О светоно́сней неде́ле, и честне́м и святе́м дни Воскресе́ния, и о спасе́нем побежде́нии Влады́ки на́шего торжествова́вше све́тло, и со гла́сом хвале́ния ра́достная поже́рше, и побе́дныя пе́сни воспе́вше, и всем везде́ вся прости́вше, и друг дру́га объима́вше и лобза́вше, и я́коже день еди́н, и пра́здник еди́н, неде́лю всю проводи́вше. Днесь па́ки са́мое то Воскресе́ние обновля́ем, но́вую неде́лю нарица́ему, пра́здника преложе́ние иму́ще. Но́вая же неде́ля нарица́ется, поне́же бо в све́тлую неде́лю и день Воскресе́ния, нача́ло прия́т е́же нарица́тися неде́ли. В сию́ же дне́шнюю неде́лю, нача́ло торжества́ прия́т. Я́коже пре́жде созида́ется це́рковь, пото́м же освяща́ется. Та́коже и Господоимени́тый день, пре́жде бысть я́коже есть, и пото́м обнови́ся. Глаго́лет же ся и па́ки и́нако но́вая неде́ля, поне́же бо в сию́ хо́щет обновля́тися уме́рших телесе́м. Есть бо осма́я ку́пно и пе́рвая: осма́я у́бо от пресла́внаго Воскресе́ния Христо́ва, пе́рвая же я́же по сей, о́браз су́щи е́же по седмочи́сленом сем ве́це, осмо́му же ку́пно и пе́рвому, и еди́ному и неразру́шному дню ве́ка бу́дущаго о́браз. В мимоше́дшую же неде́лю све́тлую, Христо́с от ме́ртвых воскре́се, нача́ток нетле́ния уме́ршим бысть. В сию́ у́бо но́вую неде́лю, вся́кого челове́ческаго созда́ния, хотя́щее бы́ти нетле́ние пра́зднуем. Она́ у́бо све́тлая неде́ля, пе́рвое прише́ствие Христо́во знамену́ет. Сия́ же но́вая неде́ля, второ́е Христо́во прише́ствие я́ве показу́ет. В пе́рвое же явле́ние Христо́во ко ученико́м, Фома́ нарица́емый близне́ц не быв та́мо неве́рова. Во второ́м же явле́нии и тому́ су́щу та́мо, и руку́ зна́мения ви́девшу, неве́рие на ве́ру преложи́.
Ева́нгелие: Су́щу ве́черу, глаго́лет богосло́в и евангели́ст Иоа́нн, в день он, во еди́ну от субо́т, и две́рем затворе́ном, иде́же бе́яху ученицы́ Его́ со́брани стра́ха ра́ди иуде́йска, прии́де Иису́с, и ста посреде́ их, и глаго́ла им, мир вам.
Толкова́ние: Поне́же бо Мари́я Магдалы́ни возвести́ ученико́м, я́ко воскре́се Госпо́дь, я́ве я́ко она́ пе́рвая ви́де Его́ воскре́сша, и виде́ние Его́ возвести́, и ра́достная глаго́лания извеща́я, дово́льна же бя́ше сия́ ученики́ уте́шити. Ну́жда же бя́ше и неве́ровати им я́ко жене́, или́ ве́ровавшим оскорби́тися я́ко несподо́бишася и ти́и виде́нию Христо́ву. Того́ ра́ди в той день, во́ньже яви́ся и глаго́ла с Мари́ею, в той день и тем святы́м апо́столом яви́ся Госпо́дь. Сей у́бо день еди́н от субо́т нарица́ет евангели́ст. Субо́ты бо те вся дне́вы неде́льския нарица́ют жи́дове. Еди́ну же от субо́т пе́рвый день, си́речь неде́лю нарица́ют субо́ту, яви́жеся ученико́м Христо́с, ве́черу су́щу, поне́же жда́ше всем собра́тися, поне́же разсе́яни бы́ша стра́ха ра́ди иуде́йскаго. Внеза́пу же и пресла́вно яви́ся, затворе́ным у́бо две́рем, без наде́яния посреди́ учени́к ста. Да́же пока́жет, я́ко Бог вся сотворя́ше вла́стию ели́ка хотя́ше. А е́же пресла́вным и напра́сным воше́ствием, затворе́ным су́щим две́рем, показа́ я́ко Бог сый естество́м и вся мо́жет ели́ка хо́щет. Обнаже́нием же ребра́ теле́снаго и зна́мения гвозди́нная показа́вшу, извеща́я всем, я́ко и́же на кресте́ пове́шену бы́вшу хра́му теле́сному, воздви́же Христо́с. Я́сноже и кро́тко явле́ние Свое́ показа́ ученико́м, и гла́сом Свои́м укроти́ сердца́ их, и смуще́ние ути́ши ре́кшу им: «Мир вам», си́речь, не смуща́йтеся, ниже́ бо́йтеся, о́ ученицы́, но дерза́йте, я́ко Аз победи́х ми́ра и миродержи́теля, поне́сшу ми грехи́ ми́ра, и смерть упраздни́вшу, и живота́ ве́чнаго пода́вшу вам. Сия́ у́бо и пре́же распя́тия глаго́лаше им: «Мир оставля́ю вам, и о мне мир име́йте». Не то́кмо бо глаго́лом ми́ра утоли́ Христо́с смуще́ние и страх, е́же име́яху апо́столи, но и показа́нием, е́же показа́ им кре́стная зна́мения и извеща́ им от ме́ртвых воскресе́ние. Я́коже бо воево́де возврати́вшуся от бра́ни и ра́нами побе́дными сия́ющу, не срамля́ется сих ра́ди, поне́же бо па́че венца́ суть красне́йша, та́ко бо и Спас ра́ны о о́бщем спасе́нии прие́м, не сокрыва́ет страда́ния, но открыва́ет, я́ко да пока́жет Cвою́ хра́брость и си́лу Госпо́дь и е́же нас ра́ди неизрече́нное Cвое́ схоже́ние и милосе́рдие. Посреди́ же стоя́щу, ви́димь есть все́ми ученики́ Христо́с, мир подая́ им, и безмо́лвие всеконе́чно, и безстра́стие.
Сего́ ра́ди а́ще и мы хо́щем бра́тие и к нам приити́ Го́споду, я́коже ко апо́столом и ученико́м, затворе́ным две́рем, потщи́мся затвори́ти две́ри, си́речь, вся чу́вствия на́ша: Уста́ у́бо кре́пким и до́брым молча́нием, поне́же бо всяк глаго́л тще́тен, его́же а́ще глаго́лют челове́цы, да́ти сло́во и́мут о нем в день Суда́. Очеса́ держа́ти, е́же непристра́стно и испы́тно зре́ти, но целому́дрено и благогове́йно - и́бо воззре́вый на жену́ я́ко вожделе́ти ю́, уже́ прелюбоде́йствова ея́ в се́рдцы свое́м. Слу́хи же возбраня́юще, глаго́лы тле́нныя и ме́рзкия послу́шати. И не оставля́ти на послуша́ние язы́ка оболга́ющаго и клевета́ющаго на бра́тию ‐ но запреща́ти им па́че, да́же сугу́бо с ни́ми не согреша́ем: себе́ у́бо злой стра́сти поуча́юще, оне́х же непра́вдующих не возбраня́юще, ничто́же бо мни́тся пред очи́ма оболга́ющих, и оклевета́ющих, и злу ра́дующихся уби́йство. Ру́ки же чи́сты и нескве́рны име́ти, и простира́ти к Бо́гу, и на де́ла пра́ведная и блага́я, а не похища́юще чужа́я, и мы́та прие́млюще, я́ко покрыва́ти пра́вды. Но́ги же направля́юще на путь ми́рен, и на соверше́ние боже́ственых за́поведей Христо́вых, а не де́рзи и ско́ры иму́ще их и теку́щих име́ти на проли́тие кро́ви. Обоня́ние же и осяза́ние отвраща́ти от плотски́х похоте́й и сласте́й.
Ева́нгелие: И се рек, показа́ им ру́це, и но́зе, и ре́бра Своя́. Возра́доваша же ся ученицы́, ви́девше Го́спода.
Толкова́ние: Показа́ Христо́с ученико́м ру́це и но́зе и ре́бра Своя́, уверя́я па́че и извеща́я осяза́нием, я́ко не мечта́ние не́кое су́щее, но вои́стину те́ло се́ су́щее ви́димое. И я́ко Той Сам есть вои́стину распе́ншийся и уме́рший, я́коже прорече́ и воскре́се. И е́же пре́жде распя́тия глаго́лаше, я́ко «Па́ки у́зрю вас и возра́дуется се́рдце ва́ше» - сие́ ны́не де́лом соверша́ет, ра́дость сотвори́ ученико́м и укрепи́в их на ве́ру изве́стну, поне́же бо брань име́яху неотло́жну к жидо́м ученицы́ и апо́столы Христо́вы.
Ева́нгелие: Па́ки глаго́ла им: «Мир вам».
Толкова́ние: Супроти́вно и ра́вно бра́ни подая́ им утеше́ние. Я́коже бо жена́м рече́ Госпо́дь: «Ра́дуйтеся», поне́же бо в ско́рби бя́ше род же́нский, прельще́ния ра́ди пра́бабняго, е́же в раи́ бысть иногда́ - и она́ па́ки пе́рвая прие́млет ра́дование от Христа́, да́же от пе́рвыя ско́рби о́ноя свободи́тся. Та́коже и ученико́м мир подае́т, бра́ни ра́ди е́же к себе́ име́яху и е́же хотя́ху пото́м име́ти вси пропове́дания ра́ди ‐ сугу́ба же благослове́ния подае́т Христо́с, хотя́ всади́ти и укрепи́ти да́ры благода́тныя, я́коже и на Авраа́ме бысть: «Благословя́ благословлю́ тя, и мно́же умно́жу тя». Лобыза́ет же па́ки обы́чным о нем сло́вом, глаго́ля: «Мир вам», я́коже не́кий зако́н полага́я ча́дом церко́вным, е́же бо мирова́ти нам друг со дру́гом и к Бо́гу, я́коже исто́чник есть не́кий и нача́ло вся́кому бла́гу. Несть бо и́но ничто́же па́че ми́ра и любве́ превы́ше и сладча́йше. Несть же и́но поле́знейше и красне́йше па́че совокупле́ния и соедине́ния. Любо́вь у́бо Сам Той Бог есть, и нарица́ется, и есть. И е́же о Бо́зе, и Бо́жий мир вся́ка ума́ преиме́яй, я́коже прия́хом. Утеша́я же ученики́ Госпо́дь и дерзнове́нных творя́ их, глаго́лет:
Ева́нгелие: Я́коже посла́ Мя Оте́ц, и Аз посыла́ю вас.
Толкова́ние: Се у́бо Мое́ де́ло восприе́млете вы, ученицы́. Те́мже дерза́йте, я́ко с ва́ми ку́пно бу́ду и нико́е же поврежде́ние име́ти хо́щете. Я́коже бо Аз соде́ях вся, ели́ко челове́ком на спасе́ние, напосле́док же и пострада́ти их ра́ди восхоте́х и сме́ртное томле́ние разруши́х. Та́ко и вам подоба́ет, на пропове́дание посыла́емым, со усе́рдием вселе́нную всю объити́ и всем челове́ком толи́ка и такова́я бла́га пропове́дати и благовести́ти и до сме́рти о сем потща́тися и подвиза́тися.
Ева́нгелие: И се рек ду́ну, и рече́ им: «Приими́те Дух Свят. И́мже оста́вите грехи́, оста́вятся им. И и́мже держите́, держа́тся».
Толкова́ние: Све́тлых соде́яв Госпо́дь учени́к Свои́х, вели́ким са́ном апо́стольским и боже́ственым устрое́нием и та́инством, и свяще́нники показа́в их, и пропове́дники. Освяща́ет их а́бие и дае́т им Дух Свят, явле́ным по дунове́нием, подо́бных сотворя́я их на прия́тие Ду́ха Свята́го. И власть подае́т им, не я́ко ме́ртвыя воскреша́ти, или́ и́на не́кая твори́ти, но грехи́ оставля́ти. По вознесе́нии же, и Той Сам Дух Святы́й соше́д, си́лы и де́йства вся́кая подаде́ им. Поду́ну же Христо́с, явля́я я́ко Той есть на́шего естества́ Соде́тель. Глаго́лет же Моисе́й: «И созда́ Бог челове́ка, персть взем от земля́, и вду́ну в лице́ его́ дыха́ние жи́зни». Поне́же бо преслуша́нием к сме́рти спаде́ Ада́м, и от дре́вняя че́сти о́ноя поползе́ся и паде́ - обнови́ его́ па́ки Христо́с, сме́ртию те́ла Своего́ упраздни́в смерть, и на пе́рвую честь о́ну возведе́ по дунове́нием.
Ева́нгелие: Фома́ же, еди́н от обою́ на́десяте, нарица́емый близне́ц, не бя́ше ту с ни́ми, егда́ прии́де Госпо́дь. Глаго́лаху же ему́ про́чии ученицы́: «Ви́дехом Го́спода». О́нже рече́ им: «А́ще не ви́жу на рука́х Его́ зна́мения гвозде́й, и вложу́ пе́рста моего́ в зна́мение гвозди́нное, и вложу́ ру́ку мою́ в ре́бра Его́ - не иму́ ве́ры».
Толкова́ние: Влады́ка Христо́с прии́де, раб же Фома́ не обре́теся. Мир ученико́м подава́шеся, и сей учени́к не бысть с ни́ми. Они́ у́бо малоду́шествие отложи́ша, Фома́ же па́че малоду́шествием содержи́м бя́ше. Всем со́браным, Фома́ еди́н оста́влен бя́ше. Отбежа́ния бо и разсе́яния, бы́вшаго тогда́ на апо́столех стра́ха ра́ди иуде́йскаго, не пости́гл бя́ше возврати́тися Фома́. Бе́ше же и се вои́стину боже́ственаго устрое́ния де́ло: не всу́е бо оста́влен бысть Фома́, но неве́рствия ра́ди его́ ве́рнейша и крепча́йша, я́же Госпо́дним Воскресе́нием, та́йна яви́тся. А́ще бо бы был та́мо с ни́ми, не бы сомне́лся, и не иска́л бы осяза́ти. А́щели же не бы осяза́л, не бы ве́ровал. А́щели же не бы ве́ровал, не бы научи́л ве́ровати. Сего́ бо ра́ди и неве́рствие Фомино́, на́шей ве́ре вина́ бысть.
Ева́нгелие: И по осми́х днех па́ки бя́ху внутрь ученицы́ Его́ и Фома́ с ни́ми. Прии́де Иису́с, две́рем затворе́ным, и ста посреди́ их, и рече́: «Мир вам». Та́же глаго́ла Фоме́: «Принеси́ перста́ своего́ зде и виждь ру́це Мои́, и принеси́ ру́ку свою́ и вложи́ в ре́бра Моя́, и не бу́ди неве́рен, но ве́рен».
Толкова́ние: Па́ки возсия́ ученико́м Свои́м пресла́вно Госпо́дь, и вхо́дит затворе́ным две́рем, и посреди́ стае́т, и мир дае́т им. Та́же всех про́чих учени́к презира́ет и, я́коже Оте́ц благ и чадолю́бец, на сомнева́ющагося Фому́ прихо́дит, извеща́ти ему́ хотя́ е́же из ме́ртвых Свое́ свято́е Воскресе́ние. Вои́стину ве́лие Влады́чнее человеколю́бие! Ка́ко ду́ши ра́ди еди́ны показа́ет Себе́ ра́ны иму́ща и прихо́дит спасти́ еди́ного ученика́ неве́рствующа. Показа́ти же хотя́, поне́же я́ко Бог веща́ше вся неве́рствия Фомина́, ели́ка изрече́ веща́ния ко ученико́м, я́ко Всеве́дец уве́де. Не жда того́ пре́жде слы́шати что от него́, но Сам предвари́в я́же иска́ше Фома́, а́бие веща́ет: «Принеси́ перста́ своего́ рече́ зде, и виждь ру́це Мои́, и принеси́ ру́ку свою́, и вложи́ в ре́бра Моя́». Поне́же у́бо не ве́руеши рече́, о́ Фомо́, и осяза́ти хо́щеши, и чу́вством то́кмо еди́ным извеща́тися на увере́ние хо́щеши. Сия́ глаго́лющу ти, несть Ми ся утаи́ло. Косни́ся руко́ю, и осяза́в, приими́ искуше́ние. И уве́ждь, и разуме́й, я́ко Сам есмь Аз Христо́с. И не бу́ди неве́рен, но ве́рен. Но оба́че рещи́ и́мать кто: Ка́ко в нетле́ннем телеси́ Христо́ве тле́нная зна́мения явля́хуся, си́речь я́звы? Глаго́лем же, я́ко те́ло Госпо́дне нетле́нно воскре́се вои́стину, я́коже и прорече́ им. И не тре́баше пи́щи или́ пи́ва. Но устрое́ния ра́ди неизрече́ннаго, я́ко уве́ритися Воскресе́нию, яде́, и пия́, и Фоме́ показа́шеся зна́мения гво́здная и ре́бреная.
Ева́нгелие: И отвеща́ Фома́, и рече́ Ему́: «Госпо́дь мой и Бог мой». Глаго́ла ему́ Иису́с: «Поне́же ви́дев Мя, ве́руеши. Блаже́ни неви́девше, и ве́ровавше».
Толкова́ние: Слы́шав же Фома́ Госпо́дни глаго́лы, и осяза́нием Ду́хом Святы́м ку́пно испо́лнься и ра́достию, неве́рствие преложи́ и сомне́ную мысль отри́ну. Уны́ние отложи́ и возопи́, глаго́ля: «Госпо́дь мой и Бог мой!» Е́же рещи́ Госпо́дь - челове́ческое естество́ показа́. А е́же рещи́ Бог мой - боже́ственое существо́ явля́ет. Еди́ного Того́ же бы́ти Го́спода и Бо́га испове́дает Фома́. Го́спода у́бо виде́нием, Бо́га же смышле́нием. Подоба́ет же Фоме́ и рече́нное Дави́дом: «Рука́ма мои́ма Бо́га взыска́х и не прельсти́хся». Блаже́ни неви́девшии и ве́ровавше: Показа́ нам Госпо́дь, я́ко се есть ве́рнейше, е́же неви́димая приима́ти ве́рою. Глаго́лет: Блаже́ни неви́девшии и ве́ровавше. Ве́ра у́бо есть наде́ющемуся о́браз и веще́м неви́димым обли́чник. Не то́кмо бо ученики́ зде блажи́т Христо́с, но и вся челове́ки хотя́щая ве́ровати пото́м. Поне́же бо пи́сано есть, я́ко блаже́на очеса́ ви́девшая Го́спода. Показу́ет Он, я́ко се есть па́че блаже́но, е́же не ви́дети и ве́ровати, и я́ко не худе́йше что име́ти хотя́т неви́девшии от ви́девших.
Ева́нгелие: Мно́га у́бо и и́на зна́мения сотвори́ Иису́с пред ученики́ Свои́ми, я́же не суть пи́сана в кни́зе сей. Сия́ же пи́сана бы́ша, да́же ве́ру и́мете, я́ко Иису́с Христо́с Сын Бо́жий и да ве́рующе, живота́ и́мате во и́мя Его́.
Толкова́ние: Поне́же бо богосло́вец сей и евангели́ст Иоа́нн мале́йша па́че други́х апо́стол рекл есть, сего́ ра́ди глаго́лет, я́ко ни про́чии апо́столи все изреко́ша, но ели́ка бя́ху дово́льна на увере́ние привлещи́ слы́шащых. Не ве́руяй же глаго́ланным, ни мно́жайшая прия́ти и́мать, ниже́ ве́ровати. Прие́мший же сия́, ничто́ же и́но на увере́ние тре́бовати восхо́щет. Явля́ет же ся, я́ко не глаго́лет евангели́ст о и́же пре́жде Креста́ бы́вших зна́мениих, но о бы́вших по Воскресе́нии - сего́ ра́ди рече́ пред ученики́ Свои́ми. Ели́ка же пре́жде распя́тия, не пред ученики́ Свои́ми то́чию сотвори́л есть Христо́с, но пред наро́ды все́ми. Еди́ным же то́кмо ученико́м, четы́редесятьми де́ньми явля́яся, зна́мения показа́ше. Единонаде́сятими же кра́ты я́ве показа́ся им. 1. Пре́жде бо яви́ся Мари́и на гро́бе, и про́чим жена́м. 2. Та́же яви́ся Петру́. 3. Пото́м же Клео́пе и Луце́ на пути́, гряду́щим во Еммау́с в раздробле́ние хле́ба. 4. Пото́м же единонадеся́тим, затворе́ным су́щим две́рем, не су́щу Фоме́. 5. Па́ки же сим единонадеся́тим и Фоме́ су́щу с ни́ми. 6. Та́же яви́ся бо́ле пятии́ сот бра́тиям еди́ною, я́коже зна́менает Па́вел. 7. К тому́ же яви́ся Ия́кову, и о сем Па́вел веща́ет. 8. Та́же седми́м на мо́ри Тивириа́дстем. 9. Пото́м же седмодеся́тим. 10. Та́же на горе́ Галиле́йстей, иде́же завеща́ им Иису́с. 11. И на горе́ Елео́ньстей, егда́ же и Вознесе́ние бысть.
Соликоству́ет же пра́зднику обновле́ния сего́ бра́тие и вре́мя се преле́тное. И явля́ются вся Воскресе́нием Христо́вым сра́доватися, я́коже бо не́кое умерщве́ние, зи́мное се́тование отло́жьши, тварь вся возботева́ет па́ки и оживля́ется: зрим зе́млю злак прозяба́ющу, сады́ олистня́юща, живо́тная игра́юща, мо́ре украша́емо, вся́ческая на добро́ту прелага́ема и обновля́ема. А́щели же безду́шная и безслове́сная та́ко свеселя́тся и просвеща́ются Воскресе́нием Христо́вым, ко́льже па́че мы до́лжни есмы́, и́же сло́вом Бо́жиим и о́бразом Его́ почте́ни, просвеща́ти себе́ и уясня́ти житие́м до́брым и благоуха́ти, и обновля́тися Ду́хом. Сего́ бо ра́ди и освяща́емся бра́тие, и в себе́ прихо́дим, и бу́дем но́ви вме́сто ве́тсех, поне́же Христо́с у́мре и воскре́се, да́же и мы грехо́м не у́мрем, но обновле́нием живота́ хо́дим, велича́юще и благодаря́ще Христа́ и́стиннаго Бо́га на́шего, вся на по́льзу устрая́ющаго, Ему́же подоба́ет сла́ва и держа́ва, со Безнача́лным Его́ Отце́м и со Пресвяты́м Ду́хом, ны́не и при́сно и во ве́ки веко́в. Ами́нь.