СЛО́ВО Г҃. Ѡ҆ стра́нничествѣ.
Стра́нничество є҆́сть, ѡ҆ставле́нїе невозвра́тно всѣ̑хъ ꙗ҆̀же во ѻ҆те́чествѣ, проти́вꙋ бл҃гоче́стїѧ ра́зꙋмꙋ на́мъ сопротивлѧ́ющихсѧ. Стра́нничество є҆́сть, бездерзнове́ненъ нра́въ, невѣ̑дома премⷣрость, неѡб̾ѧвлѧ́емь ра́зꙋмъ, ѹ҆тае́но житїѐ, неви́димо намѣ̑ренїе, неѧ́вственъ по́мыслъ, хꙋ́дости похотѣ̑нїе, тѣсноты̀ жела́нїе, вожделѣ̑нїѧ бжⷭ҇твенна вина̀, раче́нїѧ мно́жество, тщесла́вїѧ ѿрече́нїе, молча́нїѧ глꙋбина̀.
в҃. Ѡ҆бы́че нѣ̑какѡ, и҆ се́й по́мыслъ въ нача́лѣхъ рачи́телємъ гдⷭ҇нимъ непреста́ннѡ и҆ протѧже́ннѡ стꙋжа́ти, ꙗ҆́кѡ ѻ҆гне́мъ бж҃е́ственнымъ: гл҃ю же, ѹ҆дале́нїе ѿ свои́хъ, ра́зꙋмомъ хꙋ́дости и҆ ѹ҆тѣсне́нїѧ побꙋжда́ющо рачи́телей такова́гѡ добра̀. Ѻ҆ба́че поели́кꙋ вели́ко и҆ достохва́лно є҆́сть, потоли́кꙋ мно́го и҆ разсꙋжде́нїе и҆́мать: не бо всѧ́ко стра́нничество соверше́ннѣ быва́ющо, добро̀ є҆́сть.
г҃. А҆́ще всѧ́къ прⷪ҇ро́къ без̾ че́сти є҆́сть во свое́мъ ѻ҆те́чествѣ (матѳ. г҃і, н҃з), ꙗ҆́коже гл҃етъ гдⷭ҇ь, то̀ разсмотри́мъ да не ка́кѡ бꙋ́детъ на́мъ стра́нничество тщесла́вїѧ вина̀. Стра́нничество бо є҆́сть ѿ всѣ̑хъ ѿлꙋче́нїе, за є҆́же сотвори́ти по́мыслъ бг҃а не ѿлꙋча́емь. Стра́нничество є҆́сть, ненасы́тима пла́ча рачи́тель и҆ дѣ̑латель. Стра́-ненъ є҆́сть всѧ́кагѡ свои́хъ и҆ чꙋжды́хъ ѹ҆свое́нїѧ бѣ̑гатель.
д҃. Не ѡ҆жида́й ко ѹ҆едине́нїю, и҆лѝ ко стра́нничествꙋ спѣша́сѧ, мїролюби́выхъ дꙋ́шъ: занѐ та́ть ѻ҆́нъ неча́емь є҆́сть. Мно́зи (бо) соспастѝ покꙋси́вшесѧ ѹ҆ны́лыхъ и҆ лѣни́выхъ, спогибо́ша, ѻ҆гню̀ ѻ҆́номꙋ вре́менемъ ѹ҆га́сшꙋ. Прїе́мъ пла́мень, тецы̀: не вѣ̑си бо сегѡ̀, когда̀ ѹ҆гаса́етъ, и҆ во тмѣ̑ тѧ ѡ҆ста́витъ. И҆нѣ̑хъ ѹ҆́бѡ спастѝ не всѝ и҆стѧзꙋ́еми быва́емъ: гл҃етъ бо бжⷭ҇твенный а҆пⷭ҇лъ: тѣ̑мже ѹ҆̀бо кі́йждо на́съ бра́тїе ѡ҆ себѣ̀ сло́во да́стъ бг҃ꙋ (ри́мл. д҃і, в҃і). И҆ па́ки: наꙋча́ѧй, гл҃етъ, и҆на́го, себе́ ли не ѹ҆чи́ши; (ри́мл. в҃, к҃а) ꙗ҆́коже бы гл҃алъ: ѡ҆ и҆нѣ̑хъ ѹ҆̀бо не вѣ̑мъ, самѣ̑хъ же себѐ всѝ всѧ́кѡ.
є҃. Стра́нничествꙋѧ блюди́сѧ ѡ҆бхо́днагѡ и҆ сластолюби́вагѡ бѣ̑са: стра́нничество бо, винꙋ̀ є҆мꙋ̀ дае́тъ.
ѕ҃. Добро̀ є҆́сть безпристра́стїе, сегѡ́ же стра́нничество є҆́сть ма́ти. Ѹ҆страни́выйсѧ гдⷭ҇а ра́ди, не ктомꙋ̀ ѹ҆свое́нїѧ и҆́мать, да не ꙗ҆ви́тсѧ страсте́й ра́ди скита́ѧсѧ.
з҃. Ѹ҆странѧ́ѧйсѧ мі́ра, да не ктомꙋ̀ къ мі́рꙋ прико́снешисѧ: ѡ҆быко́ша бо стра̑сти любовозвра̑тны бы́ти.
и҃. И҆згонѧ́ема быва́етъ нево́лею є҆́ѵа и҆з̾ раѧ̀, и҆ мона́хъ во́лею ѿ своегѡ̀ ѻ҆те́чества: занѐ та̀ ѹ҆́бѡ па́ки дре́ва преслꙋша́нїѧ жела́ти и҆мѣ̑ла бы, се́й же бѣдꙋ̀ ѿ и҆́же по пло́ти срѡ́дникъ всѧ́кѡ страда́лъ бы.
ѳ҃. Ѿбѣга́й ꙗ҆́кѡ ѿ бичѧ̀ ѿ мѣ̑стъ паде́нїй: плодꙋ́ бо не присꙋ́тствꙋющꙋ, не ча́стѣ похотѣва́емъ.
і҃. Нижѐ се́й ѻ҆́бразъ и҆ ле́сть та́тей си́хъ да ѹ҆таева́етсѧ тебѐ: совѣ̑тꙋютъ бо на́мъ ѿ мїрски́хъ не ѿлꙋча́тисѧ, мно́гꙋ мздꙋ̀ на́мъ гл҃юще прїима́ти, а҆́ще зрѧ́ще же́нскїй по́лъ, себѐ ѹ҆держи́мъ: и҆́мже покарѧ́тисѧ не подоба́етъ, па́че же сопроти́вное твори́ти.
а҃і. Є҆гда́ бо ѿ сво́йственникѡвъ на́шихъ на лѣ̑то и҆лѝ лѣ́та ѿше́дше, ма́ло нѣ̑кое бл҃гоговѣ̑нїе, и҆лѝ ѹ҆миле́нїе, и҆лѝ воздержа́нїе себѣ̀ стѧ́жемъ: тогда̀ про́чее по́мысли сꙋ́етнїи пристꙋ́плше и҆тѝ на́мъ па́ки во своѐ ѻ҆те́чество побꙋжда́ютъ на созида́нїе мно́гихъ, гл҃етъ, и҆ ѻ҆́бразъ, и҆ по́льзꙋ, дѣѧ̑нїѧ на̑ша непра́вєднаѧ смотрѣ̑вшихъ. А҆́ще ли же и҆ сло́вомъ и҆ ма́лымъ ра́зꙋмомъ и҆зоби́лꙋемъ, тогда̀ про́чее ꙗ҆́кѡ спаси́телємъ дꙋ́шъ и҆ ѹ҆чи́телємъ на́мъ въ мі́ръ возврати́тисѧ совѣ̑тꙋютъ: да въ приста́нищи се́мъ сѡ́браннаѧ до́брѣ, въ пꙋчи́нѣ ѻ҆́нѣй ѕлѣ̀ расточа́тъ. Не женꙋ̀ ѻ҆́нꙋ, но са́маго лѡ́та подражава́ти потщи́мсѧ: дꙋша́ бо ѡ҆бра́щшисѧ ѿѻнꙋ́дꙋже и҆зы́де, ꙗ҆́кѡ со́ль ѡ҆бꙋѧ́етъ, и҆ недви́жима про́чее пребыва́етъ. Бѣ̑гай є҆гѵ́пта невозвра́тнѣ: сердца́ бо ѡ҆бра̑щшаѧсѧ та́мѡ, землѝ безстра́стїѧ і҆ерⷭ҇ли́ма не ѹ҆ви́дѣша. Возмо́жно є҆́сть въ нача́лѣхъ за младе́нчественность ѡ҆ста́влшымъ своѧ̑, и҆ соверше́ннѣ ѡ҆чищє́ннымъ бы́вшымъ къ тѣ̑мъ поле́знѣ возврати́тисѧ, не́гли ра́зꙋмомъ за є҆́же, по є҆́же спасти́сѧ, спастѝ нѣ̑кихъ. А҆́ще и҆ ѿ бг҃а мѡѷсе́й ѻ҆́нъ бг҃ови́децъ, на спасе́нїе є҆диноплеме́ннагѡ ро́да по́сланъ бы́въ, мнѡ́ги въ є҆гѵ́птѣ бѣды̑, ре́кше въ мі́рѣ помраче́нїѧ и҆мѣ̀.
в҃і. Добро̀ є҆́сть ѡ҆скорби́ти роди́тєль а҆ не гдⷭ҇а: занѐ се́й ѹ҆́бѡ, и҆ созда̀, и҆ спасѐ: ті́и же, мно́жицею и҆́хже возлюби́ша, погꙋби́ша, и҆ мꙋ́цѣ преда́ша.
г҃і. Стра́ненъ ѻ҆́нъ є҆́сть, и҆́же а҆́ки и҆ноѧзы́ченъ междꙋ̀ и҆ноѧзы́чными ꙗ҆зы́ки въ ра́зꙋмѣ сѣдѧ́й. Не ненави́дѧще мы̀ сво́йственникѡвъ свои́хъ, и҆лѝ мѣ̑стъ ѻ҆́нѣхъ, ѿхо́димъ: да не бꙋ́детъ: но приходѧ́щагѡ на́мъ ѿ ни́хъ вре́да и҆збѣга́юще. Ꙗ҆коже во всѣ̑хъ, (та́кѡ) и҆ въ си́хъ бл҃ги́хъ быва́етъ на́мъ хрⷭ҇то́съ ѹ҆чт҃ль: ꙗ҆влѧ́етсѧ бо и҆ то́й роди́телей по пло́ти мно́жицею ѡ҆ста́вивъ: и҆ ѿ нѣ̑кихъ слы́ша, мт҃и твоѧ̀ и҆ бра́тїѧ твоѧ̑ и҆́щꙋтъ тебѐ (ма́рка г҃, л҃в): скорѣ̑е до́брый на́шъ гдⷭ҇ь и҆ ѹ҆чт҃ль безстра́стнꙋ не́нависть показа̀ ре́къ: мт҃и моѧ̀ и҆ бра́тїѧ моѧ̑ сꙋ́ть творѧ́щїи во́лю ѻ҆ц҃а̀ моегѡ̀ и҆́же є҆́сть на нб҃сѣ̑хъ (матѳ. в҃і, м҃ѳ).
[Среда:]
д҃і. Да бꙋ́детъ ѻ҆те́цъ тво́й, и҆́же проти́вꙋ бре́мени грѣхѡ́въ спотрꙋди́тисѧ могі́й и҆ хотѧ́й: ма́ти же, ѹ҆миле́нїе, ѿмы́ти тѧ̀ ѿ скве́рны могꙋ́щее: бра́тъ же, и҆́же къ тече́нїю вы́шнемꙋ сотрꙋдѧ́йсѧ и҆ срѣтѧ́йсѧ: стѧжѝ сожи́телницꙋ неѿто́ржнꙋ па́мѧть сме́рти. Ча̑да же твоѧ̑ возлю́блєнна да бꙋ́дꙋтъ воздыха̑нїѧ сердє́чна. Раба̀ стѧжѝ тѣ̑ло твоѐ. Дрꙋ́ги же, ст҃ы̑ѧ си̑лы: ꙗ҆̀же во вре́мѧ и҆схо́да спо́лзовати тѧ̀ мо́гꙋтъ, а҆́ще дрꙋ́зи твоѝ быва́ютъ: се́й ро́дъ и҆́щꙋщихъ гдⷭ҇а (ѱал. к҃г, ѕ҃).
є҃і. Любы̀ бж҃їѧ, ѹ҆гасѝ любо́вь роди́тєль: глаго́лѧй же ѻ҆боѧ̑ и҆мѣ̑ти, прелсти́лъ є҆́сть себѐ, слы́ша гл҃ющагѡ: никто́же мо́жетъ двѣма̀ господи́нома рабо́тати (матѳ. ѕ҃, к҃д), и҆ прѡ́чаѧ. Не прїидо́хъ, гл҃етъ гдⷭ҇ь, ми́ръ воврещѝ на зе́млю (роди́телей къ сынѡ́мъ и҆ бра́тїи порабо́тати мѝ произволѧ́ющымъ) но ра́ть и҆ ме́чь, разлꙋчи́ти бг҃олюби́выхъ, ѿ мїролюби́выхъ: веще́ственныхъ, ѿ невеще́ственныхъ: сластолюби́выхъ ѿ смиренномꙋ́дрыхъ: весели́тсѧ бо гдⷭ҇ь ѡ҆ раздвое́нїи и҆ разлꙋче́нїи, любвѐ ра́ди ꙗ҆́же къ немꙋ̀ быва́ющемъ.
ѕ҃і. Блюди́сѧ блюди́сѧ, да не ка́кѡ вода́ми всѣ́мъ тебѣ̀ и҆спо́лнєнымъ бы́вшымъ, ꙗ҆ви́шисѧ за пристра́стїе сво́йственникѡвъ тобо́ю возлю́бленныхъ, и҆ съ пото́помъ любопрѣ́нїѧ соѿи́деши. (Да) не ѹ҆ще́дриши роди́телныхъ и҆лѝ дрꙋ́жнихъ сле́зъ: а҆́ще ли же нѝ, то̀ вѣ̑чнѣ и҆́маши слези́ти. Внегда́ тѧ ѡ҆бы́дꙋтъ ꙗ҆́коже пче́лы, па́че же ѻ҆́сы, пла́чь сво́йственнїи творѧ́ще ѡ҆ тебѣ̀, то̀ вско́рѣ на сме́рть, и҆ дѣѧ̑нїѧ, ѻ҆́комъ дꙋше́внымъ непрело́жнѣ воззрѝ, да болѣ̑знь болѣ̑знїю возмо́жеши ѿрази́ти. Ѡ҆бѣщава́ютсѧ ле́стнѣ на́мъ на́ши ті́и, и҆ не на́ши, всѧ̑ люби̑маѧ содѣѧва́ти: ра́зꙋмъ же є҆́сть си̑мъ, добрѣ̑йшемꙋ семꙋ̀ на́шемꙋ возбрани́ти тече́нїю, та́же си́це про́чее къ ра́зꙋмꙋ своемꙋ̀ на́съ привлещѝ.
з҃і. Ѿхожде́нїе ѿ мѣ̑стъ на́шихъ да бꙋ́детъ, на неꙋтѣ́шншаѧ, и҆ нетщесла̑вншаѧ, и҆ смирє́ншаѧ мѣ́ста: а҆́ще ли же нѝ, то̀ со стра́стїю пари́мъ.
и҃і. Ѹ҆таѧва́й бл҃горо́дїе, и҆ благосла́вїѧ позо́рнѣ не и҆з̾ѧвлѧ́й, да не ка́кѡ ѡ҆брѧ́щешисѧ, и҆́нъ ѹ҆́бѡ ѹ҆сты̀, и҆́нъ же вещмѝ пребыва́ѧ.
ѳ҃і. Никто́же толи́кѡ стра́нничествꙋ предадѐ себѐ, ꙗ҆́коже вели́кїй ѻ҆́нъ слы́шавый: и҆зы́ди ѿ землѝ твоеѧ̀, и҆ ѿ сро́дства твоегѡ̀, и҆ ѿ до́мꙋ ѻ҆тца̀ твоегѡ̀: а҆́ще и҆ во и҆ноѧзы́чнꙋ и҆ варварова́тꙋ зе́млю призыва́емь.
к҃. Ѻ҆вогда̀ по вели́комꙋ семꙋ̀ нѣ̑коего ѹ҆страни́вшагосѧ, наипа́че гдⷭ҇ь просла́вилъ є҆́сть: ѻ҆ба́че а҆́ще и҆ сла́ва бг҃ода́нна є҆́сть, добро̀ є҆́сть тꙋ̀ щи́томъ смире́нїѧ ѿвраща́ти.
к҃а. Внегда̀ бѣ̑сове ꙗ҆́кѡ за ве́лїе и҆справле́нїе за стра́нничество сїѐ хва́лѧтъ на́съ, и҆лѝ и҆ человѣ̑цы, тогда̀ и҆ мы̀ ѡ҆ на́съ ра́ди съ нб҃сѐ на зе́млю стра́нствовавшемъ воспрїи́мемъ помышле́нїе, и҆ ѡ҆брѧ́щемъ себѐ во вѣ̑къ вѣ̑ка и҆сполнѧ́ти не могꙋ́щихъ.
к҃в. Лю́то є҆́сть сїѐ къ нѣ̑коемꙋ и҆з̾ свои́хъ и҆лѝ и҆ стра́нныхъ пристра́стїе, могꙋ́щее пома́лꙋ къ мі́рꙋ на́съ привлещѝ, и҆ ѻ҆́гнь ѹ҆миле́нїѧ на́шегѡ соверше́ннѣ и҆зстꙋди́ти. Ꙗ҆коже невозмо́жно є҆́сть є҆ди́нѣмъ ѹ҆́бѡ ѻ҆́комъ на нб҃о: дрꙋги́мъ же на зе́млю зрѣ̑ти: та́кѡ невозмо́жно є҆́сть соверше́ннѣ всѣ̑хъ сво́йственникѡвъ и҆ несво́йствєнникъ, по́мысломъ и҆ тѣ̑ломъ не ѹ҆страни́вшемꙋсѧ, не возбѣ̑дствовати дꙋше́ю.
к҃г. Трꙋдо́мъ мно́гимъ и҆ по́двигомъ и҆справлѧ́емь быва́етъ въ на́съ ѻ҆бы́чай бл҃гъ и҆ бл҃гоꙋстро́енъ, и҆ мно́гимъ по́двигомъ и҆справлѧ́емомꙋ мо́щно є҆́сть во є҆ди́номъ мгнове́нїи поги́бнꙋти: тлѧ́тъ бо ѻ҆бы́чаи бла́ги бесѣ́ды ѕлы̑ (а҃ кор. є҃і, л҃г), и҆ мїрскі̑ѧ, и҆ нелѣ̑пѡтны. И҆́же съ сꙋ́щими въ мі́рѣ по ѿрече́нїи се́мъ спребыва́ѧй, и҆лѝ близ̾ сы́й: всѧ́кѡ и҆лѝ въ сѣла̀ и҆́хъ впаде́тъ, и҆лѝ се́рдце помышле́нїемъ ѡ҆ си́хъ ѡ҆скверни́тъ, и҆лѝ не ѡ҆сквернѧ́ѧсѧ, ѡ҆сквернѧ́ющыѧсѧ ѡ҆сꙋжда́ѧ, и҆ са́мъ съ ни́ми ѡ҆скверни́тсѧ.
Ѡ҆ со́нїихъ послѣ̑дствꙋющихъ вводи̑мымъ.
к҃д. Ꙗ҆кѡ ѹ҆́бѡ ра́зꙋма на́шегѡ ѹ҆́мъ несоверше́нъ є҆́сть ве́сь, и҆ всѧ́кагѡ невѣ̑жества и҆спо́лненъ, и҆ таи́ти нѣ̑сть мо́щно: занѐ горта́нь ѹ҆́бѡ, бра̑шна разсꙋжда́етъ: слꙋ́хъ же, разꙋмѣ́нїѧ разꙋмѣва́етъ: занѐ не́мощь ѹ҆́бѡ ѻ҆че́съ, и҆з̾ѧви́ло є҆́сть со́лнце: неразꙋ́мїе же дꙋшѝ, и҆з̾ѧви́ша глагѡ́ли. Ѻ҆ба́че зако́нъ любвѐ и҆ на ꙗ҆̀же па́че си́лы понꙋди́тель є҆́сть. Тѣ̑мже мню̀, ниже́ бо ѹ҆ставлѧ́ю: послѣ̑дованно є҆́сть по стра́нничества словесѣ̑хъ: па́че же въ тѣ̑хъ, ма̑ла ѡ҆ со́нїихъ вчини́ти, є҆ли́кѡ нижѐ ѡ҆ се́й ле́сти лестцѡ́въ си́хъ ненаꙋчє́нымъ бы́ти на́мъ.
к҃є. Со́нїе є҆́сть, ѹ҆ма̀ движе́нїе въ недви́жности тѣ̑ла. Мечта́нїе є҆́сть, пре́лесть ѻ҆́чїю въ спѧ́щемъ ѹ҆мѣ̀. Мечта́нїе є҆́сть, и҆зстꙋпле́нїе ѹ҆ма̀ бдѧ́щꙋ тѣ̑лꙋ. Мечта́нїе є҆́сть, безсꙋще́ственно видѣ̑нїе.
к҃ѕ. Вина̀ та̀ є҆ѧ́же ра́ди по предвари́вшемъ чи́нѣ ѡ҆ со́нїихъ гл҃ати восхотѣ̑хомъ ꙗ҆́вственна є҆́сть. Є҆гда̀ ѡ҆ста́влше гдⷭ҇а ра́ди до́мы своѧ̑, и҆ сво́йственники, стра́нни-чествꙋ любвѐ ра́ди бж҃їѧ себѐ прода́мы, тогда̀ про́чее бѣ̑сове со́нїи возмꙋща́ти покꙋша́ютсѧ на́съ, сво́йственникѡвъ на́шихъ показꙋ́юще на́мъ: и҆лѝ рыда́ющихъ, и҆лѝ ѹ҆мира́ющихъ, и҆лѝ за ны̀ держи́мыхъ, и҆ напаствꙋ́емыхъ. Вѣ̑рꙋѧй ѹ҆̀бо со́нїѧмъ, подо́бенъ є҆́сть за сѣ̑нїю свое́ю текꙋ́щемꙋ, и҆ тꙋ̀ держа́ти покꙋша́ющемꙋсѧ.
к҃з. Бѣ̑си тщесла́вїѧ сꙋ́ть во снѣ̑хъ проро́цы, бꙋ̑дꙋщаѧ ꙗ҆́кѡ проны́рливи примѣча́юще, и҆ та̑ на́мъ предблаговѣствꙋ́юще: видѣ̑нїемъ ѻ҆́нѣмъ сбы́вшымсѧ, мы̀ ѹ҆жасо́хомсѧ, и҆ ꙗ҆́коже бли́зъ пред̾ꙋвѣ̑дѣтелнагѡ про́чее сꙋ́ще дарова́нїѧ, по́мыслъ возвы́сихомъ. Въ покарѧ́ющихсѧ бѣ̑сови семꙋ̀, мно́жицею проро́къ бы́сть: во ѹ҆ничижа́ющихъ же того̀, при́снѡ солга̀. Дꙋ́хъ сы́й, ꙗ҆́же внꙋ́трь воздꙋ́ха сегѡ̀ ви́дѣлъ є҆́сть, и҆ ѹ҆разꙋмѣ̑въ нѣ̑коего ѹ҆мира́юща, чрез̾ со́нїе въ ле́гшихъ проречѐ. Ничто́же ѿ бꙋ́дꙋщихъ ѿ пред̾ꙋвѣ̑дѣнїѧ вѣ̑дѧтъ: поне́же чародѣ̑и на́мъ и҆ сме́рть предглаго́лати моглѝ бы́ша.
к҃и. Во а҆́гг҃ла свѣ̑та, и҆ мч҃єникъ ви́дъ мно́жицею преѡбразꙋ́ютсѧ, и҆ на́съ приходѧ́щихъ къ ни́мъ во снѣ̑хъ показа́ша: возбнꙋ́вшихъ же, ра́достїю и҆ возноше́нїемъ погрꙋзи́ша. Сїе́ же тѝ бꙋ́детъ зна́менїе пре́лести. Мꙋ̑ки и҆ сꙋды̀, и҆ разлꙋчє́нїѧ показꙋ́ютъ а҆́гг҃ли: возбнꙋ́вшихъ тре́петныхъ и҆ сѣ̑тꙋющихъ содѣ̑ловаютъ. Внегда̀ во снѣ̑хъ бѣсовѡ́мъ покарѧ́тисѧ на́чнемъ, тогда̀ про́чее и҆ бдѧ́щымъ рꙋга́ютсѧ. И҆́же со́нїѧмъ вѣ̑рꙋ є҆́мый, во все́мъ неискꙋ́сенъ є҆́сть: невѣ̑рꙋѧй же всѣ́мъ, се́й фїлосо́фъ є҆́сть. Всѣ́мъ тебѣ̀ мꙋ́кꙋ и҆ сꙋ́дъ бл҃говѣствꙋ́ющымъ вѣ̑рꙋй є҆ди̑нѣмъ: а҆́ще ли же ѿча́ѧнїе тебѣ̀ стꙋжа́етъ, то̀ и҆ сїѧ̑ ѿ бѣсѡ́въ сꙋ́ть.
Тре́тїе сїѐ трⷪ҇цы равночи́сленно є҆́сть тече́нїе: возстꙋпи́вый да не ѡ҆бозри́тъ на де́сно, и҆лѝ на лѣ̑во.