Неделя о самаряныни

Оте́ц лю́бит Сы́на и вся даде́ в ру́це Его́. Ве́руяй в Сы́на име́ет живо́т ве́чный. Не ве́руяй же Сы́ну, не у́зрит жи́зни, но гнев Бо́жий пребыва́ет на нем.

Мно́го схожде́ния приобрете́ние во всех показу́ется ве́щех. Си́це худо́жства испра́вихом, не внеза́пу от учи́телей вся навыка́юще. Си́це гра́ди созда́хом, ти́хо и пома́лу сия́ составля́юще. Си́це жизнь содержи́м на́шу. И да не почуди́шися, а́ще о жите́йских ве́щех толи́ку име́ет кре́пость – иде́же у́бо и в духо́вных мно́гу у́бо кто обря́щет сея́ прему́дрости су́щу си́лу. Си́це бо и возмого́ша свободи́тися идолослуже́ния иуде́и, ти́хо и пома́лу возводи́ми и ничто́же изнача́ла высо́ко слы́шаще, ниже́ догма́т, ниже́ гражда́нства ра́ди. Си́це по Христо́ве прише́ствии ,егда́ и высо́кых догма́т вре́мя бе, всех привожда́ху апо́столи, ничто́же испе́рва высо́ко веща́юще. Си́це и Христо́с мно́жайшим бесе́доваше в нача́ле. Си́це Иоа́нн сотвори́л есть ны́не. Я́коже о челове́це бесе́дуя не́коем чу́дном, и высо́кая спокрове́нне предложи́в. Начина́я у́бо си́це глаго́лаше: «Не мо́жет челове́к от себе́ прия́ти ничто́же». Та́же высо́ко не́что совокупи́в и рек: «Гряды́й с небеси́, на́до все́ми есть».

Па́ки во смире́нное сло́во низво́дит, глаго́ля и и́на мно́га: и я́ко «не ме́рою дае́т Бог Ду́ха», та́же наво́дит, глаго́ля: «Оте́ц лю́бит Сы́на и вся даде́ в ру́це Его́». Та́же и ве́дый мно́гу су́щу кре́пость му́ки, и не си́це обеща́нием благы́х мно́гих приводи́мых, я́коже преще́нием стра́шных, зде заключа́ет сло́во си́це, глаго́ля:

Ева́нгелие: Ве́руяй в Сы́на име́ет живо́т ве́чный. Не повину́яйжеся не у́зрит жи́зни, но гнев Бо́жий пребыва́ет на нем.

Толкова́ние: Па́ки зде на Отца́ возво́дит сло́во му́ки. Не рече́ бо «гнев Сы́на», а́ще и Сей есть Судия́, но Отца́ им поста́ви па́че устраши́ти хотя́. Еда́ у́бо довле́ет е́же ве́ровати в Сы́на ко е́же живо́т име́ти ве́чный? Ника́коже. «Не всяк бо глаго́ляй мне Го́споди Го́споди вни́дет в Ца́рствие небе́сное». И я́же в Ду́ха ху́ла довле́ет и еди́на в гее́нну воврещи́. И что глаго́лю о че́сти уче́ния? А́ще бо и во Отца́, и Сы́на пра́ве ве́рует, и в Ду́ха же Свята́го, житие́ же не имее́т пра́во - ничто́же ему́ приобрете́ние ве́ры во спасе́ние. Те́мже у́бо и егда́ глаго́лет «Се бо есть живо́т ве́чный, да зна́ют Тебе́, Еди́наго И́стиннаго Бо́га», да не вознепщу́ем довле́ти нам во спасе́ние глаго́лемое. Тре́ба бо есть нам жития́ и жи́тельства чисте́йшаго. Поне́же и зде рече́ «ве́руяй в Сы́на име́ет живо́т ве́чный», и зде, и зельне́йше.

Ниже́ бо от благи́х еди́ных, но и от сопроти́вных сло́во слага́ет. Си́це глаго́ля: «Не ве́руяйже в Него́, не у́зрит жи́зни, но гнев Бо́жий пребыва́ет на нем». Но оба́че ниже́ отсю́ду рече́м довле́ти ве́ре еди́ной во спасе́ние. И показу́ют я́же о житии́ во мно́гих ме́стех Ева́нгелии рече́нная. Сего́ у́бо ра́ди не рече́ «Сей же есть Живо́т ве́чный Еди́н», ниже́ «ве́руяй в Сы́на то́кмо име́ет живо́т ве́чный», но во обою́ сие́ явля́ше, я́ко живо́т име́ет вещь. А́ще у́бо я́же жи́тельства не после́дуют, мно́го после́дует му́ка. И не рече́ «ожида́ет его́», но «на нем», си́речь, никогда́ же от него́ отступи́т, да́же бо не вознепщу́еши смерть бы́ти привре́менную е́же «не у́зрит жи́зни», но ве́руеши я́ко всегда́шняя му́ка, сей положи́л есть глаго́л, показу́я я́ко всажда́ется ему́ вы́ну. Сотвори́л же есть сие́, сих ра́ди их глаго́л порева́я ко Христу́. Те́мже у́бо ниже́ осо́бь к ним наказа́ние творя́ше, но собо́рное, я́ко у́бо наипа́че их приводи́ти можа́ше. Не рече́ бо «а́ще ве́руете», «а́ще и не ве́руете», но о о́бщем произво́дит сло́во, я́ко бы не зазо́рно бы́ти глаго́лемая. И зельне́йше, не́жели Христо́с, сие́ сотвори́л есть. Христо́с бо я́ко «не ве́руяй уже́ осужде́н есть». Сей же «не у́зрит жи́зни, но гнев Бо́жий пребыва́ет на нем». И па́че в ле́поту: не та́коже бо бе самому́ не́коему о себе́ глаго́лати, и ино́му о нем. Христа́ бо вознепщева́ли бы́ша самолю́бия ра́ди сия́ мно́жицею веща́ти и велича́тися, Иоа́нн же сего́ свободи́ся зазре́ния. А́ще же по сих и Христо́с зельне́йшим де́йствует сло́вом, но егда́ вели́кую о себе́ сла́ву стяжа́ про́чее.

Ева́нгелие: Я́ко у́бо позна́ Иису́с, рече́, зане́ слы́шаше фарисе́и, я́ко Иису́с мно́жайших ученико́в твори́т и креща́ет не́жели Иоа́нн, [А́ще и сам Иису́с не креща́ше, но учени́цы Его́], отъи́де от Иуде́и и прии́де в Галиле́ю.

Толкова́ние: Сам у́бо не креща́ше, но возвеща́ющии, хотя́ще воздви́гнути слы́шащих в за́висть, сия́ возвеща́ху. Что у́бо ра́ди отхо́дит? Не боя́зни ра́ди, но отсеца́я их за́висть и утеша́я зави́дение. Си́лен бо бе и наше́дших удержа́ти, но не хотя́ше ча́сте сие́ твори́ти, я́ко бы не обезве́ритися плотско́му смотре́нию. А́ще бо ча́сте держи́мь избега́л бы, сие́ у́бо вознепщева́л бы ся от мно́гих.

Сего́ ра́ди мно́гая челове́чнейше устроя́ет. Я́коже бо хотя́ше уве́рити я́ко Бог бе, си́це я́ко Бог Сый плоть ноша́ше. Сего́ ра́ди и по воскресе́нии ко ученику́ глаго́лаше: «Осяжи́ и виждь, я́ко Дух пло́ти и ко́сти не име́ет, [я́коже Мене ви́дите име́юща]». Сего́ ра́ди и Петру́ запрети́ ре́кшему: «Ми́лостив ты Го́споди! Не бу́дет Тебе́ сие́». Си́це зело́ ему́ вещь потща́тельна бе. Поне́же и догма́т церко́вных не ма́ла часть сия́ есть, и е́же о на́шем спасе́нии глави́зна, и е́юже вся быва́ют и исправля́ются. Си́це бо и смерть разруши́ся, и грех убие́н бысть, и кля́тва исчезе́, и безчи́сленая внидо́ша в житие́ на́ше блага́я. Те́мже наипа́че хотя́ше уве́ритися смотре́нию, ко́рень и исто́чник нам безчи́сленых бы́вшему благи́х. Устроя́я же челове́ческая, ниже́ боже́ственыя спокрыва́ти испуща́ше. Отше́д у́бо па́ки, те́хже держа́шеся, и́хже и пе́рвее. Ниже́ про́сте в Галиле́ю восхожда́ше, но вели́ки не́кия устроя́я ве́щи на самаря́нех. И не про́сте устроя́я сия́, но с подоба́ющею Ему́ прему́дростию и е́же ни еди́но оста́вити иуде́ом, ниже́ безсту́дно не́коего отве́та непщева́ние. Е́же у́бо евангели́ст гада́тельствует, глаго́лаше:

Ева́нгелие: Подоба́ше же Ему́ проходи́ти Самари́ею.

Толкова́ние: Показу́я пути́ чрезде́льно Ему́ сие́ творя́щу, е́же и апо́столи творя́ху. Я́коже бо они́, гони́ми от иуде́й, тогда́ во язы́ки идя́ху. Си́це и Христо́с, егда́ Его́ изгна́ша, тогда́ и оне́х каса́шеся: я́коже и о сирофиники́се сотвори́л есть жене́. Сие́ же бысть, я́ко бы вся́ко отсещи́ иуде́ом отвеща́ние, да не возмо́гут глаго́лати: Я́ко оста́вль нас, к неиму́щем обре́зания отъи́де. Сего́ ра́ди и ученицы́ отвещева́юще глаго́лаху: «Вам бо ну́жно пре́жде глаго́лати сло́во Бо́жие, но поне́же недосто́йных суди́сте себе́, обраща́емся во язы́ки» . И Сам па́ки: «Не приидо́х ра́зве ко овца́м поги́бшим до́му Изра́илева» . И па́ки: «Несть добро́ взя́ти хлеб от чад, и да́ти псом» . Егда́ же изгна́ша, дверь язы́ком отверзо́ша. И ниже́ си́це предвари́тельне на о́но прихо́дит, но преходя́.

Ева́нгелие: Проходя́ у́бо, прии́де во град самаря́нский глаго́лемый Сиха́рь, близ ме́ста е́же даде́ Иа́ков Ио́сифу сы́ну своему́. Бе же та́мо исто́чник Иа́ковль.

Толкова́ние: Что ра́ди опа́сно сло́вити евангели́ст о ме́сте? Да егда́ услы́шиши жене́ глаго́лющей: «Иа́ков оте́ц наш даде́ нам исто́чника сего́», не удиви́шися. Ме́сто бо сие́ бе, иде́же о Ди́не с́ущи и о Леви́и и Симео́не негоду́юще, лю́тое о́но соде́лаша уби́йство.

Досто́йно же рещи́ и отку́ду самаритя́не соста́вися, и́бо ме́сто сие́ все Самари́я нарица́ется. Отку́ду у́бо нарече́ние прия́ша? «Само́р» - гора́ есть глаго́лашеся от стяжа́вшаго, я́коже и Иса́ия рече́: «И глава́ само́ров Ефре́м». Но живу́щии, не самаря́не, но израильтя́не глаго́лахуся. Вре́мени же происходя́щу, прирази́шася Бо́гу, и ца́рствующу Факе́ю , возше́д Фелгаваса́р. И гра́ды взят мно́ги, и нападе́ на И́лу, и уби́в его́, Оси́и ца́рствие даде́. На сего́ наше́д Салманаса́р, взят гра́ды ины́я и да́ни сотвори́ пови́нных. На се и пе́рвое у́бо прии́де , по́слежде отступи́ нача́льства и к посо́бию ефио́пскому прибеже́. Уве́де сие́ асири́янин, во́инствовав и уби́в их, не ктому́ язы́ка та́мо пребыва́ти попусти́, зазре́ния ра́ди такова́го отступле́ния. Но сих у́бо в Вавило́н приведе́ и ми́дян. Отту́дуже язы́ки от разли́чных мест приве́д, всели́ в Самари́и, я́коже про́чее утверже́но ему́ нача́льство бы́ти, свои́м име́ющим ме́сто.

Си́мже бы́вшим, хотя́ Бог показа́ти свою́ си́лу и я́ко не не́мощи ра́ди издаде́ иуде́ев, но грех ра́ди пре́данных, напуща́ет львов на ва́рваров, и́же погубля́ху язы́ков их. Возвести́шася сия́ царе́ви, и посыла́ет иере́и не́кия предаю́щая им зако́ны Бо́жия. Но оба́че ниже́ си́це всеце́ло от нече́стия отступи́ша, но и сполу́.

Вре́мени же происходя́щу па́ки, и́долов у́бо отскочи́ша, почита́ху же Бо́га. И ве́щем всих су́щим, наше́дше иуде́и про́чее, за́вистне к ним имя́ху, а́ки ко иноплеме́нником и ра́тником, и от горы́ самаритя́ны их нарица́ху. И нема́ло от зде бе к ним любопре́ние: ниже́ бо писа́ния вся прие́мляху, но Моисе́йская еди́на прие́млюще, о проро́цех не мно́го творя́ху сло́во. Любопря́хуся у́бо в благоро́дие вложи́ти себе́ иуде́йское, и хваля́хуся о Авраа́ме и прароди́теля его́, написа́ху, а́ки от Халде́я су́ща, и Иа́кова же отца́ нарица́ху, а́ки о́ному су́ща от ро́да. Иуде́иже со все́ми и сих гнуша́хуся. Те́мже и Христу́ сия́ поноша́ху, глаго́люще: «Самаряни́н еси́ Ты и бе́са име́еши». И о нисходя́щему от Иерусали́ма в Ерихо́н, сия́ ра́ди вины́ Христо́с самаряни́на вво́дит «ми́лость к нему́ сотво́ршаго» , худа́го, удо́бь пренебрего́маго, гнуша́емаго от них. И о десяти́х прокаже́нных иноплеме́нника еди́наго рече́, сего́ ра́ди самаряни́н бо бе. И Сам же ученико́м си́це глаго́ля, повеле́: «На путь язы́к не отъиди́те, и во град самари́йский не вни́дете». Не по́вести же ра́ди еди́ныя ме́сто воспомяну́ нам Иа́ковля евангели́ст, но и о е́же показа́ти отложе́ние иуде́йское, дре́вле бы́вшее, и́бо о прароди́телех их ме́ста, в ме́сто их удержа́ху они́. Я́же бо прароди́тели их держа́ху, не су́щая своя́, сия́ ле́ности ра́ди своея́ и законопреступле́ния су́щее их погуби́ша си́и.

Си́це ничто́же приобрете́ние от прароди́телей бы́ти благы́х, егда́ не такови́ прилуча́тся су́щии от оне́х. Ва́рвари бо да львов иску́ство прии́мут то́кмо, ко иуде́йскому благоче́стию возврати́шася а́бие. Они́же толи́ко претерпе́вша муче́ния, ниже́ си́це уцелому́дришася.

Зде у́бо Христо́с прии́де, худо́е у́бо и мокро́тное отрева́я житие́ при́сно, притру́дное же вводя́ и спря́танное. Не подъяре́мников бо тре́бует, но си́це ше́ствует приле́жне, я́ко и труди́тися от путьше́ствия. И сие́ везде́ наказу́ет самосоде́тельно бы́ти, и неизли́шне, и немно́гих тре́бовати.

Си́це бо хо́щет изли́шних чужи́х нам бы́ти, я́ко и саме́х ну́жных мно́го отсеца́ти, сего́ ра́ди глаго́лаше: «Ли́си я́звены име́ют и пти́цы небе́сныя гне́зда, Сын же Челове́чь не име́ет где главы́ подклони́ти» . Сего́ ра́ди и на гора́х мно́жайше пребыва́ет, не во дни то́кмо, но и в нощи́, и в пусты́нях. Сие́ и Дави́д гада́тельствуя, глаго́лаше: «От пото́ка на пути́ пие́т» , и ху́дость жития́ его́ явля́я. Сие́ и зде показу́ет:

Ева́нгелие: Утруди́бося от путьше́ствия, седя́ше си́це на исто́чнице. Час бе я́ко шесты́й, прии́де жена́ от Самари́я почерпсти́ во́ду. Глаго́ла ей Иису́с: «Даждь Ми пи́ти». Ученицы́ же Его́ отъидо́ша на то́ржища да пи́щи ку́пят.

Толкова́ние: Отсю́ду науча́емся и е́же о путьше́ствии кре́пком, и е́же о пи́щах нераде́нию, и ка́ко чрезде́льне ве́щию де́йствует зде. Си́це и ученицы́ наказа́шася я́же о себе́ устроя́ти, не бо ноша́ху на пу́тная. И явля́ет сие́ ин евангели́ст глаго́ля, внегда́ о ква́се фарисе́йском им бесе́доваше , зане́ они́ непщева́ху, я́ко хлебо́в не ноша́ху . И егда́ а́лчущих вво́дит и стира́ющых от кла́сов и яду́щих, и егда́ глаго́лет ему́ к смоко́внице алчьбы́ ра́ди приити́ , а не ина́го чего́ или́ сие́ все́ми нас наказу́ет: е́же пренебрещи́ чре́ва и непотща́тельно сего́ непщева́ти бы́ти служе́ние.

Смотри́ у́бо их и зде: ниже́ принося́щих что, ниже́ поне́же не ноша́ху от нача́ток дни о сей пеку́щыхся, но во вре́мя, в не́же вси обе́д творя́т, пи́щи купу́ющых. Но не я́ко мы, от одра́ а́бие востаю́ще, пре́жде ины́х сие́ смотря́ем, поваро́в и трепезотво́рцев призыва́юще и со мно́гим запове́дающе тща́нием, и по оне́х ины́м всем каса́ющеся, жите́йское пре́жде духо́вных творя́ще, и я́же изли́шно име́ти подоба́ше я́ко ну́жная почита́юще. Сего́ ра́ди вся горе́ и до́лу быва́ет. Сопроти́вное бо подоба́ше, всех духо́вных мно́го сотво́рьшим сло́во, по е́же сове́ршити о́на, тогда́ каса́тися сих. Не притру́дное же то́кмо, но и велича́вое отсю́ду показу́ется: не е́же труди́тися, ниже́ е́же се́сти при пути́ то́кмо, но е́же оста́тися Еди́н и ученико́м от Него́ разлучи́тися. И́бо леть бя́ше, а́ще хоте́л бы, или́ не всех посла́ти, или́ отше́дшим оне́м, ины́х служи́телей име́ти. Но не восхоте́. И́бо ученико́в си́це обучи́. И что ве́лие, рече́, а́ще смиря́хуся, не́гли рече́т кто, ры́бари су́ща и ски́ний творцы́?

Ры́бари бо бе́ша и ски́ний творцы́. Внеза́пуже на са́мый взыдо́ша небеси́ верх и всех бы́ша царе́й честне́йши, собесе́дницы бы́ти сподо́бльшеся вселе́нныя Влады́це и после́довати чуди́мому отсю́ду. Ве́сте же и о́но: я́ко наипа́че и́же от худы́х су́ще, егда́ сано́в насладя́тся, удо́бнейше взе́млется к го́рдости. А́ки добронеиску́сне име́юще к че́сти неза́пней, держа́ у́бо их в том же смиреному́дрии, наказова́ше их всех сопря́товатися и нигде́же тре́бовати служа́щих. Сам же «утруди́вся от путьше́ствия, седя́ше си́це при исто́чнице». Зри́ши ли, я́ко труда́ ра́ди седа́лище бысть, зно́я ра́ди, за е́же ожида́ти ученико́в? Ве́дяше бо сбыва́ющеся на самаритя́нех; не на сие́ же прии́де нача́льне. Не у́бо поне́же сего́ ра́ди не прии́де, прише́дшую жену́ отри́нути подоба́ше, си́це мно́го любоуче́ние показу́ющу. Иуде́и бо и к ним гряду́ша отгоня́х, а и́же от язы́к су́щи, и и́нде ходя́ща к себе́ влеча́ху. И они́ у́бо зави́дяху, си́и же ве́роваху. Они́ негодова́ху, си́и же чудя́хуся и поклоня́хуся. Что у́бо? Подоба́ше ли толи́ких спасе́ние презре́ти и усе́рдие си́це до́блествено оста́вити? Сие́ у́бо недосто́йно Его́ человеколю́бия. Те́мже у́бо с подоба́ющею ему́ прему́дростию вся настоя́щыя устрая́ет. Седя́ше бо, упокая́я те́ло и у исто́чника простужа́я себе́. Сие́ бо бе дни посре́дство, е́же и евангели́ст изъяви́л есть рек: «Час бе я́ко шесты́й». И седя́ше си́це. Что есть си́це? Не на престо́ле, не на возгла́вии, но про́сте и я́ко прилучи́ся на земли́.

«Прихо́дит жена́ от Самари́я почерпсти́ во́ду». Зри, ка́ко и жену́ ина́го ра́ди показу́ет прише́дшу, везде́ безсту́дное иуде́йское зауща́я сопротивосло́вие. И да не́ кто глаго́лет, я́ко сопротивля́ется себе́ ве́щьми, во град у́бо не входи́ти повелева́я самари́йский, самаритя́ном же бесе́дуя. Те́мже и еже не у́ пришли́ ученицы́, положи́л есть евангели́ст, мно́ги вводя́ вины́ я́же к ней бесе́дования. Что у́бо? Проше́на бы́вши во́ду от Христа́. «Даждь ми рече́ пи́ти» Христо́с глаго́лаше к ней. Что у́бо она́?

Ева́нгелие: «Ка́ко Ты, иуде́янин сый, про́сиши от мене́ пи́ти, су́щи жены́ самаряны́ни? Не смеша́ютбося иуде́и самаря́ном.

Толкова́ние: И отку́ду Его́ иуде́янина непщева́ бы́ти? От о́браза не́гли, от бесе́дования. Ты ж ми смотри́, ка́ко разсмотри́тельна жена́ бе. А́ще бо подоба́ше сохраня́тися Иису́су подоба́ше, а не о́ной: не рече́ бо самаря́не иуде́ом не смеша́ются, но иуде́и самаря́н не прие́млют. Но оба́че жена́ сия́ греха́ свобождена́, поне́же непщева́ и и́но ей припа́сти, ниже́ си́це умолча́, но я́ко непщева́ше исправля́ет не по зако́ну быва́емое.

Но о́но, а́ще кто недоуме́ется, ка́ко Иису́с иска́ше от нея́ пи́ти, зако́ном не повелева́ющу? А́ще бо глаго́лет кто, я́ко е́же прове́дети не даю́щу, сего́ ра́ди у́бо самого́ ниже́ проси́ти подоба́ше. Что у́бо есть рещи́? Я́ко разли́чно сие́ про́чее бе такова́я отрева́ти наблюде́ния. И́же бо ины́х возводя́ во е́же разреша́ти, мно́го па́че Сам сия́ у́бо прете́кл бы. «Не входя́щее бо рече́ скверни́т челове́ка, но исходя́щее» . Не ма́ло же осужде́ние бу́дет иуде́ом е́же о жене́ бесе́дование, оне́х бо мно́жицею привлача́ше и глаго́лы, и ве́щьми, но не хотя́ху. Сия́ же зри, ка́ко держи́тся от худа́го вопроше́ния. Той у́бо не поста́ви сию́ ку́плю, ниже́ путь; а́щеже не́цыи прихожа́ху, не возбраня́ше. И́бо и ученико́м сие́ глаго́лаше: «Во град самари́йский не вни́дете», а не приходя́щих отража́ти - зело́ бо недосто́йно бе Его́ человеколю́бия. Сего́ у́бо ра́ди и отвещава́ет жене́:

Ева́нгелие: И рече́: «А́ще бы ве́дала еси́ дар Бо́жий и Кто есть глаго́ляй тебе́ «даждь Ми пи́ти», ты у́бо проси́ла бы от Него́, и дал бы тебе́ во́ду жи́ву.

Толкова́ние: Пе́рвее показу́ет досто́йну су́щу слы́шати, а не презре́тися, и тогда́ Себе́ открыва́ет. И́бо имя́ше, а́бие уве́девше, И́же Кто есть, послу́шати и внима́ти Ему́, е́же о иуде́ех не у́бо кто рече́т: и́бо уве́девше, проси́ша у Него́ ничто́же, ниже́ возжеле́ша что навы́кнути от потре́бных, но досажда́ху и отгоня́ху. Жена́ же сия́ слы́шавши, зри ка́ко кро́тце отвещева́ет:

Ева́нгелие: Го́споди, ниже́ почерпа́ло име́еши, студене́ц есть глубо́к. Отку́ду у́бо име́еши во́ду жи́ву?

Толкова́ние: Пре́жде ю́ от непщева́ния смире́ннаго воздви́же и е́же непщева́ти еди́ного от мно́гых бы́ти. Не про́сте бо зде нарица́ет Го́спода, но мно́гу отдаю́ще честь. Я́ко бо почита́юще сия́ глаго́лаше, от и́же по сих рече́нных я́вствено есть: не посмея́ся бо, ниже́ поруга́ся, но недоуме́яше еще́. А́щеже не а́бие все помы́сли, да не чуди́шися: ниже́ бо Никоди́м. Что бо он рече́? «Ка́ко мо́гут сия́ бы́ти?». И па́ки: «Ка́ко мо́жет челове́к роди́тися, стар сый?». И па́ки: «Еда́ мо́жет во утро́бу ма́тери своея́ второ́е вни́ти и роди́тися?». Сия́ же честне́йши: «Го́споди, ниже́ почерпа́ло име́еши и студене́ц есть глубо́к. Отку́ду у́бо име́еши во́ду жи́ву?». И́но у́бо Христо́с глаго́лаше, и́но же непщева́ше она́. Ничто́же вя́ще слы́шавши глаго́л, ниже́ помы́слити еще́ что высо́ко могу́щи, а́ще и мо́щно бе рещи́ продерза́тельно веща́ющей: Я́ко а́ще у́бо во́ду жи́ву име́л бы еси́, не бы́ проси́л еси́ от мене́, но Сам Себе по́дал бы еси́ пе́рвее, ны́не же велича́ешися. Но ничто́же от сих рече́, но с кро́тостию отвещава́ет мн́огою. И в нача́ле, и по сих.

И́бо в нача́ле рече́: «Ка́ко Ты, иуде́янин сый, про́сиши от мене́ пи́ти?». И не рече́, а́ки ко иноплеме́ннику и врагу́ бесе́дующи: «Не бу́ди мне пода́ти тебе́ челове́ку – ра́тнику и язы́ка на́шего отчужде́ному». И по сих па́ки, слы́шавши вели́кое глаго́люща о ни́хже наипа́че ухапля́ются врази́, не посмея́ся, ниже́ поноси́. Но что рече́?

Ева́нгелие: Еда́ Ты бо́льши еси́ отца́ на́шего Иа́кова, и́же даде́ нам студене́ц сей, и сам от него́ пия́ше, и сы́нове его́, и ско́ти его́?

Толкова́ние: Зри́ши ли, ка́ко себе́ влаѓает во благоро́дие иуде́йское? А е́же глаго́лет, таково́ есть: он сею́ де́йствоваше водо́ю, и мно́жае имя́ше ничто́же да́ти. Сия́ же глаго́лаше, показу́ющи, ка́ко от пе́рваго отве́та прия́т разуме́ние и ве́лие, и высо́ко. Е́же бо «той пия́ше от него́, и сы́нове его́, и ско́ти его́», ничто́же и́но гада́тельствующия есть, но я́ко имя́ше у́бо разуме́ние бо́льши воды́, не обре́те же сие́, ниже́ ве́дяше я́вьствене. Да́же и я́вственейше реку́ е́же хо́щет рещи́, сие́ есть: не име́еши рещи́ рече́, я́ко Иа́ков нам даде́ сего́ исто́чника, ина́гоже сам тре́боваше, и́бо той и сы́нове его́ от сего́ пия́ху. Не у́бо пи́ли бы, а́ще лу́чши име́л бы ин. От сего́ у́бо ниже́ той возмо́жет да́ти, ино́го же лу́чшаго несть тебе́ име́ти, а́ще не Иа́кова испове́дуеши бо́льша бы́ти себе́.

Отку́ду у́бо име́еши во́ду, ю́же обеща́еши да́ти нам? Но иуде́и не си́це кро́тце бесе́дуют. И́бо и им о то́йже вине́ бесе́довати таковы́я воспомяну́в воды́. Но ничто́же приобрета́ху. Егда́ же Авраа́ма воспомяну́, и ка́мением би́ти начина́ху Его́.

Но жена́ не таковы́м ему́ прино́сится о́бразом, но со мно́гою кро́тостию, посреди́ зно́я и посреди́ дни, и глаго́лет, и слы́шит вся с долготерпе́нием мно́гим. И ниже́ помышля́ет что таково́, яково́ ле́по иуде́ем рещи́: «Я́ко бесу́ется и неи́стовит Сей» , привяза́ мя исто́чнику и студенцу́, подая́ у́бо ничто́же, велича́яжеся глаго́лы. Но терпи́т и приседи́т, до́ндеже обря́щет иско́мое.

А́ще жена́ самаряны́ни толи́ко твори́т тща́ние о е́же уве́дети не́что потре́бно и приседе́ти Христу́, а́ще и еще́ не ве́дящи Его́, ко́его у́бо мы получи́м проще́ния и́же и ве́дяще Его́, и ниже́ при студенце́, ниже́ в пусты́ни, ниже́ посреди́ дни, ниже́ [в] лучи́ паля́щи, но от восто́ка и под таковы́м кро́вом се́ни наслажда́ющеся благоду́шия, и не терпя́ще слы́шати что от глаго́лемых, но леня́щеся? Но она́ не такова́: но си́це держи́тся глаго́лемым, я́ко и ины́х призыва́ти. Иуде́иже не то́кмо не призыва́ху, но и хотя́щих приходи́ти возбраня́ху и запина́ху, глаго́люще: «Зри́те ли, никто́же от князь ве́рова Ему́? Но лю́дие не ве́дящи и зако́на про́кляти суть» .

Нравоуче́ние три́десять пе́рвое: О житии́ пра́вом:

Да подража́ем у́бо самаряны́ню, да бесе́дуем Христу́. И́бо и ны́не посреде́ нас стои́т, и проро́ки, и ученики́ нам веща́ет. Да услы́шим у́бо и повине́мся. Доко́ле живе́м ту́не и всу́е? Е́же бо неуго́дное Бо́гу твори́ти – ту́не житие́ есть, па́чеже не то́кмо ту́не, но и о зле. Егда́ бо да́нное нам вре́мя изнуря́ем в ничто́же потре́бно, отъи́дем казнь стра́ждуще после́днюю безвре́меннаго изнуре́ния. Не бо́ и́же име́ния ку́плю де́яти прие́м та́же изъя́д, истя́зан бу́дет от и́же вве́рившаго, а и́же живо́т тако́в изнури́в ту́не, не постра́ждет ли казнь? Не сего́ ра́ди нас Бог приведе́ в настоя́щий живо́т и ду́шу вдохну́в, да настоя́щему внима́ем то́кмо, но да вся к бу́дущему животу́ промышля́ем. Безслове́сная бо еди́но настоя́щему потре́бна житию́. Мы же сего́ ра́ди ду́шу безсме́ртну име́ем, да ко уготовле́нию о́ныя жи́зни вся да де́йствуем. Коне́й бо, и воло́в, и осло́в, и ины́х таковы́х ското́в, а́ще вопроси́т кто потре́бу, ни еди́нуже и́ну рече́м, но ю́же в настоя́щем житии́ слу́жбу. О нас же несть сие́ рещи́, но лу́чших устрое́ние, е́же по отше́ствии от зде есть. И подоба́ет вся твори́ти, да та́мо облиста́ем, да со а́нгелы лику́ем, да Царю́ предстои́м вы́ну, в венце́х нетле́нных. Сего́ ра́ди бо и безсме́ртна бысть душа́ и те́лом бу́дет безсме́ртно, да несконча́емых наслади́мся благы́х. А́ще же земли́ пригвожде́н бу́деши небе́сным предлежа́щим, помы́сли, ели́ка быва́ет доса́да к Дарова́вшему, егда́ Он у́бо го́рняя тебе́ простира́ет, ты же о них немно́го творя́ сло́во земле́ю изменя́еши. Сих ра́ди и гее́нною воспрети́, а́ки пренебрего́мь, да навы́кнеши отвсю́ду, ели́ко себе́ лиша́еши до́брых. Но не бу́ди и́скуса прия́ти му́ки о́ноя, но благоугоди́вшим нам ве́чных получи́ти благы́х благода́тию и человеколю́бием Го́спода на́шего Иису́са Христа́, с Ни́мже Отцу́ сла́ва со Святы́м Ду́хом, ны́не и при́сно и во ве́ки веко́в. Ами́нь.

Отвеща́ Иису́с и рече́ ей: Всяк пия́й от воды́ сея́, вжа́ждет па́ки. А и́же у́бо пие́т от воды́ ,ю́же Аз дам ему́, не вжа́ждет вове́к. Но вода́ ,ю́же дам ему́, бу́дет в нем исто́чник воды́, ска́чущия в живо́т ве́чный.

Духо́вную благода́ть, овогда́ у́бо Писа́ние огнь, овогда́ же во́ду нарица́ет, показу́юще я́ко не существа́ суть сия́ разуме́ния, но де́йства: ниже́ бо от разли́чных суще́ств состои́тся Дух, неви́дим же и единови́ден сый. И Иоа́нн у́бо си́це глаго́ля: «Я́ко той вас крести́т Ду́хом Святы́м и огне́м». Христо́с же: «Ре́ки от чре́ва Его́ истеку́т воды́ живу́щия. Сие́ же глаго́лаше, о Ду́се рече́, Его́же хотя́ху приима́ти». Си́це и жене́ бесе́дуя нарица́ет Ду́ха: «И́же бо а́ще пие́т от воды́, ея́же Аз дам ему́, не вжа́ждет во ве́ки». Си́це же Ду́ха нарица́ет, нарече́нием у́бо огня́, воздви́женое и те́плое благода́ти, и изнури́тельное грехо́м; гада́тельствуя воды́ же нарече́нием - и чи́стое е́же от Него́, и мно́гое простуже́ние прие́млющим Его́ мы́слем явля́я. Я́коже бо не́коего рая́ благоцвету́ща, древесы́ кипя́ща плодоно́сными и присноцвету́щами, си́це усе́рдную устрая́ет ду́шу, ниже́ печа́ли, ниже́ сатани́нскаго наве́та попуща́ющи ощути́ти: но угаша́ет вся раждеже́ныя стре́лы лука́ваго.

Ты же ми смотри́ Бо́жию прему́дрость, ка́ко ти́хо возво́дит жену́: не от пе́рваго бо рече́: «А́ще бы ве́дала еси́, Кто бе глаго́ляй тебе́ даждь Ми пи́ти», но егда́ ей вину́ подаде́ иуде́янина Его́ нарещи́ и под согреше́ние приведе́, отража́я оглаго́лание. Рече́ бо: «А́ще бы ве́дала еси́, Кто бе глаго́ляй тебе даждь Ми пи́ти, ты у́бо проси́ла у Него́». И принуди́вся вели́кая возвести́ти, помяну́ти же патриа́рха, си́це дае́т возре́ти жене́. Та́же о́ной глаго́лющи: «Еда́ Ты бо́льши еси́ отца́ на́шего Иа́кова?», не рече́: «ей, бо́льши есмь» - возмне́л бы ся велича́тися то́кмо, указа́нию не у́ явля́ему. И́миже глаго́лет, сие́ устрая́ет.

Не про́сте бо рече́: «Дам тебе́ во́ду», но пе́рвее отъе́м е́же Иа́кова, тогда́ взима́ет Себе́, от естества́ дае́мых посре́дство лиц, ели́ко и разли́чное дае́мых; предста́вити хотя́ и преиме́ние е́же к патриа́рху. А́ще бо чуди́шися, рече́, Иа́кову, я́ко сию́ даде́ во́ду, а́ще мно́го лу́чшую дам тебе́, предвари́вши бо́льша испове́дала бы еси́ Мене́ бы́ти Иа́кова.

А́ще бо ре́кши: «я́ко еда́ бо́льши еси́ Иа́кова, зане́ обеща́еши лу́чшую во́ду дая́ти». А́ще прии́меши о́ну во́ду, вся́чески испове́даеши бо́льша бы́ти Мене́. Зри́ши ли суд нелицеме́рен жены́ о бы́вших усужа́ющии я́, и патриа́рхом, и Христо́м? Но иуде́и не сиц́е: но и де́монов зря́ще отгоня́юща Его́. Не то́кмо патриа́рха не глаго́лаху бо́льша, но и бесну́ющаяся нарица́ху. Жена́ же не си́це, но отсю́ду но́сит Суд, отню́дуже Христо́с хо́щет, от указа́ния дел. И́бо и сей отзде́ осужда́ет, глаго́ля си́це: «А́ще не творю́ дела́ Отца́ Моего́, не ве́руйте Мне. А́щеже творю́, а́ще и Мне не ве́руете, дело́м ве́руйте». Си́це и жена́ ве́рою приво́дится. Сего́ ра́ди и той слы́шав: «Еда́ бо́льши еси́ отца́ на́шего Иа́кова?», Иа́кова оста́вль, о воде́ бесе́дует, глаго́ля: «И́же а́ще пие́т от воды́ сея́, вжа́ждется па́ки». И сосужде́ние не от оглаго́лания, но от преиме́ния твори́т. Не глаго́лет бо: я́ко вода́ сия́ ничто́же есть, но ху́да и удо́бь пренебрего́ма, но е́же и естество́ сведе́тельствует, сие́ повлага́ет: «И́же у́бо пие́т от воды́ ю́же Аз дам ему́, не вжа́ждется ввек».

Слы́ша во́ду жена́ пре́жде сея́, но не разуме́: поне́же бо и вода́ жи́ва, при́сно теку́щая же, вы́ну истека́юща исто́чником глаго́лется неразсека́емым - и сию́ непщева́ жена́ глаго́латися. Сего́ ра́ди я́вственейшее и сию́ показу́ет, си́це глаго́ля и от сосужде́ния преиме́ние творя́. Что бо рече́? «И́же а́ще пие́т от воды́ ю́же Аз дам ему́, не вжа́ждет во ве́ки». Сие́ бо наипа́че показа́ вели́чество и я́же по сих рече́нная: сих бо ничто́же име́ет чу́вственая вода́. Ка́я же ли суть я́же по сих? «Бу́дет в нем исто́чник воды́, ска́чущия в живо́т ве́чный». Я́коже бо исто́чника внутрь име́яй лежа́ща не у́бо ят бу́дет когда́ жа́ждею, си́це во́ду сию́ име́яй. Уве́рися а́бие жена́, мно́го разу́мнейша Никоди́ма я́вльшися. Не разу́мнейша же то́кмо, но и му́жественейша, он бо безчи́сленых таковы́х слы́ша, ниже́ ино́го не́коего о сем умоли́, ниже́ сам дерза́ше; сия́ же апо́стольския показу́ет ве́щи, всем благовеству́ющи и призыва́ющи ко Иису́су, и гра́да всеце́ла влеку́щи вне к Нему́. И он у́бо услы́шав, глаго́лаше: «Ка́ко мо́гут сия́ бы́ти?», и Христу́, поло́жшу указа́ние я́вствена е́же ве́тра, ниже́ си́це сло́во прие́мляше. Жена́ же не си́це: но пе́рвее у́бо недоуме́яше, по́слежде не со устрое́нием прие́мши сло́во, но в чи́ну отвеща́ния, на прия́тие а́бие тщи́тся. Поне́же бо рече́ Христо́с: «Бу́дет в нем исто́чник воды́, ска́чущия в живо́т ве́чный», а́бие рече́ жена́: «Даждь ми сию́ во́ду, да не жа́жду, ниже́ прихожу́ зде почерпа́ти». Зри́ши ли, ка́ко пома́лу к высоте́ догма́т возво́дится? Пе́рвее вознепщева́ Его́ законопресту́пна бы́ти не́коего иуде́янина. Та́же, егда́ сие́ отрази́ оклевета́ние, [подоба́ше бо не бы́ти Христу́ зазо́рну хотя́щу таковы́ми ю́ оглаша́ти,] слы́шавши во́ду жи́ву, вознепщева́ о чу́вственей сия́ глаго́латися. По́сле же, навы́кши я́ко духо́вна бе́ша глаго́лемая, ве́рова у́бо, я́ко мо́жет вода́ отъя́ти жа́жди потре́бу, не уже́ что сие́ есть ве́дяше, но еще́ недоуме́яше, высоча́йшу у́бо сию́ чу́вственых бы́ти непщу́ющи, я́вственое же не ве́дящи. Зде же опа́снейше у́бо возре́вши, не у́бо все ви́девши:

Ева́нгелие: Даждь бо ми, рече́, сию́ во́ду да не жа́жду, ниже́ прихожу́ зде почерпа́ти.

Толкова́ние: Пре́жде предпочте́ Его́ от Иа́кова: не тре́бую бо сего́ исто́чника, а́ще прииму́ от Тебе́ о́ну во́ду. Зри́ши ли, ка́ко Его́ предполага́ет от патриа́рха? Сие́ души́ благода́рныя. Показа́, коли́ку сла́ву имя́ше о Иа́кове; ви́де бо́льшаго, и не удержа́на бысть предприя́тием. Ниже́ бо удо́бна жена́, [не про́сте бо прия́т глаго́лемая; ка́ко бо, я́же с толи́ким опасе́нием взыска́вши?], ниже́ непоко́рна и любопри́тельна. И сие́ показа́ от проше́ния. И́бо иуде́ом рече́ не́когда: «И́же а́ще яст от пло́ти Моея́, не вза́лчет, и ве́руяй в Мя не вжа́ждет». Но не то́кмо не ве́роваша, но и соблазни́шася. Жена́ же ничто́же таково́ пострада́, но и пребыва́ет, и про́сит. Иуде́ом у́бо глаго́лаше: «Ве́руяй в Мя не вжа́ждет». Жене́ же не си́це, но дебеле́йше: «Пия́й от воды́ сея́ не вжа́ждет», обеща́ние бо духо́вных и неуста́вных веще́й.

Сего́ ра́ди воздви́гнув ея́ ума́ обеща́ньми, еще́ в чу́вственых пребыва́ет глаго́лех, за е́же не у́ мощи́ вмести́ти духо́вных опа́ство. А́ще бо рекл бы: я́ко а́ще ве́руеши в Мя, не вжа́ждеши, - не бы у́бо разуме́ла рече́нное, не ве́дящи, Кто есть бесе́дуяй, ниже́ о ко́ей жа́жде глаго́лаше. Что у́бо ра́ди не о иуде́ех сие́ сотвори́л есть? Зане́ они́ у́бо мно́га зна́мения ви́девше бе́ша. Сия́ же зна́мения у́бо ни еди́ноже ви́де, глаго́л же сих слы́шав пре́жде: сего́ ра́ди про́чее проро́чеством открыва́ти си́лу Свою́, и не а́бие наво́дит обличе́ние. Но что рече́?

Ева́нгелие: Иди́, пригласи́ своего́ му́жа и прии́ди зде. Она́ же рече́: Не име́ю му́жа. Глаго́ла ей Иису́с: До́бре рекла́ еси́, я́ко не име́ю му́жа. Пять бо муже́й име́ла еси, и ны́не его́же име́еши, несть твой муь. Сие́ и́стинно рекла́ еси́. Глаго́ла ему́ жена́: Го́споди, зрю я́ко проро́к еси́ Ты.

Толкова́ние: О́ле вели́ко жены́ любому́дрие! Ка́ко кро́тце обличе́ние прие́млет! Ка́ко бо не хотя́ше, рече́? Что ра́ди, рцы ми: не иуде́ев ли обличи́ мно́жицею и сего́ бо́льши? Несть бо ра́вно, я́же в мы́сли неизрече́нное на среду́ приводи́ти и вещь быва́ему о́тай объявле́ну сотвори́ти. То бо Бо́гу то́кмо есть и ни еди́ному же ино́му ве́дяше не́жели в мы́сли име́яй, сия́ же приобраща́ющися вси све́дят. Но оба́че обличе́ни бы́вше, не терпя́т кро́тце, но ре́кшу: «Что Мя и́щете уби́ти?», не то́кмо не чудя́тся я́ко жена́, но укоря́ют и досажда́ют. А́ще и они́ у́бо и от ины́х зна́мений имя́ху указа́ние, сия́ же сие́ то́кмо бе слы́шавши. Но оба́че не то́кмо не почуди́шася, но и досади́ша глаго́люще: «Бе́са ли име́еши? Кто тебе́ хо́щет уби́ти?». Сия́ же не то́кмо не досажда́ет, но и чуди́тся, и ужаса́ется, и проро́ка непщу́ет бы́ти: и́бо бо́льши обличе́ние сие́ жены́ косну́ся, не́жели оне́х о́но. Сие́ бо сея́ еди́ныя согреше́ние бе, о́ноже о́бще: не си́це же о о́бщих я́коже о осо́бных ухапля́емся. И они́ у́бо ве́лие не́что непщева́ху исправля́ти, а́ще Христа́ убию́т: жены́ же согреше́ние испове́дашеся от всех лука́во бы́ти. Но оба́че не стужи́ си жена́, но ужасе́ся и почуди́ся. И о Нафана́иле сие́ и́стое сотвори́л есть Христо́с: не предвари́тельне бо проро́чество введе́, ниже́ рече́: «Ви́дех тя под смоко́вницею», но егда́ он рече́: «Отку́ду мя зна́еши?», тогда́ сие́ приведе́. Хотя́ше бо и чуде́с и прорече́ний нача́ла от саме́х приима́ти приходя́щих к Нему́, якобы́ и усвоя́тися быва́емыми па́че им, и е́же тщесла́витися избежа́ти зазре́ния. Сие́ у́бо и зде твори́т. Е́же у́бо предвари́тельне обличи́ти я́ко му́жа не име́еши, ви́дяшеся тя́жко бы́ти и изли́шно. А е́же от нея́ прие́мшу вину́ вся сия́ исправля́ти: и зело́ после́довательно бе, и слы́шащую кротча́йшу соде́ловаше. И ко́е после́дование, рече́: Иди́ призови́ своего́ му́жа? О дарова́нии бе сло́во и благода́ти превосходя́щия челове́ческое естество́. Належа́ше жена́, и́щущи прия́ти, глаго́ла: «Пригласи́ своего́ му́жа», показу́я, я́ко и о́ному подоба́ет приобщи́ся сим. Она́ же тща́щися прия́ти, и кры́ющи ве́щи студ, и мня́щи к челове́ку бесе́довати, рече́: «Не име́ю му́жа». Сия́ слы́шав Христо́с, благовре́менне про́чее наво́дит обличе́ние: обоя́ со опасе́нием глаго́ля, и пре́жде них бо всех изочте́, и ны́не кры́емаго обличи́. Что у́бо жена́? Не стужи́ си, ниже́ оста́вльши бежа́, ниже́ доса́ду вещь непщева́ бы́ти. Но чуди́тся па́че Ему́ и ожида́ет бо́льше: «Зрю бо, рече́, я́ко Проро́к еси́ Ты». И смотри́ ея́ ра́зума: ниже́ зде а́бие притече́, но разсмотря́ет и чуди́тся. Е́же бо зрю сие́ есть: явля́ешимися Проро́к бы́ти. Та́же, егда́ сие́ вознепщева́, ничто́же жите́йско Его́ вопроша́ет, ниже́ о теле́сном здра́вии, ни о име́ниих, ни о бога́тстве, но о догма́тех а́бие. Что бо рече́?

Ева́нгелие: Отцы́ на́шы в горе́ сей поклони́шася.

Толкова́ние: Су́щых о Авраа́ме глаго́лющи: и́бо та́мо рече́ сы́на вознести́.

Ева́нгелие: И ка́ко вы глаго́лете, я́ко во Иерусали́мех есть ме́сто, иде́же подоба́ет кла́нятися?

Толкова́ние: Ви́дел ли еси́, ка́ко высо́ка мы́слию бысть? Я́же бо о е́же не стужа́ти си е́же жада́ти пеку́щися, и о догма́тех вопроша́ет про́чее. Что у́бо Христо́с? Не разреши́ взыска́ние, [не сие́ бо бе Ему́ потща́тельно, ко глаго́лемым про́сте отвещева́ти, изли́шне бо бе,] но возво́дит жену́ па́ки на бо́льшую высоту́. И не пе́рвее ей о сих бесе́дует, до́ндеже испове́да я́ко Проро́к есть, я́ко бы со мно́гим извеще́нием послу́шати про́чее глаго́лемых. Я́же бо сие́ увеща́вшися, не ктому́ про́чее о рече́нных сомне́тися имя́ше.

Нравоуче́ние три́десять второ́е: о е́же подоба́ет прочита́ти боже́ственая Писа́ния, и о е́же оша́ятися позо́рищь:

Да устыди́мся у́бо и усрами́мся про́чее: жена́ пять муже́й име́вшая и самаряны́ни су́щи, толи́ко о догма́тех твори́т тща́ние и ни вре́мя дни, ни е́же на и́но что приити́, ни и́но ничто́же ю́ отведе́ е́же о таковы́х взыска́ния. Мы же, не то́кмо о догма́тех не и́щем, но и о всех про́сте и я́коже прилучи́ся пребыва́ем. Сего́ ра́ди вся неради́ма суть. Кто бо от вас, рцы ми, в дому́ быв, кни́жицу взя христия́нскую в ру́це и внутрь лежа́щее прочте́ и истяза́ писа́ние? Никто́же у́бо име́ет сия́ рещи́. Но зе́рни у́бо и тавле́и у множа́йших обря́щем су́ща, кни́ги же нигде́же, но у ма́лых: и си́и же неиме́ющим подо́бно пребыва́ют, связа́вше сия́ и положи́вше вы́ну в ковче́зех, и все им тща́ние о то́нкости кожь и о добро́те писа́ний, а не о прочита́нии, ниже́ бо о по́льзе и приобрете́нии стяжа́ние их сотвори́ша, но бога́тства и любоче́стия указа́ние творя́ще о сих потща́шеся.

Толи́ко тщесла́вия вели́чество! Ни еди́нагоже бо слы́шу любоче́ствующагося, я́ко ве́дяше внутрь лежа́щая, но я́ко златы́ми есть писа́ньми напи́сана. И что сие́ приобрете́ние, рцы ми? Не сих бо ра́ди дана́ бы́ша писа́ния, да в кни́гах сия́ име́ем то́кмо, но да и на се́рдцех начерта́ем сия́. Я́ко сие́ у́бо стяжа́ние иуде́йскаго есть тщесла́вия, е́же в писа́ниих то́кмо полага́ти за́поведи. Нам же ниже́ нача́ло сей зако́н дан бысть, но на скрижа́лех се́рдца плотски́х. И сия́ глаго́лю, не возбраня́я кни́ги стяжева́ти, но и наказу́я сие́, и зело́ молю́ся. Хощу́ же от оне́х и писа́ния, и разуме́ния в мы́сли обноси́ти ва́шей, да си́це очища́ется, прие́млющи ю́же от веще́й вину́. А́ще бо во хра́мине, иде́же Ева́нгелие бу́дет лежа́ще, не дерзне́т приступи́ти дия́вол, мно́го па́че души́, разуме́ния такова́ обнося́щи, не ко́снется когда́, ниже́ наступи́т де́мон, ни естество́ греха́.

Освяти́ у́бо ду́шу, освяти́ те́ло, при́сно сия́ на се́рдцы и на язы́це име́я. А́ще бо студосло́вие оскверня́ет и бесо́в призыва́ет, благоявле́нно, я́ко духо́вное прочита́ние просвеща́ет и Ду́ха благода́ть привлача́ет. Боже́ственая суть напева́ния Писа́ния. Да напева́ем у́бо себе́ и су́щим в души́ страсте́м я́же о оне́х чарова́ния .

А́ще бо уви́дим, кото́рое суть прочита́емая, со мно́гим сия́ услы́шим усе́рдием. Сия́ при́сно глаго́лю и глаго́ля не преста́ну. Ка́ко бо не безме́стно, и́же у́бо на то́ржищи седя́щых, и колесни́чников, и плясце́в, и имена́, и ро́ды, и гра́ды, и де́йства глаго́лати о́бразы, и саме́х коне́й, и доброде́тель, и зло́бу со опасе́нием возвеща́ти: а и́же зде достиза́ющих ничто́же о быва́емых зде ве́дети, но и само́е число́ книг не ве́дети. А́ще бо сла́дости ра́ди о́на жене́ши, бо́льшу сый зде су́щу покажу́. Что бо сла́доснейше, рцы ми, что же чудне́йше: челове́ка ли с челове́ком боря́щася уви́дети, или́ челове́ка дия́вола ра́тующа, и те́ло безтеле́сному, си́лою сплета́емо и одолева́юще? И́же от твоего́ ро́да су́ща да зрим борьбы́, сия́ я́же и подража́ти благоле́пно и поле́зно, и подража́ющим венча́тися мо́щно, но не оне́х и́хже ре́вность студ прино́сит подража́ющему. О́ну бо с бе́сы у́зриши рать, а́ще у́бо у́зриши. Сию́ же со а́нгелы и арха́нгелы, и а́нгельским Влады́кою.

Рцы у́бо мне, а́ще тебе́ леть бы́ло бы со кня́зи или́ цари́ седя́щу зре́ти и наслажда́тися виде́ния, не вели́ку ли честь непщу́еши бы́ти сие́? Зде же со Царе́м а́нгельским зря, и зря от сре́дних хрепто́в держи́ма дия́вола, и мно́гая у́бо любопря́щася преодоле́ти, возмога́юща же ничто́же - не тече́ши ли и жене́ши таково́е зре́ние? И ка́ко мо́щно есть бы́ти сему́, рече́? А́ще кни́гу саму́ю в ру́це име́еши. У́зриши бо в ней и по́двиги, и до́лгия за́пуски , и вины́ я́же о́ного пра́веднаго худо́жство. Сия́ же зря, уве́си и сам си́це ра́товати, и свободи́шися бесо́в. Бесо́вское бо торжество́, а не челове́ческая позо́рища вне соверша́емая. Те́мже молю́ сатани́нских оша́ятися торже́ств. А́ще бо во идолотре́бницу не подоба́ет входи́ти, мно́го па́че на пра́здник сатани́нский.

Сия́ глаго́ля не преста́ну, ча́стей стужа́я, до́ндеже бу́дет что вя́щше, мне бо неле́ностно, рече́, вам же опа́сно. Не у́бо отягчи́те наказа́ние: а́ще бо отягчи́тися подоба́ет, мне подоба́ше, мно́жицею глаго́лющу и не послу́шаему, а не вам, при́сно у́бо слы́шащим, при́сно же преслу́шающим. Но не бу́ди вы́ну сим вам порица́тися: но свободи́вшимся студа́ сего́, сподо́битися духо́внаго зре́ния и бу́дущия сла́вы наслади́тися благода́тию и человеколю́бием Го́спода на́шего Иису́са Христа́, с Ни́мже Отцу́ сла́ва со Святы́м Ду́хом, во ве́ки веко́в. Ами́нь.

Глаго́ла ей Иису́с: Же́но, ве́руй Мне, я́ко гряде́т час, егда́ ниже́ в горе́ сей, ниже́ во Иерусали́мех поклони́тися Отцу́. Вы кла́няетеся Его́же не ве́сте, мы кла́няемся е́же ве́мы: я́ко спасе́ние от иуде́й есть.

Везде́ ве́ры нам тре́ба есть возлю́блении, ве́ры, благи́х ма́тери, спасе́ния чарова́ния. И сея́ кроме́, ничто́же от вели́ких догма́т есть удержа́ти. Но уподо́бишася начина́ющим по чи́ну без корабля́ преплы́ти, и́же дома́ла у́бо ныра́юще довле́ют рука́ми у́бо и нога́ми де́йствующе, на пре́жде произоше́дше, вско́ре от волн погружа́ются. Си́це и свои́ми де́йствующе по́мыслы, пре́жде не́же что навы́кнути, истопле́ния претерпева́ют. Я́коже и Па́вел рече́, и́же погрузи́шася о ве́ре . Е́же да не и мы постра́ждем, свяще́ннаго да держи́мся я́коря, и́мже и самаряны́ню Христо́с приво́дит ны́не, ре́кши бо о́ной: «Ка́ко вы глаго́лете, я́ко во Иерусали́мех есть ме́сто, в не́мже подоба́ет кла́нятися?», Христо́с же глаго́лаше: «Ве́руй ми, о́ же́но, я́ко гряде́т час, егда́ ниже́ во Иерусали́мех, ниже́ в горе́ сей поклони́теся Отцу́». Мно́го ве́лие уче́ние ей откры́: и е́же ниже́ Никоди́му, ниже́ Нафана́илу рече́.

Сия́ у́бо потща́ся честне́йша показа́ти своя́ иуде́йских, и сие́ от оте́ц умудря́ше. Христо́с же не к сему́ сре́те вопроше́нию: изли́шне бо еще́ бе сие́ рещи́ и показа́ти, что у́бо ра́ди отцы́ в горе́, что же ра́ди иуде́и в Иерусали́мех покланя́хуся. Сего́ ра́ди у́бо умолча́, обои́х же мест старе́йшинства отъе́м, возставля́ет ея́ ду́шу, показу́я я́ко ниже́ иуде́и, ниже́ сии́ име́ют не́что ве́лие к хотя́щему дарова́тися - и тогда́ разли́чие вво́дит. Оба́че и си́це честне́йшых иуде́й изъяви́л есть, не вме́сто ме́ста предпочи́тает, но от мы́сли оне́м председе́ние дая́. А́ки бы глаго́ла: Ме́ста у́бо ра́ди ничто́же подоба́ет любопре́тися, иуде́и у́бо нра́вом вя́щше самаритя́н вас стяжа́ше. «Вы бо, рече́, поклоня́етеся е́же не ве́сте. Мы же поклоня́емся е́же ве́мы». Ка́ко не ве́дяху самаря́не е́же поклоня́хуся? Зане́ ме́стна и уча́стна непщева́ху Бо́га бы́ти. Си́це у́бо Ему́ и угожда́ху. Си́це и пе́рсяном посла́вше возвести́ша, я́ко ме́ста сего́ бог на нас негоду́ет, ничто́же вя́щше оне́м по сему́ и́дол мечта́юще. Те́мже пребыва́ху и бесо́в, и Его́ почита́юще, и несме́стная смеша́юще. Иуде́и же сего́ бе́ша свобожде́ни непщева́ния, и вселе́нныя Его́ ве́дяху су́ща Бо́га, а́ще и не вси.

Сего́ ра́ди рече́: «Вы поклоня́етеся Его́же не ве́сте, мы поклоня́емся Его́же ве́мы». Да не чуди́шися, я́ко со иуде́и Себе́ счисля́ет: к непщева́нию бо жены́ бесе́дует, я́ко проро́к сый иуде́анин - те́мже и е́же покланя́емся положи́л есть. Я́ко бо от поклоня́ющихся есть, вся́ческому я́вствено: е́же бо покланя́тися - тва́ри де́ло есть, а е́же покланя́ему бы́ти - Влады́це тва́ри. Но еще́ я́ко иуде́янин бесе́дует. Е́же у́бо: мы зде, мы иуде́яне. Воздви́г у́бо иуде́йское, па́ки достове́рно Себе́ твори́т и повину́ет па́че глаго́лемым от Него́ внима́ти, незазо́рно творя́ сло́во и показу́я, я́ко не сро́дством ко единоколе́нному я́же оне́х взима́ет. И́же бо о ме́сте сия́ изъявля́я, в не́мже наипа́че моля́хуся иуде́и, и лихои́мствовати всех непщева́ху, и че́стная сих отъе́м: благоявле́нно, я́ко ниже́ по сих к благода́ти не́коего глаго́лаше, но со и́стинною и прорица́тельною си́лою. Понеже у́бо по́мысл пре́жде оста́ви, рек: Ве́руй ми же́но и про́чая, наво́дит: Я́ко спасе́ние от иуде́й есть. А е́же глаго́лет, таково́ есть: или́ я́ко вселе́нней блага́я отту́ду бы́ша [е́же бо ве́дети Бо́га и презира́ти и́дол, отту́ду нача́ло име́ти, и и́на вся догма́ты. И от вас же сие́, а́ще и не пра́ве, от иуде́й у́бо нача́ло прия́т].

Спасе́ние у́бо или́ сия́, или́ прише́ствие Свое́ нарица́ет. Па́чеже обоя́ сия́ спасе́ние нарица́я, я́же рече́ от иуде́й бы́ти, е́же и Па́вел гада́тельствуя глаго́лаше: «От ни́хже Христо́с по пло́ти Сый, на́до все́ми Бог». Зри́ши ли, ка́ко содержи́т дре́вняго, и ко́рень показу́ет благи́х, и все́ми несопроти́вна Су́ща Зако́ну. А́ще у́бо от иуде́й вину́ бы́ти всех благи́х рече́, но:

Ева́нгелие: Гряде́т час и ны́не есть, егда́ и́стиннии покло́нницы покло́нятся Отцу́ ду́хом и и́стинною.

Толкова́ние: […] Рек и́стинных, соизве́рже самаритя́ном и иуде́ев. А́ще бо и оне́х лу́чши си́и, но бу́дущым ме́ньши мно́го и толи́ко ели́ко и́стины - о́браз.

Глаго́лет же о Це́ркви, я́ко и́стинное поклоне́ние и Бо́гу ле́пое сие́ есть: «И́бо Оте́ц таковы́х и́щет поклоня́ющихся Ему́». Те́мже у́бо, а́ще таковы́х дре́вле иска́ше, не хотя́ о́нем попусти́ о́браз, но сходя́, и сего́ ра́ди, да и сих введе́т. Кото́рии бо суть и́стиннии покло́нницы? И́же не ме́стом заключа́юще служе́ние, и Бо́гу ду́хом угожда́юще, я́коже и Па́вел рече́: «Ему́же служу́ ду́хом мои́м во благовествова́нии Сы́на Его́». И па́ки: «Молю́ у́бо вас преста́вити телеса́ ва́ша же́ртву жи́ву и благоуго́дну Бо́гови слове́сное служе́ние ва́ше». Егда́ же рече́т дух Бог, ничто́же и́но явля́ет ра́зве безтеле́сно. Подоба́ет у́бо безтеле́сному и слу́жбу такову́ бы́ти, и безтеле́сным в нас приноси́тися, си́речь, душе́ю и ума́ чистото́ю. Те́мже рече́: «И поклоня́ющимся Ему́, ду́хом и и́стинною подоба́ет поклоня́тися». Поне́же бо и они́, и иуде́и о души́ у́бо не радя́ху, мно́го же о телеси́ потща́ние творя́ху, очища́юще сие́ вся́чески, - рече́, я́ко не чистото́ю те́ла, но и́же в нас безтеле́сным, си́речь, умо́м, Безтеле́сный почита́ется.

Не у́бо овца́ пожира́и и тельца́, но всего́ себе́ возложи́ Бо́гови и всесожжи́: сие́ бо есть же́ртву жи́ву предста́вити и и́стиною у́бо подоба́ет поклоня́тися. Я́ко я́же у́бо пе́рвее о́браз бе́ша: обре́зание, всесожже́ния, жре́ния, кади́ла - ны́не же не ктому́, но и́стинна все: не плоть бо, но лука́выя подоба́ет отсеца́ти по́мыслы и распина́ти себе́, и безтеле́сная убива́ти вожделе́ния и закала́ти.

Недоуме́ся жена́ к рече́нным и отрече́ся к высоте́ глаго́ланных. И тружа́ющися, услы́ши, что рече́:

Ева́нгелие: Вем, я́ко прихо́дит Меси́я глаго́лемый Христо́с. Егда́ прии́дет Он, возвести́т нам вся. Глаго́ла ей Иису́с: Аз есмь глаго́ляй тебе́.

Толкова́ние: И отку́ду самаря́ном е́же ожида́ти Христо́во прише́ствие, Моисе́я прие́млющым еди́ного? От саме́х моисе́йских писа́ний. И́бо в нача́ле Сы́на откры́л есть, е́же бо сотвори́м челове́ка по о́бразу На́шему и по подо́бию. К Сы́ну рече́ся Авраа́му в ски́нии: «Сей есть глаго́ляй». И Иа́ков о Нем проро́чествуя глаго́лаше: «Не оскуде́ет князь от иуде́й, ниже́ вождь от бедр его́, до́ндеже прии́дет Ему́же соблюда́ется, и Той ча́яние язы́ком».

И сам же Моисе́й рече: «Проро́ка вам воздви́гнет Господ́ь Бог от бра́тий ва́шых, я́ко Мене́ того́ послу́шайте». И е́же зми́ем, и я́же жезло́м моисе́овым, и е́же Исаа́ком и овча́тем, и мно́га и́на мо́щно бе хотя́щим избира́ти, прише́ствие Его́ пропове́дующа.

И что у́бо, рече́, не от сих возвожда́ше жену́ Христо́с? Но Никоди́му у́бо зми́я на среду́ приведе́, и Нафана́илу проро́чества воспомяну́: сей же ничто́же таково́ рече́. Что ли у́бо ра́ди и за что? Зане́ они́ у́бо мужи́ бе́ша и в сих воспита́шася, сия́ же жена́ убо́га и неуче́нна, и писа́ний неиску́сна. Сего́ ра́ди ей не от сих бесе́дует, но от воды́ и прорече́ния сию́ привлача́ет: и си́ми в па́мять приво́дит Христо́ву и открыва́ет про́чее Себе́. Е́же у́бо а́ще и в нача́ле не взыска́вшей жене́ рекл бы, возмне́л бы ся у́бо ей лга́ти и ту́не веща́ти. Ны́не же пома́лу ю́ на па́мять возве́д, благовре́менне Себе́ откры́л есть. Иуде́ем у́бо ча́сте глаго́лющым: «Доко́ле душа́ на́ша взе́млеши, рцы нам, а́ще Ты еси́ Христо́с», сие́ у́бо не отвещева́ше я́вствено. Сей же рече́ я́вствене Сам бы́ти.

Благоразу́мнейши бо бе жена́ иуде́ев: они́ бо не о е́же уве́дети иска́ху, но о е́же поруга́тися Ему́ при́сно. А́ще бо хоте́ли бы́[ша] уве́дети, дово́льно бе и е́же глаго́лы, и е́же Писа́ньми, и е́же зна́меньми уче́ние. Сия́ же от нелицеме́рнаго ра́зума и просты́я мы́сли веща́ше я́же веща́ше, и я́вствено от и́же по сих от нея́ бы́вших. И́бо слы́ша, и ве́рова, и ины́х на сие́ улови́. И везде́ жены́ есть уве́дети, и опа́сное, и ве́рно.

«И по сем приидо́ша ученицы́ Его́». Зело́ во вре́мя пристиго́ша, уче́нию соверши́вшуся. О́ чудесе́, жена́ самаряны́ни су́щи, такова́я веща́ет!

Ева́нгелие: И по сих, я́коже рече́ евангели́ст, приидо́ша ученицы́ Его́, и чудя́хуся, я́ко с жено́ю глаго́лаше. Ничто́же у́бо рече́, что и́щеши и что глаго́леши с не́ю.

Толкова́ние: Что ли чудя́хуся? Невелича́вому, е́же с вели́чеством смире́нному. Зане́ си́це сла́вен Сый, терпя́ше с толи́ким смиреному́дрием жене́ бесе́довати ни́щей и самаряны́ни. Но оба́че и ужа́сшеся, не вопроси́ша вину́: си́це бе́ша нака́зани ученико́в чин соблюда́ти. Си́це Его́ боя́хуся и стыдя́хуся. А́ще бо и не у́ досто́йное о Нем непщева́ние имя́ху, но оба́че я́ко чу́дну не́коему внима́ху и мно́го Ему́ отдая́ху стыде́ние. А́ще и во мно́гых ме́стех явля́ются мно́га дерза́юще, си́речь егда́ Иоа́нн напа́дает на пе́рси Его́, егда́ Ему́ приступи́вше глаго́лют: «кто бо́лий есть во Ца́рствии небе́снем», егда́ сы́нове Зеведе́евы мо́лят, да еди́н от десны́х, еди́н от шу́их ся́дет.

Что ли у́бо ра́ди зде не вопроси́ша? Зане́ о́на у́бо вся я́ко на них восходя́ща, ну́жду имя́ху истяза́ти - зде же ничто́же им толи́ко по́льзова быва́емое. И Иоа́нн же по мно́гом вре́мени сие́ сотвори́л есть, к само́му концу́, егда́ мно́жайшаго наслади́ся дерзнове́ния, дерз́аше любо́вию Христо́вою: «Сей бо бе, рече́, его́же любля́ше Христо́с».

Нравоуче́ние три́десять тре́тие: я́ко вельми́ нас по́лзует кро́тость, и я́ко сию́ име́я евангели́ст Иоа́нн любля́шеся от Го́спода:

Что сего́ блаже́нства бу́дет у́бо ра́вно? Но не да́же до сего́ ста́нем о́ возлю́бленнии, е́же ублажа́ти апо́стола, но я́кобы и блажи́мых бы́ти. Вся да де́йствуем и да подража́ем евангели́ста, и да уви́дим ки́я бе́ша я́же любо́вь сотвори́ша толи́ку. Ка́я ли у́бо бе́ша сия́? Оста́ви отца́, и кора́бль, и мре́жу, и после́дова Иису́су. Но сие́ о́бще ему́ и к бра́ту бе, и к Петру́, и Андре́ю, и ины́м апо́столом.

Что ли у́бо изря́днее бе, е́же мно́гу любо́вь сотвори́? Еда́ обря́щем? Сам бо о себе́ ничто́же таково́ рече́, но ра́зве я́ко любля́шеся то́кмо. Исправле́ния же его́ за я́же любля́шеся умолча́, смиря́яся.

Я́ко бо его́ изря́дную не́кую любо́вь имя́ше, вся́ческому я́вствено бе. Но оба́че ниже́ бесе́дуя, ниже́ вопраша́я явля́ется на еди́не Его́, я́коже Петр мно́жицею, я́коже Фили́пп, я́коже Иу́да и Фома́. Но егда́ со апо́столы обра́доватися и послу́шати восхоте́, тогда́ то́кмо, егда́ бо верхо́вный его́ прину́ди от апо́стол вопроси́ти, тогда́ проси́. Мно́гу бо си́и к друг дру́гу имя́ху любо́вь. Си́це у́бо и во свети́лище вку́пе явля́ются восходя́ще, и о́бще к наро́ду глаго́люще.

А́ще и Петр тепле́йшь везде́, и дви́жется, и веща́ет, и к концу́ же слы́шит Христа́ глаго́люща: «Пе́тре, лю́биши ли Мя вя́щше сих?». Любя́й же вя́щше сих, благоявле́нне я́ко любля́шеся. Но сему́ у́бо от е́же люби́ти Иису́са, о́ному же от е́же люби́тися от Иису́са я́вствено я́ко бысть. Что ли у́бо есть е́же любо́вь сотвори́ изря́дную? Мне ви́дится мно́гу кро́тость показова́ти му́жу и ти́хость: те́мже у́бо ниже́ дерза́я во мно́гих ме́стех явля́ется. Сие́ же ели́ко есть и от Моисе́я я́вствено: и́бо и о́ного толи́ка и такова́ сие́ соде́ла. Ничто́же бо смиреному́дрия ра́вно. Сего́ ра́ди блаже́нств отсю́ду нача́ Христо́с, я́коже бо не́кое основа́ние и степе́нь вели́каго зда́ния положи́ти хотя́, си́це смиреному́дрие пе́рвее положи́. Несть бо, несть спасти́ся кроме́ сего́. Но а́ще и пости́тся кто, а́ще и мо́лится, а́ще и ми́лостыню твори́т с го́рдостию - гну́сна вся, сему́ не су́щу. Я́коже у́бо возлю́бленна и вожделе́нна, су́щу , и со утверже́нием вся быва́ют. Да смиря́емся у́бо о́ возлю́блении, да смиря́емся: и́бо зело́ удо́бно исправле́ния а́ще трезви́ся. Что бо отню́д есть к го́рдости тебе́ взима́ющее, о́ челове́че? Не зри́ши ли естества́ ху́дость, произволе́ния удо́бь поползнове́нное? Помы́сли свою́ кончи́ну, помы́сли грехо́в мно́жество.

Но не́гли мно́го исправля́я велему́дрствуеши? Саме́м у́бо сим погубля́еши. Те́мже не си́це согреша́ющему, я́коже исправля́ющему подоба́ет смири́тися. Что ли у́бо? Зане́ ов у́бо име́ет ну́жду со́вести. Ов же, а́ще не зело́ трезви́тся, вско́ре я́коже от не́коего ду́ха возве́ян взе́млется и исчеза́ет я́коже фарисе́й.

Но ни́щим ли подае́ши? Но не твоя́, но Влады́чня, о́бщее клевре́тов. И сего́ ра́ди па́че смиря́тися подоба́ет, в беда́х вкупоро́дных своя́ прозира́ющему и свое́ естество́ во оне́х науча́ющему. Не́гли и мы таковы́х бу́дем прароди́телей. А́ще же приложи́тся к нам бога́тство, ле́по сие́ па́ки оста́вити нам.

Что же ли отню́д и бога́тство есть? Сень немощна́, дым расходя́щься, цвет тра́вный. Па́чеже и цве́та худе́йше. Что у́бо о траве́ велему́дрствуеши? Не и разбо́йником ли преодолева́ет бога́тство, и малаки́ям, и блудни́цам, и гробокопа́телем? Сие́ ли у́бо тебе́ взима́ет, зане́ таковы́х име́еши обе́щников стяжа́ния? Но че́сти ли жела́еши? Но ни еди́ноже во сло́во че́сти ми́лостыни прили́чнейше: они́ бо принужде́ни суть и с не́навистию че́сти я́же бога́тства и могу́тства, сия́ же от произволе́ния и от со́вести почита́ющих. Те́мже ниже́ отврещи́ сия́ мо́гут когда́ почита́ющии. А́ще же челове́цы толи́ко ми́лующим отдаю́т стыде́ние честь и вся им спомога́ют блага́я, помы́сли коли́ко от Человеколю́бца Бо́га прии́мут воздая́ние, каково́ воздарова́ние. Сие́ у́бо да взы́щем бога́тство при́сно пребыва́ющее и никогда́же отбега́юще, да и зде вели́цы и та́мо бы́вше све́тли ве́чных да получи́м благи́х благода́тию и человеколю́бием Го́спода на́шего Иису́са Христа́, с Ни́мже Отцу́ сла́ва со Святы́м Ду́хом, ны́не и при́сно и во ве́ки веко́в. Ами́нь.

Оста́ви почерпа́ло свое́ жена́ и отъи́де во град и глаго́ла челове́ком: «Прииди́те уви́дите Челове́ка, И́же рече́ мне вся ели́ка сотвори́х. Еда́ у́бо сей есть Христо́с?».

Мно́гия нам теплоты́ тре́ба есть и тща́ния воздви́женнаго: сея́ бо кроме́ немо́щно есть получи́ти обеща́нных благи́х. И сие́ показу́я Христо́с рече́, овогда́ у́бо: «А́ще не во́змет кто креста́ своего́ и после́дует Ми, несть Мене́ досто́ин», овогда́ же: «Огнь приидо́х воврещи́ на зе́млю, и хоте́х а́ще у́же возгоре́ся». Обои́ми си́ми те́плаго и раждеже́наго ученика́, и ко вся́кой беде́ уготовле́наго нам предста́вити хотя́.

Такова́ не́кая бе и сия́ жена́. Си́це бо от рече́нных возгоре́ся, я́ко и водоно́с оста́вити, и потре́бу, ея́же ра́ди прии́де, и те́кши во град, всего́ наро́да привлещи́ ко Иису́су: «Прииди́те бо, рече́, и уви́дите Челове́ка И́же рече́ мне вся ели́ка сотвори́х». Смотри́ тща́ние и ра́зума. Прии́де почерпсти́, и, егда́ у́бо и́стиннаго получи́ исто́чника, пренебреже́ про́чее чу́вственнаго, уча́щи нас, а́ще и ма́лым указа́нием в послуша́нии духо́вных, всех презира́ти жите́йских и ни еди́но же сло́во о них име́ти. По свое́й бо си́ле, е́же сотвори́ша апо́столи, и сия́ сотвори́ла есть.

Они́ бо зва́ни бы́вше, оста́виша мре́жи: сия́ же само́вольне, ни еди́ному же возвеща́ющу, оставля́ет водоно́с и благове́стников де́ло твори́т, от ра́дости воспери́вшися. И не еди́наго же призыва́ет и втора́го, я́коже Андре́й и Фили́пп, но гра́да всеце́ла воздви́гнуши и наро́да толи́ка си́це к Нему́ приведе́. И смотри́, ка́ко разу́мне. Не рече́ бо: «Прииди́те и уви́дите Христа́», но и сия́ со схожде́нием, с ни́мже и Христо́с ю́ улови́л есть привлача́ет муже́й: «Прииди́те бо уви́дите Челове́ка, рече́, И́же рече́ мне вся ели́ка сотвори́х». А́ще и мо́щно бе рещи́ и́нако: прииди́ те и ви́дите проро́чествующаго, но егда́ разгори́тся душа́ огне́м боже́ственным, ни ко еди́ному же су́щых на земли́ про́чее зрит: ни к сла́ве, ни к сра́му, - но еди́наго есть то́кмо держа́щаго ю́ пла́мени. Еда́ сей есть Христо́с? Зри па́ки прему́дрость мно́гу жены́. Ниже́ изъяви́ я́вствене, ниже́ умолча́: хотя́ше бо не от своего́ изрече́ния ввести́ их, но от услыша́ния О́ного: е́же па́че удо́бь прия́тно творя́ше сло́во, е́же суда́ сего́ сотвори́ти обе́щ́ников.

И́бо не все ея́ житие́ извести́, но от рече́нных и о ины́х уве́рися. И не рече́: «Прииди́те, ве́руйте», но: «Прииди́те, ви́дите», е́же сего́ легча́йше бе и па́че их привлача́ше. Ви́дел ли еси́ жены́ прему́дрость? Ве́дяше бо, ве́дяше я́вствене, я́ко вкуси́вше исто́чника о́ного, та́яже постра́ждут я́же и она́. И́бо а́ще не́кая от ины́х была́ бы дебе́лейшых, и спокры́ла бы обличе́ние, сия́ же облича́ет свое́ житие́ и на среду́ предлага́ет, я́ко бы всех привлещи́ и я́ти.

Ева́нгелие: Посреди́ же сих, моля́ху Его́ ученицы́ Его́ глаго́лаше: Равви́, яждь.

Толкова́ние: Зря́ще бо Его́ утру́ждшася от путьше́ствия, и зно́ю належа́щу, моля́ху Его́: ниже́ бо бе продерза́ние е́же моли́ти о бра́шнех, но любле́ния су́щаго ко Учи́телю. Что у́бо Христо́с?

Ева́нгелие: Аз пи́щу име́ю я́сти, ю́же вы не ве́сте. Глаго́лаху бо рече́ друг ко дру́гу: Еда́ кто принесе́ к Нему́ я́сти?

Толкова́ние: Что у́бо чуди́шися? А́ще же на во́ду слы́шавши еще́ во́ду мечта́ше, иде́же у́бо и ученицы́ еще́ сия́ стра́жут и ничто́же не у́ духо́вна разумева́ют. Но недоуме́ют у́бо, оба́чеже стыде́ние обы́чное и честь Учи́телю отдаю́т, к друг дру́гу у́бо бесе́дующе, Ему́же вопроше́ние не дерза́юще прнести́.

Сие́ и и́нде творя́т, жела́юще у́бо вопроси́ти, не вопроша́юще же. Что у́бо Христо́с?

Ева́нгелие: Мое́ бра́шно есть, рече́, да сотворю́ во́лю посла́вшаго Мя и совершу́ де́ло Его́.

Толкова́ние: Челове́ческое спасе́ние зде бра́шно нарече́, показу́я ели́ко вожделе́ние име́ет на́шего промышле́ния. Я́коже бо нам жада́тельно е́же я́сти, си́це Ему́ е́же спасти́ нас.

Слы́ши же, ка́ко везде́ не от гото́ваго вся открыва́ет, но пе́рвее в недооуме́ние влага́ет послу́шателя: да наче́н иска́ти глаго́лемое, та́же недоуме́яся и тружа́яся, со мно́жайшым прии́мет усе́рдием я́вльшеся иско́мое и наипа́че воздви́гнется к послуша́нию.

Что у́бо ра́ди не а́бие рече́: «Мое́ бра́шно есть, да сотворю́ во́лю Отца́ Моего́»? А́ще и ниже́ сие́ я́вствено бе, но пе́рваго я́вственейше. Но что? «Аз, рече́, бра́шно име́ю я́сти, е́же вы не ве́сте». Пе́рвее бо их, е́же рех, недоуме́нием внима́тельнейшых соде́лати хо́щет и обучи́ти, и таковы́ми гада́нии слы́шати глаго́лемая. Что же ли есть во́ля О́тча? Глаго́лет про́чее сию́ и сказу́ет:

Ева́нгелие: Не вы ли глаго́лете, я́ко четы́ре ме́сяцы есть и жа́тва прихо́дит? Се глаго́лю вам: Воздви́гните очеса́ ва́ша и у́зрите ни́вы, я́ко белы́ суть к жа́тве.

Толкова́ние: Се па́ки обы́чными имены́ возво́дит к велича́йших зре́нию их. И́бо бра́шно рек, ничто́же и́но изъяви́л есть ра́зве спасе́ние челове́к хотя́щих приходи́ти. И ни́ва же и жа́тва само́е сие́ па́ки явля́ет - мно́жество душ гото́вых к прия́тию про́поведи. Очеса́ же зде глаго́лет и мы́сленыя, и теле́сныя: и́бо зря́ху про́чее мно́жество гряду́ще самаритя́н; произволе́ния же их угото́вание - ни́вы убеле́нныя рече́. Я́коже бо кла́сове, егда́ у́бо убеля́тся, к жа́тве суть гото́ви, си́це и си́и ны́не, рече́, ко спасе́нию суть уготовле́ни и устрое́ни. И что ра́ди не рече́ я́вствене, я́ко гряду́т ве́ровати челове́цы и гото́ви суть ко прия́тию сло́ва, оглаше́ни бы́вше от проро́к, плод же про́чее отдаю́ща, но ни́ву и жа́тву нарече́? Что хотя́т Ему́ сия́ преложе́ния? Не зде бо то́кмо, но и во всем Ева́нгелии сие́ твори́т. И проро́цы же си́мже де́йствуют о́бразом, мно́го уподо́бительне глаго́люще. Что у́бо вино́вное? Не про́сте бо сия́ у́ законоположи́ла есть Ду́ха благода́ть: но что ра́ди и за что? Двои́х ра́ди непщева́ний. Еди́наго у́бо, я́ко я́вственнейшу бы́ти сло́ву и па́че назре́ние привести́ глаго́лемая: мысль бо обы́чнаго о́браза веще́й восприе́млема воздвиза́ет па́че и я́коже напи́саны ве́щи зря́ще держи́т бо́льши. Еди́наго у́бо ра́ди сего́. Друга́го же, я́ко бы и услади́тися повествова́нию и пребы́тнейшу бы́ти глаго́лемых па́мять. Не си́це бо изрече́ние держи́т и возво́дит послу́шателя мно́гаго, я́ко е́же ве́щьми повествова́ние и подписа́ние иску́са. Е́же причте́ю, есть со мно́гою быва́емо уви́дети прему́дростию.

Ева́нгелие: И жняй мзду прие́млет, и собира́ет пло́да в живо́т ве́чный.

Толкова́ние: Жа́твы бо сея́ плод не в ве́чный живо́т, но в привре́менный возраста́ет: он же - в нестаре́емый и безсме́ртный. Зри́ши ли, ка́ко чу́вствени у́бо глаго́лы, духо́вна же разуме́ния? И саме́ми рече́ньми разделя́ет земна́я от небе́сных. Е́же бо о воде́ бесе́дуя сотвори́л есть, сво́йственое ея́ положи́: «Я́ко пия́ и во́ду сию́ не вжа́ждет», сие́ и зде твори́т: е́же в живо́т ве́чный глаго́ля пло́да собира́ти сего́. «Да и се́яй и вку́пе ра́дуется и жняй». Кто есть се́яй, и кто есть жняй? Проро́цы суть се́явшии. Но не си́и пожа́ша, но апо́столи. Не у́бо сего́ ра́ди лиша́ются сла́дости и воздарова́ния трудо́в, но с ва́ми ра́дуются, а́ще и не с ва́ми жнут: ниже́ бо жа́тва де́ло се́яния. Иде́же у́бо ме́ньши труд, бо́льша же сла́дость - зде вас соблюдо́х, не в се́янии: мно́го бо та́мо злострада́ние и труд, в жа́тве бо прихо́д у́бо мног, труд же не толи́к, но и мно́го удо́бство.

Зде же хо́щет состро́ити си́ми, я́ко и проро́к хоте́ние сие́ есть е́же ко Мне челове́ком приступи́ти. Сие́ и Зако́н устро́ил есть. Сего́ ра́ди и се́яша, да сего́ родя́т пло́да. Показу́ет же, я́ко и о́нех Сам посла́л есть и я́ко мно́го сро́дство но́вому к ве́тхому. И вся вку́пе при́тчею сею́ состроя́ет. Помина́ет же и сло́ва прито́чнаго, произноси́маго от мно́гих: «Всем бо, рече́, сло́во есть и́стинно, я́ко ин есть се́яй, и ин есть жняй».

Сия́ же глаго́лаху мно́зи, а́ще ини́и у́бо труды́ претерпе́ша, ини́и же пло́ды обоима́ша. И глаго́ла, я́ко сие́ сло́во зде наипа́че и́стинну име́ет: труди́шабося проро́цы, вы же пло́ды от оне́х трудо́в жне́те, ны́не нарече́ мзды; ниже́ бо о́нем безме́зден мно́гий он труд. Сие́ и Дании́л сотвори́л есть: и́бо и той при́тчи помина́ет глаго́лющия: «Изы́де от беззако́нных согреше́ние». И Дави́д, внегда́ рыда́ти, помина́ет таковы́я при́тчи. Сего́ ра́ди предвари́в рече́: «Да и се́яй вку́пе ра́дуется и жняй». Поне́же хотя́ше глаго́лати, я́ко ин се́ял есть, и ин жнет, да не кто е́же рех лиши́тися проро́ков вознепщу́ет мзды, стра́нно не́что глаго́лет, и пресла́вно, и чу́вственым не сходя́ще, но духо́вных изря́дно су́ще. В ве́щех бо чу́вственых, а́ще случи́тся ино́му се́яти и ино́му жа́ти, не вку́пе ра́дуются, но боле́знуют се́ющии а́ки ины́м тружда́ющымся, ра́дуютжеся жну́щии еди́ни. Зде́же не си́це: но и не жну́щии я́же се́яше, та́коже жну́щым сра́дуются. Отню́дуже я́вствено, я́ко и си́и приобща́ются мзды.

«Аз посла́х вас жа́ти, е́же не вы труди́стеся. Ини́и труди́шася, и вы в труд их внидо́сте». Си́це подвиза́ет па́че их. Поне́же бо ви́дяшеся притру́дна бы́ти вещь е́же вселе́нную обоити́ и пропове́дати, показу́ет я́ко и удо́бно есть. Е́же бо зело́ притру́дно о́но бе, е́же мно́гаго труда́ тре́боваше - е́же низлага́ти се́мена и ду́шу непросвеще́нну вводи́ти в богоразу́мие.

Что же ра́ди сия́ веща́ет? Да егда́ их по́слет во е́же пропове́дати, не смутя́тся я́ко в вещь притру́дну посыла́еми. Притру́днейшая бо проро́к бе, рече́. И сведе́тельствует де́ло сло́ву: я́ко вы на ле́гкое приидо́сте. Я́коже бо о жа́тве со удо́бством у́бо плод собира́ется, и во еди́ном часце́ ту мно́го исполня́ется рукоя́тий , не ожида́юще вре́менем приложе́ния, и зимы́, и ве́сны, и дождя́: си́це и ны́не быва́ет, и дела́ вопию́т.

Посреди́ у́бо Ему́ глаго́люще сия́, изыдо́ша самаритя́не и собира́шеся внеза́пу плод. Сего́ ра́ди рече́: «Воздви́гнете очеса́ ва́ша и ви́дите ни́вы, я́ко белы́ суть». Рече́ сия́, и де́ло яви́ся: и глаго́лы от веще́й зря́ше.

Ева́нгелие: От гра́да бо о́ного мно́зи, рече́, ве́роваша в Него́ от самаря́н за сло́во жены́ свиде́тельствующия: Я́ко реч́е мне вся ели́ка сотвори́х.

Толкова́ние: Созира́ху бо, я́ко не бы у́бо почуди́лася к благода́ти жена́ обличи́вшему ея́ прегреше́ния, ниже́ бо е́же обра́доватися, ино́му свое́ житие́ обличи́ла бы.

Нравоуче́ние три́десять четве́ртое: Я́ко подоба́ет ка́ющемуся не то́кмо в дея́нии ка́ятися и отступа́ти, но и в ра́зуме сопроти́вное твори́ти и́хже согреши́л есть:

Да подража́ем у́бо жену́ и мы, и о свои́х гресе́х да не стыди́мся челове́ков, но бои́мся я́коже подоба́ет Бо́га, И́же и ны́не зря́щаго быва́емое, и тогда́ му́чащаго непока́явшихся ны́не. Я́коже а́ще сопроти́вное твори́м, хотя́щаго у́бо суди́ти не бои́мся, а и́же ничи́мже нас врежда́ющых, сих ужаса́емся и и́же от них студа́ трепе́щем. Сего́ ра́ди в не́мже бои́мся, в нем стра́ждем муче́ние. И́же бо студа́ челове́ческаго боя́ся ны́не то́кмо, Бо́гу же зря́щу не срамля́яся соде́яти что безме́стно, не хотя́ пока́ятися и преложи́тися: во он день не пред еди́ным и други́м, но вселе́нней всей зря́щи облича́ется.

Я́ко бо и благи́х действ и не таковы́х, ве́лие позо́рище та́мо седи́т - я́же ове́ц и ко́злищь при́тча да нака́жет, и блаже́нный Па́вел глаго́ля: «Подоба́ет бо нам, рече́, предста́ти пред суди́щем Христо́вым, да прии́мет ко́ждо я́же те́лом ели́ко соде́я, или́ бла́го, или́ зло». Соде́ял ли еси́ что лука́во, или́ помы́слил еси́, и кры́еши челове́ка? Но Бо́га не укры́еши. Но ничто́же сих тебе́ раде́ние бысть: очеса́ же челове́ческия, сие́ тебе́ страх. Те́мже у́бо помы́сли, я́ко ниже́ челове́к утаи́тися возмо́жеши в день он: вся бо я́ко во о́бразе ста́нут пред очи́ма на́шыми, я́ко самоосужде́нну коему́ждо бы́ти. И сие́ я́вствено и от бога́того: и́бо презира́ема ни́щаго Ла́заря глаго́лю, пред очи́ма ви́дяше стоя́ще бога́тый, и его́же мно́жицею гнуша́шеся перста́, того́ мо́лит утеше́ние ему́ бы́ти тогда́.

Молю́ у́бо, а́ще и ни еди́н же уви́дит на́ша дела́, ко́ждо нас в свою́ со́весть вни́ти, и посади́ти себе́ судию́ по́мысла, и на среду́ привести́ согреше́нная. И а́ще не хо́щет тогда́ обличи́ти во он Стра́шный день, да исцеля́ет уже́ я́звы, да налага́ет врачева́ния покая́ния. Мо́щно бо есть, мо́щно безчи́сленых испо́лненому язв, отъити́ здра́вствующу. «А́ще бо, рече́, оста́вите, оста́вятся вам грехи́». Я́коже бо в креще́нии погружа́емый, грехи́ не ктому́ явля́ются: си́це и сия́ изче́знут, а́ще восхо́щем пока́ятися. Есть же покая́ние, е́же не ктому́ та́яже твори́ти. И́же бо те́ми же начина́я, уподо́бися псу, к свое́й блево́тине возвраща́ющуся. Подоба́ет у́бо отступа́ти, и дея́нием, и ра́зумом дерзну́тых и отступи́вшым, и врачева́ния налага́ти я́звам сопроти́вная грехо́м.

Я́коже что глаго́лю. Похи́тил еси́ и лихои́мствовал: отступи́ хище́ния и наложи́ ми́лостыню я́зве. Соблуди́л еси́: отступи́ блуда́ и наложи́ чистоту́ вре́ду. Зле рекл еси́ бра́ту и вреди́л еси́: преста́ни осужда́я и наложи́ любому́дрие. И на ко́еждо си́це да твори́м согреше́нных на́ми, и да не претека́ем про́сте согреше́ния. Наста́ бо про́чее, наста́ испыта́нии вре́мя. Те́мже и Па́вел глаго́лаше: «Госпо́дь близ, ничи́мже пецы́теся», и́же в скорбе́х и труде́х и по́двизех су́ще. А и́же в хище́ниих живу́щии, в наслаже́нии, и́же лю́тая испыта́ния хотя́ще пострада́ти - не сие́, но о́но у́бо услы́шат в ле́поту: «Госпо́дь близ, пецы́теся». Ниже́ бо мно́го остае́т сконча́ния вре́мя, но к концу́ про́чее мир тщи́тся. Сие́ ра́ти явля́ют, сие́ ско́рби. сие́ тру́си, сие́ любо́вь изся́кшия. Я́коже бо те́ло от души́ разделя́ющеся и близ су́ще сконча́ния, безчи́сленое привлача́ет озлобле́ния, и хра́мине хотя́щей па́сти, мно́го предпа́дати обыко́ша, и от кро́ва, и от стен: си́це и вселе́нныя близ и при две́рех стои́т сконча́ния. И сего́ ра́ди безчи́сленая разсе́яшеся всю́ду зла́я. А́ще бо тогда́ Госпо́дь близ, мно́го па́че ны́не близ. А́ще пре́жде трие́х сот лет, егда́ сия́ глаго́лаше, исполне́ние лет време́н Па́вел нарица́ше, мно́го па́че настоя́щее. Но не́гли за сие́ само́е не ве́руют не́цыи. И у́бо сего́ ра́ди ве́ровати подоба́ет па́че. Отку́ду бо ве́даеши, о́ челове́че, я́коже не близ есть кончи́на и по ма́ле вре́мени сря́щут рече́нная? Я́коже бо ле́ту коне́ц не после́дний день глаго́лем бы́ти, но и после́дний ме́сяц, а́ще и три́десят дней име́ет. Си́це и толи́ких лет, а́ще и четы́реста лет коне́ц реку́, не погрешу́, я́коже отто́ле провозглаша́ше коне́ц.

Да спря́таем у́бо себе́, да наслади́мся стра́хом Бо́жиим: и́бо в безстра́шии пребыва́ющым нам, ни зело́ пеку́щимся, ниже́ ожида́ющым предста́нет внеза́пу прише́ствие. И сие́ явля́я Христо́с глаго́лаше: «Я́коже бо во днех Но́евых и я́коже во днех Ло́товых, си́це бу́дет». Си́це и Па́вел явля́я, глаго́лаше: «Егда́ же глаго́лют мир и утверже́ние, тогда́ внеза́пная им надста́нет па́губа и я́коже боле́знь во чре́ве име́ющей». Что же есть «я́коже боле́знь во чре́ве име́ющей»? Мно́жицею непра́здныя жены́ внеза́пу игра́ющи и обе́д творя́щи, или́ в ба́ни, или́ на то́ржищи пребыва́ющи, ничто́же от бу́дущих предзря́щи, от боле́зни я́ти бы́ше внеза́пу. Поне́же у́бо и на́ша такова́, да бу́дем при́сно угото́влени: не при́сно бо сия́ услы́шим, не при́сно сих о́бласть име́ет – «во а́де бо, рече́, кто испове́стьтися?». Те́мже у́бо зде да пока́емся, да си́це ми́лостива прии́мем Бо́га в бу́дущий день и мно́гия наслади́тися возмо́жем ми́лости, ея́же бу́ди всем нам получи́ти благода́тию и человеколю́бием Го́спода на́шего Иису́са Христа́, Ему́же сла́ва и держа́ва, ны́не и при́сно и во ве́ки веко́в. Ами́нь.

Стихи́:

Во́ду прия́ти прише́дши тле́нную же́но:

Живу́ю почерпа́еши, е́юже скве́рны душе́вныя омыва́еши.

В то́йже де́нь, в неде́лю пя́тую по Па́сце, самаряны́ни пра́здник пра́зднуем: поне́же в то́й Христо́с Месси́ю Себе́ я́ве испове́доваше, е́же е́сть Христо́с [или́ пома́зан]: Ме́са бо у евре́й, еле́й. Сего́ бо ра́ди мню́ и в средопентико́стную седми́цу учине́н бы́сть. И я́ко в пре́жде тоя́ у́бо неде́ли в купе́ли чудоде́йствует, в се́й же над Иа́ковлим студенце́м, к жене́ бесе́дуя Христо́с, и́же студене́ц са́м Иа́ков ископа́, и дарова́ Ио́сифу сы́ну своему́: изря́дно бо бе́ ме́сто сие́, иде́же и бли́з су́щу горы́ Сомо́ры, самаря́не населя́ху гра́ды мно́ги. В Сиха́рь же прихо́дит Христо́с, иде́же обита́вшу дре́вле Иа́кову, с Ди́ною дще́рию свое́ю, и с сы́нми, Сихе́м сы́н Емо́ров Хоре́й возжеле́ ея́, и наси́лив бы́сть с не́ю. И отту́ду бра́тия тоя́ раздражи́вшеся на ре́вность зело́, внеза́пу вше́дше в гра́д, вку́пе вся́ убива́ют, и того́ Сихе́ма, и отца́ его́ Емо́ра. Обита́ет у́бо та́мо Иа́ков, и настоя́щий студене́ц ископа́. Не самари́тяне же пре́жде обита́ху у тоя́ горы́, но исра́ильтяне Бо́гу прирази́вшеся, Факе́ю ца́рствующу, пе́рвым пле́ном и вторы́м, Ассири́ом прише́дшым под да́нь си́х подложи́ша: и пома́ле Оси́ю ца́рствующу, прилага́ются к ефио́пляном: е́же уве́дев ассири́йский ца́рь, преселя́ет я́ в Вавило́н. На о́ном же ме́сте разли́чным язы́ком жи́ти повеле́: но Бо́г львы́ на иноплеме́нники о́ныя пуща́ет. Ца́рь же ассири́йский па́ки уве́дев сие́, свяще́нники от иуде́й те́м посыла́ет, [еще́ бо та́мо бя́ху плене́ннии,] я́ко да и Бо́жия зако́ны прии́мут. И от и́дол у́бо ско́ро отскочи́ша. Еди́ны же пя́теры кни́ги Моисе́овы прия́ша, отмета́ющеся проро́к, и про́чаго писа́ния. Си́и и самаря́не зово́ми бя́ху, я́ко от горы́ Сомо́ры: и ненави́дими бя́ху евре́йми, от плене́ния возвраща́ющимися, зане́ и́сполу иуде́йствоваху, и не ядя́ху с ни́ми, ме́рзостны я́ непщу́юще. Те́мже и Христа́ самаряни́на мно́гажды нарица́ху, я́ко не́кая от зако́нных у́бо презира́юща и разруша́юща, я́коже они́. Прихо́дит у́бо в Сиха́рь Госпо́дь, и труди́вся от путеше́ствия, се́де о часе́ шесто́м дне́. Жена́ же не́кая от гра́да прии́де почерпсти́ воды́, ученико́м отше́дшым на ку́плю пи́щи: про́сит у́бо воды́ Иису́с. Она́ же не прикаса́тися предлага́ет, позна́ бо его́ и от гла́са, и от оде́жды. О́н же возво́дит ю́, духо́вную во́ду принося́ в среду́, ю́же неоску́дную и чисти́тельную показу́ет: Ду́х бо воде́ и огню́ при́сно уподобля́ется. Жена́ же неотсту́пно прилежа́щи не име́ти о́ному во́ду такову́ю, за е́же почерпа́ла не носи́ти, и студенцу́ бы́ти глубоку́ приглаго́лет. Та́же и на пра́отца Иа́кова возно́сит сло́во, я́ко са́м студене́ц ископа́: и о́н, и о́вцы его́ от него́ пия́ху, бога́тое отсю́ду исто́чнику представля́ющи, и е́же и́нако благопотре́бну и студену́. Христо́с у́бо не бо́льша себе́ глаго́лет Иа́кова, да не жену́ устраши́т, но о воде́ глаго́лет, представля́я отсю́ду тоя́ предо́брое: пия́й от воды́ о́ноя ника́коже вжа́ждет. Про́сит же воды́ жена́, о́н же глаго́лет своего́ е́й му́жа пригласи́ти, я́ко тверде́йших слове́с тре́бующи разуме́ния. Она́ же отри́чется не име́ти му́жа. Ве́дый же вся́, глаго́лет: до́бре рекла́ еси́, пя́ть бо име́ла еси́, я́коже зако́н повелева́ет, и его́же ны́не и́маши шеста́го я́ко беззако́нно о́ному сбыва́ющая, не́сть ти́ му́ж. Не́цыи у́бо пя́ть муже́й, пя́ть кни́г моисе́овых непщева́ша бы́ти, я́же самаря́не прие́мляху: шеста́го же та́ словеса́ Христо́ва, я́же не бы́ша еще́ о́ная: и́бо не у́ благода́ть излия́на бе́. Друзи́и же, да́нныя пя́ть зако́ны от Бо́га, и́же в раи́, и по изгна́нии, и́же при Но́и, и́же при Авраа́ме, и́же при Моисе́и. Шесты́й же Ева́нглие, е́же и еще́ не имя́ше. Су́ть же и́же и пя́ть чу́вствий глаго́лют. Отвещава́ет ему́ жена́, Проро́ка его́ имену́ющи. Та́же вопроша́ет Его́ и о горе́, где́ подоба́ет кла́нятися, в Сомо́ре ли, или́ во Иерусали́ме. Не мня́ху бо самаря́не, я́ко соверше́нно везде́ Бо́гу бы́ти, но та́мо пребыва́ти то́чию Бо́гу, иде́же и поклоня́хуся, в Гари́зе я́ве горе́, за е́же та́мо да́тися благослове́нию от Бо́га. Или́ зане́ та́мо пе́рвый Авраа́м же́ртвенник водрузи́ Бо́гу, я́коже иуде́и па́ки глаго́лаху: во Иерусали́ме подоба́ет покланя́тися Еди́ному Бо́гу. Те́мже и́же и отвсю́ду в пра́здник та́мо собира́хуся. Христо́с же отвещава́ет, от иуде́й глаго́ля спасе́ние ми́рови: оба́че рече́, Бо́г невеще́ственный е́сть, и покланя́тися сподо́бльшиися, не в же́ртвах уже́ покло́нятся, но в Ду́се и и́стине. Или́ и си́це Бо́га позна́ют, не еди́наго, но в Ду́се Свято́м и Сы́не, то́й бо и́стина. Жена́ па́ки глаго́лет: слы́шим от писа́ний, я́ко Месси́а гряде́т, е́же е́сть Христо́с. Иису́с же глаго́лет: А́з е́смь, благонра́вие жены́ разуме́в. Ве́даша же самаря́не и о Месси́и от моисе́йских кни́г, изря́днее же от Сего́: е́же проро́ка ва́м возста́вит Госпо́дь Бо́г, и от ины́х мно́гих. Конча́вшейся же бесе́де, и ученицы́ прихо́дят, и кра́йнему удивля́ются схожде́нию, ка́ко с жено́ю глаго́лаше? Оба́че же моля́ху его́ я́сти, ку́пно у́бо за е́же потруди́тися, и за вре́мене зно́йное. О́н же о ве́чной пи́щи те́м глаго́лет челове́ческаго я́ве спасе́ния, и я́ко подоба́ет и́м проро́ческия труды́ пожа́ти. Но жене́ во гра́д дости́гшей, и я́же о себе́ сказа́вшей, вси́ воздви́гшеся, и ко Христу́ прихо́дят ве́ровавше: я́ко не бы́ жена́ себе́ порекла́, а́ще не бы́ вели́ко что́ разуме́ла. И мольбу́ излия́вше, тому́ пребы́ти у ни́х во дню́ двою́, умоля́ют его́. И пребы́в, мно́жайша соде́я чудеса́, я́же у́бо от мно́жества во Ева́нглии не писа́шася. Сия́ же е́сть самаряны́ня, последи́ от Христа́ Фоти́ниа именова́нная, я́же и муче́ния венце́м увязе́ся при Неро́не ке́саре, и с седмию́ свои́ми сы́ны, по мно́зе озлобле́нии, и строга́нии, и сосцу́ отре́зании, сокруше́нии ру́к, и тросте́й то́нких под но́гти влага́нии, и о́лова напое́нии, и ины́х безчи́сленных му́к истяза́нии, наконе́ц от двою́ фи́нику привяза́нии и расторгну́тии. Ве́домо же бу́ди, я́ко студенца́ о́наго го́рлище, си́речь у́стие, ца́рь Иустиниа́н че́стне отту́ду прине́с, в Бо́жия сло́ва вели́ком хра́ме святы́я Софи́и положи́: но и ка́мень, на не́мже Христо́с седя́ самаряны́ни бесе́доваше, и досе́ле обоя́ пребыва́ют пред па́пертом от восто́ка, в хра́м входя́щым на ле́вой стране́, вся́к неду́г исцеля́юща, па́че же от огне́виц страда́ти приключа́ющымся, и тряса́вицею боля́щым, очища́ют же и отго́нят и чарова́ния быва́емая. Твоея́ му́ченицы Фоти́нии моли́твами, Христе́ Бо́же, поми́луй на́с. ами́нь.

По отпу́сте у́трени и многоле́тнах, исходя́ще в притво́р, пое́м: Сла́ва и ны́не: стихи́ру ева́нгельскую, глас 4:

У́тро бе глубоко́, / и жены́ приидо́ша на гроб Твой, Христе́, / но Те́ло не обре́теся жела́емое и́ми. / Те́мже недоумева́ющимся, и́же в ри́зах блеща́щихся предста́вшии глаго́лаху: / что Жива́го с ме́ртвыми и́щете;/ воста́, я́коже предрече́, / что не по́мните глаго́л Его? / И́мже ве́ровавша, ви́денная пропове́даху, / но мня́хуся лжа благовеще́ния: / та́ко бы́ша еще́ ко́сни ученицы́. / Но Петр тече́, и ви́дев // просла́ви Твоя́ в себе́ чудеса́.

Чтем поуче́ние Студи́тово, я́коже предписа́ся в неде́лю Фомину́: О стра́шном Суди́щи, и [я́ко] кре́пко пременя́ти дни сего́ живота́ на́шего:

1. Бра́тия и отцы́, пребыва́ние сея́ жи́зни не дрема́ние вам да твори́тся, ни ослабле́ние, ни пренемога́ние, но по́двиг па́че и успе́шно поуче́ние, Бо́гу угожде́ние, я́ко приближа́ющимся сме́рти. Никто́же бо бысть раб приближа́яся го́споду своему́ да́ти сло́во, или́ посо́льник по́сланому ему́, лени́во соверши́ти, но толи́ко поспеше́ние быва́ет, я́ко мни́тся удиви́тися ему́. Что бо? И мы приближа́ющеся Го́споду на́шему, па́че же приближа́ется Госпо́дь. И стра́шное сложе́ние, о не́мже вси предста́нем на́зи и обличе́ни, вдаю́ще сло́во утвержда́емым на́шим и прие́млющим, или́ Ца́рство небе́сное, или́ му́ку ве́чную. И ко́ему кто досто́ин? Кто же дрема́ти восхо́щет, а не па́че в пла́мень вели́кий входя́ твори́т во́лю Го́спода своего́, да не обря́щется я́ко раб он свя́зан рука́ма и нога́ма и изве́ржен из черто́га.

2. А́щели ни сия́ указа́ния страша́т нас, поне́ от сих увежда́ем бу́дущая. Не зрим ли враги́ царе́й: ка́ко о́ви в темни́цах изнемога́ют, о́ви бие́нием испыту́ются, о́ви во изгна́ния посыла́ются? Друзи́и о́чи погубля́ют, друзи́и же о свое́й жи́зни беду́ют. А не согреши́вше ника́ко, и ти́и стра́хом предстоя́т и с тре́петом слу́жат, се́мо и о́вамо посыла́еми на брань, и на жесто́кия стражда́. И никто́же отрица́яйся есть или́ не слу́шая. А́щели о цари́ тле́нне си́це есть, кольми́ па́че о Нетле́ннем, но Еди́нем Цари́ царе́м и Го́споде господе́м, стра́хом и тре́петом подоба́ет сим бы́ти и ничто́же па́че запове́данных де́яти? Или́ «о бога́тстве благосты́ни Его́ не ради́ти и терпе́ния», я́коже рече́ свято́е Писа́ние, «не разуме́еши ли, я́ко благода́ть Бо́жия в покая́ние тя веде́т? По жесто́честву же твоему́ и непокая́нию се́рдца собира́еши себе́ я́рость в день гне́ва и открове́ния правосу́дия Бо́жия, И́же пода́ст кому́ждо по де́лом его́». Сия́ да устраша́т вас, и весь день тве́рдо и соблюда́емо, пременя́ем а́бие зау́тра востаю́ще бо́дрено и сон оттряса́юще, бде́нно мо́лимся, поне́же годи́ны не пою́тся воскресе́ния ра́ди, да исправле́нию срета́ем к де́лом: а́щели есть ключа́рь во клети́, а́щели есть маге́рь в маге́рницы, а́ще есть дия́кон диякону́я, а́щели моля́ся в мольбе́ - та́ко вси всех исходя́ще ми́рно. Николи́же порица́ние, николи́же вопль, николи́же прекосло́вие, ни зло́ба одержа́ема, я́ко явля́тися вне ми́рну, вну́трь же храни́ти зло́бу и во́ время уяда́ти я́ко змия́ или́ я́ко вельбу́д. Зломы́сля, в поноше́ние пре́йде - бысть покая́ние, от чистоты́ оставле́ние: не па́ки помышле́нием раждиза́ющеся, ниже́ по пи́саному, «воздаю́ще зло за зло, ни поруга́ние в поруга́ние: супроти́вно же благословя́ще, ве́дяще, я́ко в то ся есте́ призва́ли, да благослове́ние насле́дите. Хотя́й бо животу́ и ви́дети дни бла́ги, по пи́саному, да удержи́т язы́к свой от зла, и устне́ его́ не глаго́лати льсти. И да уклони́тся от зла и сотвори́т добро́, да взы́щет ми́ра и пожене́т и́. Я́ко о́чи Госпо́дни на пра́ведных, и у́ши Его́ в моли́тву их. Лице́ же Госпо́дне на творя́щих зла́я».

3. Сия́ же ма́лая. Что же бо́льшая? К нача́лом, ко влады́чеством, к мироде́ржцем ве́ка сего́ брань на́ша предстоя́щему гоне́нию , и́же страша́ прети́т се и о́но, я́коже слы́шим. А́ще у́бо в ма́лых сих неиспра́влени бу́дем, ка́ко в бо́льших благоиспыта́емся? «В ма́ле ве́рен и во мно́зе ве́рен есть», я́коже рече́ Госпо́дь. Поне́же и вы во мно́зе и в ма́ле благода́тию Христо́вою яви́стеся, и по покоре́нию, и по испове́данию: не и́нуде растерза́йтеся, но обою́ду соверше́ни бу́дете, и сверша́еми во всем де́ле бла́зе, «ни еди́ному даю́ще препя́тие, да непоро́чна бу́дет слу́жба», но уго́дни быва́юще Го́сподеви во всем, да насле́дите Ца́рство небе́сное о Христе́ Иису́се Го́споде на́шем, Ему́же сла́ва и держа́ва, со Отце́м и со Святы́м Ду́хом, ны́не и при́сно и во ве́ки веко́в. Ами́нь.

По чте́нии же, а́бие тропа́рь свята́го Фео́дора, глас 8:

Правосла́вия наста́вниче, благоче́стия учи́телю и чистоты́, / вселе́нныя свети́льниче, мона́шествующих Богодухнове́нное удобре́ние, / Фео́доре прему́дре, уче́ньми твои́ми вся просвети́л еси́, цевни́це духо́вная, // моли́ Христа́ Бо́га спасти́ся душа́м на́шим.

И посе́м: Христо́с воскре́се: три́жды, и пе́рвый час по обы́чаю.