Суббота шестой седмицы по Пасце

Глаго́ла Си́мон Петр: Го́споди, ка́мо и́деши? Отвеща́ ему́ Иису́с: Иде́же Аз иду́, не мо́жеши Мне ны́не после́довати. По́слежде последуеши:

Ве́лие любо́вь, и огня́ самого́ зе́льнейше, и на са́мое восхо́дит не́бо: и ничто́же и возбране́ние есть, е́же возбраня́ет зе́льное устремле́ние или́ удержа́ти возмо́же. Тепле́йший у́бо Петр слы́шав, «Я́ко иде́же Аз иду́, вы не мо́жете приити́», что рече́? «Го́споди, ка́мо и́деши?». Сие́ же глаго́лаше, не си́це уве́дети хотя́, я́коже после́довати жела́я. Я́вствене у́бо рещи́, я́ко «иду́» не сме́яше еще́, рече́ же: «Ка́мо и́деши». Христо́с не ко глаго́лом, но к мы́сли отвещава́ше, я́ко бо сие́ хотя́ше и́миже Христо́с рече́ я́вствено. Что бо рече́? «Иде́же Аз иду́, не мо́жеши Мне ны́не после́довати». Зри́ши ли, я́ко е́же после́довати жела́ше, сего́ ра́ди вопраша́ет? Слы́шав же «я́ко после́дуеши по́сле», ниже́ си́це жела́ние держа́ше, а́ще и бла́ги наде́жди прия́т, но си́це тщи́тся я́ко рещи́: «Сего́ ли ра́ди не могу́ Тебе́ ны́не после́довати? Ду́шу мою́ за Тебе́ положу́». Поне́же бо оттрясе́ страх преда́ния, и при́сных яви́ся и сей, и сый со дерзнове́нием собо́ю про́чее вопраша́ет, ины́м молча́щым. Что глаго́леши, Пе́тре? Рече́ я́ко «не мо́жеши», и ты ли глаго́леши я́ко «могу́»? Те́мже у́бо уве́даеши иску́сом саме́м я́ко «не мо́жеши», я́ко ничто́же твоя́ есть любо́вь, не су́щи свы́ше по́мощи. Отню́ду же я́вствено, я́ко и паде́ние о́но промышля́я о нем попусти́. Хотя́ше бо и нра́вы наказа́ти, поне́же бо пребыва́ше в зе́льности, сам у́бо не вложи́ его́, ниже́ пори́ну на преда́ние, оста́ви же пу́ста я́ко бы уве́дети свою́ не́мощь. Рече́ я́ко подоба́ет преда́тися, глаго́лет: «Ми́лостив Ты, не бу́дет тебе́ сие́». Запреще́н бысть, и не наказа́ся. И па́ки хотя́щу Христу́ омы́ти ему́ но́зе, рече́: «Не сотвори́ши сие́ ввек». Слы́шавши па́ки: «Не мо́жеши Мне после́довати ны́не», глаго́лет: «А́ще и вси отве́ргутся, аз не отве́ргуся». Поне́же у́бо ле́по бе ему́ в го́рдость взя́тися поуча́ющуся, сопроти́в глаго́лати ему́, наказу́ет про́чее ему́ не сопроти́в па́дати. Сие́ у́бо и Лука́, гада́тельствуя ему́ рече́ ре́кшу: «И Аз моли́хся о тебе́, да не оскуде́ет ве́ра твоя́», си́речь, да не в коне́ц поги́бнеши. Все́ми смиреному́дрию науча́я и челове́ческое облича́я естество́, ничто́же само́ о себе́ су́ще.

Поне́же бо мно́гая любо́вь сопротивосло́вна его́ сотвори́ла есть, уцеломудря́ет про́чее его́, да не и в су́щых по сих сие́ постра́жет, егда́ вселе́нныя строе́ние прии́мет: но воспомина́я и́хже пострада́, познава́ет себе́. И зри зе́льность паде́ния. Не еди́ною бо и два́жды сие́ пострада́, но си́це изступи́, я́ко в ма́ле вре́мени три́жды рещи́ глаго́л отверже́ния: да навы́кнеши, зане́ не си́це любля́ше я́коже любля́шеся. Но оба́че си́це па́дшу, рече́: «Лю́биши ли Мя мно́жае сих?». Си́це не от истуже́ния, но е́же обнажи́тися су́щия свы́ше по́мощи бысть. Любо́вь похваля́ет Петро́ву, а е́же от нея́ ражда́емое сопротивосло́вия - пресеца́ет. А́ще бо лю́биши, до́лжен еси́ люби́мому покаря́тися. Рече́ тебе́ и су́щим с тобо́ю: «Не мо́жеши». Что спира́ешися? Не ве́си ли, что есть изрече́ние Бо́жие? Поне́же всем уве́дети не хо́щеши, я́ко не мо́щно не бы́ти е́же глаго́лю, во отверже́нии сие́ уве́си: и́бо мно́го тебе́ сие́ неве́рно бы́ти явля́шеся. Сие́ бо ниже́ ве́дел еси́, о́ного же све́тлость сам име́л еси́ в души́ твое́й: но оба́че быва́ше неча́емое.

«Ду́шу мою́ за Тебе́ положу́». Поне́же бо слы́ша, я́ко бо́льшу сея́ любо́вь никто́же име́ет, наскочи́ а́бие, не сыт сый и крае́в дости́гнути хотя́. Но Христо́с, показу́я, я́ко Его́ еди́ного есть сие́ со госпо́дьством обеща́тися, рече́: «Пре́жде але́ктору возгласи́ти», си́речь ны́не: ниже́ бо бе мно́го растоя́ние. В безго́дии бо ноще́й бесе́доваше, и пе́рвая, и втора́я стра́жа бе прише́дши.

«Да не смуща́ется ва́ше се́рдце». И́бо ле́по бе им слы́шавшым смуща́тися. А́ще бо верхо́вный, и си́це распале́н, пре́жде але́ктора три́жды отве́ржется, вели́ко не́кое ча́яние им и обстоя́ние страда́ти ле́по бе, дово́льно и адама́нтския преврати́ти душа́. Поне́же бо сия́ помышля́ющым, ле́по бе им изступи́ти. Зри, ка́ко их утеша́ет глаго́ля: «Да не смуща́ется ва́ше се́рдце». Сим о́бразом Божества́ своего́ си́лу показу́я: зане́ я́же в души́ имя́ху, сия́ весть на среду́ приводи́ти.

«Ве́руйте в Бо́га и в Мене́ ве́руйте», си́речь всем преити́ подоба́ет лю́тым, я́же бо в Мя ве́ра и в Роди́теля всех си́льнейша есть находя́щих и ничто́же оста́вит облада́ти от ско́рбных. Та́же рече́: «В дому́ Отца́ Моего́ оби́тели мно́зи суть». Я́коже Петра́ скорбя́ща утеша́ет глаго́ля: «После́дуеши же по сих», си́це и сим сию́ наде́жду явля́ет. Да́же бо не вознепщу́ют о́ному еди́ному обеща́ние да́тися, рече́: «В дому́ Отца́ Моего́ оби́тели мно́зи суть. А́ще ни рекл бы вам: Иду́ угото́вати ме́сто вам», си́речь, я́ко и вас он лик прии́мет, и́же и Петра́, изоби́лие бо та́мо мно́го оби́тели, и несть рещи́ я́ко угото́вания тре́бует. Поне́же бо рече́: «Не мо́жете мне ны́не после́довати», да не вознепщу́ют в коне́ц отсещи́ся, сие́ наведе́: «Да иде́же есмь Аз, и вы бу́дете та́мо». Толи́ко о ве́щи сей творю́ тща́ние, я́ко у́же сего́ был бых, а́ще не дре́вле вам угото́валося бы: показу́я, я́ко зело́ им дерза́ти наде́ятися.

Та́же, да не возмни́тся я́коже прохлажа́я их глаго́лати, но ве́руют я́ко сие́ есть, наво́дит: «И иде́же иду́ ве́сте, и путь ве́сте». Дая́ше бо им указа́ние, е́же не про́сте сим рещи́ся. Сие́ же глаго́лет, поне́же све́дяше их ду́шу, сие́ про́чее взыску́ющу уве́дети.

Петр бо не о е́же уве́дети, но я́ко бы после́довати глаго́лаше. Но поне́же запреще́н бысть он и, е́же прене́мощно вознепщева́ся бы́ти, мо́щно изъяви́ - мо́щно же я́вльшеся в вожделе́ние их приведе́, е́же разуме́ти со опасе́нием сие́. Сего́ ра́ди рече́: «И путь ве́сте». Я́коже бо рек: «Отве́ржешися Мене́», ни еди́ному же ничто́же провеща́вшу, и я́же в се́рдцы испыту́я, глаго́лаше: «Не смуща́йтеся», си́це и зде рек: «Я́ко ве́сте», вожделе́ние явля́ше су́щее в се́рдцы их, и Сам им дае́т вину́ е́же вопроси́ти. А е́же к»а́мо и́деши», Петр у́бо от любле́ния рече́. Фома́ же от боя́зни глаго́лет: «Го́споди, не ве́мы ка́мо и́деши». Ме́сто не ве́мы рече́, и та́мо водя́щий путь ка́мо све́мы? И зри с коли́кою боя́знию: не рече́ бо «рцы нам ме́сто», но «не ве́мы ка́мо и́деши». Сие́ бо дре́вле вси боле́зноваху. А́ще бо иуде́и взы́сковаху слы́шаще, а́ще и свободи́тися Его́ хотя́ще, мно́го па́че и́же никогда́ же Его́ разлучи́вшеся хотя́ще, уве́дети хотя́ху. Боя́хужеся Его́ вопросити, вопраша́ют же оба́че от мно́гаго жела́ния и боя́зни. Что у́бо Госпо́дь?

«Аз есмь путь и и́стинна и живо́т. Никто́же мо́жет приити́ ко Отцу́, то́кмо Мно́ю». Что у́бо не а́бие вопроше́н от Петра́ «ка́мо и́деши?», рече́: «Аз ко Отцу́ иду́, но вы не мо́жете ны́не после́довати», но толи́ких вложи́ слове́с обхоже́ние, вопроше́н быв и отве́ты сложи́в? Иуде́ом у́бо в ле́поту сие́ не глаго́лаше. Сим же что ра́ди? Рече́ у́бо и сим, и иуде́ом, я́ко от Бо́га изы́де, и к Бо́гу и́дет. Па́ки же сие́ я́вственнейше не́жели пе́рвее рече́. Но иуде́ом у́бо в ле́поту не рече́. А́ще бо рекл бы, «я́ко не мо́жете ко Отцу́ приити́», а́бие у́бо киче́ние вещь вознепщева́ли бы. Ны́не же сокры́в, в боя́знь их вложи́. Ученико́м же что ра́ди си́це рече́ и Петру́? Ве́дяше его́ мно́гое усе́рдие и я́ко сего́ ра́ди належа́ше у́бо стужа́я, я́ко бы та́мо его́ отвести́. Испра́вив у́бо е́же хотя́ше неизъявле́нием и тем е́же кры́ти сло́во, па́ки сие́ открыва́ет. Рек бо, «я́ко иде́же есмь никто́же мо́жет приити́», наведе́: «В дому́ Отца́ Моего́ оби́тели мно́зи суть. Ко Отцу́ же никто́же мо́жет приити́ ра́зве Мно́ю». Сие́ не хотя́ше им в нача́ле рещи́, я́ко бы не во мно́жайшую печа́ль вложи́ти: егда́ же у́бо их ути́ши, тогда́ глаго́лет. От запреще́ния бо Петро́ва мно́гое печа́ли изгна́, в страх впа́дше, да не когда́ та́яже ему́ услы́шат, спря́товахуся па́че.

«Аз есмь путь», си́речь я́ко Мно́ю ходи́те. А е́же «и и́стинна и живо́т», я́ко вся́чески сия́ бу́дут: ничто́же бо у Мене́ ло́жно. Живо́т же, я́ко ниже́ сама́ смерть вам возбрани́ти мо́жет приити́. А́ще бо Аз есмь путь, не востре́буете водя́щаго. А́ще же и и́стинна, не ложь глаго́лемая. А́ще и живо́т - а́ще и у́мрете получи́ти рече́нных. Е́же у́бо пути́ - и разуме́ша, и испове́даша, про́чая же не ве́дяху. Не у́бо сме́яху рещи́ я́же не ве́дяху, но оба́че мно́го от пути́ утеше́ние прия́ша. А́ще бо Аз Госпо́дь рече́ есмь е́же ко Отцу́ привести́, вся́чески прииде́те та́мо. Ниже́ бо есть ины́м приити́ путе́м. Рек у́бо «никто́же мо́жет приити́ ко Мне, а́ще не Оте́ц привлече́т его́». Па́ки рече́: «А́ще Аз вознесу́ся от земли́, всех привлеку́ к Себе́». И я́ко «никто́же мо́жет приити́ ко Отцу, то́кмо Мно́ю». Везде́ изравня́ет Себе́ Роди́телю. Ка́ко же рек я́ко «иде́же иду́ ве́сте, и путь ве́сте»? Наведе́: «А́ще Мене́ ве́дели бы́сте, и Отца́ Моего́ ве́дели у́бо бы́сте. И от ны́не позна́ете Его́ и ви́десте Его́». Не сопротивосло́вя, ви́дяху бо Его́, не си́це же я́коже подоба́ше. Бо́га бо ве́дяху, Отца́ же не у́. По́сле бо Дух прише́д, всяк в них устро́и ра́зум. А е́же глаго́лет, таково́ есть: А́ще ве́дали бы́сте Мое́ существо́ и досто́инство - и О́тче ве́дели бы́сте. «И отны́не позна́ете Его́ и ви́дите Его́», - о́во у́бо бу́дущаго, о́воже настоя́щаго, - си́речь Мно́ю. Зре́ние же глаго́лет, е́же в мы́сли позна́ние. Ви́димых у́бо мо́жем и зре́ти и не ви́дети. Разумева́емых же, не мо́жем и разумева́ти и не ве́дити . Сего́ ра́ди рече́ «и ви́дите Его́», я́коже рече́ яви́ся а́нгелом: а́ще и не то существо́ яви́ся, но оба́че рече́ яви́тися я́коже оне́м уви́дети мо́щно: показу́я, я́ко Его́ ви́девый, Ро́ждьшаго ви́дел есть. Ви́деша же Его́ не наги́м существо́м, но пло́тию обложе́на. Весть же и́нде и зре́ние глаго́лати ра́зум, я́ко егда́ глаго́лет: «Блаже́ни чи́стии се́рдцем, я́ко ти Бо́га у́зрят». Чи́стых же не и́же блуда́ свобожде́нных, но и́же всех грехо́в рече́: всяк бо грех скве́рну влага́ет души́.

Нравоуче́ние се́дмьдесять тре́тие: О ми́лостыни, и я́ко лу́чше не ми́ловати не́жели от непра́вды, и я́ко подоба́ет уклони́тися от зла и си́це твори́ти бла́го, и я́ко ничто́же есть е́же не умове́нными рука́ми причаща́тися:

Вся у́бо да де́йствуем, я́ко бы отмы́ти скве́рну. Омыва́ет же пре́жде ба́ня , по́слеже и и́ни пути́ мно́зи и всяче́стии. Человеколюби́в бо Сый Бог, и по сих даде́ нам пути́ разли́чны свобожде́ния, и́хже пе́рвый всех есть ми́лостыня. Ми́лостынями бо и ве́рами очища́ются греси́. Ми́лостыню же не ю́же от непра́вды глаго́лю: сие́ бо не ми́лостыня, но лю́тость и безчелове́чие. Ка́я бо по́льза совлещи́ ина́го и облещи́ друга́го? От ми́лости бо ве́щи начина́тися подоба́ет, сие́ же безчелове́чие, а́ще бо и вся я́же от ины́х да́мы, нико́е же приобре́тение нам. Показу́ет [то] Закхе́й, и́же тогда́ рече́ уми́лостивити Бо́га, дав от я́тых че́тверо сугу́бицею. Мы же тма́ми похища́юще и ма́ла даю́ще, непщу́ем ми́лостива твори́ти Бо́га, а́ще и наипа́че Его́ прогне́ваем. Рцы бо мне, а́ще у́бо осла́ ме́ртва и согни́вша от распу́тия и у́лиц, привле́к на же́ртвеник возне́сл бы еси́: еда́ у́бо не вси посмея́либыся тебе́, я́ко сту́дну и скве́рну?

Что у́бо, а́ще обличу́ я́ко я́же от хище́ния скве́рнейша сего́? Кото́раго получи́м отве́та? Да положи́м бо не́кий сосу́д бы́ти от хище́ния: не осла́ ли уме́рша па́че смердя́ше? Хо́щеши ли уве́дети, коли́ко греха́ согни́тие есть? Услы́ши проро́ка глаго́люща: «Возсмерде́ша и согни́шася ра́ны моя́». Ты же глаго́лы у́бо Бо́га мо́лиши забы́ти, и́хже твори́ши злых, сам же и́миже твори́ши похища́я и устраша́еши помина́ти всегда́, наложи́в свой грех на же́ртвеник. Ны́не же не сие́ есть то́кмо согреше́ние, но и е́же сего́ люте́йше, я́ко святы́х оскверня́еши душа́. Сие́ бо ка́мень есть и освяща́ется, о́не же - выну Сама́го но́сят Христа́. И сме́еши ли та́мо посыла́ти от таковы́я нечистоты́? Ни, рече́, не сия́ име́ния, но и́на? Смех сия́ и бляде́ния. Не ве́си ли, я́ко а́ще и во мно́го мно́жество име́ний непра́вды впаде́т ка́пля - вся оскверня́ются. И я́коже и во исто́чник чист, гной кто вверг, - всего́ его́ нечи́ста соде́ла. Та́ко и в бога́тстве, лихоима́ние вше́дше, - вся отдыха́ти твори́т су́щаго та́мо злово́ния. Та́же, ру́це у́бо умыва́ем в це́рковь входя́ще, се́рдце же не ктому́. Еда́ бо ру́це глас испуща́ют? Душа́ произно́сит глаго́лы, на о́ну Бог взира́ет: ничто́же тре́ба есть теле́сныя чистоты́, о́ной оскверне́ной. Ка́я бо по́льза, а́ще я́же от вне у́бо ру́це измыва́еши,а вну́треняя нечистоты́ име́еши? Е́же бо лю́то и вся развраща́юще сие́ есть, зане́ ма́лых боя́щеся, вели́ких пренебреже́м. Е́же бо неумове́нными рука́ми моли́тися, ничто́же есть, а е́же не умове́нною мы́слию, сие́ есть всех злых после́днее. Сего́ ра́ди и иуде́ом о таковы́х нечисто́тах упражня́ющымся, что рече́? «Измы́й от зло́бы ду́шу свою́ и се́рдце твое́». Доко́ле бу́дут ти по́мысли трудо́в твои́х?». Да измыва́ем у́бо не ти́ною, но чи́стою водо́ю: ми́лостынею, а не лихоима́нием. Пре́жде свободи́ся е́же похища́ти, и тогда́ покажи́ ми́лостыню. Уклони́ся от зла и сотвори́ бла́го. Уста́ви ру́це от лихоима́ния, и та́ко их на ми́лостыню приведи́. А́ще же те́ми же и ни́щых совлача́ем, а́ще и не от оне́х дае́мыми облече́м, но ниже́ си́це избежи́м му́ки. Вина́ бо измоле́ния - вся́кого согреше́ния вина́ быва́ет . Того́ бо е́же си́це ми́ловати, е́же не ми́ловати лу́чше [н]есть . Поне́же и Ка́ин лу́чши бя́ше, ниже́ отню́д прине́с. А́ще же и́же ме́ншая прине́с, Бо́га раздражи́л есть - и́же чужа́я дая́, ка́ко не раздража́ет? Аз тебе́ рех рече́ не похища́ти, и ты ли мя от них почита́еши? Что непщу́еши ли, я́ко услажа́юся си́ми? Те́мже у́бо рече́т к тебе́: «Вознепщева́л еси́ беззако́ние, я́ко бу́ду тебе́ подо́бен. Обличу́ тя и предста́влю пред лице́м твои́м грехи́ твоя́». Но не бу́ди ни еди́ному же сего́ услы́шати гла́са, но ми́лостыню чи́сту соде́лавшым и све́тлыя свеща́ име́ющим, си́це в черто́г вни́ти благода́тию и человеколю́бием Го́спода на́шего Иису́са Христа́, И́мже и с Ни́мже Отцу́ сла́ва со Святы́м Ду́хом, ны́не и при́сно и во ве́ки веко́в. Ами́нь.

Глаго́ла Ему́ Фили́пп: «Го́споди, покажи́ нам Отца́ и довле́ет нам». Глаго́ла ему́ Иису́с: «Толи́ко вре́мя с ва́ми есмь, и не позна́л ли еси́ Мене́, Фили́ппе? Ви́девый Мене́, ви́де Отца́».

Проро́к у́бо глаго́лаше ко иуде́ом: «Зре́ние блудни́цы бысть тебе́, обесту́дился еси́ ко всем» - я́ко уподо́бижеся не о́ному гра́ду пра́ведно то́кмо сия́ рещи́, но и безсту́дне ко и́стинне сопротивозря́щым. Фили́ппу бо ко Христу́ ре́кшу: «Покажи́ нам Отца́», рече́: «Толи́ко вре́мя с ва́ми есмь, и не позна́л ли еси́ Мене́, Фили́ппе?». И оба́че не́цыи суть и по глаго́лех сих отделя́юще Сы́на от Роди́теля. И́бо ко́е бо́льша сего́ и́щеши приближе́ние? Не́цыи бо от рече́ния сего́ и в Саве́лиев неду́г впадо́ша. Но и сих, и о́нех оста́вльше мы, а́ки по ме́ре законопреступа́ющих, да уви́дим рече́нных опа́ство. «Толи́ко вре́мя с ва́ми есмь и не позна́л ли еси́ Мене́, Фили́ппе?» рече́. Что бо? Ты ли еси́ Оте́ц, Его́же взыску́ю? Ни, рече́. Сего́ ра́ди ниже́ рече́ «не позна́л еси́ Его́», но «не позна́л еси́ Мене́»: ничто́же и́но изъявля́я, ра́зве я́ко ничто́же и́но есть Сын, или́ сие́ е́же есть Оте́ц пребы́в е́же бы́ти Сын. Отку́ду же на сие́ прии́де Фили́пп? Глаго́лаше: «А́ще Мене́ ви́дели бы́сте, и Отца́ Моего́ ве́дели у́бо бы́сте». И иуде́ом мно́жицею рече́ сие́. Поне́же у́бо вопроси́ Петр Его́ мно́жицею и иуде́и: «Кто есть Оте́ц?», вопроси́ Его́ и Фома́. И ни еди́н же ничто́же навы́че я́вствено, но еще́ не ве́дяше глаго́лемая. Да не возмни́тся тя́жек бы́ти Фили́пп и стужа́ти ему́ со иуде́и, вопроша́я Его́ «покажи́ нам Отца́», наведе́: «И довле́ет нам»: ничто́же мно́жае взыску́ем. И́бо и Христо́с глаго́лаше: «А́ще Мене́ ви́дели бы́сте, и Отца́ Моего́ ве́дели у́бо бы́сте». И Собо́ю Отца́ явля́ше. Он же сопроти́в обрати́ чин и рече́: «Отца́ покажи́, я́ко Его́ ве́дый опа́сне». Но не прие́млет Его́ Христо́с, но на путь поставля́ет, Собо́ю Отца́ уве́дети увеща́. Той же теле́сными очесы́ си́ми хотя́ше уве́дети.

Не́гли о проро́цех слы́ша я́ко «ви́деша Бо́га». Но схожде́ние бе о́на, о́ Фили́ппе. Сего́ ра́ди Христо́с глаго́лаше: «Бо́га никто́же ви́де никогда́ же». И па́ки: «Всяк слы́шавый Бо́га и уви́дев, прихо́дит ко Мне». «Ниже́ гла́са Его́ слы́шасте, ниже́ вид Его́ узре́сте». И в дре́внем: «Никто́же у́зрит лице́ Мое́ и жив бу́дет». Что у́бо Христо́с? Зело́ запрети́тельне: «Толи́ко вре́мя с ва́ми есмь, и не позна́л ли еси́ Мене́, Фили́ппе?». И не рече́ «ви́дел еси́ Мене́», но «не позна́л Мя еси́». Еда бо Тебе хощу уведети? Отца уви́дети ищу́ ны́не, Ты же ми глаго́леши: «Не позна́л ли еси́ мене́?». Ко́е у́бо после́дование име́ет сие́? Мно́го у́бо, поне́же бо сие́ есть е́же есть Оте́ц пребыва́я Сын, в ле́поту о Себе́ показу́ет Роди́теля. Та́же, разделя́я ипоста́си, рече́: «Ви́девый Мене́, ви́де Отца́», да не кто рече́т, я́ко Той Оте́ц [и] Той Сын. А́ще бо Той был бы Оте́ц, не бы у́бо рекл: «Ви́девый Мене́, О́ного ви́дел есть». Ка́ко же не рече́ ему́: «Невозмо́жная про́сиши и не по челове́ку, Мне бо еди́ному сие́ мо́щно»? Поне́же у́бо рече́ «довле́ет нам», я́ко Его́ ви́дев – показу́ет, я́ко ниже́ Его́ ви́де. Вои́стинну бо и О́ного ви́дел бы, а́ще и Сего́ возмо́гл бы. Те́мже глаго́лаше: «Ви́девый Мене́, ви́де Отца́. А́ще кто Мене́ ви́де, и О́ного у́зрит. А е́же глаго́лет, таково́ есть: я́ко ниже́ Мене́, ниже́ О́ного мо́щно есть уви́дети. Фили́пп бо е́же зре́ние иска́ше позна́ние. И поне́же у́бо Его́ ви́дети непщева́ше, хотя́ше же и Отца́ си́це уви́дети. Показу́ет, я́ко ниже́ Его́ ви́де. А́ще же глаго́лет кто зре́ние зде ра́зум, ниже́ сие́ сопроти́во глаго́лю: «Позна́вый бо Мене́ рече́, позна́ Отца́». Но не рече́ сие́, но единосу́щное преста́вити хотя́ рече́: «И́же существо́ Мое́ ве́дый, весть и О́тчее». «И что, рече́ , сие́? И́бо и́же тварь ве́дый, весть и Бо́га». И́бо [тварь] вси ве́дят и зрят, Бо́га же не ве́дят вси. И́нако же, да уви́дим что Фили́пп и́щет уви́дети. Еда́ прему́дрость О́тчу? Еда́ благосты́ню? Ни, но е́же что есть Бог то́жде существо́. К сему́ у́бо отвещава́ет Христо́с: «Ви́девый Мене́». Тварь же ве́дый, не и существо́ Бо́жие весть. «А́ще кто ви́де Мене́, Отца́ Моего́ ве́де» рече́. А́ще же ина́го существа́ был бы, не бы сие́ рекл. Да́же и дебеле́йшаго косну́ся словеси́: никто́же зла́то не ве́дый, во сребре́ зла́та существо́ уви́дети мо́жет - не и́но бо ины́м явля́ется естество́. Сего́ ра́ди и до́бре запрети́ рек: «Толи́ко вре́мя с ва́ми есмь, и не позна́л ли еси́ Мене́, Фили́ппе?». Толи́каго наслади́вся уче́ния, ви́дел еси́ зна́мения со госпо́дьством и вся я́же Божества́ бе́ша сво́йствена, и я́же Оте́ць Еди́н де́лает: прегреше́ния разреша́ема, неизрече́нная на среду́ приводи́ма, смерть отходя́щу, соде́тельство о земли́ быва́емо – «и не позна́л Мя еси́, Фили́ппе?». Поне́же бо пло́тию обложе́н бысть, сего́ ра́ди рече́: «Не позна́л Мя еси́». Ви́дел ли еси́ Отца́? Не ищи́ мно́жае уви́дети, во О́ном бо Мене́ ви́дел еси́. А́ще ви́дел еси́ Мене́, ничто́же испыту́й: и́бо во Мне О́ного позна́л еси́.

«Не ве́руеши ли, я́ко Аз во Отцы́?», си́речь во о́ном существе́ явля́юся. «Глаго́лы я́же Аз глаго́лю, о Себе́ не глаго́лю». Ви́дел ли еси́ приближе́ния вели́чество и еди́наго существа́ указа́ние? «Оте́ц во Мне пребыва́яй, Той твори́т дела́». Ка́ко от глаго́л начина́я, на дела́ прии́де? После́довательно бе рещи́: Той глаго́лет глаго́лы. Но двоя́ полага́ет зде, о уче́ниих и зна́мениих. Или́ поне́же и глаго́лы дела́ бе́ша. Ка́ко у́бо Той твори́т и у́бо и́нде рече́: «А́ще не творю́ дела́ Отца́ Моего́, не ве́руйте Мне»? Ка́ко у́бо зде Отца́ рече́ твори́ти? Сие́ и́стое явля́я, я́ко ничто́же посреди́ Отца́ и Сы́на. А е́же глаго́лет, таково́ есть: Не у́бо и́нако сотвори́л есть Оте́ць, а и́нако Аз. И у́бо и́нде, и Сам оте́ц де́лает: «Оте́ц бо мой досе́ле де́лает, и Аз де́лаю». Та́мо у́бо непреме́нное дел, зде же то́жде показу́я. А́ще гото́вое рече́ний изъявле́ние смире́ние явля́ет, да не чуди́шися. Пе́рвее бо рек «не ве́руеши», тогда́ сие́ провеща́, показу́я о е́же в ве́ру его́ привести́, си́це вообрази́ глаго́лы: се́рдца бо их прихожда́ше. «Ве́руйте, я́ко Аз во Отцы́, и Оте́ц во Мне». Подоба́ше у́бо вам слы́шащым Отца́ и Сы́на, ничто́же и́но иска́ти во представле́ние е́же по существу́ сро́дства.

А́ще же вам не довле́ет сие́ ко е́же показа́ти единоче́стное и единосу́щное, поне́же от дел научи́теся. И е́же «ви́девый Мене́, ви́де Отца́ Моего́», а́ще от дел глаго́лал бы, не бы по́сле рекл: «А́ще же ни, за дела́ ве́руйте Ми». Та́же, показу́я, я́ко сия́ мо́жет то́кмо, но и́на мно́го бо́льша сих, со премно́жеством сия́ полага́ет. Не глаго́лет бо, я́ко бо́льша сих могу́ сотвори́ти, но е́же мно́го чу́днейше бе, и ины́м да́ти могу́ рече́ и бо́льша сотвори́ти сих: «Ами́нь бо глаго́лю вам, я́ко ве́руяй в Мя, дела́ я́же творю́ сотвори́т, и бо́льша сих сотвори́т, я́ко ко Отцу́ Моему́ гряду́», си́речь ва́ша есть е́же чудоде́йствовати: Аз бо отхожу́. Та́же, поне́же возвести́ е́же сло́во хотя́ше, рече́: «Я́ко е́же а́ще про́сите во и́мя Мое́, сотворю́ сие́, да во мне просла́вится Оте́ц».

Зри́ши ли, ка́ко па́ки Сам твори́т сие́? «Сотворю́ бо рече́ Аз», и не рече́ «умолю́ Отца́», но «да просла́вится Оте́ц». И у́бо и́нде глаго́лаше: «Бог просла́вит Его́ в Себе́», зде же Сам просла́вит Отца́. Егда́ бо Сын явля́ется ве́лия моги́й, прославля́ется Роди́вый. Что же ли есть «во и́мя Мое́»? е́же апо́столи глаго́лаху: «Во и́мя Иису́с Христо́во, воста́ни и ходи́». Вся бо зна́мения я́же сотвори́ша, Сам де́йствоваше. «И рука́ Госпо́дня бе с ни́ми» - «Аз сотворю́» рече́.

Зри́ши ли госпо́дьство? Я́же ины́ми Сам твори́т, а я́же ли Собо́ю не вознемога́ет, но Отца́ поспешеству́ет. И кто у́бо сия́ рече́: Что ра́ди второ́е сие́ полага́ет? Удержа́я Свое́ сло́во и показу́я, я́ко пе́рвая схожде́ния бе́ша, а е́же «ко Отцу́ иду́», си́речь не погиба́ю, но во свое́м досто́инстве пребыва́ю и на небесе́х есмь - сия́ же вся утеша́я их глаго́лаше. Поне́же бо ле́по бе им, не у́ о воскресе́нии ве́дящым словеса́, помышля́ти что се́товно - ины́ми обеща́ет такова́ дава́ти им, везде́ исцеля́я их и показу́я, я́ко пребыва́ет вы́ну, и не пребыва́ет то́кмо, но и бо́льшую показу́ет си́лу.

Нравоуче́ние седмьдесять четвертое: Я́ко доброде́тель духо́вная же́ртва есть, и я́ко сребролю́бие от тщесла́вия есть, и я́ко три есть вожделе́ние: есте́ственое, ну́жное и посре́днее:

Да после́дуем у́бо Ему́ и да во́змем крест. А́ще бо не близ есть гоне́ние, но ины́я сме́рти вре́мя. «Умертви́те бо рече́ у́ды ва́ша су́щая на земли́». Да погаси́м у́бо вожделе́ние, да убие́м я́рость, да отъи́мем за́висть. Сие́ есть же́ртва жи́ва: не в пе́пел сия́ же́ртва скончава́ется, ниже́ в дым разлива́ется, ниже́ дров тре́бует, и огня́, и ножа́. Име́ет бо и огнь и ножь, Ду́ха Свята́го. Сим де́йствуя Ноже́м, отсеца́й от се́рдца изли́шнее и чу́ждее, отверза́й заткнове́ние слу́ха. Неду́ги бо и лука́выя вожделе́ния загража́ти обы́кша словеси́ вхо́да. И́бо име́ний вожделе́ние приложи́вшеся, не попуща́ет слы́шати е́же о ми́лостыни сло́во. И за́висть прише́дши, прегражда́ет е́же о любви́ уче́ние. И ин неду́г впад, па́ки лени́вейшую устра́яет ко всем. Да отъи́мем у́бо лука́вая вожделе́ния. И́бо довле́ет восхоте́ти - и вся погасо́ша. Не у́бо да сие́ ве́дим, я́ко томи́тельно име́ний вожделе́ние, но я́ко ле́ности на́шия есть томи́тельство. Мно́зи у́бо ниже́ я́ко есть сре́бреница ве́дети глаго́лют: несть бо есте́ствено вожделе́ние сие́. Есте́ственая бо, испе́рва и изнача́ла изве́ржени бы́ша. Зла́то же и сребро́, и до мно́гаго вре́мени, ниже́ я́ко когда́ есть зна́емо бе. Отку́ду у́бо возрасте́ вожделе́ние сие́? От тщесла́вия и ле́ности после́дния. О вожделе́нии бо, о́ви у́бо суть ну́жны, о́виже есте́ствени, о́ви же посре́дне сих. Яково́ что глаго́лю? Ели́цы растлева́ют несоверше́нно живо́тное, сия́ есте́ствены и ну́жны суть., си́речь, е́же бра́шен, и пите́й, и е́же спа́ти. Вожделе́ние теле́с же жела́ние есте́ствено, но у́бо есть не ну́жно же: мно́зи бо ему́ преодоле́ша и не погибо́ша. Име́ний же вожделе́ние ниже́ есте́ствено, ниже́ ну́жно, но изли́шне. И а́ще хо́щем, не прии́мем его́ нача́ло. Сего́ ра́ди и Христо́с о де́встве бесе́дуя рече́: «Моги́й вмести́ти, да вмеща́ет». О име́ниих же не си́це, но что: «А́ще кто не отве́ржется всех име́ний свои́х, несть [Мене] досто́ин». Е́же бо бе удо́бно – наказова́ше, а е́же превосхо́дит мно́гих - попуща́ет произволе́нию. Что у́бо вся́кого лиша́ем себе́ отве́та? От наси́льственейшия у́бо стра́сти я́тый, не мно́гу постра́жет казнь: от немощны́я же уловле́ный, вся́кого лише́н есть отве́та. Что бо рече́м, егда́ глаго́лет: «А́лчуща Мя ви́десте, и не напита́сте»? Ко́е прии́мем отвеща́ние? Нищету́ предложи́м вся́чески? Но не́смы вдови́цы о́ноя убо́жайши, я́же две ме́дници вве́ргши, всех превзы́де. Не коли́чество бо вноше́ния истязу́ет Бог, но ме́ру изволе́ния: и сие́ же Его́ промышле́ния.

Почуди́вшеся у́бо Его́ человеколю́бию, возмо́жная да совнесе́м, да́же и в настоя́щем житии́ и в бу́дущем, мно́гаго получи́вше Бо́жия человеколю́бия, возмо́жем наслади́тися обеща́нных благи́х благода́тию и человеколю́бием Го́спода на́шего Иису́с Христа́, И́мже и с Ни́мже Отцу́ сла́ва со Святы́м Ду́хом, ны́не и при́сно и во ве́ки веко́в. Ами́нь.

Во дни о́ны, отве́рз Петр уста́, рече́: «Пои́стине разумева́ю, я́ко не на ли́ца зрит Бог: но во вся́ком язы́це боя́йся Его́ и де́лая пра́вду, прия́тен Ему́ есть. Сло́во, е́же посла́ сыно́м Изра́илевом, благовеству́я мир Иису́с Христо́м, Сей есть всем Госпо́дь».

Толкова́ние Златоу́стаго: Я́ве зна́менает Петр глаго́ля, я́ко Его́же пре́жде Бо́га боя́шеся, Корни́лие, Зако́ном и проро́ки пропове́данного, Его́же ра́ди и ми́лостыню творя́ше - Сей пои́стинне есть Бог: не бе же ему́ то́чию Сыно́вний ра́зум. А́ще обре́зан, а́ще не обре́зан - прия́т бу́дет от Бо́га, рече́, а́ще досто́ин есть. А́ще его́же от Ефио́пия ка́женика не презре́, что у́бо рече́т кто от благочести́вых и виде́ния ви́дящих? Я́коже и Па́вел глаго́лет: «Егда́ бо язы́цы не иму́ще зако́на, естество́м зако́нная творя́т». А́ще волхвы́ не презре́, ни ефио́плянина, ни разбо́йника, ни блудника́ - кольми́ па́че де́лающих пра́вду и хотя́щих спасти́ся.

Су́щее: Вы ве́сте глаго́л бы́вший по всей Иуде́и, наче́н от Галиле́и, по креще́нии, е́же пропове́да Иоа́нн, Иису́са И́же от Назаре́та, я́ко пома́за Его́ Бог Ду́хом Святы́м и си́лою, И́же прии́де благовеству́я и исцеля́я вся наси́лованныя от дия́вола, я́ко Бог бя́ше с Ним.

Толкова́ние Златоу́стаго: Поне́же излия́ Себе́ и обе́щник бысть нам кро́ви и пло́ти, та́же и́мать по естеству́ я́ко Бог: приима́ти глаго́лется ра́ди вочелове́чения. Те́мже, а́ще глаго́лется Иису́с Назоряни́н рожде́йся от Де́вы, пома́зан бысть Ду́хом Святы́м и си́лою - ничто́же и́но от сказа́ния навыко́хом, то́чию Ду́ха Свята́го осия́ние к Де́вей, и си́лы Бо́жия, е́же роди́ти Емману́ила: я́коже рожде́ное не от му́жа, но от Ду́ха Свята́го и от си́лы Бо́жия бысть.

Су́щее: И мы есмы́ свиде́теле всем, и́хже сотвори́ во стране́ иуде́йстей и во Иерусали́ме: Его́же и уби́ша пове́сивше на дре́ве, Сего́ Бог воскреси́ тре́тий день и дасть Ему́ я́ве бы́ти не всем лю́дем.

Толкова́ние Златоу́стаго: Па́ки смире́нная глаго́лет: егда́ показа́, я́ко от Бо́га по́слан бысть, тогда́ глаго́лет, я́ко убие́н бысть, да не что безме́стное вмени́ши. Ви́диши ли, ника́коже ученицы́ воскресе́ние сокрыва́ют, но с про́чими полага́юще и о́браз: Его́же уби́вше, рече́, обе́сиша на дре́ве.

Су́щее: Но свиде́телем, пре́жде нарече́нным от Бо́га нам, и́же с Ним ядо́хом и пи́хом, по воскресе́нии Его́ от ме́ртвых: и повеле́ нам пропове́дати лю́дем и засвиде́тельствовати, я́ко Той есть нарече́нный от Бо́га, Судия́ живы́м и ме́ртвым: о Сем вси проро́цы свиде́тельствуют, оставле́ние грехо́в прия́ти и́менем Его́, вся́кому ве́рующему Вонь.

Толкова́ние Златоу́стаго: И́бо Сам Влады́ка Христо́с тех избра́л есть, но и се Петр на Бо́га возглага́ет: «пре́жде нарече́нным Бо́гом» рече́. Зри, отку́ду воскресе́ние извеща́ет. Почто́ по воскресе́нии ни еди́но сотвори́ зна́мение, но яде́ и пи? Я́ко то воскресе́нию вели́ко зна́мение бе: сему́же ничто́же бо́льше зна́мение, я́ко я́сти и пи́ти.

«О сем, рече́, свиде́тельствуют вси проро́цы». И не глаго́лет , я́ко Той есть Сын Бо́жий, но, е́же страху́юще их, па́че прили́чное строе́ние е́же от проро́к приво́дит: вели́ку бо сла́ву име́яху проро́цы.

«И́же ядо́хом и пи́хом с ни́ми» рече́: но́во бо не́кое бра́шно яде́ со ученики́ Госпо́дь, а не по пе́рвому чи́ну я́же ядя́ше с ни́ми и пива́ше пре́жде воскресе́ния. Тогда́ бо по всему́ кроме́ греха́ уподо́бився нам, ядя́ше и пия́ше я́же и мы: во́лею вдасть пло́ти пи́щную потре́бу проси́ти. По воскресе́нии же не ктому́ потре́бе теле́сней яст и пие́т, но то́чию уверя́я и показу́я Свои́м ученико́м и и́хже по сему́ те́ми ве́ровати хотя́щим и́стинное естество́ теле́сное, и е́же и пострада́в во́лею, воскре́се боголе́пне, повсю́ду отгоня́я прокля́таго мне́ния и мечта́ния помышле́ние. «Се же но́вое бра́шно и питие́» нарече́, е́же по воскресе́нии бы́вшее Ему́ со ученики́ Свои́ми, а не по пе́рвому обы́чаю.

Ели́ко от проро́к глаго́лаше о отпуще́нии грехо́в, Иису́сом ре́ша сия́ бы́ти, си́це Иса́ия Того́ в лице́ приноша́я глаго́лет: «Аз есмь очища́я грехи́ и беззако́ния твоя́».

Вопро́с: Ка́ко са́ми апо́столы, от иуде́йства отступи́ша, и е́ллинство упразни́ша, и мно́ги ско́рби и беды́ претерпе́вша, и кро́ви своя́ пролия́ша, и душа́ своя́ положи́ша, о сем да су́щая от иуде́й и от е́ллин ко Христу́ приведу́т - и па́ки са́миже глаго́лют, «я́ко во вся́ком язы́це боя́йся Бо́га и творя́й пра́вду, прия́тен Ему́ есть»? И еще́: «Сла́ва и честь и мир вся́кому де́лающему благо́е, иуде́ови же и е́ллину». И а́ще та́ко есть, то ка́ко апо́стол Петр глаго́лет: «Несть о ино́м ни о еди́ном спасе́ния, и несть ина́го и́мени под небесе́м, о не́мже подоба́ет спасти́ся нам, то́кмо о Го́споде на́шем Иису́се Христе́, я́ко о Сем вси проро́цы свиде́тельствуют оставле́ние грехо́м прия́ти и́менем Его́ вся́кому ве́рующему в Него́»? Ка́ко сия́ глаго́лы умиря́тся и согла́сны бу́дут?

Отве́т: А́ще во вся́ком язы́це боя́йся Бо́га прия́тен Ему́ есть, то почто́ Корни́лия не оста́ви пребыва́ти в свое́й ве́ре, но повеле́ крести́тися во и́мя Иису́с Христо́во, а́ще и боя́шеся Бо́га, и [бе] творя́й пра́вду? И па́ки, почто́ рече́ Госпо́дь Свои́м ученико́м: «Ше́дше в весь мир, пропове́дайте Ева́нгелие всей тва́ри, крестя́ще их во и́мя Отца́ и Сы́на и Свята́го Ду́ха, и уча́ще блюсти́ вся ели́ка запове́дах вам. И и́же ве́ру име́ет крести́тся спасе́н бу́дет, а и́же не и́мет ве́ры осужде́н бу́дет»? И па́ки глаго́лет: «А́ще кто не породи́тся от воды́ и Ду́ха, не мо́жет вни́ти в Ца́рство небе́сное». То ка́ко во вся́ком язы́це боя́йся Бо́га прия́тен Ему́ есть?

Во ине́х бо язы́цех несть порожде́ния от воды́ и Ду́ха: во иуде́ох бо обре́зание, в е́ллинех же идолообеща́ние. Но е́же иуде́и возбраня́ху апо́столом крести́ти необре́заных, Петр же уви́дев от явле́ния е́же с небеси́ плащени́ца о́ноя, глаго́лаше: «я́ко во вся́ком язы́це боя́йся Бо́га и де́лая пра́вду, прия́тен Ему́ есть». Се же рече́ о су́щих пре́жде воплоще́ния Христо́ва и распя́тия и воскресе́ния Его́, боя́щихся Бо́га и де́лающих пра́вду, ли во иуде́ох, ли в язы́цех, не покланя́ющися и́долом, но и́стинному Бо́гу: я́ко Корни́лие и подо́бнии ему́ прия́тни бы́ша, стра́ха ра́ди Бо́жия и пра́вды ра́ди. Ны́не же во вся́ком язы́це боя́йся Бо́га и де́лаяй пра́вду, прия́тен ему́ есть на креще́ние. А́щели кто рече́т: еда́ кто бу́дет не име́я стра́ха Бо́жия и не творя́й пра́вды, не прия́тен ли бу́дет на креще́ние?, - таково́му рече́тся: не́мощно на креще́ние не иму́щему стра́ха Бо́жия и не творя́щему пра́вды. Егда́ то́кмо обеща́ется приити́ на креще́ние, тогда́ и страх Бо́жий име́ет и пра́вду твори́т: отрека́ет бо ся сатаны́ и всех дел его́, и обеща́ется Христу́ и всем святы́м Его́, и быва́ет боя́йся Бо́га и творя́й пра́вду. Ны́не у́бо, креще́ния ра́ди и обеща́ния благи́х дел прия́тни Ему́ суть: пре́жде же воплоще́ния Христо́ва, стра́ха ра́ди Бо́жия и пра́вды ра́ди прия́тни Ему́ бы́ша. Подо́бноже тому́ глаго́лет вели́кий апо́стол Па́вел: «Сла́ва и честь и мир вся́кому де́лающему благо́е, иуде́овиже и е́ллину». И сия́ та́кожде глаго́лет о су́щих пре́жде воплоще́ния Христо́ва де́лающих бла́га де́ла. Ны́не же по воплоще́нии Христо́ве, не тако́е, но: «Сла́ва и честь и мир, иуде́ови же и е́ллину, и вся́кому челове́ку де́лающему благо́е и ве́рующему Христо́ви, и печа́ть креще́ния Его́ прие́мшу». Я́коже глаго́лет то́йже блаже́нный Па́вел: «Ели́цы во Христа́ крести́стеся, во Христа́ облеко́стеся. Несть иуде́й, ни е́ллин: вси бо вы еди́но есте́, о Христе́ Иису́се». И па́ки: «А́ще и суть бо́гови мно́зи, госпо́дие мно́зи, но нам еди́н Бог Оте́ц, из Него́же вся, и мы в Него́, и еди́н Иису́с Христо́с, И́мже вся, и мы Тем». И ели́цы [в] пра́виле сем приложа́тся, мир на них и ми́лость. Ели́цы же супроти́вно сему́ му́дрствуют, о сих Па́вел глаго́лет: «А́ще и мы или́ а́нгел с небеси́ благовести́т па́че е́же благовести́хом вам - про́клят да бу́дет». Иуде́йже и е́ллин сопроти́вно сему́ вся и глаго́лют, и творя́т: и кресту́ Христо́ву руга́ются и воскресе́нию Христо́ву не ве́руют. То ка́ко сла́ва честь и мир вся́кому де́лающему благо́е иуде́ови же и е́ллину? О е́ллинех у́бо глаго́лет: «Не прельща́йтеся: ни блудницы́, ни идолослу́жители не вни́дут в Ца́рство небе́сное». О иуде́ох же глаго́лет: «Я́ко не оправди́тся от дел Зако́на вся́ка плоть, а́ще не ве́рою Иису́с Христо́вою», «Христо́с ны искупи́л от кля́твы зако́нныя: а́ще бы зако́ном пра́вда была́, то Христо́с ту́не у́мре». И па́ки глаго́лет то́йже: «И не па́ки под и́гом рабо́ты держи́теся. И се аз Па́вел глаго́лю вам: я́ко а́ще обре́заетеся, Христо́с вам ни в ку́юже есть по́льзу». Глаго́лавый у́бо пре́жде, «сла́ва честь и мир вся́кому де́лающему благо́е иуде́ови же и е́ллину», то ка́ко Алекса́ндра [и] Имене́я преда́сть сатане́, отступи́вших от Христо́вы ве́ры, и Елли́му ослепи́, хотя́щаго антипа́та отврати́ти от ве́ры? Но я́вственно есть, я́ко и се глаго́лет о су́щих пре́жде воплоще́ния Христо́ва, о боя́щихся Бо́га и де́лающих пра́вду и не поклоня́ющихся и́долом. О ни́хже глаго́лет па́ки: «Егда́ у́бо язы́цы не иму́ща Зако́на, естество́м зако́нная творя́т, и́же явля́ют де́ло Зако́на напи́сано в сердца́х свои́х».

Коне́ц толкова́нию.

Све́тло нам сло́во и благода́ти напо́лнено, елма́ и све́тел святы́х оте́ц собо́р. Зело́ бо ми в печа́ли су́щу, пребезако́ннаго ра́ди хуле́ния Несто́риева, воста́ви се многовето́вно и а́нгельско, и многови́димое и небе́сное позо́рище, и́же благоче́стию учи́тели, столпы́ святы́я ве́ры, сы́ны неподви́гнущиися, свети́ла присносветя́щаяся, приста́нища ти́хая, ве́рнии смы́слении строи́тели, му́дрии хитроде́льницы Ефе́сскаго пловле́ния. И то́чно а́нгелом живу́ще на земли́, и́же проро́ком схо́дницы, и апо́столом сопресто́льницы, и святы́м це́рквам засту́пницы: И́же скве́рней хуле́ сопе́рницы: И́же на́шему благоуче́нию па́чеже му́дрости подъи́мницы: И́же доброле́пный и богообра́зный престо́л предержа́ще иере́йск: И́же ме́дом ка́плющая источа́юще во́ды: И́же Бо́жию смышле́нию духо́вныя ве́твия: И́же с четы́рьми краи́ Вселе́ную без труда́ сходи́вшии: ни зно́й, ни пу́чина морска́я, ни во́лнам яря́щеся крате́ние в ле́ность вложи́ша, но ве́рными стопа́ми ходя́ще, зде приидо́ша. Все вку́пе оста́вивше любве́ ра́ди, па́че же стра́ха Госпо́дня: и взе́мше крест, я́ко му́дрии сопе́рницы Святы́я Де́вы Богоро́дицы Мари́и приидо́ша зде.

Тем упова́юще моли́твами их святы́ми, ма́ло что похвалим сего́ гра́да: и та́ко на похвалу́ Богоро́дичну распростре́м сло́во: Ра́дуйся Ефе́сский гра́де, па́че же морски́й ви́димый, и́мже у приста́нищь их и ме́ста земны́х , приста́нища а́нгельская, небе́сная к тебе́ приидо́ша. Ра́дуйся, Асиа́нскому устрое́нию хвало́! Я́коже би́сером честны́м, святы́х хра́мы о́крест огради́ся: и ны́не от мно́гих святы́х оте́ц и патриа́рх стопа́ми сле́дуя ся святи́ши, благосло́вя святи́тся пои́стине: врата́, и сто́гны, и приста́нища, святы́х оте́ц прише́ствием: где бо мно́зи па́стырие вни́дут, мног их ра́ди бу́дет свя́тости собо́р. Па́че си́и боголю́бцы, ве́рою любо́вницы. То́чнии а́нгелом изгоня́т все сатани́нское де́ло и еллинское куми́ром беше́ние, фруге́тския и аполина́рския, фотианския же и строглодутския, и все про́сто распре́ние осрами́тся. Сла́вит же ся пра́вей ве́ре хвала́.

Ра́дуйжеся и сам треблаже́не апо́столе и евангели́сте, де́вству похвало́, чистоте́ учи́телю, куми́рстей пре́лести погуби́телю, храму артеми́дску потреби́телю, Ефе́сским приста́нище и помо́щниче, ни́щая пита́я и ско́рбным убе́жище, ни́щим отдыше́ние и поко́й. Ра́дуйся безскве́рный сосу́де, благослове́ния испо́лнен. Тебе́ бо и Госпо́дь наш Иису́с Христо́с на крест взе́мляся, Богоро́дицу при́сно Де́вую а́ки чи́сту предаде́.

Ра́дуйся и ты Мари́е, Богоро́дице Де́во, Прехва́льная Ма́ти, Свет нося́щия, Сосу́де нескверне́ный, вся́чески неприро́чен . Ра́дуйся, Мари́е Де́во, Ма́ти и Раба́: Де́ва же того́ ра́ди, е́же от Тебе́ Де́выя ро́ждшуся Богу: Ма́ти же, е́же в па́зухах Твои́х ноша́шеся и млеко́м Твои́м воспита́вшися: Раба́, е́же от Тебе́ о́браз ра́бий взе́мша. Вни́де бо Царь славе во град твой, па́че же во чре́во твое́: и па́ки изы́де я́коже Сам восхоте́, и свята́я Твоя́ врата́ затвори́шася. Прия́ бо без семене, боголе́потне же роди́. Радуйся Мари́е Богоро́дице, Хра́ме неразори́мый. Па́че же свят, я́коже вопие́т проро́к глаго́ля: «Свят храм Твой и чуде́сен пра́вдою». Ра́дуйся Мари́я, неприро́чный Го́лубе. Ра́дуйся Марие, Име́ние че́стно Вселе́ней, е́же обхо́дит вся края́, Свеща́ неуга́снущия: от Тебе́ бо Со́лнце пра́вды Христо́с роди́ся. Ра́дуйся Мари́е, Вмеще́ние невместя́щагося, Я́же Единоро́дна Сы́на Бо́жия сло́во вмести́вши и Кла́са неувя́дуща без ра́ла и без се́мене прозя́бши. Ра́дуйся Мари́е Богоро́дице, Ея́же ра́ди проро́цы глася́т, Ея́же ра́ди па́стырие славосло́вствуют со а́нгелы, глаго́люще стра́шную ону песнь: «Сла́ва в вы́шних Бо́гу и на земли́ мир, в челове́цех благоволе́ние». Ра́дуйся Мари́е Богоро́дице, Ея́же ра́ди волсви́ кла́няются, от звезды́ све́тлы возводя́щеся. Ра́дуйся Мари́е Богоро́дице, Ея́же ра́ди ангели ра́дуются, арха́нгели весе́луются, с ра́достными пе́сньми воспева́юще. Ра́дуйся Мари́я Богоро́дице, Ея́же ра́ди двоенадеся́тная добро́та апо́стольская избра́ся. Ра́дуйся Мари́я Богоро́дице, Ея́же ра́ди Иоа́нн еди́наче сый во чре́ве Ма́терни Ему́ возра́довася: и поклони́ся свеща́, Све́ту неуга́снущему. Ра́дуйся Мари́е Богоро́дице, Ея́же ра́ди предприи́де Благода́ть Неизглаго́ланная, о Не́йже проро́к вопия́ше глаго́ля: «Яви́ся благода́ть Бо́жия спасе́ная всем челове́ком». Ра́дуйся Мари́е Богоро́дице, Ея́же ра́ди предприи́де Свет и́стинный, И́же во тме и се́ни сме́ртней седя́щим лю́дем. Ча́да бо рече́ седя́щая во тме и се́ни сме́ртней седя́щим люде́м, ви́дят свет вели́к. Кий у́бо свет? Но Го́спода на́шего Иису́с Христа́ и́стиннаго Бо́га на́шего Свет, освеща́я всего́ челове́ка, прииду́щаго во утва́рь. Ра́дуйся Мари́е Богоро́дице, Ея́же ра́ди Ева́нгелие пропове́дается: «Благослове́н гряды́й во и́мя Госпо́дне», Ея́же ра́ди и во граде́х и в се́лех и во о́стровех це́ркви правове́рным основа́шася. Ра́дуйся Мари́е Богоро́дице, Ея́же ра́ди предъи́де и́же сме́рти Побе́дник и а́ду Погуби́тель. Ра́дуйся Мари́е Богоро́дице, Ея́же ра́ди прии́де е́же первозва́нну Созда́тель, и преступле́ному Прости́тель, и в небе́сное Ца́рствие Вождь. Ра́дуйся Мари́е Богоро́дице, Ея́же ра́ди просвете́ся и просвети́ся воскресе́нию добро́та. Ра́дуйся Мари́е Богоро́дице, Ея́же ра́ди вода́ свя́тости устраше́на же Иорда́нска истече́. Ра́дуйся Мари́е Богоро́дице, Ея́же ра́ди Иоа́нном Иорда́н освяти́ся, и диа́вол безчу́вствуется. Ра́дуйся Мари́е Богоро́дице, Ея́же ра́ди всех дух, Христо́ви ве́руя спаса́ется. Ра́дуйся Мари́е Богоро́дице, Тебе́ бо ра́ди морски́я во́лны утиша́щеся и умо́лкнуще, клевре́ты на́ша и сослуже́бни, с ра́достию, благослове́нием и благовесе́лием понесо́шася. И земля́ бо, я́же иногда́ от разбо́йник ходи́ма, святы́х оте́ц прише́ствием в мир преложи́ся. Пи́шетбося: «Я́ко красны́ но́ги благопове́дающим мир Го́спода на́шего Иису́с Христа́».

Пропове́дника ми́ру глаго́люща во Ева́нгелиих: «Мир Мой даю́ вам». Кий мир? Его́же поху́лив Несто́рий, не прия́ глаго́ля: я́ко не роди́ся глаго́ля Иису́с Христо́с, е́же Бо́жие сло́во и Сын от Де́вы Мари́и: да ни без вре́да Де́ва , е́же Деви́чу рождеству́ све́дый, ни арха́нгельску гла́су ве́руя глаго́лющу е́же «ра́дуйся Обра́дованная, Госпо́дь с Тобо́ю». Пе́рсску бо ца́рствию подо́бяся и Единоро́дна Сы́на Бо́жия отврещи́ мня́ся на па́губу мно́гим и на обла́зн душа́м, поги́бе: но елма́ мно́го о́во о сем е́же зле сху́лившу. Птели́ну возгласи́х, егда́ раб вам спове́дах, его́же Иереми́я проро́к пропове́да глаго́ля: «Воспея́ рябь , собра́ и́хже не роди́». И па́ки скверна́вый той, ви́дя ипа́ты защи́тяща его́, те́ми упова́я, кри́лы вострепета́: и мня нас постраши́ти, па́че воста́вити: иди́те у́бо со стена́нием и со слеза́ми. Нау́ком рече́м: «Бла́го упова́ти к Бо́гу или́ упова́ти к челове́ку?». Ты бо той прокля́ злат тул свой, испраздни́в боля́ры, и маги́стры, и ипа́ты, и лик ца́рский на ны воста́ви. Но мы проро́ческое о́но рече́м сло́во: «Оне́ колесни́цами, а оне́ ко́ньми: а мы во и́мя Госпо́дне Бо́га на́шего помо́лимся». А́ще бо и ко вла́стелем земны́м или к самому зело́ благочести́вому на́шему царю́ бы ми глаго́лати - не бых ся осрами́л, ни содрогну́лся, име́я проро́ка Дави́да повеле́ша ми и глаго́люща: «И глаго́лах проти́ву царе́м и не стыдя́хся».

Кто слы́ша такова́ и тре́петна стра́шна дея́ния, и́же от проро́к нам пропове́да на Христа́ и Бо́га Сло́ва? И ны́не в челове́чь прелага́ема, и Богоро́дица человекороди́ма глаго́лющися: да ми не глаго́лет кто беся́? Е́же гоня́щим Благода́ти скверна́вым жидо́м напра́сно продерза́ние, е́же на Христа́ дерзну́ша неразу́мницы тогда́, тем бо ны́не упова́ние дасть, и́же ху́лив Бо́жия Сло́ва глаго́ля, я́ко челове́ка распя́сте. И еще́ же пре́лесть е́ллинску и тре́бы безако́нныя куми́ром приноси́мыя? Но и то не разуме́нию дея́ние, и го́рька неду́га А́риева, и прескверна́вую хулу́ Манихе́йскую, и поги́бельное одея́ние Саве́лиево, и Порфи́рово, и Фоти́ново зломы́сла, в не́же вник и той похули́.

О́ го́ре, я́ко всего́ пре́йде того́ зло́ба и сконча́ся на нем! Е́же презо́риваго глави́зна, глаго́лющу «разорю́ си име́нницу и бо́льшую возгражду́», ему́же и рече́ся: «Безу́мне, [в] сей но́щи ду́шу твою́ изму́т от тебе́. А я́же угото́ва, кому́ бу́дут?». В вели́ку бо вознесе́ся высоту́: скверна́в сый и ме́рзок толи́ко, па́ки снесе́ся в про́пасть. Хуле́нию впад, ему́же одоле́ апо́стол Па́вел. Е́же сосу́д избра́н, щур церко́вный, и́же благопове́дание и небе́сный фимиа́н, гремя́щий исто́чник, и́же посла́нию но́сец, и́же осле́п на пути́ и прозре́в Бо́жиим ве́дением, Его́же явле́ние Христо́во на ли́цы пове́рже. И Бо́жия ве́дения па́ки к ве́ре поведе́, е́же Вселе́ную утверди́ ве́ровати. К вку́пе су́щней Святе́й Тро́ице во еди́н Госпо́дь, во еди́ну ве́ру и во еди́но креще́ние: Еди́ного Отца́, и Един́ого Сы́на, Еди́н Святы́й Дух, неразлуче́ное су́щие, неиспы́тное Божество́, Бог от Бо́га Го́спода на́шего Иису́с Христа́, Свет от Све́та. Просвеще́ние сла́ве, от святы́я Де́вы Мари́и Ро́ждьшася, по арха́нгелову гла́су глаго́лющу: «Ра́дуйся обра́дованная, Госпо́дь с тобо́ю». И па́ки то́жде: «Дух Святы́й на́йдет на тя, и си́ла Вы́шняго осени́т Тя. Те́мже и ражда́емое от Тебе, свя́то нарече́тся Сын Бо́га Жива́го».

Не то́чию арха́нгелом Гаври́лом, но и блаже́ным Дави́дом слы́шим по вся дни в це́рквах глася́ща того́жде и глаго́люща: «Госпо́дь рече́ ко Мне: Сын Мой еси́ Ты, Аз днесь роди́х Тя». И великогла́сный же Иса́ия, сын Аммо́сов проро́ка, е́же от проро́ка проро́к пропове́да нам глаго́ля: «И Де́вая во чре́ве прии́мет и роди́т Сы́на, и нареку́т и́мя Ему́ Емману́ил, е́же есть протолку́я ся «С на́ми Бог»».

Но не ве́руеши проро́ком, и апо́столом, и евангели́стом, и арха́нгелу Гаври́лу? Поне́ бесну́ющася с тобо́ю подража́й е́же вострепета́вшим Его́ си́лы и возопи́вшим посла́би: «Что нам и тебе́ Иису́се Назаряни́не? Прии́де се́мо пре́жде го́да му́чити нас». А́ще бо и в той год глаго́лашеся и и́стинна пре́жде го́да, и ны́не на тебе́ до́йде, бе́яше же приити́ анти́христу, но скоре́е в его́ ме́сто прии́де. Ни ли льстя́щему тя диа́волу покори́ся глаго́лющу: «Сын ли еси́ Бо́жий? Рцы ка́мение се хле́би бу́дут»? О́ дея́нию стра́шну и у́жасти по́лну! Бе́си со отце́м свои́м диа́волом, Сы́на Бо́жия нарица́ют, И́же от Де́вы Мари́и ро́ждшася: а сей, Сы́на Бо́жия в челове́ка прелага́ет. Возвраще́ние ко́е и бесова́ние изобре́т, взову́ща нас твори́ти.

Взыска́ благоче́тца царя́, любо́вника и раб́а́ су́ща пра́вей ве́ре, и еще́ же или́ ко святы́х царе́й в ве́ре светя́щим, но не мо́же до конца́ изво́лити. Я́же бо и ни́щих златолю́бцем дая, мня те́ми христолю́бцем одоле́ти лю́бящим и́стину: и всезла́го ра́ди сребролю́бия в беду́ го́ршую впаде́, в заве́трии ходя́ утопе́. Недержа́ ве́ры правле́ния, тем и потопе́: и бысть злы́ми по́вестьми позо́рище всей Вселе́ней. Мня бо все зла́го ра́ди и го́ркаго смы́сла возбрани́ти благочте́нию де́льники, не взем в отемне́нии ума́ поразуме́ти уче́ния оте́ческая, и апо́столька, и проро́ческа, и арха́нгельска, и ева́нгельския гла́сы. Немилосе́рдство обре́т зло и в безбо́жие оде́явся. Губи́тельну и безако́нну ве́ру Вселе́нней восхоте́, но не обре́те: и нас [обре́те] не устрое́ни к безако́ннаго ему́ и ху́льнаго промышле́ния. Не бо ору́жием высо́ким упова́ем, ни златови́диме и вся́ко зло сребролю́бием, но си́лою Божиею. Тем и Бог сокруши́ зубы́ ему́ во усте́х ему́ чрено́вное львом сокруши́ Госпо́дь. И мы бо от святы́х писа́ний к нему́ отве́т твори́м.

На́ша бо ору́жия, не пло́тная, ни земна́я, но духо́вная и небе́сная, я́коже блаже́нный Па́вел пропове́да. Но не мни кто то нам глаго́люща, я́коже пора́дующася отпаде́нию твоему́ безбо́жне и братоубие́ние хотя́щу сотвори́ти. Па́дшу бо ти на страдбе́, облажне́нию сему́ ру́це ти кни́гами пода́хом. И на́шего смире́ния преслу́ша: и того́ ра́ди преслуша́ния беду́ прия́. Се бо та́ко по и́стине по́слуха дае́м досто́йна и ве́рна пресвята́го архиепи́скопа всей Вселе́нней, отца́ же и патриа́рха Келести́на, е́же вели́каго гра́да Ри́мска: я́ко и той ти кни́гами показа́ отступи́ти от бесо́вныя тоя́ обла́зны. Преслу́ша его́ и восхвали́ся бесова́нием су́етства своего́, обощре́ние всей Вселе́нней сотвори́вся и четверокра́йну вселе́ную смяте́, и вся святы́я на беду́ сию́, со мно́гим стра́хом и боле́знию согна́. Писа́ бо зло́бу, ника́коже благостно. Тем и Бог обори́т тя: изомкну́в пре́жде от Ца́рска града, потом и престо́ла патриа́ршеска, ему́же не бе досто́ин. Тем и у́зрят тя: правди́вии убоя́тся и реку́т: «От челове́к, и́же не положи Бога помо́щника себе́, но паде́ся множеством богатства своего».

И та́ко погибо́ша, неве́рующии святе́й Богоро́дицы. Тех днесь проклина́ет святы́я и собо́рная Це́ркви.

Мы же правове́рнии Пречестну́ю и Пречи́стую Деву, вои́стину Богородицу Влады́чицу, и Царю́ избра́нную от всех родо́в , выщшу и пресла́внейшу херуви́м и всея́ тва́ри честне́йшу, ра́дующеся и хвала́ми чту́ще велича́ем: и ро́ждшагося от Нея́ Христа́ Бо́га на́шего, со Отце́м и с Пресвяты́м и Благи́м и Животворя́щим Ти Ду́хом. Ами́нь.

Святы́й же вселе́нский четве́ртый собо́р бысть в Халкидо́не при Маркия́не благочести́вем цари́, и при Лео́не па́пе Ри́мстем, и при Анато́лии патриа́рхе Константи́ня гра́да, шестисо́т и три́десятих святы́х оте́ц на Диоско́ра бы́вшу патриа́рху Алекса́ндрова гра́да и Евти́ха архимандри́та. Си́и бо Спа́са на́шего Бо́га Иису́с Христа́ вочелове́чение отмета́ста, весма́ про́ста в привиде́нии его́ плоть носи́вша басносло́вяща. Те́мже во еди́ном существе́ его́ глаго́ласта, Божеству́ страсть прилага́юща. Того́ ра́ди у́бо сия́ пребы́вшая в той пре́лести, прокля́ша вку́пе со единомы́слеными их, боже́ственое же повеле́ние возгласи́в: Бо́га соверше́на и челове́ка соверше́на во двою́ естеству́, несме́сно, неразде́льно Го́спода нашего и Бога пропове́даша, свята́го же па́пы Лео́нта еписто́лию и́же ко свято́му патриа́рху Флавиа́ну, я́ко столп прия́ша правове́рию.

И па́ки и́нако: Халкидо́нска же собо́ра, пщева́ние си́це бысть. Евти́хий архимандри́т пребыва́ в монастыри́ нарица́емем И́овль, и́же есть во Евдо́ме вне Константи́на гра́да. Сей о Христе́ глаго́лаше пре́жде соедине́ния, во двою́ естеству́ бы́ти Ему́. По соедине́нии же еди́но естество́ изве́стно испове́даше. Евсе́вий же бе́яше тогда́ епископ Дори́ла гра́да та́ко нарица́ема, бли́жний сый друг его́, и́же мно́жицею с ним бесе́довав в кни́жнем ра́зуме. И я́ко уве́де того́ развраще́ние клюдя́ща и не пременя́ющася от е́реси, пи́шет а́бие на того́ и вдае́т епи́скопу Константи́на гра́да Флавиа́ну. Он же собра́в епи́скопи обре́тшаяся во гра́де и собо́ром испыта́в Евти́ха. И я́ко обре́те и́стинствующе Евсе́вия, измета́ет Евти́хия не хоте́вшаго отложи́ти е́реси.

Тогда́ Евти́хий по изверже́нии вели́ко подвиже́ние твори́т на Флавиа́на, име́я споспе́шники и́ны мно́ги от пола́т и кувикула́рия Хриса́фия. Тогда́ от царя́ ма́лаго Феодо́сия, ве́лия могу́ща увещева́ют у́бо царя́ науче́нием Евти́ховым повеле́ти Диоско́ру предсе́днику Алекса́ндрьския це́ркви твори́ти собо́р и взыска́ти от Евти́ха сотворе́ных. Диоско́р же повеле́нное исполня́я, приид́е во Ефе́с. С ни́мже и нема́ло епи́скоп прииде. Прии́де же та́мо Флавиа́н и Евти́хий, царю́ си́це повеле́вшу.

Мно́гу же от писа́ния сопре́нию бы́вшу. Повеле́ Диоско́р и и́же с ним собо́р, я́ко изврещи́ Флавиа́на, устро́ити же Евти́ха во свое́ ме́сто, утверди́вше ве́ру Евти́хову: испове́давшу и Диоско́ру тождь мы́слити е́же и Евти́х. Проклина́ют же испове́дающая две Христо́ве естестве́ по едине́нии. Блаже́ный же Флавиа́н еще́ сый во Ефе́се оста́вль живо́т, Евти́хий же прише́д в свой монасты́рь, не по мно́зе у́мре.

Ле́ту же в сему́ не испо́лньшуся, умира́ет и царь, Маркиа́ну же в того́ ме́сто воцари́вшуся. Пре́жде же рече́ный Евсе́вий Дори́лу епи́скоп, а́бие па́ки воспомина́ет царе́ви глаго́ля: я́ко без пра́вды бы́вшу оби́дену ца́рскому гра́ду и Флавиа́ну епи́скопу от Диоско́ра. Про́сит же и при Диоско́ре сотворе́ным, взыска́ным бы́ти собо́ром. Уве́ривжеся у́бо Евсе́виевою молбо́ю Маркиа́н царь: Вселе́нскому собо́ру в Халкидо́не гра́де повелевает бы́ти. Повелева́ет же с ни́ми та́мо князе́м бы́ти, приити́ же и Диоско́ру та́мо. И я́коже мно́гу писа́нию предложе́ну бы́вшу, извер́жен Диоско́р быва́ет, и про́клят, и в озе́мствие осужда́ется во Ас остро́в: и та́мо умира́ет. Проклина́ет же ся и Евти́хий, и па́ки Несто́рий. Утвержа́ет же ся и собо́ром написа́ное на Евти́ха в Константи́не гра́де при Флавиа́не, разве́рже и́же во Ефе́се на Флавиа́на бы́вый собо́р, повелева́ет же ся и во двою́ естеству́ испове́дати Христа́, еди́ну же Его́ ве́дати ипоста́сь.

Обрето́шажеся сея́ су́щи мы́сли епи́скоп шестисо́т и три́десяте, и́же и в собо́ре подписа́ша, ему́жеся прочита́ти в Халкидо́не. Прии́де сам Маркия́н царь и обе́щник епи́скопом быва́ет. Тогда́ бо а́бие и от Ри́ма по́сланая Лео́нтом па́пою Ри́мским еписто́лия приспе́, ю́же весь святы́й Вселе́нский четве́ртый собо́р поче́т и столпо́м Правове́рия нареко́ша.

Сказа́ние ри́мския еписто́лии: Поне́же твое́ благоро́дие и благолю́бие поуверзе́нием рече́ния ко Христу́ разгара́яся, не восхоте́ оте́ц свои́х сове́ты и вла́сти отцвета́ющия, я́коже ре́ша кни́ги, но Мари́ину благую и богопохва́льную часть избра́, я́же не отъи́мется от тебе́. И того́ ра́ди на пре́дняя спе́я па́че и па́че: не та́ко ине́х ве́щех прилежа́, я́коже по́льзующих себе́ же и ине́м, понужда́еши неключи́мство на́ше нача́ти, и соверши́ти дра́го и изя́щно де́ло, и еще́ же и вы́ше моего́ ве́дения. Ве́де бо, Го́споди мой, ве́де, я́ко учи́вшимся от млад ного́т ми́рским и ри́торским кни́гам таково́ есть де́ло. Е́же от Ри́ма ве́ры твоея́ ра́ди к нам прии́де, испо́лнь Ду́ха Свята́го и прему́дрости богому́драя си́и догма́тская еписто́лия, его́же ра́ди и столп правове́рия от свята́го и Вселе́нскаго четве́ртаго собо́ра нарече́на есть: а́ки уясня́ющи Бо́жество же и воплоще́ние, и́мже ра́зньствит обе́щствуя, и́мже еди́нствует Божеству́ челове́чество и челове́чество Божеству́. Его́же не́цыи недоумева́юще, и́нако изглаго́лавша, погибо́ша. Они́ бо, е́же есть Евтих́ий, о не́мже нам сло́во.

Аз же ве́дый моего́ уче́ния не́мощь, и не достиза́я вы́сости глаго́л, и к вели́честву ра́зума недоумева́я, боя́жеся и зла́го преслуша́ния, и о обою́ду те́сно име́я: оба́че со воздыха́нием и стра́хом нача́х вы́шняя моего́ ума́ ве́щи, е́же от гре́ческаго слове́нски преложи́ти. Ве́де же Го́споди мой, кир Нико́лае, я́ко ника́коже досто́йно твоего́ ча́яния преложе́ние, моея́ же си́лы не ху́жде. Оба́че ни си́и суть моея́ мы́сли дея́ния, но твоея́, о́ чи́стый , те́плыя ве́ры пло́дове.

Призыва́ю же раб твой, и́нок Феодо́сий, моего́ патриа́рха моли́твы, и над сим сыропу́стнаго кондака́ ра́зум, и ва́ше боголю́бие на по́мощь. От всех же проще́ния прося́ мое́й гру́бости, и́же и безмо́лвия не имы́й на я́сность преудобре́ному сему́ кова́рству. Молю́ же у́бо, да не с зазо́ром бу́дет неуме́ние на́ше, но проще́нием напи́саное се.

Предсло́вие: Блаже́наго па́пы Лео́нта, старе́йшаго и вели́каго Ри́ма, изложе́ное вели́кое посла́ние, и́же во святы́х ко Флавиа́ну архиепи́скопу Константи́на гра́да на Евти́хия суему́дренаго и на единомы́сленыя его́.

Еписто́лия: Поче́тше писа́ние твоея́ любве́, нема́ло почуди́хомся, закосне́ния того́ делма́ толи́ка вре́мене. Ны́не же в чин воспомина́ния прини́кше, расмотри́хом о бы́вшем, что таковы́х пред епи́скопы собла́зн, от вас на здра́вую ве́ру прозя́бших, едва́ не когда́ по́зде разуме́хом и пре́жде неразумева́ема мни́мая, ны́не нам на я́ве бы́ша.

И́хже ра́ди Евти́хий и́же старе́йшинским нарече́нием досто́ин че́сти мнимь бы́ти, вельми́ неразу́мен и зело́ неуче́н показа́ся, я́ко о сем проро́ку рещи́: «Не изво́ли разуме́ти да ублажи́т, непра́вду умы́сли на ло́жи свое́м». Что бо есть безпра́веднее и непра́веднее нечести́ваго помышле́ния, е́же до́бре смы́слящим и мудре́йшим не покаря́тися? В безу́мие же таково́е впа́дают, и я́ко не́ким претыка́нием неразуме́ния разуме́ти и́стинну возбраня́еми: ни проро́ческим гласово́м, ни апо́стольским писа́нием, ни ева́нгельским веща́нием внима́юще, но са́ми о себе́ неи́стови ся де́юще. Сего́ ра́ди учи́тели льсти явля́еми, поне́же и́стинне ученицы́ не бы́ше.

Ка́я у́бо от боже́ственых книг, Ве́тхаго же и Но́ваго Заве́та, прия́т, я́ко ни того́ самого́ изображе́ния ве́ре предве́рие, я́же есть: «Ве́рую во Еди́ного Бо́га и Отца́» возмо́же разуме́ти? И́же бо всей вселе́нней глас, креща́емыя оглаша́я сей во ум, и еще́ сему́ ста́рцу не прие́млется. Не ве́дый бо, что подоба́ет о вочелове́чении Бо́жия Сло́ва разумева́ти, и боже́ственых Писа́ний в ширини́ потруди́тися не восхоте́в, я́ко у́бо отту́ду све́ту ра́зума досто́ин бы был. О́ного у́бо подоба́ше о́бщее и не двогла́сное испове́дание послуша́нием и прилежа́нием сотвори́ти, е́же все мно́жество ве́рных испове́дают.

Ве́ровати ему́ в Бо́га Отца́ Вседержи́теля и во Христа́ Иису́са Сы́на Единоро́днаго Го́спода на́шего, Рожде́наго от Ду́ха Свята́го из Мари́я Де́вы. И́миже треми́ отвеща́нии весма́ вся ухитре́ния ерети́ческая разоря́ются, егда́ бо Бог Вседержи́тель и Оте́ц бы́ти ве́руется, соприсносу́щен Ему и Сын пока́жется, ника́коже Отца́ разлуча́яся: поне́же бо от Бо́га Бог, от Вседержи́теля Вседержи́тель, от Присносу́щнаго Присносу́щен. Не по ле́те ро́ждься, не ме́ний си́лою, не разлуче́н существо́м. Сей же Сам Присносу́щнаго Отца́ Единоро́ден, Соприсносу́щен, роди́ся от Свята́го Ду́ха и Мари́и Де́вы. Се же рождество́, е́же по ле́те боже́ственаго и присносу́щнаго Его рождества́, ничто́же уя́т или́ приложи́, но всего́ Себе́ истощи́в во спасе́ние заблу́ждьшаго челове́ка, да и смерть победит, и диа́вола держа́ву сме́рти иму́щаго Свое́ю низложи́т си́лою. Не бо у́бо можа́хом победи́ти греха́ и сме́рти нача́льника, а́ще не бы Сам человеколю́бне на́шего восприя́л естества́ и Свое́ сотвори́л, Его́же ни грех оскверни́, ни смерть удержа́ти возмо́же. И зача́ бо ся у́бо я́ве от Ду́ха Свята́го во утро́бе Де́вы Ма́тери, И́же та́ко сохра́ньше и де́вство того́ ра́ди, я́коже у́бо це́лу бы́вшу де́вству, егда́ Его́ зача́т.

А поне́же от сего́ прекра́снаго исто́чника, в ве́ре христиа́нстей чи́стыя почре́ти мы́сли не возмо́же, почто́ не зе́льнаго ра́ди сия́ния и́стины не возмо́г разуме́ти? От своея́ отемня́ется слепоты́: да поне́ к евангельским себе приве́л бы уче́нием и Матфе́ю глаго́лющу: «Кни́ги рождества́ Иису́с Христо́ва, Сы́на Дави́дова, сы́на Авраа́мля». И апо́стольским преда́нием сказа́ния, а́ще бы взыска́л и поче́л бы посла́ние к ри́мляном: «Па́вел раб Христо́в, зван апо́стол, отлуче́н на благовествова́ние Бо́жие, е́же провозвести́ проро́ки Свои́ми в писа́ниих святы́х о Сы́не свое́м, бы́вшу от се́мени Дави́дова по пло́ти». А́ще бы у́бо сей проро́ческия кни́ги благочести́ве проше́л и обрета́л бы обеща́ние Бо́жие ко Аврааму глаго́лющее: «О се́мени твое́м благословя́тся вси язы́ки», ника́коже бы не ве́ровал Влады́ческому сему́ се́мени, но восле́довал бы апо́столу глаго́лющу: «Авраа́му рече́на бы́ша обеща́ния се́мени его́. Не рече́, я́ко се́менем мно́гим, но я́ко еди́ному Се́мени твоему́, е́же есть Христо́с». Иса́ино пророчество ясне́йшаго ра́ди держа́шеся слы́шания глаго́лющее: «Се Де́вая во чре́ве прии́мет и роди́т Сын, и нареку́т и́мя Ему́ Еману́ил, е́же есть сказа́емо с на́ми Бог». И сего́ же пророка а́ще бы поче́л ве́рою глаго́л, ве́ровал бы у́бо: «Я́ко Отроча́ роди́ся нам, Сын, и дан бысть нам. Ему́же власть Его́ на ра́ме Его́. И нареку́т и́мя Его́ вели́ка сове́та А́нгел. Бог кре́пок, Властели́н, Нач́алник ми́ру, Оте́ц бу́дущаго ве́ка».

В пу́стошь же глаго́ляй та́ко, прельща́ется: «А́ще и плоть бысть Сло́во, рече́, роди́выйся от Де́вы Христо́с, име́ у́бо челове́ческо обли́чие, не име́я же ма́терня те́ла и́стинна», а́ки того́ ра́ди Влады́це Христу́ не бы́[вшу] на́шего ме́ньше существа́. Поне́же по́сланный к де́вей Мари́и рече́ а́нгел: «Дух Святы́й на́йдет на Тя, и си́ла Вы́шняго осени́т Тя. Те́мже и ражда́емое от Тебе́ Свя́то нарече́тся, Сын Бо́жий». И я́коже у́бо зача́тие Деви́чее Бо́жиего де́йства бысть де́ло, от естества́ заче́ншия, пло́ти зача́таго не бы́ти? Но не та помышля́ти О́ного рождества́, его́же единоро́дное есть ди́вно, и чу́ден бысть Единоча́дый, я́коже новоле́тнаго ра́ди родства́ рожде́ственую изврещи́ и́стинну. Плоть бо Де́вей Святы́й Дух дарова́, и́стинство же те́ла - от те́ла зача́то бысть. «И Му́дрости созда́вши Себе́ хра́мину, Сло́во плоть бысть и всели́ся в ны». Се же есть все те́ло е́же прия́ от челове́ка и ду́хом живо́тным слове́сным одуши́, сохраня́ему у́бо сво́йства коему́ждо естеству́ и во еди́но лице́ сходя́щемася взя́то бысть. От Божества́ у́бо - смире́ние, от си́лы же – немо́щное, от безсме́ртия же - сме́ртное. И к до́лжественому до́лгу на́шего естества́ отда́ти: боже́ствено естество́ соедини́ся естеству́ стра́стному, да се на́шему исцеле́нию створит подо́бие. Еди́н той Сам Сый, хода́тай Бо́гу и челове́ком, челове́к Христо́с Иису́с, да и умре́ти от еди́ного возмо́жет, и сконча́тися от е́тера не возмо́жет. Да в це́ле естестве́ челове́ка и́стинна и соверше́не естестве́ Бог и́стинен ся роди́т: весь Сам в Себе́ и весь в нас. На́ша же егда глаго́лю, ка́я глаго́лю? Не о́на ли я́же в нас в нача́ло Соде́тель положи́ и я́же в поновле́нии прия́т? О́на бо, я́же льстец введе́ и прельсти́вся челове́к согреши́ - сего́ весма́ сле́да во Спа́се не обре́те. Или́ поне́же на прича́стие челове́ческия не́мощи прии́де, того́ ра́ди и прича́стен бысть на́шим грехо́м - да не бу́дет.

Прия́ бо о́браз ра́бий без вся́кия грехо́вныя скве́рны: и челове́чеством возмага́я, и Божества́ не охужда́я. А е́же его́же ра́ди Себе́ Неви́димый ви́дима сотвори́, и Творе́ц, и Влады́ка всех, еди́н от челове́к восхоте́ бы́ти - соше́ствие есть, милосе́рдие, а не не́мощь си́лы. Я́коже бо по о́бразу Бо́жию сотвори́ челове́ка: и Сам у́бо во о́браз ра́бий бысть - сохраня́ет бо коего́ждо существа́ соверше́но сво́йства. И я́коже не отсека́ет о́браза ра́бия о́браз Бо́жий, та́ко ни о́браза Бо́жия о́браз ра́бий охуди́. Поне́же бо диа́вол хваля́шеся, зря челове́ка прельще́на со бла́знию его́, боже́ственаго да́ра лише́на и нетле́нных благ обнаже́на, сме́ртному лю́тому отве́ту пови́нна: и своим зло́бам обре́т Того́ а́ки не́кое утеше́ние, я́ко са́мому су́щу бы́вшу тому́ прича́стнику преда́ния. Я́ко и Бо́гу, се Своея́ пра́вды истяза́ющу, возда́ти о челове́це Своего́ отве́та, его́же толи́кою че́стию почте́, тре́бование устро́я неизрече́ннаго та́инства бысть: да непреме́нный Бог, Его́же сове́т насажде́нныя бла́гости лиши́ти не возмо́жет, пе́рвое о нас неизрече́ннаго та́инства соверша́я оправда́ние: да и не челове́к и́же злоде́йством диа́вольския зло́бы ко греху́ приле́п кроме́ све́та Бо́жия поги́бнет. Исхо́дит у́бо во смире́ное сего́ ми́ра Сын Бо́жий, сходя́й от небе́снаго престо́ла и Оте́ческия сла́вы не отлуча́яся, но́вым чи́ном и но́вым рожде́нием быв. Но́вым у́бо чи́ном, я́ко неви́димь Сый во Свои́х, ви́димь бысть от нас: и непостижи́мь Сый, восхоте́ пости́жен Сый бы́ти: и пре́жде лет Сый, бы́ти начина́ется от ле́та. И всех Сый Влады́ка, ра́бий образ восприя́т, Своего́ Божества́ вообра́жь вели́чество. И безстра́стный Бог не вознегодова́, стра́стен бы́ти челове́к. И безсме́ртен ро́дом, сме́ртному ся зако́ну повину́, но́вым же рождество́м ро́ждься. Поне́же убо пречи́стая Де́ва по́хоти не позна́, пло́тскаго же соста́ва пода́: и прия́ся, от Ма́тере Влады́чня естества́, а не грех.

Или́ поне́же Влады́це Иису́с Христу́ ро́ждьшуся от утро́бы Де́выя, ди́внаго су́ща рожде́ния, того́ ра́ди не подо́бно нам естество́? Бог бо Сый и́стинен: Той Сам есть и Челове́к и́стинен. И лжа ника́коже в сем соедине́нии несть. Поне́же обое́ ко́ждо е́теро со е́тером есть: и челове́ческа ху́дость, и вели́чество Божества́. Я́коже бо е́же ми́ловати Бо́гу нра́вом есть неотсту́пно, та́ко и челове́к вели́чеством Божества́ не погиба́ет. Де́йствует бо коего́ждо о́браз со уставны́м о́бществом, е́же в сво́йстве име́. Сло́ву убо де́йствующу я́же суть Его́, те́лу же соверша́ющу я́же суть ему своя́. Я́коже еди́ному сия́ти чудесы́, друго́му же укори́знами подпа́дати. И яќоже Сло́во от ра́венства О́тчия сла́вы есть неотлу́чно, та́ко и те́ло, естества́ на́шего ро́да не отлучи́ся. Еди́н бо Сам: Сын Челове́чь есть и́стинен, и Сын Бо́жий и́стинен. Бог у́бо по сему́: «Я́ко искони́ бе Сло́во, и Сло́во бе к Бо́гу. И Бог бе Сло́во». Челове́к же по сему́: «Я́ко Сло́во плоть бысть и всели́ся в ны». Бог же по сему́: «Я́ко вся Тем бы́ша. И без Него́ не бысть ничто́же». Челове́к же по сему́: я́ко бысть от жены́, бысть под зако́ном. Да у́бо пло́тское рождество́, челове́ческаго есть обавле́ние естества́. Рождество́ же па́ки деви́ческо, возвеще́ние боже́ственыя есть си́лы. Младе́нство же де́тища, пеле́н ху́достию познава́ется. Вели́чество же ве́лийства Его́, ева́нгельскими гла́сы явля́ется. И уподобля́ется у́бо новоражда́емым челове́ком Сей, Его́же и род нечести́вый совещева́ше умори́ти. Но есть Влады́ка всех, Ему́же волсви́ ра́дуются, моле́бне поклони́тися. А егда́ ко Предте́че Своему́ Иоа́ннову креще́нию гряде́т, да не утаи́тся, я́ко покро́вом пло́тным Божество́ сохраня́емо, глас Оте́чь от небе́с сходя́ рече́: «Се сын Мой возлю́бенный, о Не́мже благоизво́лих». Да Его́же я́ко челове́ка диа́воля собла́зн искуша́ет, Сему́ я́ко Бо́гу а́нгельский слу́жит чин. Е́же бо алка́ти и жада́ти, тружда́тися и пла́кати - я́ве челове́ческо есть. Но пятию́ хлеб пять ты́сящь челове́к насы́тити и пода́ти самаряны́ни во́ду жи́ву, отку́ду же та поче́рпши, нача́т ктому́ не жада́ти, и е́же по хрепто́м морски́м пешеше́ствовати нога́ми не погружа́емыма, свире́пству же и треволне́нию запреща́ему и утеша́ему - пои́стине есть Бо́жие. А я́коже у́бо да мно́жайша премину́: я́ко не сего́ же есть естества́, е́же пла́катися от жа́лостныя любви́, преста́вльшуся дру́гу, разше́дшася к пе́рьсти четверодне́вным его́ погребе́нием - и воскресну́ти повеле́нием гла́са ожи́вша. Или́ на дре́во воздви́жену бы́ти - и от дне в нощь прело́жша, соста́вы вся потрясти́. Или́ гво́здии прибости́ся - и ра́йскыя отве́рсти две́ри, ве́ры ра́ди разбо́йничи. Та́ко не того́ же есть естества́ е́же глаго́лати: «Аз и Оте́ц, еди́но есве́». И е́же рещи́: «Оте́ц Мой бо́лий Мене́ есть». А́ще бо о Влады́це Иису́с Христе́, Бо́жие и челове́чее, еди́но есть лице́, оба́че и́но есть о́но, е́ же прича́стно поруга́ния, и́но же общу́яся сла́ве. Я́ко се, от нас у́бо есть в Нем, и́мже мний Отца́ ра́венство челове́чества, от Отца́ же ему́ есть, е́же со Отце́м ра́венство Божества́.

Сего́ ра́ди у́бо лицу́ еди́нства ко́еждо естество́ разумева́ти до́лжно есть. И Сы́на почита́ем челове́ча соше́дша с небе́с, егда́ Сын Бо́жий - те́ло от тоя́ Де́вы, от Нея́же роди́ся и прия́. И па́ки Сын Бо́жий ра́спят глаго́лется и погребе́ся: се же не саме́м Божество́м, и́мже соединя́ется Единоро́дный Присносу́щный: Единосу́щен Сый Отцу́, но немо́щию челове́ческа естества́ потерпе. Те́мже Единоро́днаго Сы́на Бо́жия распя́та и погребе́на, вси соо́бразно ку́пно испове́даем, е́же есть: «Ве́рую во Еди́ного Бо́га и Отца́ Вседержи́теля». И я́же по сих, по о́ному же апо́стольскому: «А́ще бо бы́ша разуме́ли, не бы́ша Го́спода распя́ли». Егда́ же сам Госпо́дь наш и Спас, ве́ру ученико́м Свои́х ра́ди вопраша́ний указа́ше: «Кого́ Мя, рек, глаго́лют челове́цы бы́ти, Сы́на Челове́ча?», о́нем отвеща́ющем, други́м дру́го, я́ко ины́я быти сла́вы. «Вы же рече́, кого́ Мя глаго́лете бы́ти», Сы́на су́ща Челове́ча, Его́же во о́бразе ра́бии и пои́стинне в те́ле ви́дите, кого́ Мя глаго́лете? Тогда блаже́ный Петр, от Бо́га вдохнове́н и свои́м испове́данием всем хотя́ бы́ти спасе́ное страна́м: «Ты еси́, рече́, Христо́с Сын Бо́га жива́го». И досто́йно блаже́н яви́ся нарече́ния от Го́спода, и от пе́рвовображе́наго Ка́меня тве́рдость восхити́ до́брыя де́тели, и испове́дания, и слы́шания, и́же бо открове́нием О́тчим Того́ и Свята́го Сы́на Бо́жия испове́да, и Христа́. Поне́же бо еди́но, сею́ же отлуча́емо ве́руемо, неподо́бно есть и чу́жде спасе́ния. И не сея́ есть беды́ е́же Го́спода Иису́с Христа́, - или́ Бо́га еди́ного без челове́ка, или́ челове́ка еди́ного без Бо́га, - ве́ровати. По воскресе́нии же Госпо́дни е́же в пра́вду я́ве со и́стиннем те́лом его́ бысть: поне́же бо не ин воскре́се, но распны́йся и умры́й. Чесо́го ра́ди у́бо ино́го четы́редесяте дний по воскресе́нии пребы́сть? Но да от вся́кия напа́сти ве́ру на́шу учи́стит. Глаго́ля бо свои́м ученико́м, и ходя́й с ни́ми, и водворя́яся. Изве́сте е́же и многоиспы́тно, я́ко оста́вити осяза́ну Ему́ бы́ти от них, да вся́ко и́хже прежаса́ше неве́рование. Того́ ра́ди две́рем затворе́ным вни́де ко ученико́м и дунове́нием свои́м по́дал есть Святы́й Дух, дарова́в свет ра́зума боже́ственых писа́ний, и открыва́ше недоумева́емая. И па́ки сами́х язв ребр и пронзе́ние гвозди́иное, и вся но́вая язв показа́ше зна́мения глаго́ля: «Осяжи́те Мя и ви́дите, я́ко дух пло́ти и ко́сти не и́мать, я́коже мя ви́дите иму́ща», я́ко да позна́ется пребыва́я в том сво́йство боже́ственаго и челове́ческаго естества́ неразлу́чно. И та́ко научи́мся сло́ву.

Не то бы́ти е́же есть плоть, в не́йже та́йне ве́ры ле́гко сый и без ума́ сый Евти́хий, и́же мня́ше неприча́стна Его́ су́ща пло́ти. Е́же естества́ на́шего во единоча́днем Сы́не Бо́жии не позна́, ни смире́ния ра́ди, ни сла́вы делма́ воскресе́ния, ни отве́та убоя́вся, боже́ственому апо́столу евангели́сту Иоа́нну глаго́лющу: «Всяк Дух испове́дуяй Иису́с Христа́ в плоть прише́дша, от Бо́га есть. И всяк Дух разлуча́яй Иису́с Христа́, от Бо́га несть». И се есть анти́христов. Что же есть разлуча́яй Иису́с Христа́? Е́же челове́ческо естество́ от Него́ отлуча́ти и та́инство, и́мже спасо́хомся еди́нем. И искуша́ти же, в пу́стошь шата́нием безу́мно пиша́ и те́мно разумева́я о естестве́ те́ла Христо́ва. Ну́жне е́же о стра́сти Его́, ра́вно неви́стным и несмы́сля. И́бо крест Влады́чень лжу, - а́ще бы име́л стра́сти за мирско́е спасе́ние я́вльшияся и пои́стинне бы́вшия, - ника́коже отмета́яся, имже разуме́ти бы ему смерть я́ко пло́тию бысть, то не бы не отмета́лся, а́ще бо пои́стинне разуме́л на́шея пло́ти бы́вша Бо́га челове́ка, Его́же ве́дый стра́стна бы́вша. Поне́же бо у́бо отверже́ние и́стинному те́лу, отверже́ние есть и стра́сти теле́сныя. А́ще сего́ ра́ди прие́млема есть и держи́тся ве́ра христиа́нская, то пропове́дания ева́нгельска да не отвраща́ет своего́ слу́ха, но да разсмо́трит, кото́рое естество́ прободе́но гвоздьми́ на кресте́ ви́сяше, и прободе́ным ре́бром предстоя́щаго при кресте́ во́ина копие́м да помы́слит, отку́ду кровь и вода́ истека́ше, И́же тогда́ Це́ркви Бо́жии ба́ню источи́ и струя́ пития́. Да слы́шит же и блаже́наго Петра́ апо́стола пропове́дующа: «Я́ко очище́ние духо́вное окропле́нна ра́ди быва́ет кро́ве Христо́вы». И не та́ко про́сто почита́ти сего́ апо́стола глаго́люща, ве́дуще, я́ко не тле́нным сребро́м и зла́том искупле́ни бы́сте от су́етнаго ва́шего отцы́ пре́дана жития́, но честно́ю кро́вию, я́ко чис́та а́гнца и непоро́чна Христа́ Иису́са. И блаже́ннаго Иоа́нна апо́стола свиде́тельству, да не сопроти́в глаго́лет глаго́лющему: «И кровь Иису́са Сы́на Бо́жия очища́ет ны от всего́ греха́». И па́ки: «И сия есть [победа], победи́вшая мир, ве́ра на́ша». Кто же есть победи́вый мир? Но ве́руяй, я́ко Иису́с есть Сын Бо́жий сей, гряды́й водо́ю и кро́вию. Иису́с Христо́с не водо́ю то́кмо, но водо́ю и кро́вию: и Дух есть послу́шествуя, поне́же Дух [послу́шества] есть и́стинна. Три бо суть послу́шествующии: Дух, вода́ и кровь. И та триеди́но суть: Дух я́ве освяще́нию, кровь же избавле́нию, вода́ же креще́нию. Я́же триеди́но суть и неразделя́ема: и ничто́же от тех своего́ разлуча́ется совокупле́ния. Поне́же Вселе́нская Це́ркви се́ю ве́рою живе́т и возраста́ет, да не кроме́ и́стиннаго Божества́ челове́чество бу́дет, ни кроме́ и́стиннаго челове́чества Божество́ ве́руемо бу́дет.

К на́шему же глаго́лу и послуша́нию, я́коже Евти́хий отвещева́ше глаго́ля? «Испове́дую, рече́, и аз от двою́ естеству́ бы́ти Го́споду на́шему. Но пре́жде соедине́ния. По соедине́нии же еди́нство испове́дую». Отчужи́тися пои́стинне окая́ннаго, учужде́ному испове́данию. К сему́же ни еди́ному же судя́щих та́ко пови́ннаго не извести́ти и не запрети́ти, но та́ко безу́мна сло́ва претещи́ и премину́ти, я́коже слы́шаных ни во что́же поло́жшем, ни проти́вляшеся. И егда́ па́че тако́ю мы́слию нече́ствовавшее, е́же глаго́лати, я́ко от двою́ естеству́ пре́жде вочелове́чения Единочадый есть Сын Божий: е́же есть отме́тно всея́ и́стинны, я́ко со Сло́вом пло́ти бы́вши, еди́ному в Нем естеству́ бы́ти. Да бы Евти́хий не име́л себе́ пра́ва и не пови́нна от глаго́ланных от него́. Поне́же ни от еди́ного же в ва́шем собо́ре загради́шася того́ уста́, да того ра́ди твое́й любви́ воспомина́ю, тверде́е бра́те честны́й, да а́ще щедро́т ра́ди Бо́жиих уста́вится во отве́т де́ло неуче́наго челове́ка и па́губы сея́ сущия, в мы́сли его́ учи́стится. Я́коже чин соде́янных явля́ет до́бре разлучи́ти начи́н от своея́ ре́ти: егда́ на́шим отве́том одержи́мь, по́чнет испове́дати и глаго́лати о себе́, его́же пре́жде не пропове́даше и в на́шей безмо́лвствует ве́ре, ея́же пре́жде бе́яше чуждь. Но тогда́, егда́ в про́клятей и нечести́вей за́поведи разуме́ти не восхоте́, я́коже и ва́ше бра́тство разуме́, в свое́й прельсти́ того́ пребыва́юща, я́ко досто́йну ему́ бы́ти изверже́ния, о ни́хже а́ще ве́рне и по и́стине боле́знует. А́ще бо и по́зде у́бо, оба́че разуме́л бы, я́ко на по́льзу епи́скопское госпо́дьство на того́ подви́жеся: или́ а́ще к конча́нию отве́та разуме́ет, я́коже вся от того́ зле возглаше́ная явле́ным гла́сом и свои́м препре́тися написа́нием: то несть отча́яния досто́ин, но поми́лования. Поне́же бо Госпо́дь наш, и́стинный благи́й Па́стырь, ду́шу Свою́ положи́в за овца́, И́же и прии́де душ челове́ческих спасти́, а не погуби́ти, и нам хо́щет бы́ти подо́бно Своея́ бла́гости: да у́бо согреша́ющая целому́дрствит пра́вду, возвраща́ющая же ся - ника́коже ми́лостивнаго преще́ния отри́нет тогда́ пои́стине, тогда́ [со] благи́м плодо́м ве́ры по и́стинне. Отмсти́т же, егда́ пе́рвый злоче́стия нача́льник свои́м злове́рием препре́тся.

Феодо́сий: Ра́зум же у́бо си́цев есть о сей ве́щи, я́коже есть мне́ти: Я́ко блаже́ный Флавиа́н не имя́ше та́ко на тща́ние, е́же о бы́вших Евти́хия ра́ди, а́бие писа́ти к Ри́му: а́ки не Вселе́нскому собо́ру бы́вшу, но своея́ ему́ сущу вла́сти скриви́вшему в ве́ре, и обличе́ну и не ка́ющуся, изверже́ну бы́вшу. Ны́не же, не по изволе́нию, но владу́щими посыла́емь ко Ефе́су, посыла́ет о бы́вших гра́моты, дая́ ви́дети вели́кому Лео́нту. Ея́же ра́ди вины́ и па́па не ве́дый, вписа́ сие́ посыла́ние а́ки к живо́му су́щу: о́ному же преста́вльшуся, и́де, и достожа́лостну смерть я́ко Ааро́н и Моисе́й прия́т, Бо́гу та́ко попусти́вшу, судба́ми и́миже весть Сам. О́ коли́ку и какову́ недоумева́нную скорбь и тугу́ имя́ху тогда́ на́ши отци́ святи́и! И́же и про́кляти бы́вше от ерети́к, я́ко к сему́ и безго́дная пасту́ша смерть: печа́ль с тоско́ю тем расчерпа́вше го́ркаго пития́ се́тованием растворя́ема, и уны́нием исполня́ема ча́ша, ея́же не беяше ка́ко уклони́тися. Но преблаги́й Бог, И́же промы́сленик на́шему спасе́нию, до конца́ не попусти́ тому́ на до́лзе бы́ти та́ко, по апо́столу утеша́я и печа́льныя. Те́мже и уте́ши а́бие, и враги́ Своя́ посрами́ кля́твами стра́шными и неразре́шными у́зами, нека́ющася обложи́в, мрак ерети́ческаго смра́да разгна́в: и восия́в пра́ведное со́лнце, и освети́в благоуха́нием пра́выя ве́ры ра́зумы же и душа́ от всего́ се́рдца. И по и́стинне самого́ Того́ ско́раго на по́мощь призыва́ем со упова́нием, я́коже и песнопе́вец возглаша́ет и до ны́не во всех христолюби́вых усте́х глаго́ля: «Бу́ди Го́споди ми́лость Твоя на нас, я́коже упова́хом на Тя». Я́коже и бысть. Его́же ра́ди бу́ди и́мя Госпо́дне благослове́н отны́не и во вся безконе́чныя ве́ки. Ами́нь.

Да у́бо от сего́ до́лжествено есть ве́дети, я́ко несть сам па́па Лео́нт от Ри́ма на собо́р приходи́л, но сию́ еписто́лию я́ко самого́ того́ ве́рха апо́стольскаго сопресто́льника иму́ща, - реку́же Анато́лий и и́же с ним святы́й собо́р, - еретики́ прокля́ша, ве́ру же правосла́вную утверди́вше се́ю еписто́лиею, уже́ изнемо́гшу, и до́лу прекло́ньшуся, и нога́ми попираему злове́рных челове́к. Сию́ же еписто́лию я́коже Дави́д, сей собо́р святы́й, я́ко от тобо́льца , от ума́ Лео́нтова взе́мше, я́ко ка́мык, и на своя язы́ки я́ко на пращу́ нало́жше, си́лою Свята́го Ду́ха святи́и отцы́, верго́ша яко на Голиа́да на еретики́. И велехва́лящагося ерети́ческими усты́ диа́вола пора́жши, и главу́ его́ отсе́кше, побе́дную песнь победополо́жнику Христу́ Бо́гу до́брии победи́тельницы, не в ты́сящах, но во тмах па́че воспева́ху. А́ки на стена́х Иерусали́млех, в це́ркви Христо́ве, а́ки сио́нския де́вы де́вствеными душа́ми, я́ко не оскверне́ными пре́лестию е́реси, но уневе́щаными Жениху́ Христу́ Бо́гу, я́ко о́ны де́вы му́дрыя. И́хже моли́твами, бу́ди нам рачи́телем слове́с их вхо́да, боже́ственаго черто́га получи́ти, си́це воспева́ющим с боже́ствеными отцы́: «Воста́ я́ко спя Госпо́дь, и порази́ враги́ Своя́ вспять», подая́ нам вели́кую и бога́тую ми́лость, ны́не и при́сно и во ве́ки веко́в. Ами́нь.

Сие́ рцы высокогла́сно: Ева́нгельския ра́ди за́поведи сие́ посла́ние а́ки тала́нт торжнико́м нам преда́вшему, христолюби́вому благоро́дному свято́ши ве́чная па́мять.

Лю́дие: Ве́чная па́мять.