Неделя святых отец собора иже в Никеи

По пра́зднице пресла́внаго Вознесе́ния Го́спода на́шего Иису́са Христа́, па́мять пра́зднуем в сию́ неде́лю, святы́х и богоно́сных оте́ц на́ших, три́ста и осмьна́десять и́же при Константи́не вели́цем и правове́рнем христиа́нстем царе́, соше́дшимся на злочести́ваго А́рия, бы́вшаго презви́тера во Александри́и, ху́лящу же на Сы́на Бо́жия Го́спода на́шего Иису́са Христа́, И́стиннаго Бо́га: тварь бо глаго́лаше Его́ бы́ти нечести́вый А́рий, а не Единосу́щна Бо́гу и Отцу́: и я́ко бя́ше иногда́, и егда́ несть был. Отню́дуже я́ко врага́ и́стине, ку́пно со единому́дрствующими ему́, святы́й собо́р прокля́в отве́рже. Пре́жде же сих прокля́ его святы́й Петр, архиепи́скоп александри́йский и му́ченик. И нима́ло восхоте́ прия́ти его́, ни во вре́мя самого́ муче́ния его́. Мно́гим у́бо поклоня́ющим коле́на свято́му, и прия́ти его́ моля́щимся, святы́й Петр и му́ченик глаго́лаше: «Яви́мися Госпо́дь, раздра́ну ри́зу нося́щь. И вопроси́вшу же ми Его́: «Кто Ти раздра́ ри́зу, Го́споди?», рече́: «А́рий ми раздра́. Но соблюди́ не приими́ его́, скве́рнен у́бо есть глаго́лаше: и в сем ве́це, и в бу́дущем»». И всем запоручи́ отвраща́тися его́, и не име́ти с ним ни еди́но приобще́ние. Посрами́ у́бо сего́ святы́й собо́р, и прокля́т, и отве́рже, и всех единому́дрствующих ему́. Правосла́вную же ве́ру укрепи́ и утверди́.

Единосу́щна Отцу́ Сы́на пропове́да, Творца́ всем, а не тварь, но Бо́га И́стинна, преве́чна от Отца́ ро́ждшася, а не сотворе́на: и Влады́ку и Го́спода. Я́коже и свято́е зна́мение правове́рныя ве́ры испове́дает, е́же есть: «Ве́рую во еди́наго Бо́га Отца́ Вседержи́теля». И́же святи́и си́и, три́ста и осмина́десять, богоно́снии отцы́, духнове́нием свята́го Ду́ха изглаго́лаша. Патриа́рси же, ели́цы пе́рвии вожди́ бе́ху, свято́му и Вселе́нскому собо́ру сему́, бы́ша си́и: Селиве́стр Ри́мский, Алекса́ндр Константи́на гра́да, Алекса́ндр Алекса́ндрский, Евста́фий Антиохи́йский и Мака́рий Иеросали́мский. Сий у́бо пра́здник Це́рковь Бо́жия днесь пра́зднует. Правосла́вным у́бо и святы́м отце́м, я́ко о благоче́стии подви́гшимся и о правосла́вней и о святе́й ве́ре, ве́чную па́мять я́сно и благода́рно прославля́ет, А́рия же, и Саве́лия, и Фоти́на, и всех ку́пно ерети́к, анафематиса́ет и отрева́ет. Да́же бо уве́дят ерети́цы, от самы́х тех Влады́чних глаго́л, я́ко «чу́ждих себе́ от Сы́на Бо́жия сотвори́ша». Отто́ргшеся и отсе́кшеся, и отве́ргшеся от свята́го телесе́ Це́ркве Христо́вы, я́ко у́ды согни́ли и ме́рзцы. Сего́ ра́ди ева́нгельстии си́и глаго́лы прочита́ются днесь.

Ева́нгелие: Во вре́мя о́но рече́, возве́д Иису́с о́чи Свои́ на не́бо и рече́: «О́тче, прии́де час, просла́ви Сы́на Своего́, да и Сын Твой просла́вит Тя».

Толкова́ние: Го́споду на́шему Иису́су Христу́ и Бо́гу гряду́щу на страсть, погреба́льныя глаго́лы веща́ет, к любо́вным и ученико́м свои́м глаго́ля: «В ми́ре скорбь име́ти хо́щете, но дерза́йте Аз победи́х ми́ра». Мно́гаже и и́на глаго́лаше им, и к беда́м их подви́г и поостри́в, и научи́в дерза́ти, и кре́пко терпе́ти находя́щая: на моли́тву приходи́ти по поуче́нии, наказа́я нас в напа́стех вся оставля́ти и к Бо́гу прибега́ти. Возве́д же о́чи Свои́ на не́бо, науча́я и нас та́ко твори́ти, и иска́ти та́мо всем злым разреше́ние и свобожде́ние.

«О́тче, прии́де час, просла́ви Сы́на Своего́, да́же и Сын Твой просла́вит Тя». Не и́щет сла́вы прия́ти от Бо́га и Отца́, пресла́вный Сын и Бог, и́же со Отце́м Единосла́вимь, и Единочти́мь и Сопресто́лен, име́яй при́сно вся О́тчая, и всем вся да́руяй, ниже́ под вре́мены и часы́ есть, веко́м Творе́ц, И́же времена́ и ле́та во вла́сти Свое́й поло́жь.

Но «час» рече́: подо́бное вре́мя, в не́же пострада́ти разсмотри́, и Свое́ю стра́стию умертви́ти смерть, и ме́ртвыя оживи́ти, Воскресе́нием Свои́м е́же от ме́ртвых.

«Прии́де час» глаго́лет: вре́мя есть уже́, О́тче, на стра́сти приити́ Ми.

«Просла́ви Сы́на Своего́», сла́ву нарица́я Крест и Воскресе́ние. Зане́же возве́д очеса́ на не́бо и такова́я глаго́лаше, легча́йше се творя́, апо́столы челове́чески утеша́я. Поне́же бо рече́ им «в ми́ре скорбь име́ти хо́щете» и восколеба́ се́рдца их, воздвиза́ет па́ки их моли́твою, наказа́я нас не малоду́шествовати в напа́стех и беда́х, но прибега́ти Го́сподеви, и от Него́ проси́ти по́мощь и заступле́ние. А́ще бо и во́лею страда́ше Влады́ка, и я́ко Бог не тре́боваше посо́бие , но я́ко челове́к се твори́т, о́браз нам предае́т и пра́вило, побежда́ти моли́твою оскорбля́ющих и оби́дящих нас, ви́димых и неви́димых враг. Прии́де бо Христо́с, не то́кмо Себе́ яви́ти, но и нас наказа́ти вся́кой доброде́тели. Наказа́ющий же, не то́кмо словесы́ наказа́ти до́лжен есть, но и де́лом.

«Просла́ви Сы́на Своего́, да́же и Сын Твой просла́вит Тебе́». Си́речь откры́й, яви́ О́тче челове́ком неве́дящим и неве́рующим в Мя, и покажи́ им сла́ву ю́же име́х, и име́ю при́сно от Тебе́, я́ко Сын И́стинен, и Бог от Бо́га И́стиннаго и Отца́.

«Да́же и Сын Твой просла́вит Тебе́». Да́же сотворю́ и Аз челове́ки ве́ровати и позна́ти, я́ко тако́в есть Оте́ц Мой и Бог, яко́в же есмь и Аз, Единоча́дый Сын Твой и Бог, Единосу́щен, и Единочти́мь, и Единосла́вимь.

«Ви́девый бо Сы́на, ви́дел есть Отца́». Аз у́бо просла́влюся, Сын Твой позна́вся. Ты же па́ки просла́вишися, Оте́ц Мой ве́ровався. Сла́ва же вои́стину О́тчая, е́же ве́ровати Сы́ну Его́. Сы́ну же па́ки сла́ва, е́же позна́ну бы́ти Отцу́ Его́.

Ева́нгелие: И я́коже дал еси́ Ему́ власть на вся́кой пло́ти, да все е́же дал еси́ Ему́, даст им живо́т ве́чный.

Толкова́ние: Сла́ва Бо́жия есть, е́же всем и всегда́ блага́я дава́ти. Не то́кмо бо во Иуде́ю прии́де пропове́дание, но и во всю Вселе́нную. Сего́ ра́ди глаго́лет: «И власть на вся́кой пло́ти». Ева́нгельское же пропове́дание, на всех челове́к явля́ет благо́е дарова́ние, и от сего́ быва́ющий живо́т и спасе́ние ве́чное, а́ще бо и неве́роваша вси, свои́м изволе́нием удержа́вшеся и возврати́вшеся.

Ева́нгелие: Се же есть живо́т ве́чный, да зна́ют Тебе́ Еди́наго И́стиннаго Бо́га, и Его́же посла́л еси́ Иису́са Христа́.

Толкова́ние: «И́стиннаго Бо́га» глаго́лет. Поне́же бо покланя́ющеися куми́ром, бо́ги сия́ нарица́ху лжу́ще, бо́зи же не бе́ху, но лука́вых и злых челове́к, и бесо́вска обли́чия. «Еди́наго же И́стиннаго Бо́га», рек, и Отца́, глаго́лет: Бо́жие же и О́тчее позна́ние не прие́млет никто́же, но то́кмо Сы́ном. Позна́ние же и́стинное есть - де́лы благи́ми ве́ра. Ве́рованием же пра́вым - позна́ние Бо́жие быва́ет.

Ева́нгелие: Аз просла́вих Тя на земли́. Де́ло соверши́х, е́же дал еси́ Мне, да сотворю́.

Толкова́ние: На земли́ рече́ просла́вил есть Отца́ Христо́с. Поне́же бо на небесе́х просла́влен бя́ше от а́нгел и покланя́емь, сла́ву же сию́ глаго́лет, е́же от челове́к слу́жбу и поклоне́ние быва́емое и приноша́емо Ему́.

Ева́нгелие: И ны́не просла́ви Мя Ты О́тче, от Тебе́ Сама́го, сла́вою ю́же име́х у Тебе́, пре́жде мир не бысть.

Толкова́ние: Хотя́ показа́ти нам Христо́с плотска́го устрое́ния Его́ та́йну, сла́ву про́сит от Бо́га и Отца́. Еще́ бо естество́ плотско́е не бя́ше просла́вилося, ниже́ нетле́ние прия́ло бя́ше, ниже́ престо́лу Ца́рскому бя́ше причасти́лося. По Воскресе́нии же и Вознесе́нии - и сла́ве, и нетле́нию, и престо́лу Ца́рскому причаща́ется и прие́млет, и вся тварь поклоня́ется Ему́.

Ева́нгелие: И яви́х И́мя Твое́ челове́ком.

Толкова́ние: Аз Тебе́ сказа́нна и явле́на всем челове́ком сотвори́х. Никому́ же от всех челове́к позави́дев, удержа́х поуче́ние. А́щели же не вси ве́роваша, несть от Мене́ вина́, но изволе́ние неве́ровавших.

Ева́нгелие: И́хже дал еси́ мне от ми́ра, Твои́ бя́ху, и Мне их дал еси́, и сло́во Твое́ сохрани́ша.

Толкова́ние: На утверже́ние и извеще́ние ученико́м глаго́лет сия́, показу́я, я́ко и́стинно прилежа́щих к Нему́, и ве́рующих пра́во, и соверша́ющих святы́я Его́ за́поведи, Свои́х и при́сных и́мать, и Оте́ц лю́бит их, и ми́лует и промышля́ет о них. Вся у́бо Сыно́вняя - О́тча суть, та́коже и О́тчая - Сыно́вня суть. Не у́бо ны́не прия́т сих Сын, но Оте́ц име́яше, и Сыно́вни бе́ху.

«Яви́х и́мя Твое́ челове́ком». Яви́бо и́мя Отца́ Сын, поне́же бо, а́ще и ве́дяху Его́, но не я́ко Отца́ ве́дяху, но я́ко Зижди́теля то́кмо. И жи́дове то́кмо зна́ху Его́, но ни они́ вси. Единоро́дный же Сын и Сло́во Бо́жие и О́тчее на земли́ я́влься, Отца́ Его́ яви́, и словесы́, и де́лы позна́на Его́ челове́ком сотвори́. И́же бо Его́ Сы́на Бо́жия показа́, я́ве у́бо я́ко и Отца́ споказа́ше.

Ева́нгелие: Аз рече́ о сих молю́. Не о всем ми́ре молю́, но о тех и́хже дал еси́ Мне, я́ко Твои́ суть. И Моя́ вся, Твоя́ суть. И Твоя́, Моя́. И просла́вихся в них.

Толкова́ние: Па́ки о ученице́х глаго́лет, многоразли́чно сих утеша́я, да́же позна́ют и любо́вь ю́же и́мать на них. Не о сих же то́кмо сия́ глаго́лет, но и о всех ве́рующих вонь уче́нием учени́к Его́. «Ми́ра» же нарица́ет неве́рных люде́й, и́же не суть Бо́жии: «Отчужди́ша бо ся рече́ гре́шнии от чре́ва». Не о сих уже́ му́дрствующих мирска́я молю́ся, но и́хже дал Ми еси́. Да́же бо не мне́ти и́муть не́цыи, я́ко вско́ре дано́ бысть Ему́ нача́льство и власть, глаго́лет: «Я́ко Твои́ бя́ху, и Мои́ бя́ху. Твоя́ бо вся, Моя́ суть». И я́ко име́ю их Аз, и Ты и́маши, и неотъя́ти бы́ша. «Моя́ бо вся, Твоя́». Я́же бо ви́дит кто во Отце́, та́же ви́дит и в Сы́не. Не по прия́тии существа́, но по существу́. И́хже бо и си́ла равна́, равно́ ве́де и де́йство: Христо́с бо Бо́жия Си́ла и Бо́жия Прему́дрость.

Ева́нгелие: О́тче Святы́й, соблюди́ их во И́мя Твое́.

Толкова́ние: Си́речь, Cвое́ю по́мощию и де́йством боже́ственым сохране́ни бу́дут.

Ева́нгелие: И́хже дал еси́ мне, сохрани́х. И никто́же от них поги́бе, то́кмо сын поги́бельный.

Толкова́ние: Ели́ко по Мне глаго́лет Христо́с, ничто́же не оскуди́х, но соблюдо́х их и всеобра́зно подвиго́хся о сих укрепле́нии. А́ще ли же от себе́ поги́бе Иу́да, и мно́зи ини́и пото́м отмета́ются на погубле́ние - ничто́же се до Мене́: не Мне у́бо отрева́ющу и оставля́ющу, отступа́ют от пути́ пра́ваго. Что у́бо Ми подоба́ше сотвори́ти в них, и не сотвори́х? Ну́ждею не привлача́ю, ни понужда́ю. Приходя́щих бо ко Мне во́лею Свое́ю не изгоня́ю вон, ниже́ отрева́ю, ни оставля́ю до́бре пребыва́ющих в за́поведех Мои́х: злых же и лука́вых оставля́ю самовла́стно ходи́ти.

Ева́нгелие: Ны́не же к Тебе́ иду́. И сия́ глаго́лю в ми́ре, да и́мут ра́дость Мою́ испо́лнену в себе́.

Толкова́ние: Да́же отдохну́т и обезпеча́луются ученицы́, сия́ глаго́лю в ми́ре на утеше́ние сим и да́же и́мут ра́дость Мою́ испо́лнену в себе́.

Сию́ бо ра́дость и весе́лие бра́тие, име́ти в себе́ всеобра́зно потщи́мся. Су́щаго в нас бесну́ющагося и неи́стовствующаго бе́са низложи́м, я́коже бо и святи́и богоно́снии отцы́ - А́рия и Саве́лия, и единому́дрствующих сим. Соблюда́юще кре́пко бра́тие, я́же святы́ми си́ми отцы́ завеща́нная боже́ственая правосла́вная поуче́ния, я́же оне́ми осужде́нна и отрече́нна, ху́льная преда́ния и разуме́ния, отвраща́емся и омража́ем. Се у́бо есть ве́чный живо́т, да́же мы́слию разуме́ем, и се́рдцем ве́руем, и усты́ испове́даем, Еди́наго И́стиннаго Го́спода на́шего Иису́са Христа́, и́мже Бо́га и Отца́ позна́хом, и Животворя́щий Святы́й Дух к нам прии́де.

О́тче Святы́й, соблюди́ нас и́менем возлю́бленнаго Сы́на Твоего́, Его́же дал еси́ нам, и благода́ти Животворя́щаго и Пресвята́го Ду́ха Твоего́. И никто́же от нас поги́бнет, от и́стинных Твои́х поклони́телей, всеси́льная свята́я Тро́ице единосу́щная, но враг наш неусыпа́емый и сопоста́т лю́тый, под нога́ма нас немощны́х паде́т. Я́ко писа́ние Твои́х за́поведей и повеле́ний, в нас содева́ется и соверша́ется. От дия́воляго же томле́ния и напа́дания, ненави́дящих нас враг изба́вльшеся, невре́дно поживе́м, Тобо́ю укрепля́еми. И та́ко живу́ще, и́мамы ра́дость Твою́ испо́лнену в себе́. И от сея́ исполня́еми, безнапа́стно многомяте́жнаго жития́ сего́ пре́йдем пучи́ну и на твое́ ти́хое приста́нище прии́дем: я́ко Тобо́ю дае́тся вся́ко бла́го и спасе́но, и Тебе́ сла́ву возсыла́ем, Отцу́ и Сыну и Свято́му Ду́ху, ны́не и при́сно и во ве́ки веко́в. Ами́нь.

Я́коже ри́тори и вети́я, си́речь летопи́сцы и песнотво́рцы, прикланя́ют своя́ слу́хи в бы́вшая между́ цари́ ра́ти и ополче́ния, да украся́т словесы́ и возвели́чат му́жествовавшая кре́пко по свое́м цари, и не да́вших в бра́ни плещу́ враго́м, и тех сла́вяще, похвала́ми велича́ют - кольми́ па́че нам ле́по есть и хвалу́ к хвале́ приложи́ти хра́брым вели́ким воево́дам Бо́жиим, кре́пко подвиза́вшимся по Сы́не Бо́жии и своем́ цари́ и Го́споде на́шем Иису́се Христе́, по Не́мже ополчишася на еретики́ святи́и на́ши отцы́, архиепи́скопи и епи́скопи, и́хже число́м три́ста и осмьна́десять, по числу́ дре́вняго Авраа́ма. Но Авраа́м теле́сную сотвори́ побе́ду ви́димым во́ем, а си́и во духо́вной одоле́ша ра́ти и неви́димыя победи́ша бе́сы. Авраа́м пять царе́й с си́лами их погуби́ и Ло́та сыно́вца своего́ возврати́. А си́и вся еретики́ духо́вными иссеко́ша мечи́ и Це́рковь Бо́жию возврати́ша от кумирослуже́ния. Авраа́ма возвра́щшася от се́чи ца́рски, благослови́ его́ Бо́жий иере́й Мелхиседе́к и хле́бы с вино́м изнесе́. А святы́я на́ша отцы́ по низложе́нии и прокля́тии богобо́рец ерети́к, Сам Бог оте́ц благослови́ и прослави, и Святы́й Дух венча́ и освяти́. А Сын Бо́жий за он хлеб и вино́, Свое́ честно́е Те́ло и Святу́ю Кровь тем предложи́ в безконе́чный живо́т. Не то́кможе тем еди́нем, но и всем ве́рным.

Но молю́ ва́шу любо́вь бра́тие, не зазри́те ми гру́бости: ничто́же бо от своего́ ума́ вопису́ю зде, но прошу́ от Бо́га да́ра сло́ву на прославле́ние Святы́я Тро́ицы. Глаго́лет бо: «Отве́рзи своя́ уста́ и напо́лню я́». Тем приклони́те ума ва́шего слу́хи, о Христе́ бо начина́ю сло́во, Его́же А́рий от Бо́га Отца́ отсещи́ мы́сляше.

Сей А́рий поп бе́яше Алекса́ндрськия Це́ркви. Па́че же рещи́: сосу́д сатани́н бе и волк, о́вчею ко́жею покрове́н. Сему́ бе́яше поруче́но учи́ти Христо́ве ве́ре лю́ди. Но поне́же не бе от де́лателей виногра́да Христо́ва, нача́т зло́е се́мя се́яти, по нему́же те́рние и волче́ц прозяба́ше: ху́льник бо бе, а не благове́стник. И глаго́лаше: «Несть Христо́с Сын Бо́жий, но вся тварь ча́да суть Бо́жия. А Сы́ном Бо́жиим нарица́ется тварь». И се уве́дав архиепи́скоп Петр, изри́ну его́ из Це́ркве. А́рий же совокупля́я собо́рища, свое́й е́реси учя́ше наро́ды, Бо́гови попусти́вшу таково́му иску́су от диа́вола на Святу́ю Це́рковь приити́: и́бо сему́ на долзе бывшу вре́мени, распространяшеся душегу́бная та е́ресь. И до́йде зло́е уче́ние то до Антиохи́и и до Византи́и, и мно́зи оставля́юще Христо́ву веру, приста́ша е́реси его́.

Богоизбра́нный же и правове́рный царь Константи́н, ви́дев це́рковь Бо́жию А́рием возмяте́ну, не ху́де опеча́лися: и повеле́ от всея́ вселе́нныя собра́ти епи́скопы, и приити́ всем в Ники́ю. Помяну́ бо блаже́ный проро́ческое сло́во глаго́лющее: «Собере́те ему́ преподо́бныя его́, да ся просла́вит Бог во све́те святы́х Свои́х». И ско́ро совокупи́шася святи́и на́ши отцы́, п о су́ху и по мо́рю, нетру́дно путеше́ствующе, я́ко корабли́ по́лни духо́внаго бога́тства или́ я́ко орли́ апо́стольски укрили́вшеся уче́нием, ле́гцы су́ще те́лом: по́стницы бо бе́ша и смире́ни ду́хом, утверже́ни бо бе́ху Христо́вым Ева́нгелием. Приведе́н же бысть и А́рий со единомы́сленики свои́ми. И внидо́ша вси в дом на то устро́ен, царе́ви же се́дшу на престо́ле и старе́йшины святи́тель Христо́в[ых] одесну́ю его́ на престо́лех посажде́ни бы́ша. А́рий же со свои́ми посо́бники проти́ву вшед, ста, кре́пко вооружи́вся на святу́ю Тро́ицу. И нача́т я́ко стре́лы пуща́ти богоху́льная словеса́, я́ко лев злохи́трием неукроти́мо рыкая, «ему́же кля́твы уста́ его́ по́лна суть го́рести и льсти»: изво́ли бо тму па́че, не́жели свет: ни восхоте́ бо благослове́ния, но возлюби́ кля́тву, и прии́де ему́. Оста́ви небеса́ и позва́вшаго на ня Христа́, и обрати́ся в преиспо́дняя ада со прельсти́вшим его́ зми́ем, и́мже тогда́ сам диа́вол неподо́бная глаголаше. Вели́к бо бе воево́да сатани́н А́рий: но царь его́ уже́ бе свя́зан, тем и во́инство его́ нетве́рдо боря́шеся: бе́ху бо филосо́фи, кни́жницы злохи́трии по А́рии на Христа́ ху́лящеи.

Повеле́ же царь А́риеви пре́жде своя́ уче́ния глаго́лати, и́миже льстя́ше мир, к свое́й па́губе обраща́я. И нача́т окая́нный си́це догматиса́ти: «Что ся вам мнит о Христе́? Я́ко Той не искони́ есть с Бо́гом, ни Единосу́щен Богу Отцу́, ни ра́вен Святому Ду́ху существо́м, ниже́ есть Сло́во Бо́жие в естестве́, ни тем вся ви́димая сотворе́на бысть тварь, ни ви́дим есть Оте́ц Сы́нови, ни воплоти́лся есть Бог в челове́ческое естьство́, но вся тварь небе́сная и земна́я Сын Бо́жий нари́чется». Се же ему́ изглаго́лавшу и мно́жайшая к сим, и́хже не леть есть нам писа́ти, ни вам слы́шати.

К нему́ же возгласи́вше святи́и на́ши отцы́, реко́шя: «Слы́ши А́рие, безгла́вный зверь, нечи́стый ду́ше, окая́нный челове́че, но́вый Ка́ине, вторы́й Иу́до, плотяны́й де́моне, преле́стный зми́ю, церков́ный все́ми ве́домый та́тю, необра́тный разбо́йниче, нераска́емый гре́шниче, неукроти́мый на Христо́ва овча́та во́лче, безбоя́зный святы́я ве́ры разори́телю и хотя́щим ся спасти́ па́костниче, Бо́жий вра́же и сы́ну поги́бели! Сия́ от своего́ ума́, а не от святы́х книг извеща́л еси́. И глаго́леши, е́же твое́ се́рдце умы́сли, а не е́же Бог проро́ком и апо́столом о Свое́м Сы́ну писа́ти повеле́. Но да уве́си и навы́кнеши о Христе, я́ко Той есть Сын Бо́жий, Еди́н Сый от Тро́ица и на́шего ра́ди спасе́ния в после́дняя ле́та воплоти́ся, Сам Бог Оте́ц пе́рвое пове́дает о Свое́м Сы́ну, я́ко Присносу́щен Ему́ есть: «Из чре́ва бо рече́ пре́жде денни́цы роди́х Тя». Ниже́ ка́ко роди́, не таи́т от Свои́х раб, Единосу́щнаго Своего́ Сы́на рожде́ния, о не́мже на Иорда́не и Фаво́ре двокра́т послу́шествова глаго́ля: «Се есть Сын Мой возлю́бленный, о Не́мже благоизво́лих». А о тва́ри не рече́ «роди́х ю́», но Моисе́й та́ко вписа́: «И сотвори́ Бог пятию́ де́ньми всю тварь, ви́димую ели́ко на земли́ и ели́ко на небеси́».

Паки же о вочелове́чении Бо́га Сло́ва, а́нгели послу́шествоваша к па́стырем, глаго́люще: «Сла́ва в вы́шних Бо́гу. И на земли́ мир ,в челове́цех благоволе́ние. Се бо вам благовеству́ем ра́дость ве́лию, я́ко бу́дет всем челове́ком, я́ко днесь роди́ся вам Христо́с, Спас Сын Бо́жий, во гра́де Дави́дове».

Сих не зле разуме́й, но до́бре навы́кни, я́ко Той есть Сын Бо́жий, и воплоти́ся. О сем бо и евангели́ст написа́л есть реки́й: «Искони́ бе Сло́во, и Бог бе Сло́во. И Сло́во плоть бысть, и всели́ся в ны. И ви́дехом сла́ву Его́, сла́ву я́ко Единоча́даго от Отца́, испо́лнь благода́ти и и́стины».

Та́коже и Па́вел, посла́нник Бо́жий и учи́тель язы́ком, о Христе́ глаго́лет: «Вели́ка есть бла́га, ве́рна та́йна: Бог яви́ся в пло́ти и оправда́ся в Ду́се, показа́ся а́нгелом, пропове́дан бысть во язы́цех, ве́рен бысть в мире, вознесе́ся в сла́ве».

И сия́ вся и́стинна суть: вся бо от Бо́га повеле́на суть глаго́лати. О твое́й же е́реси сам Святы́й Дух те́мже апо́столом прорече́, егда́ призва́в в Мили́т ефе́сския свяще́нники: «Ви́дете рече́, я́ко по оше́ствии мое́м вни́дут в вы во́лцы тя́жцы, ста́да Христо́ва не щадя́ще, восторга́ти ученики́ во след себе́». И па́ки к Тимофе́ю о вас же Па́вел глаго́лет: «Я́ко в после́дняя времена́ отсту́пят не́цыи от ве́ры Христо́вы науче́нием де́монским и ду́хом неприя́зненым, лжеслове́сницы, лицеме́ри, и́хже коне́ц па́губа». Да у́бо повине́теся толи́ким свиде́телем, о вочелове́чении Сы́на Бо́жия пове́дующем. А́щели от апо́стол своя́ уклоня́ете слу́хи, поне́ проро́к послу́шайте, пре́жде глаго́лавших о Христе́, я́ко искони́ бе с Бо́гом Отцо́м, и вся Тем бы́ша, и ка́ко в после́дняя ле́та сни́де на зе́млю и с челове́ки поживе́. О сем у́бо препря́т тя проро́цы Святы́м Ду́хом, гла́снее трубы́ пове́дающе, я́ко Христо́с есть Сын Бо́жий, Бог и Челове́к, при́сно Сый Бог, Сия́ние сла́вы, О́браз неви́димаго Бо́га, Его́же вочелове́чения дозря́ще святи́и ти́и мужи́, вси велегла́сно к нам вопию́т о благове́щении по́сланном к Де́ве арха́нгелу, и о зача́тии от Свята́го Ду́ха, и о зна́мении звезды́, ве́дшей пе́рсы к ро́ждешемуся Бо́гу в Вифлее́ме, о младе́нстве Ве́тхаго де́ньми, и о креще́нии Его́ очища́ющем грехи́, и о отверже́нии ве́тхаго Зако́на, и о пресла́вных Его́ чудесе́х, и о преда́нии Его́ от ученика́, и за весь мир умре́тии, о сше́ствии во ад, и о воскресе́нии от ме́ртвых, о Святе́м Дусе, Его́же дал есть апо́столом, о вознесе́нии Его́ на небеса́, и о седе́нии одесну́ю Бо́га Отца́, и о вторе́м Его́ прише́ствии, егда́ прии́дет суди́ти ми́ру и возда́ти кому́ждо по дело́м его́.

О сих же всех препреша и посрами́ша еретики́, и прокле́нше богоху́льника А́рия и с его́ единомы́сленики изри́нуша и́ из Це́ркве, и просла́виша Иису́с Христа́ Сы́на Бо́жия су́ща, и утверди́ша Це́рковь Бо́жию апо́стольскыми за́поведьми, и научи́шя всех ве́ровати во Святу́ю Тро́ицу, Единосу́щну и Неразде́льну, Отца́ и Сы́на и Свята́го Ду́ха: и повеле́ша покланя́тися в Тро́ице Еди́ному Бо́гу.

Бысть же сий пе́рвый собо́р при Константи́не святе́м, правове́рнем цари́, в двадеся́тное ле́то ца́рства его́. И той заточи́ А́рия ху́лившаго Христа́ Сы́на Бо́жия, и возврати́ся боле́знь его́ на главу́ его́, и на верх его́ неправда его сни́де: тому́ бо рече́ Госпо́дь не бу́дет проще́ния, ни в сий век, ни в бу́дущий: но и зде проклина́емь есть, и та́мо го́рце му́чимь. Собо́р же святы́х оте́ц триехсо́т и осмина́десяти освяти́ша и пра́здновати повеле́ша. Бе́ху же старе́йшины собо́ру мужи́ святи́и чудотво́рцы: Селиве́стр, па́па Ри́мский, и́же креще́нием Константи́на царя́ от прока́зы очи́сти и мно́га и и́на сотвори́ чудеса́, Митрофа́н патриа́рх Царя́ гра́да, и́же слепцу́ о́чи сло́вом отве́рзе и немо́му моли́твою проглаго́лати сотвори́, Алекса́ндр архиепи́скоп Алекса́ндрьский, проро́ческим укра́шен да́ром, Евста́фий Антиохи́и и Мака́рий Иерусали́мский, патриа́рха су́ща и знамено́сца, Вит, и Вике́нтий, и с Пафну́тием Нико́лае, честни́и митрополи́ти и чудотво́рцы, и ини́и мно́зи святи́и епи́скопи, в них́же бе и богоблаже́нный Спиридо́н, и́мже сотвори́ Бог чу́до в собо́ре: наче́ншу бо ему глаго́лати к филосо́фом, и́же по А́рии пря́хуся, ви́деша огнь из уст его́ исходя́щь: и отве́ргшеся А́рия, ве́роваша во Святу́ю Тро́ицу, и бы́ша христиа́не Бо́жиею благода́тию.

Да коея́ че́сти и похвалы́ не суть досто́йни вели́цыи ти́и Христо́ви святи́тели, та́ко подвиза́вшеся по Христе́, я́ко и апостоли, и того́же апо́стольскаго престо́ла и венца́ сподо́бишася?

О́ богоблаже́ннии отцы́, правове́рныя веры прави́тели, ве́рнии и недре́млющеи святы́я Це́ркве стра́ждеве, за ню́же и до кро́ве проти́ву враго́м брань поста́висте: не убоя́вшеся царе́й и челове́ческаго стра́ха, ни мучи́тель претя́щих о́бщею сме́ртию, ни па́ки вре́менныя ра́ди че́сти ослабе́вше, ни преврати́сте Госпо́дня сло́ва, ни преда́сте на лжи и́стины: но я́ко науче́ни бысть от апо́стол, та́ко и пожи́сте: я́ко нача́сте, та́ко и оконча́сте. Добрии Христо́ва ста́да па́стырие, зане́же и душа́ своя́ положи́сте, не даду́ще во́лку ко а́гнцем прибли́житися, но на па́жити Бо́жия зако́на це́лы и многопло́дны упа́сше, до́ндеже и во огра́ду го́рняго Иерусали́ма жезло́м ва́шего уче́ния допрова́дисте!

О́ богоблаже́ннии святи́тели, богонасажде́ннаго виногра́да до́брии де́лателие, от него́же вселе́стное искорени́сте те́рние, и богоразу́мие во вся челове́ки присади́сте, и оляде́вшую грехми́ на́ших серде́ц зе́млю ева́нгельских слове́с ра́лом возде́ласте!

Вы есте́ реки богонасажде́ннаго рая́, напои́вши весь мир спаси́тельнаго уче́ния и грехо́вную скве́рну струя́ми ва́шего наказа́ния омыва́юще.

Зе́мнии а́нгели, Бо́жию престо́лу при́сно предстоя́ще, ми́ра всему́ мі́ру, и благочести́вым князе́м на́шим здра́вие телесе́м и душев́наго проси́те спасе́ния, и за вся христиа́не приле́жно Христу́ моли́теся.

О́ богоблажении Христо́ви архиере́и, высо́ко паря́щии орли́, и́же не у тру́па, но у жива́го Те́ла собира́ющеся Христова, его́же я́дше в безконе́чныя ве́ки на небесе́х живете́!

Ма́ло потруди́стеся на земли́, и во ве́ки в небе́снем почива́ете Ца́рствии.

Орга́ни Свята́го Ду́ха, вся ве́рныя душеполе́зными и спаси́тельными наслажда́юще глаго́лы.

Богоно́снии о́блацы, и́же чудотво́рными ка́плями одожда́юще неве́рных сердца́ и вся плодоно́сны покая́нием сотвори́сте.

Вы есте́ необори́мии гра́ди, всех к вам прибега́ющих спа́сше, непоколеби́мии столпи́, к ни́мже прирази́вшеся вси богоху́льнии еретицы́, погибо́ша.

О́ богоблаже́нии на́ши учи́тели, свети́льницы ми́ру, наста́вницы заблу́жшим, вожди́ душе́вными осле́пшим очесы́, пору́чницы ка́ющимся спасе́нию, безме́зднии вра́чеве душа́м и те́лом, богонауче́нии цели́тели, изба́вители оби́димым и су́щим в беда́х ско́рии помо́щницы, от уз разреши́тели и бесо́м прогони́тели, куми́ром разруши́тели и льсти вся́кой обличи́тели!

О́ богоблаже́нии преподо́бнии святи́тели, честни́и сосу́ди, Бо́жие сло́во в себе́ нося́ще, кра́сныя оби́тели, в ни́хже почи́ла есть свята́я Тро́ица, неувяда́ющии цве́ти ра́йскаго са́да, небе́снаго виногра́да кра́сныя ле́торасли, благопло́дная древеса́, наслажда́юще ве́рных душа́ же и сердца́, прему́дрии ловцы́, мир весь богоразу́мием объе́мше и по́лну церко́вную мре́жу ко Христо́ви привлеко́сте!

Достойну труда мзду прия́ли есте́: просла́вили есте́ на земли́ Христа суща Сына Бо́жия, и Той просла́вил есть вас на небесе́х: «Сла́вящая бо Мя, рече́, просла́влю».

Сам бо Иису́с Христо́с я́ко фи́ники добропло́дны, в мирски́х удо́лиях избра́л вы есть и в це́рквах до́му Своего́ посади́л на украше́ние апо́стольскаго престо́ла, на утверже́ние святы́я ве́ры, на поновле́ние обетша́вшим грехми́, на возведе́ние впа́дшим в е́ресь, на исправле́ние помя́тшимся в собла́знех, на исцеле́ние неду́гующи в зако́не, на укрепле́ние борю́щимся по Христе́, на поруше́ние диа́волих се́тий, на изреше́ние вязя́щих в зло́бе, на смире́ние на ся вражду́ющим, на извлече́ние топя́щихся в теле́сных по́хотех, на спасе́ние погиба́ющих в безу́мии, на пи́щу а́лчущих, на оде́яние наги́м.

И и́на мно́га суть святы́х отец на́ших богоуго́дная исправле́ния и до́брыя де́тели, и́мже и Сам Госпо́дь Бог, и Сведе́тель, и Мздовозда́тель.

Мы же гру́бии су́ще ра́зумом и ни́щи сло́вом, не по чи́ну, но ще́рбо похвале́ние ва́шему пра́зднику списа́вше, мо́лимся и мили ся де́ем, святи́и патриа́рси, архиепи́скопи, епи́скопи, преподо́бнии архиере́и, пречестни́и презви́тери и вси свяще́ннии пра́веднии учи́тели. Прииме́те на́ша худа́я словеса́, я́ко Бог две ме́дницы о́ноя убо́гия вдови́ц, и проси́те на́шим ду́шам отпу́ста грехо́в, да и про́чее ле́то живота́ на́шего в чистоте́ поживше, в ру́це Бо́жии своя́ преда́мы душа́, и да отве́рзет нам небе́сная врата́, и та́мо су́щих сподо́бит ны благ, ми́лостию и человеколю́бием Го́спода Бога и Спа́са на́шего Иису́с Христа́, Ему́же сла́ва, честь, и держа́ва, и поклоне́ние, со Отце́м и с Пресвяты́м, Благи́м и Животворя́щим Ду́хом, ны́не и при́сно и во ве́ки веко́в. Ами́нь.

Днесь, ве́рнии, па́мять святы́х оте́ц чте́тся. По ве́ровании бо, е́же Сын Бо́жий Челове́к бысть, во́лею пострада́ и у́мре, и погребе́н бысть, и воскре́се, и вознесе́ся на небеса́, и про́чее правове́рие утверди́ша святи́и отцы́. Мно́зи же от ерети́к испове́даша, я́ко Христо́с пострада́ и воскре́се: а е́же подо́бен Сын Отцу́, то ника́коже, но многи́ хулы́ на Божество́ веща́ша еретицы́. Святи́и же отцы́ правове́рное Це́ркви уче́ние изъясни́ша, и ве́ру утверди́ша. Тем по Госпо́дьских пра́здницех, па́мять святы́х оте́ц пра́зднуется.

Бе во Александри́и еги́петстей, пресви́тер вели́кия Це́ркве, и́менем А́рий, хитр сый кни́гам вельми́, ему́же Петр архиепи́скоп поручи́л бе учи́ти лю́ди в це́ркви. Не по мно́зе же вре́мени нача́ А́рий зла́я веща́ти глаго́ля, вся тварь Сын Бо́жий есть: Христа́ же Иису́са глаго́лаше не Единосу́щна Бо́гу Отцу́, ни ра́вна Свято́му Духу́; се же уве́дев архиепи́скоп, повеле́ А́рия изгна́ти из це́ркве. Он же нача́ собо́ры де́яти, уча́ свое́й е́реси мно́ги.

Ви́дев же царь Це́рковь возмуще́ну А́рием, повеле́ созва́ти всея́ Вселе́нныя епи́скопы, и ско́ро снидо́шася в Ники́ю, иде́же А́рий приведе́н бысть со единомы́шленники свои́ми. И снидо́шася от всю́ду еписко́пи, три́ста и осмь на́десять, и седо́ша со царе́м.

Приведо́ша же А́рия и его́ дру́ги на собо́р, и повеле́ царь Константи́н пе́рвее А́рию глаго́лати. И рече́ А́рий, не искони́ Сло́во Бо́жие бысть, ни Тем ви́димая бы́ша, ни подо́бен есть Сын Отцу́, ни и́стинен естество́м бысть, но тварь и созда́ние все Бо́гу Сын нарече́тся, а Оте́ц неви́дим есть Сы́нови.

Бя́ху же со А́рием и филосо́фи мно́зи, в них же еди́н Фео́дор зело́ хитр, разреша́я А́рием глаго́лемая, и на епи́скопы кре́пко по А́рии противля́шеся, бе бо язы́ком речи́ст. Прояви́ же Госпо́дь Бог, я́ко не си́лою есть прия́ти кому́ Ца́рство Небе́сное, но пра́вду де́яй прии́мет Е́. Сотвори́ же ся тогда́ в собо́ре чу́до: епи́скоп бе тримифи́йский Спиридо́н и́менем, не кни́жен сый, ни речи́ст, дерза́ше хотя́ пре́тися с филосо́фом. Епи́скопы же ве́дуще его́ не кни́жна, браня́ху ему́, да не бу́дет посра́млен. Он же не послу́ша их, но с ра́достию рече́ к филосо́фу, во и́мя Иису́са Христа́, послу́шай сего́ ерети́че: Бог бо Еди́н есть И́же не́бо и зе́млю му́дре сотвори́, и челове́ка созда́, и всю тварь соста́ви Сло́вом и Ду́хом, ви́димую же и неви́димую, и вся я́же в них. Сего́ же и мы Сло́ва Сы́на Бо́жия ве́дуще, в после́дняя дни на́шего ра́ди спасе́ния от Де́вы ро́ждьшагося, и ра́спятием, и сме́ртию, и воскресе́нием свободи́вшаго род челове́чь, Его́же ча́ем хотя́ща приити́, суди́ти живы́м и ме́ртвым. Ве́руеши ли сим филосо́фе? И вси и́же со А́рием ужасо́шася и умолко́ша, се то́кмо Фео́дор филосо́ф рече́: «И аз о́тче ве́рую та́ко». Святы́й же глаго́ла: «А́ще хо́щешу ду́шу свою́ спасти́, то иди́ по мне в Це́рковь, да прии́меши зна́мение ве́ры Христо́вы». Фео́дор же обрати́вся, глаго́ла ко ученико́м свои́м: «Слы́шите у́бо, се досе́ле по А́рии кре́пко пря́хся: и егда́ нача́ ми ста́рец сий глаго́лати, си́ла ве́лия исхожда́ше из уст его́, и не мого́х проти́витися си́ле Бо́жии».

Вси и́же в собо́ре том су́щии ви́деша огнь из уст спиридо́новых исходя́щь, егда́ глаго́ла к Фео́дору, и та́ко вси бы́ша христия́не, и́же с Фео́дором бы́вшии, ра́зве А́рия христобо́рца, его́же святи́и отцы́ посрами́вше изверго́ша, и из собо́ра и от о́бласти изгна́ша, и утверди́ша правове́рие. Прокля́ша же А́рия и его́ е́ресь, и вся еретики́.

Бя́ше же старе́йшина в собо́ре святи́телем, Селиве́стр па́па ри́мский, и Алекса́ндр патриа́рх, Евста́фий архиепи́скоп, Митрофа́н от Византи́и, Мака́рий от Иерусали́ма, Нико́ла от Лики́и, Пафну́тий от Еги́пта. Сей бысть пе́рвый собо́р в Ники́и, три́ста осмь на́десять святы́х оте́ц, в дванадеся́тое ле́то ца́рства константи́нова. Си́и же святи́и отцы́, от всех коне́ц земли́ сше́дшеся я́ко крила́ти, без труда́ ше́ствоваша: им же ни зной, ни вар, ни широта́ мо́ря, ни пучи́на стра́шная; ни бу́ря ве́лия, ни дале́чество пути́ возбрани́: но вся любве́ ра́ди Христо́вы презре́вше снидо́шася, и ве́ру утверди́ша блаже́ннии отцы́.

Тем же похва́лим их глаго́люще: ра́дуйтеся о преблаже́ннии, боже́ственнии сла́внии учи́телие, и Христа́ моли́те за мир, и за правове́рнаго царя́ на́шего, и за вся христия́ны, всех нас изба́вити от бед и скорбе́й находя́щих на ны. И ве́ру пра́ву и невре́дну от ересе́й сохрани́ти нам, да насле́дие в Ца́рствии Небе́снем со святы́ми прии́мем, сла́вяще Святу́ю Тро́ицу, Отца́ и Сы́на и Свята́го Ду́ха, ны́не и при́сно и во ве́ки веко́в.

Стихи́:

Свети́л собра́ние избра́нное:

Лучеви́дны просвети́те мне́ мы́сли.

Стра́нна Сы́на О́тча Существа́, глаго́ля:

А́рий си́це, Бо́жия сла́вы стра́нен.

В то́йже де́нь, в неде́лю седму́ю по Па́сце, и́же в Нике́и Пе́рвый Собо́р пра́зднуем три́ста и осмина́десяти богоно́сных оте́ц, вины́ ра́ди сицевы́я:

Поне́же бо Госпо́дь на́ш Иису́с Христо́с, в пло́ть оболки́йся, е́юже по на́м смотре́ние все́ неизрече́нно де́йствова, и ко Оте́ческому па́ки взы́де престо́лу, хотя́ще показа́ти святи́и, я́ко вои́стинну Сы́н Бо́жий бы́сть Челове́к, и соверше́нный Челове́к Вознесе́ся Бо́г, и се́де одесну́ю вели́чествия на высо́ких, Собо́р се́й святы́х оте́ц та́ко Его́ пропове́да, и испове́да Единосу́щна, и Единоче́стна Отцу́. Си́м сло́вом по сла́вном Вознесе́нии, настоя́щий уста́виша пра́здник, а́ки собра́ние толи́ких оте́ц предызводя́ще, Сего́ во пло́ти Возне́сшася Бо́га и́стинна, и во пло́ти Челове́ка соверше́нна пропове́дающе.

Собо́р же се́й бы́сть при Константи́не Вели́цем царе́, в двадеся́том ле́те ца́рства его́, гоне́нию преста́вшу. Се́й в Ри́ме пре́жде облада́ше, пото́м же и всесла́вный Константи́нь гра́д себе́ тезоимени́т созда́в.

В ле́то от созда́ния ми́ра пя́ть ты́сящ осмьсо́т три́десять осмо́е, я́же на а́риа нача́ша глаго́лати. И́же А́рий бя́ше у́бо от Ливи́и, во Александри́ю же прише́д, и диа́кон от священному́ченика Петра́ Александри́йскаго поста́влен бы́в поне́же ху́лити нача́т на Сы́на Бо́жия, тва́рь Сего́ пропове́дая, от не су́щих же бы́ти, и дале́че су́ща от Боже́ственнаго достоя́ния злоупотреби́тельно же Прему́дрости и Сло́ву Бо́жию глаго́латися: я́ко уподо́бльшася Саве́ллию злочести́вому, единоли́чно, и единоипоста́сно глаго́лющу Божество́. И овогда́ у́бо Отцу́ быва́ти, овогда́ же Сы́ну, овогда́ же Ду́ху Свято́му.

Сия́ у́бо А́риа ху́ляща, вели́кий Пе́тр от свяще́нства его́ отлуча́ет, Христа́ я́ко Младе́нца на святе́м же́ртвеннице ви́дев, в раздра́нну облече́на ри́зу и глаго́люща, я́ко А́рий раздра́ ю́.

Ахи́лла же, по Петре́ патриа́рхию прии́мый Александри́йскаго гра́да, на обеща́ниих па́ки разреша́ет А́риа: к си́м же поставля́ет его́ и пресви́тера, и во Александри́и учи́теля предпоставля́ет. Ахи́лле же сконча́вшуся, Алекса́ндр быва́ет патриа́рх, и́же А́риа та́яжде и го́ршая ху́ляща обре́т, от Це́ркве изри́нув, Собо́ром того́ низложи́в, я́коже глаго́лет Феодори́т: я́ко и прело́жна естества́ Христа́ глаго́лаше, и безу́мную и безду́шную восприя́ти пло́ть Го́споду, пе́рвый се́й отры́гну. А́рий у́бо мно́гих своему́ злоче́стию подве́д, пи́шет и усвоя́ет Никомиди́йскаго Евсе́виа, Ти́рскаго Павли́на, Евсе́виа же Кесари́йскаго, и ины́х, и на алекса́ндра вмеща́ется. Алекса́ндр же везде́ по вселе́нней хулы́ о́наго и низложе́ние посла́в, мно́гих на ме́сть воздви́же.

Це́ркви у́бо смуща́емей, и мно́гим хотя́щым христиа́нская приима́ти, возбраня́емым же любопре́нием уче́ния, вели́кий Константи́н везде́ по вселе́нней, людски́ми колесни́цами и носи́лы, су́щыя отцы́ в Нике́ю собра́в, та́мо и са́м прихо́дит. И отце́м у́бо все́м се́дшым, повеле́н и са́м се́де не на ца́рстем престо́ле, но на ума́леннем достоя́ния седа́лищи. И я́же на А́риа глаго́ланным бы́вшым, ана́феме у́бо о́н, и о́ному сму́дрствующии вси́ подлага́ются. Сло́во же Бо́жие от святы́х оте́ц, Единосу́щное, и Единоче́стное, и Собезнача́льное пропове́дается Отцу́. Излага́ют же си́и ве́ры святы́й Симво́л, приве́дше то́й да́же и до е́же, И в Ду́ха Свята́го Го́спода: е́же посе́м, Вторы́й испо́лни Собо́р. Затверди́ же к си́м Пе́рвый Собо́р и Па́схи пра́здник, когда́, и ка́ко подоба́ет на́м то́й соверша́ти, и не со иуде́и, я́коже бя́ше пе́рвее обы́чно. Излага́ет же и пра́вил о церко́вном исправле́нии два́десять. Святы́й же ве́ры Симво́л, вели́кий, и равноапо́стольный константи́н по́слежде все́х, червле́ными затверди́ пи́смены.

Бя́ху же архиере́й у́бо святы́х си́х оте́ц двесте́ три́десять и два́. Свяще́нников же и диа́конов, к си́м же и мона́хов о́смьдесять и ше́сть: все́х же три́ста и осмьна́десять. Знамени́тии же си́и: Силве́стр Ри́мский архиере́й. Митрофа́н Константи́ня гра́да, бо́лен сы́й: си́и у́бо бы́ша ту́ чрез своя́ местоблюсти́тели. Алекса́ндр Александри́йский, со Афана́сием Вели́ким, архидиа́коном тогда́ су́щим, и Евста́фий Антиохи́йский, и Мака́рий Иерусали́мский. Осси́й Кудру́вский епи́скоп. Пафну́тий испове́дник. Мироточи́вый Никола́й, и Спиридо́н Тримифу́нтский, и́же та́мо филосо́фа низложи́в крести́, трисо́лнечное ему́ показа́в. Посреде́ же Собо́ра двема́ к Бо́гу преста́вльшемася отце́ма архиере́ома, вели́кий константи́н в ковче́ги и́х преде́л свята́го собо́ра вложи́в, и тве́рдо заключи́в, обре́те и от о́нех запеча́тан же и подпи́сан неизрече́нными словесы́ Бо́жиими.

Соверши́вшуся же Собо́ру, поне́же и Царьгра́д уже́ созида́емый соверши́ся. Призыва́ет Константи́н Вели́кий святы́я о́ныя вся́ му́жы, и́же и обше́дше ве́сь гра́д, и моли́твовавше и дово́льно, ца́рствующий бы́ти градово́м уставля́ют, и Ма́тери Сло́ва того́ возложи́ша царю́ повеле́вшу. И та́ко святи́и ки́йждо отидо́ша в до́мы.

Но еще́ к Бо́гу не отше́дшу вели́кому Константи́ну, с сы́ном свои́м Конста́нтием ски́птры соблюда́ющу, А́рий к царю́ прихо́дит, глаго́ля: оставля́ю вся́, и Це́ркви Бо́жией соедини́тися хощу́. Написа́в у́бо своя́ хулы́ обе́си на вы́и, и а́ки бы Собо́ру повину́яся, во о́но руко́ю ударя́я, си́м глаго́лаше повинова́тися: и у́бо ца́рь во обще́ние прия́ти А́риа патриа́рху константи́ня гра́да повелева́ет. Бя́ше же тогда́ по Митрофа́не Алекса́ндр, и́же злонра́вие ве́дый му́жа, не ве́руяй бя́ше, и моля́шеся Бо́гу яви́ти ему́, а́ще по во́ли Его́ А́рий приобщи́тся. Егда́ же вре́мя прии́де, в не́же подоба́ше сослужи́ти ему́ тепле́йший быва́ет в моли́тве. А́рий же к це́ркви гряды́й, и не́где бли́з столпа́ торго́внаго, расто́ргшуся его́ чре́ву, в наро́дное подтро́ние вхо́дит, и та́мо разсе́деся, все́ вну́треннее зда́ние изрыга́ет до́лу, Иу́дино разседа́ние подъе́м, о ра́внем преда́тельстве Сло́ва, и Бо́жияго Сы́на О́тча Существа́ оттерза́я, растерза́ется са́м, и ме́ртв обре́тен бы́в: и та́ко Бо́жия Це́рковь от о́наго па́губы измени́ся.

Святы́х тре́х со́т и осмина́десяти богоно́сных оте́ц моли́твами, Христе́ Бо́же на́ш, поми́луй на́с. Ами́нь.