СЛО́ВО I҃. Ѡ҆ клеветѣ̀.
Никто́же и҆з̾ бл҃гомꙋ́дрствꙋющихъ сопротиворече́тъ, непщꙋ́ю, не ѿ не́нависти и҆ памѧтоѕло́бїѧ клеветѣ̀ ражда́тисѧ: тѣ̑мже по прароди́телѣхъ є҆ѧ̀ ꙗ҆́кѡ во плени́цѣ и҆ ѹ҆чини́сѧ.
в҃. Клевета̀ є҆́сть ѿро́дъ не́нависти: то́нокъ недꙋ́гъ: дебе́ла сокрове́на и҆ таѧ́щасѧ пїѧ́вица, любвѐ и҆ждива́ющи и҆ и҆стреблѧ́ющи кро́вь. Любвѐ лицемѣ̑рїе. се́рдцꙋ скве́рны и҆ тѧ́готы вино́вна. и҆стребле́нїе чистоты̀.
г҃. Ꙗ҆коже сꙋ́ть ѻ҆трокови̑цы безсты́днѡ ѕла̑ѧ дѣ̑юще: и҆ сꙋ́ть и҆́ны ѻ҆́тай и҆ стыдѣ̑ннѣе лю̑тша пе́рвшихъ сотворѧ́юще: та́кѡ и҆ во страсте́хъ безче́стїѧ мо́щно є҆́сть ѹ҆ви́дѣти: мнѡ́гшїѧ ѻ҆́ны тайнолꙋка̑вы ѻ҆трокѡви́цы сꙋ́ть: лицемѣ̑рїе, лꙋка́вство, печа́ль, памѧтоѕло́бїе, клевета̀ серде́чна: и҆́на ѹ҆́бѡ мнѣ̑нїемъ предлага́юще, на и҆́на же взира́юще.
д҃. Ѹ҆слы́шахъ клеве́щꙋщихъ и҆ воспрети́хъ, и҆ сїѐ къ словоизвине́нїю дѣ̑лателїе ѕла̀ сегѡ̀ ѿвѣща́ша: ꙗ҆́кѡ ѿ любвѐ и҆ попече́нїѧ ѡ҆клевета́емагѡ сїѧ̑ творѧ́тъ. А҆́зъ же къ ни̑мъ, преста́ните, рѣ̑хъ, ѿ таковы́ѧ любвѐ: да нело́жнѣ возгл҃етъ рекі́й: ѡ҆клевета́ющаго та́й и҆́скреннѧго своего̀, сего̀ и҆згонѧ́хъ. А҆́ще глаго́леши люби́ти, то̀ моли́сѧ ѻ҆́тай, и҆ не ѡ҆смѣѧва́й мꙋ́жа: се́й бо ѻ҆́бразъ прїѧ́тенъ є҆́сть ѹ҆ бг҃а. Нижѐ сїѐ тебѣ̀ да ѹ҆таева́етсѧ, и҆ всѧ́кѡ трезви́тисѧ и҆́маши ѡ҆ є҆́же не ѡ҆сꙋжда́ти согрѣша́ющаго. І҆ꙋ́да въ ли́цѣ ѹ҆чн҃кѡ́въ бѣ̀, разбо́йникъ же въ ли́цѣ ѹ҆бі́йцєвъ: и҆ чꙋ́до ка́кѡ въ є҆ди́номъ мгнове́нїи возпремѣне́нїе бы́сть.
є҃. А҆́ще кто̀ клеветы̀ дꙋ́ха побѣди́ти хо́щетъ, то̀ не согрѣша́ющемꙋ, но под̾ꙋща́ющемꙋ бѣ̑сꙋ порече́нїе то̀ да написꙋ́етъ: никто́же бо хо́щетъ ко бг҃ꙋ согрѣши́ти, а҆́ще и҆ не понꙋжда́емь всѧ́къ и҆з̾ на́съ є҆́сть.
ѕ҃. Ви́дѣхъ ꙗ҆́вственнѣ согрѣши́вшаго и҆ ѻ҆́тай пока́ѧвшагосѧ: и҆ є҆го́же ѡ҆сꙋди́хъ ꙗ҆́кѡ блꙋдника̀, бѣ̀ про́чее ѹ҆ бг҃а цѣломꙋ́дръ: ѡ҆браще́нїемъ чи́стѣ того̀ ѹ҆ми́лостививъ.
з҃. Никогда́же да ѹ҆стыди́шисѧ клеве́щꙋщагѡ къ тебѣ̀ на бли́жнѧго: па́че же глаго́ли, преста́ни бра́те: а҆́зъ на всѧ́къ де́нь лю́тшими согрѣша́ю: и҆ ка́кѡ ѻ҆́наго ѡ҆сꙋжда́ти могꙋ̀; два́ бо сїѧ̑ приѡбрѧ́щеши: є҆ди́нѣмъ пла́стыремъ и҆ себѐ и҆ и҆́скреннѧго и҆сцѣли́въ. Є҆ди́нъ и҆ се́й и҆з̾ сокраще́нныхъ пꙋте́й ко ѿпꙋще́нїю согрѣше́нїй наставлѧ́ющихъ є҆́сть: гл҃ю же, є҆́же не сꙋди́ти: є҆лма̀, не сꙋди́те, и҆ не сꙋ́дѧтъ ва́мъ.
и҃. Чꙋ́ждь є҆́сть ѻ҆́гнь, воды̀: ꙗ҆́коже (и҆) є҆́же сꙋди́ти, ка́ѧтисѧ хотѧ́щемꙋ. А҆́ще и҆ въ са́момъ то́мъ и҆схо́дѣ ѹ҆́зриши кого̀ согрѣша́юща, нижѐ тогда̀ того̀ ѡ҆сꙋжда́й: безвѣ̑стенъ бо человѣ̑кѡмъ сꙋ́дъ бж҃їй є҆́сть. Согрѣши́ша нѣ̑цыи вєли́ка ꙗ҆́вственнѣ, содѣ̑лаша же бла̑га бѡ́лша та́йнѣ: и҆ прелсти́шасѧ любонасмѣѧ́телїе, ды́мъ вмѣ̑стѡ со́лнца содержа́ще.
ѳ҃. Ѹ҆слы́шите менѐ, ѹ҆слы́шите ѕлі́и чꙋжди́хъ словоистѧза́телїе: а҆́ще и҆́стинно є҆́сть, ꙗ҆́коже и҆ є҆́сть и҆́стинно, ꙗ҆́кѡ и҆́мже сꙋдо́мъ сꙋ́дите, сꙋ́дѧтъ ва́мъ: то̀ всѧ́ко ѡ҆ кото́рыхъ либо порече́мъ бли́жнѧго, въ та̑ впаде́мъ, и҆лѝ въ тѣлє́сна, и҆лѝ въ дꙋшє́вна: и҆ и҆́накѡ нѣ̑сть.
і҃. Ско́рїи и҆ прилѣ̑жнїи словоистѧза́телїе бли́жнѧгѡ прегрѣше́нїй сꙋ́щїи, се́ю стра́стїю стра́ждꙋтъ: поне́же не ѹ҆̀ ѡ҆ свои́хъ согрѣше́нїихъ соверше́ннꙋ и҆ непари́телнꙋ па́мѧть и҆ попече́нїе сотвори́ша: занѐ а҆́ще бы кто̀ своѧ̑ ѕла̑ѧ дале́че ѿ покрыва́ла самолю́бїѧ ѻ҆па́снѣ ѹ҆ви́дѣлъ, то̀ ни ѡ҆ чесо́мже про́чее и҆но́мъ и҆з̾ тѣ̑хъ ꙗ҆̀же въ житїѝ се́мъ попече́нїе сотвори́лъ бы: помышлѧ́ѧ, нижѐ къ пла́чꙋ своемꙋ̀ довлѣ̑ти є҆мꙋ̀ своемꙋ̀ є҆гѡ̀ вре́мени, а҆́ще бы и҆ сто̀ лѣ̑тъ пожи́лъ, а҆́ще бы и҆ ве́сь і҆ѻрда́нъ, рѣ̑кꙋ сле́зъ и҆з̾ ѻ҆́чїю своє́ю ѹ҆ви́дѣлъ и҆сходѧ́щꙋ. Назна́менахъ пла́чь, и҆ не ѡ҆брѣто́хъ въ не́мъ слѣда̀ клеветы̀ и҆лѝ ѡ҆сꙋжде́нїѧ.
а҃і. И҆лѝ согрѣши́ти на́съ бѣ̑сове побꙋжда́ютъ: и҆лѝ не согрѣши́вшихъ, согрѣша́ющихъ сꙋди́ти: да вторы́мъ пе́рвое ѡ҆сквернѧ́ютъ ѹ҆бі̑йцы сі́и.
в҃і. Вѣ̑ждь и҆ сїѐ памѧтоѕло́бныхъ и҆ зави́дливыхъ бы́ти зна́менїе: є҆гда̀ ѹ҆чє́нїѧ, и҆лѝ дѣла̀, и҆лѝ и҆справлє́нїѧ бли́жнѧгѡ, сла́дцѣ и҆ ѹ҆до́бнѣ порица́ютъ, дꙋ́хомъ не́нависти погрꙋжа́еми.
г҃і. Ви́дѣхъ нѣ̑кихъ ѻ҆́тай и҆ неѡб̾ѧвлѧ́емѡ вселю̑та содѣва́ющихъ согрѣшє́нїѧ, и҆ мнѣ̑нїемъ своеѧ̀ и҆́хъ чистоты̀, лю́тѣ напа́дающихъ на лє́гка (нѣ́каѧ) согрѣша́ющихъ и҆ ѡ҆б̾ѧвлѧ́емыхъ.
д҃і. Сꙋди́ти, є҆́сть са́на бж҃їѧ безстꙋ́дно восхище́нїе: ѡ҆сꙋди́ти же, дꙋшѝ своеѧ̀ є҆́сть поги́бель.
є҃і. Ꙗ҆коже возноше́нїе и҆ без̾ и҆ны́ѧ стра́сти погꙋби́ти человѣ̑ка мо́жетъ: та́кѡ и҆ є҆́же сꙋди́ти са́мо ѡ҆ себѣ̀ и҆ є҆ди́но въ на́съ сꙋ́що, соверше́ннѣ погꙋби́ти на́съ мо́жетъ: є҆лма̀ фарїсе́й ѻ҆́нъ за сїѐ ѡ҆сꙋжде́нъ бы́сть.
ѕ҃і. Ꙗ҆коже ꙗ҆годособира́тель зрѣ́лы ꙗ҆́гѡды ꙗ҆ды́й, ничто́же ѡ҆ ки́слыхъ гро́здїй ꙗ҆́годахъ радѣ̑ти и҆́мать: и҆ бл҃горазꙋ́мный и҆ смы́сленный ѹ҆́мъ, є҆ли̑ки ѹ҆́бѡ въ нѣ̑кихъ добродѣ̑тєли ѹ҆́зритъ, сїѧ̑ то́щнѡ назна́менꙋетъ: безꙋ́мный же, поречє́нїѧ и҆ недоста́тки и҆спы́товати и҆́мать, ѡ҆ не́мже и҆ рече́сѧ: и҆спыта́ша беззако́нїе, и҆зчезо́ша и҆спыта́ющїи и҆спыта̑нїѧ.
з҃і. Нижѐ ѻ҆чи́ма твои́ма зрѧ̀, ѡ҆сꙋжда́й: мно́жицею бо и҆ ті́и прелсти́стѣсѧ.
Восхожде́нїе десѧ́тое є҆́сть, є҆́же побѣди́вый, любвѐ дѣ̑латель, и҆лѝ пла́ча є҆́сть.