Слово 13. О унынии

Сохранить из браузера

ГотовоДата последнего обновления: 02.01.2026

Слово 13. О унынии

СЛО́ВО Г҃I. Ѡ҆ ѹ҆ны́нїи.

Е҆ди́ница и҆ сїѧ̀ мно́жицею и҆з̾ многосло́вїѧ вѣ̑твїй, ꙗ҆́коже ѹ҆жѐ предвари́вше и҆ рѣ̑хомъ є҆́сть, и҆ пе́рвое и҆сча́дїе, гл҃ю же, сїѐ ѹ҆ны́нїѧ: тѣ̑мже и҆ прили́чествꙋющъ є҆мꙋ̀ чи́нъ въ лꙋка́вѣй се́й вери́зѣ ѡ҆предѣли́хомъ.

в҃. Ѹ҆ны́нїе є҆́сть, разслабле́нїе дꙋшѝ, и҆ ѹ҆ма̀ ѡ҆слабле́нїе, пренеможе́нїе по́двига, не́нависть ѡ҆бѣ̑та: мїрски́хъ блажи́тель, бг҃а ѡ҆болгава́тель, ꙗ҆́кѡ немилосе́рдна и҆ не чл҃вѣколюби́ва: и҆знемога́нїе ѡ҆ ѱалмопѣ̑нїи, въ мл҃и́твѣ немоществꙋ́ющо, въ слꙋ́жбѣ желѣ̑зно, въ рꙋкодѣ̑лїи безлѣ̑ностно, въ послꙋша́нїи неискꙋ́сно.

г҃. Мꙋ́жъ послꙋшли́въ, ѹ҆ны́нїѧ непозна́тель: чꙋ́вственными мы́слєннаѧ и҆спра́вивъ.

д҃. Ѻ҆бщежи́тїе є҆́сть, ѹ҆ны́нїю противобори́телно: мꙋ́жꙋ же безмо́лвникꙋ, сꙋпрꙋ́гъ вѣ̑ченъ, пре́жде сме́рти ѿ негѡ̀ не ѿстꙋпи́тъ: и҆ пре́жде кончи́ны є҆гѡ̀, на всѧ́къ де́нь боро́ти и҆́мать. Ке́ллїю ѿше́лничꙋ ѹ҆ви́дѣвшо ѡ҆скла́бисѧ, и҆ прибли́жившосѧ къ немꙋ̀ бли́зъ всели́сѧ.

є҃. Вра́чь недꙋ́гꙋющихъ и҆з̾ ѹ҆тра̀ посѣща́етъ: и҆ ѹ҆ны́нїе, подвиза́ющихсѧ, ѡ҆ полꙋ́дне.

ѕ҃. Страннопрїи́мства, ѹ҆ны́нїе є҆́сть под̾ꙋще́нїе: и҆ ми̑лостыни чрезъ рꙋкодѣ́лїѧ ѹ҆вѣщава́етъ дѣ̑лати. Посѣща́ти болѧ́щихъ, побꙋжда́етъ ѹ҆се́рднѡ, воспомина́ющо гл҃ющаго: бо́ленъ бѣ̑хъ, и҆ прїидо́сте ко мнѣ̀. Къ скорбѧ́щымъ и҆ малодꙋ̑шнымъ ѹ҆вѣщава́етъ приходи́ти: и҆ ѹ҆тѣша́ти малодꙋ̑шныѧ малодꙋ́шное под̾ꙋща́ющо.

з҃. На мл҃и́твѣ ста́вшымъ, нꙋ̑ждна дѣла̀ воспомина́етъ, и҆ всѧ́ко ѹ҆хищре́нїе твори́тъ ѿѻнꙋ́дꙋ на́съ (а҆́ки) ѡ҆бро́тїю бл҃госло́вною ѿвлещѝ везслове́сное.

и҃. Трича́сенъ тре́петъ и҆ главоболѣ̑нїе, ѻ҆гневи́цꙋ же и҆ чревоболѣ̑нїе, ѹ҆ны́нїѧ бѣ̑съ сотворѝ. Девѧ́томꙋ дости́гшꙋ, ма́лѡ возни́кне: трапе́зѣ же положе́нѣй бы́вшей, съ посте́ли сскочи́лъ є҆́сть: и҆ мл҃и́твѣ дости́гшей, па́ки тѣ̑ло ѹ҆тѧгча̀. На мл҃и́твѣ ста́вшихъ, сно́мъ погрꙋзи́ло є҆́сть: и҆ прозїѧва́нми безвре́менными, и҆з̾ ѹ҆́стъ сті́хъ восхи́тило є҆́сть.

ѳ҃. Прѡ́чїѧ ѹ҆́бѡ стра̑сти є҆ди́ною нѣ̑коею добродѣ̑телїю ка́ѧждо и҆з̾ ни́хъ ѹ҆празднѧ́ютсѧ: ѹ҆ны́нїе же и҆́нокꙋ, ѡ҆бдержи́телна є҆́сть сме́рть.

і҃. Мꙋ́жественна дꙋша̀, ѹ҆ма̀ ѹ҆ме́рша воскреси́ла є҆́сть: ѹ҆ны́нїе же и҆ лѣ̑ность, всѐ бога́тство расточѝ. Є҆ди́номꙋ и҆ семꙋ̀, и҆ всѣ̑хъ тѧжча́йшꙋ и҆з̾ ѻ҆сми́хъ ѕло́бы предстоѧ́тєль сꙋ́щꙋ, по ѻ҆́нѣхъ послѣ̑дованїю и҆ на се́мъ сотвори́мъ: ѻ҆ба́че и҆ ѻ҆́но прило́жимъ.

а҃і. Ѱалмопѣ̑нїю не присꙋ́тствꙋющꙋ, ѹ҆ны́нїе не ꙗ҆влѧ́етсѧ: и҆ пра́вилꙋ сконча́вшꙋсѧ, ѻ҆́чи ѿверзо́стѣсѧ.

в҃і. Во вре́мѧ ѹ҆ны́нїѧ, нꙋ̑ждницы ꙗ҆влѧ́ютсѧ: ничто́же бо (та́кѡ) вѣнцѡ́въ вино́вно быва́етъ мона́хꙋ, ꙗ҆́коже ѹ҆ны́нїе.

г҃і. Насмотрѝ и҆ ѡ҆брѧ́щеши (то̀) на стоѧ́нїи ножнѣ̑мъ борю́що: и҆ на сѣда́лищи воскланѧ́ти повинꙋ́етъ на стѣ̑нꙋ: и҆з̾ ке́ллїи приница́ти побꙋжда́етъ, стꙋ́ки и҆ то́поты ножны̑ѧ творѧ́що. Пла́чай себѐ, ѹ҆ны́нїѧ не вѣ̑сть.

д҃і. Да свѧ́жетсѧ и҆ се́й мꙋчи́тель ѿ па́мѧти согрѣше́нїй, и҆ да бїе́тсѧ ѿ рꙋкодѣ̑лїѧ: влеко́мъ же ѿ помышле́нїѧ бꙋ́дꙋщихъ бла̑гъ: и҆ предста́въ ѡ҆ подоба́ющихъ да вопроша́етсѧ.

є҃і. Глаго́ли про́чее ты̀, ѽ разсла́бленне и҆ ѡ҆сла́бленне, кто̀ є҆́сть роди́вый тѧ̀ ѕлѣ̀; Ка̑ѧ сꙋ́ть и҆сча̑дїѧ твоѧ̑; Кі́и же сꙋ́ть ра́тꙋющїи тебѐ; и҆ кто̀ є҆́сть ѹ҆бі́йца тво́й; Ѻ҆́нъ же глаго́летъ, въ вои́стиннꙋ ѹ҆́бѡ послꙋ́шницѣхъ, не и҆́мамъ а҆́зъ гдѣ̀ главꙋ̀ подклони́ти: а҆ въ ни́хже и҆́мамъ, то̀ въ безмо́лвїи спребыва́ю съ ни́ми. Призыва́тєлницы же моѝ, мнѡ́жайши сꙋ́ть: ѻ҆вогда̀ ѹ҆́бѡ нечꙋ́вство дꙋшѝ, ѻ҆вогда́ же непомина́нїе вы́шнихъ: ѻ҆вогда́ же и҆ превосхожде́нїе трꙋдѡ́въ. И҆сча̑дїѧ моѧ̑ сꙋ́ть, прехождє́нїѧ мѣ̑стъ со мно́ю быва́єма: преслꙋша́нїе ѻ҆тца̀: непомина́нїе сꙋда̀: ѻ҆вогда́ же и҆ ѡ҆ставле́нїе ѡ҆бѣ̑та. Сопє́рницы же моѝ, ѿ ни́хже свѧ́занъ є҆́смь ны́нѣ, ѱалмопѣ̑нїе съ рꙋкодѣ̑лїемъ: вра́гъ мо́й є҆́сть сме́рти помышле́нїе: ѹ҆мерщвлѧ́ющаѧ же менѐ є҆́сть мл҃и́тва съ наде́ждею и҆звѣ̑стною до́брыхъ. Кто́ же є҆́сть роди́вый мл҃и́твꙋ, тꙋ̀ вопроси́те.

Третїѧна́десѧть є҆́сть побѣ̑да, ю҆́же вои́стиннꙋ стѧжа́вый, во все́мъ и҆скꙋ́сенъ є҆́сть до́брѣ.