День Святаго Духа

Духо́вней благода́ти, с небесе́ днесь нам просвети́вшейся, духо́вно духо́вным пе́нием воспои́м Свята́го Ду́ха благода́ти. Не́мощно бо нам есть изрещи́ к Сего́ вели́честву, но ели́ко вмести́м похвали́ти Сего́ си́лу и дея́ния. Сей бо Дух Святы́й вся испыта́ет, и глубины́ Бо́жия.

День Пятьдеся́тный пра́зднуем, день Свята́го Ду́ха, ко апо́столом соше́ствия, наде́жди соверше́ния, терпе́ния кра́я, спасе́ния ча́яния, моли́твы исполне́ния, терпе́ния о́браза.

Днесь, и́же при Еве́ри соде́я во язы́цех Дух, во апо́столех язы́ки о́гненны соде́я. И соде́ланый он убо [столп] сли́тие язы́ком показа́, к дерзнове́нию и наказа́нию возбрани́ти челове́чю хоте́нию: зде же во язы́цех о́гненных, дея́ние Свята́го Ду́ха, соде́лания пропове́данных, сохрани́ти на исполне́ние Бо́жия хоте́ния.

Испе́рва бо Дух Бо́жий ноша́шеся верху́ воды́: и зде при Христе́ на Креще́нии, то́йже Святы́й Дух Бо́жию почива́ше. Ту приноша́шеся, зде же почива́ше, я́ко Единосу́щен, и Равноче́стен, и Присносу́щен, и Собезнача́лен Отцу́ и Сы́ну.

Принося́й голуби́цею на воде́ пото́пней, я́снину Но́еви провеща́я: Сей же и на воде́ Иорда́нстей Дух Святы́й, в виде́нии голуби́не Крести́маго сыновство́ показа́ ми́ру.

Стра́шен же от Го́спода отве́т на ты́я, и́же на Святы́й Дух дерзну́ша хулу́: «И́же бо Святы́й Дух ху́лит, не оста́вится ему́ ни в сий век ни в бу́дущий».

Сему́ Свято́му Ду́ху хоте́ние возвеща́я Дави́д, Бо́га моля́, глаго́лаше: «Не отве́рзи мене́ от лица́ Твоего́ Го́споди, и Ду́ха Свята́го Твоего́ не отхими́ от мене́».

Ве́домо есть, иде́же Сего́ есть отлуче́ние, ту всея́ тли наше́ствие.

Веждь, я́ко Дух Госпо́день отступи́ от Сау́ла, и вни́де вонь лука́вое. И сего́ ра́ди рече́: «Ду́ха Твоего́ Свята́го не отъими́ от мене́».

Сей Дух Святы́й проро́ки освяти́, апо́столы наста́ви, му́ченики уси́ли.

Сей Дух Святы́й Иса́ию освяти́, Иезеки́иля наста́ви, и ме́ртвым воста́ние показа́. Глаго́лет бо та́ко: «Бысть на мне рука́ Госпо́дня, изведе́ мя Ду́хом Госпо́дним».

Сей Дух Святы́й Иереми́ю из чре́ва избра́, и Дании́ла воздви́же Суса́не на избавле́ние: «Воздви́же бо, рече́, Бог Ду́хом Святы́м о́трочища де́тска, ему́же и́мя Дании́л».

Сему́ Ду́ху Свято́му предли́чие возлю́бль Дави́д, Бо́га моля́ше, глаго́ля: «Дух Твой Святы́й наста́вит мя на зе́млю пра́вую».

Сей Дух Бо́жий Святы́й, всели́ся во Святу́ю Де́ву Мари́ю, и спле́тся причаще́нием Бо́жия Словесе́ О́тчим благоволе́нием, и Ту Богоро́дицу показа́.

Сего́ Свята́го Ду́ха напо́лньшися Елисаве́ть, разуме́ Де́вою к ней Госпо́день прихо́д, те́мже и глаго́лаше: «Отку́ду се мне, да Ма́ти Го́спода моего́ прии́де ко мне».

Сего́ Свята́го Ду́ха испо́лнися Заха́рия, Иоа́ннов оте́ц, от него́ Ему́ рожде́нна сы́на поставля́ет проро́ка и Предте́чу, приходя́щему Царю́.

Сего́ Свята́го Ду́ха испо́лнися и той сам Иоа́нн, и просве́щься разу́мныма очи́ма, ви́де разводя́щася небеса́, и Дух Святы́й приходя́щь на Креща́емаго и Креща́юща Ду́хом и огне́м.

Сего́ Свята́го Ду́ха дея́нием и Той Сам Госпо́дь, по то́нку наставля́я Своя́ Си апо́столы, и утвержда́я ум во вре́мя му́ки Своея́, глаго́лаше к ним: «А́ще бо Аз, рече́, не иду́, то Уте́шитель не прии́дет к вам».

Еще́ же и Сосу́щную Его́ си́лу сим открыва́я, глаго́лаше: «Егда́ прии́дет Дух Святы́й, И́же от Отца́ исхо́дит, Он вы наста́вит на и́стину всю».

Сего́ Свята́го Ду́ха прише́ствия ча́юще, и ожида́юще си́лы, святи́и апосто́ли, бе́яху вку́пе о том, ча́юще с Вы́шнею си́лою облещи́ся, по Го́сподни за́поведи глаго́лющей: «Ся́дете во гра́де Иерусали́ме, до́ндеже облече́теся си́лою свы́ше: се бо Аз послю́ обетова́ние Отца́ Моего́ на вы».

И бысть в сконча́ние, рече́, дне Пятьдеся́тнаго, и всем святы́м апо́столом собра́вшымся о том, по́слан бысть Паракли́т над них, в виде́нии язы́к о́гнен. И сугу́бо обетова́ние О́тчее и Свята́го Ду́ха прие́мше, и возмо́гша показа́ша слия́ния Его́, Сего́ си́лу и дар.

Сего́ Свята́го Ду́ха испо́лнься Стефа́н му́ченик, пе́рвый диа́кон, положе́ния ра́ди рук апо́стольских прия́т, и творя́ше зна́мения и чудеса́ ве́лия в лю́дех: испо́лнь бо сый Ду́ха Свята́го, ви́де две́ри небе́сныя отве́рсты, и Единоро́дное Сло́во Бо́жие во пло́ти стоя́ще одесну́ю си́лы Бо́жия.

Сего́ Свята́го Ду́ха испо́лнься Па́вел, бысть боже́ственным та́йнам пропове́датель. Рече́ бо к нему́ Ана́ния: «Госпо́дь Спас посла́ мя к тебе́, я́ко да не́гли прозри́ши и испо́лнишися Ду́ха Свята́го». И се испы́тне глаго́лаше: «Мню бо и аз име́ти Дух Бо́жий».

Сей Дух Святы́й предста́в Корни́лию, и и́же бе́яху с ним, егда́ на креще́нии, глаго́лаху бо язы́ком свои́м ко́ждо их, и велича́ху Бо́га.

Сей Святы́й Дух наше́д на скопца́ му́рина по вше́ствии от воды́, ра́дости испо́лнь сый, и путе́м свои́м ра́дуяся идя́ше.

Сей Дух Святы́й, пропове́давый во проро́цех, проразуме́вый во апо́столех, глаго́лавый в челове́цех, Сей бо им от Го́спода бысть дан: тому́ не возмого́ша проти́ву ста́ти, ни отвеща́ти вси противля́ющиися им: «Не вы бо есть, рече́, глаго́лющии, но Дух Отца́ ва́шего глаго́ляй в вас».

Сей Дух Святы́й иере́и освяща́я, це́ркви обновля́ет, олтари́ очища́ет, же́ртвы соверша́ет, и грехи́ лю́дем очища́ет.

Сей Дух Святы́й с преподо́бными пребыва́ет, пра́ведныя очища́ет, царе́й наставля́ет.

Сей Дух Святы́й cимео́ню ду́шу храня́ше, и сме́рти уста́ва возбрани́, и животу́ вре́мя преложи́, до́ндеже ви́дит животу́ и сме́рти Изба́вителя: бе́яше бо Симео́ну обе́щано от Свята́го Ду́ха не ви́дети сме́рти, до́ндеже ви́дит Христа́ Госпо́дня.

Сей Святы́й Дух Илию́ укрепи́, и Сего́ возлю́бль си́лу Елисе́й, прося́ у Илии́, глаго́лаше: «Да бу́дет во мне сугу́бь Дух твой».

Сей Святы́й Дух ду́ши просвяща́ет, телеса́ освяща́ет.

Сей Дух Святы́й, соше́дый на апо́столы, боже́ственныя му́дрости испо́лни я́: и, Сего́ да́ры прии́мше, вся испо́лнишася богоразу́мия: и не богоразу́мия то́кмо еди́ного, но и даро́в духо́вных.

Сего́ Свята́го Ду́ха чуждь быв Си́мон волхв, в па́губу бысть. Рече́ бо к Си́мону Петр: «Безце́нное благода́ти Свята́го Ду́ха, поне́же восхоте́ име́нием прия́ти, то да бу́дет сребро́ твое́ в па́губу с тобо́ю».

Те́мже возлю́бленнии, потщи́мся на́ша телеса́ нетле́нна сохрани́ти. Це́ркви бо Свято́му Ду́ху - стяг, те́ло но́во, побе́дник до́брый на дия́вола бысть. Что бо глаго́лаше Дух Бо́жий? Сотвори́ ми та́ко.

Сим бо Ду́хом укре́плься Ио́сиф, телесе́ не оскверни́ти восхоте́в жития́ ме́рзскими де́лы. Ве́дый бо, я́ко телесе́, долгу́я во гресе́, не пребыва́ет Дух, те́мже и в Ца́рский чин прии́де.

Сей Дух Веселеи́ла просве́щь, ски́нию все́ю красото́ю и хи́тростию соверши́.

Сей Дух имы́й Иису́с Навви́н, сын бысть Моисе́ов при́сный, и зе́млю нарече́нную лю́дем насле́ди. Рече́ Бог к Моисе́ови: «Избери́ себе́ Иису́са Навви́на, и́же и́мать Дух Бо́жий в себе́».

Сей Дух Святы́й, Госпо́дь, по тридне́внем Свое́м из ме́ртвых воста́нии, ду́нув на ученики́, рече́: «Прииме́те Дух Святы́й».

Той же па́ки Дух, по всех е́же от ме́ртвых воста́нии, да́ти ве́рным ве́чный живо́т сподо́би: «По́слеши бо, рече́, Дух Свой и сози́ждутся, и обнови́ши лице́ земли́».

Мно́зи суть Свята́го Ду́ха да́рове, мно́зи Сего́ и всеси́льни да́рове. Глаго́лет бо не́где о сем: «Словесе́м Госпо́дним небеса́ утверди́шася, и ду́хом уст Его́ вся си́ла их».

Иса́ия же: «Дух Бо́жий, Дух прему́дрости, Дух смы́сла, Дух хоте́ния, Дух кре́пости, Дух ра́зума, Дух благоче́стия».

Па́вел же па́ки: «Дух сыновства́ и благода́ти, Соприсносу́щен и Собезнача́льный, и Сопресто́льный, и Равноче́стный Бо́гу».

Сын и Сло́во Сего́ нарече́ Ду́ха, Уте́шителя же духа на́шего.

Дави́д бо Дух Святы́й нари́чет И́, поне́же от великоподо́бия Дух Святы́й посыла́ется.

Вла́стелеск же, я́ко все́ми облада́ет, я́ко от Того́ бы́вшым всем им, и Тем блюдо́мым.

Бла́го же, я́ко вся благосты́ни и спасе́ния Сего́ ро́дове суть.

Иса́ия же что? Дух Бо́жий, поне́же от Бо́га и Отца́ исхо́дит. Я́коже и той, я́ко исхо́дит Дух Бо́жий, глаго́ля: «И́же от Отца́ исхо́дит».

И па́ки: «Дух прему́дрости и ра́зума». Поне́же вся прему́дрости и ра́зума, Благи́й Того́ ра́ди дан бысть.

И Дух хоте́ния и кре́пости, поне́же ходи́мое и возмощи́ то сотвори́ти.

И па́ки: Дух ра́зума и благоче́стия.

Иезеки́иль же духо́вный глаго́лет: «Дам бо вам, рече́, Ца́рство но́во, и Дух нов Единосу́щен, и Сонача́лен, и Сове́тен».

И хо́щещи ли ве́ровати, послу́шай Писа́ния глаго́люща о Нем: «Егда́ гото́вляше Не́бо Тем нам».

И па́ки проро́к глаго́лет: «Госпо́дь посла́ мя и Дух Его́». И да не мнит кто от живу́щих, в бу́дущь и прииду́щь, или́ от други́я ипоста́си есть рече́ннаго ра́ди, Дух нов наведе́, глаго́ля: «И Дух Мой дам вам ». Зане́же рече́ «Дух нов», та́ко и сло́во : поне́же но́выя за́поведи исправле́ния Тем бы́ша, я́же в Дея́ниих святы́х апо́стол, и за́поведи сей та́ко рече́но бысть: «Та́ко глаго́лет Дух Святы́й, отлучи́те ми Варна́ву и Па́вла на дел́о, я́коже нареко́х я́».

Па́ки прилучи́ся Святы́й Дух и на́м , я́коже глаго́лет: «Дух мой дам вам».

Се ли Его́ прише́ствие показа́еши я́ве бы́ти, я́коже ны́не бысть в при́тчи, Сего́ благода́ть на святы́х апо́столех.

И хо́щещи ли ве́ровати глаго́лемым, послу́шай и евангели́ста Иоа́нна глаго́люща: «Ту бо бе Дух, иде́же Иису́с просла́вися».

Сей Дух Па́вел нарече́, Дух сыновства́, и Дух благода́ти, поне́же в вода́х купе́льных породи́вшеся челове́цы водо́ю и Ду́хом, сыновство́ прие́млем. Те́мже и Госпо́дь к Никоди́му глаго́ля: «А́ще кто не роди́тся от воды́ и Ду́ха, не мо́жет вни́ти в Ца́рство Бо́жие». Сего́ ра́ди и Дух сыновства́, и Дух благода́ти, поне́же благода́ть и и́стина Иису́с Христо́м бысть. Ду́ха ради Свята́го, и си́лою Бо́жиею ро́ждься.

И па́ки: «Дух Уте́шитель», поне́же и Уте́шитель с на́ми ко Отцу́ есть: и не то́кмо ко Отцу́, но и нам всегда́ на поруче́ние: «Аз бо вопрошу́ Отца́, и ино́го Уте́шителя, я́ко Мене́, даст вам».

Да пребу́дет с ва́ми во ве́ки, утеша́я ва́ша сердца́, и утвержда́я на терпе́ние Бо́жие и упова́ние Христо́во. Поне́же сию́ за́поведь прие́мше по святе́м Его́ из ме́ртвых воста́нии святи́и апо́столи, учи́ти и крести́ти пуще́ни бы́вше, во и́мя Отца́ и Сы́на и Свята́го Ду́ха: поне́же се и ны́не и́стинней сподо́бихомся ба́ни Свята́го Ду́ха ра́ди, потщи́мся и ду́шу и те́ло нескве́рно соблюсти́, сла́вяще Пресвяту́ю и Единосу́щную Тро́ицу, Отца́ и Сы́на и Свята́го Ду́ха, ны́не и при́сно и во ве́ки веко́в. Ами́нь.

Ели́ко же вас на пра́зднствующую приснокипя́щую благода́ть гряде́те, ко исто́чнику благосты́ней Христу́ притеце́м. Исто́чник, о Не́мже проро́к вопия́ше ко Отцу́ свето́вному: «Я́ко от Тебе́ Исто́чник живо́тный, во Све́те Твое́м у́зрим свет», си́речь во Единоро́днем Твое́м Сы́не, Дух Святы́й. Я́коже у́бо проро́к Влады́ку Христа́ Исто́чник нарече́?

Есть у́бо, о́ дру́зи, и земни́и исто́чницы в разли́чных ме́стех среброобра́зны ви́дети, и во глубине́ ка́меничие на дне воды́ прини́кшу смотри́ти, разже́нному у́бо до́бре златолу́чному со́лнцу во дни жа́твенныя, простра́ннее своя́ луче́ бездо́ждне поко́ившу, и на во́днем благоно́сии. Вско́ре, и́же к тако́му исто́чнику прибли́жився пу́тник, с тщето́ю не отъи́дет: ру́це бо в ча́ши ме́сто воудо́лив, и весь сам ся сла́дце прего́рбив, во́ду почерпа́я, жа́жду цели́т, зной утеша́ет, лице́ разгоре́ло обро́сит, чу́вства разсла́бленая совокупля́ет, ду́шу ту́жащу разширя́ет, се́рдце окаменева́юще умягчева́ет, коле́не нехотя́щии ити́, па́ки грясти́ понужда́ет. Но той у́бо исто́чник среброви́дный, жа́жду у́бо мно́гажды цели́т, слезе́ну же надыма́ет. И зной у́бо мно́гажды утеша́ет, я́тром же твори́т боле́ти. И ду́шу у́бо мно́гажды изскочи́ти хотя́щу удержа́ет, сту́день же пе́рсем вложи́в, многовре́менную я́зю ражда́ет.

Влады́ка же наш Иису́с Христо́с, И́же до́бре Исто́чник нарече́н, не я́коже кипя́ среброви́дными струя́ми, но я́коже пловы́й боговла́стными уче́ньми: не часть у́бо не́кую ве́рных цели́т, часть же не́кую врежда́ет - от Це́ла же це́лое дая́, та дае́т прири́щущым, я́же от ни у кого́же заи́м и́мать. Не бо́ на долг путь Влады́ка Христо́с ве́рныя посыла́ет живы́я воды́ почерпа́ти, но во утро́бе разу́мней име́ти Ему́ поуща́ет. Слы́ша бо ны́не глаго́лющу Ему́: «А́ще кто жа́ждет, да прии́дет ко Мне и пие́т. Ве́руяй в Мя, я́коже рече́ Писа́ние, ре́ки от чре́ва его́ истеку́т во́ды жи́вы».

Есть у́бо, о́ дру́же, и четверото́чни ре́ки. Оте́ц - исто́чник в поро́де и́же во Еде́ме : но той на земли́ вдоли́ся , и издо́лу и́мать струи́, [во] истеку́щую струю́ расхо́дится. Крестя́щым бо ся, не су́щым ту, обли́чно бо быва́ет водно́е тре́бование. Влады́ка же наш Госпо́дь Иису́с Христо́с, непреста́нный Исто́чник, не от земли́ восхо́дит, но с небесе́ подае́тся: не в ча́сти мни́тся, но всю́ду сла́вится: не с тле́нными тле́ет, но и тле́нным нетле́ние дае́т. И исто́чник у́бо, и́же в раи́, четы́ре ре́ки то́чию си суть: Гио́н, Фисо́н, Тигр и Ефра́т. И ти́и уча́стни и малото́чни, и не всю зе́млю напая́юще: и зиме́ у́бо водня́щеся, в жа́тву же изнемога́юще. Церко́внаго же рая́ Исто́чник, апо́стольския ре́ки, мно́ги у́бо и несве́домы, - а́ще и Иу́да пресече́. Разуме́й же со все́ми четы́ри ева́нгельския ре́ки: Матфе́я, Луку́, Ма́рка, Иоа́нна, и́же вся ве́си, и оте́чества, и гра́ды напая́ют боже́ственными уче́нии.

А́ще бо «звезда́ звезды́ премину́ет сла́вою», по Па́влю уче́нию, ка́ко не духо́вная пло́тных старе́йша суть? Что та́ко рай в Еде́ме име́яй обрета́ется, я́коже церко́вный сей свети́льник нося́ познава́ется? Та́мо Ада́м, я́ко уше́д кры́яся: зде Влады́ка Христо́с, я́ко Бог кла́няемь. Та́мо Е́ве запина́емо: зде Мари́я сла́вима. Та́мо дре́во смерть ражда́я: зде дре́во живо́т расти́т. Та́мо змий лжесло́вию уча́, та́мо законополо́жение преслу́шано: зде богоуве́дение извеще́но. О́нде крин белоли́ствен: зде новопросвеще́нный светлоду́шен. Та́мо ло́зы велезре́нныя: зде му́жи любосло́внии. О́нде исто́чник безгла́сен: зде ре́ки велегла́сныя.

Слы́ша бо ны́не Евангели́ста Иоа́нна вопию́ща: «В после́дний день вели́кий пра́здника, стоя́ше Иису́с и вопия́ше, глаго́ля: А́ще кто жа́ждет, да прии́дет ко Мне и пие́т». Что глаго́леши, о́ дру́же? Па́че, что ся по́здиши? Христо́с зове́т, никто́же да лени́тся. Исто́чник вопи́ет, никто́же ся отре́чи. Вси жа́ждаем, вси да присту́пим. Ели́ко же че́рплем, толи́ко же избыва́ет. И возопие́м Дави́дови дру́зи Дави́дово, к безсме́ртному и приснотеку́щему исто́чнику: «И́мже о́бразом жела́ет еле́нь на исто́чники водны́я, та́кожде жела́ет душа́ моя́ к тебе́ Бо́же».

До́бре глаго́лаше Евангели́ст: «В после́дний день вели́кий пра́здника». До́бре и после́дний той, и вели́кий нарече́. Есть бо после́дний той вели́к , и пе́рвый. После́дний к жидо́м, се́тное бо им прилучи́ся зло беззако́ния ра́ди е́же о Христе́, и студ лица́ их откры́ся. Те́мже Госпо́дь, укаря́я вели́кий град их Иерусали́м, глаго́лаше: «Лице́ блудни́ца бысть тебе́, не срамля́еши ли ся ко всем». После́дний у́бо есть ко всем , пе́рвый к христия́ном. О́нем дро́ждия: нам же чи́стое питие́. О́нем при́щины : нам же мсто. До́бре у́бо после́дний и вели́кий пра́здник евангели́ст сий нарече́.

Что бо́ле настоя́щаго пра́здника? Сей Пятьдеся́тный пра́здник не то́чию живы́я весели́т, но и уме́ршая нари́чет. Сей Пятьдеся́тный пра́здник Це́ркви све́тит, и гро́бы кра́сит, и до́мы благоуха́ния наполня́ет.

Что бо бо́ле сего́ пра́здника, во́ньже Святы́й Дух явле́ние сотвори́, просвеще́ние язы́чное апо́столом дарова́? Днесь христия́нство утверди́ся. Днесь жидо́вство увяде́. Днесь пога́нство закури́ся. Днесь ерети́чество загради́ся. Днесь боже́ственное уче́ние разши́рися. Реку́т же вся́ко не́котории: то ка́ко днесь ерети́чество загради́ся, боже́ственный же уста́в разши́рися? Ка́ко ли? От Госпо́дня уче́ния. Днесь бо нас Госпо́дь явля́я, научи́ наказа́нием явле́нным единосу́щие Отца́ и Сы́на и Свята́го Ду́ха, в трех разли́чиих и со́бствех. А́ще бо исто́чника, ни воды́, ни реки́, никто́же мо́жет разлучи́ти, ка́ко ерети́честии о́троцы сме́ют Отца́ от Сы́на от Свята́го Ду́ха отлучи́ти? Земна́я неразлу́чна, но духо́вная ли разлу́чна?

Реку́т же вся́ко не́котории: То кто исто́чник, кто же вода́, кто же река́? Кто ли Исто́чник? Оте́ц свето́вный. Кто же ли Вода́? Единоро́дный Сын. Кто же Река́? Святы́й Дух. И отку́ду то я́ве? Приими́ ука́з не от мои́х слове́с, но от боже́ственнаго писа́ния. И я́ко Исто́чник Оте́ц, послу́шай того́ Отца́ проро́ком, к жидо́м, к иму́щым ху́льны и ти́нныя и́долы, вопию́ща си́це: «Мене́ оста́виша, Исто́чник воды́ жи́вы, и ископа́ша себе́ рвы у́тлы, и́же не возмо́гут воды́ удержа́ти». А я́коже вода́ Сын, послу́шай Его́ глаго́люща к самаряны́ни: «А́ще бы ве́дала же́но, дар Бо́жий, и Кто есть глаго́ляй ти: даждь Ми пи́ти: ты у́бо проси́ла бы у Него́, и дал ти у́бо бы во́ду жи́ву». А я́коже река́ Святы́й Дух, слы́ши о сем ны́не Го́спода глаго́люща: «А́ще кто жа́ждет, да прии́дет ко мне и пие́т. Ве́руяй в Мя, я́коже рече́ Писа́ние, ре́ки от чре́ва его́ истеку́т воды́ живо́тны». Та́же прило́жь евангели́ст, глаго́лаше, да не мнят о ви́димей реце́, Го́спода глаго́люща: «Се же глаго́лаше, рече́, о Ду́се, Его́же хотя́ху приима́ти ве́рующии Вонь». Ви́де ли правове́рия приснотеки́й исто́чник? Ви́де ли доброче́стия невозмуще́нную во́ду? Ви́де ли боговиде́ния нему́тную ре́ку?

До́бре у́бо настоя́щий пра́здник Пятьдеся́тный, вели́кий нарече́ евангели́ст: есть сей вели́к. Днесь бо апо́столи утверже́ние прия́ша. Днесь ловцы́ - мудрецы́. Днесь безкни́жницы - учи́тели. Днесь единоязы́чни - многоязы́чни. Днесь немоту́ющии - чи́сте бесе́дуют. Днесь дря́хли - све́тли. Днесь у́дницы - уста́вницы. Днесь, и́же в ва́пах ловя́щии, мир улавля́ют. Днесь, и́же рыб и́щут, челове́ки оглаша́ют. Днесь, и́же зве́рий бе́гающе, бе́сы попира́ют. Днесь, и́же непотре́бнии - потре́бни. Днесь безде́льнии - де́льни. Днесь убо́зии - заимода́вцы. Днесь гони́мии - моли́ми. Днесь на́зии - ца́рствующии. Днесь, во у́глех кры́ющеся, в собо́рех суть глаго́люще. Что я́ко долгосло́вую? Днесь, и́же о сиро́тстве пла́чущии, О́тчее име́нство вопию́ще.

Послу́шай разу́мне: Го́споду Иису́су Христу́ пред апо́столы на не́бо восходя́щу и апо́столом обеща́вшу о реце́, Святе́м Ду́се, - ле́по бе, земли́ взе́млющися, реку́ обеща́ти, - ра́довахуся у́бо апо́столи, и ду́ши я́ко ва́пы угото́ваша, когда́ же река́ огнено́сивая бу́дет, го́да не ве́деху. Госпо́дь бо восходя́, обещава́ние Свята́го Ду́ха назна́мена: го́да же, когда́ бу́дет прише́ствие, не пове́да. Почто́? И́мже Бог уста́вне не твори́т, но егда́ хо́щет, тогда́ и показа́ется. Пребыва́ху у́бо апо́столи по возше́ствии Госпо́дни, наде́жду же о Святе́м Ду́се иму́ще, и размышля́юще в себе́, и друг со дру́гом собира́ющеся. И я́ко у́бо ви́деша еди́н, и вторы́й, и тре́тий день, я́ко обеща́нный дар без конца́ бысть, челове́ческими по́мыслы подви́гшеся апо́столи, нача́ша к себе́ бесе́дующе глаго́лати: «Что сотвори́м му́жи и бра́тие? Уже́ деся́тый день пребы́хом, и ничто́же от Учи́теля ви́дим, от рече́нных коне́ц прие́млюще. Что се ди́вно и пресла́вно? И́мемы ли ся у́бо по пе́рвое ры́барство, или́ обеща́ния пожде́м и еще́ ма́ло? Деся́тый день и́мамы пра́зднующе. Что се чу́до? Что се пресла́вно? Елисе́й учени́к Илии́н, тогда́ же, овчи́ну, прии́м чу́до сотвори́: учени́к ученика́, а мы пра́зднуем. Что се пресла́вное? Еда́ у́бо Илия́ на́шего Учи́теля сильне́е? Но не сме́ем рещи́. Ви́дехом бо пред лице́м на горе́ преображе́ние: ка́ко не то́чию Илия́, но и Моисе́й Учи́телю на́шему я́ко Бо́гу поклони́стася. Что се чу́до? Что се пресла́вное? Елисе́й вско́ре ра́тай чу́до сотвори́, безслове́снаго живота́ остностро́чную ко́жу прии́м. Что бо ле́по бе́яше зако́нному Да́телю? Но овчи́ны прича́стие прия́ти? А мы не су́щии ученика́ ученицы́, но апо́столи Христо́ви, деся́тый сей день пра́зднуем».

Та́ко апо́столом бесе́дующым к себе́, и на до́лзе наде́жнаго обеща́ния: и еще́ ча́ющым, се напра́сно небе́сная у́бо отверзо́шася врата́, арха́нгельских сил вопия́ху во́ини, возду́шная же ширина́ мятя́шеся стра́хом, о́блачныя же трубы́ ца́рскими прираже́нии глас испуща́ху. Все же земно́е ме́сто, я́ко трость ве́тром тру́сы зыба́шеся, морско́е же о́гненною поня́вою покрыва́шеся. И свиде́тельствует ми списа́тель апо́стольских дея́ний Лука́ глаго́ля, я́коже ны́не слы́ша: «Скончава́ющуся дни пятьдеся́тному, бе́яху вси единоду́шно вку́пе апо́столи. И бысть напра́сно с небесе́ глас, я́ко носи́му ду́ху бу́рну, и напо́лни до́мы иде́же бе́яху седя́ще. И яви́шася им разделя́еми язы́цы я́ко о́гненни, се́де же на еди́ном ко́ждо их. И нача́ша глаго́лати ине́ми язы́ки, я́коже Дух дая́ше им отвещава́ти». Я́коже дая́ше, а не я́коже веля́ше.

Ви́де ли вели́чество пра́здника? Ви́де ли Свята́го Ду́ха дар? Ви́де ли посрамле́ние духобо́рных ерети́к? Пятьдеся́тницу чтут, а Ду́ха Свята́го стреля́ют. Кто язы́ки кове́т, а́ще не язы́чный Зди́тель ? Кто вели́ка уста́ стру́жет, а́ще И́же и осля́ти глаго́лати пра́ве устро́ив? Кто безкни́жныя умудря́ет? Но Святы́й то́чию Дух.

Но вско́ре реку́т сопроти́внии: отку́ду то я́ве, я́коже Святы́й Дух дае́т прему́дрости, и виде́ние язы́чное? Отку́ду ли? Слы́ши Го́спода глаго́люща, кривове́рниче, к Свои́м ученико́м: «Не пецы́теся, егда́ приведу́т вы пред влады́ки и старе́йшины, ка́ко или́ что возглаго́лете: не вы бо есте́ глаго́люще, но Дух Отца́ Моего́, глаго́ляй в вас».

О пресла́вных чуде́с! Во огни́ сни́де Святы́й Дух, я́ко и огнь се́де на еди́ном кого́ждо апо́столе. И огнь сый, не изже́ апо́стол, но па́че освети́. Почто́? Поне́же не бе жгий, но светя́й. Ху́льныя жгий, доброчести́выя же светя́. Я́коже бо мирски́й и ве́щный огнь, те́рние у́бо жжет, воск же растопля́ет: о́лово разваря́ет, кал же суши́т: сребро́ же све́тло твори́т, зла́то же чи́стит, и хле́вину све́тит. Та́коже и безвеще́ственный огнь, си́речь Святы́й Дух, грехи́ затира́ет, се́рдцу несы́ту вя́нути твори́т, челове́ка льсти́ва погубля́ет, ду́шу обраща́ющуся очища́ет, му́жа ве́рна све́тла твори́т, и церко́вный дом освеща́ет.

И́нако же во огни́ зде Святы́й Дух: да уве́мы я́ве, я́ко боже́ственнаго естества́ Святы́й Дух. Той бо Бог наш огнь есть, по глаго́лющему словеси́: «И́же а́ще взы́щещи Бо́га, Бо́жие зна́мение ка́жуща и та́йну даю́ща, огне́м И́ обря́щеши творя́ща». Та́ко бо и сы́ны Изра́илевы из земли́ еги́петския изведе́ столпо́м о́гненным приста́ви: не жгущь, но светя́щь. Та́ко и пе́рвое явле́ние Бог Моисе́ови творя́, пла́мене огнекупи́ннаго Свой глас испусти́: не да слы́шит, но да научи́т. Та́ко и Дании́лу показа́ся Бог на престо́ле о́гнене, Сам Ся седя́ показа́: да не отщети́т проро́ка, но да научи́т всю́ду в чесо́м Бог.

Реку́т вся́ко не́цыи: «Я́ко то ве́тхаго заве́та суть зна́мения. Скажи́ нам, рече́, я́ко и в но́вем заве́те Бог огне́м чу́до твори́т, о́но бо ве́тхаго возвеще́ние». Послу́шай, дру́же: а́ще не ве́си, навы́кни. А́ще ли ве́си, помяни́.

Нано́сиши вся́ко на па́мять си, я́ко Бог пред все́ми волхвы́ веды́й, звездо́ю я́ доводя́. Ве́си же я́ве, я́ко огнь есть звезда́.

Та́коже и Госпо́дь Свое́ те́ло, е́же на чи́стей трапе́зе, угль о́гнен нарече́. И когда́ се? Послу́шай Иса́ию от мног лет вопию́ща: «И пу́щен бысть ко мне еди́н от серафи́м, и в руце́ его имя́ше угль, и́же лжи́цею взят от тре́бника. И прикосну́ся ко устна́ма мои́ма, и рече́: Се прикосну́ся ко устна́ма твои́ма, и отъи́мет беззако́ние твое́, и грехи́ твоя́ очи́стит». Кий же угль грехи́ очища́ет, ра́зве приобще́ние Госпо́дне?

Я́коже то Госпо́дь, и креще́ние поновле́ния на́шего огнь нарече́. И отку́ду то я́ве? Послу́шай Иоа́нна Крести́теля вопию́ща: «Гряде́т за мно́ю кре́плий мене́, Ему́же несмь досто́ин ону́ща понести́: Той вы крести́т Ду́хом Святы́м и огне́м».

Всего́ же бо́ле, я́ко во огни́ сни́де Дух Святы́й, се пресла́вное де́йство Свята́го Ду́ха: смы́сленнейшии от жидо́в разуме́вше, я́ко единоязы́чни апо́столи пред сим, без то́лка кому́ждо приходя́щему к ним и от ра́зных оте́честв, тем же язы́ком подая́ху уче́ния доброчести́ва, воздиви́вшеся, нача́ша глаго́лати к себе́, я́коже ны́не слы́ша: «Не се ли си́и суть вси глаго́лющии галиле́яне? И ка́ко их слы́шим ко́ждо на́шим язы́ком, в не́мже роди́хомся: парфя́не, ми́ди, и елами́те, и живу́щии междуре́чии, и во Иуде́и же и Каппадоки́и, в по́нте и Аси́и, и во Фриги́и же и Памфили́и, и в часте́х ливи́йских, и и́же в Кирини́и, и приходя́щии ри́мляне, жи́дове же и прише́льцы, кри́те и аравля́не, слы́шим глаго́лющая на́шими язы́ки вели́чия Бо́жия?».

Восчуди́шася жи́дове, ви́дяще апо́столы многоязы́чествующа. Те́мже дивя́щеся, глаго́лаху к себе́: «Не си ли вси глаго́лющии суть галиле́яни, убо́зии ря́дницы, и не суть кни́жницы, и се́ти плету́щии? Не от сих ли ча́сто ры́бы купова́хом? Отку́ду сим ве́сти? Еда́ ка́ко в рыб ме́сто, язы́ки улови́ша? Но ви́дехом пред сим единоязы́чны: отку́ду разли́чныя бесе́ды, я́ко из сокро́вищ из горта́ней излага́ют? Отку́ду сим такова́я? Ны́не навыко́хом: ве́тхая мину́ша, се бы́ша но́ва вся. Петр ри́мски бесе́дует, его́же Моисе́й не мо́жет твори́ти. Не слы́шахом ли его́ глаго́люща: «Худогла́сен есмь, и туп язы́ком», и отмета́шеся посыла́ния ху́дости ра́ди гла́сныя? Исправле́ния не прия́, но пребы́сть имы́й, е́же естество́ пода́ . Моисе́я бо оста́вим, и та́ко сия́ блажи́м. Па́че же Того́, И́же те́ми пресла́вная чудеса́ твори́т, Бог, восла́вим Его́: Того́, И́же о́бщаго ра́ди всех успе́ха единови́дный ловце́м язы́чный сосу́д на потре́бу приходя́щым упра́ви. Что та́ко Авраа́му дано́ бысть, премину́ша си́и вся: име́ние преоби́дят, сла́ву отме́щут, без мзды целя́т. При́сно а́лчут, а́ки пита́ющеся све́тли суть. Ме́ртвых повеле́нием воставля́ют, я́зи прого́нят и бе́сы отго́нят. Обременя́еми ра́дуются, зауша́еми, обраща́ют и другу́ю лани́ту. Без жезла́ и ме́ха и изме́ны хо́дят, зла́та и сребра́ и ме́ди ни слу́хом прия́ти хотя́т. К сим притеце́м, глаго́лющым вели́чия Бо́жия. Про́чих отврати́мся, блудя́щих и ничто́же успе́ющих».

Но се у́бо смы́сленнейшии от жидо́в глаго́лаху. Беззако́ннии же па́ки от жидо́в, о́ па́ки подви́гшеся за́вистию!, и си́и нача́ша сопроти́в отвещава́ти, я́коже ны́не слы́шу: «Я́ко мсту напо́лнени суть», ре́кше пия́ни суть зело́, и того́ ра́ди сопроти́вне бесе́дуют.

То слы́шав блаже́нный Петр, и терпе́ти не моги́й, подвиза́ше бо и́ огнь Ду́ха Свята́го, став посреде́, я́коже слы́ша ны́не, нача́ глаго́лати: «Му́жи жи́дове, и живу́щии во Иерусали́ме вси, се вам да бу́дет ве́домо, внуши́те словеса́ моя́. Не бо́ я́коже вы мните́, си́и пия́ни суть, есть бо час тре́тий дне».

До́бре блаже́нный Петр свиде́тельствуя тре́звству: «Тре́тий час дне». То кто есть тре́тий час? Святы́й Дух. Пе́рвый час Оте́ц, И́же зако́н уста́ви. Вторы́й час Сын, И́же благода́ть дав. Тре́тий час Святы́й Дух, И́же язы́ки апо́стольски ра́зны сотвори́в.

Рече́ у́бо Петр: «Му́жи жи́дове, живу́щии во Иерусали́ме вси, се вам ве́домо бу́ди, внуши́те словеса́ моя́. Не бо́, я́коже вы мните́, си́и пия́ни суть». Никто́же да́ра Бо́жия пия́нства помышля́й. А́ще обоня́сте или́ слы́шасте, бли́же прииде́те и уве́дете опа́сне, вино́м ли па́хнут или́ благода́тию ды́шут. Вети́йствуют ли, или́ я́ко ли́ствие стерня́ются пия́нством, или́ я́ко и столпо́ве водруже́ннии суть трезве́нием. Дре́млют ли пия́нством лихи́м, или́ уча́т боговиде́нием. Пия́нством ли де́ло то мните́, о́ жи́дове? Пия́нство язы́к вя́жет, уста́ развраща́ет, о́чи обрете́ле твори́т, кри́ве и сугу́бне ходи́ти твори́т. Пия́нством обнажа́ется и не чу́ет: от ни́хже подоба́ет благода́ти честь приима́ти, от те́хже насмива́ется. Пия́ни ли суть апо́столи? Ей ли, или́ ни, о́ жи́дове? И́же ли де́лав Ной кора́бль и упи́ся? Или́ мы, и́же крест пропове́даем?

До́бре у́бо реко́сте, о́ жи́дове, я́ко пия́ни есмы́: не от вина́, я́коже разумева́ете вы, но от боже́ственныя благода́ти. О сем же пия́нстве от мног лет проро́к вопия́ше: «Упию́тся от оби́лия до́му Твоего́, пото́ком пи́щи Твоея́ напои́ши их, я́ко от Тебе́ исто́чник живота́».

Вонми́ разу́мне: вре́мя бо у́бо зна́менати сло́во, и вско́ре отпусти́ти вас днесь.

Мню бо вам приглаша́ти гро́бы и па́мять пре́жде усо́пших почести́, а не поху́лити: не отмещи́ его́ я́ко уме́рша, жив бо есть того́ Влады́ка, и показу́ет уме́ршему пре́жде. Что твори́ши? И́деши ны́не, цветы́ к мертвецу́ несы́й? До́бре твори́ши, хвалы́ еси́ досто́ин. Но оба́че цветы́ принеси́ ему́ добротво́рие, а не лихи́м пия́нством венча́й преди́ умер́шаго. Доброгове́инством, а не мясояде́нием. Моли́ зань просфи́рою, а не напа́стию. А́ще над гро́бом ты ны́не вино́ пие́ши, но и мя́са я́си, что еси́ успе́л пре́жде уме́ршему? Даждь зако́н, ме́дницу убо́гому, - и он ра́дуется. Посади́ чре́во а́лчущаго хле́бом - и он сослажда́ет си.

О челове́ческаго смотре́ния! Врежа́ющыя лю́бим, спаса́ющих же ненави́дим. Кий изве́т днесь, над гро́бом одры́ постила́ти, и пир вели́к составля́ти, и я́ко на бра́це плеска́нием смех твори́ти? И́но брак, и и́но гроб. Что над гро́бом днесь, я́ко и на рожде́нии мирсте́м пля́шут? И́но рожде́ние мирско́е, и и́но же надгро́бие мирско́е.

О доброчи́нии у́бо, о́ дру́зи, попеце́мся, Свята́го Ду́ха прихо́д почте́м, и Писа́ния послу́шаем, и Го́споду повине́мся. Слы́ша бо вся́ко, что Госпо́дь прише́д сотвори́? Подо́бная и ты сотвори́, я́ко христиани́н. Что же прише́д Госпо́дь сотвори́? В год ли попла́ка, или́ без го́да вино́ пи? Воспрети́ ли ду́ху помоли́вся, или́ взыгра́ и кото́ру сотвори́? Всю́ду же я́ве, я́ко и помоли́вся, и прослези́, и воспрети́ ду́хови, и возмути́ся по жале́нию: о́браз дая́ нам. Во след у́бо восле́дуим Го́спода.

И Писа́ния глаго́люща: «Пла́чися, рече́, над ме́ртвым, а не над гро́бом». Попла́чися с го́да, я́ко Госпо́дь Ла́заря. Послу́шай собо́рника глаго́люща: «Вре́мя пла́катися, и вре́мя смея́тися». Что у́бо над гро́бом днесь нога́ма сража́ют, и кимба́лы стряса́ют побе́дныя о́бразы, и пою́т гла́сы я́ко на позо́рищих? Еда́ бо враги́ победи́ша, или́ мучи́теля победи́ша, да ли́ки сатанины́ соста́виша, и та́ко по то́ржищем облича́ются?

О́ безчи́сленных деле́с! Что бо днесь не творя́т непра́ведных, и́же над гро́бом пия́ницы! Днесь возгража́ти обещава́ются гро́бы: и то́чию я́ко отсту́пят от гро́ба, вско́ре па́мять отлага́ют. Пия́нство бо, до́брей па́мяти губи́тельство.

Уклони́мся у́бо от пия́нства. Пока́жем клеветники́ жи́довы, глаго́лавшая ны́не, я́ко мсты напо́лнени суть апо́столи. Принесе́м Госпо́дне уче́ние, глаго́лющее я́коже ны́не слы́шахом: «А́ще жа́ждет, да прии́дет ко Мне и пие́т. Ве́руяй в Мя, я́коже рече́ Писа́ние, ре́ки из чре́ва его́ истеку́т воды́ жи́вы». Послу́шай разу́мно: о воде́ учи́т Госпо́дь, а не о вине́ упая́ющем.

Реку́т же си́це не́котории: «Доста́точна бо суть противосло́вия пия́ницы при́сно. Что у́бо, зло ли есть вино́, и́мже ху́лиши е́? Да а́ще зло вино́, рече́, почто́ Госпо́дь наш Иису́с Христо́с во́ду вино́м сотвори́?».

Послу́шай смы́сленне: не вино́ зло твори́м, - Бо́жий бо дар есть, - но пия́нства гнуша́емся, дия́воле бо де́ло есть. Оба́че проти́ву тому́ слы́ши се́, уже́ бо сло́во конца́ до́йде. Преложи́ у́бо Госпо́дь во́ду в вино́: но оба́че то сотвори́ в Канагалиле́и на бра́це, егда́ бе вина́ потре́ба, а не над гро́бом Ла́заревым в Вифа́нии. Но и пла́ка над Ла́зарем, И́же на бра́це во́ду в вино́ преложи́: иде́же ли мертве́ц, сле́зы подаде́.

Те́мже и вас молю́ люби́мицы, бежи́м пия́нства, и всего́ де́йства вра́жия. Послу́шаим же Влады́ки и со опасе́нием свое́ житие́ устро́им, да бу́дущих благ полу́чим, о Христе́ Иису́се Го́споде на́шем, Ему́же сла́ва во ве́ки веко́в. Ами́нь.

Часта́ убо нам, но успе́шна Це́ркве душе́вная позо́рища. И уче́ния бо содержа́ние вонь ро́днейша, глаго́лющих язы́ки и послу́шающих ра́зумы, возде́лает: елма́ же и ра́таю, ча́сто зе́млю орю́щу и копа́ющу, всего́ у́бо бы́лия и всего́ те́рния ни́вы чи́стятся. Сла́вятся у́бо Христо́вых мно́жество пра́здник духо́вных, нам дарова́в ра́ди за неизглаго́ланнаго [и] спасе́наго плотска́го строе́ния Его́, ю́ноствующи всегда́ родства́ све́тлость, нестаре́яйся просвеще́ния пра́здник, ве́чнаго воскресе́ния хвала́, пресла́вное возноше́нию чу́до, душе́вное пятьдеся́тное благодея́ние.

Уте́шитель бо Дух Святы́й днесь к челове́ком соше́д, пло́тнаго устрое́ния Христо́ва зна́менает соверше́ния, апо́стольскаго ли́ка свяща́я, деля́ да́ры, дерзнове́ние дая́, чудеса́ да́руя, словесе́м дая́ отгони́ти я́зву.

Что же глаго́лю словесе́м? И́бо и сте́неве святы́х не́когда вопроси́шася на цельбу́. Проша́ху бо Петро́ва сте́ня скорбя́щии, минове́нием то́лько спасе́ние восхища́юще. Па́вла же и подглавотя́жь устрое́ния име́ху цельбы́. Дото́ле бо ся простре́ Ду́шная благода́ть, доне́лиже и ме́ньшим дая́ти боля́щым цельбу́. Но и́ма что чу́дно пра́здник сей и та́йно . К чудесе́ бо дея́ния Духо́внаго, отреше́ние отвеща́ния пе́рваго бысть. Не бо́, но е́же ны́не от Ду́ха дели́ми язы́цы, смеси́вшиися челове́ческия язы́ки на столпе́ дре́вле упра́виша. И сему́ указа́ние - стра́нское послу́шество. «Парфя́не бо, и мидя́не, и елами́те», и и́ни мно́жайши, «слы́шим вся ты́я свои́м язы́ком глаго́лющая вели́чия Бо́жия». Иде́же Бо́жия пропове́дуются словеса́, ту и ва́рварстии слу́си умудря́ются: где же зло́бное гражде́ние поуча́ется, ту му́дрый язы́к ва́рварскими глаго́лет. До́бре же «разделя́еми » и язы́чными управле́нии Писа́ние пове́дает: не бо́, но «сле́зше» , разумева́ем и деле́ния потре́боваше .

«Яви́ша же ся им разделя́еми язы́цы я́ко огнь». О ве́лие чу́до прише́ствия Ду́ха, вско́ре да́вый апо́столом прему́дрость! Виждь у́бо двана́десять ученика́ от еди́ного Учи́теля наказу́еми. Виждь ми двана́десяте вое́вод, еди́ному Царю́ учиня́еми. Виждь двана́десяте свети́ле све́тлеи, от еди́наго восходя́ще Холма́. Виждь двана́десяте чи́стеи лучи́, от еди́ного исходя́ще Со́лнца. Виждь ми двана́десяте свещи́, от еди́ныя вжига́еми И́скры. Виждь ми двана́десяте лозе́, от и́стиннаго Виногра́да изра́стше. Виждь ми двана́десяте ко́шниц, от еди́ныя исполня́еми Трапе́зы. Виждь ми двана́десяте реце́, от еди́наго исходя́ще Исто́чника. Виждь ми двана́десяте язы́ка, от еди́ныя Благода́ти глаго́леми.

И поклони́шися Свято́му Ду́ху, я́ко Единосу́щну Отцу́ и Сы́ну: не от поуче́ния и ставле́ния словесе́ прему́дры ученики́ сотвори́ Дух, но от того́ еди́наго язы́чнаго измене́ния. И чу́днее, я́ко не то́чию Бо́жия вели́чия , учи́ти ум ко вся́кому язы́ку стра́нну согла́сно их жре́лу , сотвори́.

Бы́ша бо мре́жа ры́барьска уста́, и́мже спа́сшеся мы, хва́лящеся вопие́м:

Ра́дуйтеся, Христо́ви апо́столи, вам бо духо́вным дея́нием вы́шнее и ни́жнее Ца́рство поручи́. Ра́дуйтеся, соль земна́я, я́же николи́же не мо́жет обуя́ти. Ра́дуйтеся, свет ми́ра сего́, пребы́вая в восто́це, и везде́ просвеща́я слепы́я, и́же без дров горит: ему́же Свети́льник Христо́с, Свеща́ - Крест, еле́й - дар духо́вный. Ра́дуйтеся, свет ми́ра сего, и́мже нощь вся отступа́ет. Ра́дуйтеся, иере́ом знамена́телие, и учи́тели, и нака́затели, народоло́вцы стран, ры́барей пра́ведных поучи́тели, греху́ уби́йцы, неве́рным освети́тели, непобеди́мая вети́я, недре́млющии стра́жеве. Ра́дуйтеся, моего́ жре́ла ве́трие, гре́шнаго язы́ка обостри́телие, мои́х словес древоде́ли. Рад́уйтеся, и́же вре́тища не иму́ще, и благода́тьством всю вселе́нную испо́лнивше. И́мже расте́йший жезл и́злиха - и отвсю́ду я́зю отгна́сте. И́мже не бе ри́зы вторы́я - но цари́ от вас облеко́шася. И мо́ре [носи́ше] пешеше́ствующии вы, я́ко и кора́бли ядроно́сныя подража́ю вы . И́мже не бе медь при по́ясе, ни зла́ту ни сребру́ не ноша́шеся меше́ц, но но́зе у́бо от вре́тища хромы́м дарова́сте, ва́шему бо по́ясу слепе́ц прикосну́ся, прозре́, тече́ние де́нное начина́ше и пе́рстом каза́ти зве́зды, и́хже пе́рвее не ве́дяше. Ра́дуйтеся, диа́волу запе́нницы, бесо́м прого́нницы, очисти́тели прельще́ния: вы бо прельще́ния отгна́сте от душ на́ших. И́хже и убру́си уподобля́ются Христо́ва подо́лка. Ра́дуйтеся, бога́тство обре́тшии, сокрове́нное на по́ле, и жене́ дра́хму, ю́же погуби́, показа́вше. Ра́дуйтеся, и́же мре́жу свою́ во глубине́ вселе́нныя погру́жше, и от всего́ ро́да собра́вшеся, улови́сте ры́бы, я́же и до ны́не вечеря́я Царь весели́тся. Ра́дуйтеся, и́же у́гльный Ка́мык всю́де [на] ра́мех нося́ще, и ве́рных до́мы освеща́юще и утвержа́юще, си́лою Распя́таго и умерщве́нныя Воскреси́вшаго, Христа́ Бо́га на́шего, Его́же ле́по сла́вити, со Отце́м и со Святы́м Ду́хом, ны́не и при́сно и во ве́ки веко́в. Ами́нь.

Днесь, бра́тие, на́йде Свята́го Ду́ха благода́ть, начина́ющися от дне́шняго дне, и объиду́щи вре́мя да́же и до сего́ дне, и велича́ема быва́ет. Я́вльшибося благода́ть Свята́го Ду́ха, внеза́пу доброгла́сна, неглаго́ланных уста́ отве́рзе, и ненака́занных язы́ки затче́, а ры́барская сердца́ на дерза́ние преложи́.

Те́мже и обнища́вшую мою́ мысль исхища́ет от стра́ха дне́шняго, с небесе́ прише́дши благода́ть. Си́це же бо, пре́жде Свята́го Ду́ха прише́ствия, стра́ху я́ся Петр рабы́ни, отве́ржеся своего́ Влады́ки. По прише́ствии же Свята́го Ду́ха, пред наро́ды и цари́ с дерзнове́нием вопия́ше, испове́дуя: не мо́жем мы, я́же ви́дехом и слы́шахом, не глаго́лати. Те́мже и пия́нство, Свята́го Ду́ха благоязы́чество, то иуде́и мне́ша, глаго́люще: «Я́ко мстом испо́лнени суть».

Отвеща́ же к ним Петр: О годи́но искуша́емая, Тро́ицею же утвержа́емая! Поне́же бо в тре́тию годи́ну Крест водружи́ся, и в тре́тию годи́ну Моисе́й на горе́ прия́т скрижа́ли: и в тре́тию годи́ну Святы́й Дух виде́нием о́гненым на апо́столех се́де, пове́дая я́ко Бог Дух есть. «Бог наш, рече́, огнь пояда́я есть». И прише́ствие Сы́на, я́ко и дождь на руно́ бысть, поне́же бысть смотре́нию о́браз. А о Ду́се да пока́жется, я́ко Бог Дух есть. Иса́ия рече: «Ви́дех Го́спода на престо́ле высо́це и превознесе́не, и серафи́ми стоя́ху о́крест Его́. И рече́ ко мне: Кто и́дет к лю́дем сим, или́ кого́ послю́ к ним? Одебеле́ бо се́рдце лю́дем сим, и уши́ма свои́ма тя́жко слы́шаша, и очеса́ своя́ смежи́ша. Егда́ когда́ у́зрят очи́ма свои́ма, и уши́ма услы́шат, и се́рдцем разуме́ют, и исцелю́ я. Хо́щеши ли?». О Ду́се бо рече́: я́ко Ду́ха ви́де Иса́ия на престо́ле высо́це и превознесе́не, послу́шай Па́вла и помяни́: пуще́н быв к Неро́ну в Рим, и обре́те ту мно́жество иуде́й, и уча́ше я́ словеси́ спасе́ния: о́ви же повинова́хуся, а друзи́и не ве́роваху: нестро́йни же бы́вше ме́жду собо́ю, разыдо́шася, ре́кшу Па́влу глаго́л еди́н: «До́бре рече́ Дух Святы́й о вас Иса́ием проро́ком: «Слу́хом слы́шите и не и́мате разуме́ти»». Ви́диши ли, я́ко Госпо́дь и Бог Дух Святы́й есть?

Где бо не обря́щеши Ду́ха Свята́го, в Тро́ице везде́ сла́вима в зако́не. Послу́шай проро́ка глаго́люща: «Словесе́м Госпо́дним небеса́ утверди́шася, Ду́хом уст Его́ вся си́ла их». Но и в благода́ти, егда́ Спас на спасе́ное креще́ние прии́де, Оте́ц свы́ше Сы́на послу́шествоваше, и Дух Святы́й в виде́нии голуби́не прии́де. То́йже Дух, в виде́нии голуби́не се́де на еди́ном кого́ждо их на апо́столе. Ви́диши ли, я́ко престо́ли суть апо́столи? Бог бо седи́т на престо́ле святе́м Свое́м.

Сей Дух, Ана́нию солга́вша умори́. Сей Дух дае́т благи́м благода́ти, разделя́я на вла́сти кому́ждо, я́коже хо́щет. Сего́ Ду́ха напо́лнися апо́стол Па́вел, и Елли́му корени́тца омрачи́. Сего́ Ду́ха Гаврии́л Мари́и благовествова́ше, глаго́ля: Дух Святы́й на́йдет на Тя, и си́ла Вы́шняго осени́т Тя».

То́йже и ны́не на́йдет на ны, и благослови́т ны. Сей бо смеша́ется с водо́ю, и изгаша́ет грехи́ я́ко и огнь. И новокреще́нныя просвеща́ет я́ко и свет, а нас ми́лует я́ко Бог. Я́ко Тому́ подоба́ет сла́ва и держа́ва, ны́не и при́сно и во ве́ки веко́в. Ами́нь.

Вели́цыи нам люби́мии от Бо́га да́ны да́рове во дне́шний пра́здник. Ве́село да восхва́лим Христа́ Бо́га на́шего: се бо в прише́ствие Свята́го Ду́ха доидо́хом. Днесь си́лу прия́ша апо́столи, и нача́ша глаго́лати ине́ми язы́ки, я́коже Дух Святы́й подава́ше им.

Почто́ Святы́й Дух Отцу́ и Сы́ну Единосу́щен Сый во о́бразе о́гнене яви́ся апо́столом, а на Единоча́дем Сы́не в голуби́не о́бразе яви́ся? Почто́же иногда́ голуби́ным о́бразом, а иногда́ о́гненым явля́ется Святы́й Дух? Ни на Го́спода прии́де во о́бразе о́гнене, ни на ученики́ яви́ся в голуби́не?

Четы́рьми у́бо се есть разделе́нии: со Отце́м и Сы́ном бе Единове́чен Дух, о́гненым о́бразом яви́ся апо́столом, я́ко Беспло́тен, Неизрече́нен и Неви́димь Бог. Но о́гнен есть, Павлу свиде́тельствующу: «Бог наш есть Огнь пояда́яй»: того́ ра́ди о́гненым о́бразом явле́ние Свята́го Ду́ха на зе́млю Госпо́дь посла́. Моисе́й глаго́лет: «Одесну́ю Его́ огнь и зако́н, а ошу́юю гре́шнии бу́дут».

Вельми́ бо жада́ет Христо́с Бог на́шего спасе́ния, Свои́м милосе́рдием изво́ли обнови́ти естество́ на́ше, обетша́вшее грехи́: те́мже в на́шу плоть облече́ся, и во́лею за ны пострада́, хотя́ нас спасти́, и воскре́се из ме́ртвых, взы́де на не́бо, и се́де одесну́ю Отца. В сий же дне́шний день Дух Святы́й посла́, в виде́нии о́гненых язы́к, ученико́м Свои́м раздая́, я́коже обеща́ по Воскресе́нии Свое́м, глаго́ля: «Восхожу́ ко Отцу́ Моему́, и Отцу́ ва́шему. У́не бо есть вам да Аз иду́: А́ще бо не иду́ Аз, Паракли́т не прии́дет к вам, И́же есть Уте́шитель. А́ще ли иду́, то умолю́ Отца́, и ино́го Паракли́та по́слет вам, И́же в вас бу́дет, Дух И́стинный, Той научи́т вы, и воспомяне́т вся ели́ка глаго́лах вам». Днесь Дух Святы́й прия́ша апо́столи, и ине́ми язы́ки нача́ша глаго́лати, и ше́дше во весь мир, проидо́ша вся уча́ще.

О пра́зднице у́бо ма́ло да побесе́дуем, да слы́шите, ка́ко духо́вне пра́здновати подоба́ет. Пра́зднуют бо и е́ллини свои́м бого́м, си́речь бесо́м. Пра́зднуют же и жи́дове угожда́я пло́ти, но вси ти́и духо́внаго пра́зднества не обрета́ют. Мы же ве́рнии, духо́вне да пра́зднуем. А́ще ли же во святы́я пра́здники упива́етеся, и блуд творите́, рцы́те ми, чим есте́ лу́чше пога́ных? Они́ бо и́долом слу́жат, а вы пия́ньством и блудо́м диа́волу рабо́таете па́че Бо́га: оста́вльше бо Бо́жия пра́здники, дия́волю во́лю творите́. Велича́ет бо ся дия́вол о ва́шем пия́ньстве глаго́ля: «Лу́чше мне запо́йцы от христиа́н, не́жели от пога́ных идоломоле́бницы, вся бо во́ля моя́ в пия́ницах есть».

Тем, ве́рнии, глаго́лю вам: бе́гайте ненасы́тнаго блуда́ и пия́ньства. А́ще бо во святы́я пра́здники упива́етеся, и блу́дите, то дия́волу рабо́таете, и во́лю его́ творите́, я́коже Сам Госпо́дь о том глаго́лет: «Не пребу́дет Дух Мой в челове́цех сих». Ка́ко бо во пия́наго Дух Святы́й всели́тся? Несть бо добр пия́нчивый, и Дух Святы́й гнуша́ется пия́ньства: в досто́йныя бо Дух Святы́й вселя́ется.

Те́мже молю́ вас, ве́рнии, истрезви́теся Стра́хом Бо́жиим, да прии́мете Дух Святы́й, я́коже и апо́столи. Отве́ржите от себе́ вся зла́я де́ла, и уклони́теся вся́кия непра́вды, да спасе́ни бу́дете, о Христе́ Иису́се Го́споде на́шем. Аминь.

Стихи́:

Вся́кое дыха́ние просла́ви ду́ха Госпо́дня:

И́мже лука́вых духо́в всу́е де́рзости.

В си́й де́нь, в понеде́льник Пятдеся́тницы, того́ Всесвята́го и Животворя́щаго, и Всеси́льнаго Ду́ха пра́зднуем, еди́наго от Тро́ицы Бо́га, единоче́стна и единосу́щна и единосла́вна Отцу́ и Сы́ну. В си́й у́бо де́нь Пятдеся́тницы святы́м апо́столом су́щественне на́йде, в ви́де о́гненных язы́ков, се́д на еди́наго коего́ждо и́х в го́рнице, в не́йже бя́ху пребыва́юще. Че́сти же ра́ди ко Всесвято́му Ду́ху, и разде́льне, и в се́й Пятдеся́тнице узако́ниша пра́здновати Ему́, и́же вся́ до́бре разчини́вше боже́ственнии отцы́. Обеща́вый бо Спа́с, пре́жде стра́сти, Уте́шителя прише́ствие, ре́к: Поле́зно е́сть, да А́з иду́, а́ще бо А́з не иду́, Уте́шитель не прии́дет. И па́ки: Егда́ же прии́дет О́ный, научи́т ва́с, и наста́вит ва́с на вся́кую и́стину. И па́ки: Умолю́ Отца́, и ино́го Уте́шителя по́слет ва́м, Ду́ха и́стины, И́же от Отца́ исхо́дит. И по стра́сти же, егда́ и на не́бо восходя́, рече́: Вы́ же пребу́дите во Иерусали́ме, до́ндеже облече́теся си́лою с высоты́: посыла́ет Его́: пребыва́ющым бо и́м внегда́ испо́лнитися дню́ Пятдеся́тницы, об часе́ тре́тием дне́ на го́рнице, внеза́пу гро́м с небесе́ бы́сть, я́ко и мно́жеству вселе́нныя претещи́: и в ви́де о́гненных язы́к яви́ся Ду́х Святы́й, еди́ному и́х коему́ждо, не то́кмо двана́десятим, но и седми́десятим. И глаго́лаху стра́нными язы́ки, си́речь, еди́н ки́йждо от апо́столов, все́ми язы́ки язы́ков глаго́лаше. Не у́бо свои́м язы́ком апо́столу глаго́лющу, иноплеме́нник слы́шаше, но коего́ждо язы́ка язы́к апо́стол слы́шаше и глаго́лаше: отону́дуже и собра́вшымся наро́дом, пия́нствовати возмне́шася. Не ве́дый бо ки́йждо, ка́ко апо́стол осо́бно все́ми язы́ки глаго́лаше, пия́нствовати тому́ непщева́ху. Ини́и же дивля́хуся глаго́люще: что́ у́бо хо́щет сие́ бы́ти? бя́ху же си́и от всея́ земли́ со́брани пра́здника ра́ди: па́рфяне, ми́дяне и елами́те, пре́жде ма́ла от антио́ха плене́ни бы́вшии. По Вознесе́нии у́бо десяти́м дне́м мину́вшим, прихо́дит Ду́х Святы́й, и не а́бие вознести́ся Христу́, да па́че тепле́йшыя сотвори́т ученики́ ожида́ющыя Его́. Глаго́лют же не́цыи: я́ко на ки́йждо от дне́й, еди́н ки́йждо а́нгельских чино́в, приходя́ обоже́нной пло́ти о́ной покланя́шеся. Девяти́ у́бо дне́м испо́лншымся, в деся́тый де́нь Уте́шитель прии́де, примире́нию бы́вшу Сы́ном. По пяти́десятих же дне́х от Па́схи, в воспомина́ние ве́тхаго зако́на. Изра́иль бо отне́лиже чермно́е мо́ре про́йде, пяти́десятим дне́м мимоше́дшым, Десятосло́вие прия́т. Зри́ же и зна́мения: та́мо гора́, зде́ го́рница: та́мо о́гнь, зде́ язы́цы о́гненнии. вме́сто же громо́в и мра́ка, дыха́ние зе́льное зде́. В ви́де у́бо язы́ков сни́де Ду́х Святы́й, я́ко сво́йственно име́ти к Живо́му Сло́ву явля́ет: или́ и я́ко апо́столи научи́ти и приводи́ти язы́ки, язы́ком имя́ху. О́гненных же, зане́ Бо́г о́гнь пояда́яй е́сть, и очище́ния ра́ди: Разделя́емых же, дарова́ния ра́ди. И я́коже иногда́ еди́н язы́к ве́дущих, на мно́гия раздели́, и размеси́: та́ко и ны́не, ве́дущих еди́н язы́к на мно́гия раздели́, да собере́т от о́нех язы́ков по конца́м вселе́нныя разсе́янныя. В пра́здник же быва́ет, да множа́йшым собра́вшымся, повсю́ду ве́щь возгласи́тся, и да и́же в Па́схе прилучи́вшиися, и я́же о Христе́ бы́вшая ви́девше, чуди́тися и́мут. В Пятдеся́тнице же, зане́ подоба́ше в не́же вре́мя дре́вле зако́н да́н бы́сть, по нему́же и Ду́ха благода́ти излия́тися, я́коже и Христо́с сотвори́ в зако́нной Па́схе, Свою́ Па́сху соверши́в, и́стинную Па́сху. Не на уста́ же се́де Ду́х Святы́й, но на глава́х апо́столов, влады́чественное объима́я, и бо́льшее телесе́, и са́мый у́м, от него́же и язы́к е́же глаго́лати и́мать. Или́ я́ко о́браз не́кий гла́с язы́ком Ду́х испуща́ет, я́ко рукополага́ти апо́столы чрез главы́, всея́ поднебе́сныя учи́тели: рукоположе́ние бо на версе́ гла́в быва́ет. Гла́с же и о́гнь, зане́же и в Сина́и сия́ бы́ша: я́ко да яви́тся То́йжде Ду́х, и тогда́ и ны́не законополага́яй, и вся́ разчиня́яй. Смяте́ся же мно́жество шу́мом дыха́ния, поне́же мня́ху концу́ бы́ти, ели́ка иуде́ом Христо́с о разруше́нии и́х провозвести́. Я́коже о́гненны, рече́: да никто́же теле́сно что́ о Ду́се Свято́м смы́слит. Пия́нством у́бо осужда́ются апо́столи: но Пе́тр ста́в и провеща́в посреде́ наро́да, сие́ обличи́, не и́стиною держи́мое, Ио́илево проро́чество в словеси́ приве́д, и покори́ от ни́х я́ко три́ ты́сящи. Уте́шитель же Ду́х Святы́й глаго́лется, я́ко утеша́ти и поко́ити на́с моги́й: вме́сто бо Христа́ Сего́ прия́хом, и О́наго те́м име́юще, я́ко и хода́тайствует о на́с гла́сы неизглаго́ланными к Бо́гу, я́ко Человеколю́бец на́ш предстоя́й я́коже и Христо́с: Уте́шитель бо и Он. Сего́ ра́ди и ины́й Уте́шитель Ду́х Святы́й глаго́лется. Глаго́лет бо апо́стол: и́мамы Уте́шителя Иису́са к Бо́гу. Ины́й же рече́ся, за единосу́щное: е́же бо рещи́, ины́й и ины́й, о тождесу́щественных, и купноесте́ственных. А е́же и́но и и́но, о разли́чных ве́мы естества́х. Се́й Святы́й Ду́х еди́н е́сть и Отцу́ и Сы́ну во все́х: те́мже и соде́ловает ку́пно с Ни́ма все́, и то́е са́мое иму́щее бы́ти воскресе́ние. И ели́ка хо́щет, твори́т: освяща́ет, разделя́ет, новотвори́т, спосыла́ет, умудря́ет, помазу́ет проро́ки: про́сто рещи́, во все́м самовла́стный е́сть, всеси́льный, благи́й, пра́вый, влады́чествуяй. Те́м вся́ прему́дрость, живо́т, движе́ние, вся́ко прича́стный святы́ни, и вся́кому животу́. Про́сто, вся́ и́мать, ели́ка Оте́ц и Сы́н, кроме́ нерожде́ния и рожде́ния, от Отца́ еди́наго исходя́й. Излия́вшуся у́бо на вся́кую пло́ть Ду́ху Свято́му, ми́р вся́кими дарова́ньми испо́лнися: и Те́м вси́ язы́цы к богове́дению руково́дствовашася, и вся́кий неду́г, и вся́кая я́зя прогна́на бы́сть. Трегу́бо же от Христа́ ученико́м да́н бы́сть Ду́х Святы́й. Пре́жде стра́сти не я́ве зело́. По Воскресе́нии дунове́нием я́вственнее. Ны́не же низпосла́ Сего́ су́щественно: па́че же Са́м сни́де соверше́нный, просвеща́яй и освяща́яй и́х, и те́м па́ки концы́ вселе́нныя приводя́й, прише́ствием Свята́го Ду́ха. Моли́твами святы́х апо́стол, Христе́ Бо́же на́ш поми́луй на́с.