Неделя всех святых

Рече́ Госпо́дь: Всяк и́же испове́сть Мя пред челове́ки, испове́м его́ и Аз пред Отце́м Мои́м И́же на небесе́х.

Толкова́ние: На муче́ние зде подвиза́ет учени́к Свои́х Христо́с, и сердца́ их устроя́ет, и подвиза́ет вся презира́ти хотя́щая им приходи́ти лю́тая и зла́я: си́речь, печа́ли и уничиже́ния, нахожде́ния же и вся́кия ины́я ско́рби, и напа́сти и беды́. Еще́ же и самы́я тоя́ сме́рти, повелева́ет презира́ти, и учи́т и укрепля́ет их, глаго́ля:

Ева́нгелие: Не убо́йтеся от убива́ющих те́ло, ду́шу же не могу́щих уби́ти. Се у́бо Аз посыла́ю вас, я́ко овца́ посреде́ волко́в.

Толкова́ние: Вся́ким о́бразом угото́вает, и я́ко ору́жием огража́ет, к напа́стем приходи́ти. И хотя́щая случа́тися им зла́я, провозвеща́ет им и глаго́лет: я́ко, прове́дущим сим вся, име́ют утеше́ние, егда́ страда́ти хотя́т. Аз у́бо, рече́, Кре́пкий и Сла́вный и Всеве́дец, посыла́ю вас: сего́ ра́ди дерза́йте, я́ко кре́пцы, непоколе́блеми, и не я́ты и́мате бы́ти. И гото́вайтеся па́че, е́же терпе́ти кре́пко ско́рби и беды́: я́коже бо невозмо́жно есть, посреди́ волко́в овча́том не злострада́ти, та́ко и вам, посреди́ неве́рных и враг ва́ших, не страда́ти невозмо́жно. Но а́ще и стра́ждете, а́ще и гони́ми быва́ете - не вражду́йте, ниже́ малоду́шствуйте: я́ко овча́та бо кро́тка и ти́ха хощу́ вас бы́ти. И та́ко у́бо па́че возмо́жете побежда́ти враги́ ва́ша. А́щели же и телеса́ ва́ша убие́на бу́дут, но ду́ши ва́ша жи́вы бу́дут во ве́ки, в весе́лии и ра́дости веселя́щеся.

Ева́нгелие: Быва́йте у́бо му́дри я́ко зми́я, и це́ли я́ко го́лубие.

Толкова́ние: И му́дрых бы́ти хо́щет учени́к Христо́с, и вся́ким ра́зумом и прему́дростию ходи́ти: я́коже ни дава́ти при́тчу враго́м. К тому́ же подоба́ет ве́дети, я́ко овча́та сих слы́шаще, мним, я́ко забве́ным и несмы́сленым подоба́ет бы́ти христия́ном, и пра́зднем, и неподви́жнем везде́. Сего́ ра́ди глаго́лет: я́ко му́дрым подоба́ет бы́ти сим и ве́дущим, ка́ко подоба́ет жи́ти посреди́ мно́гих враг. Я́коже бо змия́, все те́ло предае́т бие́мо быва́ти, главу́ же соблюда́ет ели́ко возмо́жно, и понужда́ется всеобра́зно сохрани́ти ю́: та́коже и христия́нин, вся своя́ да предае́т: зла́то, стяжа́ния, сла́ву, ктому́ же и те́ло предава́ти ра́нимо быва́ти: главу́ же свою́, е́же есть Христо́с, соблюда́ти вся́кою кре́постию, любве́ ра́ди Его́ и ве́ры. И я́коже змия́, сквозе́ не́кую разсе́лину те́сную прохожда́я, и стесня́яся, совлачи́т ве́тхия ко́жины: та́ко и мы, те́сным путе́м ходя́ще, ве́тхаго совлачи́мся челове́ка. Поне́же зми́й вреди́в есть, и сме́рти хода́тай быва́ет челове́ком мно́жицею, повелева́ет нам Христо́с це́лым бы́ти: си́речь, про́стем, а не лука́вым, не иму́щим вре́да и зло́бы я́ко змия́. Но це́ли бы́ти па́че, я́коже го́луби. Сия́ бо взима́ющим ча́да их и отгоня́еми, па́ки ко влады́кам свои́м возвраща́ются.

Бу́дем у́бо и мы бра́тие му́дри я́коже змия́, я́ко не посме́шным бы́ти нам в житии́ сем: но вся я́же о нас непоро́чна и чи́ста и незазо́рна, сохраня́ти вся́ким о́бразом потщи́мся. На поврежде́ние же други́х бу́дем я́ко го́луби: си́речь, про́сти, и нелука́ви, и никому́ же зла за зло воздаю́ще.

Ева́нгелие: Соблюда́йтеся рече́ от челове́к: преда́ти бо и́мут вас в собо́рища и со́нмы их, и уя́звят вас, и ко влады́кам и царе́м приведе́ни бу́дете Мене́ ра́ди, во сведе́тельство им и язы́ком.

Толкова́ние: Не то́кмо бо к жидо́м посыла́ет ученики́ Госпо́дь, но и к язы́ком. Сего́ ра́ди глаго́лет: «Во сведе́тельство им и язы́ком», си́речь на обличе́ние им и неве́рующим. Соблюда́ти же ся учи́т Госпо́дь ученики́, и не дава́ти при́тчи хотя́щим поврежа́ти, но му́дро устрая́ти и исправля́ти я́же о них. А́ще бо име́ния и зла́та хотя́т гоня́щеи, дади́те ели́ка и́мате и вся пре́зрите. А́ще хотя́т по́честь, дади́те им, да нико́ю же при́тчу име́ют. А́ще ли же ве́ру ва́шу отъя́ти потща́ются, сохраня́йте вся́ким о́бразом главу́, си́речь ве́ру ва́шу.

«Вся́кий у́бо и́же а́ще испове́сть о Мне пред челове́ки, испове́м и Аз о нем пред Отце́м Мои́м небе́сным». Не то́кмо бо душе́ю ве́ровати хо́щет и и́щет Христо́с, но и от уст испове́дание истяза́ет. «Се́рдцем у́бо, рече́, ве́руется в пра́вду, усты́ же испове́дается во спасе́ние». Не рече́ же я́ко «и́же а́ще испове́сть Мене́», но Мно́ю: си́речь, Мое́ю си́лою и благода́тию. Вы́шнею же по́мощию и благода́тию заступа́емь, испове́сть испове́дающий. И Бо́жиим споспеше́нием и по́мощию, дерзну́ти и́мать всяк ве́рующий пра́во. «Испове́м и Аз о нем», си́речь, соиспове́дающаго Мя ве́рою и по́двигом, дея́нием де́лы его́ благи́ми, дерзнове́нием его́, и́мже о Мне на гоня́щих дерзну́л есть. «Испове́м и Аз», глаго́лет Христо́с. Кроме́ бо Бо́жия си́лы и споспеше́ния, ниже́ мы испра́вити мо́жем се, ниже́ Бог кроме́ на́шего потща́ния и изволе́ния помога́ет нам. Тре́буем же и мы пре́жде всех, боже́ственаго посо́бия и си́лы. Кроме́ же о́ного ничто́ же соверши́ти мо́жем: и Бог па́ки на́шего потща́ния истяза́ет. А́ще бо мы не восхо́щем, ниже́ потщи́мся, ниже́ Бог нам помога́ет. Испове́даем же мы о Бо́зе, си́речь по́мощию Его́ и благода́тию. И Той и о нас на́шим я́ве усе́рдием и тща́нием и чи́стою ве́рою. А́ще бо не да́мы Бо́гу при́тчи, ниже́ испове́даем: ни Бог испове́дати и́мать о нас, но и па́че отри́нет нас.

«И́же а́ще отве́ржется Мене́ пред челове́ки, отве́ргуся и Аз его́ пред Отце́м Мои́м небе́сным». Отре́кшеися и презре́вшеи Бо́га, отрече́ни бу́дут от Него́. И услы́шати и́мут: «Я́коже у́бо сотвори́сте, та́ко бу́дет и вам». И «Возда́ние ва́ше возда́стся вам на глава́х ва́ших». И «Отступи́те от Мене́ де́латели беззако́ния, я́ко не ве́де вас». Де́латели бо суть беззако́ния пе́рвии, ели́цы ве́ру отметну́ша и Христа́ отверго́шася во вре́мя гоне́ния. Пото́м же и вси еретицы́, де́латели беззако́ния суть, та́коже бо и ти́и отмета́ются Христа́. Не рече́ же: «Я́ко и́же а́ще отве́ржется Мно́ю», я́коже о испове́дании рече́: поне́же бо не си́лою Бо́жиею отрица́ется отрица́яйся, но от Бо́жия си́лы па́че и благода́ти оставля́емь быва́я отмета́ется. А́ще бо не бы недосто́йна себе́ сотвори́л боже́ственой по́мощи, не бы оста́влен был от Бо́га отметну́тися Его́. Сия́ бо не то́кмо ко ученико́м глаго́лет Христо́с, но ко всем ку́пно ве́рующим: на мно́жайшее дерзнове́ние поспеша́я, и на бо́льшую любо́вь подвиза́я нас, и высо́цех сотворя́я, и устрая́я нас кре́пцех быва́ти, и хра́бро о ве́ре стоя́ти. Вся́кий у́бо испове́даяй пред челове́ки, я́ко Бог есть Христо́с, и вся́кия беды́ и напа́сти презира́я, любве́ ра́ди Его́ и ве́ры, обрести́ и́мать Христа́ испове́дающа Бо́гу Отцу́, я́ко присносу́щен раб есть: и прие́млет его́ в ве́чная жили́ща, и пребу́дет при́сно веселя́ся. Отмета́ющеижеся услы́шати и́мут: «Я́ко не ве́де вас» и «По́йдете во све́те огня́ ва́шего, и в пла́мени его́же распали́сте»: и и́дут в ве́чныя му́ки.

Ева́нгелие: Не мни́те, я́ко приидо́х вложи́ти мир на зе́млю: не приидо́х воврещи́ мир, но мечь. Приидо́х бо разлучи́ти челове́ка от отца́ своего́, и дще́ре на ма́терь свою́, и неве́сту на свекро́вь свою́: и врази́ челове́ку дома́шнии его́.

Толкова́ние: Не везде́ бо есть добро́ соедине́ние, но быва́ет иногда́ и разделе́ние добро́. Ниже́ вся́кое умире́ние похва́льно, но быва́ет мно́жицею и мир на повреже́ние и дале́че боже́ственыя любви́ отгоня́ющь. Егда́ у́бо ми́римся о разруше́нии и́стины, прегре́шно есть и неподо́бно зело́. Таковы́й бо мир не прии́де Христо́с вложи́ти, но супроти́вное па́че. Хо́щет нас друг от дру́га до́браго ра́ди отлуча́тися. Не вся́кое бо мирова́ние и совокупле́ние добро́, но быва́ет егда́ и ра́спря, и разлуче́ние - ве́лие и боже́ствено де́ло. Никто́же у́бо сим о́бразом любо́вию да прилежи́т к лука́вым, ниже́ ми́ра име́ти с ни́ми. Но а́ще и оте́ц, а́ще и ма́ти, а́ще ча́да, а́ще бра́тия, супроти́вни обрета́ются зако́ну Христо́ву, сопроти́вимся им, я́ко враго́м И́стине.

Ева́нгелие: И́же лю́бит отца́ или́ ма́тере па́че Мене́, несть Мене́ досто́ин. И и́же лю́бит сы́на или́ дще́ре па́че Мене́, несть Мене́ досто́ин. И и́же не прии́мет креста́ своего́, и гряде́т по Мне, несть Мене́ досто́ин.

Толкова́ние: Не я́же к Бо́гу отчуже́ние и омраже́ние, приводя́ Госпо́дь сия́ глаго́лет, ниже́ роди́теля и ча́да ненави́дети зако́нит, но не мно́жае Того́ о́нех люби́ти. «И и́же прихо́дит ко Мне, рече́, и не возненави́дит отца́ своего́, и ма́тере, и жену́, и де́ти, и бра́тию, не мо́жет Мне бы́ти учени́к». Не повелева́ет бо Христо́с сих всех ненави́дети, поне́же и се зело́ же́стоко есть: но егда́ хотя́т мно́жае па́че Христа́ люби́ти их, и егда́ поврежа́ют нас и отлуча́ют от любве́ Бо́жия, тогда́ ненави́дети их подоба́ет.

Е́же бо люби́ти роди́теля и ча́да па́че Христа́, в беды́ нас приво́дит и во глубины́ погубле́ния. Не рече́ бо «я́ко не любя́й Мене́ па́че отца́ и ма́тере», но «любя́й сих па́че Мене́», несть Мне досто́ин. И поне́же у́бо не стужа́йте си роди́теля и ча́да, сия́ слы́шаще. Бо́льшее глаго́лет: «И́же не взима́ет креста́ своего́, и во след Мене́ и́дет, несть Мне досто́ин». Па́че бо: ду́ша несть при́снейше челове́ку. Оба́че же а́ще и ду́шу свою́ не возненави́дят челове́цы Мене́ ра́ди, или́ сме́ртию разделя́юще сия́, или́ тесното́ю и ско́рбию живу́ще, не мо́гут быва́ти Мне ученицы́. И́же бо а́ще не отрече́тся живота́ сего́, и на бра́ни и крамолы́ не преда́ст себе́, и на закла́ния и кро́ви, и на ну́жныя и поно́сныя сме́рти Христа́ ра́ди - несть досто́ин учени́к или́ раб Его́ бы́ти.

Но поне́же мно́зи, я́ко та́тие, и разбо́йницы, и злоде́и распина́ются - приложи́л есть, «и е́же после́дует Мне», си́речь, и́же по Мои́х зако́нех живе́т. Подоба́ет бо не то́кмо в гоне́ниих показа́ти хра́брость, но и целому́дрие, и кро́тость име́ти, и вся́ку и́ну доброде́тель де́лати. Не ходя́й же во след вели́каго Бо́га и Спа́са на́шего Иису́са Христа́, я́коже рече́но бысть, вон Ца́рствия изгоня́емь быва́ет, и ве́чным огне́м осужа́емь быва́ет.

Ева́нгелие: Хотя́й обрести́ ду́шу свою́, погуби́т ю́. И погуби́вый ду́шу свою́ Мене́ ра́ди, приобря́щет ю́.

Толкова́ние: Устрая́яй пло́тное житие́, мнит я́ко ду́шу свою́ приобрета́ет: той бо па́че погубля́ет ю́, ве́чной му́це и томле́нию предая́. Погубля́яй же ду́шу свою́ и уморя́я, не я́коже разбо́йницы и та́тие и злоде́и, или́ я́коже удавля́яй себе́ Христа́ ра́ди: он бо есть спаса́яй ду́шу свою́.

Ева́нгелие: Прие́мляй вас, Мене́ прие́млет. И прие́мляй Мене́, прие́млет Посла́вшаго Мя. Прие́мляй проро́ка, во и́мя проро́че, мзду проро́чу прие́млет. И прие́мляй пра́ведника, во и́мя пра́ведниче, мзду пра́ведничу прие́млет.

Толкова́ние: Подвиза́ет нас Христо́с, да́же прие́млем избра́нных и учине́ных на на́ше духо́вное посеще́ние, и промышле́ние, и попече́ние. Почита́яй бо ученики́, О́ного почита́ет. Почита́яйже Того́, Бо́га и Отца́ почита́ет. Подоба́ет бо нам почита́ти пра́ведныя, во и́мя пра́ведных: си́речь, подо́бни суть и челове́цы Бо́гу, но не́коего ра́ди заступле́ния и предста́тельства, е́же и́муть от царе́й. А́ще ли же и пра́ведника о́браз то́кмо и́мут, де́ла же не и́мут: мы, я́ко пра́ведных прие́млем их, и Бог возда́ст нам. Я́коже а́ще бы́хом пра́ведника прия́ли и́стиннаго, се бо зна́менает глаголя́, я́ко мзду пра́веднаго прии́мет. И и́нако бо па́че разуме́ется, я́ко пра́веден нарече́тся он, прие́мший пра́веднаго, и мзду прии́мет, я́ко пра́веднии прие́млют.

Ева́нгелие: И и́же а́ще напои́т еди́наго от ме́нших сих ча́шу студены́ воды́, то́кмо во и́мя ученика́, ами́нь глаго́лю вам, не погуби́т мзду свою́.

Толкова́ние: Да́же у́бо нищету́ и убо́жество не предложи́м. Сего́ ра́ди глаго́лет, а́ще бо и ча́шу воды́ студены́ да́мы, я́коже ученико́м Христо́вым бы́ти о́нем, сего́ ра́ди прия́ти и́мамы мзду. Ча́шу же студены́ воды́ дае́т, и поуча́яй распала́емых боже́ственым огне́м, и разжига́емых неподо́бными вожделе́ньми и де́лы, и творя́ их ученики́ Христу́. Не погубля́ет бо ни сей мзду свою́.

Сия́ бо слы́шаще бра́тие, после́дуем Госпо́дним за́поведем: и благи́ми нра́вы украша́ем себе́, и вся́кими доброде́тельми почести́ себе́ потщи́мся. Бе́гаем плотски́х вожделе́ний и мирски́х дел. Бе́гаем присвое́ния преле́стника и омрази́м его́ от всея́ души́. Кре́пко и му́жески супроти́вимся, на кова́рства и наве́ты злонача́льнаго врага́. До́ндеже вре́мя и́мамы, блага́я де́лаем: де́лания бо есть вре́мя се, бу́дущее же воздая́ния. Я́коже во све́те и дни хо́дим, да́же сы́ны све́та и дне бу́дем. И по разреше́нии жития́ сего́, и плотска́го тяжа́ния отложе́ния, ко присносу́щному и боже́ственому све́ту и́дем, о Христе́ Иису́се Го́споде на́шем, Ему́же подоба́ет вся́ка сла́ва, честь и покланя́ние, со безнача́льным Его́ Отце́м, и со Пресвяты́м и Благи́м и Животворя́щим Ду́хом, ны́не и при́сно и во ве́ки веко́в. Ами́нь.

Ра́дуйся, раю́, и ты, Еде́ме, весели́ся: уже́ бо не жале́еши свои́х жи́телей, и́хже ра́ди бе́яше сотворе́н, па́ки дожда́в их. Пре́лестию бо бе сатанино́ю и за́вистию, лише́н и затворе́н. Твоему́ бо жи́телю Ада́му реку́: «Творца́ своего́ ослу́шавшуся, А неприя́зни дия́вола послу́шавшу, Прия́т казнь не сам еди́н, Но и с пле́менем свои́м».

Казнь же бысть, изгна́ние из поро́ды, и смерть, и ско́тское житие́. Си́це бо первозда́нный нам от супоста́та впаде́ся в тле́ние и всему́ ро́ду сие́ нанесе́. Сия́ и Дави́д воспомина́я, рече́: «И челове́к в че́сти сый, не разуме́, приложи́ся скоте́х несмы́сленных и уподо́бися им».

Во мно́ги бо зло́бы вни́де челове́ческое пле́мя, че́сти своея́ отступи́в я́коже подоба́ет, без све́та во тме живу́щым уподо́бися: во тме бо и без све́та хо́дят, и́же вне за́поведей Бо́жиих живу́т. Но блаже́нный Творе́ц, Милосе́рдый Влады́ка, не погони́ преступле́ния челове́ческа, но прише́д в ны убо́гия и плоть на́шу прии́м и подо́бие, ра́зве греха́. Нам бо бе пре́жде по́дал от Своего́ о́браза и от Своего́ ду́ха, и не снабде́хом. Да тем прие́млет от на́шего немощна́го естества́, да ны очи́стит, и без тли сотвори́т, и введе́т в рай в Ца́рство Свое́, и прии́мники сотвори́т Своего́ Божества.

Та́же поне́же есть уморена́ плоть неприя́знию, тою́ па́ки и умори́ти умертви́вшаго пе́рваго врага́. На Кресте́ бо распя́ту бы́вшу, Ему́же самохо́тне соше́дшу во а́дово те́мно ме́сто, свя́занныя разреши́в изведе́, и вла́стеля те погуби́, и смерть преоби́диму сотвори́ живу́щым.

Подража́тели Ему́ мно́зи я́ко зве́зды бы́ша, поне́же ви́дяще на Кресте́ возвы́шшася и кровь пролия́вша: та́ко пло́ти своя́ нача́ша, а́ки на сла́дости вели́кия, предая́ти на муче́ние.

Оба́че, а́ще и пред распя́тием бе во а́де Крести́тель Иоа́нн, Предте́ча обою́ схо́ду, меню́ же воплоще́ния Христо́ва и распя́тия. И а́ще пло́тныма очи́ма и не ви́де Христа́, кровь свою́ пролия́вша, то духо́вныма дозре́, предвари́в пролия́, и во ад сни́де, ра́дость пове́дая седя́щым во тме.

И посе́м святи́и апо́столи и ученицы́, о́ви кро́вию подража́тели бы́ша и де́лом, а друзи́и без кро́ве, чи́стым житие́м и чу́дным, я́коже и пре́жде Зако́на ве́тхаго, и по зако́не Ду́ха. О́ви вохити́шася, угоди́вше Бо́гу: а друзи́и соблю́дшеся от зла де́ла, и стра́сти плотны́я прие́мше вся́ки, преидо́ша в свет неисповеди́мый. По Христе́ же изнико́ша я́ко о́блацы, и песо́к морски́й, му́жеска по́лу и же́нска вся́кими верста́ми, реку́ же де́тскими и ю́ными и ста́рыми, стра́сти Христо́вы взы́щуще, преступи́ти в жизнь ве́чную.

Сих всех святы́х сло́во воспомина́я, пове́дает стра́сти и разли́чныя о́бразы муче́ния их. Не бо́ еди́наго, или́ двою́, или́ десяти́ чи́смен, хва́льное се пове́дается сло́во, но безчи́сленному мно́жеству святы́х муже́й. И́же бо мо́жет звез́ды на небесе́х исчести́, или́ песо́к морски́й, или́ мо́ре изме́рити пя́дию, той мо́жет и сих чи́смен ве́дети. Но и́хже мы челове́цы чи́смене не ве́мы, то Той еди́н то́чию имена́ зело́ свесть. Я́коже Сам Той глаго́ля, рече́: «Ва́ши же и власи́ главни́и вси изочте́ни суть». Да И́же власы́ мо́жет исчести́ во всех челове́цех, не па́че ли чтет свиде́тельство их, и преподо́бных пло́ти, и уго́дник всех?

Не бо́ в еди́ном ме́сте то́чию мно́жество их есть, но и по мно́гих ме́стех мно́га мно́жества. Я́же бо и Бо́жие пребо́льши есть вели́чие, и в неви́димых есть испо́лнено - та́кожде и ве́ры Его́ ду́ши привя́занная рече́т, по всему́ ми́ру распросте́рлася есть. Да а́ще по мно́га ме́ста мно́жества, то оба́че в еди́ном ме́сте любы́ есть. Я́же бо и земля́ житие́м ра́зным разлуча́ше, то же и не́бо единомы́слием совокупля́ше: и бысть пло́тное совокупле́ние. Да и́же вкра́тце: в ми́ре сем пожи́ша ра́зно, то на небесе́х и в раи́ ку́пно живу́т, друг дру́га ви́дяще и свеселя́щеся. Не бо́ им пресре́дь бе́яше ра́зно до́лго жи́ти, но сего́ до́бре зело́ жела́ху, е́же бы всем вку́пе при́сно жи́ти, и Животво́рца и Влады́ку сла́вити и хвали́ти: да тем и стра́сти я́ко и живо́т без конца́ нарица́ху. А е́же не прия́ти стра́сти, то сие́ беду́ лю́ту си творя́ху: но е́же а́ще худа́ страсть бу́деше, и та́ко ти́и вели́ку си боле́знь творя́ще: а е́же ве́лия зело́ - то поко́й. Я́ко и мно́гажды мно́ги бо́ги иму́щым тем слуга́м, е́же суть безбо́зи, преклони́вшым си гне́вы и я́рости на ми́лости, хотя́ще преба́вити и прельсти́ти я́ - сия́ разуме́вше святи́и, и добромы́сленны, имены́ злы́ми и укори́знами кида́юще, на бо́лий гнев воставля́ют, да горча́йшим муче́нием бо́лий дар от Христа́ прии́мут. Та́ко бо по всему́ ми́ру святы́х муж ли́кове, мно́гими страстьми́, и труды́ подвиза́вшеся, принести́ к Царю́ ве́чному в же́ртву себе́ наде́ющеся, прия́ти от Него́ да́ры вели́ки, во вся ве́ки пребыва́юща, по пи́санному: «И́же есть Мене́ ра́ди оста́вил все зде, той жизнь ве́чную прии́мет, и стокра́т на сем све́те». Та́ко и бысть, и та́мо прии́мут, и зде ны́не без забве́ния сла́вими суть. И апо́стол бо глаго́лет: «Ко́ждо свою́ мзду прии́мет проти́ву своему́ труду́». И влеча́ше их любы́ Госпо́дня.

Сей бо бе пре́жде их прия́л страсть, да Нань взира́юще, небрежа́ху, ни мня́ху си бед, ни муче́ний, ни сме́рти. Той бо им бе́яше сказа́л стра́нная терпе́ния, и обеща́в жизнь ве́чную: да бо́льшия жи́зни ча́юще, ху́ждьшую преоби́дяху. Хотя́ще в тле́ющия ме́сто, нетле́ющую прия́ти, и в малого́дныя ме́сто, безконе́чную. Уже́ бо к сему́ и на ум им не прихожда́ше и на па́мять, ни оте́чество, ни у́жики, ни сердобо́ли, ни име́ние мно́гое, ни бога́тство вели́кое, ни боля́рство высо́кое, или́ власть вели́кая, или́ са́нове честни́и, или́ досто́инства обрета́тельная. Наде́яху бо ся Оте́чество име́ти небе́сное, а у́жики и сердобо́ли – а́нгелы, в ни́хже вели́чество ра́дости неисповеди́мыя, и ли́кове веселу́юще неразлу́чне, и пе́ния пра́зднующих духо́вная, и глас ра́достен и сла́ву, и све́тове боже́ственнии, присносу́щнаго све́та заря́ми сия́юще и луча́ми.

Та́цы суть тех му́ченик да́рове, таковы́ суть тех по́двизи, тру́ждьшихся житие́м чи́стым и до́брою благода́тию. И бе́яше ви́дети чу́до вели́ко, и у́жасти вы́ше, посреде́ суди́ща му́ченик. О́вы гне́вающеся, и я́ко поруга́вшеся му́чащым я́ го́рце зело́. А си́и хотя́щии тому́: или́ разли́чными те́ми му́ками му́чащиися, я́ко сластьми́ ся пита́юще веселова́ху.

Ча́сто бо страсте́м во обою́ жи́знию де́яшеся, проти́ву ме́ре терпе́нию, на по́двиги полага́ющаго Христа́, и на тризне́ние трудо́м, на подъя́тие приноси́мых мук. А други́м и возвра́т лю́тых тех мук, на му́чащыя без ми́лости: я́ко се на́ковально бие́мы, и наказа́юще бию́щыя. На́ковально бие́мо, не явля́ет на себе́ ни скве́рны, ни ра́ны, ни горе́ния - та́ко и друзи́и от кре́пких мук огне́м натрижне́ни, и в пе́щницы вве́ржени зело́ распалены́, со а́нгелы ликоствова́вше духо́вным пе́нием, на по́двиги поло́жшаго Влады́ку Бо́га сла́вляху. И ро́сным тем пла́менем цвету́ще, жгу́щее де́йство, на ужига́ющыя приста́вники возвраща́ху. И подоба́ет Дави́дово сло́во зде воспомяну́ти: «В де́лех ру́ку свое́ю увяза́ет гре́шник». А друзи́и на суди́щи ста́вше, и жду́ще зве́рскаго испуще́ния на растерза́ние их и на изъяде́ние, ниже́ ся вострепета́ша, но утверди́ша си ум, и утеша́хуся, и уготовля́хуся на смерть жития́ ра́ди ве́чнаго, до́бре хва́ляще Бо́га. Ти́и же лю́тии зве́рие и я́рии, отреше́ни бы́вше и припуще́ни, и мно́гажды оста́вльше му́чимыя, на судя́щыя и му́чащыя устре́мльшеся, и раскуса́юще я́, и растерза́вше, явля́юще я́ супоста́тники Бо́жия, я́ко и всем позара́таем возвели́чити и сла́вити Бо́га, я́ко мни́мыя бо́ги тем прокужа́ют, и ка́пища тех сокруша́ют, и бе́сы и́же бе́ша в них ся всели́ли.

И бе́яше ви́дети отве́рницу твори́му ди́вну: судии́ судя́щыя, самы́я му́ки прие́млюще. А я́же непщева́ху му́чаще, то ты́я вне му́ки стоя́ще. И́хже досто́ит нам сла́вою похвали́ти, реку́ще: О си́ло вы́ше си́лы, иму́щая си́льны чудеса́! О повеле́нию неви́димому, ви́диму же показу́ющимся вели́чеством! О про́мысле вы́ше мы́сли, промышля́еме вели́ка про́мысла на по́льзу и строй дая́ния!

Да и си́и му́жи святи́и, си́це изволе́нием му́ку прии́мше, де́йством же упражне́ни, свои́м успе́нием прия́ша сконча́ние.

А друзи́и не та́ко бра́тие, и вы́ше бо глаго́лахом реку́ще, проти́ву ве́ры стра́сти полага́ющему Го́споду, на трижне́ние устро́и Христо́с, но и обруга́ния и бие́ния, и у́зы и темни́ц искуше́ние прия́ша, ка́мением же побие́ния и претре́ния, и ужиза́ния, и усекнове́ния, и ра́зличными друче́нии и муче́ньми, сию́ жизнь кра́ткую препроводи́вше усну́ша. И ни мечь, ни огнь, ни претре́ния пе́рсей их, ни ка́менное побива́ние, ни сква́ры, ни котлы́, ни стру́зи, ни одри́ желе́знии, ни скрачи́ла, ни удо́вная ре́зания, ни коле́са со у́дицами, ни оловя́ннии взва́ри, ни тро́стная повира́ния, ни мясокрое́ния, ни ина какова́ лю́та му́ка и боле́зненна, терпели́вых подви́жник кре́пких возмо́же соврати́ти от любве́ Бо́жия: но та вся томи́тельная претерпе́вше и победи́вше, и лю́бльшаго зело́ зрят Бо́га, и оста́вльше нам Го́сподем набди́мыя пло́ти, и Бо́гом со́бранныя мо́щи.

И ка́ко Бо́гом суть со́браны и соблюдены́, разуме́им бра́тие. Не́киих бо от святы́х мече́м изсе́кше судии́ ти́и безбо́жнии, я́ко злоде́йска телеса́ в пусты́ни в пото́цех помета́ша, иде́же це́ла и неко́снена пребы́ша: ни зверь бо, ни пти́ца, ни и́но ничесо́же мо́же вкуси́ти от них. Но е́же испе́рва обы́чно им я́сти, то же чрез естество́ оста́виша, необы́чны нра́вы творя́ху, набдя́ще пло́ти святы́х тех. Быва́ху и́же пре́жде плотоя́дцы, то ти́и плотолю́бцы: избра́нны бо бе́яху пло́ти ты́я на вся́ко целе́ние, оста́вльшым им ве́рующым к ним. Не бо́, но и друзи́и му́ченицы во огни́ изгоре́вше, пе́пел свой я́ко свет явля́ху, и́же и доны́не ве́рующым и взе́млющым от него́ цельбы́ да́руют. А други́х па́ки на у́ды разсе́кше, и ко́сти тех я́ко ме́рзска телеса́ судия́м и мучи́телем су́ща, в ре́ки вве́ржени бы́ша, не погрязо́ша тя́гостию, я́коже есть нрав тя́жкому погряза́ти, но верху́ вод я́ко и плоть пла́вающе, и я́ко зве́зды сия́юще, и́же богоче́стием собра́ти хотя́щым показа́хуся. Та́коже у́же в мо́ре вмета́ху, ча́стыми волна́ми к кра́ю приплы́вше, и боже́ственными чудесы́ до́брым ся муже́м яви́вше, по домо́х ве́рных разнесе́ни бы́вше. А друзи́и в земли́ все те́ло иму́ще вко́пано, при́сно покрове́ным не люби́ша бы́ти, но яви́шася со́нными явле́нии христолю́бцем, да изше́дше прия́ша честны́й покло́н от всех челове́к, чудеса́ творя́ще де́яху, и́же их тре́буя проша́ше. Да си́це многообра́зно обре́тены их мо́щи святы́я, к ним же приходя́ще ве́рою, исцеле́ния обрета́ем душа́м на́шым и телесе́м.

Мы же зде сла́вяще, похва́лим святы́я сия́ полки́. Нача́ло же сотвори́м, Иоа́нна Крести́теля похваля́юще. Ка́ко ли мы ему́ хо́щем хвалу́ сотвори́ти, его́же есть сам Госпо́дь похвали́л, реки́й: «В рожде́нии же́нстем бо́лий Иоа́нна не воста́нет»? Ка́ко сего́ мы хо́щем похвали́ти, и́же вы́шши есть славле́ния на́шего? Сему́ бо во утро́бе ма́терни Влады́ка Христо́с, сво́йство и та́йну пре́жде всех яви́. Его́же бо а́нгели едина́ко не ве́дяху, то сей то́ уве́де: е́же бо гряды́й принесе́ благове́щение арха́нгел Гаврии́л, то сей то́ пове́даше, во утро́бе взыгра́вся. Та́ко суть твоя́ взыгра́ния Иоа́нне, и пре́жде ше́ствия в свет сей. Та́ко бо ти даст сан достоя́ния Бог, и не у́ роди́вшуся. О правди́ваго Со́лнца заре́ вели́кая! О Царя́ вели́каго дру́же сла́вный! Ты вся са́ны в себе́ и́маши: со апо́столы апо́стол, с проро́ки проро́к, с му́ченики му́ченик, с преподо́бными преподо́бный, и с пра́ведными пра́ведник. Во пло́ти сый, а́нгельски препроводи́в житие́ свое́, и тех сан и́маши. Я́коже и глаго́ла сам Госпо́дь о тебе́, к жидо́м реки́й: «Но что есте́ изошли́ ви́дети, проро́ка ли? Ей реку́, и бо́ле проро́ка». Сей бо есть, о не́мже пи́шется: «Се Аз послю́ а́нгела Моего́ пред лице́м Твои́м, и́же устро́ит путь Твой пред Тобо́ю». Пе́рвый пропове́дник Ца́рствия Христо́ва ты бысть.

И вас, ка́ко хощу́ похвали́ти святи́и апо́столи, недомышля́ю себе́. Вас бо прозва́ сам бра́тию и дру́ги, рек: «Вы бра́тия Ми есте́. Я́ко раб не весть, что ему́ Госпо́дь твори́т, вам же все есмь дал уве́дети». Вы, рече́, освети́сте мир сей, и осоли́сте ду́хом, пита́юще ве́рныя. И доведо́сте рая́, и Ца́рствия Бо́жия, и до ны́не дово́дите христолю́бцей уче́нием свои́м. И сего́ ра́ди кто есть вам то́чен? Кто ли есть бо́лий? Вы бо обтеко́сте всю зе́млю, не даю́ще поко́я нога́ма свои́ма, и сна свои́ма очи́ма. Не сотвори́сте бо уго́дия пло́тем свои́м. Вы миротво́рцы и учи́тели. Вы вожде́ве небе́снии. Вы небеса́ душе́вная, испове́дающе сла́ву Бо́жию, мглу разгоня́юще грехо́вную. Вы церко́вная сла́ва. Ва́ми бо ся мы гре́шнии хва́лим. До́брии свети́льницы, кро́тцыи сказа́тели, егда́ есть ле́по: и я́ри, егда есть подо́ба извести́ служи́тели Христо́вы и помо́щницы челове́ческому пле́мени. Тольма́ бо помого́сте им и помога́ете, я́ко и всю жизнь всего́ ми́ра оста́вльше, прелете́ша к вам. Рече́ бо к вам, заве́т творя́ Христо́с: «Да иде́же Аз бу́ду, ту и служа́щии Мне». То же и си́и сотвори́ша, а́може ви́деша учи́тели своя́ присту́пльша, та́мо и си́и идо́ша. Подража́тели бо бы́ша ва́ши пои́стинне, ви́деша бо кро́ви пролия́ны, и мно́ги пото́ки проки́даны, и вше́дшыя на вели́кий свет Ца́рства Бо́жия.

Та́мо и си́и иду́т ученицы́ ва́ши, и страстоно́сцы, и подвиго́ша, и понови́ша ва́ши стра́сти свои́ми телесы́. По вас прие́млюще му́ки вся́кия Христа́ Царя́ ра́ди, а́ще и в порядо́вная ле́та, оба́че а́ки еди́ны ду́ши в разли́чных телесе́х, и в верста́х, и в роду́ обою́ меню́, му́жеска же по́лу и же́нска. Си́и бо святи́и му́ченицы, на еди́но зря́ще спасе́ние, все оста́виша, оте́чество, бога́тство, са́ны, и досто́инства, роди́тель, версты́, де́ти и бра́тию, сердобо́ли и дру́ги, и и́наки вся́кия вла́сти и сла́вы. И ретя́щеся, кто бы предвари́в, кровь свою́ пролия́л. Христа́ ра́ди див творя́ху, я́ко и да́ры ся ури́щуще на стра́сти. Того́ ся то́чию боя́ще, еда́ ослабе́ет му́чай, и оста́влься в сем житии́, бу́дет лише́н венца́. И муче́ния разли́чнаго не брежа́ху, но понужда́ху друг дру́га, реки́й: «Гряде́м бра́тие, на беды́ гряде́м, до́ндеже гнев сей на ны еда́ ся ка́ко укроти́т мучи́тель, и го́ньзнет на́шего спасе́ния».

Вели́ко натрижне́ние положено́ се: подви́гнемся, да не бу́дем лише́ни его́. Коли́ко бо добро́ есть, бра́тие, благи́х ра́ди беду́ прия́ти и умре́ти. Поне́же а́ще и ны́не не у́мрем, но и по́слежде рожде́нию долг свой не ну́жда ли есть прия́ти?

Да сотвори́м ну́жду сию́ самохо́тию , е́же нам есть [должно] о́бще. То же о присных свое́ творя́ще, сме́ртию живо́т премени́в. Не бу́ди никто́ же нас плотолю́бец: вси я́ко еди́ни у́мрем, я́ко и сотвори́ша, о ни́хже ра́дуемся днесь. Та́ко ти́и, бра́тие, помого́ша челове́ческому пле́мени уче́ния апо́стольска, па́че же рещи́ Свята́го Ду́ха уче́ние. Той бо в них Сый, та уче́ния дая́ше. Мы же дру́зи, по учи́телех ученики́ похваля́юще, рцем: О святи́и кре́пцыи челове́цы! О чи́стыя и боголюби́выя ду́ши! О честни́и пода́тели, и жили́ща Христо́ва, и домо́ве Свята́го Ду́ха, и у́дове вся́кого бла́га! О соста́ви, от ни́хже есте́ соста́влени, егда́ ся роди́сте ве́щию пло́тною, и па́ки прие́мше свое́, я́коже ся разсы́па соста́вленное те́ло, и освяти́ свой ко́ждо соста́в! О блаже́нный наро́де мно́гий и многосве́тлый, еди́ным све́том освеще́нный!

Ка́цеми вы доблестьми́, чрез естество́ ся укрепи́вших, похва́лим? Вы роди́телема честь сотвори́сте, Ада́му реку́ и Е́ве, свои́ми страстьми́ хулы́ гонзи́сте, роди́вшая челове́ческое пле́мя, и в печа́ли ме́сто ра́дости испо́лнися. Вы зе́млю я́ко не́бо сотвори́сте, заря́ми возше́дше, и те́мная ме́ста оста́вивше, я́ко и зве́зды вся ме́ста сия́юще, и твердя́ще в за́поведи и́стовыя. Вас ни оте́ц пла́чася, ни ма́ти терза́ющися, ни жена́ моля́щи, ни де́ти крича́ще, ни у́жики вопию́ще, ни могу́ще разсла́бити, ни умягчи́ти ва́ших серде́ц. Вы бо не то́чию с мучи́тели победи́стеся, но и с естество́м и ро́дом, от него́же ча́ди су́ще, е́же непобеди́мо есть никогда́ же. Тому́ бо вы соодоле́сте, и вы́ше бе́ясте, ему́же ни зверь лю́тый, ни гад ядови́тый не мо́жет соодоле́ти: естеству́ бо ники́й живо́т не мо́жет соодоле́ти, но вам любы́ Бо́жия и страсть Христо́ва, бо́льша всего́ твори́тся дозря́щи.

Ва́ши о́бщницы де́лы и любо́вию, а на́ши учи́тели, па́стыри и засту́пницы: мню́ же архиере́и и чисти́тели, и о́ба ря́да свята́я, отве́ргшеся сея́ жи́зни. О́ви с ни́ми, а друзи́и - ле́ты по́слежде, но де́лом те́мже, и о́бще прия́ша, рай с ва́ми и Ца́рство. А́ще бо и не случи́ся им кро́ви пролия́ти за Творца́, но оба́че сле́зы мно́ги источи́ша, и по́ты пролия́ша, и труды́ подъя́ша до́лги зело́, и го́рьки, и бе́дны, и боле́зненны. Си́и бо ходи́ша во овчи́нах и в ко́зиях ко́жах, во власяны́х ри́зах, желе́зом око́вани, лиша́еми, скорбя́ще, озло́блени, в пусты́нях скита́ющеся, и в гора́х, и в пеще́рах, и в верте́пех земны́х. Сего́ честна́го полка́ кто мо́жет испове́дати? Си́и бо свое́ те́ло вся́чески суть томи́ли, не насыща́юще своея́ утро́бы, не наспя́щеся, ни напива́ющеся воды́, ни просто́ры даю́ще своему́ уму́: но а́лчни, бо́си, на́зи, трепе́щуще зимо́ю, поработи́вшеся самохо́тию. Та́ко есть Христо́ва любы́, и огнь духо́вный: и где же вни́дет, та́мо всю скве́рну сожже́т и тя́жесть, и сотвори́т и́стее сне́га, и легча́е пера́.

Но аз зде ста́вя, воспятя́ся па́ки реку́: «Ра́дуйся раю́, жи́теля своего́ па́ки восприе́мля». И кто суть жи́тели ти́и?

Ада́м пе́рвый. А́ще и не снабде́ Творца́ за́поведи, но оба́че ми́лостию и кро́вию просты́ню прия́. А́вель же по том честны́й муж, и Сиф, и Ено́с. И Ено́х угоди́вый, и Ной пра́ведный, и сы́нове его вси́. Авраа́м же язы́ком оте́ц, обеща́нию прии́мник. Мелхиседе́к же иере́й Бо́жий. И Исаа́к, и Иа́ков, и пле́мя его́. И́ов страстоте́рпец, и Моисе́й вели́кий, зако́ну прии́мник. Ааро́н архиере́й, и Иису́с На́ввин, вводя́й в зе́млю обеща́нную. Судия́, Самуи́л проро́к, и Дави́д, царь и проро́к. Иезеки́я, и Иоси́я, и проро́цы двана́десяте, пропове́давшии о прихо́де Христо́ве. И три вели́ции, Иса́ия же, реку́, и Иереми́я, Иезеки́иль. И Дании́л, и трие́ о́троцы, и́же не изгоре́ша во огни́. И ини́и пра́веднии, пре́жде зако́на и по зако́не правди́вии ду́хове, до Иоа́нна Крести́теля. И от сего́ сему́же вси чи́нове, и полкоподви́жницы суть, о ни́хже и мы собра́вшеся ра́дуемся, и па́мять творя́ще пра́зднуем веселя́щеся.

А́ще бо о еди́ном гре́шнице пока́явшемся, ра́дость быва́ет на небесе́х, я́коже Госпо́дь Христо́с глаго́лет, толи́ко па́че, сели́ко мно́жество ты прие́мля, ка́ко ся не и́маши ра́довати с на́ми?

Мы же бра́тие, очи́стимся к сим святы́м. А́ще ли то и се па́че рещи́: бу́дем я́коже вси очи́стившеся житие́м, и кро́вию свободи́мся вся́кия скве́рны пло́тныя и душе́вныя. Истрезви́мся, воспря́нем, предста́вим пло́ти своя́ и ду́ши тре́бу жи́ву и свя́ту, и уго́дну Бо́гови, и слове́сну мольбу́. Ничто́же бо та́ко Чи́стому Влады́це че́стно есть, я́коже чистота́. Стра́сти прие́млем и мы, страстоте́рпец ра́ди. Одоле́им и мы, Победи́теля ради. Свиде́тельствуим и́стинною, свиде́телей ра́ди. Себе́ страсте́м их дади́м, я́ко и саме́м побе́дником бы́ти, и прии́мником тоя́ же сла́вы. Удержи́м гнев я́ко лю́тый зверь, и язы́к я́ко о́стрый мечь, и сла́дость я́ко и пла́мы угаси́м, и отверза́им очи́ма на́шима на достоя́ние гля́дати. Научи́м при́кось беся́щься, и вкус размету́щься, егда́ смерть вни́дет две́рцами на́шими, и смех лих отве́ржем. Ни поклони́м коле́ну к Ваа́лу име́ния ра́ди, ни боя́зни ра́ди о́бразу злато́му: но бои́мся па́че всего́ Бо́га, и на все щит во́змем ве́ре, и всего́ неприя́знена де́йства го́нзнем. И сия́ бо рать люта́ зело́, и ополче́ние мно́го, и побе́да вели́ка. А́ще ся есмы́ та́ко собра́ли или́ собере́м, то пои́стине я́коже Христо́с лю́бит, та́ко ся есмы́ совокупи́ли, я́ко и́стинне святы́я му́жи чтем.

Я́коже се досто́йно, и вои́стинну па́мять их днесь творя́ще, сла́вим я́. А́ще ли не та́ко, но пита́ния ра́ди схо́димся и бесе́д, то ни в кий же успе́х схо́димся: не хотя́т бо си́цему схо́ду святи́и му́жие. Да не мо́зем бра́тие, скве́рно проводи́ти свята́го сего́ дне, ни скве́рне в сем ме́сте святе́м стоя́ти: ни высо́каго обни́жим, ни безче́стием оскверни́м честна́го. И сократя́ще рече́м, не твори́м зе́млене духо́внаго. Пра́зднуют у́бо и пога́нии, но я́коже го́де есть бесо́м. А нам, я́коже есть все духо́вно: де́ло, по́ступ, мышле́ние, сло́во, и да́же до хожде́ния и оде́жди, - все бо в зако́н и в чин де́ет Бо́жий муж, та́коже и пра́здновати, и ра́доватися, и весели́ти: не бо́ ставля́ет никто́же, но не без го́да и и́злиха. Да а́ще та́ко ся схо́дим в сию́ святу́ю це́рковь, я́коже подоба́ет христия́ном, то и мы бу́дем прича́стницы с те́ми святы́ми страстоно́сцы, то́йже сла́ве и че́сти, его́же бо о́ко не ви́дело дебе́ло сый, ни у́хо слы́шало, ни челове́чь ум когда́ домы́слися, по во́ли свое́й приклада́я высо́ких сла́вах и пречу́дных, тому́же суть прии́мницы святи́и му́жие.

Да и мы ра́дующеся днесь со святы́ми си́ми, подви́гнемся в ра́дость Госпо́дню с ни́ми вни́ти, и свет прия́ти Блаже́нныя и Владу́щия Пресвяты́я Тро́ицы, в Ню́же есмы́ ве́ровали, Ю́же испове́даем пред Бо́гом и челове́ки, ничто́же боя́щеся, да е́же до после́дняго издыха́ния мно́зем дерзнове́нием. До́брое вруче́ние святы́х оте́ц, и раб Христо́в: ю́же ве́ру да бы́хом чи́сте снабде́вше, с не́ю па́ки шли к ним.

Но Ты Бо́же Ми́лостивый, И́же нас еси́ изве́л из тмы безме́рныя, и введ в вели́кий свет и ве́рный, и дал уве́дети Свое́ и́мя. И́же разсыпа́еши язы́ки, и́же ра́тем хотя́щыя. И́же заступа́еши Своя́ рабы́, ми́лости прося́щих от Тебе́, мо́жеши бо из бед изтерза́ти. И́же проща́еши отгрех, и очища́еши от беззако́нных разжиза́нии. Погрузи́ во ополче́ния злове́рных и пога́ных, и даждь Свои́м рабо́м, владу́щему, реку́, сего́ ме́ста, и муже́м его́ и о́бласти, ти́хостию ми́рне проводи́ти, на вели́цем же и пра́веднем Суде́ Твое́м Твою́ ми́лость прия́ти. Ты бо еси́ обою́ жи́знию Влады́ка и Госпо́дь. Ты и́маши безчи́смене си́лы а́нгельски, и мно́жества полко́в ве́рных, мо́жеши вско́ре победи́ти. Ты бо преда́ Авраа́му, уго́днику Твое́му, три́ста и осмьна́десять домоча́дец, одоле́ти мно́гим си́лам ца́рским, та́ко бо Ты помога́еши вско́ре ве́рующым к Тебе́. Ты еги́птяны казни́в, изра́ильтеское же пле́мя из беды́ исто́рже, и во обеща́нную зе́млю введе́. Ты же и соста́вы у́твари сея́ естество́ премени́, на му́ку нечести́вым, а на спасе́ние бе́дным. И́же поруга́ние показа́ еги́петскую власть су́щу. И́же зе́млю и во́ду и возду́х и свет вооружи́ на еги́петския непра́выя челове́ки. И́же то́жде день Свои́м рабо́м све́том снабде́, а сопроти́вником тмо́ю и мра́ком сотвори́. И́же то́жде мо́ре изра́ильтяном разве́рзе на проше́ствие, а еги́птяном на затворе́ние, и потопле́ние сотвори́. И́же распросте́ртыма рука́ма Моисе́овыма, си́лу дал есть на амали́тско погубле́ние. И́же сте́ны иерихо́нския самопаде́нием разори́. И́же мно́ги язы́ки воста́вив, и тех ме́сто Свои́м рабо́м дал есть. И́же побежде́на сотвори́ Голия́фа без ору́жия рука́ма дави́довыма. Ты еси́ велича́ние Сенахири́мово на главу́ ему́ возвра́ти, и́же ты́сящь сто о́смьдесять и пять я́вльшуся а́нгелу вско́ре погуби́: и показа́ челове́ком, я́ко Твоея́ си́лы есть мощь и побежде́ние, а не челове́ки, и́же и де́лом показа́, я́ко не снабди́т себе́ си́лою мно́гою. Твоя́ бо есть ми́лость и мощь непобеди́ма, я́же ми́луеши. Твоя́ благода́ть ору́жие непобеди́мо. Твоя́ отда́ния венцы́ неувяда́ющии правди́вым. Ты пла́мы о́гненны устуди́, я́ко не жещи́ пра́ведных. Ты звере́й лю́тых укроти́, я́ко не вреди́ти преподо́бных Твои́х раб. Я́же Ты че́стны и́маши, то тех ни вода́ потопи́т.

Да и ны́не, изба́ви Своя́ лю́ди ве́рныя из беды́ всех, мольба́ми всех муже́й святы́х, поми́луй наро́д Свой, и не попусти́ на ня никако́му злу приити́, и да́руй ве́чную благода́ть, Сы́не Бо́жий. Ты бо еси́ смерть упраздни́вый, е́же и стро́йным ми́ром пра́виши це́ркви. Во Твое́ и́мя и́же и зверови́д ся крести́т, и бе́сове повину́ются, боя́щеся и сотерза́ющеся. Ты Еди́н утеша́яй печа́льныя, и избавля́яй от пле́на. И́же вели́к еси́ ви́димым, сла́вленным, вели́к неви́димым прихо́дом. И́же сме́ртию победи́ смерть, и Крест на сатанину́ па́губу воздви́же.

Ми́рный Царю́ Иису́се, даждь мир, Влады́ко Го́споди, и доведи́ в пе́рвый рай и Ца́рство, егда́ прии́деши со святы́ми а́нгелы Свои́ми с небе́се на Суд Стра́шный, сла́вный и пречи́стый, Пресвя́таго и Cла́внаго Отца́ же и Свята́го Ду́ха, единоче́стием и си́лою Сла́вимь, ны́не и при́сно и во ве́ки веко́в. Ами́нь.

Отне́леже Пятьдеся́тницу пра́здновахом и прише́ствие Свята́го Ду́ха, не пре́йде седми́ дний число́: ны́не же приспе́ всех святы́х честна́я па́мять. Поне́же и сам Госпо́дь рече́: «О́тче, хощу́, да иде́же Аз, ту бу́дут и уго́ждьшии Мне». Просла́ви бо Госпо́дь Бог на небеси́ и на земли́ святы́я Своя́, апо́столы же, проро́ки и му́ченики, святи́тели и преподо́бныя, и свяще́нномученики, по́стники с му́ченицами, и с преподо́бными жена́ми; и́хже па́мять чту́ще, потщи́мся в за́поведех Бо́жиих бы́ти, и пра́вду де́яти, да и нас Госпо́дь Бог просла́вит.

Святи́и бо такови́и же че́ловецы бы́ли, я́коже и мы, но непра́вду и зло́бу возненави́дели, сла́ву же ми́ра сего́ и бога́тьство ни во что́же вмени́ли, и живота́ своего́ не пощаде́ли, те́мже и на небесе́х со а́нгелы пребыва́ют без ста́рости и безсме́ртни. Того́ ра́ди му́ченицы име́ли те́ло сме́ртно, но ду́ши их со а́нгелы во сла́ве, Христо́ва бо смерть велми́ просла́ви я́. Не толма́ не́бо све́тло укра́шено звезда́ми, я́коже му́ченическая телеса́ я́звами краси́ма.

Кто же не диви́тся сему? Бие́мии одолева́ют бию́щих, связу́емии разреше́нных, жго́мии жгу́щих, му́ченицы бо вя́жеми, и многоразли́чно томи́ми и му́чими, победи́ша му́чащих, мно́ги прии́мше стра́сти, проро́цы же и апо́столи, мно́го бы́ша томи́ми, и от святи́тельска чи́на мно́зи, разли́чны му́ки от беззако́нник прия́ша: и мно́га беззако́ннии святы́м сотвори́ша зла́я: наги́х бо водя́ще, и ру́ки о́пако связа́вше бия́ху, и стру́жуще изнемога́ху мучи́тели, а прие́млющии му́ки, побе́ду на дия́вола устроя́ху. Мно́ги же зло́бы мучи́тели зли́и на святы́я устро́иша: о́вых бо к дре́ву привяза́вше: ре́бра им прободо́ша, о́вых же изстреля́ша: а ине́м ру́це и но́зе отсеко́ша, ине́м же язы́ки отре́заша, и о́чи изверте́ша, и главы́ мече́м отсеко́ша, и зу́бы сокруши́ша: ине́м же чрева́ разре́заша, и ре́бра разврати́ша, и гру́ди разсеко́ша, и никогда́же почи́вше беся́щеся окая́ннии мучи́тели. Но и с дре́ва сне́мше, на у́глии о́гнене, и на сковрадах желе́зных растяго́ша, от теле́с их сугу́бей кро́ви теку́щи. Мно́гих же телеса́ огне́м сожго́ша. Святи́и же сия́ вся с ра́достию Го́спода ра́ди терпя́ху, ча́юще воздая́ния бу́дущих благ, и а́ще не бы Госпо́дь укрепля́л их, то не бы стерпе́ли толи́кия мно́гия му́ки. Я́коже бо со́лнце восходя́щее многоза́рны лучи́ испуща́ет, та́ко и святы́х телеса́ бя́ху ра́нами укра́шена, терпе́нием бо венца́ восприя́ша: и не то́кмо му́жи еди́ны, но и жены́ мно́ги Христа́ ра́ди стра́сти и му́ки прия́ша.

Преподо́бнии же те́сным путе́м ше́ствоваше, о́вии в пусты́нях, ини́и же в гора́х и в разсе́линах земны́х, а́лчьбою, и жа́ждою, и нагото́ю, от бесо́в тма́ми искуша́еми сконча́шася. Дия́вол же и а́нгели его́ велми́ боя́хуся и трепета́ху, о́ну воспомяну́вше Госпо́дню кровь, ея́же ради апо́столи, проро́цы и му́ченицы, и и́ни мно́зи святи́и кро́ви своя́ излия́ша, и насле́дницы бы́ша Ца́рствия Небе́снаго.

Те́мже ве́рнии потщи́мся до́брыми де́лы почти́ти па́мять всех святы́х, и поревну́ем до́брым их де́лом. Они́ бо всю жизнь сию́ преоби́деша: мы же поне́ да остане́мся без вре́меннаго яде́ния, и прокля́таго пия́нства. Они́ огню́ телеса́ своя́ преда́ша, а мы поне́ от име́ния на́шего подади́м неиму́щим и бе́дным. Они́ попра́ша у́глия о́гненая, а мы телесе́ на́шего злы́я по́хоти да отрази́м. Они вся оста́виша, сла́ву и бога́тство све́та сего́, ни живота́ пощаде́вше Ца́рствия ра́ди небе́снаго: мы же поне́ десяти́ну стяжа́ния своего́ Бо́гови отдади́м, да ми́лостив бу́дет и нам Госпо́дь наш в день Су́дный. А не скорби́те никто́же о раздава́емых: но па́че ра́дуйтеся о ве́чных благи́х угото́ваных ми́лостивым.

Днесь соше́дшеся ве́рнии почте́м доброде́тельно пра́зднующе всех святы́х честну́ю па́мять, иму́ще мир и любо́вь ме́жду собо́ю, за́висть же и гнев оста́вивше, и вся непра́вды, и вся зла́я де́ла. Святи́и бо мно́го труди́шася, и мно́ги прия́ша стра́сти и беды́ Ца́рствия ра́ди небе́снаго: и мы сотвори́м повеле́нная нам от Бо́га, да спасе́мся. Святи́и бо о́вии на сковрада́х пеко́ми, а ини́и на у́глиях жго́ми, друзи́и же в котле́х вари́ми: о́вии в мо́ри потопля́еми, ини́и же на колесе́х протяза́еми, и стру́жеми, о́вии ка́мением побива́еми, а ини́и звере́м в снедь помета́еми. О́вии во глубину́ рвов вмета́еми, и по соста́вом раздробля́еми, и мно́ги без числа́ му́ки и стра́сти претерпе́вше, уго́дницы Бо́жии бы́ша, жела́юще ве́чнаго поко́я и ра́дости.

Мы же ве́рнии да пребу́дем в пра́вде, за́поведи Бо́жия творя́ще, да со все́ми святы́ми насле́дуем Ца́рство Небе́сное, о Христе́ Иису́се Го́споде на́шем, Ему́же сла́ва ны́не и при́сно и во ве́ки веко́в. Аминь.

Отне́лиже святы́х му́ченик пра́здник, Пятидеся́тный пра́здновахом. И до прихо́да Свята́го Ду́ха сотвори́хом, до́ндеже пости́гнет му́ченический лик, па́че же и святы́х полк сочета́ние: полка́ бо а́нгельскаго, и́же ви́де Иаков патриа́рх, ничи́мже сей ху́ждьши, но то́чен и ра́вен: ма́лым бо ничи́м, имены́ то́чию отлуча́ются, де́лы же совокупля́ются. На небеси́ живу́т, а́нгели и му́ченицы без ста́рости и безсме́ртни суть а́нгели, то́жде и му́ченицы си прии́мут. Но они́ безпло́тно получи́ша естество́, сим же, сме́ртно иму́ще те́ло, я́ко безпло́тни претерпе́ша му́ки.

Не тольми́ есть све́тло не́бо чи́ном зве́здным украша́емо, я́ко телеса́ му́ченическая све́тла, чи́ном я́звеным краси́ма. Хо́щеши ли навы́кнути страстоте́рпческое боре́ние, му́чеником место? Ничтоже есть стра́шно на ра́ти полцы́: по о́бе страну́ ста́нут, окова́ни блиста́ющеся ору́жием и зе́млю осветя́ще, о́блацы стре́лами пуща́ются в руду́ , закрыва́юще возду́х мно́жеством стрел, ре́ки крова́вы теку́т отвсю́ду, и мно́го паде́ние обои́м, я́ко на жа́тве класо́м па́дающим. Сице убо во́ем, иду́щим друг на дру́га, се у́бо от тех.

Но на сию́ брань тя призову́, две му́ченицы. И о́во му́ченическо, но о́вии суть в ополче́нии му́ченическом. О́вии же наги́м те́лом борю́т му́ченицы, и побе́да наги́х на вооруже́ных быва́ет. Кто ся не почуди́т? Бие́мь, одолева́ет бию́щим. Свя́заный, раздре́щшому. Жего́мый, жегу́щому. Ви́де ли, я́ко сия́ страшне́йши о́ноя. О́на боя́ще и стра́шна, но по ве́щи быва́ет. Сия́ же вся́кого естества́ премину́ет и вся́коя ве́щи поря́дие. Что бо ся пресла́внее? Что ли бра́ни сея́ безако́ннее?

На ра́тех бо и обои́ зае́млются, и ра́тни, [и] борю́щиися. Зде же не и́нако, но: ов наг, ов же на ору́жии и труде́х, и мно́ги му́ки подъе́млюще, и безчи́сленыя я́звы: и мучи́теля победи́ша. Му́ченики бо на́ги водя́ще, и ру́це созади́ связа́вше, и всю́ду бию́ще и стру́жуще, и та́ко побежде́ни бы́ша. Прие́млющии стру́пы побе́ду поста́виша на диа́вола: и я́коже накова́льна бие́ма не ослабе́ет сама́, ни мяте́тся, бию́щии же желе́зо разоря́ет па́че: та́коже и святы́х душа́, толи́ким наводи́мым му́кам у́бо ничто́же, бию́щих же си́лу раздруша́юще, сты́дце и сме́шне, побежде́ни от трудо́в отпуща́ху по мно́гих и нестерпи́мых я́звах: и привяза́вше я́ к дре́ву, ре́бра пропокова́ху, погубля́юще бразды́ и а́ки зе́млю оборю́ще , а не те́ла разсека́юще.

И бе́яше ви́дети ре́бра расте́рзана, и гру́ди резсе́кльшася: и ни тогда́ преста́ша от возбеше́ний, кровопи́йнии они́ зве́рие. Егда́ со дре́ва сне́мше, на у́глех и на желе́зной ле́ствицы распя́ша их, и бя́ше ви́дети па́ки горе́е пе́рвых позо́р: сугу́бы ка́пли ка́плющия из те́ла, о́вы кро́ви теку́ще, о́вы же пло́ти та́ющеи - святи́и же а́ки на цве́те ши́пчиннем на у́глех лежа́ща, си́це со вла́стию быва́ющих, зря́ху ту же ле́ствицу разу́мную, ю́же ви́де Иа́ков от земли́ до небеси́ протяже́ну. По о́ной схожда́ху а́нгели, а по сей взыдо́ша му́ченицы, на обою́ же Госпо́дь восклоня́шеся . А́ще бо бы Госпо́дь на сей не восклоня́лся, не бы́ша стерпе́ли боле́зний тех святи́и си́и. Но по о́ной у́бо схо́дят а́нгели, я́ко они́ у́бо на слу́жбу спуща́ются, хотя́щим прия́ти спасе́ние. И страстоте́рпцы, и му́ченицы избы́вше трудо́м, идо́ша у́бо к трудополо́жнику Бо́гу.

Ви́десте ли мно́гажды на восто́це восходя́щее со́лнце, и же́лты испуща́юще луча́? Такова́ бя́ху святы́м телеса́: и а́ки неќим луча́м желтови́дным подо́бна, река́м крова́вым всю́ду теку́щим по них, те́ло их освеща́ющим, вельми́ па́че, не́жели не́бо и со́лнце. Сию́ кровь у́бо ви́дяще украша́хуся, бе́си же зря́ще боя́хуся, и той же диа́вол трепета́ше: не бо кровь бя́ше про́ста, но кровь спасе́на: кровь, небеси́ досто́йна, и кровь свята́я, и кровь я́же при́сно до́бре церко́вныя сады́ напая́ет. Ви́де кровь диа́вол, содрогну́ся. Воспомяну́ бо и о́ноя кро́ви Госпо́дня, о́ноя бо ра́ди Кро́ви и сея́ убоя́ся. Святи́и бо му́ченицы Христа́ ра́ди пострада́ша, и кро́ви своя́ полия́ша, и по вре́меннем животе́ отсю́ду на не́бо восхо́дят: и а́нгелом пред ни́ми иду́щим, и арха́нгелом с ни́ми гряду́щим со ору́жием.

Егда́ же взы́дут на не́бо, и вся си́лы ту сря́щут я́. Ели́ко бо во́ином стра́шным прише́дшим во град, тогда́ весь наро́д ри́щется отвсю́ду, и осту́пльше я́ смо́трят удо́бнаго здра́вия отвсю́ду. Вельми́ па́че страстоте́рпцем доброчести́вым на не́бо вше́дшим, сри́щутся а́нгели, и вся си́лы го́рняя отвсю́ду схо́дят, испы́товающе вся стру́пы хра́брых, и от бра́ни прише́дшим по мно́гих беда́х и одоле́ниих. И та́ко с любо́вию гостя́т , вся я́ целу́ют, и веду́т я́ со мно́гою че́стию к небе́сному Царю́ и к Престо́лу О́ному по́лну су́щу сла́вы, иде́же херу́вими и серафи́ми. Прише́дше та́мо и поклони́вшеся, Седя́щему на Престо́ле, и мно́жайшая от Влады́ки приимут ве́чная блага́я и неизглаго́ланную ра́дость: и в лик святы́х причту́тся, и с херуви́мы Трисвяту́ю песнь прино́сят Влады́це.

Те́мже бра́тие, поревну́им святы́м му́чеником, преоби́деша они́ жи́зни. Преоби́дим и мы ядь, пове́ржем и мы име́ние в ру́це убо́гим. Попра́ша они́ у́глие, угаси́м и мы по́хотный огнь. Да прии́мем от Бо́га вся проше́ния наша.

Те́мже бра́тие, егда́ хо́щем ми́лостыню твори́ти, не зрим на труше́ния име́ния, но зрим на собра́ние пра́вды: «Разсы́па и дасть убо́гым, пра́вда его́ пребыва́ет в век ве́ка». Не зри тщи́маго бога́тства, но внемли́ расту́щаго о́нде скро́вища. Написа́им на се́рдцых на́ших: я́коже до́мы своя́ творя́ще све́тлы, цве́тным ша́ром всю́ду украша́ют, та́ко и мы по стена́м ума́ на́шего, насле́дим му́ченическое муче́ние: о́но бо нашаре́ние без успе́ха, се же и́мать приобре́тение, не тре́бует бо ни труше́ния име́ния , ни хи́трости не́кия се писа́ние , но всего́ лу́чши поуче́нием сотвори́ти и мы́слию кре́пкою и бо́дрою: и тем а́ки не́коею руко́ю написа́ти му́ки их. О́вы на сковрада́х лежа́ща, о́вы же в котле́х погружа́емы, о́вы же в мо́ри потопля́емы, други́я же стру́жемы и на колесе́х протяза́емы, ины́я же во зве́ри пуща́емы, о́вы же над про́пасть ведо́мы, и я́ко ко́ждо [их] улучи́ся разори́ти житие́ : да тем писа́нием све́тлу сотвори́вше ду́шу, стро́йно жили́ще небес́ному Ца́рствию сотвори́м.

А́ще бо у́зрит в на́шем уме́ такова́ писа́ния, прии́дет со Отце́м и жили́ще сотвори́т в нас Ду́хом убо Святы́м, Царский бу́дет дом наш ум. Ника́коже безчи́нен по́мысл взы́ти мо́жет на па́мять му́ченическу, вели́ко сведе́тельство творя́щу Царю́ Бо́гу всех, ча́сто с на́ми су́щу. Та́ко у́бо от сего подъи́мше, возмо́жем по отше́ствии отсю́ду в се́ла приити́ ве́чная, и́хже бу́ди всем нам получи́ти благода́тию и человеколю́бием Го́спода Бо́га и Спа́са на́шего Иису́с Христа́, с Ни́мже сла́ва и держа́ва Отцу́ и Свято́му Ду́ху, ны́не и при́сно и во ве́ки веко́в. Ами́нь.

Стихи́:

Го́спода моего́ вся́ пою́ дру́ги:

А́ще же кто́ хотя́ ко все́м да и́дет.

В то́йже де́нь в Неде́лю по Пятдеся́тнице, и́же повсю́ду вселе́нныя, во Аси́и, Ливи́и и Евро́пии, се́вере же и ю́зе, святы́х все́х пра́здник пра́зднуем: его́же у́бо по Всесвята́го Ду́ха соше́ствии боже́ственнии отцы́ на́ши узако́ниша соверша́ти, а́ки бы о́браз не́кий показу́юще, я́ко Всесвята́го Ду́ха прише́ствие, сицева́я апо́столы де́йствова, освяти́вшее и упрему́дрившее и́же от на́шего смеше́ния, в наполне́ние отпа́дшаго о́наго чи́на а́нгельскаго, си́х уста́вившее, и Бо́гу Христо́м приве́дшее. О́вех у́бо муче́нием и кро́вию, о́вех же доброде́тельным житие́м и пребыва́нием, и я́же па́че естества́ соде́ловает. Схо́дит у́бо Ду́х Святы́й в ви́де огня́, естество́м го́рнейшее име́яй преложе́ние: восхо́дит же к го́рним пе́рсть, естество́м до́лу прело́жна су́щи, и на́ше смеше́ние, пре́жде вма́ле у́бо прия́тая, и обоже́нная Бо́гом Сло́вом пло́ть, вознесе́нная, и одесну́ю О́тчи сла́вы се́дшая. Ны́не же и все́х влече́т хотя́щих, я́ко обетова́ние, я́коже Бо́гу Сло́ву показу́ющу примире́ния дела́, и не́кий наме́ренный коне́ц, е́же к на́м пло́тию прише́ствия Его́ и смотре́ния, я́коже дре́вле отринове́нныя в соедине́ние и дру́жество приво́дит Бо́жие, незна́ющыя от язы́к лю́ди, челове́ческаго естества́ а́ки не́кия нача́тки принося́щаго Бо́гу, и́же в не́м разли́чно благоискуси́вшихся. По еди́ному у́бо о́бразу, си́це все́х святы́х пра́зднуем праздник: по второ́му же, поне́же мно́зи у́бо Бо́гу благоугоди́ша доброде́тели ра́ди кра́йния, и инообра́зно безъимени́тии от челове́к бы́ша: или́ и за не́кая не́гли челове́ческая, мно́гу же оба́че сла́ву от Бо́га иму́ще. Или́ я́ко мно́зи у́бо по Христе́ жи́тельствоваша во Инди́и, и Еги́пте, и Арави́и, Междоре́чии же и Фриги́и, и и́же вы́ше Евкси́на мо́ря: еще́ же и во все́м за́паде, да́же и до саме́х Вретани́йских острово́в, и про́сто рещи́, в восто́це и за́паде. Не бя́ше же подо́бно си́х все́х я́коже подоба́ет почести́, ра́ди безчи́сльства, я́коже церко́вный прия́т обы́чай: да у́бо е́же от о́нех все́х по́мощь прии́мем, иде́же кто́ на земли́ Бо́гу благоугоди́. Ина́ко же: и бу́дущих ра́ди, не́гли святы́х все́х пра́здник боже́ственнии отцы́ пра́здновати узако́ниша: все́х же, и́же пре́жде и по́слежде, явле́нных же и неявле́нных, во ели́цех Ду́х Святы́й всели́выйся освяти́, почита́юще и свосприе́млюще. Или́ и тре́тие, подоба́ше по ча́сти на ки́йждо де́нь пра́зднуемыя святы́я, и во еди́н собра́ти де́нь да яви́тся, я́ко о еди́ном Христе́ подвиза́шася, и вси́ то́жде доброде́тели теко́ша по́прище. И та́ко вси́ я́ко еди́наго Бо́га раби́ досто́йно венча́ни бы́ша, Це́рковь си́и соста́виша, го́рний ми́р вознаполня́юще, поощря́юще же и на́с ра́вный по́двиг си́м твори́ти, разли́чен су́щ и многови́ден, к по ели́ку же ко́ждо и́мать си́лы, все́м усе́рдием тща́тися. Си́м у́бо, и́же от ве́ка святы́м все́м, Ле́в приснопа́мятный и прему́дрый ца́рь хра́м преве́лий и предо́брый созда́, бли́зу же е́сть се́й святы́х апо́стол хра́ма вну́трь Константи́ня гра́да: пре́жде у́бо, я́коже глаго́лют, феофа́не жене́ его́ пе́рвее сего́ созида́яй, угоди́вшей Бо́гу в коне́ц. И е́же пресла́вное посреде́ мо́лв и ца́рствий вну́трь: и поне́же приобщи́ наме́рение свое́ Це́ркви, не обре́те ея́ покоре́нныя во́ли свое́й, ниже́ восхоте́ мудрова́ния его́, глаго́лющи: я́ко не ле́по е́сть о́ну, я́же вчера́ неда́вно растлева́шеся ца́рским мечта́нием, и пи́щею, внеза́пу почита́ти толи́ко, я́коже созида́ти е́й сицевы́й хра́м великоле́пный, и изря́дный, и ниже́ вре́мя дая́ше е́, а́ще и благоугоди́ Бо́гу. Тогда́ прему́дрейший ца́рь собо́рным хоте́нием всея́ Це́ркве, вели́кий хра́м, и́же созда́, посвяти́ все́м святы́м вселе́нныя, глаго́ля: а́ще и Феофа́на е́сть свята́, да сопричте́тся со все́ми святы́ми. И сего́ ра́ди а́з мню́, я́ко отсе́ле прия́т нача́ло пра́здноватися се́й пра́здник, внегда́ бя́ше и пре́жде. Сего́ ра́ди положи́ша и́ последи́ все́х пра́здников, о́крест вся́ пра́здники ле́та состяга́яй, и заключа́яй а́ки огражде́нием. Зане́ церко́вное уставле́ние и благочи́ние, а́ще и пре́жде мно́гаго нача́ся, и пома́ле прихожда́ше в до́брое уставле́ние, я́коже подоба́ше: но во дни́ сего́ царя́ уста́виша в соверше́нное, и изъобрази́ша чи́ном, и́же дне́сь е́сть. Трио́дь у́бо, вкра́тце рещи́, обдержи́т вну́трь с вели́ким прилежа́нием, ели́ка Бо́г сотвори́ на́с ра́ди неизрече́нными словесы́. Паде́ние диа́воле с небесе́, пе́рвою при́тчею изгна́ние Ада́мово, и преступле́ние: е́же на́с ра́ди Бо́га Сло́ва смотре́ние все́, и ка́ко на небеса́ Святы́м Ду́хом па́ки взыдо́хом, и испа́дший о́ный чи́н испо́лнихом, е́же святы́ми все́ми познава́ется. Ве́домо же бу́ди, я́ко вся́ ны́не пра́зднуем, ели́ка благода́тно освяти́ Ду́х Святы́й: глаго́лю у́бо высоча́йшыя и освяща́тельныя умы́, девяти́ я́ве чино́в: Пра́отцы и патриа́рхи, проро́ки и свяще́нныя апо́столы, му́ченики и священнонача́льники, священному́ченики и преподобному́ченики, преподо́бныя и пра́ведныя, и вся́ святы́х же́н ликова́ния, и ины́я вся́ безъимени́тыя святы́я, с ни́миже да бу́дут и хотя́щии бы́ти. Пре́жде же все́х, и во все́х, и со все́ми, святы́х святу́ю, пресвяту́ю, и те́х пребезсравни́тельно лу́чшую а́нгельских чино́в, Госпожу́ на́шу и Влады́чицу, Богоро́дицу Мари́ю Присноде́ву: Ея́же моли́твами Христе́ Бо́же, и все́х от ве́ка святы́х Твои́х, поми́луй и спаси́ на́с, я́ко еди́н Бла́г и Человеколю́бец.

Бра́тия и отцы́, пра́здник у́бо есть пра́здником свята́я Пентико́стии, ю́же пра́здновати сподо́бихомся. Пра́здник же святы́х всех, к нему́же ся прибли́жихом. Но поне́же пра́зднику своя́ притяжа́ти что от благи́х, по́мыслом лу́чшим помышля́я, а́ще мни́тся, коли́цы и коли́ко помина́еми святи́и.

Кто ли изочте́т зве́зды небе́сныя, и песо́к воскра́й мо́ря просы́пан? Толи́ко и во всем ми́ре му́ченик и́же за ве́ру проти́вишася на сопроти́вныя си́лы: устреми́шася к мучи́тельским полко́м, поидо́ша на огнь на мечь на зве́ри, на вся уси́льная, назира́юще муче́ния, я́ко пи́щу кро́ви изли́тия я́ко весе́лия: и то́южде наде́ждею наступа́ху на у́глие огня́, угаси́ша огня́ раждиза́ема, упраздни́ша я́же па́че естества́ естество́м, удиви́ша мучи́тели и царя́. Что свиде́тельствующе? Я́ко Иису́с есть Христо́с Сын Бо́жий, о И́мени Его́ живо́т ве́чный, я́коже пи́шется.

Еда́ кро́вию еди́ны му́ченицы быва́ют? Не бу́ди то: но житие́м боже́ственым живу́щии. Рече́ бо апо́стол: «Проидо́ша в ми́лотех и в ко́зиях ко́жах, лиша́еми, оскорбля́еми, озло́блени, и́мже не бе досто́ин весь мир, в пусты́нях скита́ющеся, в гора́х и в верте́пех и в про́пастех земны́х».

И ма́ло сшед, сели́ко иму́ще полк му́ченик, тяготу́ отложи́вше и напа́стный грех, терпе́нием теце́м на предлежа́щий нам по́двиг, взира́юще Нача́льника ве́ре и соверши́теля Иису́са. Ви́диши ли я́ му́ченик наре́кл есть? Все преподо́бство лю́бящее и с терпе́нием ско́рбно житие́ иму́щее. Что ли у́бо, о́ бра́тие? И мы в муче́ние нарекли́ся есмы́: и́бо в воста́нии на́шем и терпе́нии мно́го ско́рбно есть крестоно́снаго жития́ в сохране́ние нам, - де́вства бо обетова́ние, и́же неотрица́емое страда́ние, покоре́ние, - свиде́тельствуем, я́ко Иису́с есть Сын Бо́жий: свиде́тельствуем, я́ко суд есть и возда́ние на стра́шнем Суди́щи Христо́ве, ожи́вльших нас, сопроти́ву ста́вше диа́волу врагу́ Христо́ву, му́чащему я́ко и язвя́щему приноше́ньми обою́дных помышле́ний и поги́бельных сла́стий отврещи́ся нам не бы́ти Бо́гу. И́бо растле́еми в князе́х их, прии́дут и после́дуют супоста́тному их дея́нию, глаго́люще «несть Бо́га», по от свята́го Дави́да рече́нному: «Рече́ безу́мен в се́рдцы свое́м, несть Бо́га». А́ще бо забве́ния не сотвори́т Бо́жия душа́м челове́ческим, я́ко и отверже́ние не бы претвори́л ума́. Устреми́тися на по́хоть пло́тску, на проли́тие грехо́м, на опи́тие вина́, на блуд, на обьяде́ние, на лихои́мство, на идолослуже́ние и на и́но е́же о непра́вых. А́ще а́бие прие́м ду́шу по́вестию, по себе́ веде́т восхи́тив от Бо́га и собо́ю указу́я неугаси́мый огнь ве́чнаго муче́ния, коль умиле́но есть прельще́ние и окая́ннейше прельще́ния конча́ние? Но мы бра́тие, я́ко свиде́тели Христо́ви, до́брое свиде́тельство и еще́ свиде́тельствуем, до́брое испове́дание и еще́ испове́даем, ра́дующеся со все́ми святы́ми, я́ко сподо́бихомся свиде́тельствовати о Христе́, не преклони́вше коле́н Ваа́лу: по́хоти ны́не глаго́лю плотски́я, и про́чими сластьми́ жития́.

Да не услы́шаем его́ низлага́ющу отрица́емых явле́ний покоре́ния, но повсегда́ я́коже на по́прищи сопроти́вно подви́гнемся: бие́ни, но не ослабля́еми. Та́же что, я́же от свиде́тельства по́льза: ве́дите, я́ко стоя́щеи свиде́телие не́коему в житии́, прича́стницы ему́ быва́ют: и зане́же свиде́тельствоваше, де́лу соприча́стницы явля́ются. Со́брано бо есть и зде о том, я́ко Христо́ви му́ченицы, я́ко свиде́тельствовавше Ему́ о всем, непостоя́нна муче́ния претерпе́ша, в бу́дущем ве́це насле́дницы Ему́ явя́тся. Рече́ бо апо́стол: «Егда́ Христо́с яви́тся жизнь на́ша, тогда́ и вы яви́стеся с Ним во сла́ве». С ни́миже и еще́ и мы свиде́тельство на́ше творя́щеи бо до́лго и за житие́, всегда́ да сподо́бимся ве́чных возда́ний наслади́тися и со Христо́м ве́чно весели́тися, Ему́же сла́ва и держа́ва, честь и поклоне́ние, со Отце́м и со Святы́м Ду́хом, ны́не и при́сно и во ве́ки веко́в. Ами́нь.

По чтении же, тропарь святаго Феодора, глас 8: Правосла́вия наста́вниче, благоче́стия учи́телю и чистоты́, / вселе́нныя свети́льниче, мона́шествующих Богодухнове́нное удобре́ние, / Фео́доре прему́дре, уче́ньми твои́ми вся просвети́л еси́, цевни́це духо́вная, // моли́ Христа́ Бо́га спасти́ся душа́м на́шим. И абие 1-й час и конечный отпуст.