Предисло́вїе є҆́же ѡ҆ тѣлесѣ̑хъ, и҆ безтѣле́сныхъ человѣ̑цѣхъ сло́ва.

Слы́шахомъ неи́стово чревоѡб̾ѧде́нїе ны́нѣ ре́кшо тогѡ̀ бы́ти и҆сча́дїе ю҆́же къ тѣлесє́мъ бра́нь, и҆ не чꙋ́до: ѹ҆чи́тъ бо ѡ҆ се́мъ и҆ дре́внїй на́шъ ѻ҆́нъ пра́ѻтецъ а҆да́мъ: занѐ а҆́ще бы чре́вомъ побѣжде́нъ не бы́лъ, то̀ не бы̀ сꙋпрꙋ́жницꙋ что̀ бѣ̀ познава́лъ. Тѣ̑мже пе́рвꙋю за́повѣдь блюдꙋ́щїи, вторы́мъ престꙋпле́нїемъ не па́даютъ: но пребыва́ютъ сы́ни а҆да́мови, не зна́юще что̀ бѣ̀ а҆да́мъ: но ма́лымъ чи́мъ ѹ҆ма́лени ѿ а҆́гг҃лъ: и҆ сїѐ, да не безсме́ртно пребꙋ́детъ ѕло́е, ꙗ҆́коже гл҃етъ бг҃осло́вїѧ тезоимени́тый.

СЛО́ВО Е҃I. Ѡ҆ нетлѣ̑ннѣй въ тлѣ̑нныхъ ѿ трꙋдѡ́въ и҆ по́тѡвъ чистотѣ̀ и҆ цѣломꙋ́дрїи.

Чистота̀ є҆́сть, безтѣле́сна є҆стества̀ ѹ҆свое́нїе. Чистота̀ є҆́сть, до́мъ хрⷭ҇то́въ вожделѣ̑ненъ, и҆ нб҃о се́рдца назе́мно.

в҃. Чистота̀ є҆́сть, є҆стества̀ па́че є҆стества̀ преесте́ственно ѿрече́нїе: и҆ съ безтѣле́сными тѣ̑ла ме́ртвенна и҆ тлѣ̑нна пресла́вно вои́стиннꙋ ретѣ̑нїе.

г҃. Чи́стъ є҆́сть, и҆́же раче́нїемъ раче́нїе ѿрази́вый, и҆ ѻ҆́гнь ѻ҆гне́мъ невеще́ственнымъ ѹ҆гаси́вый.

д҃. Цѣломꙋ́дрїе є҆́сть, собо́рное всѣ̑хъ добродѣ̑телей наименова́нїе.

є҃. Цѣломꙋ́дрїе є҆́сть, чистота̀ дꙋши́ же и҆ тѣ̑ла.

ѕ҃. Цѣломꙋ́дръ є҆́сть, и҆́же (и҆) въ са́михъ тѣ̑хъ снѣ̑хъ, ниеди́нагѡ движе́нїѧ ѿ сꙋ́щагѡ въ себѣ̀ ѹ҆строе́нїѧ ѡ҆щꙋща́ѧй.

з҃. Цѣломꙋ́дръ є҆́сть, и҆́же соверше́нно нечꙋ́вствїе ѡ҆ разли́чїи тѣле́съ вы́нꙋ стѧжа́вый.

и҃. Сїѐ пра́вило и҆ предѣ̑лъ є҆́сть соверше́нныѧ и҆ всечи́стыѧ чистоты̀: є҆́же та́кожде ѡ҆ ѡ҆дꙋшевле́нныхъ же и҆ бездꙋ́шныхъ, слове́сныхъ же и҆ безслове́сныхъ зало́гъ и҆мѣ̑ти.

ѳ҃. Никто́же и҆з̾ чистотѣ̀ ѡ҆бꙋчи́вшихсѧ, себѣ̀ стѧжа́нїе тоѧ̀ да вмѣни́тъ: є҆стество́ бо сїѐ побѣди́ти, не ѿ возмо́жныхъ бы́ти є҆́сть: и҆дѣ̑же є҆стества̀ побѣжде́нїе бы́сть, та́мѡ превышеесте́ственнагѡ прише́ствїе позна́сѧ: без̾ всѧ́кагѡ бо прекосло́вїѧ ме́ншее ѿ бо́лшагѡ ѹ҆празднѧ́етсѧ.

і҃. Нача́ло ѹ҆́бѡ чистоты̀, несослага́ющсѧ по́мыслъ, и҆ безмечта̑нна вре́менми и҆стица̑нїѧ. Среда̀ чистоты̀, є҆сте́ствєнна движє́нїѧ мно́жества ра́ди бра́шенъ то́чїю, безмечта́ннѣ составлѧ́єма, и҆ ѿ и҆стица́нїѧ свобѡ́дна. Коне́цъ же, ѹ҆мерщвле́нїе тѣ̑ла, пред̾ꙋме́ршымъ помыслѡ́мъ.

а҃і. Бл҃же́нъ вои́стиннꙋ є҆́сть, и҆́же ѡ҆ всѧ́комъ тѣ̑лѣ, и҆ ша́рѣ, и҆ красотѣ̀, соверше́нно нечꙋ́вствїе стѧжа́лъ є҆́сть.

в҃і. Не и҆́же бре́нїе сїѐ нескве́рно сохрани́вый, то́й чи́стъ є҆́сть: но и҆́же ѹ҆́ды сегѡ̀ дꙋшѝ повинꙋ́вый соверше́ннѣ.

г҃і. Вели́къ ѹ҆́бѡ є҆́сть, и҆́же ѡ҆ ѡ҆сѧза́нїи пребыва́ѧй безстра́стенъ, бо́лїй же є҆́сть и҆́же ѿ видѣ̑нїѧ пребы́вый неꙋѧзвлѧ́емь, и҆ побѣди́вый видѣ̑нїе ѻ҆́гненно, добро́тою вы́шнихъ. И҆́же ѹ҆́бѡ мл҃и́твою пса̀ сего̀ ѿрѣва́ѧй, приꙋподо́билсѧ є҆́сть ра́тꙋющемꙋсѧ со льво́мъ: а҆ и҆́же сопротиворе́чїемъ сего̀ низвраща́ѧй, то̀ гонѧ́щемꙋ є҆щѐ врага̀ своего̀: а҆ и҆́же прило́гъ є҆гѡ̀ ѿню́дъ ѹ҆ничижи́вый, то̀ а҆́ще и҆ во пло́ти є҆́сть, но ѹ҆́бѡ и҆з̾ гро́ба воскре́се.

А҆́ще сїѐ и҆́стинны чистоты̀ зна́менїе є҆́сть, є҆́же без̾ движе́нїѧ бы́ти въ сꙋ́щихъ во снѣ̀ мечта́нїихъ: то̀ сїѐ всѧ́кѡ предѣ̑лъ є҆́сть блꙋда̀, є҆́же и҆стица̑нїѧ терпѣ̑ти бо́дрствꙋющꙋ помышлє́нїи.

д҃і. И҆́же ѹ҆́бѡ по́ты и҆ трꙋды̀ бра́нь творѧ́й съ сопе́рникомъ си́мъ, свѧза́вшемꙋ ѹ҆́жемъ врага̀ своего̀ подо́бенъ є҆́сть. А҆ и҆́же воздержа́нїемъ и҆ бдѣ̑нїемъ, то̀ ѹ҆́зами желѣ̑зными сего̀ ѡ҆бложи́вшемꙋ. А҆ и҆́же смиренномꙋ́дрїемъ и҆ безгнѣ̑вїемъ и҆ жа́ждою, то̀ ѹ҆би́вшемꙋ сꙋпоста́та, и҆ въ песцѣ̀ скры́вшемꙋ: песо́къ разꙋмѣ̑ти и҆́маши смире́нїе, не пита́етъ бо страсте́й па́жить, но є҆́сть землѧ̀ и҆ пе́пелъ.

є҃і. И҆́нъ є҆́сть и҆́же по́двигами, и҆ и҆́нъ, и҆́же смире́нїемъ: и҆ и҆́нъ и҆́же бж҃їимъ ѿкрове́нїемъ мꙋчи́телѧ сего̀ свѧ́зана и҆мѣ̑ѧй. (И҆) ѻ҆́въ ѹ҆́бѡ, денни́цѣ: ѻ҆́въ же, вели́цѣй лꙋнѣ̀: ѻ҆́въ же, свѣ̑тломꙋ со́лнцꙋ приꙋподо́бишасѧ: всѝ трѝ, на нб҃сѣ̑хъ жи́телство и҆́мꙋтъ: ѿ зарѝ ѹ҆́бѡ, свѣ̑тъ: ѿ свѣ̑та же, возсїѧ̀ со́лнце: ꙗ҆́коже и҆ ѡ҆ рече́нныхъ мо́щно є҆́сть ѹ҆разꙋмѣ̑ти и҆ ѡ҆брѣстѝ.

ѕ҃і. Притворѧ́етъ ѹ҆́бѡ ли́съ, со́нъ, бѣ̑съ же цѣломꙋ́дрїе: но ѻ҆́нъ ѹ҆́бѡ, да ко́кошъ прелсти́тъ: се́й же, да дꙋ́шꙋ погꙋби́тъ.

з҃і. Да не и҆́меши вѣ̑ры бре́нїю семꙋ̀ въ животѣ̀ твое́мъ: и҆ да не ѹ҆пова́еши на нѐ до́ндеже хрⷭ҇та̀ ѹ҆срѧ́щеши.

и҃і. Не дерза́й воздержа́нїѧ ра́ди не па́даѧ: ничто́же бо ꙗ҆ды́й нѣ̑кто съ нб҃сѐ све́рженъ бы́сть.

[Статия 2]

ѳ҃і. Ѿрече́нїе нѣ̑цыи разꙋмѣва́телни до́брѣ ѡ҆предѣли́ша, гл҃юще сїѐ бы́ти враждꙋ̀ на тѣ̑ло, и҆ ра́ть проти́вꙋ чре́вꙋ.

к҃. Въ новонача́лныхъ ѹ҆́бѡ, ѿ наслажде́нїѧ падє́нїѧ ꙗ҆́кѡ наивсе́мнѣйше ѡ҆быко́ша быва́ти тѣлє́снаѧ. Въ сре́днихъ же, ѿ высокомꙋ́дрїѧ, ѻ҆ба́че ꙗ҆́кѡ и҆ въ новонача́лныхъ. Въ приближа́ющихсѧ же къ соверше́нствꙋ, ѿ є҆́же ѡ҆сꙋжда́ти бли́жнѧго и҆ то́чїю.

к҃а. Нѣ̑цыи ѹ҆блажи́ша є҆стество́мъ скопцє́въ ро́ждшихсѧ, ꙗ҆́кѡ ѿ мꙋчи́телства тѣ̑ла сегѡ̀ и҆зба́вленыхъ: а҆́зъ же ѹ҆бл҃жи́хъ повседне́вныхъ скопцє́въ, и҆́же по́мысломъ ꙗ҆́кѡ ноже́мъ са́мѣхъ себѐ и҆зрѣ̑зовати ѡ҆быко́ша.

к҃в. Ви́дѣхъ нево́лею па́дшихъ, и҆ ви́дѣхъ во́лею па́дати хотѧ́щихъ ѹ҆́бѡ, не могꙋ́щихъ же, и҆ ѿ на всѧ́къ де́нь па́дающихъ, тѣ̑хъ па́че ѡ҆каѧ́хъ, ꙗ҆́кѡ и҆ не могꙋ́щымъ ѕлосмра́дїѧ сегѡ̀ жела́ти.

к҃г. Ѻ҆каѧ́ненъ є҆́сть па́даѧй: ѡ҆каѧ́ншъ же и҆́же и҆ и҆но́мꙋ сегѡ̀ вино́венъ быва́ѧй: зане́же двои́хъ паде́нїй и҆ сла́сти и҆но́гѡ то́й тѧготꙋ̀ (на себѐ) привлека́етъ.

к҃д. Не хощѝ словоѡправда̑нїи и҆ сопротивоглагѡ́ланїи низвраща́ти бѣ̑са блꙋда̀: зане́же ѻ҆́нъ ѹ҆дѡ́бны и҆звѣ̑ты и҆́мать, ꙗ҆́кѡ є҆сте́ственнѣ съ на́ми ра́тꙋющсѧ.

к҃є. И҆́же пло́ть свою̀ восхотѣ̑вый возра́товати, и҆лѝ побѣди́ти ѡ҆ себѣ̀, всꙋ́е тече́тъ: а҆́ще бо не гдⷭ҇ь разори́тъ до́мъ пло́тѧнъ, и҆ сози́ждетъ до́мъ дꙋше́венъ, то̀ всꙋ́е бдѣ̀ и҆ пости́лсѧ є҆́сть разорѧ́ѧй.

к҃ѕ. Предложѝ гдⷭ҇еви не́мощь є҆стества̀, позна́въ во все́мъ безси́лїе своѐ, и҆ прїи́меши дарова́нїе цѣломꙋ́дрїѧ неѡщꙋ́тнѣ.

к҃з. Є҆́сть въ сладостра́стныхъ ꙗ҆́коже мѝ нѣ̑кто ѿ ни́хъ во и҆скꙋ́сѣ бы́въ по и҆стрезвѣ̑нїи и҆сповѣ̑да, чꙋ́вство нѣ̑коегѡ тѣле́съ раче́нїѧ, и҆ дꙋ́хъ безстꙋ́денъ и҆ безчеловѣ̑ченъ въ са́момъ се́рдца чꙋ́вствѣ ꙗ҆́вственнѣ сѣдѧ́щь, и҆ тѣле́снꙋ се́рдца болѣ̑знь а҆́ки ѻ҆́гнь ѿ пе́щи ра́тꙋемаго ѡ҆щꙋща́ти сотворѧ́ющъ, бг҃а ѹ҆́бѡ не боѧ́щасѧ, па́мѧть мꙋ́ки ꙗ҆́кѡ ничто́же презира́юща, мл҃и́твы гнꙋша́ющасѧ, и҆ ма́лѡ не на са́момъ то́мъ дѣѧ́нїи сотворѧ́емѣмъ: ме́ртвыхъ тѣле́съ ꙗ҆́кѡ бездꙋ́шныхъ ка́менїй видѣ̑нїе вмѣнѧ́юща, безꙋ́мна нѣ̑какова и҆ и҆зстꙋ́плша стра́ждꙋщаго содѣ̑ловающъ: слове́сна и҆ безслове́сна сꙋщества̀ жела́нїемъ всегда́шнимъ ѹ҆пи́вшасѧ: є҆гѡ́же а҆́ще не бы̀ прекрати́лисѧ дні́е, не бы̀ спасла́сѧ всѧ́ка дꙋша̀: въ бре́нїе сїѐ кро́вїю и҆ слю́зомъ скве́рнымъ срастворе́нное ѻ҆дѣ̑ѧна. Ка́кѡ бо; зане́же всѧ́ко бы́вшее, сро́дства своегѡ̀ ненасы́тнѣ жела́етъ: кро́вь, кро́ве: и҆ че́рвь, червѧ̀: и҆ бре́нїе, бре́нїѧ: тѣ̑мже и҆ пло́ть сїѧ̀, пло́ти: а҆́ще и҆ ѹ҆хищре́нми преле́стницꙋ сїю̀ прелща́ти покꙋша́емсѧ, є҆стества́ бо сегѡ̀ и҆ црⷭ҇твїѧ ѻ҆́нагѡ нꙋ̑ждницы и҆ жела́телїе. Предрече́нныѧ ѹ҆́бѡ бра́ни и҆скꙋ́са не прїе́мшїи, бл҃же́ни сꙋ́ть. Помо́лимсѧ (же) ѿню́дъ ѿ такова́гѡ тоѧ̀ и҆зба́витисѧ и҆скꙋ́са: въ предрече́нный бо попо́лзшїисѧ ро́въ, ѿ по лѣ̑ствицѣ ѻ҆́нѣй восходѧ́щихъ и҆ низходѧ́щихъ дале́че ѿпа́даютъ: и҆ къ та́мошнемꙋ восхожде́нїю по́тѡвъ мно́гихъ со гла́домъ тре́бꙋютъ кра́йнѣйшимъ.

к҃и. Смо́тримъ не нѣ̑какѡ ли въ мы́сленныхъ вразѣ̑хъ на́шихъ ꙗ҆́коже на чꙋ́вственнѣй бра́ни во ѡ҆полче́нїи и҆́хъ сво́йственно нѣ̑кое кі́йждо и҆з̾ ни́хъ врꙋче́нїе дѣ̑йствовати ѹ҆чине́нъ є҆́сть: є҆́же чꙋ́до є҆́сть. Назна́менахъ во и҆скꙋша́емыхъ, и҆ ви́дѣхъ падє́нїѧ паде́нїй лю̑тша: и҆мѣ̑ѧй ѹ҆́мъ слы́шати, да слы́шитъ.

к҃ѳ. Ѻ҆бы́чай є҆́сть бѣ̑сови семꙋ̀, и҆ па́че же въ подвиза́ющихсѧ, и҆ мона́шеское житїѐ проходѧ́щихъ, мно́жицею всѐ своѐ ѹ҆стремле́нїе, и҆ тща́нїе, и҆ ко́знь и҆ кова́рство, и҆ примышле́нїе сотворѧ́ти, тѣ̑ми ꙗ҆̀же проти́вꙋ є҆стествꙋ̀, а҆ не тѣ̑ми ꙗ҆̀же по є҆стествꙋ̀ тѣ́мъ ра́тꙋємымъ быва́ти: тѣ̑мже мно́жицею и҆ со же́нскимъ по́ломъ спребыва́юще, и҆ къ немꙋ̀ на по́хоть и҆лѝ помышле́нїе ѿню́дъ нера́тꙋеми сꙋ́ще, себѐ ѹ҆бл҃жи́ша: не разꙋмѣва́юще ѻ҆каѧ́ннїи, ꙗ҆́кѡ и҆дѣ̑же є҆́сть бо́лшаѧ поги́бель, та́мѡ ме́ншїѧ нѣ̑сть потре́ба.

л҃. Мню̀ двои́хъ ра́ди си́хъ ви́нъ ѹ҆бі́йцы сі́и на́съ ѻ҆каѧ́нныхъ всеѡкаѧ́ннїи во ꙗ҆̀же проти́вꙋ є҆стествꙋ̀ низвраща́ти ѡ҆быко́ша, ꙗ҆́кѡ вещество̀ паде́нїѧ сегѡ̀ вездѣ̀ на́мъ ѹ҆до́бнѣ и҆мꙋ́щихъ, и҆ ꙗ҆́кѡ бо́лшꙋю мꙋ́кꙋ стѧжа́вшихъ. Вѣ̑сть рече́нное и҆́же ди̑вїимъ ѻ҆слѡ́мъ пре́жде ѹ҆́бѡ повелѣва́ѧй: по́слѣжде же ѿ ди́вїихъ ѻ҆сє́лъ ѻ҆каѧ́ннѣ повелѣ̑нъ и҆ порꙋ́ганъ бы́вый: и҆ нбⷭ҇нымъ пре́жде пита́емый хлѣ̑бомъ, по́слѣжде же добра̀ сегѡ̀ лише́нъ бы́вый: и҆ є҆́же ѹ҆́бѡ чꙋ́дншее є҆́сть, ꙗ҆́кѡ и҆ по покаѧ́нїи (є҆гѡ̀), сто́лпъ ѹ҆́бѡ вели́къ падѐ, болѣ̑знꙋѧ го́рцѣ наста́вникъ на́шъ речѐ а҆нтѡ́нїй: ѻ҆́бразъ же паде́нїѧ премꙋ́дрый се́й ѹ҆таи́лъ є҆́сть: вѣ̑дѧше бо бы́ти блꙋ́дъ тѣле́снѣ и҆ кромѣ̀ и҆но́гѡ тѣ̑ла. Є҆́сть нѣ̑каѧ сме́рть въ на́съ и҆ поги́бель паде́нїѧ, въ на́съ и҆ съ на́ми при́снѡ соѡбноси́ма, въ ю҆́ности наипа́че: ю҆́же а҆́зъ писа́нїю преда́ти не посмѣ̑хъ: ѹ҆держа́ бо рꙋ́кꙋ мою̀ рекі́й: быва́ємаѧ бо ѻ҆́тай ѿ нѣ̑кихъ, сра́мнѡ є҆́сть и҆ глаго́лати, и҆ писа́ти и҆ слы́шати.

л҃а. Мою̀ ѹ҆́бѡ сїю̀ и҆ не мою̀ вражде́бнꙋю люби́мꙋю пло́ть, па́ѵелъ ѹ҆́бѡ сме́рть наречѐ: кто́ бо мѧ̀, гл҃етъ, и҆зба́витъ ѿ тѣ̑ла сме́рти сеѧ̀; И҆́нъ же бг҃осло́въ, встра́ственнꙋ и҆ ра́бнꙋ и҆ но́щнꙋ. Чесогѡ́ же ра́ди таковы́хъ на ню̀ нарече́нїй ѹ҆потреби́ша, наꙋчи́тисѧ жа́ждахъ. А҆́ще сме́рть є҆́сть, ꙗ҆́коже предрече́сѧ, пло́ть, то̀ побѣди́вый тꙋ̀, ѿню́дъ не ѹ҆мира́етъ: и҆ кі́й ѹ҆́бѡ є҆́сть чл҃вѣ̑къ ѻ҆́нъ, и҆́же поживе́тъ, и҆ не ѹ҆́зритъ сме́рти скве́рны пло́ти своеѧ̀;

л҃в. И҆спыта́ти подоба́етъ молю̀, кто̀ є҆́сть бо́лїй: ѹ҆ме́рый ли и҆ воскр҃сы́й, и҆лѝ ника́коже ѹ҆ме́рый: и҆ втора́го ѹ҆́бѡ ѹ҆блажи́вый, прелсти́лсѧ є҆́сть: ѹ҆ме́ръ бо хрⷭ҇то́съ воскр҃се: пе́рваго же, ниеди́номꙋ во ѹ҆мира́ющихъ, па́че же па́дающихъ ѿча́ѧнїю бы́ти ѹ҆вѣщава́етъ.

л҃г. Чл҃вѣколюби́ва бг҃а безчеловѣ̑чный се́й вра́гъ предста́тель блꙋда̀ глаго́летъ бы́ти: и҆ мно́го проще́нїе стра́сти се́й ꙗ҆́кѡ є҆сте́ственнѣй подаю́ща. Наблюди́мъ же лє́сти бѣсѡ́въ, и҆ по содѣ̑ѧнїи првⷣна сꙋдїю̀ того̀ и҆ непроща́юща ѡ҆брѧ́щемъ тѣ̑хъ и҆менꙋ́ющихъ: занѐ та́мѡ ѹ҆́бѡ да ко грѣхꙋ̀ под̾ꙋстѧ́тъ, та́кѡ ѹ҆потреби́ша: ны́нѣ же про́чее, да во ѿча́ѧнїе на́съ потопѧ́тъ.

л҃д. Печа́ли ѹ҆́бѡ и҆ ѿча́ѧнїю ѹ҆твержда́ющымсѧ, на грѣ̑хъ себѐ предава́ти па́ки не ѡ҆быко́хомъ: си́ма же ѹ҆га́сшема, па́ки мꙋчи́тель ѻ҆́нъ человѣколю́бїѧ на́съ прее́мствꙋетъ.

[Статия 3]

л҃є. Поели́кꙋ нетлѣ̑ненъ и҆ безтѣле́сенъ є҆́сть гдⷭ҇ь, потоли́кꙋ ѡ҆ чистотѣ̀ и҆ нетлѣ̑нїи тѣ̑ла на́шегѡ весели́тсѧ. Ни ѡ҆ чесо́мже и҆но́мъ ꙗ҆́коже ѡ҆ ѕлосмра́дїи блꙋда̀ нѣ̑цыи гл҃ютъ ра́доватисѧ бѣсовѡ́мъ: тѣ̑мже нижѐ ѡ҆ стра́сти и҆но́й, ꙗ҆́коже ѡ҆ скве́рнѣ тѣ̑ла.

л҃ѕ. Чистота̀, бж҃їе є҆́сть ѹ҆свое́нїе и҆ подо́бїе, по возмо́жномꙋ человѣ̑кѡмъ.

л҃з. Ма́ти ѹ҆́бѡ сла́дости є҆́сть, землѧ̀ и҆ роса̀: ма́ти же чистоты̀, безмо́лвїе съ послꙋша́нїемъ. Ѿ безмо́лвїѧ ѹ҆́бѡ и҆справлѧ́емое тѣлесѐ безстра́стїе, къ мі́рꙋ мно́жицею приближа́ющосѧ, не пребы́сть непоколеби́мо: ѿ послꙋша́нїѧ же прибыва́ющее, вездѣ̀ и҆скꙋ́сно и҆ непозы́блемо.

л҃и. Ви́дѣхъ горды́ню, смиренномꙋ́дрїѧ вино́внꙋ: и҆ гл҃ющаго помѧнꙋ́хъ: кто̀ ѹ҆разꙋмѣ̀ ѹ҆́мъ гдⷭ҇нь; Ро́въ и҆ зача́тїе киче́нїѧ, паде́нїе: паде́нїе же мно́жицею въ хотѧ́щихъ, вина̀ є҆́сть смиренномꙋ́дрїѧ.

л҃ѳ. И҆́же съ чревоѡб̾ѧде́нїемъ и҆ насыще́нїемъ бѣ̑са блꙋда̀ побѣди́ти хотѧ́й, подо́бенъ є҆́сть, съ є҆ле́емъ ѹ҆гаша́ющемꙋ пожа́ръ.

м҃. И҆́же съ воздержа́нїемъ и҆ є҆ди́нымъ бра́нь (сїю̀) покꙋси́выйсѧ ѹ҆толи́ти, подо́бенъ є҆́сть є҆ди́ною рꙋко́ю пла́вающемꙋ, и҆ пꙋчи́ны и҆зба́витисѧ любопрѧ́щемꙋсѧ. Спрѧзѝ съ воздержа́нїемъ смире́нїе: без̾ втора́гѡ бо пе́рвшее безполе́зно ѡ҆брѣта́етсѧ.

м҃а. И҆́же себѐ ѿ нѣ̑кїѧ стра́сти ѡ҆би́дима ѹ҆́зритъ, на тꙋ̀ и҆ є҆ди́нꙋ пре́жде всѣ̑хъ да воѡрꙋжи́тъ себѐ, и҆ па́че же на тождеплеме́нна врага̀: семꙋ́ бо низложе́нꙋ не бы́вшꙋ, ничи́мже ѿ про́чїихъ побѣ̑ды по́льзꙋемсѧ: є҆гѵ́птѧнина же сего̀ и҆ мы̀ порази́вше, всѧ́кѡ въ кꙋпинѣ̀ смире́нїѧ бг҃а ѹ҆́зримъ.

м҃в. Ѡ҆щꙋти́хъ а҆́зъ и҆скꙋша́емь во́лка сего̀, ра́дость безслове́снꙋ и҆ сле́зы, и҆ ѹ҆тѣше́нїе въ дꙋшѝ преле́стнѣ творѧ́ща, и҆ мнѧ́хсѧ младе́нчественъ сы́й (а҆́зъ), пло́дъ, а҆ не тлю̀ содержа́ти.

м҃г. А҆́ще всѧ́къ грѣ̑хъ, є҆го́же а҆́ще сотвори́тъ человѣ̑къ, кромѣ̀ тѣ̑ла є҆́сть: а҆ блꙋдѧ́й, во своѐ тѣ̑ло согрѣша́етъ: то̀ всѧ́кѡ сегѡ̀ ра́ди, поне́же (и҆) са́мое то̀ пло́ти сеѧ̀ сꙋщество̀ ѡ҆сквернѧ́ти и҆стица́нїемъ ѡ҆быко́хомъ: є҆́же во и҆́номъ грѣсѣ̀ быва́ти невозмо́жно є҆́сть. Взыскꙋ́ю же а҆́зъ, ка́кѡ ѡ҆ всѧ́комъ грѣсѣ̀, согрѣша́ющѧ человѣ̑ки и҆ то́чїю, ѡ҆быко́хомъ гл҃ати: повнегда́ же нѣ̑коего соблꙋди́вша ѹ҆слы́шимъ, болѣ̑зненнѣ гл҃емъ: ѻ҆́нсица падѐ.

м҃д. Бѣжи́тъ ѹ҆́дицы ры́ба ско́рѡ, и҆ сластолюби́ва дꙋша̀ ѿвраща́етсѧ ѿ безмо́лвїѧ.

м҃є. Є҆гда̀ къ дрꙋ́гъ дрꙋ́гꙋ нѣ̑кихъ дїа́волъ се́ю ѹ҆́зою стꙋ́дною свѧза́ти хо́щетъ, то̀ и҆ є҆ди̑ны и҆ дрꙋгі̑ѧ страны̑ и҆спыта́въ ѿѻнꙋ́дꙋ ѻ҆́гнь се́й начина́етъ.

м҃ѕ. Мно́жицею къ сластолю́бїю прекланѧ́ющїисѧ, милосе́рдни и҆ ми́лостиви, и҆ сосле́зни и҆ ласка́телни бы́ти ѡ҆быко́ша: ѡ҆ чистотѣ̑ же прилѣжа́щїи, не та́кѡ такѡва́ѧ и҆́мꙋтъ.

м҃з. Разꙋмѣва́теленъ мꙋ́жъ, стра́шно мѧ̀ вопросѝ предложе́нїе: кі́й ре́къ грѣ̑хъ, кромѣ̀ ѹ҆бі́йства и҆ ѿверже́нїѧ, тѧ́жшъ всѣ̑хъ є҆́сть; и҆ мнѣ̀, є҆́же въ є҆́ресь па́сти ре́кшꙋ, и҆ ка́кѡ, гл҃етъ, є҆ретїкѝ цр҃кви ѹ҆́бѡ собо́рна прїе́млющи со и҆́стиннымъ своеѧ̀ и҆́хъ є҆́реси а҆наѳематиса́нїемъ, та̑инъ, тѣ̑хъ сподоблѧ́етъ причаще́нїѧ: соблꙋди́вшаго же, и҆сповѣ̑дающагосѧ, и҆ ѿ грѣха̀ ѻ҆́нагѡ престаю́щаго внꙋ́трь прїе́млющи, на лѣ́та того̀ ѿ пречⷭ҇тыхъ та̑инъ ѿлꙋча́ти, ѿ а҆пⷭ҇лскихъ тѣ̑й ѹ҆вѣрѧ́емо є҆́сть пра́вилъ; Мнѣ̑ же ѡ҆ недоꙋмѣ̑нїи се́мъ ѹ҆ди́влшꙋсѧ, недоꙋмѣва́емое пребы́сть недоꙋмѣва́емо и҆ нерѣши́мо.

м҃и. И҆спыта́имъ, и҆ и҆змѣ̑римъ, и҆ наблюди́мъ: ка́ѧ ѹ҆́бѡ въ ѱалмопѣ̑нїи ѿ бѣ̑са блꙋда̀ сла́дость на́мъ прибыва́етъ: ка́ѧ же, ѿ слове́съ дх҃а, и҆ сꙋ́щїѧ въ ни́хъ бл҃года́ти и҆ си́лы.

м҃ѳ. Да не забꙋ́деши себѐ ѽ ю҆́ный: ви́дѣхъ ѿ дꙋшѝ нѣ̑кихъ ѡ҆ возлю́бленныхъ свои́хъ молѧ́щихсѧ, и҆ ѿ блꙋда̀ подвиза́еми, мнѧ́хꙋсѧ па́мѧть и҆ зако́нъ любвѐ сотворѧ́ти.

н҃. Мо́щно є҆́сть ѡ҆сѧза́нїемъ тѣле́снѣ ѡ҆сквернѧ́тисѧ: ничто́же бо тѧ́жше є҆́сть чꙋ́вства сегѡ̀. Помѧнѝ сопле́тшаго съ рꙋко́ю пла́тище, и҆ ѹ҆терпа́й рꙋ́кꙋ ѡ҆ є҆сте́ственныхъ и҆ не є҆сте́ственныхъ, ѡ҆ свое́мъ же чꙋ́ждемъ тѣ̑лѣ.

[Статия 4]

н҃а. Мню̀ не глаго́латисѧ комꙋ̀ ѿню́дъ ст҃ꙋ тезоиме́ннѣ, а҆́ще не пе́рвѣе зе́млю сїю̀ на ѡ҆сщ҃е́нїе претвори́тъ: а҆́ще и҆ мо́щно є҆́сть преѡбрази́ти.

н҃в. На посте́ли возле́гше, тогда̀ трезви́мсѧ: зане́же ѹ҆́мъ тогда̀ без̾ тѣ̑ла, бо́ретсѧ съ бѣса́ми: и҆ а҆́ще ѡ҆брѧ́щетсѧ сластолюби́въ то̀ преда́тель сла́дцѣ быва́етъ.

н҃г. Па́мѧть сме́рти всѧ́кѡ да ѹ҆́снетъ съ тобо́ю, и҆ съ тобо́ю да совоста́нетъ, и҆ є҆динопомышлѧ́ема і҆и҃сова мл҃и́тва: ничто́же бо ꙗ҆́коже сїѧ̑ во снѣ̀ ѡ҆брѧ́щеши помоществова̑нїѧ.

н҃д. Нѣ̑цыи ѿ бра́шенъ є҆ди́нѣхъ бра́немъ си̑мъ и҆ и҆стица́нїемъ бы́ти сꙋ́дѧтъ: а҆́зъ же (и҆) послѣ̑днѣ недꙋ́гꙋющихъ, и҆ кра́йнѣ постѧ́щихсѧ си́ми крѣ̑пцѣ ѡ҆сквернѧ́емыхъ ви́дѣхъ: вопроси́хъ ѡ҆ си́хъ нѣ̑когда нѣ̑коего и҆з̾ и҆скꙋ́снѣйшихъ разсꙋди́телныхъ и҆́нѡкъ, и҆ наꙋчѝ бл҃же́нный ѻ҆́нъ ѕѣлѡ̀ ꙗ҆́снѣ: є҆́сть, гл҃етъ приснопомина́емый ѻ҆́нъ, во снѣ̑хъ и҆стица́нїе, ѿ мно́жества бра́шенъ и҆ ѿра́ды: дрꙋго́е ѿ го́рдости, є҆гда̀ ѡ҆ многовре́меннѣмъ неистица́нїи на́шемъ возноша́емсѧ: и҆ є҆́сть (па́ки), ѿ є҆́же бли́жнѧго ѡ҆сꙋжда́ти: и҆ два̀ ѹ҆́бѡ сїѧ̑, гл҃етъ, мо́гꙋтъ и҆ болѧ́щымъ приключа́тисѧ: непщꙋ́ю же, и҆ трѝ сїѧ̑: а҆́ще ли же бы кто̀ себѐ ѿ всѣ̑хъ си́хъ предрече́нныхъ ви́нъ чи́ста сꙋ́ща ѡ҆щꙋти́лъ, то̀ бл҃же́нъ є҆́сть такова́гѡ ра́ди безстра́стїѧ, ѿ за́висти бѣсѡ́въ и҆ то́чїю, слꙋ́чшеесѧ пострада́въ: сїѐ бг҃ꙋ на не́мъ попꙋсти́вшꙋ слꙋчи́тисѧ вре́менемъ: да безгрѣ̑шнымъ ѕлоключе́нїемъ высоча́йше стѧ́жетъ смире́нїе.

н҃є. Никто́же ꙗ҆̀же во снѣ̑хъ мечта̑нїѧ, въ себѣ̀ во днѝ помышлѧ́ти да восхо́щетъ: ра́зꙋмъ бо и҆ се́й є҆́сть бѣсовѡ́мъ, да ѿ со́нїй бдѧ́щихъ на́съ ѡ҆сквернѧ́ютъ.

н҃ѕ. Ѹ҆слы́шимъ и҆ и҆́но врагѡ́въ си́хъ на́шихъ кова́рство: ꙗ҆́коже тѣ̑ло вредѧ̑щаѧ бра̑шна, по вре́мени, и҆лѝ по днѝ, недꙋ́гъ въ на́съ твори́ти ѡ҆быко́ша: та́кѡ мно́жицею (быва́етъ) и҆ ѡ҆ вина́хъ дꙋ́шꙋ ѡ҆сквернѧ́ющихъ: ви́дѣхъ наслажда́ющихсѧ, и҆ а҆́бїе не ѡ҆сквернѧ́емыхъ: и҆ ви́дѣхъ со жена́ми ꙗ҆дꙋ́щихъ, и҆ спребыва́ющихъ: и҆ ниеди́но лꙋка́во помышле́нїе а҆́бїе помышлѧ́ющихъ: и҆ ѹ҆́бѡ дерзнꙋ́вше прелща́емїи, є҆гда̀ возмнѣ̑шасѧ ми́ръ и҆ ѹ҆твержде́нїе и҆мѣ̑ти, то̀ въ ке́ллїи свое́й, внеза́пꙋ пострада́ша поги́бель: ка́ѧ же ѻ҆́на є҆́сть поги́бель, ꙗ҆́же наеди́нѣ є҆ди̑нѣмъ на́мъ тѣле́снѣ и҆ дꙋше́внѣ быва́ющаѧ; и҆скꙋше́нъ ѹ҆́бѡ бы́вый, вѣ̑сть: не бы́вый же и҆скꙋше́нъ, ѹ҆вѣ̑дѣти не тре́бꙋетъ.

н҃з. Во вре́мѧ ѻ҆́но добро̀ на́мъ є҆́сть помоществова́нїе, вре́тище, пе́пелъ, стоѧ́нїе всено́щно: жела́нїе хлѣ̑ба: ѧ҆зы́къ пали́мь, и҆ ма́лѡ ѡ҆роша́емь, во гро́бищахъ вселе́нїе: и҆ пре́жде всѣ̑хъ смире́нїе се́рдца: и҆ а҆́ще мо́щно ѻ҆те́цъ (нѣ̑кїй) и҆лѝ бра́тъ тща́ливъ, и҆ ста́ръ мꙋдрова́нїемъ на по́мощь: чꙋждꙋ́сѧ бо а҆́ще є҆ди́нъ кто̀ и҆з̾ пꙋчи́ны кора́бль спастѝ мо́жетъ.

н҃и. То́жде паде́нїе мно́жицею стори́чно ѿ и҆нѣ̑мъ содѣ̑ѧннагѡ ѡ҆сꙋжде́нїе и҆́мать, ѿ нра́ва, ѿ мѣ̑ста, ѿ пред̾ꙋспѣ̑ѧнїѧ, и҆ ѿ и҆ны́хъ мно́гихъ.

н҃ѳ. Преди́венъ мнѣ̀ нѣ̑кто и҆ кра́йнѣйшъ чистоты̀ предѣ̑лъ сказа̀: красотꙋ̀ бо, гл҃етъ, нѣ̑кто ѹ҆зрѣ̑въ, творца̀ велмѝ ѿ ѻ҆́ныѧ просла́ви: и҆ ѿ є҆ди́нагѡ сегѡ̀ видѣ̑нїѧ, въ любо́вь бж҃їю и҆ сле́зъ и҆сто́чникъ прекланѧ́шесѧ: и҆ мо́щно бѣ̀ ѹ҆́жасъ ѹ҆ви́дѣти: и҆но́гѡ ро́въ, и҆но́мꙋ вѣне́цъ быва́ющъ вы́ше є҆стества̀: а҆́ще всегда̀ таковы́й въ таковы́хъ таково́е чꙋ́вство и҆ дѣ̑ланїе стѧжа́лъ є҆́сть, то̀ воскре́се нетлѣ̑ненъ, пре́жде ѻ҆́бщагѡ воскрⷭ҇нїѧ.

ѯ҃. Тогѡ́жде пра́вила и҆ на пѣснопѣ̑нїихъ и҆ пѣ̑снехъ ѹ҆потреби́мъ: занѐ бг҃олюби́вїи ѹ҆́бѡ, къ весе́лїю и҆ бж҃е́ственнѣй любвѝ и҆ слеза́мъ, и҆ ѿ внѣ̑шнихъ, и҆ ѿ дх҃о́вныхъ пѣ̑сней, подвиза́еми бы́ти ѡ҆быко́ша: сластолюби́вїи же сопроти́внѣ.

ѯ҃а. Нѣ̑цыи, ꙗ҆́коже и҆ предвари́вше рѣ̑хомъ, на безмо́лвническихъ мѣ̑стѣхъ мно́гѡ мно́жае ра́тꙋеми быва́ти ѡ҆быко́ша и҆ нѣ̑сть чꙋ́до, любопребыва́ютъ бо та́мѡ мно́гѡ мно́жае бѣ̑сове, ѿ гдⷭ҇а въ пꙋсты́ни, и҆ въ бе́зднꙋ

и҆згна́ни бы́вше, на спасе́нїе на́ше. Ра́тꙋютъ безмо́лвника лю́тѣ бѣ̑сове блꙋда̀: да ꙗ҆́кѡ ничи́мже по́лзꙋющасѧ ѿ пꙋсты́ни въ мі́ръ поведꙋ́тъ. Ѿхо́дѧтъ ѿ на́съ, въ мі́рѣ пребыва́ющихъ: да ꙗ҆́кѡ (та́мѡ) не ра́тꙋеми, съ мїрски́ми пребꙋ́демъ: и҆дѣ̑же ра́тꙋеми є҆смы̀, та́мѡ всѧ́кѡ со враго́мъ лю́тѣ ра́тꙋемсѧ, не ра́тꙋемь бо ѿ на́съ, дрꙋ́гъ на́шъ врагѡ́мъ и҆ то́й ѡ҆брѣта́етсѧ.

ѯ҃в. Покрыва́еми є҆смы̀ рꙋко́ю гдⷭ҇нею въ мі́рѣ по нѣ̑коей потре́бѣ пребыва́юще, не́гли мл҃и́твою ѻ҆́тчею мно́жицею: да не и҆ гдⷭ҇ь похꙋле́нъ бꙋ́детъ (чрез̾ на́съ). Ѻ҆вогда́ же и҆ ѿ непоболѣ̑нїѧ, и҆ ѿ є҆́же во мно́зѣ и҆скꙋ́сѣ и҆ насыще́нїи ви́димыхъ и҆ глаго́лемыхъ пре́жде бы́ти: и҆лѝ и҆ бѣсовѡ́мъ ѹ҆стꙋпа́ющымъ во́лею, и҆ ѡ҆ставлѧ́ющымъ на́мъ бѣ̑са возноше́нїѧ мѣ̑сто всѣ̑хъ наполнѧ́ющаго.

ѯ҃г. Ѹ҆слы́шите преле́стника сегѡ̀ ко́знь и҆ кова́рство, всѝ чистотѣ̀ ѡ҆бꙋча́тисѧ произволѧ́ющїи, и҆ сохрани́тесѧ: повѣ̑да мѝ нѣ̑кто и҆з̾ во и҆скꙋ́сѣ ле́сти сеѧ̀ бы́вшихъ: ꙗ҆́кѡ многокра́тнѣйше тѣле́съ си́хъ бѣ̑съ, спрѧ́тиваетъ себѐ въ коне́цъ: бл҃гоговѣ̑нїе кра́йнѣйшее мона́хови подме́ща, и҆ сле́зъ не́гли и҆сто́чникъ, во вре́мѧ ѻ҆́но внегда̀ со жена́ми сѣди́тъ и҆лѝ бесѣ̑дꙋетъ: ѡ҆ па́мѧти же сме́рти, и҆ сꙋда̀, и҆ цѣломꙋ́дрїѧ, того̀ ты́ѧ ѹ҆чи́ти под̾ꙋща́ѧ: да чрез̾ сло́во то̀ и҆ притво́рное благоговѣ̑нїе, притекꙋ́тъ ꙗ҆́кѡ къ па́стырю къ во́лкꙋ семꙋ̀ ѡ҆каѧ̑нныѧ ѻ҆́ны: и҆ ѻ҆бы́чаю и҆ дерзнове́нїю про́чее бы́вшꙋ, тогда̀ паде́нїе всеѡкаѧ́нный постра́ждетъ.

ѯ҃д. Бѣжа́ще бѣжи́мъ є҆́же не ви́дѣти, ни слы́шати плода̀, ѿ негѡ́же не вкꙋси́ти про́чее ѡ҆бѣща́хомсѧ: чꙋждꙋ́сѧ бо а҆́ще дв҃да прⷪ҇ро́ка крѣ̑плшихъ себѐ непщꙋ́емъ бы́ти, є҆́же невозмо́жно є҆́сть.

ѯ҃є. Та́кѡ высока̀ и҆ вели́ка є҆́сть чистоты̀ похвала̀, ꙗ҆́кѡ посмѣ̑ти нѣ́кимъ и҆з̾ ѻ҆ц҃є́въ безстра́стїе тꙋ̀ нарещѝ.

ѯ҃ѕ. Нѣ̑цыи глаго́лютъ невозмо́жно є҆́сть про́чее по вкꙋ́сѣ грѣха̀ чи́стꙋ и҆менова́тисѧ: а҆́зъ же тѣ̑хъ низвраща́ѧ, гл҃ахъ: возмо́жно и҆ ѹ҆до́бно є҆́сть хотѧ́щемꙋ ди́вїю ма́слинꙋ къ до́брѣй ма́слинѣ прицѣпи́ти: а҆́ще бы ѹ҆́бѡ дѣ̑вственникꙋ тѣ̑ломъ ключи̑ вы́шнихъ ѹ҆вѣ̑рени бы́ли, то̀ не́гли пра́вєдна бы предглаго́ланнїи ѹ҆ставлѧ́ли: да посрамлѧ́етъ тѣ̑хъ те́щꙋ и҆мѣ̑вый, и҆ ключи̑ црⷭ҇твїѧ ѻ҆́нагѡ носѧ́й.

ѯ҃з. Многоѻбра́зенъ є҆́сть ѻ҆́нъ тѣле́съ си́хъ ѕмі́й: въ неискꙋ̑сныѧ ѹ҆́бѡ всѣва́ѧ є҆́же во и҆скꙋ́сѣ, и҆ є҆ди́номъ бы́ти и҆ преста́ти: и҆скꙋ̑сныѧ же, ѿ па́мѧти ѻ҆́ныѧ ко и҆скꙋ́сꙋ па́ки побꙋжда́етъ ѻ҆каѧ́нный (ле́стныхъ). Мно́зи и҆з̾ пе́рвшихъ за неꙋвѣ̑дѣнїе ѕла̀ сегѡ̀, не ра́тꙋеми сꙋ́ть: и҆з̾ вторы́хъ же, ꙗ҆́кѡ во и҆скꙋ́сѣ ме́рзости сеѧ̀ бы́вшїи, стꙋжє́нїѧ про́чее, и҆ бра́ни стра́ждꙋтъ (бы́вше не́нависти сеѧ̀, про́чее не ѹ҆слажда́ютсѧ): ѻ҆ба́че и҆ сопроти́вное мно́жицею (быва́етъ).

ѯ҃и. Ѻ҆вогда̀ ѿ снѡ́въ бла́зи и҆ ми́рни нѣ̑какови востае́мъ, ѿ ст҃ы́хъ а҆́гг҃лъ сїѐ ѻ҆́тай под̾е́млемъ: и҆ па́че же є҆гда̀ со мно́гою мл҃и́твою и҆ трезвѣ̑нїемъ ѹ҆снꙋ́хомъ: ѻ҆вогда́ же и҆ не бла́зи ѿ снѡ́въ востае́мъ, ѿ лꙋка́выхъ со́нїй сїѐ пострада́вше.

[Статия 5]

ѯ҃ѳ. Ви́дѣхъ нечести́ваго превозносѧ́щасѧ, и҆ вы́сѧщасѧ, и҆ мѧтꙋ́щасѧ, и҆ неи́стовѧщасѧ на мѧ̀, ꙗ҆́кѡ ке́дры лїва̑нскїѧ, и҆ ми́мѡ и҆до́хъ воздержа́нїемъ, и҆ сѐ не бѣ̀ ꙗ҆́коже пре́жде ꙗ҆́рость є҆гѡ̀, и҆ взыска́хъ є҆го̀, смири́въ по́мыслъ мо́й, и҆ не ѡ҆брѣ̑тесѧ во мнѣ̀ мѣ̑сто є҆гѡ̀, и҆лѝ слѣ̑дъ є҆гѡ̀.

ѻ҃. И҆́же тѣ̑ло побѣди́лъ є҆́сть, се́й є҆стество̀ побѣди́лъ є҆́сть: є҆стество́ же сїѐ побѣди́вый, всѧ́кѡ вы́ше є҆стества̀ бы́сть: сїе́ же бы́вый, ѹ҆ма́лисѧ ма́лымъ чи́мъ ѿ а҆́гг҃лъ, да не рекꙋ̀, ничи́мже.

ѻ҃а. Нѣ̑сть чꙋ́до съ невеще́ственнымъ невеще́ственномꙋ ра́товатисѧ: чꙋ́до же вои́стиннꙋ чꙋ́до, є҆́же веще́ственномꙋ съ вражде́бнымъ си́мъ и҆ ра́тꙋющꙋсѧ вещество́мъ невеще́ствєнныѧ врагѝ побѣди́ти.

ѻ҃в. Мно́го ѡ҆ на́съ бл҃гі́й гдⷭ҇ь творѧ̀ и҆ въ се́мъ попече́нїе, же́нска по́ла безстꙋ́дїе, ꙗ҆́коже ѹ҆здо́ю нѣ̑коею стыдѣ̑нїемъ возбрани́лъ є҆́сть: занѐ а҆́ще бы ѻ҆́нъ на мꙋ́жескъ по́лъ са́мъ ѡ҆ себѣ̀ притека́лъ, то̀ не бы спасла́сѧ всѧ́ка пло́ть.

ѻ҃г. И҆́но прило́гъ, и҆ и҆́но сочета́нїе, и҆ и҆́но сослꙋже́нїе, и҆ и҆́но плѣне́нїе, и҆ и҆́но борьба̀. А҆ и҆́на глаго́лемаѧ стра́сть въ дꙋшѝ, ѿ разсꙋди́телныхъ ѻ҆тє́цъ бы́ти ѡ҆предѣлѧ́етсѧ: занѐ прило́гъ ѹ҆́бѡ бл҃же́ннїи ті́и бы́ти ѡ҆предѣлѧ́ютъ сло́во про́сто, и҆лѝ ѻ҆́бразъ приклю́чшїѧсѧ ве́щи новоѧвле́ннѣ въ се́рдце вноси́мь. Сочета́нїе же, є҆́же свозглаго́лати съ ꙗ҆́влшеюсѧ ве́щїю, по стра́сти и҆лѝ безстра́стнѣ. Сосложе́нїе же, преклоне́нїе всла́ственно дꙋшѝ ко ѹ҆ви́дѣнной ве́щи быва́ющо. Плѣне́нїе же, нꙋ́ждно и҆ нево́л̾но се́рдца ѿведе́нїе, и҆лѝ пребыва́телно и҆ и҆зрѧ́днѣйшагѡ ѹ҆строе́нїѧ на́шегѡ потреби́телно совокꙋпле́нїе къ приклю́чшейсѧ ве́щи. Борбꙋ́ же ѡ҆предѣлѧ́ютъ бы́ти равномо́щнꙋ на ра́тꙋемаго си́лꙋ, во́лею и҆лѝ побѣжда́ющꙋ, и҆лѝ побѣжде́нїе под̾е́млющꙋ. Стра́сть же, сво́йственнѣ бы́ти гл҃ютъ ѻ҆́но вре́менемъ до́лгимъ въ дꙋшѝ встра́ственнѡ возгнѣздѧ́ющеесѧ, и҆ ꙗ҆́коже во и҆́мство тꙋ̀ про́чее сꙋ́щимъ къ себѣ̀ ѻ҆бы́чаемъ приве́дшее, (ꙗ҆́кѡ) самоизво́лнѣ про́чее къ немꙋ̀ и҆ сво́йственнѣ са́мꙋ ѡ҆ себѣ̀ притека́ющꙋ. И҆з̾ си́хъ всѣ̑хъ, пе́рвшее ѹ҆́бѡ, безгрѣ̑шно є҆́сть: второ́е же, не всѧ́кѡ: тре́тїе же, по ѹ҆строе́нїю подвиза́ющагѡсѧ: борба́ же, и҆лѝ вѣнє́цъ и҆лѝ мꙋче́нїй вино́вна быва́етъ. Плѣне́нїе бо, и҆́накѡ во вре́мѧ мл҃и́твы, и҆ и҆́накѡ во и҆́но вре́мѧ, и҆ и҆́накѡ ѡ҆ сре́днихъ, и҆ и҆́накѡ ѡ҆ лꙋка́выхъ помышле́нїихъ сꙋ́дитсѧ: стра́сть же, без̾ сꙋмнѣ̑нїѧ во всѣ̑хъ, и҆лѝ равнова́жнꙋ покаѧ́нїю, и҆лѝ бꙋ́дꙋщей мꙋ́цѣ подлежи́тъ. И҆́же ѹ҆́бѡ пе́рвое безстра́стнѣ помышлѧ́ѧй, всѧ̑ послѣ́днѧѧ є҆ди́ною ѿсѣчѐ.

ѻ҃д. Є҆́сть ѹ҆ ѻ҆па́снѣйшихъ и҆з̾ разꙋмѣва́телныхъ ѻ҆тє́цъ, и҆ и҆́но нѣ̑кое ѿ си́хъ то́нше помышле́нїе, ю҆́же ве́щь превѣва́нїе ѹ҆ма̀ нѣ̑цыи и҆менова́тисѧ гл҃ютъ, є҆́же без̾ вре́мене и҆ сло́ва и҆ ѻ҆́браза, скорѣ̑е стра́сть стра́ждꙋщемꙋ назна́меновати ѻ҆бы́че. Скорѣ̑е ни є҆ди́нъ ѿ сегѡ̀ и҆́же є҆́сть тѣле́съ, бы́стршъ, и҆лѝ неѧ́вствен̾шъ въ дꙋ́сѣхъ бы́ти ѻ҆бы́че: па́мѧтїю то́нкою и҆ без̾ сочета́нїѧ, безвре́менною же и҆ несказа́нною, ѹ҆ нѣ̑кихъ же и҆ невѣ̑домою своѐ въ дꙋ́шꙋ прише́ствїе ꙗ҆влѧ́ющъ. А҆́ще ѹ҆̀бо кто̀ таковꙋ́ю тогѡ̀ то́нкость пла́чемъ пости́гнꙋти возмо́же, се́й на́съ наꙋчи́ти мо́жетъ, ка́кѡ мо́щно є҆́сть и҆ ѻ҆́комъ є҆ди́нѣмъ, и҆ просты́мъ видѣ̑нїемъ, и҆ ѡ҆сѧза́нїемъ рꙋкѝ, и҆ пѣ̑сни слы́шанїемъ, кромѣ̀ всѧ́кїѧ мы́сли и҆ по́мысла, блꙋди́ти дꙋшѝ встра́ственнѣ.

ѻ҃є. Нѣ̑цыи гл҃ютъ ѿ помыслѡ́въ се́рдца тѣ̑лꙋ на стра̑сти приходи́ти: нѣ̑цыи же па́ки напроти́вное, ѿ тѣле́сныхъ чꙋ́вствъ лꙋка̑вымъ ражда́тисѧ помыслѡ́мъ: и҆ пе́рвшїи ѹ҆́бѡ гл҃ютъ, а҆́ще не бы предте́клъ ѹ҆́мъ, то̀ не бы привозпослѣ̑дствовало тѣ̑ло: вторі́и же, ѕлодѣ̑йствїе тѣле́сныѧ стра́сти, къ своемꙋ̀ словозащище́нїю приво́дѧтъ гл҃юще: мно́жицею ѿ сладча́йша взо́ра, и҆лѝ рꙋ́чна ѡ҆сѧза́нїѧ, и҆лѝ благово́нна ѡ҆бонѧ́нїѧ, и҆лѝ слꙋ́ха сладкогла́сїѧ, и҆лѝ ꙗ҆́же во вкꙋ́сѣ сла́дости, по́мысли ті́и въ се́рдце вхо́дъ прїе́млютъ: ѡ҆ си́хъ, могі́й ѡ҆ гдⷭ҇ѣ, наꙋчи́тъ: ѕѣлѡ́ бо такѡва́ѧ ра́зꙋмомъ дѣ̑ѧтелство проходѧ́щымъ нꙋ̑ждна сꙋ́ть и҆ полє́зна: сꙋ́щымъ бо въ простотѣ̀ се́рдца дѣ̑лателємъ ѡ҆ си́хъ сло́во ниеди́но є҆́сть: не всѣ̑хъ бо є҆́сть ра́зꙋмъ се́й, нижѐ всѣ̑хъ є҆́сть бл҃же́ннаѧ ѻ҆́на простота̀ бронѧ̀ ѻ҆́на проти́вꙋ лꙋка́выхъ си́хъ ле́стемъ.

ѻ҃ѕ. Нѣ́кїѧ ѹ҆́бѡ и҆з̾ страсте́й, ѿ тѣ̑хъ ꙗ҆̀же внꙋ́трь на тѣ̑ло и҆схо́дѧтъ: нѣ́кїѧ же па́ки, напроти́внымъ ѻ҆́бразомъ: и҆ въ сꙋ́щихъ ѹ҆́бѡ въ мі́рѣ, второ́е: въ мона́шеское же житїѐ проходѧ́щихъ, пе́рвшее, ра́ди веще́ствъ ѻ҆́нѣхъ неимѣ̑нїѧ: а҆́зъ же ѡ҆ се́мъ ѻ҆́но гл҃ю: взы́щеши ѹ҆ ѕлы́хъ ра́зꙋма и҆ не ѡ҆брѧ́щеши.

ѻ҃з. Є҆гда̀ мно́гѡ проти́вꙋ бре́нїѧ сегѡ̀ сопрꙋ́жномꙋ бѣ̑сꙋ подвиза́вшесѧ, сего̀ ѿ се́рдца на́шегѡ ка́менїемъ поста̀, и҆ мече́мъ смире́нїѧ ѹ҆мꙋ́чивше, и҆зжене́мъ: тогда̀ про́чее въ тѣлесѝ (на́шемъ) ꙗ҆́коже че́рвь нѣ̑кїй внꙋ́трь сѣдѧ̀, на безсловє́сна нѣ́каѧ движє́нїѧ и҆ безвре́мєнна, скокта́ѧ на́съ ѡ҆каѧ́нный се́й ѡ҆сквернѧ́ти понꙋжда́етсѧ.

ѻ҃и. Сїе́ же наипа́че страда́ти ѡ҆быко́ша, бѣ̑сови тщесла́вїѧ покарѧ́ющїисѧ: зане́же въ се́рдцѣ не ктомꙋ̀ по́мыслы блꙋ̑дны ча́стѣ помышлѧ́юще, къ тщесла́вїю прибли́жишасѧ. А҆ ꙗ҆́кѡ рече́нное нело́жно є҆́сть: внегда̀ безмо́лвїѧ нѣ̑коегѡ сі́и и҆мꙋ́тсѧ, то̀ разꙋ́мнѡ себѐ да и҆стѧ́жꙋтъ и҆ всѧ́кѡ ѡ҆брѧ́щꙋтъ по́мыслъ нѣ̑кїй во глꙋбинѣ̀ се́рдца своегѡ̀, ꙗ҆́кѡ нѣ̑коего ѕмі́ѧ во гно́ищи кры́ющасѧ, и҆ ꙗ҆́кѡ ѿ своегѡ̀ тща́нїѧ и҆ ѹ҆се́рдїѧ и҆справле́нїе ѻ҆́но серде́чныѧ нѣколи́кѡ чистоты̀ и҆спра́виша подме́щꙋща: не помышлѧ́юще ѡ҆каѧ́ннїи ѻ҆́нагѡ: что́ бо и҆́маши, є҆гѡ́же нѣ̑си прїѧ́лъ тꙋ́не, и҆лѝ ѿ бг҃а, и҆лѝ ѿ и҆ны́хъ содѣ̑йства и҆ мл҃и́твы; Да смо́трѧтъ ѹ҆̀бо, и҆ всѧ́цѣмъ тща́нїемъ предрече́ннаго ѕмі́ѧ и҆з̾ се́рдца своегѡ̀ мно́гимъ смиренномꙋ́дрїемъ ѹ҆мертви́вше, да и҆зверга́ютъ: ꙗ҆́кѡ да ѿ негѡ̀ ѿчꙋжди́вшесѧ, не́гли возмо́гꙋтъ нѣ̑когда и҆ сі́и ко́жаныхъ ри́зъ совлещи́сѧ, и҆ побѣ̑днꙋю чистоты̀, ꙗ҆́коже нѣ̑когда чи́стїи младе́нцы, пѣ̑снь гдⷭ҇ви воспѣ̑ти: а҆́ще совле́кшесѧ, не на́зи ѻ҆́нѣхъ неѕло́бїѧ и҆ смире́нїѧ є҆сте́ственна, ѡ҆брѧ́щꙋтсѧ.

ѻ҃ѳ. Наблюда́етъ и҆ са́мъ се́й бѣ̑съ, и҆ мно́гѡ мно́жае ѿ и҆нѣ̑хъ, времена̀, є҆гда̀ наипа́че не мо́жемъ тѣле́снѣ на́нь помоли́тисѧ: и҆ тогда̀ ра́товати на́съ покꙋша́етсѧ непреподо́бный се́й.

п҃. Помоществꙋ́етъ не ѹ҆̀ стѧжа́вшымъ мл҃и́твꙋ се́рдца и҆́стиннꙋ, є҆́же въ тѣле́снѣй мл҃и́твѣ ѕлострада́нїе, гл҃ю же, протѧже́нїе рꙋ́къ, пе́рсей бїе́нїе, на нб҃са̀ чи́сто воззрѣ̑нїе, воздыха́нїй молва̀, колѣ̑нъ ча́сто преклоне́нїе, ꙗ҆̀же твори́ти присꙋ́тствꙋющихъ ра́ди мно́жицею не мо́гꙋтъ, тѣ̑мже тогда̀ ра́товати бѣ̑сове покꙋша́ютсѧ: и҆́же и҆ не могꙋ́ще є҆щѐ ѹ҆ма̀ мꙋ́жествомъ, и҆ неви́димою си́лою мл҃и́твы сопротивлѧ́тисѧ: не́гли по нꙋ́ждѣ послаблѧ́ютъ ра́тꙋющымъ тѣ̑хъ. Ѿскочѝ, а҆́ще мо́щно є҆́сть, вско́рѣ, ѹ҆кры́йсѧ ма́лѡ невѣ̑домѡ: воззрѝ ѻ҆́комъ, а҆́ще мо́щно є҆́сть, дꙋше́внымъ: а҆́ще ли же нѝ, то̀ понѐ внѣ̑шнимъ: крⷭ҇тови́днѣ воздѣ̑й рꙋ́цѣ недви́жимѡ, да и҆ ѻ҆́бразомъ си́мъ а҆мали́ка сего̀ посрами́ши и҆ побѣди́ши. Возопі́й къ могꙋ́щемꙋ спастѝ, не ѹ҆хищре́нными гл҃ы, но смире́нными веща́нми: пре́жде всѣ̑хъ, поми́лꙋй мѧ̀, ꙗ҆́кѡ не́мощенъ є҆́смь, предначина́ѧ: тогда̀ и҆скꙋ́съ прїи́меши вы́шнѧгѡ си́лы: и҆ неви́димѡ неви́димыхъ пожене́ши неви́димою по́мощїю. И҆́же та́кѡ ѡ҆бы́кнꙋвый ра́товати, вско́рѣ и҆ дꙋше́ю є҆ди́ною врагѝ сїѧ̑ ѿгонѧ́ти на́чнетъ: возда́рїе бо пе́рвшагѡ второ́е ѿ бг҃а дѣ̑лателємъ є҆́сть, и҆ пра́веднѣ.

п҃а. Въ собра́нїи нѣ̑гдѣ ѡ҆брѣ̑тсѧ, назна́менахъ тщали́ва бра́та ѿ лꙋка́выхъ пѡ́мыслъ стꙋже́на бы́вша, и҆ мѣ̑стꙋ прили́чнꙋ не ѡ҆брѣ̑тшꙋсѧ на та́йнꙋ мл҃и́твꙋ, на нꙋ́ждꙋ чре́внꙋю вскочи́въ ꙗ҆́кѡ ѿ неѧ̀ понꙋжда́емь, крѣ̑пкꙋ мл҃и́твꙋ на сꙋпоста́ты сїѧ̑ сотвори́лъ є҆́сть: мнѣ̑ же за неприли́чность мѣ̑ста ѻ҆́нагѡ зазрѣ̑вшꙋ є҆мꙋ̀, ѡ҆ нечи́стыхъ, глаго́летъ, пѡ́мыслъ прогна́нїи, въ нечи́стѣ мѣ̑стѣ помоли́хсѧ ѡ҆чи́ститисѧ ѿ скве́рны.

п҃в. Всѝ ѹ҆̀бо бѣ̑сове помрача́ти ѹ҆́мъ покꙋша́ютсѧ, та́же, люби̑маѧ тѣ́мъ совѣ̑тꙋютъ: а҆́ще бо ѻ҆́нъ не смѣжи́тсѧ, сокро́вище ѻ҆́но ѹ҆кра́дено не бꙋ́детъ. А҆ и҆́же блꙋда̀, мно́гѡ мно́жае всѣ̑хъ: се́й мно́жицею влады́кꙋ сего̀ ѹ҆ма̀ помрачи́въ, и҆ пред̾ человѣ̑ки твори́ти побꙋжда́етъ и҆ ѹ҆строѧ́етъ, ꙗ҆̀же вознеи́стовившїисѧ є҆ди́ни дѣ̑лаютъ: тѣ̑мже по вре́мени ѹ҆мꙋ̀ и҆стрезви́вшꙋсѧ, не то́чїю ѹ҆ви́дѣвшихъ, но и҆ сами́хъ себѐ за нечє́стнаѧ своѧ̑ дѣѧ̑нїѧ и҆ бесѣ́ды и҆лѝ ѻ҆́бразы срамлѧ́емсѧ, и҆ ѡ҆ пе́рвомъ на́шемъ ѡ҆слѣпле́нїи ѹ҆жаса́емсѧ: тѣ̑мже нѣ̑цыи мно́жицею ѿ такова́гѡ разсꙋжде́нїѧ, ѿ ѕла̀ сегѡ̀ преста́ша.

п҃г. Ѿвраща́йсѧ ѿ сꙋпоста́та сегѡ̀ по содѣ̑ѧнїи се́мъ моли́тисѧ тебѣ̀, и҆лѝ бг҃оче́ствовати, и҆лѝ бдѣ̑ти возбранѧ́ющагѡ, помина́ѧ ре́кшаго: занѐ твори́тъ мѝ трꙋды̀ дꙋша̀ сїѧ̀ мꙋчи́телствꙋемаѧ ѿ предпрїѧ́тїй, сотворю̀ ѿмще́нїе є҆ѧ̀ ѿ врагѡ́въ є҆ѧ̀.

п҃д. Кто̀ тѣ̑ло побѣди́лъ є҆́сть; И҆́же се́рдце сокрꙋшѝ: кто́ же се́рдце сокрꙋши́лъ є҆́сть; И҆́же са́мъ себѐ ѿве́ржесѧ: ка́кѡ бо не сокрꙋши́лсѧ є҆́сть, и҆́же во́ли (свое́й) ѹ҆́мре.

п҃є. Є҆́сть встра́ственъ встра́ственна встра́ственшъ, и҆ са́мое то̀ скве́рнъ свои́хъ и҆сповѣ̑данїе со сладостра́стїемъ всла́ственнѣ творѧ́й. Нечи̑стаѧ въ се́рдцѣ и҆ стꙋ̑днаѧ помышлє́нїѧ, ѿ сегѡ̀ преле́стника се́рдца, бѣ̑са блꙋда̀ ѡ҆быко́ша ражда́тисѧ: ꙗ҆̀же и҆сцѣлѧ́етъ воздержа́нїе, и҆ є҆́же та̑ нивочто́же ѿню́дъ вмѣнѧ́ти.

п҃ѕ. Кі́имъ же а҆́зъ нра́вомъ и҆ ѻ҆́бразомъ сего̀ дрꙋ́га моего̀ свѧза́въ, по послѣ̑дованїю про́чїихъ сꙋди́ти и҆́мамъ, не вѣ̑мъ: пре́жде бо не́же свѧжꙋ̀, разрѣша́етсѧ: и҆ пре́жде не́же сꙋди́ти и҆́мамъ, примирѧ́юсѧ: и҆ пре́жде не́же мꙋ́чити и҆́мамъ, преклонѧ́юсѧ: ка́кѡ возненави́ждꙋ, є҆го́же є҆стество́мъ люби́ти ѡ҆быко́хъ; Ка́кѡ свобождꙋ́сѧ, съ ни́мже во вѣ̑ки свѧ́занъ є҆́смь; Ка́кѡ ѹ҆праздню̀ є҆̀ со мно́ю и҆ воскреса́ющее; Ка́кѡ покажꙋ̀ нетлѣ̑нно, тлѣ̑нно прїе́мшее є҆стество̀; Что̀ благосло́вно рекꙋ̀ ко бл҃гослѡ́внаѧ и҆мꙋ́щемꙋ є҆стество́мъ; А҆́ще свѧжꙋ̀ посто́мъ сего̀, то̀ ѡ҆сꙋди́въ бли́жнѧго, томꙋ̀ па́ки предава́емь є҆́смь: а҆́ще и҆ ѿ є҆́же сꙋди́ти преста́въ сего̀ побѣждꙋ̀, то̀ возне́ссѧ се́рдцемъ, низведе́нъ бы́хъ си́мъ: и҆́бо и҆ содѣ̑йственникъ є҆́сть и҆ сꙋпоста́тъ: и҆ помо́щникъ, и҆ сопе́рникъ: и҆ застꙋ́пникъ, и҆ навѣ̑тникъ: ѹ҆го́дїе прїе́млѧ, ра́тꙋетъ: и҆ и҆стаѧва́емь, и҆знемога́етъ: ѹ҆покоева́емь, безчи́нствꙋетъ: и҆ ѡ҆тѧгчава́емь, не терпи́тъ: а҆́ще ѡ҆печа́лю, то̀ ѿню́дъ возбѣ̑дствꙋю: а҆́ще ѹ҆ѧзвлю̀, то̀ не и҆́мамъ чи́мъ добродѣ̑тєли стѧжꙋ̀: того́жде и҆ ѿвраща́юсѧ, и҆ ѡ҆б̾е́млю. Ко́е є҆́сть є҆́же ѡ҆ мнѣ̀ та́инство; Ко́е сло́во є҆́сть моегѡ̀ срастворе́нїѧ; Ка́кѡ са́мъ себѣ̀ вра́гъ и҆ дрꙋ́гъ є҆́смь; Глаго́ли мѝ ты̀, глаго́ли мѝ, ѽ сꙋпрꙋ́жница моѧ̀, ѽ є҆стество̀ моѐ: не бо ѿ и҆но́гѡ наꙋчи́тисѧ ѡ҆ тебѣ̀ востре́бꙋю: ка́кѡ ѿ тебѐ пребꙋ́дꙋ неꙋѧзвлѧ́емь; Ка́кѡ возмогꙋ̀ є҆сте́ственныѧ и҆збѣжа́ти бѣды̀, поне́же про́чее враждова́ти на тѧ̀ хрⷭ҇тꙋ̀ ѡ҆бѣща́хсѧ; Ка́кѡ мꙋчи́телство твоѐ побѣждꙋ̀, поне́же понꙋжда́тель тво́й бы́ти произво́лихъ; Ѻ҆но́ же къ дꙋшѝ свое́й ѿвѣщава́ющо гл҃аше: не скажꙋ́ ти ѹ҆́бѡ, чесогѡ̀ и҆ ты̀ не вѣ̑си, но є҆́же кꙋ́пнѡ ра́зꙋмомъ содержи́мъ. А҆́зъ во мнѣ̀ возлюбле́нїе ѻ҆тца̀ и҆́мамъ: внѣ̑шнѧгѡ ѹ҆́бѡ раждиза́нїѧ, ѹ҆гожде́нїе моѐ и҆ повсе́мнѣ ѿра́дꙋ: внꙋ́треннѧгѡ же двиза́нїѧ, ѿ предва́ршїѧ ѿра́ды, и҆ бы́вшихъ сотворе́нныхъ дѣѧ́нїй. А҆́зъ заче́ншо ражда́ю падє́нїѧ. Ѻ҆́на же рождє́на бы̑вша, па́ки сме́рть ѿча́ѧнїемъ ражда́ютъ. А҆́ще позна́еши мою̀ и҆ твою̀ ꙗ҆́вственнꙋ и҆ глꙋбо́кꙋ не́мощь, то̀ свѧза́лъ є҆сѝ рꙋ́цѣ моѝ: а҆́ще горта́нь ѹ҆мꙋ́чиши, то̀ свѧза́лъ є҆сѝ но́зѣ моѝ є҆́же на пре́дъ не и҆тѝ: а҆́ще спрѧже́шисѧ съ послꙋша́нїемъ, то̀ ѿ менѐ распрѧ́глсѧ є҆сѝ: а҆́ще стѧ́жеши смире́нїе, то̀ главꙋ̀ мнѣ̀ ѿсѣ̑клъ є҆сѝ.

Пѧтьнадесѧ́таѧ по́честь. И҆́же во пло́ти сы́й и҆ сїю̀ прїе́мый, ѹ҆́мре и҆ воскре́се: и҆ бꙋ́дꙋщагѡ нетлѣ̑нїѧ нача́ло ѹ҆жѐ ѿсю́дꙋ позна̀.