису́съ въ це́рковь и уча́ше. Подо́бенъ и се́й мину́вшему пра́зднику. По ма́лѣ же на́ небо восхожде́нія пра́здникъ бу́детъ. Пра́здникъ же глаго́летъ, не я́ко у е́ллинъ и жидо́въ быва́ющь, въ не́мже и́гры, и пія́нства, и пѣ́сни блу́дныя, и пляса́нія, но пра́зднуемъ, я́ко же лѣ́по христія́номъ, и свято́му пра́зднику въ че́сть. Въ не́мъ же не и́гры дѣ́юще, ни упива́ющеся, но моли́твы и духо́вныя пѣ́сни Го́сподеви возсыла́юще. Яко же рече́ Госпо́дь: идѣ́же бу́дутъ со́брани о и́мени Мое́мъ два́, или́ тріе́, ту́ е́смь и Азъ посредѣ́ и́хъ. Бу́демъ ми́лостиви, да и на́мъ ми́лостивъ бу́детъ Госпо́дь Бо́гъ, и поми́луетъ на́съ, Ему́же сла́ва ны́нѣ и при́сно и во́ вѣки вѣко́мъ. [Ами́нь.]