Вторник шестой седмицы по Пасце

Отвеща́ ему́ наро́д: Мы слы́шахом от Зако́на, я́ко Христо́с пребыва́ет во ве́ки. И како Ты глаго́леши, я́ко подоба́ет вознести́ся Сы́ну Челове́чу? Кто есть Сын Челове́чь?

Удо́бь е́млемо пре́лесть и не́мощно, а́ще и безчи́слеными отвне́ помазу́ется ша́ры. И я́коже и́же гнила́я от стен повапля́юще не возмага́ют пома́зание испра́вити, си́це и лжу́щии удо́бне облича́ются. Е́же у́бо и зде пострада́ша иуде́и. Христу́ бо к ним ре́кшу: «Егда́ вознесу́ся от земли́, всех привлеку́ к Себе́». «Мы слы́шахом рече́ от Зако́на, я́ко Христо́с пребыва́ет в век, ка́ко Ты глаго́леши, я́ко вознести́ся подоба́ет Сы́ну челове́чу?. Кто есть сей Сын челове́чь?». Еда́ ве́дяху я́ко Христо́с безсме́ртен не́кто есть и живо́т име́ет конца́ не име́ющь? Те́мже у́бо и о́но ве́дяху е́же глаго́лаше. И́бо во мно́гих ме́стех Писа́ний вку́пе и страсть, и воскресе́ние лежи́т. И́бо Иса́ия вку́пе сия́ полага́ет: «Я́ко овча́ на заколе́ние веде́н бысть» глаго́ля, и про́чая вся. И Дави́д во второ́м псалме́ и и́нде совокупля́ет сия́ обоя́. И патриа́рх же рек: «Возгле́г, усну́ я́ко лев», наведе́ «и я́ко ски́мен львов: кто воздви́гнет его́?» - вку́пе и страсть, и воскресе́ние показу́ет. Но си́и непщу́юще заусти́ти Его́ и показа́ти не су́ща Христа́, от сего́ испове́дуют я́ко Христо́с во ве́ки пребыва́ет. И зри, ка́ко злоде́йствене: не ре́ша бо, я́ко мы слы́шахом я́ко Христо́с ничто́же стра́ждет, ниже́ распина́ется, но: «я́ко пребыва́ет в век». И́бо ниже́ сие́ рече́нное сопроти́вно бе, безсме́ртию бо страсть не бысть возбране́ние. Отсю́ду есть уви́дети, я́ко мно́го от обои́х сомне́ний разумева́ху, и во́лею злоде́йствоваху. Поне́же бо предвари́, о сме́рти бесе́довав, вы́шше слы́шавше е́же вознести́ся, зде сие́ вознепщева́ху. Та́же глаго́лют: «Кто сей есть Сын челове́чь?». И сие́ злоде́йствене: да не вознепщу́еши у́бо рече́, я́ко о Тебе́ сие́ глаго́лем, и рече́ши, я́ко вражды́ ра́ди сим противля́емся. Се бо не ве́мы, о ком глаго́леши, и оба́че изъявля́ем.

Что у́бо Христо́с? Зауща́я их и показу́я, я́ко страсть ничто́же возбране́ние ко е́же пребыва́ти Ему́ ввек, еще́ рече́: «Ма́ло вре́мя Свет с ва́ми есть», явля́я я́ко смерть Его́ преставле́ние есть. И́бо свет со́лнечный не отъе́млется, но ма́ло уступи́вши, па́ки явля́ется. «Ходи́те, до́ндеже свет и́мате». Ко́е зде глаго́лет вре́мя? Еда́ настоя́щую жизнь всю или́ пре́жде Креста́ вре́мя? Аз у́бо мню обоя́: неизрече́ннаго бо ра́ди Его́ человеколю́бия, мно́зи и по Кресте́ ве́роваша. Глаго́лет же сия́, приводя́ их в ве́ру. Е́же и вы́ше сотвори́, си́це глаго́ля: «Еще́ ма́ло вре́мя с ва́ми есмь». «Ходя́й во тме, не весть ка́мо и́дет».

Коли́ка у́бо ны́не иуде́и де́йствуют, не ве́дят, что де́йствуют, но я́ко во тме си́це ходя́ще. Мнят у́бо пра́вым ходи́ти путем, сопроти́вным же хо́дят: суббо́ты блюду́ще и зако́н храня́ще, сне́дей наблюде́ния - не ве́дят ка́мо хо́дят. Сего́ ра́ди глаго́лаше: «Ходи́те во Све́те, да сы́нове Све́та бу́дете», си́речь Мне сы́нове. И́бо в нача́тцех рече́ евангели́ст: «Я́ко не от кро́ве, ниже́ от хоте́ния пло́тска, но от Бо́га роди́шася», си́речь Отца́. Зде же Сам глаго́лет сих ражда́ти, да навы́кнеши я́ко еди́но де́йство Отца́ и Сы́на. «Сия́ рек Иису́с и отше́д от них, скры́ся». Ны́не что кры́ется? Ниже́ бо ка́мения взя́ша на Него́, ниже́ поху́лиша таково́ не́что яково́ пре́жде. Что у́бо ра́ди скры́ся? Сердца́ проходя́, ве́дяше я́рость их свере́пеющу: а́ще и ничто́же вещах́у, ве́дяще горя́щу уби́йствующу, - и не пожда́ я́ко бы в де́ло изы́ти, но кры́ется, утеша́я их за́висть. Зри у́бо, ка́ко сие́ назна́мена евангели́ст: а́бие у́бо наведе́: «Толи́ка же зна́мения сотво́ршу, не ве́роваху в Него́». Ка́я толи́ка? Ели́ка оста́ви евангели́ст. И от су́щих же по сих сие́ я́вствено. И́бо отше́д, и осла́бив, и возврати́вся, па́ки ти́хо им бесе́дует, си́це глаго́л: «Ве́руяй в Мя, не ве́рует в Мя, но в Посла́вшаго Мя».

Зри бо, что твори́т: начина́ет от смире́нных и спря́танных, и прибега́ет ко Отцу́, та́же па́ки возво́дит сло́во. Егда́ уви́дит зверя́щихся, отхо́дит. И па́ки надстае́т, и от смире́нных нача́ло твори́т па́ки. И сие́ где сотвори́л есть? Где бо не сотвори́л? Зри у́бо вма́ле, что рече́: «Я́коже слы́шу и сужду́», та́же высоча́йше: «Я́коже бо Оте́ц воскреша́ет ме́ртвых и живи́т, си́це и Сын и́хже хо́щет живи́т». Па́ки: «Аз не сужду́ вас, ин есть Судя́й».

Та́же отхо́дит па́ки. Та́же надста́ в Галиле́и: «Де́лайте рече́ не бра́шно ги́блющее», и рек о Себе́ вели́ка, я́ко от небеси́ сни́де, я́ко живо́т ве́чный дае́т, па́ки отхо́дит. И в потче́ние ски́нии па́ки надста́в, са́мо сие́ твори́т. И вы́ну, уви́дит у́бо кто, си́це упещря́юща уче́ние: дерзнове́нием, отше́ствием, смире́нными, высо́кими словесы́, е́же и зде сотвори́л есть. «Толи́ка же ему́ зна́мения сотво́ршу, не ве́роваху в Него́» рече́. Да соверши́тся сло́во Иса́иино е́же рече́: «Го́споди, кто ве́рова слу́ху на́шему? И мы́шца Госпо́дня кому́ откры́ся?». И па́ки: «Не можа́ху рече́ ве́ровати, зане́ рече́ Иса́ия: слу́хом услы́шите, и не разуме́ете. Сия́ рече́, я́ко ви́де сла́ву Его́ и глаго́ла о Нем». Се па́ки е́же я́ко и рече́, не виновносло́вия, но сбы́тия: ниже́ бо поне́же рече́ Иса́ия не ве́роваху, но поне́же у́бо не хотя́ху ве́ровати, сего́ ра́ди рече́ Иса́ия. Что у́бо не си́це евангели́ст глаго́лет, но неве́рие от проро́чества, а не проро́чество от неве́рия бы́ти рече́? И происходя́, зе́льнейше са́мо сие́ полага́ет глаго́ля: «Сего́ ра́ди не можа́ху ве́ровати, я́ко рече́ Иса́ия».

Отсю́ду предста́вити мно́гими хо́щет Писа́ния нело́жное и я́ко я́же прорече́не [не] и́нако сбы́сться, но я́коже рече́. Да́же бо не кто возглаго́лет: и что ра́ди прии́де Христо́с? Не ве́дяше ли, я́ко не хотя́ху Ему́ внима́ти? И проро́ков вво́дит, сие́ ве́дящых. Прии́де же, да изве́та не име́ют о гресе́ свое́м. Я́же бо прорече́ проро́к, я́ко вся́чески быва́ема прорече́. А́ще бо не вся́чески име́ла бы́ша бы́ти, не бы проре́кл: вся́чески же имя́ху бы́ти, поне́же неисце́льне имях́у они́. А́ще же лежи́т е́же не можа́ху вме́сто е́же не хотя́ху лежи́т: и да не чуди́шися. И́бо и́нде рече́: «Моги́й вмести́ти да вмести́т». Си́це весть во мно́гих ме́стех си́лу - произволе́ние глаго́лати. И па́ки: «Не мо́жет мир ненави́дети вас, Мене́ же ненави́дит». Сие́ и во о́бщем обы́чаи соблюда́емо уви́дит у́бо кто. Я́ко егда́ глаго́лет не́кто: «Не могу́ возло́бити о́нсицу», зе́льное хоте́ния си́лу глаго́ля. И па́ки: «Не мо́жет о́нсица бы́ти благ». И проро́к же что рече́? «А́ще премени́т му́рин ко́жу, и рысь пестроты́ своя́, и лю́дие си́и возмо́гут бла́го твори́ти, уве́дев зла́я?». Не сие́ бо рече́, я́ко невозмо́жно им доброде́тели де́лание, но я́ко не хотя́т: сего́ ра́ди не мо́гут. А е́же глаго́лет зде евангели́ст, сие́ рече́: я́ко невозмо́жно лга́ти проро́ку. Не у́бо сего́ ра́ди не мо́щно бя́ше им ве́ровати: мо́щно бы и ве́ровавшим им, нело́жну пребы́ти, не бо у́бо вся прорече́. Я́ко сво́йства не́кая такова́ Писа́ние име́ет, и подоба́ет зако́ном его́ уступа́ти. «Сия́ же рече́, я́ко ви́де сла́ву Его́». Кого́? О́тчу. Ка́ко у́бо Иоа́нн о сы́не глаго́лет, Па́вел же о Ду́се? Не я́ко совокупля́юще ипоста́си, но еди́но досто́инство бы́ти явля́ющу: ре́ша и́бо я́же О́тчя – Сыно́вня, и я́же Сыно́вня - Ду́ха суть. И́бо мно́га а́нгелы рече́, и никто́же глаго́лет «до́бре рече́ а́нгел», но что «Бог рече́»: я́же бо от Бо́га а́нгелы рече́нна, Бо́жия у́бо бу́дут: не ктому́ же Бо́жия, я́же а́нгелов. Зде же Ду́ха бы́ти глаго́лы. «И глаго́ла о Нем». Что глаго́ла? «Ви́дех Го́спода седя́ща на престо́ле высо́це» и про́чая. Сла́ву у́бо зде рече́ зре́ние о́но ды́ма, е́же слы́шати та́инств неизрече́нных, е́же ви́дети серафи́ми, мо́лнию ю́же от престо́ла ска́чущу, е́йже сопроти́в возре́ти не име́ху си́ле о́не. «И глаго́ла о Нем». Что глаго́ла? Я́ко слы́шах глас глаго́лющь: «Кого́ послю́, и кто по́йдет? И рече́: Се Аз, посли́ Мя. И рече́: слу́хом услы́шите и не разуме́ете, ослепи́ бо их очеса́ и окамени́ их се́рдце, да не когда́ уви́дят очи́ма, и се́рдцем уразуме́ют». Се па́ки и́но взыска́ние: но и [несть] , а́ще пра́ве внима́ем. Я́коже со́лнце не́мощных уязвля́ет зре́ния, не от своего́ естества́: та́ко и о не внима́ющых Бо́жиим словесе́м быва́ет. Си́це и о любопри́тельных в Бо́жиих словесе́х. Си́це и о фарао́не се́рдце ожесточи́ти глаго́лется. Сво́йство же и сие́ Писа́нию: и е́же «предаде́ в неиску́сен ум», и е́же «раздели́ язы́ком», си́речь попусти́, оста́ви. Не де́йствующа бо Его́ зде вво́дит, но от ины́х зло́бы сия́ быва́ема показу́ет. Егда́ бо оставля́еми быва́ем от Бо́га, предае́мся диа́волу. Диа́волу же преда́вшеся, безчи́слена стра́ждем лю́тая. Устраша́я у́бо послу́шателя рече́ ожесточи́ и предаде́, я́ко бо Той не то́кмо не предае́т, но ниже́ оставля́ет, а́ще не хо́щем.

Услы́ши что рече́: «Не грехи́ ли ва́ши разстоя́т Мене́ и вас?», и па́ки: «Удаля́ющиися от Тебе́ поги́бнут». Оси́е же рече́: «Забы́л еси́ зако́на Бо́га твоего́, забу́ду тебе́ и Аз». И сам же в Ева́нгелиих: «Коли́жды восхоте́х собра́ти ча́да ва́ша, и не восхоте́сте». И Иса́ия же па́ки: «Приидо́х, и не бе челове́к: призва́х, и не бе послу́шая». Сия́ же глаго́лет, показу́я нас начина́ющых оставле́ния и вино́вных быва́ющых поги́бели. Бог бо не ктому́ оставля́ти, ниже́ му́чити хо́щет: но и егда́ му́чит, не хотя́ сие твори́т – «Не хощу́ бо рече́ сме́рти гре́шнику». Христо́с же погуби́ти хотя́ Иерусали́ма, и слези́т: е́же и мы о люби́мых твори́м.

Нравоуче́ние шестьдеся́ть осмо́е: О любви́ и братолю́бии:

Сия́ у́бо ве́дяще, вся да де́йствуем, я́ко бы не отступи́ти Бо́га, но да держи́мся душе́внаго попече́ния и я́же ко друг дру́гу любви́, и да не растерза́ем на́шых уде́с - е́же беся́щыхся и иступи́вших есть. Но ели́ко у́бо зле пребыва́ющых уви́дим, да исцеля́ем па́че. И́бо в телесе́х мно́го мно́жицею зрим злоболе́знена и неисце́льна, име́ющых неду́ги, и не преста́ем налага́юще врачева́ния. Что бо ка́мчуга го́рше? Что же егда́ у́бо отсеца́ем у́ды? Ника́коже. Но вся твори́м, я́ко бы утеше́ния не́коего наслади́тися, поне́же разреши́ти зло́е не мо́жем. Сие́ и о бра́тиях да твори́м: а́ще и неисце́льная неду́гуют да пребыва́ем врачу́юще и нося́ще друг дру́гу тяготы́. Си́це бо соверши́м зако́н Христо́в. и получи́м обеща́нных благи́х благода́тию и человеколю́бием Го́спода на́шего Иису́с Христа́, И́мже и с Ни́мже Отцу́ сла́ва со Святы́м Ду́хом, ны́не и при́сно и во ве́ки веко́в. Ами́нь.

Оба́че у́бо и от князе́й мно́зи ве́роваша в Него́, но фарисе́й ра́ди не испове́даху, да не от со́нмища изгна́ни бу́дут: возлюби́ша бо сла́ву челове́ческую па́че, не́жели сла́ву Бо́жию:

Всех у́бо бе́гати подо́бне нам ну́жно ду́щу растлева́ющих страсте́й, мно́га же вя́щше оне́х, я́же мно́га от них ража́ющася согреше́ния. Я́коже что глаго́лю: сребролю́бие - есть у́бо и о себе́ лют неду́г, мно́го же быва́ет люте́йши, зане́ ко́рень и́мати есть всех злых. Таково́ и тщесла́вие. Се́ и си́и ве́ры, жела́ния ра́ди сла́вы, отрази́шася. «Мно́зи бо от князь ве́роваша в Него́, иуде́й же ра́ди не испове́даху, да не от со́нмища изгна́ни бу́дут». Е́же им испе́рва глаго́лаше: «Ка́ко мо́жете ве́ровати сла́ву от челове́к прие́млюще и сла́ву ю́же от Бо́га не и́щуще?». Не у́бо кня́зи бе́ша, но ра́би рабо́тою после́днею.

Но оба́че и се́й по́слежде разреши́ся страх. Нигде́же бо о апо́столех зрим се́ю держи́мых стра́стию: и́бо кня́зи от о́нех ве́роваша, и свяще́ники: Ду́ха бо благода́ть прише́дши, всех их адама́нта сотвори́ крепча́йшых. Поне́же у́бо сие́ бе возбраня́ющее ве́ровати тогда́, услы́ши что рече́: «Ве́руяй в Мя, не верует в Мя, но в Посла́вшаго Мя». А́ки бы глаго́лал: что бои́теся ве́ровати в Мя? В Бо́га ве́ра восхо́дит Мно́ю, я́коже у́бо и неве́рие. Зри, ка́ко все́ми непреме́нное показу́ет существа́. И не рече́: ве́руяй Мне, - да не кто рече́т, я́ко глаго́л ра́ди глаго́лаше, е́же и о челове́цех мо́щно бе рещи́, [апо́столом бо ве́руяй, не им ве́рует, но Бо́гу], - но да навы́кнеши, я́ко о я́же в суще́ство Свое́ ве́ре рече́. И не рече́ «ве́руяй Мои́м глаго́лом», но «ве́руяй в Мя». И что ра́ди нигде́же рече́ глас сопроти́во обра́тне: «Ве́руяй во Отца́, не во Отца ве́рует, но в Мя»? Зане́ рекли́ у́бо бы: Се мы ве́руем во Отца́, а в Тебе́ не ве́руем: и́бо не́мощнейше еще́ пребыва́ху. Ученико́м у́бо бесе́дуя си́це рече́: «Ве́руйте в Бо́га и в Мя ве́руйте», сих же не́мощнейших зря та́ковы услы́шати глаго́лы, и́нако возво́дит, показу́я я́ко несть ве́ровати Отцу́, не ве́рующему в Него́. И да вознепщу́еши, зане́ о челове́це рече́ся, наво́дит: «Ви́дяй Мене́, ви́дит Посла́вшаго Мя».

Что у́бо? Те́ло ли есть Бог? Ника́коже. Зре́ние бо у́мное рече́ зде, и отсю́ду единосу́щное явля́ет. И что есть «ве́руяй в Мя»? Я́ко у́бо рече́ кто, ре́чную отъе́мляй во́ду, не ре́чную, но ю́же от исто́чника взе́млет: па́чеже и се взе́млет еще́ не́мощнейшь о́браз ко предлежа́щему. «Аз Свет в мир приидо́х». Поне́ бо Оте́ц сие́ нарица́ет, везде́, в дре́внем и в но́вом, и сим де́йствует и́менем. Сего́ ра́ди и Па́вел Осия́ние Его́ нарица́ет, отсю́ду навы́к. И мног показу́ет зде е́же ко Отцу́ сро́дство, и ничто́же посре́дство: а́ще у́бо ю́же в Него́ ве́ру, не в Него́, но во О́ного бы́ти рече́. Све́та же Себе́ нарече́, за е́же льсти свобожда́ти и мы́сленую разреша́ти тму. «А́ще кто не послу́шает мене́, Аз не сужду́ ему́: не приидо́х бо да сужду́ ми́ру, но да спасу́ ми́ра». Да́же бо не вознепщу́ют, я́ко не́мощи ра́ди пренебрега́ющых претече́, сего́ ра́ди рече́: «Не приидо́х да сужду́ ми́ру». Та́же, да не лени́вейши си́це бу́дут, навы́кше я́ко ве́руяй спаса́ется, не ве́руяй же му́чится, зри, ка́ко им я́вствено поста́ви суди́лище: «Отмета́яй бо Мене́ рече́ и не прие́мля глаго́л Мои́х, име́ет су́дящаго ему́». А́ще «Оте́ц ни еди́ного же су́дит» и Ты не прише́л еси́, да су́диши ми́ру, кто его́ су́дит? «Сло́во е́же глаго́лах, о́но су́дит его́». Поне́же бо глаго́лаху, я́ко несть от Бо́га, сие́ рече́, я́ко но не ктому́ сия́ возмо́гут глаго́лати глаго́лы, я́же глаго́лах. Ны́не в чи́ну поставля́ет оглаго́льника облича́ющаго их и вся́ко отсеца́ющаго отвеща́ние: «И сло́во е́же глаго́лах». Ко́е сло́во? Я́ко от Себе́ не приидо́х, «я́ко посла́вый мя Оте́ц, Он ми даде́ за́поведь, что реку́ и что возглаго́лю» - и ели́ка такова́ вся. У́бо сия́ их ра́ди глаго́лаше си́це, да́же ни еди́но же име́ют отве́та ви́ну и непщева́ние. Поне́же а́ще не сие́ бы́ло бы, что Иса́ия вя́щше и́мать. И́бо он са́мое сие́ рече́: «Госпо́дь дае́т ми язы́к наказа́ния, е́же разуме́ти внегда́ подоба́ет рещи́ сло́во». Что же и Иереми́и? И́бо он егда́ посыла́шеся, вдыха́шеся . Что же Иезеки́иль? И́бо сей глави́зну снед, си́це веща́ше. И́накоже обря́щутся: хотя́щии слы́шати е́же глаго́лаше, вино́вни ра́зума су́ще ему́.

А́ще бо егда́ посыла́шеся, за́поведь тогда́ прия́т, что рещи́ пре́жде не́же посла́тися, не ве́дяше ли? И что сих нечести́вейше глаго́л: а́ще си́це сия́ кто прии́мет, и не уве́сть смире́ния их вину́. Но Па́вел у́бо рече́ и сам ве́дети, и уча́щихся, «что во́ля Бо́жия блага́я и уго́дная и соверше́нная». Сын же ли не ве́дяше, до́ндеже за́поведь прия́т? И ка́ко у́бо име́ет сло́во сия́? Зри́ши ли я́ко сего́ ра́ди в премно́жество смире́ния глаго́лемая во́дит, да и о́нех привлече́т, и су́щых по сих заусти́т? Сего́ ра́ди челове́чески веща́ет глаго́лы, да поне́ си́це прину́дит избега́ти ху́дости рече́нных, све́дящим, я́ко не естества́ си́це глаго́лемая, но слы́шащих не́мощи. «И вем я́ко за́поведь Его́ живо́т ве́чный есть. Я́же у́бо глаго́лю, и я́коже запове́да ми Оте́ц, си́це глаго́лю». Зри́ши ли смире́нное рече́нных? За́поведь бо прие́мый несть себе́ Госпо́дь. И́бо Сам рече́, «я́коже Оте́ц воздвиза́ет ме́ртвых и животвори́т, си́це и Сын и́хже хо́щет живи́т». Та́же воздвиза́ти у́бо и́хже хо́щет о́бласть име́ет, рещи́ же ли и́хже хо́щет - не име́ет? Что у́бо есть рече́нное сие́? Рече́, я́ко не име́ет естество́ вещь ина́я, у́бо О́ному глаго́лати, ина́я же Мне веща́ти. «И вем я́ко за́поведь Его́ живо́т ве́чный есть» - ко о́нем, лестьца́ Его́ нарица́ющим и глаго́лющым о вре́де приити́. Егда́ же глаго́лет «Аз не сужду́», несмь поги́бели таковы́х вино́вен рече́, но они́. Си́ми бо то́чию не сведе́тельствуется, хотя́ отступи́ти от них и не ктому́ сопребыва́ти: я́ко ничто́же Аз я́ко свое́ веща́я бесе́довах вам, но вся я́ко от Отца́. И сего́ ра́ди в смире́нная сло́во к ним заключи́, да рече́т я́ко до конца́ сего́ к ним испусти́ после́дняго гла́са. «Зане́ я́коже запове́да Ми Оте́ц, си́це глаго́лю». А́ще же богопроти́вен был бых, сопроти́вно у́бо рекл бых: я́ко ничто́же Бо́гу уго́дных глаго́лю, я́ко бы на Мя преити́ сла́ве. Н́ыне же толи́ко на Него́ вся возведо́х. я́ко ничто́же Свое́ рещи́.

Что у́бо ра́ди не ве́руете Мне глаго́лющу, я́ко за́поведь прия́х, и си́це зе́льне отъе́млющему лука́вое мне́ние е́же сопротивле́ния? Я́коже бо за́поведь прие́млющим не́мощно и́но что твори́ти или́ глаго́лати, ра́зве ели́ка посла́вшии хотя́т, до́ндеже за́поведь соверша́ют, а не пречертава́ют - си́це ниже́ Мне и́но что соде́яти или́ рещи́ мо́щно, но ра́зве я́же Оте́ц хо́щет. Я́же бо Аз творю́, Он твори́т, я́ко «со Мно́ю есть и не оста́ви Мене́ еди́наго Оте́ц». Зри́ши ли, ка́ко везде́ показу́ет совокупле́нна Роди́телю и ничто́же посреде́ су́ще? И́бо егда́ глаго́лет: «О Себе́ не приидо́х», не о́бласть отъе́мля глаго́лет, но чу́ждее и спроти́вное отъе́мля. А́ще бо челове́цы госпо́дие себе́, мно́го па́че Единоро́дный Сын. И я́ко сие́ есть и́стинно, услы́ши что рече́ Па́вел: «Я́ко истощи́ Себе́ и предаде́ за ны». Но е́же рех: лю́то тщесла́вие, лю́то. Сие́ бо о́нех не ве́ровати, ины́х зле ве́ровати устро́и: и я́же оне́х ра́ди глаго́лаше за человеколю́бие, сия́ в нече́стие привлеко́ша.

Нравоуче́ние шестьдеся́ть девя́тое: О тщесла́вии и жена́х украша́ющихся, и о ми́лостыни:

Да бежи́м у́бо зве́ря все́ми, упещре́н бо есть и все изнуря́ющь, всю́ду разсева́ет своего́ я́да: и во име́ниих, и в наслажде́нии, и в добро́те теле́с. Сего́ ра́ди везде́ превосхо́дим. Сего́ ра́ди е́же о ри́зах лихоима́ние, мно́гое рабо́в мно́жество. Сего́ ра́ди везде́ у́бо потре́ба пренебреже́тся: и во хра́мех, и в ри́зах, и в тра́пезе, лихоима́нии же владе́ет. Хо́щеши сла́вы наслажда́тися? Де́лай ми́лостыню. Тогда́ тебе́ похва́лят А́нгели. Тогда́ тебе́ Бог ублажи́т. Ны́не бо похвала́ до златолия́нных ста и тка́ний, ты же не ве́нчан, претека́еши кля́твы, себе́ зря́щи прие́млющу мно́жицею. А́щеже сия́ не те́лу обложи́ши, но во чревеса́ ни́щых истощи́ши - мно́го блаже́нство отвсю́ду бу́дет, мно́га похвала́. Тогда́ сия́ прии́меши, егда́ сия́ ины́м да́си. До́ндеже еди́на держи́ши - не и́маши. Сокро́вище бо неве́рно хра́мина, сокро́више изве́стно - ни́щых ру́це. Что те́ло украша́еши, душе́ небрего́ме, нечистото́ю держи́ме? Что не толи́ко отдае́ши души́ промышле́ние, ели́ко те́лу? А́ще и мно́жайшее подоба́ше, но оба́че люби́мицы, поне́ ра́вное ей да подае́м промышле́ние. Рцы бо мне, а́ще бо кто тебе́ вопроси́л, что хо́щеши: те́лу ли твоему́ бы́ти све́тлу и здра́вствующу и красото́ю побежа́ти, а ри́зы носи́ти худы́, или́ сие́ у́бо бе́дно име́ти и неду́гов напо́лнено, а зла́то носи́ти украша́тися? Не мно́го ли па́че избрала́ бы еси́ в естестве́ теле́снем име́ти благозра́чие, не́жели одея́нием риз?

Та́же о телеси́ у́бо сие́ изволя́ется, о души́ же ли сопроти́вное? И сту́дную име́ющи, и злови́дну, и че́рну - непщу́еши что обоима́ти о златы́х? И коли́каго сия́ безу́мия! Обрати́ красоту́ сию́ внутрь и оше́йная сия́ души́ обложи́. Те́лу бо обложе́на , ниже́ во здра́вие, ниже́ в благозра́чие сие́ по́льзуют, ниже́ бо че́рное бе́ло соде́ловают, ниже́ сту́дное добро́. И благови́дно души́ же а́ще обложи́ши, вско́ре ю́ вме́сто че́рныя бе́лу соде́лаеши, вме́сто сту́дныя и злови́дныя - до́бру и благови́дну. И не мое́ сло́во, но самого́ Го́спода си́це глаго́люща: «А́ще бу́ду греси́ ва́ши я́ко очервле́ни, я́ко сне́га убелю́». И: «Дади́те ми́лостыню, и вся вам бу́дут чи́ста». Не себе́ же еди́ну, но и му́жа си́це пребыва́ющи до́бра сотвори́ши.

А́ще бо уви́дят красоту́ сию́ отлага́ющих, не мно́гу прии́мут изнуре́ния ну́жду: не име́юще же, лихоима́ния отсту́пят вся́кого и в ми́лостыню бу́дут удо́бнейши. И вы же им мо́жете со дерзнове́нием сове́товати подоба́ющая. Ны́не бо вся́ку отверго́сте такову́ о́бласть. Ко́ими бо устна́ми сия́ возлага́ете, кото́рыми очесы́ сопроти́в возри́те, ми́лостыню истязу́ющия от муже́й, егда́ мно́жайшая в теле́сное обложе́ние изнуря́ете? Тогда́ возмо́жеши со дерзнове́нием бесе́довати му́жу о ми́лостыни, егда́ красоту́ златы́х отве́ржеши. А́ще и ничто́же сотвори́ши - свое́ испо́лнила еси́ все. Па́че же невозмо́жно не и о́ного приобрести́ , ве́щьми ей бесе́дующей. «Что бо ве́си же́но, а́ще му́жа спасе́ши?».

Я́ко же у́бо ны́не и о себе́, и о о́ном да́си сло́во, си́це а́ще мечта́ние сие́ совлече́ши - всесугу́б вене́ц име́ти и́маши с му́жем, вене́чница су́щи и торжеству́ющи в нетле́нных ве́цех о́нех и ве́чных наслажа́ющися бла́гих, и́хже бу́ди всем нам получи́ти благода́тию и человеколю́бием Го́спода на́шего Иису́с Христа́, Ему́же сла́ва и держа́ва в ве́ки веко́в. Ами́нь.

Во дни о́ны, бысть Петру́ посеща́ющу всех, сни́ти и ко святы́м живу́щим в Ли́де. Обре́те же ту челове́ка не́коего и́менем Ене́я, от осми́х лет лежа́ща на одре́, и́же бе разсла́блен. И рече́ ему́ Петр: «Ене́я, исцеля́ет тя Иису́с Христо́с. Воста́ни с посте́ли своея́». И а́бие воста́. И ви́деша его́ вси живу́щии в Ли́де и во Ассаро́не, и́же обрати́шася ко Го́споду.

Толкова́ние Златоу́стаго: Я́коже не́кий воево́да обхожда́я четы́ и посеща́я, си́це Петр по всех ве́ровавших прохожда́ше, ка́я бе смире́на страна́, ка́я ли того́во прише́ствие тре́боваше. И зри у́бо: иде́же бя́ше ра́спря со иуде́ом, иде́же беды́, иде́же неду́жным исцеле́ния, той пе́рвый всех есть. Иде́же у́бо ути́шия, и утеше́ния ве́щи испо́лнени суть, о́бщая всем быва́ют, и не и́щет честь бо́льшую: егда́ же чу́до твори́ти подоба́ше, то пе́рвый дерзну́ет. И зде па́ки той боли́т и скорби́т. Почто́ же не стерпе́ ве́ру челове́ка, ниже́ вопроси́, а́ще хо́щет исцели́тися? Па́че у́бо и ко мно́зем утеше́ние зна́мение бысть. Слы́ши у́бо, коли́ко ся по́льзеваху. «И ви́деша бо вси живу́щии в Ли́де» и про́чая. Я́коже бо Христо́с в нача́ле зна́мений не истяза́ше ве́ру, та́ко и сий: во Иерусали́ме у́бо подо́бно ве́ра их пе́рвие бысть, да иду́щу Петру́ поне́ сень осени́т не́коего от них. Мно́га бо бы́ша та́мо зна́мения, зде же се пе́рвое приключа́ется. О́ва бо зна́мения о е́же друзи́х на ве́ру привлещи́ быва́ху, о́ва же и к ве́ровавшим утеше́ние.

Су́щее: Во Иопи́и же бе не́кая учени́ца и́менем Тави́фа, я́же сказа́ема глаго́лется Се́рна. Сия́ бя́ше испо́лнена благи́х дел, и ми́лостыни и́хже творя́ше. Бысть же во дни ты́я боле́вши ей умре́ти. Омы́вше же ю́, положи́ша в го́рницы.

Толкова́ние Златоу́стаго: «Я́же сказа́ема глаго́лется Се́рна» рече́. Показу́ет именова́ние: я́ко бо́рза и бодра́ бе я́коже се́рна. Мно́га бо и по смотре́нию имена́ быва́ют, я́коже мно́гажды ре́хом. Смотри́ у́бо, я́коже и до же́нскаго по́ла учени́ческое и́мя достиза́ет и досто́инство именова́ния. И не про́сто у́мре Тави́фа, но «в бо́лести бы́вши». И не призва́ше Петра́ да́же до сконча́ния ея́. И посла́вше, глаго́лаху: «Не облени́тися приити́ до них». «Омы́вше же, рече́, положи́ша в го́рницы»: ника́коже пла́че, ника́коже рыда́ние.

Су́щее: Близ же су́щи Ли́де Иопи́и. Ученицы́ же слы́шавше, я́ко Петр есть в ней, посла́ша два му́жа к нему́, моля́ще его́ не облени́тися приити́ до них. Воста́в же Петр, и́де с ни́ми. Его́же прише́дша, возведо́ша в го́рницу. И предста́ша ему́ вся вдови́цы пла́чуще, и показа́юще ри́зы и оде́жды, ели́ка творя́ше с ни́ми су́щи Се́рна.

Толкова́ние Златоу́стаго: Почто́ пребы́ша да́же у́мрет? Почто́ не призва́ша Петра́ пре́жде сего́? Недосто́йно мня́ху про́чее о таковы́х труди́ти ученики́, и от пропове́дания колеба́ти. «Мо́лят» рече́, си́речь тому́ повелева́ют про́чии ученицы́, да спасе́ние ей да́рует. Отходя́щим нам от жития́ сего́, несть бога́тства понести́: мно́гащи же ни зде пребыва́юще удержа́ти. А́ще бо на небеса́ преложи́ши я́ рука́ми убо́гих - вся души́ свое́й положи́ши: а́ще и смерть на́йдет, про́чее никто́же ти сия́ отъе́млет, но отъи́деши та́мо бога́т. Таково́е име́яше Тави́фа сокрови́ще. Сего́ ра́ди не хра́мина ту пропове́даше, ниже́ сте́ны, ниже́ ка́мение, ниже́ сто́лпие - но телеса́ вдови́ц оде́янна, и сле́зы излива́еми, и смерти бе́гство, и жи́зни наи́тие. Такова́я и мы сокро́вища устро́им себе́, таковы́я хра́мины. Си́це и Бо́га поспе́шителя и́мамы, и мы Ему́ поспе́шители бу́дем. Той бо от небытия́ в бытие́ приведе́ ни́щих, ты же приведе́ны и су́щая не оставля́еши гла́дом погуби́тися, и про́чая злострада́ния: посеща́я, утеша́я, повсю́ду воздвиза́я храм Бо́жий. Зде же показу́ется, ели́ко ми́лостыня с ве́рою твори́т, я́ко и зде́шнюю, и ве́чную хода́тает жизнь.

Су́щее: Изгна́в же вон вся Петр, и прекло́нь коле́не помоли́ся. И обра́щься к те́лу рече́: «Тави́фа, воста́ни». Она́же отве́рзе о́чи свои́, и ви́девши Петра́, се́де. Пода́в же ей ру́ку, воздви́же ю́. Призва́в же святы́я и вдови́цы, поста́ви ю́ жи́ву. Уве́дано же бысть се по всей Иопи́и, и мно́зи ве́роваша в Го́спода.

Толкова́ние Златоу́стаго: Почто́же вся изгоня́ет? Да не смути́тся слеза́ми: не вся у́бо чудеса́ во смуще́нии наро́да творя́ху, или́ па́ки во безмо́лвии. Не то́кмо же о ине́х спасе́нии попече́ние Бог творя́ше, но и о ине́х и́же бо се́нию толи́ких исцеле́ния. Ка́ко ны́не си́це мо́лится, я́ко сие́ пе́рвое ме́ртву воскреси́? Есть же, я́ко и ве́ра приходя́щим поспеша́ше. Пре́жде оживле́ние, та́же си́ла подае́тся: о́во бо глаго́лом, о́воже руко́ю. Зри, я́ко ту я́ко от сна воздви́же: пре́жде о́чи ей отве́рзе, та́же от виде́ния се́де, та́же руко́ю си́лу прия́т. И зри плод доброде́телный не на показа́ние су́ща. Сего́ ра́ди и вся изгоня́ет вон, Учи́телю подо́бяся. Возгласи́в же святы́я вдови́цы, воста́ви ю́ жи́ву рече́: о́вех бо на утеше́ние, да чу́до ви́дят и я́ко прия́ша жи́ву свою́ сестру́, о́вым же на теле́сное посеще́ние.

Коне́ц толкова́нию.

Ра́дования день и весе́лия, бра́тие. День весе́лия и спасе́ния, день просвеще́ния и освяще́ния, день ми́ра и смире́ния, день пакибытия́ и обновле́ния душ на́ших, день вои́стину ве́лий и ди́вен и све́тел. Сий пра́здник есть пра́здником, и торжество́ торжество́м. Сий есть честны́й и святы́й и светоно́сный день Воскресе́ния Христо́ва. В сий день совоздви́же нас Христо́с, пове́рженых грехо́м. В сий день сооживи́ нас умерщве́ных прегреше́ньми. В сий день рай отве́рзе, наслади́тися нам дре́ва живо́тнаго, е́же есть честна́я и животворя́щая Его́ Плоть и Кровь, ея́же ра́ди очища́емся и освяща́емся, и просвеща́емся, и обновля́емся.

Сего́ ра́ди молю́ся вам, да искуша́ет всяк себе́ бра́тие, и та́ко Те́лу честно́му да причаща́ется, и от Кро́ви Его́ да пие́т. Яды́й бо и пия́ недосто́йне - грех себе́ яст и пие́т, не разсужда́я Те́ла и Кро́ве Го́спода на́шего Иису́са Христа́.

Оба́чеже кто изрече́т си́лы Госпо́дня, слы́шаны сотвори́т вся хвалы́ Его́? Кто ли дово́лен есть пове́дати и показа́ти и сказа́ти досто́йно дне сего́ благода́ть, и воспе́ти, и удиви́тися сего́ си́ле и вели́чию, я́ко неиспы́танны судбы́ Бо́га на́шего, и неизсле́довани путие́ Его́? Вчера́ бе́хом уны́ли, дне́сь же све́тли. Вчера́ в воздыха́нии и пла́чи, днесь же в весе́лии и ра́дости. Вчера́ в малоду́шьствии, дне́сь же во благоду́шии.

Неизглаго́ланна бо есть вои́стину бра́тие дне сего́ благода́ть, неисповеди́м есть та́йны сея́ дар, неизследи́мо есть вои́стину преумноже́ние вели́чия Бо́жия, е́же о нас любве́ и милосе́рдия Его́ исхожде́ния.

Избавле́ние бо дал есть Себе́ Христо́с о всех нас, и приве́л есть нас от сме́рти на живо́т, от тмы на свет, от рабо́ты на свобожде́ние, от вражды́ на присносу́щную любо́вь. Искупи́л есть нас от кля́твы греха́, быв нас ра́ди кля́тва, я́ко да сыновство́ восприи́мем. Да́же ктому́ не бу́дем раби́, но свобо́дни: не ктому́ же пристра́стни, но безстра́стни: не ктому́ миролю́бцы, но боголю́бцы: не ктому́ по пло́ти ходя́ще, но по ду́ху. И́бо ходя́щии по пло́ти, плотска́я му́дрствуют, а и́же по ду́ху - духо́вная.

Дал есть нам духо́вно пра́здновати, и духо́вно ходи́ти. Дал есть нам преподо́бием и пра́вдою жи́ти, любо́вию и совокупле́нием, кро́тостию и ми́ром, долготерпе́нием и благосты́нею. Освяти́л есть и просла́вил нас Ду́хом Святы́м, я́ко да обновле́нием живота́ хо́дим.

Мы же что возда́мы Го́сподеви о всех сих, и́хже дал есть нам? Что возда́мы досто́йно Бо́жиему велеле́пию и сла́ве и ца́рствию? Что возда́мы проти́вно и ра́вно премно́гому да́ру Его́ и благода́ти?

Благодари́м Го́спода, возлю́блении. Благодари́м и просла́вим, е́же нас ради ве́лию Его́ ми́лость. Благодари́м и припаде́м Го́сподеви, и поклони́мся Ему́, и принесе́м ми́ро и пе́ния я́ко да́ры, со стра́хом и благогове́нием.

Человеколюби́в бо есть и благолюби́в Влады́ка, всех прие́млет, а́ще и ма́ла и худа́ суть на́ша приноше́ния. Возлю́бим и мы бра́тие, возлюби́вшаго нас благода́тию. У́мрем о Уме́ршем нас ра́ди ту́не. По́йдем по за́поведех Его́ святы́х. Очи́стим себе́ от вся́кия скве́рны пло́ти и ду́ха. Принесе́м Бо́гу на́шему де́ла бла́га, ве́ру, любо́вь, наде́жду, терпе́ние, сокруше́ние се́рдца, умиле́ние сле́зы, со́вести очище́ние; умерщве́ние землены́х удо́в, блуда́, нечистоты́, страсти, вожделе́ния зла́го, и лихоиме́ния .

Порабо́таем Го́сподеви ра́зумом, и благосостоя́нием, и терпе́нием, и прилежа́нием. Восприи́мем в пе́рсех любо́вь и́стиннаго Бо́га и Спа́са на́шего, воспое́м Ему́ песнь но́ву, вси ку́пно воспое́м, воспле́щем рука́ми и воскли́кнем Бо́гу гла́сом весе́лия: Я́ко Госпо́дь вы́шний стра́шен, Царь ве́лий по всей земли́. Ве́лий Госпо́дь и хва́лен зело́. Ве́лий Госпо́дь, и вели́чию Его́ несть конца́. Ве́лий Госпо́дь, и ве́лия кре́пость Его́.

Упраздни́ бо и порази́ превзя́таго и гордели́ваго врага́ на́шего дия́вола, и смерть попра́, и всех воскреси́, и жизнь ве́чную нам дарова́. Вчера́ у́бо спогребо́хомся Христу́, днесь же совостае́м. Вчера́ сраспина́хомся, днесь же спрославля́емся.

Сего́ ра́ди и наслади́мся вси бра́тие благи́ми дарми́, сего́ све́тлаго и до́браго торжества́. Вни́дем ра́дующеся в ра́дость Го́спода на́шего, я́ко раби́ благоразу́мни. Ца́рие и архиере́и, кня́зи и под нача́льствами, свяще́нницы и дия́кони, мни́си и бельцы́, во́ини и прости́и, ста́рцы со ю́нотами, му́жи и жены́, бога́тии и ни́щии, раби́ же и свобо́днии, просла́вите и возвели́чите Го́спода Бо́га на́шего. И кра́сный сей день и све́тлый пра́здник воспо́йте, и удиви́теся, и почти́те и́. Пости́стеся и потруди́стеся - прииди́те ра́дующеся, приими́те пе́нязи. Ели́цы от пе́рваго часа́ де́ласте, приими́те днесь досто́йную мзду. Ели́цы по тре́тием приидо́сте, благодаря́ще и веселя́щеся пра́зднуйте днесь. Ели́цы по шесто́м постиго́сте, ничто́же сумни́теся. Укосни́вии до девя́таго, приступи́те ничто́же срамля́ющеся. Ели́цыже до пе́рваго на́десять уме́дливше постиго́сте, не убо́йтеся укосне́ния.

И сего́ ра́ди неуныва́йте, любопочита́тель есть Влады́ка, Благ есть и Ми́лостив: прие́млет после́дняго я́коже и пе́рваго. Поко́ит де́лавшаго от первонадеся́таго часа́, я́коже и от пе́рваго. И после́дняго ми́лует, и пе́рваго наслажда́ет. И сему́ дае́т, о́ному же да́рствует. И ра́зума его́ лобыза́ет, и де́ло почита́ет, и любле́ние прие́млет, и изволе́ние хва́лит, и прилежа́ние зрит, и вожделе́ние лю́бит.

Сего́ ра́ди приступи́те вси к Нему́ и просвети́теся: и пе́рвии, и сре́днии, и после́днии - вси ку́пно мзду восприими́те. Бога́тии и ни́щии, друг со дру́гом ликоству́йте. Возде́ржницы и неради́вии, день сей почти́те. Пости́вшеися и непости́вшеися, возвесели́теся днесь.

Трапе́за испо́лнь есть, никто́же да изы́дет а́лчен и лиша́емь. Вси наслади́теся бога́тыя благосты́ни, я́ко Па́сха на́ша нас ра́ди пожре́ся Христо́с. Вси почерпи́те от неистощи́маго исто́чника Спа́са и Бо́га, возвесели́теся. Вкуси́те и ви́дите я́ко благ Госпо́дь. Бог Госпо́дь, и яви́ся нам.

Никто́ же да пла́чется о нищете́, яви́ бо ся о́бщее Ца́рствие. Никто́ же да рыда́ет прегреше́ния, проще́ние бо от гро́ба возсия́. Никто́же да бои́тся сме́рти, свободи́ бо нас Спа́са на́шего смерть.

Разруши́м у́бо е́же друг на дру́га враждова́ния и злопомне́ния бра́тие, прости́м всех воскресе́нием, и рцем ненави́дящим нас: я́ко бра́тия на́ша есте́, и сих любо́вию объи́мем. Христо́с бо есть смире́ние на́ше, и́же земна́я и небе́сная смири́л есть, и совокупи́л вся соедине́нием, и средогра́дие вражде́бное разруши́в пло́тию свое́ю. Мир по́дал есть ученико́м свои́м и апо́столом. Мир оста́вил есть им, и о́неми и нас ми́ра и любве́ сы́ны сотвори́л есть. «Дерза́йте, Аз победи́х рече́ ми́ра» и миродержи́теля, поне́сшу ми грехи́ ми́ра. Спасл бо ны есть Христо́с Бог, и от а́да изба́вил. Исто́рже бо нас от наси́лования дия́воля, и от рабо́ты его́ свободи́л есть.

Огорчи́ся ад, вкуси́в честны́я и святы́я пло́ти Влады́чния, я́коже Иса́ия пророче́. Огорчи́ся ад, усре́т Тебе́ до́лу. Огорчи́ся у́бо, поне́же бо упраздни́ся. Огорчи́ся у́бо, поне́же бо пору́ган бысть. Огорчи́ся, поне́же свя́зан бысть.

Прия́т те́ло, и Бо́га усре́те. Прия́т е́же ви́де, и паде́ отню́дуже несматря́ше. Поглоти́ смерть неве́дящи, и поглоти́в, позна́ Его́же поглоти́. Поглоти́ живота́, и попра́на бысть живото́м. Поглоти́ я́ко еди́ного со все́ми, и лиши́ся со все́ми и еди́наго. Похи́ти И́ я́ко лев, но сокруши́ зу́бы своя́. Греха́ ра́ди смерть превозмо́же, но во Христе́ греха́ не обре́т, упраздни́ся ктому́. Жа́ло бо сме́рти грех, греха́ же Христо́с не сотвори́, ниже́ обре́теся лесть во усте́х Его́.

Подо́бно же вре́мя есть рещи́: «Где ти, сме́рте, жа́ло? Где ти, а́де, побе́да?». Воскре́се Христо́с, ты же низве́ржеся. Воскре́се Христо́с, и ра́дуются а́нгели. Воскре́се Христо́с, и падо́ша бе́сове. Воскре́се Христо́с, и живо́т пребыва́ет. Воскре́се Христо́с, и ме́ртвии совоздвиго́шася. Воскре́се Христо́с, и от тли изба́вихомся. Воскре́се Христо́с, и от кля́твы избы́хом. Воскре́се Христо́с, и мы с Ним воскресо́хом. Воскре́се Христо́с, и мы оживи́хомся. Христо́с от ме́ртвых воскре́се, нача́ток уме́ршим бысть. Тому́ сла́ва и держа́ва и поклоне́ние и велеле́пие, ны́не и при́сно и во ве́ки веко́в. Ами́нь.