Слово 17. О к небеси текущем нестяжании

Сохранить из браузера

ГотовоДата последнего обновления: 02.01.2026

СЛО́ВО з҃I. Ѡ҆ къ нб҃сѝ текꙋ́щемъ нестѧжа́нїи.

Нестѧжа́нїе є҆́сть, попече́нїй ѿложе́нїе, безпопече́нїе житїѧ̀, пꙋтеше́ственникъ невозбранѧ́емь, вѣ̑ра за́повѣдемъ, печа́ли чꙋ́жде.

в҃. Нестѧжа́теленъ мона́хъ, є҆́сть влады́ка мі́рꙋ, бг҃ови попече́нїе ѹ҆вѣрѧ́ѧ, и҆ вѣ̑рою всѣ̑хъ рабы̑ стѧжа́въ: не рече́тъ человѣ̑кꙋ ѡ҆ потре́бѣ свое́й: приходѧ̑щаѧ же ꙗ҆́кѡ ѿ рꙋкѝ гдⷭ҇ни прїи́метъ.

г҃. Нестѧжа́теленъ дѣ̑латель, безпристра́стїѧ сы́нъ, приходѧ̑щаѧ є҆мꙋ̀ ꙗ҆́кѡ не сꙋ̑щаѧ вмѣнѧ́ѧ: ѿхожде́нїю пости́гшꙋ, вмѣнѝ всѧ̑ ѹ҆ме́ты бы́ти: а҆́ще ли же печа́лꙋетъ ѡ҆ нѣ̑чесомъ, то̀ не ѹ҆̀ нестѧжа́тель бы́сть.

д҃. Нестѧжа́теленъ мꙋ́жъ, въ мл҃и́твѣ чи́стъ: любостѧжа́телный же, ѻ҆́бразы вещества̀ мо́литсѧ.

є҃. Пребыва́ющїи въ повинове́нїи, сребролю́бїѧ чꙋ́жди сꙋ́ть, и҆дѣ̑же бо тѣ̑ло (своѐ) преда́ша, что̀ про́чее и҆́мꙋтъ своѐ; Є҆ди́нымъ такові́и ѡ҆би́дими быва́ти ѡ҆быко́ша, на прехожде́нїе ѹ҆до́бни и҆ гото́ви сꙋ́ще. Ви́дѣхъ вещество̀, терпѣ̑нїе мона́хѡмъ на мѣ̑стѣ роди́вшо, па́че ѻ҆́нѣхъ же а҆́зъ гдⷭ҇а ра́ди скита́ющихсѧ мно́жае ѹ҆бл҃жи́хъ.

ѕ҃. Вкꙋси́вый вы́шнихъ, ѹ҆до́бь презира́етъ ни̑жнѧѧ: ѻ҆́ныхъ же не вкꙋси́вый, ѡ҆ стѧжа́нїихъ ра́дꙋетсѧ.

з҃. Безслове́сенъ нестѧжа́тель, двѣма̀ ѡ҆би́димь быва́етъ: настоѧ́щихъ ѹ҆далѧ́ѧсѧ, и҆ бꙋ́дꙋщихъ лиша́ѧсѧ.

и҃. Да не ѹ҆̀бо ꙗ҆ви́мсѧ ѽ мона́си, пти́цъ невѣ̑рнши: не пекꙋ́тсѧ бо, ни собира́ютъ.

ѳ҃. Вели́къ ѹ҆́бѡ є҆́сть ѿверга́ѧй бл҃гоче́стнѣ и҆мѣ́нїѧ, ст҃ъ же ѿверга́ѧй во́лю свою̀. Ѻ҆́нъ ѹ҆́бѡ стори́цею и҆лѝ и҆мѣ̑нїи, и҆лѝ дарова́нми прїи́метъ: се́й же, живо́тъ вѣ̑чный наслѣ̑дитъ.

і҃. Не ѡ҆ста́влѧтъ вѡ́лны мо́ре, нижѐ сребролю́бца гнѣ̑въ и҆ печа́ль.

а҃і. Презрѣ̑вый вещество̀, и҆зба́висѧ ѿ словоѡправда́нїѧ и҆ прекосло́вїѧ: любостѧжа́телный же, за и҆глꙋ̀ до сме́рти подвиза́етсѧ.

в҃і. Вѣ̑ра неꙋкло́нна, ѿсѣче́тъ попечє́нїѧ: сме́рти же па́мѧть, ѿверга́етсѧ и҆ тѣ̑ла.

г҃і. Не бѣ̀ во і҆́ѡвѣ сребролю́бїѧ слѣ̑дъ: тѣ̑мже и҆ лише́нъ бы́въ, без̾ смꙋще́нїѧ пребы́сть.

д҃і. Ко́рень всѣ́мъ ѕлы̑мъ є҆́сть и҆ глаго́летсѧ сребролю́бїе: не́нависть бо, и҆ татбы̑, и҆ за̑висти, и҆ разлꙋчє́нїѧ, и҆ вражды̑, и҆ смꙋщє́нїѧ, и҆ памѧтоѕлѡ́бїѧ, и҆ немилосє́рдїѧ, и҆ ѹ҆бі̑йства, то̀ сотвори́ло є҆́сть.

є҃і. Ма́лымъ ѻ҆гне́мъ нѣ̑цыи, мно́го вещество̀ сожго́ша: и҆ є҆ди́ною добродѣ̑телїю, всѣ̑хъ настоѧ́щихъ и҆ рече́нныхъ бѣжа́ша страсте́й: сїѧ̀ нарица́етсѧ безпри- стра́стїе, сїе́ же родѝ и҆скꙋ́съ и҆ вкꙋ́съ ра́зꙋма бж҃їѧ, и҆ попече́нїе ѿвѣ̑тствованїѧ и҆схо́да.

ѕ҃і. Не неꙋвѣ̑дѣно ѹ҆́бѡ є҆́сть со внима́нїемъ проче́тшемꙋ всеѧ̀ ма́тере ѕлы́хъ (чревоѡб̾ѧде́нїѧ) сло́во ѻ҆́но: глаго́летъ бо въ лꙋка́вомъ свое́мъ и҆ проклѧ́томъ чадоро́дїи, второ́мꙋ є҆ѧ̀ бы́ти и҆сча́дїю, ка́мени нечꙋ́вствїѧ: возбрани́ же мѧ̀ сво́й є҆мꙋ̀ чи́нъ ѿда́ти, многогла́вый ѻ҆́нъ і҆дѡлослꙋже́нїѧ ѕмі́й: тре́тїй не вѣ̑мъ ка́кѡ полꙋчи́въ ѹ҆ разсꙋди́телныхъ и҆з̾ ѻ҆ц҃є́въ во ѻ҆сми́хъ (страсте́й) ѻ҆́нѣхъ вери́зѣ: є҆го́же ѹ҆мѣ̑реннѣ ѡ҆ко́нчивше, гл҃ати про́чее ѡ҆ нечꙋ́вствѣ хо́щемъ, ꙗ҆́кѡ тре́тїемꙋ сꙋ́щꙋ семꙋ̀ въ рожде́нїи второ́мꙋ: по не́мже про́чее и҆ ѡ҆ снѣ̀ и҆ ѡ҆ бдѣ̑нїи, не то́чїю же но и҆ ѡ҆ младе́нчественнѣмъ и҆ не мꙋ́жественнѣмъ страхова́нїи, вкра́тцѣ побесѣ̑дꙋемъ: новонача́лныхъ бо сꙋ́ть такѡва́ѧ недꙋ̑гованїѧ.

Седмьнадесѧ́тый по́двигъ стѧжа́вый къ нб҃сѝ невеще́ственнѣ ше́ствꙋетъ.