Четверток седмой седмицы по Пасце

Яви́х Твое́ и́мя челове́ком, и́хже дал еси́ Мне от ми́ра. Твои́ бе́ша, и Мне их дал еси́, и сло́во Твое́ соблюдо́ша:

Вели́ка сове́та А́нгел глаго́лет Сын Бо́жий, ины́х ра́ди и́хже научи́, и нача́льне, я́ко Отца́ челове́ком возвести́. Е́же у́бо и ны́не рече́: «Яви́х Твое́ и́мя челове́ком». Рек бо, я́ко соверши́х Твое́ де́ло, повеству́ет па́ки сие́ глаго́ля, ко́е де́ло. И у́бо я́вствено бе и́мя? И́бо Иса́ия рече́: «Клени́теся Бо́гом и́стинным». Но е́же мно́жицею рех, сие́ и ны́не глаго́лю: я́ко а́ще и не я́вствено бе, [кроме́ иуде́ом], и ниже́ сим всем: ны́не же о язы́цех. И не сие́ то́кмо явля́ет, но я́ко и Отца́ Его́ позна́ша. Несть же подо́бно навы́кнути, я́ко Соде́тель есть, и я́ко Сы́на име́ет. Яви́л же есть Его́ и́мя и словесы́, и ве́щьми. «И́хже дал еси́ Мне от ми́ра». Я́коже бо вы́шше рече́: «Никто́же прихо́дит ко Мне, а́ще не бу́дет дано́ ему́» и «а́ще не привлече́т его́ Оте́ц Мой». Си́це и зде: «И́хже дал еси́ Мне». И у́бо Сам рече́ путь бы́ти Себе́, отню́ду же я́вствено, я́ко двоя́ зде состроя́ет рече́нными: и я́ко не спроти́вен Отцу́, и я́ко хоте́ние Его́ е́же ве́ровати им Сы́ну. «Твои́ бе́ша, и Мне их дал еси́». Зде хо́щет научи́ти зело́ люби́ма от Отца́. Поне́же у́бо я́ко не тре́боваше е́же прия́ти их, я́вствено отту́ду: Той их и сотвори́л есть, Той и́ми и промышля́ет вы́ну. Ка́ко их прия́т? Но е́же рех, сие́ явля́ет - е́же ко Отцу́ единомышле́ние. А́ще и челове́чески кто восхо́щет то истяза́ти, и си́це, я́коже рече́ся, не ктому́ бу́дут О́тче. А́ще бо егда́ Оте́ц их имя́ше, не имя́ше их Сын, благоявле́нно, я́ко и егда́ даде́ их Сы́ну, Сам отступи́ влады́чества. И то же отку́ду па́ки: обря́щутбося, внегда́ у́бо бе́ша Отца́, несоверше́нни су́ще. Егда́ же к Сы́ну приидо́ша, тогда́ быва́юще соверше́нни. Но смех сия́ и рещи́. Что ли у́бо си́ми явля́ет? Я́ко и Ему́ да́но есть, е́же ве́ровати им Сы́ну. «И сло́во Твое́ соблюдо́ша. И ны́не уве́деша, я́ко вся я́же дал еси́ Мне от Тебе́ бе́ша». Ка́ко сло́во Твое́ соблюдо́ша? Тем е́же Мне ве́ровати и не внима́ти иуде́ом: ве́руяй бо рече́ Ему́, «запечатле́ яко Бог и́стинен есть». Не́цыи у́бо глаго́лют, я́ко «ны́не уве́дех, я́ко вся ели́ка дал ми еси́, от Тебе́ бе́ша» - но не у́бо име́ет сие́ сло́во. Ка́ко бо хотя́ше не ве́дети Сын я́же О́тча? Но о ученице́х рече́ся. Отне́лиже бо сия́ рех, рече́, уве́деша, я́ко вся ели́ка дал еси́ Мне, от Тебе́ суть - ничто́же чу́жде, ниже́ осо́бно Мне от Тебе́. Осо́бное бо, я́ко в чужде́м мно́гая полага́ет. Разуме́ша у́бо, я́ко вся ели́ка научу́, Твоя́ суть: и уче́ния, и догма́ты. И отку́ду уве́деша? От глаго́л Мои́х: таково́ бо и научи́х. И не сие́ то́кмо, но я́ко и от Тебе́ изыдо́х: сие́ бо чрез все Ева́нгелие потща́ся состро́ити. «Аз о них умолю́». Что глаго́леши? Не ве́дяща ли Отца́ учи́ши, я́ко челове́ку не ве́дящу бесе́дует? Что у́бо хо́щет си́е разделе́ние? Зри́ши ли, я́ко ничто́же и́но моли́тва быва́ет, но я́ко да уве́дят любо́вь ю́же име́ет к ним. И́же бо не то́кмо е́же от себе́ подая́, но и ина́го на сие́ моля́, - вя́щшую показу́ет любо́вь. Что у́бо есть «о сих умолю́, а не о всем ми́ре, рече́, но о и́хже дал еси́ Мне»? Ча́сте полага́ет «е́же дал еси́ Мне», да уве́дят я́ко Отцу́ сие́ уго́дно. Та́же, понеже у́бо ча́сте рече́ «Твои́ суть» и «Мне их дал еси́», отъе́мля лука́вое зазрение, да не кто вощнепщу́ет но́во Его́ бы́ти нача́льство, и ны́не прия́ти. Что рече́? «Моя́ вся Твоя́ суть, и Твоя́ Моя́, и просла́вихся в них». Ви́дел ли еси́ равноче́стие? Да́же бо не слы́ша я́ко «дал еси́ Мне», вознепщу́еши Его отчужда́тися о́бласти О́тчи, или́ пре́жде сего́ - Сыно́вни, обоя́ отъя́т рек, я́же рече́. А́ки бы глаго́лал: ниже́ слы́ша я́ко Мне их дал еси́, вознепщу́еши их чу́ждих бы́ти Отца́, Моя́ бо Его́ суть. Ниже́ слы́ша яко́ Твои́ бе́ша, вознепщу́еши чу́ждих бы́ти Мои́х, Его́ бо Моя́ суть. Те́мже е́же «дал еси́» - схожде́ния еди́наго рече́ся. Я́же бо Оте́ц име́ет, Сыно́вня суть, а я́же Сын име́ет, О́тча. Сие́ же ниже́ о Сы́не по челове́ку глаго́латися, но поне́же у́бо бо́льшаго суть - вся́ческому я́вствено, сопроти́вное же - не ктому́, зде же сопроти́в обраща́ет: сопротивообраще́ние же, ра́вность показу́ет. Сие́ и и́нде явля́я, глаго́лаше: «Вся я́же О́тча, Моя́ суть», о ра́зуме бесе́дуя.

А е́же «дал еси́ мне», и ели́ка такова́ - да пока́жет, за не я́ко чуждь прише́д их привлече́, но Свои́х прия́т. Та́же и вину́ полага́ет, и указа́ние глаго́ля: «И просла́вися в них». И не ктому́ Его́ суть я́же О́ного, но Моя́ вся. Си́речь, или́ я́ко о́бласть их име́ю, или́ я́ко прославля́ют Мене́, Тебе́ и Мне ве́рующе, и прославля́ют подо́бне. А́ще же не подо́бне просла́вися в них, не ктому́ Его́ суть я́же О́ного: никто́же бо, в ни́хже не име́ет о́бласть, прославля́ется. Ка́ко просла́вися подо́бне? Вси подо́бне умира́ют о Нем, я́коже и о Отце́, и пропове́дят я́коже Отца́, и я́коже о и́мени Его́ глаго́лют вся быва́ти, си́це и о и́мени Сыно́вни. «И не ктому́ есмь в ми́ре, и си́и в ми́ре суть». Е́же есть: а́ще и не явлю́ся по пло́ти, си́ми прославля́юся. Что у́бо ча́сте глаго́лет «я́ко в ми́ре несмь», и «я́ко поне́же у́бо их оставля́ю, Тебе́ их предлага́ю», и «егда́ бех в ми́ре, Аз соблюда́х их»? А́ще бо сия́ про́сте прии́мет кто, мно́га после́дуют безме́стная. Ка́ко бо име́ет сло́во, е́же не бы́ти Ему́ в ми́ре, и егда́ отхо́дит, ино́му их запоручи́ти? Сия́ бо я́ко челове́ку про́сту, угожа́ющаго ему́ вы́ну, бе́ша глаго́лы. Зри́ши ли, я́ко челове́чески мно́жайшая бесе́дует и ко их непщева́нию, непщу́ющых я́ко вя́щшее не́кое имя́ху утверже́ние от прише́ствия Его́. Те́мже рече́: «Егда́ Аз бех, соблюда́х их». И у́бо глаго́лет, «яко прииду́ к вам» и «с ва́ми есмь до сконча́ния». Ка́ко у́бо я́ко угожа́ти хотя́ сия́ рече? Но е́же рех я́ко ко оне́х непщева́нию, да ма́ло отдохну́т, слы́шаще Ему́ сия́ глаго́лющу и запоруча́ющу Отцу́. Поне́же бо мно́га от Него́ утеше́ния слы́шавше, не повинова́хуся, про́чее Отцу́ бесе́дует, е́же в них любле́ние показу́я. А́ки бы глаго́лал: поне́же к Себе́ Мя призыва́еши, устро́их их во утверже́нии: Аз бо к Тебе́ гряду́. Что глаго́леши? И не мо́жеши ли соблюда́ти их? Ей, могу́. Чесо́ у́бо ра́ди сия́ глаго́леши? Да име́ют ра́дость Мою́ испо́лнену в себе́. Си́речь, да не мо́лствуют, не соверше́ннейши суще. Сия́ же рек, изъяви́л есть, я́ко оне́х ра́ди упокое́ния и ра́дости вся сия́ си́це глаго́лаше: поне́же ви́дится сопроти́вно сло́во бы́ти. «Ны́не же несмь в ми́ре, и си́и в ми́ре суть». Сие́ бо непщева́ху они́: еще́ у́бо им сосхо́дит. А́ще бо рекл бы, «я́ко Аз соблюда́я их», не бы у́бо си́це ве́ровали. Те́мже у́бо рече́: «О́тче свя́те, соблюди́ их в ми́ре, Аз соблюда́х их во и́мя Твое́». Па́ки а́ки челове́к бесе́дует и а́ки проро́к, поне́же у́бо нигде́же явля́ется ничто́же во и́мя Бо́жие сотвори́в. «И́хже дал еси́ Мне сохрани́х. И ни еди́н же от них поги́бе, то́кмо сын поги́бели, да Писа́ние соверши́тся». И и́нде рече́: «Все е́же дал еси́ Мне, не погублю́ от него́». А́ще и не он поги́бе еди́н, но и мно́ги по́слежде, ка́ко у́бо рече́ «не погублю́»? Е́же по Мое́й си́ле не погублю́, е́же и и́нде я́вственнейше явля́я глаго́лаше: «Не изри́ну его́ вон». Не от Моея́ вины́, ниже́ Мне пореша́ющу, ниже́ оставля́ющу. А́ще же о себе́ отска́чут, ну́ждею не привлача́ю. «Ны́не же к Тебе́ гряду́». Зр́иши ли челове́чнейшую слежа́щу мысль и рече́ние? Те́мже а́ще кто хо́щет умаля́ти Сы́на, от сих умали́т и Отца́. Зри у́бо изнача́ла, о́во у́бо я́ко уча́ еще́ и изъявля́я сие́, о́во же обещава́я. Я́же у́бо я́ко уча́, я́ко егда́ глаго́лет: «Не о ми́ре молю́». А я́же я́ко обещава́я: «Аз соблюдо́х до ны́не, и ни еди́н же поги́бе. И ты у́бо соблюди́ их» рече́. И па́ки: «Твои́ бе́ша, и Мне их дал еси́. И егда́ бех в ми́ре, соблюда́х их». Но всех раздреше́ние, е́же к не́мощи их глаго́латися рече́ным. Рек же я́ко «никто́же от них поги́бе то́кмо сын поги́бели», наведе́, «да Писа́ние соверши́тся». Ко́е Писа́ние рече́? Е́же мно́га о Нем глаго́люще. Не у́бо сего́ ра́ди поги́бе , да Писа́ние соверши́тся. И о сем и напреди́ мно́га бесе́довахом, я́ко осо́бствуя се Писа́нию есть обы́чай, я́ко виносло́вие полага́ющу я́же от сбы́тия случа́ющая. И подоба́ет вся со опасе́нием истяза́ти: и обы́чай глаго́лющаго, и вину́, и зако́ны Писа́ния, а́ще у́бо не хотя́т прельща́тися. «Бра́тие бо, не де́ти быва́йте умы́» - сие́ же не разуме́ний Писа́ний прочита́ти подае́т то́кмо, но и о тща́нии жития́. И́бо отроча́та ма́лая вели́ких у́бо не жела́ют, ни еди́наго же досто́йным чуди́тися обыко́ша. И́бо вози́ла, и коня́, и мскоблюсти́теля, и колеса́, вся от скуде́ли сотворе́на, ра́дуются зря́ще. А́ще же царя́ на колесни́цы седя́ща зла́те уви́дят, и мсков бе́лых спряже́ние, и мно́гу красоту́ - ниже́ обраща́ются. И неве́сты па́ки, от тоя́же у́бо ве́щи взе́мше сотворе́ны украша́ют, по существу́ же и́стинныя и све́тлыя ниже́ уве́дят, и о мн́огих ины́х са́мое сие́ стра́ждут.

Нравоуче́ние о́смьдесять пе́рвое: Я́ко подоба́ет небе́сная и ве́чная предпочита́ти земны́х и привре́менных, и я́ко подоба́ет ми́ловати не от непра́вды или́ и лихоима́ния:

И́же от челове́к мно́зи ны́не стра́ждут: небе́сная бо слы́шаще, ниже́ внима́ют, к бе́рненым же всем, подо́бне де́тем суть устраше́ни: и е́же от земли́ бога́тству чудя́тся, и сла́ву, и наслажде́ние е́же в настоя́щем житии́ почита́ют, а́ще и та у́бо суть де́тска я́коже о́на, о́на же - жи́зни и сла́вы и осла́бы вина́. Но я́коже отроча́та сих у́бо отвраща́еми пла́чут, о́нехже ниже́ бы́ти в вожделе́нии ве́дят, - та́ко у́бо и от муже́й бы́ти мня́щых мно́зи. Сего́ ра́ди рече́: «Не де́ти быва́йте умы́». Име́ний жела́еши, рцы ми? И не жела́еши ли бога́тства пребыва́ющаго, но игра́ний де́тских? Та́же, а́ще у́бо не́коего уви́диши чудя́щася ца́те свинца́, и сляче́на я́ко бы ю́ подъя́ти , не разсуди́ши ли мно́гую его́ нищету́ ? Ты же ли я́же сих худе́йша собира́я, в бога́тых себе́ чи́слиши? И ка́ко у́бо име́ет сие́ сло́во? Бога́таго бо о́ного бы́ти рече́м, презира́ющаго настоя́щых всех: никто́же бо никто́же ма́лых сих сребра́ и зла́та, и ина́го мечта́ния изво́лит подсме́яти, а́ще не бо́льшых жела́ние и́мать. Я́коже у́бо ниже́ свинча́тыя ца́ты, а́ще не златы́я ца́ты стяжа́в бу́дет. И ты у́бо, егда́ уви́диши челове́ка, всего́ ми́ра претека́юща ни отку́ду же ину́ду, непщу́й сие́ бы́ти или́ твори́ти, ра́зве от е́же к бо́льшему зре́ти ми́ру. Си́це и де́латель: ма́лых пшени́це пренебреже́т, егда́ бо́льшу ча́ет жа́тву. А́ще же нея́вствене наде́жди су́щи, су́щих пренебреже́м, мно́го па́че о изве́стном ча́янии сие́ подоба́ет твори́ти. Те́мже у́бо молю́ и мил ся де́ю, не отщетева́ти себе́ вы́шних сокро́вищь, с соло́мою и пле́вою в приста́нище кора́бль веду́щим. Е́же хо́щет кто да глаго́лет о нас, да стужа́ет к ча́стому наказа́ния, и буесло́вцев да нарица́ет, ненави́стных, тя́жких: не отступи́м, ча́сте от них наказу́юще и ча́сте о́но проро́ческое всем подглаша́юще вам: «Грехи́ твоя́, ми́лостынями искупи́. И беззако́ния своя́, щедро́тами ни́щих, и обе́си их на свое́й вы́и, да не днесь у́бо сотвори́ши, у́треже отступи́ши». И́бо те́ло сие, повседне́вныя тре́бует пи́щи. Та́ко и душа́ - и мно́го па́че она́. И а́ще не прие́млет, не́мощнейша быва́ет и сту́днейша. Да не у́бо презира́ем, погиба́ему, удавля́ему. Мно́ги прие́млет на всяк день я́звы, жела́ющи, гне́вающися, леня́щися, укоря́ющи, отмща́ющи, зави́дящи. Подоба́ет у́бо и врачева́ния состро́яти. Нема́ложе е́же ми́лостыни врачева́ние: всем я́звам наложи́тися мо́щно. «Да́йте бо ми́лостыню, рече́, и вся вам бу́дут чи́ста». Ми́лостыню, а не лихоима́ние: я́же бо от лихоима́ния не пребыва́ют, а́ще и тре́бующым да́си. Ми́лостыня бо, я́же вся́кия свобождена́ непра́вды есть, сия́ вся твори́т чи́ста: сие́ и поста́ бо́льше, и до́лу лега́ния.

А́ще и она́ боле́знейша и притру́днейша, но сия́ приобре́тнейша: просвеща́ет ду́шу, умаща́ет, до́бру и кра́сну твори́т. Не та́ко подви́жников плод ма́сличный подъе́млет, я́коже подви́жников благоче́стия. Сей и еле́й восчерпа́ем, да помазу́ем у́бо ру́це, да к супротивоборцу́ взима́емся до́бре. Поуча́яйся ми́ловати тре́бующаго, вско́ре любостяжа́ния отступи́т. Пребыва́яй во е́же дая́ти ни́щим, вско́ре и гне́ва отступи́т, и ниже́ ве́лие возму́дрствует когда́.

Я́коже ура́неных ча́сте исцеля́яй врачь, спряту́ется удо́бне беда́ми ины́х, челове́ческое разсмотря́я естество́, - та́ко и мы, а́ще ни́щих совни́дем поможе́ниям, любому́дрствуем удо́бне. И не почуди́мся бога́тству, ниже́ ве́лие что настоя́щая возне́пщуем, но пренебреже́м всех: и, высо́цы бы́вше к небеси́, удо́бне получи́м вечных благи́х, и́хже бу́ди всем нам получи́ти благода́тию и человеколю́бием Го́спода на́шего Иису́са Христа́, И́мже и с Ни́мже Отцу́ сла́ва со Святы́м Ду́хом, ны́не и при́сно и во ве́ки веко́в. Ами́нь.

Аз дах им сло́во Твое́, и мир возненави́де их, я́ко не суть от ми́ра, я́коже несмь Аз от ми́ра:

Егда́ доброде́тельни бы́вше, го́нимся от лука́вых, и доброде́тели жела́юще, нахухна́емся от о́нех - да не разслабля́емся, ниже́ стужа́ем си. Таково́ бо естество́ вещь име́ет, и везде́ не́нависть обы́че ражда́ти доброде́тель пред лука́выми. Зави́дяще бо кро́тце жи́ти хотя́щым и мня́ще уготовля́ти себе́ отве́т, а́ще ины́х сла́ву низложа́т, ненави́дят пре́жде сопроти́вная проходя́щых и вся де́йствуют о е́же посрами́ти житие́ о́нех. Но да не тужи́м: сие́ бо доброде́тели зна́мение. Сего́ ра́ди и Христо́с рече́: «А́ще от ми́ра б́ысте бы́ли, мир у́бо своя́ люби́л бы». И и́нде па́ки: «Го́ре вам, егда́ до́бре вам реку́т вси челове́цы». Сего́ ра́ди и зде рече́: «Сло́во Твое́ дах им, и мир возненави́де их». Па́ки глаго́лет вину́, ея́же ра́ди досто́йни суть мно́гаго прилежа́ния от Отца́ получи́ти: Тебе́ бо ра́ди возненави́дени бы́ша рече́ и словеси́ Твоего́, те́мже пра́ведни вся́кого у́бо бу́дут наслади́тися промышле́ния. «Не молю́ да во́змеши их, но да соблюде́ши их от лука́ваго». Па́ки изъявля́ет сло́во, па́ки ясне́йши соде́ловает - е́же ничто́же и́но есть показу́ющаго ра́зве, я́ко мно́го о них твори́т промышле́ние, те́мже е́же со опасе́нием твори́ти е́же о них утеше́ние. И у́бо Сам глаго́лаше, «я́ко вся сотвори́т Оте́ц, ели́ка а́ще попро́сят», ка́ко у́бо зде Сам о них мо́лит? Ничто́же и́но е́же рех, ра́зве любо́вь показу́я. «От ми́ра не суть, я́коже Аз несмь от ми́ра». Ка́ко у́бо и́нде рече́: «И́хже дал еси́ Мне от ми́ра. Твои́ бе́ша»? Та́мо у́бо естество́ глаго́ля, зде же о дея́ниих лука́вых. И до́лго им слага́ет похвале́ние: пе́рвое, я́ко не суть от ми́ра, та́же, я́ко Той их даде́, и я́ко сло́во Его́ соблюдо́ша, и я́ко Его́ ра́ди ненави́дятся. А́ще же глаго́лет, «я́коже Аз несмь от ми́ра», да не смути́шися: е́же бо «я́коже» зде, несть непреме́ннаго опасе́ния. Я́коже бо егда́ о Себе́ и Отце́ глаго́лется, то «я́коже» - мно́га ра́вность, сро́дства ра́ди естества́: си́це [егда́] о нас и о Нем глаго́лется, мно́го посре́дство, за е́же и мно́го бы́ти посре́дство и безме́рно обоего́ естества́. А́ще бо «греха́ не сотвори́л есть Той, ниже́ лесть ка́я обре́теся во усте́х Его́», ка́ко мо́гут у́бо апо́столи сравня́тися Ему́? Что у́бо есть е́же рече́: «Я́ко от ми́ра не суть»? Ко ино́му зря́щим, - ни еди́ноже о́бще что в земли́ им есть, но небе́снии бы́ша гра́ждане. И о сих любо́вь Свою́ показу́ет, егда́ ко Отцу́ их похваля́ет и предлага́ет Роди́телю. Рек же «соблюди́ их», не о свобожде́нии бед рече́, но и о е́же в ве́ре пребыва́нии. Те́мже и наведе́: «Освяти́ их во и́стине Твое́й», святы́х сотвори́ Ду́ха дая́нием и пра́вых догма́т. Я́коже егда́ глаго́лет: «Чи́сти есте́ словеси́ ра́ди, е́же глаго́лах вам», и ны́не то́жде рече́: накажи́ их, научи́ их и́стинне. И у́бо сие́ глаго́лет Ду́ху твори́ти: ка́ко у́бо то от Отца́ про́сит ны́не? Да навы́кнеши па́ки равноче́стие. Пра́выя бо догма́ты, о Бо́зе глаго́лемы, освяща́ют ду́шу. А́ще же глаго́лу рече́ освяща́тися, да не чуди́шися. И я́ко о догма́тех рече́, наведе́: «Сло́во Твое́ и́стинно есть», си́речь ничто́же ло́жно в нем, вся́чески сбы́тися подоба́ет всем рече́нным и я́ко ничто́же обра́зно явля́ет па́ки, ниже́ теле́сно. Я́коже Па́вел рече́ и о Це́ркви, «я́ко освяти́ ю́ глаго́лом»: весть бо и глаго́л Бо́жий очища́ти. Ви́дит же ми ся и и́но явля́юще: е́же «освяти́ их», си́речь, во е́же отдели́ их сло́ву и про́поведи. И сие́ па́ки от су́щых по сих я́вствено. «Я́коже Мене́, рече́, посла́л еси́ в мир. И Аз посла́х их». А е́же глаго́лет, и Па́вел [рече́]: «полага́я в нас сло́во примире́ния». О не́мже бо Христо́с дости́же, о сем и си́и вселе́нную постиго́ша. А е́же «я́коже», па́ки зде не уподобле́ния о Нем и апо́столех лежи́т. Ка́ко бо инако бе вме́стно челове́ком посыла́тися? Обы́чай же Ему́ и бу́дущее а́ки бы́вшее глаго́лати. «И о них освяща́ю Себе́, да бу́дут освяще́ни во и́стинне». Что есть «освяща́ю Себе́»? Приношу́ Тебе́ же́ртву, Же́ртвы же вся свя́ты глаго́лются, и вои́стинну свя́та Бо́гови возложе́нная. Поне́же бо дре́внее во о́бразе освяще́ние бе овча́тем, ны́не же не ктому́ во о́бразе, но в само́й и́стинне. Те́мже рече́: «Да бу́дут освяще́нни во и́стинне» Твое́й. И́бо и их Тебе́ возлага́ю и творю́ приноше́ние: или́ у́бо за е́же Главе́ сие́ быва́ти рече́, или́ за е́же и им жре́тися. «Предста́вите бо рече́ у́ды ва́ша же́ртву жи́ву су́щу, свя́ту». И «вмени́хомся я́ко овца́ заколе́ния». И кроме́ сме́рти же́ртву их соде́ловает и приноше́ние. Я́коже бо же́ртву назна́мена Свою́, рек «освяща́ю», я́вствено от су́щих по сих. Понеже за них умре, - рече же: «я́ко о них освяща́ю Себе́», - да не кто вознепщу́ет, я́ко о апо́столех сие́ то́кмо творя́ше, наведе́: «Не о сих же молю́ еди́ных, но и о ве́рующых сло́вом их в Мя». Отсю́ду па́ки воздви́же их душа́, показа́в бу́дущых мно́гих ученико́в.

Поне́же бо е́же имя́ху изря́дно, о́бще сотвори́л есть, па́кт их утеша́ет, явля́я и ины́х спасе́ния быва́ющих их вино́вных. Рек же о спасе́нии их и е́же освяти́тися ве́рою и же́ртвою, глаго́лет про́чее о единомышле́нии. И в сие́ заключа́ет сло́во, от зде нача́в и в то сконча́в. И начина́я рече́: «За́поведь но́ву даю́ вам», и «да бу́дут еди́но, я́коже ты О́тче во Мне, и Аз в Тебе́». Па́ки е́же «я́коже», не опа́снаго изравне́ния о них, - ниже́ бо мо́щно им бе толи́ко, - но я́ко челове́ком мо́щно, я́коже егда́ глаго́лет: «Бу́дите ще́дри, я́ко Оте́ц ваш». Что же есть в «Нас »? В ве́ре су́щей «в Нас ». Поне́же бо ничто́же си́це соблажня́ет всех, я́коже е́же растерза́тися - сие состроя́ет, я́ко бы́ти еди́но . Что ли у́бо, соверши́ сие́, рече́? И зело́ соверши́. Вси бо, и́же апо́столы ве́ровавше, еди́но суть, а́ще и не́цыи от них растерза́шася. Ниже́ бо си́е Его́ утаи́ся. Но и сие́ прорече́, и показа́ и сие́ челове́ческия ле́ности су́ще. «Да мир ве́рует, я́ко Ты Мя посла́л еси́». Я́коже у́бо ина́я глаго́лаше: «О сем позна́ют вси, я́ко Мне ученицы́ есте́, а́ще любо́вь и́мате между́ собо́ю». И ка́ко отсю́ду ве́ровати хотя́ху? Я́ко ми́ра еси́ Бог, рече́. А́ще у́бо я́же от ни́хже уве́деша соблюду́т, позна́ют Учи́теля, от ученико́в слы́шащии. А́ще же ра́туются, не реку́т ми́рнаго Бо́га бы́ти ученико́в. Не су́щаже Мя ми́рна, не испове́дят посла́тися от Тебе́. Зри́ши ли, ка́ко до конца́ сие́ состроя́ет, е́же ко Отцу́ единоразу́мное. «И Аз сла́ву, ю́же дал еси́ Мне, дах им» - ю́же зна́мений, ю́же догма́ты и да единоду́шни бу́дут. Сия́ бо сла́ва, «да бу́дут еди́но», и зна́мений бо́льши. Я́коже бо и Бо́гу чуди́мся, я́ко несть ра́спря, несть рать в естестве́ О́ном и вели́ка сия́ сла́ва, си́це и си́и рече́, от зде да бу́дут све́тли. И ка́ко у Отца́ про́сит сие́ да́ти им, Сам сие́ глаго́ля дая́ти?

А́ще бо о зна́мениих, или́ о единомышле́нии, или́ о ми́ре Ему́ сло́во - явля́ется Сам им сия́ пода́в. Отню́дуже я́вствено бе, я́ко утеше́ния ра́ди их проше́ние быва́ет. «Аз в них, и Ты во Мне». Ка́ко даде́ сла́ву? В них быв, и отца́ име́я с Собо́ю, я́ко бы содержа́ти. И́ндеже не си́це рече́, не Тем Отцу́ приходи́ти, но и Себе́, и Отца́ у него́ бы́ти, и оби́тель у него́ сотвори́ти. Та́мо у́бо саве́ллиан зауща́я уста́, зде же А́риево мне́ние отъе́мля. «Да бу́дут соверше́ни во еди́но, да позна́ет мир, я́ко Ты Мя посла́л еси́». Ча́сте сие́ глаго́лет, показу́я зна́мения па́че мир могу́ща привлача́ти. Я́коже бо разделе́ние разреши́тельно, си́це согла́сие собира́тельно. «И возлюби́х их, я́коже Мене́ возлюби́л еси́». Па́ки зде то: «я́коже» а́ки челове́к возлюби́тися возмо́жно. И зна́мение любви́ - е́же Себе́ за них да́ти. Рек у́бо, я́ко бу́дут во утверже́нии, я́ко не превратя́тся, я́ко бу́дут свя́ти, я́ко мно́зи ве́руют и́ми, я́ко мно́гия насладя́тся сла́вы, я́ко не Той их возлюби́л есть еди́н, но и Оте́ц - глаго́лет про́чее и о су́щих по зде́шнем отше́ствии о по́честех и венце́х соблюда́емых им. «О́тче бо, рече́, и́хже дал еси́ Мне, хощу́ да иде́же есмь Аз и си́и бу́дут». Е́же у́бо иска́ху при́сно глаго́лаше: «Ка́мо и́деши?». Что глаго́леши? Сие́ проше́нием ли прие́млеши, и не у́ име́еши? Ка́ко у́бо им глаго́лаше: «Ся́дете на двуна́десять престо́лех»? Ка́ко у́бо обеща́ бо́льша и вя́щша? Зри́ши ли я́ко вся схожде́ния ра́ди глаго́лются? Поне́же ка́ко глаго́лаше: «После́дуеши же по́сле»? Но о мно́жайшем извеще́нии и показа́нии любви́ сия́ рече́: «Да ви́дят сла́ву Мою́, ю́же дал еси́ Мне». Па́ки сие́ е́же ко Отцу́ единомы́слити зна́мение: высоча́йше у́бо пре́жних, «пре́жде сложе́ния бо ми́ра» рече́. Име́юще же не́кое и сие́ схожде́ние – «дал бо Ми еси́» глаго́лет. А́ще же не сие́ есть, сла́дце у́бо вопроси́л бых сопроти́в глаго́лющых: дая́й подлежа́щему, не́коему дае́т - еда́ у́бо пре́жде Его́ роди́в, по́сле сла́ву даде́, пе́рвее оста́вль бы́ти безсла́вна? Ка́ко у́бо име́ет сло́во? Зри́ши ли, я́ко е́же «даде́» - роди́л есть. Что же ра́ди не рече́ «да причастя́тся сла́вы», но да «зрят сла́ву»? Зде гада́тельствует, я́ко вся́ко упокое́ние, сие́ есть е́же зре́ти Сы́на Бо́жия - сие́ у́бо и прославля́тися твори́т. Е́же и Па́вел рече́: «Открове́нным лице́м, сла́ву Госпо́дню взира́юще». Я́коже бо к луча́м зря́щии и возду́ха наслажа́ющеся тонча́йшаго, от зре́ния име́ют наслаж́ение, си́це и тогда́, и мно́го вя́щше сие́ нам соде́ловает сла́дость. Вку́пеже и показу́ет, я́ко не сие́ есть зри́мое, но гро́зно не́кое существо́. «О́тче пра́ведне. И мир Тебе́ не позна́».

Что хо́щет сие́? Ко́е име́ет после́дование? Показу́ет зде ни еди́наго ве́дяща Бо́га, но ра́зве еди́но позна́вшых Сы́на. А е́же глаго́лет, таково́ есть: восхоте́х всех сие́ бы́ти, но не позна́ша Тя, а́ще и ничто́же име́юще порица́ти . Сие́ бо есть: «О́тче пра́ведне». Зде ми ви́дится и стужа́я сия́ глаго́лати, я́ко вои́стинну Блага́го же и Пра́веднаго, не восхоте́ша позна́ти. Поне́же бо иуде́и глаго́лаху Бо́га ве́дети, Его́же не ве́дети. К сему́ отвещава́ет, глаго́ля: «Я́ко возлюби́л еси́ Мене́ пре́жде сложе́ния ми́ру», отве́т сложи́в ко осужде́ниям иуде́йским. И́же бо сла́ву прие́м, возлю́блен Бы́вый пре́жде сложе́ния ми́ру, И́же сведе́телей хотя́ име́ти их сла́вы о́ноя, ка́ко сопроти́вен бе Отцу́? Не у́бо сие́ есть е́же ре́ша иуде́и, я́ко си́и у́бо Тя ве́дят, Аз же Тя не вем, но спроти́вное. Аз у́бо Тебе́ вем, ини́и же Тебе́ не позна́ша. «И си́и же позна́ша, я́ко Ты Мя посла́л еси́». Зри́ши ли, я́ко их гада́тельствует глаго́лющих не бы́ти Ему́ от Бо́га, и к сему́ сло́во изглавля́ет все? «И изъяви́х им и́мя Твое́, и изъявлю́». И у́бо Ду́ха рече́ соверше́нное позна́ние? Но я́же Ду́ха, Моя́ суть. «Да любо́вь, е́юже возлюби́л Мя еси́, в них пребу́дет, и Аз в них». А́ще бо навы́кнут, Кто [еси] Ты, тогда́ уве́дят, яко не отделе́н Аз, но и от зело́ люби́мых, и при́сный Сын и совокупле́нный. Сие́ же увеща́вшеся я́коже подоба́ет, и ю́же в Мене́ ве́ру и любо́вь соблюду́т опа́сну, я́коже подоба́ет. Лю́бящим же Его́ я́коже подоба́ет, Аз пребу́ду в них. Зри́ши ли, ка́ко в добр коне́ц соверши́л есть, в любо́вь, всех ма́тере, сконча́в сло́во?

Нравоуче́ние о́смьдесять второ́е: Подвиза́ние к пра́вде, и отступле́ние су́щых в житии́ лю́тых:

Да ве́руем у́бо и да лю́бим Бо́га, да не и о нас глаго́лется: «Бо́га испове́дуют ве́дети, де́лы же отме́щутся». И па́ки: «Ве́ры отве́ржеся, и есть неве́рнаго го́рши». Егда́ бо он и рабо́м, и ю́жикам, и чужди́м помага́ет, ты же ниже́ к ро́ду бли́жним угожа́я, ка́я бу́дет тебе́ про́чее наде́жа или отве́т, Бо́гу ху́лиму и досажа́ему тебе́ ра́ди? Смотри́ бо, коли́ки даде́ нам при́тчи благотворе́ния Бог: о́вого у́бо я́ко сро́дника, о́вого же я́ко дру́га, о́вогоже я́ко сосе́да, о́вогоже я́ко согра́жанина, о́вогоже я́ко челове́ка ми́луй, рече́. А́ще же ничто́же тебе́ сих держи́т, но вся растерза́еши ю́зы, услы́ши Па́вла - я́ко неве́рнаго еси́ го́рши. Зане́ он ничто́же о ми́лостыни слы́шав, ниже́ су́щих на небесе́х, превзы́де тебе́ любому́дрием и человеколю́бием. Ты же и враго́в люби́ти повеле́н быв, дома́шних я́ко враго́в зри́ши и име́ний щади́ши па́ки, не́жели теле́с. А́ще и та у́бо изнуря́ема, ничто́ постра́ждут лю́то, сей же презира́емь, погиба́ет. Ко́е у́бо неи́стовство - име́ний щаде́ти, сро́дников [же отню́дь]. Отку́ду сие́ жела́ние вскочи́? Отку́ду безчелове́чие и лю́тость? А́ще бо кто я́коже на позо́рища версе́ сед, в ми́ра всего́ расмотри́т, - па́чеже а́ще хо́щете еди́н прои́дем град, - а́ще кто у́бо на высоте́ сед вся расмотри́ти возмо́гл бы челове́ческая, помы́сли, ели́ко позазри́т безслове́сие, ели́ки сле́зы претерпи́т, ели́ким посмее́тся сме́хом, ели́кою возненави́дит не́навистию. Такова́ бо де́йствуем, я́ко и безу́мия, и слез, и не́нависти бы́ти досто́йна. О́нсица пита́ет псов, да ди́вны зве́ри ло́вит, сам во зве́рство отпа́дая. Ин пти́цы и волы́, да прено́сит ка́мения, челове́ков же презира́ет, гла́дом тае́мым: и зла́то у́бо безчи́слено изнуря́ет, да ка́менных челове́ков соде́лает, су́щих же челове́ков, ка́менных быва́емых от озлобле́ния, презира́ет. Ин ка́мения зла́та собира́я, со мно́гим злострада́нием облага́ет сте́ны, ни́щых же утро́бы на́ги зря, не преклоня́ется. И о́ви у́бо риз́ам свои́м, ри́зы па́ки умышля́ют: и́нже ниже́ са́мое те́ло на́го обложи́ти име́я. На суди́лищых же па́ки, ин ина́го пожре́. Ин во блудни́цах изнури́ и влако́мых , Други́й - в шуто́в и плесце́в. Возда́ния ин све́тла, вкупле́ния сел и домо́в. Па́ки: о́в у́бо ро́сты счита́ет, ов же ро́сты росто́в. Ов же писа́ния слага́ет, мно́гих по́лна уби́йств, и ниже́ е́же от но́щи упокое́ние обье́млет, о су́щых ины́м злых бдя. Дню же бы́вшу, о́ви у́бо на приобре́тение непра́ведно, ови́же на изнуре́ние блу́дно, о́виже на татбу́ обличе́ну теку́т. И изли́шних у́бо и возбране́нных мно́го тща́ние, ну́жных же - ни еди́ноже сло́во. Судя́щии же, и́мя у́бо судии́ име́ют, де́ло же разбо́йников и мужеуби́йц. А́ще и ка́зни кто истя́жет, а́ще и заве́ты безчи́сленая - па́ки обря́щет и зде зла: льсти, татбы́, наве́ты. И о сих все упражне́ние, духо́вных же сло́во - ни еди́ноже. Но це́рковь о е́же то́кмо ви́дети стужа́ют вси: иско́мое же не сие́ есть, но дел нам тре́ба есть и мы́сли чи́стыя. А́ще же весь день изнури́ши в лихоима́ние, та́же ма́лы глаго́лы вшед рече́ши - не то́кмо не сотвори́л еси́ ми́лостива Бо́га, но и раздражи́л еси́ бо́льше. А́ще бо хо́щеши примири́ти твоего́ Влады́ку, дела́ покажи́, уве́ждь собра́ние бед, зри нагы́х, а́лчущых, оби́димых. Безчи́сленыя ти человеколю́бия про́йде пути́. Да не убо прельща́ем себе́, ту́не и всу́е живу́ще, ниже́ я́ко ны́не здра́вствуем да пренебреже́м. Но помы́сливше, яко мно́жицею в неду́г впа́дше и в после́дней боле́зни прише́дше, умира́ем стра́хом и ча́янием бу́дущых, - да ожидаем паки в таяже впасти, и то́йже стяжи́м страх, и бу́дем лу́чши: я́ко я́же у́бо ны́не - безчи́сленых осужде́ний досто́йна. Су́щии у́бо в суди́щих - львом уподо́бишася и псом. А и́же на то́ржищих - лиси́цам. Безве́щно е́же живу́щии житие́ - ниже́ си́и в потре́бное безвеще́ствием де́йствуют, упражне́ние все в позо́рища и я́же оттуду изнуря́юще. И запреща́яй у́бо быва́емым ни еди́н же, ревну́ющии же и ухапля́еми, я́ко нера́вная им де́йствуют, - мно́зи. Те́мже и сим па́ки му́читися и не творя́щым зла́я: «Не то́кмо бо сия́ творя́т, но и соблаговоля́ют творя́щим». И́бо и я́же усе́рдия их та́кожде растле́шася - отню́ду же я́вствено, я́ко и изволе́ния есть пострада́ти казнь. Сия́ на всяк день глаго́лю, и глаго́ля не престаю́. А́ще убо не́цыи услы́шат - приобре́тение. А́щеже ни еди́н же внима́яй бу́дет - тогда́ услы́шите сия́, егда́ приобре́тения несть , и укори́те себе́, и мы вины́ чи́сти. Но не бу́ди сей то́кмо нам отве́т име́ти, но и похвалу́ вас бы́ти на́шу пред суди́щем Христо́вым, да о́бще благи́х наслади́мся благода́тию и человеколю́бием Го́спода на́шего Иису́са Христа́, Ему́же сла́ва и держа́ва, во ве́ки веко́в. Ами́нь.