Четверток первой седмицы по Пятидесятнице

Отъидо́ша у́бо па́ки к себе́ ученицы́, Мари́я же стоя́ше у гро́ба, пла́чущи вне:

Люби́телен не́како же́нский род и к ми́лости уклони́телнейшь. Сие́ же рех, да не чуди́шися, что же у́бо Мари́я го́рце рыда́ше у гро́ба, Петр же ничто́же таково́ пострада́: «ученицы́ бо отъидо́ша к себе́», она́ же «стоя́ше слезя́щи». И́бо и естество́, и е́же о воскресе́нии не у́ я́вствене ве́дяше сло́во, я́коже они́ ри́зы ви́девше и ве́ровавше, отъидо́ша к себе́ ужаса́ющеся. И чесо́ ра́ди не а́бие прии́доша в Галиле́ю, я́коже им обеща́ся пре́жде стра́сти? Ожида́ша про́чих не́гли и еще́ же во цвету́щем бе́ша ужаснове́нии. Си́и у́бо отъидо́ша, она́ же стоя́ше у [гро́ба]. Жела́ния ве́лие бо, е́же рех, ко утеше́нию и гроб явля́емь.

Зри́ши ли у́бо ю́: я́ко бы вя́щше упоко́итися, и прини́кшу, и хотя́щу ме́сто уви́дети «иде́же те́ло лежа́ше». Сего́ бо ра́ди и мно́гаго сего́ тща́ния мзду прия́т нема́лу. Е́же бо не ви́деша ученицы́, сие́ ви́де жена́ пе́рвая: седя́щих а́нгелов, о́вого у́бо при нога́х, о́вого же у главы́: в бе́лых [ри́зах] и о́браз све́тлости мно́гия испо́лнь и ра́дости. Поне́же бо не бе высо́ка жены́ мысль, я́ко от сударе́й прия́ти упокое́ние, быва́ет же не́что вя́щше: и а́нгелов зрит седя́щих в све́тле о́бразе, я́ко бы ей воста́витися пре́жде от стра́сти отзде́ и уте́шитися. Но ничто́же ей о воскресе́нии глаго́лющим, но ти́хо принужда́ет[ся] уче́нием сим. Ви́де зре́ния све́тла и па́че, не́жели по обы́чаю. Ви́де о́браз све́тел, слы́ша сострада́тельнаго гла́са. Что бо рече́? «Же́но, что пла́чеши?». Си́ми же все́ми, я́коже две́ри отве́рзене, пома́лу во е́же о воскресе́нии сло́во. И о́браз же седа́лища их в вопроше́ние ю́ приведе́: и́бо изъявля́ху, я́ко ве́дяху бывшее, сего́ ра́ди ниже́ вку́пе седя́т, но разстоя́щеся от друг дру́га. Поне́же бо не бе ле́по ей дерзну́ти про́сте вопроси́ти, вопроше́нием и о́бразом седа́ния приводя́ ю́ на бесе́дование. Что у́бо сия́? Те́пле, вку́пе и любе́зне: «Взя́ша Го́спода моего́, и не вем, где положи́ша Его́».

Что глаго́леши? Не у́ ли ничто́же о воскресе́нии ве́даеши, но еще́ не и́стинно мечта́еши? Зри́ши ли, ка́ко не у́ высо́ко прия́т веле́ние? «И сия́ ре́кши, обрати́ся вспять». И ко́е сие́ после́дование? Ко о́нем бесе́дующу, и не у́ ничт́оже слы́шавшу от нею́ , обрати́ся вспять. Мне ви́дится, сия́ глаго́лющи ей, внеза́пу яви́вся Христо́с созади́ ея́ ужаси́ти а́нгелов: и о́нем ви́девшим Влады́ку, и о́бразом, и зре́нием, и подвиже́нием а́бие изъяви́ти, я́ко Го́спода ви́деша. И сие́ жену́ обрати́, и вспять возврати́тися сотвори́. О́нем у́бо си́це яви́ся, жене́ же не си́це: я́кобы ю́ не от пе́рваго ужаси́ти зре́ния, но худе́йшим и о́бщым о́бразом. И я́вствено, от ни́хже и вертогра́даря Его́ бы́ти непщева́. Си́це же смире́нную, не подоба́ше внеза́пу на высо́кая возводи́ти, но ти́хо. Па́ки у́бо ю́ вопраша́ет: «Же́но, что пла́чеши? Кого́ и́щеши?». Сие́ изъяви́ ви́дети ей, е́же хо́щет вопроси́ти и во отвеща́ние приведе́. Сие́ у́бо и жена́ уразуме́вши, не ктому́ и́мя Иису́сово глаго́лет, но я́ко ве́дящу вопраша́ющему, о Нем пыта́ет. Рече́: «А́ще ты взял еси́ Его́, рцы ми, где положи́л еси́ Его́, и аз возму́ Его́». Па́ки положе́ние и взя́ти, и е́же носи́ти а́ки о ме́ртвом беседующи рече́. А е́же изъявля́ет, сие́ есть: а́ще стра́ха ра́ди иуде́йскаго взя́сте Его́ отсю́ду, рцы́те ми, и аз возму́ Его́. Мно́га прия́знь и любле́ние жены́: высо́ко же не у́ от нея́. Сего́ ра́ди про́чее предлага́ет ей сие́ не зре́нием, но гла́сом. Я́коже бо иуде́ом, овогда́ у́бо познава́шеся, овогда́ же не я́вствен бе, и предстоя́ та́ко, и веща́я: внегда́ хотя́ше, тогда́ зна́ема Себе́ творя́ше. И́бо егда́ иуде́ом глаго́лаше: «Кого́ и́щете?», ни зре́ние, ни глас позна́ша, доне́леже восхоте́.

Е́же у́бо и зде случи́ся. И и́мя ея́ то́кмо нарече́, поноша́я и каса́яся, я́ко сия́ о Живо́м мечта́ше. Ка́коже «обрати́вшися» глаго́лет? А́ще у́бо к ней бесе́доваше, мне ви́дится, ре́кшу ю́ е́же «где положи́сте Его́», обра́щшуся ко а́нгелом я́ко вопраша́ющу «что ужасо́шася?»: та́же Христу́ назва́вшу ю́, обрати́ти к Себе́ от о́нех и гла́сом я́вствена Себе́ сотвори́ти. Егда́ бо нарече́ ю́ «Мари́я», тогда́ Его́ позна́: си́це не зре́ния бе, но гла́са позна́ние. А́ще же глаго́лют, «отку́ду я́вствено, я́ко а́нгели ужасо́шася и сего́ ра́ди обрати́ся жена́?», и зде реку́т: «отку́ду я́вствено, я́ко косну́ся Его́ и припаде́»? Но я́коже сие я́вствено от е́же рещи́ «не прикаса́йся Мне». [Оба́че почто́ рече́ «не прикаса́йся Мне»?] Не́цыи ре́ша, я́ко благода́ть про́сит духо́вную, слы́шавши со ученики́ глаго́люща: «А́ще поиду́ ко Отцу́ Моему́ и молю́ Его́, и дасть вам ина́го Уте́шителя».

И ка́ко не су́щая со ученики́ сия́ слы́ша? И́накоже, и дале́че мы́сли сея́ таково́е мечта́ние. Ка́коже про́сит, не у́ ко Отцу́ отше́дшу? Что у́бо есть? Мне ви́дится хоте́ти ей еще́ сопребы́ти Ему́ я́коже тогда́, и от ра́дости ничто́же помы́слити ве́лие, а́ще и мно́го лу́чши бысть по пло́ти. Сего́ у́бо отводя́ ю́ помышле́ния, и е́же со мно́гою Ему́ боя́знию бесе́довати, - ниже́ бо ученико́м явля́ется про́чее отлуча́яся, - та́коже возво́дит ея́ мысль, я́ко бы гове́йнейше Ему́ внима́ти. Е́же бо рещи́ «не приступа́й Мне я́коже и пе́рвее: не бо в тех же ве́щи, ниже́ та́коже име́ю сопребыва́ти про́чее вам» - же́стоко бе и велича́ние име́юще. А е́же рещи́ «не у́ взыдо́х ко Отцу́», не ско́рбнейше, то́жде явля́ющаго бе. Рек бо «я́ко не у́ взыдо́х», явля́ет я́ко та́мо спеши́т и тщи́тся. Та́може хотя́щаго отъити́ и не ктому́ со челове́ки жи́ти, не подоба́ше с тою́же зре́ти мы́слию, е́юже и пре́жде сего́.

И я́ко сие́ есть явля́ет е́же по сих. Рек бо сие́, рече́: «Иди́ рцы бра́тии Мое́й, я́ко иду́ ко Отцу́ Моему́ и Отцу́ ва́шему, и Богу Моему́ и Бо́гу ва́шему». А́ще и не хотяше вско́ре сие́ твори́ти, но по четы́редесятех днех: ка́ко у́бо сие́ рече́? Воздви́гнути хотя́ ея́ мысль и увеща́ти, я́ко на небеса́ восхо́дит. А е́же «ко Отцу́ Моему́ и Отцу́ ва́шему, и Бо́гу Моему́ и Бо́гу ва́шему» - смотре́ния есть, поне́же и е́же взы́ти, пло́ти есть. Ничто́же бо ве́лие мечта́юще и сия́ веща́ет. И́нако бо Его́ Оте́ц и и́нако наш? Вельми́ у́бо. А́ще бо пра́ведных и́нако Бог и ины́х челове́к, мно́го па́че Сыно́вен по пло́ти и наш. Поне́же бо глаго́ла «рцы бра́тиям», да не от сего́ ра́вно не́что мечта́ют, показу́ет премене́ное. Той бо хотя́ше седе́ти на престо́ле Оте́ческом, си́и же предстоя́ти. Те́мже, а́ще и по существу́ плотско́му брат наш бысть, но че́стию мно́го разнствова, и ниже́ есть рещи́ ели́ко.

Она́ у́бо отхо́дит, сия́ возвеща́ющи ученико́м. Толико есть приседе́ние и терпе́ние до́бро! Та́може про́чее, ка́ко не боле́зноваху хотя́ще отъити́, ниже́ веща́ху якова́ и пе́рвее? Тогда́ у́бо я́ко уме́ршу сие́ страда́ша, ны́не же воскре́сшу, чесо́ ра́ди хотя́ше Ему́ боле́зновати? Возвести́ же и зрен́ие, и глаго́лы, я́же дово́льна бе́ша их уте́шити. Поне́же у́бо ле́по бе ученико́м сия́ слы́шащим, или́ не ве́ровати жене́, или́ ве́ровавшим боле́зновати, я́ко их не сподо́би зре́ния, а́ще и обеща́вся в Галиле́и им яви́тися - да́же у́бо не сия́ обраща́юще тужа́т, ниже́ еди́н день оста́ви преити́, но в вожделе́ние их приве́д: и тем е́же у́же ведети воста́вша Его́, и тем е́же от жены́ слы́шати - жа́ждущим уви́дети и пристра́шным су́щым, е́же и сие́ наипа́че жела́ние творя́ше вя́щее.

Тогда́, ве́черу бы́вшу, надстае́т, и со мно́гим чудесе́м. Что у́бо [в] ве́чер яви́ся? Егда́ наипа́че ле́по им бы́ти пристра́шным. Но е́же чу́дно: ка́ко мечта́ние Его́ не возмне́ша? И́бо затворе́нным вни́де две́рем и внеза́пу. Наипа́че у́бо и жена́ предвари́вши, мно́гу ве́ру соде́ла. И́накоже, и я́сно, и ти́хо зре́нием показа́. В день же не предста́ у́бо, я́ко собра́тися всем вку́пе, мно́го бо бе ужаснове́ние: ниже́ бо дверь порази́, но внеза́пу ста посреде́ и показа́ ребро́ и ру́ку. Вку́пе же и гла́сом уте́ши волня́щагося по́мысла, рек: «Мир вам», си́речь, не смуща́йтеся. И глаго́ла воспомяну́в, его́же пре́жде креста́ к ним рече: «Мир мой оставля́ю вам». И па́ки: «Во Мне мир име́йте, в ми́ре скорбь име́ти бу́дете».

«Возра́довашася у́бо ученицы́ ви́девше Го́спода». Зри́ши ли о де́лех словеса́ сбыва́ющася? Е́же бо глаго́лаше пре́жде креста́, я́ко «па́ки узрю́ вам и возра́дуется се́рдце ва́ше, и ра́дости ва́шия никто́же во́змет от вас», сие́ у́бо де́лом испо́лни. Вся же сия́ возвожда́ху их во опа́снейшую ве́ру. Поне́же бо рать несмири́тельну имя́ху ко иуде́ом, ча́сте приглаго́лет е́же «мир вам», сопротивоси́льно дая́ ра́ти утеше́ние.

Сей у́бо пе́рвый по воскресе́нии рече́ глаго́л. Те́мже и Па́вел всю́ду рече́: «Благода́ть вам и мир». Жена́м же ра́дость благовеству́ет, зане́же в печа́лех род он бе, и сия́ прия́т пе́рвую кля́тву. После́довательне у́бо муже́м, ра́ти де́ля, - ми́р, жена́м же, печа́ли ра́ди, благовеству́ет ра́дость. Вся же разруши́в печа́льная, приглаго́лет исправле́ния Креста́: сия́ же бе́ша мир. Поне́же у́бо вся отъя́шася возбране́ния, рече́, и побе́ду поста́вих све́тлу, и испра́вишася вся, та́же про́чее рече́: «Я́коже посла́ Мя Оте́ц, и Аз посыла́ю вас». Ниже́ еди́но име́йте неудо́бство: и от у́же бы́вших, и от досто́инства Моего́ посыла́ющаго. Те́мже рече́ зде взима́ет их ду́шу и показу́ет мно́го достове́рное, а́ще у́бо хотя́т Его́ де́ло восприя́ти.

И не ктому́ моле́ние ко Отцу́ быва́ет, но госпо́дьством дае́т им благода́ть и си́лу: «Ду́ну бо и рече́: «Приими́те Ду́ха Свята́го». И́мже отпустите́ грехи́, отпу́стятся. И и́мже держите́, держа́тся»». Я́коже бо не́кий царь князе́й посыла́я о́бластию во юзи́лищи, и вмета́ти, и испуща́ти дае́т, та́ко и сих посыла́я, се́ю облага́ет си́лою. Ка́ко у́бо рече́ «а́ще не отъиду́, Он не прии́дет», и у́бо Ду́ха дае́т? Не́цыи у́бо ре́ша, я́ко не Ду́ха даде́, но прили́чных их ко прия́тию дунове́ние устро́и. А́ще бо а́нгела ви́дев Дани́л «изступи́», что неизрече́нную благода́ть о́ну прие́млюще не бы пострада́л, а́ще не ученико́в их пе́рвее устро́ил бы? Сего́ ра́ди не глаго́ла рече́ «прия́сте Ду́ха Свята́го», но «приими́те Ду́ха Свята́го». Не у́бо же кто согреши́т и тогда́ прия́ти им глаго́ля о́бласть не́кую духо́вную и благода́ть: но не я́коже ме́ртвых воскреша́ти и си́лы твори́ти, но я́ко оставля́ти грехи́.

Разли́чна бо дарова́ния Ду́ха. Те́мже приведе́: «И́мже отпустите́, отпу́стятся», показу́я, кото́рый вид де́йства дае́т. Та́може по четы́редесятих днех, зна́мений при́яша де́йство. Сего́ ра́ди рече́: «Приими́те си́лу наше́дшу Свято́му Ду́ху на вы, и бу́дете Мне сведе́тели». Сведе́тели же зна́меньми быва́ху: и́бо безме́рно Ду́ха благода́ть, и многови́ден дар. Сие́ же быва́ет, да навы́кнеши я́ко Отца́ и Сы́на и Свята́го Ду́ха, еди́н дар и о́бласть. Я́коже бо ви́дятся осо́бна бы́ти О́тча, сия́ и Сыно́вня бы́ти явля́ются, и Ду́ха Свята́го. Ка́ко у́бо «никто́же приихо́дит к Сы́ну рече́, а́ще не Оте́ц привлече́т его́»? но сие́ показу́ется Сыно́вне су́ще: «Аз бо есмь, рече́, путь, и никто́же прихо́дит ко Отцу́, то́кмо Мно́ю». Зри же сие́ и Ду́ха су́щее: «Никто́же бо мо́жет рещи́ Го́спода Иису́са, то́кмо Ду́хом Святы́м». И па́ки апо́столов, овогда́ у́бо от Отца́, овогда́ же от Сы́на, овогда́ же от Ду́ха дая́тися Це́ркви. И разделе́ния дарова́ний, Отца́ и Сы́на и Свята́го Ду́ха зрим су́ща.

Нравоуче́ние о́смьдесять шесто́е: Я́ко подоба́ет почита́ти свяще́ников, а́ще и ху́ди бу́дут житие́м: ти́и бо о нас сло́во воздадя́т:

Вся у́бо да де́йствуем, я́ко бы Ду́ха Свята́го име́ти у себе́. И вруче́нным де́йству, со мно́гою угожда́ем че́стию. Вели́к бо свяще́ннический сан. «И́мже а́ще отпустите́, рече, отпу́стятся грехи́. Те́мже и Па́вел глаго́лаше: «Повину́йтеся наста́вником ва́шым и покаря́йтеся» и «от преизли́шества непщу́йте их в че́сти». Ты бо свои́ми пече́шися: и а́ще сия устроя́ются до́бре, ни еди́но же други́х тебе́ бу́дет сло́во. Свяще́нник же, а́ще и свое́ устро́ит житие́ до́бре, о твое́м же не со опасе́нием попече́тся - с лука́выми в гее́нну отхо́дит: и мно́жицею, от свои́х не пре́дан быв, от ва́ших погиба́ет, а́ще не вся подоба́ющая ему́ испра́вит до́бре. Те́мже, ве́дяще убо беды́ вели́чество, мно́гу отдава́йте им честь и любо́вь. Е́же и Па́вел назна́мена глаго́ля: «Я́ко бдят о душа́х ва́ших, а́ки сло́во воздаю́ще». Сего́ ра́ди подоба́ет мно́гаго слугова́ния от нас наслажда́тися им. А́ще же напа́даете со ины́ми на них и вы, ниже́ ва́ша до́бре устро́ятся. До́ндеже во благоду́шии пребыва́ет ко́рмчий, во утвержении будут и я́же вса́дников. А́ще же укоря́емым о́нем и вра́жебне име́ющим ко е́же зло страда́ти - ниже́ бде́ти подо́бне мо́жет, ниже́ худо́жество соблюда́ти, и не хотя́ безчи́слеными си́ми облага́ется злы́ми.

Та́ко и свяще́нник: а́ще у́бо наслади́тся су́щаго от вас угожде́ния, и ва́ша устро́ити до́бре возмо́жет: а́ще же печа́лию их облага́ет, ру́це ослабля́юще, удо́бь е́млемых с вами их сотвори́те злы́ми во́лнами, а́ще и зело́ до́блествени бу́дут. Помы́сли что о иуде́ох рече́ Христо́с: «На Моисе́ове седа́лищи седо́ша кни́жници и фарисе́и. Вся у́бо ели́ка глаго́лют вам твори́ти, твори́те». Ны́не же несть рещи́, на Моисе́ове седа́лищи седо́ша свяще́нницы, но на Христо́ве: О́ного бо прия́ша уче́ние, и на Его́ престо́ле седя́т. Те́мже и Па́вел рече́: «О Христе́ мо́лим, я́ко Бо́гу моля́щу на́ми». Не зри́те ли о вне́шних нача́льницех всех подница́ющих, и ро́дом лу́чших мно́жицею, и житие́м, и ра́зумом о судя́щих их? Но оба́че да́вшаго ра́ди, ничто́же сих помышя́ют, но стыдя́тся суда́ царе́ва, а́ще и кто у́бо прие́м нача́льство ни бу́дет. Та́же, а́ще у́бо челове́к поста́вит толи́к страх, Бо́гу же поставля́ющу, а вы презира́ете поста́вленнаго и укаря́ете, и безчи́слеными поноше́ньми омыва́ете - и бра́тий на́шых возбране́ни бы́вше суди́ти, на свяще́нников ли язы́к поощря́ете? И где сия́ отве́та досто́йна, егда́ су́щаго у́бо в очеси́ на́шем бревна́ неви́дим, сучцы́ же ина́го го́рце испыту́ем? Не ве́си ли, я́ко люте́йше себе́ твори́ши суди́лище, си́це судя́ свяще́нника? И сия́ глаго́лю, не похваля́я недосто́йне свяще́нство управля́ющых, но ми́луя и слезя́: не у́бо сего́ ра́ди реку́ пра́ведно бы́ти от нача́льствуемых суди́тися. А́ще и житие́ их зело́ осужде́но бу́дет, ты же, а́ще себе́ внима́еши, ничи́м же повреди́шися в поруче́нная ему́ от Бо́га. А́ще бо осло́м гла́су испусти́тися сотвори́л есть, и волхво́м благослове́ния духо́вная дарова́, и безслове́сными устна́ми и нечи́стым язы́ком Валаа́мовым де́йствовав прирази́вшыхся ра́ди иуде́й, мно́го па́че нас ра́ди благоразу́мных. И а́ще зело́ ху́ди суть свяще́нницы, своя́ вся де́йствует Бог и посыла́ет Святы́й Дух. Ниже́ бо чи́стый, от своея́ привлача́ет Сего́ чистоты́, но Благода́ть есть вся соде́ловающия. «Вся бо, рече́, вас ра́ди, а́ще Па́вел, а́ще Аполло́с, а́ще Ки́фа».

Я́же бо вруче́н есть иере́й - Бо́гу еди́ному есть дарова́ти. И иде́же а́ще челове́ческое дости́жет любому́дрие, недоста́точно благода́ти о́ноя яви́тся. И сия́ глаго́лю, не я́ко ле́ностне свое́ житие́ устрая́ем, но да не леня́щимся не́ким предстоя́щим, вы нача́льствуемии себе́ мно́жицею собира́ете зла́я. И что глаго́лю свяще́нников? Ниже́ а́нгел, ниже́ арха́нгел соде́лати что мо́жет в дае́мая ему́ от Бо́га: но Оте́ц, и Сын и Святы́й Дух стро́ит вся, Иере́й же свой взае́м дае́т язы́к и свою́ подае́т ру́ку. И́бо ниже́ пра́ведно бе, инаго ра́ди зло́бы, во образова́ния спасе́ния на́шего верою приступа́ющым врежда́тися. Сия́ у́бо вся ве́дяще, не суди́те, и Бо́га бо́йтеся, и свяще́нников Его́ в че́сти да име́йте, вся́ку им отдаю́ще честь, да и о свои́х исправле́ниих и е́же ко о́нем угожде́нии, мно́го прии́мем от Бо́га воздарова́ния благода́тию и человеколю́бием Го́спода на́шего Иису́са Христа́, И́мже и с Ни́мже Отцу́ сла́ва со Святы́м Ду́хом, во ве́ки веко́в. Ами́нь.

Преше́дша же Амфипо́ль и Аполло́нию, внидо́ста в Солу́нь, иде́же бе со́нмище Иуде́йское. По обы́чаю же своему́ Па́вел вни́де к ним и по суббо́ты три стяза́шеся с ни́ми от Писа́ний, Сказу́я и предлага́я им, я́ко Христу́ подоба́ше пострада́ти и воскре́снути от ме́ртвых, и я́ко Сей Иису́с, Его́же аз пропове́даю вам, есть Христо́с. И не́цыи от них ве́роваша и приложи́шася к Па́влу и Си́ле, от чести́вых Е́ллин мно́жество мно́го и от жен благоро́дных не ма́ло. Зазре́вше же непоко́ршиися Иуде́е и прие́мше крамо́льники не́кия му́жи злы́я, и собра́вше наро́д, мо́лвяху по гра́ду, наше́дше же на дом Иассо́нов, иска́ху их извести́ к наро́ду. Не обре́тше же их, влеча́ху Иассо́на и не́кия от бра́тий ко градонача́льником, вопию́ще, я́ко и́же разврати́ша вселе́нную, си́и и зде приидо́ша, И́же прия́т Иассо́н. И си́и вси проти́вно веле́нием ке́саревым творя́т, царя́ глаго́люще ино́го бы́ти, Иису́са. Смято́ша же наро́д и градонача́льники слы́шащия сия́. Взе́мше же дово́льное от Иассо́на и от про́чих, отпусти́ша их. Бра́тия же а́бие в нощи́ отсла́ша Па́вла и Си́лу в Бе́рию, и́же прише́дша, идо́ша в собо́р Иуде́йский. Си́и же бя́ху благоро́днейши живу́щих в Солу́не, и́же прия́ша сло́во со всем усе́рдием, по вся дни разсужда́юще Писа́ния, а́ще суть сия́ та́ко. Мно́зи у́бо от них ве́роваша, и от е́ллинских жен благообра́зных и муже́й не ма́ло. И я́ко уве́даша и́же от Солу́ня иуде́е, я́ко и в Бе́рии пропове́дася от Па́вла сло́во Бо́жие, приидо́ша и та́мо дви́жуще и смуща́юще наро́ды. А́бие же тогда́ бра́тия отпусти́ша Па́вла ити́ на помо́рие, оста́ста же Си́ла и Тимофе́й та́мо. Провожда́ющии же Па́вла ведо́ша его́ да́же до Афи́н, и прие́мше за́поведь к Си́ле и Тимофе́ю, да я́ко скоре́е прии́дут к нему́, изыдо́ша.

Во Афи́нех же жду́щу их Па́влу, раздража́шеся дух его́ в нем зря́щем и́дол полн сущь град. Стяза́шеся же у́бо на со́нмищи со иуде́и и с чести́выми, и на то́ржищи по вся дни с приключа́ющимися. Не́цыи же от епику́р и от сто́ик филосо́ф стяза́хуся с ним, и не́цыи глаго́лаху: что у́бо хо́щет суесло́вивый сей глаго́лати? Ини́и же: чужди́х бого́в мни́тся пропове́дник бы́ти, я́ко Иису́са и воскресе́ние благовествова́ше им.

Пое́мше же Па́вла, ведо́ша на А́риев лед.

Толкова́ние: А́риев лед - суди́ще бе вне гра́да Афине́йска, име́я пятьдеся́т суде́й от ро́да честне́йша и му́дростию пе́рвых су́ща. Сего́ ра́ди при́тчею глаго́лют афине́и, я́ко А́рие водрузи́ на том ме́сте свое́ копие́. А́рий же толку́ется, я́ко на бра́ни я́рость, его́же я́ко бо́га чтя́ху безу́мнии. Бысть же и суди́ще на том ме́сте ме́жду А́рием и Посейдо́ном. Посейдо́н же бог есть е́ллинский, толку́етжеся Посейдо́н - мо́крое во́дное ме́сто. Прело́жься у́бо Посейдо́н с А́рием за уби́йство Алирофе́ево, - Алирофе́й же бя́ше сын Посейдо́нов, - и уби́ его́ А́рий при свое́й дще́ри Арки́пе: и поне́же водрузи́ ту копие́ свое́, А́рий нарече́ся. И па́ки ме́сто то А́рий нарече́ся я́ко высо́ко, и при́кро, и ка́менно. Диони́сий же нари́чется «ареопаги́т», я́ко еди́н сий от суде́й тех, и́же ся нарица́ху ареопаги́те. А е́же Па́вел глаго́лет: «Я́ко сзира́я бо́ги ва́ша, обрето́х пи́сано на еди́ном неве́домому бо́гу, его́же у́бо не ве́дуще чте́те: сего́ аз пропове́даю вам», есть же си́це: Афине́и я́ко мня́щеся бы́ти прему́дрейши и име́юще мно́гия бо́ги, убоя́шася, еда́ ка́ко бу́дет ин бог, его́же не ве́дят. И сотвори́ша тре́бище неве́домому бо́гу. Ини́иже си́це глаго́лют о сем: я́ко о́спи бы́ли во Афи́нех не́когда и тле́ние челове́ком мно́го, и сего́ ра́ди поста́виша тре́бище всех бого́в и́хже чтя́ху, да преста́нет неду́г. И я́ко не преста́, реко́ша в себе́: «Еда́ ка́ко бу́дет бог ин его́же не ве́мы», и сотвори́ша тре́бище неве́домому бо́гу. От него́ же вину́ прие́м Па́вел боже́ственый апо́стол, пропове́да им и́стиннаго Бо́га Го́спода на́шего Иису́са Христа́, Его́же ра́ди ве́роваше мно́зи, и прему́дрый Диони́сие.

Су́щее: [Ведо́ша его́,] глаго́люще: «Не мо́жем разуме́ти, что но́вое сие́ глаго́лемое тобо́ю уче́ние. Стра́нна бо не́кая влага́еши во ушеса́ на́ша. Хо́щем у́бо разуме́ти, что хотя́т сия́ бы́ти». Афине́иже вси и приходя́щеи стра́ннии нивочто́же и́но упражня́хуся, ра́зве глаго́лати что или́ слы́шати но́вое. Став же Па́вел посреде́ А́риева па́га, рече́: «Му́жие афине́йстии, по всему́ зрю я́ко в ве́ре блудя́ще есте́. Проходя́ бо и согля́дая бо́ги ва́ша, обрето́х и куми́р, на не́мже бе напи́сано и́мя «неве́домому бо́гу», его́же у́бо неве́дуще благоле́пне чте́те. Сего́ аз пропове́дую вам: Бог сотвори́вый мир и вся я́же в нем, сей не́бу и земли́ Госпо́дь сый. Не в рукотворе́ных хра́мех живе́т, ни от рук челове́ческих угожде́ния прие́млет, тре́буя что. Сам дая́ всем живо́т и дыха́ние по вся́ческих. Сотвори́лже есть от еди́ныя кро́ве весь язы́к челове́чь, жи́ти по всему́ лицу́ земно́му. Уста́вив предъучине́ная времена́ и преде́лы селе́ния их, взысќати Го́спода. А́ще у́бо взы́щут Его́ и обря́щут, я́ко недале́че есть от еди́ного кого́ждо нас су́ща: о Нем бо живе́м и дви́жемся и есмы́. Я́коже и не́цыи от ва́ших кни́жник реко́ша, Его́же бо и род есмы́».

Толкова́ние: Се глаго́лет, нарица́я по души́ ро́дом Бо́жиим. Ни мни же души́ име́ти часть или́ вделе́ние Божества́, но толи́ко име́ет подо́бие не́кое в безсме́ртии и в му́дрости к Божеству́, его́же скоти́ и зве́рие не име́ют. Род же Бо́жий есмы, не из естества́ Его́ сотворе́ни, но сотворе́ни в му́дрости нам да́нной от Него́. И обновле́ние на душа́х на́ших в Бо́зе: и есмы́, и живе́ми, и в нас все сотвори́т и де́йствует.

Су́щее: «Род у́бо су́ще Бо́жий, не до́лжни есмы́ непщева́ти Божеству́ подо́бну бы́ти зла́ту или́ сребру́ или́ ка́мению начерта́ниу худо́жну, и смышле́нию челове́ка. Ле́та у́бо неве́дения презре́в Бог, я́же ны́не повелева́ет челове́ком всем всю́ду пока́ятися: зане́ уста́вил есть день, во́ньже хо́щет суди́ти вселе́нней в пра́вду о Му́же, Его́же предуста́ви, ве́ру подая́ всем, воскреси́в Его́ от ме́ртвых». Слы́шавше же воскресе́ние ме́ртвых, о́ви у́бо руга́хуся, о́виже ре́ша: «Да слы́шим па́ки о сем». И та́ко Па́вел изы́де от среды́ их. Не́цыи же му́жие прилепи́вшеся ему́, ве́роваша, в ни́хже бе и Диони́сие ареопаги́тский, и жена́ и́менем Дама́рь, и друзи́и мно́зи с ним;

По си́хже отлучи́ся Па́вел от Афи́н и прии́де в Кори́нф. И обре́те не́коего жидови́на и́менем Аки́лу, понтя́нина ро́дом, новоприше́дша от Ита́лии, и Приски́лу жену́ его́: зане́ повеле́ Клавди́е отлучи́тися всем иуде́ом от Ри́ма. И прии́де к ним. И зане́ единохудо́жником бы́ти им, пребы́сть у них и де́лаше. Бя́ху бо усма́рие хи́тростию. Стяза́шежеся на со́нмищих по вся суббо́ты, препира́шеже иуде́и и е́ллины. И я́коже снидо́ста от Македо́нии Си́ла же и Тимофе́й, стужа́ше ду́хом Па́вел, свиде́тельствуя иуде́ом Христа́ Иису́са. Противля́щимжеся им и ху́лящим, оттря́с ри́зы своя́ рече́ к ним: «Кровь ва́ша на глава́х ва́ших. Чист аз, отны́не в язы́ки иду́». И прише́д отту́ду, прии́де в дом не́коего и́менем Иу́ста, чту́ща Бо́га, ему́же хра́мина бе в скрай со́нмища. Крисп же нача́льник собо́ру ве́рова Го́сподеви со всем до́мом свои́м. И мно́зи от кори́нфян слы́шавше, ве́роваху и креща́хуся. Рече́ же Госпо́дь в виде́нии нощно́м Па́влу: «Не бо́йся, но глаго́ли. И да не умо́лкнеши, зане́ Аз есмь с тобо́ю. И никто́же приложи́т озло́бити тя, зане́ лю́дие суть Ми мно́зи во гра́де сем». Се́де же ле́то и ме́сяца шесть, уча́ в них сло́ву Бо́жию.

Галлио́ну же анфипа́ту су́щу во Аха́ии, нападо́ша единоду́шно иуде́е на Па́вла и приведо́ша его́ на суди́лище, глаго́люще: «Я́ко кроме́ зако́на сей развещава́ет чти́ти Бо́га». Хотя́щуже Па́влу отве́рсти уста́, рече́ Галлио́н ко иуде́ом: А́щебы непра́вда была́ ка́я, или́ оби́да зла, о́ иуде́е, по сло́ву у́бо послу́шал бых вас. А́щели же стяза́ния суть о словеси́ и о и́менех и о зако́не ва́шем, ве́дите са́ми. Судия́ бо аз сим не хощу́ бы́ти». И изгна́ их от суди́лища. Е́мше же вси е́ллини Сосфе́на нача́льника собо́ру, бия́ху пред суди́щем. И ничто́же о сих Галлио́ну раде́ние бысть. Па́вел же еще́ пребы́в дни дово́льны и целова́в бра́тию, отплы́ в Си́рию, - и с ним Аки́ла и Приски́лла, - остри́г главу́, в Ке́греих: обре́кся бо бе. Приста́ же во Ефе́се, и тех оста́ви ту. Сам же вшед в со́нмище, стяза́шеся со иуде́и. Моля́щим же им его, о мно́зе вре́мени пребы́ти у них, не обеща́ся, но отрече́ся им и рек: «Я́ко подоба́ет ми всяк пра́здник гряду́щий сотвори́ти во Иерусали́ме. Па́ки же возвращу́ся к вам, Бо́гу хотя́щу». И отвезе́ся от Ефе́са, Аки́ла же и Приски́лла оста́ша во Ефе́се.

И соше́д в Кесари́ю, возше́д и целова́в це́рковь, сни́де во Антиохи́ю. И сотво́рь вре́мя не́кое, изы́де, проходя́ поря́ду Галати́йскую страну́ и Фриги́ю, утвержда́я вся ученики́. Иуде́анин же не́кто, Аполло́с и́менем, алекса́ндрянин ро́дом, муж слове́сен, прии́де во Ефе́с, си́лен сый в кни́гах. Сей бе оглаше́н пути́ Госпо́дню, и горя́ ду́хом, глаго́лаше и уча́ше изве́стно я́же о Го́споде, ве́дый то́кмо креще́ние Иоа́нново. Сей же нача́т дерза́ти на со́нмищах. Слы́шавша же его́ Аки́ла и Приски́лла, прия́ша его́ и изве́стнее тому́ сказа́ша путь Госпо́день. Хотя́щу же ему́ преити́ во Аха́ию, предпосла́вше бра́тия написа́ша ученико́м прия́ти его́, и́же прише́д та́мо посо́бствова мно́го ве́ровавшим благода́тию. Тве́рдо бо иуде́и не престая́ облича́ше пред людьми́, сказу́я Писа́ньми, Иису́са бы́ти Христа́.