Слово 18. О нечувстве, сиречь умерщвлении души и смерти ума, прежде смерти тела

Русский текст Книга День Сохранить из браузера

ГотовоДата последнего обновления: 02.01.2026

СЛО́ВО И҃I. Ѡ҆ нечꙋ́вствѣ, си́рѣчь ѹ҆мерщвле́нїи дꙋшѝ, и҆ сме́рти ѹ҆ма̀, пре́жде сме́рти тѣ̑ла.

Нечꙋ́вство и҆ на тѣлесѣ̑хъ и҆ на дꙋ́сѣхъ є҆́сть, ѹ҆мерщвле́но чꙋ́вство: ѿ многовре́менна недꙋ́га и҆ нерадѣ̑нїѧ въ нечꙋ́вство ѡ҆конча́вшеесѧ.

в҃. Безболѣ̑знїе є҆́сть ѹ҆ка́чествовано нерадѣ̑нїе, ѹ҆терпа́юща мы́сль: предпрїѧ́тїѧ поро́дъ, ѹ҆се́рдїю сѣ̑ть, мꙋ́жествꙋ сило̀: ѹ҆миле́нїѧ невѣ̑дѣнїе: ѿча́ѧнїѧ две́рь, забве́нїѧ ма́ти, и҆ по рождествѣ̀ (то̀) ма́тере своеѧ̀ быва́етъ ма́ти, ѿраже́нїе стра́ха.

г҃. Безпоболѣ̑нъ є҆́сть, безꙋ́менъ любомꙋдре́цъ: самоѡсꙋжде́нъ сказа́тель: самосопроти́венъ любосло́вецъ: слѣ̑пъ ѹ҆чи́тель сегѡ̀ є҆́же ви́дѣти: ѡ҆ здра́вїи ꙗ҆́звы бесѣ̑дꙋетъ, и҆ тꙋ̀ чеша̀ не престае́тъ: проти́вꙋ стра́сти вѣща́етъ, а҆ вредѧ̑щаѧ ꙗ҆ды́й не престае́тъ: на ню̀ мо́литсѧ, и҆ а҆́бїе на дѣ̑ланїе тоѧ̀ и҆́детъ: ѡ҆ дѣ̑ланїи тоѧ̀ на себѐ гнѣ̑ваетсѧ: и҆ свои́хъ слове́съ не срамлѧ́етсѧ ѡ҆каѧ́нный: ѕлѣ̀ творю̀, вопїе́тъ, и҆ ѹ҆се́рднѡ прилѣжи́тъ: ѹ҆сты̀ на ню̀ мо́литсѧ, а҆ тѣ̑ломъ ѡ҆ не́й подвиза́етсѧ: ѡ҆ сме́рти любомꙋ́дрствꙋетъ, а҆ ꙗ҆́кѡ безсме́ртенъ пребыва́етъ: ѡ҆ разлꙋче́нїи воздыха́етъ, а҆ ꙗ҆́кѡ вѣ̑ченъ дре́млетъ: ѡ҆ воздержа́нїи бесѣ̑дꙋетъ, а҆ ѡ҆ чревоѡб̾ѧде́нїи подвиза́етсѧ: ѡ҆ сꙋдѣ̀ чте́тъ, и҆ ѡ҆склаблѧ́тисѧ начина́етъ: ѡ҆ тщесла́вїи чте́тъ, и҆ ѡ҆ са́момъ то́мъ чте́нїи тщесла́витсѧ: ѡ҆ бдѣ̑нїи провѣщава́етъ, и҆ сно́мъ а҆́бїе себѐ погрꙋжа́етъ: мл҃и́твꙋ похвалѧ́етъ, и҆ ꙗ҆́кѡ ѿ би́ча ѿ тоѧ̀ бѣ̑гаетъ: послꙋша́нїе бл҃жи́тъ, и҆ пе́рвый то́й преслꙋ́шаетъ: безпристра́стныхъ похвалѧ́етъ, и҆ рꙋ́бища ра́ди ѕлопо́мнѧ и҆ ра́тꙋѧсѧ не срамлѧ́етсѧ: гнѣ̑ваѧсѧ ѡ҆горчава́етсѧ, и҆ за ѡ҆горче́нїе то̀ па́ки гнѣ̑ваетсѧ, и҆ къ побѣжде́нїю побѣжде́нїе прилага́ѧ не ѡ҆щꙋща́етъ: насы́тивсѧ, раскаѧва́етсѧ: и҆ ма́лѡ покоснѣ̑въ, па́ки къ насыще́нїю приложѝ: молча́нїе бл҃жи́тъ, и҆ многосло́вїемъ то̀ похвалѧ́етъ: ѡ҆ кро́тости ѹ҆чи́тъ, и҆ въ са́момъ то́мъ ѹ҆чи́телствѣ мно́жицею гнѣ̑ваетсѧ: воспрѧнꙋ́въ, воздохнꙋ̀: и҆ главо́ю покива́въ, па́ки стра́сти тоѧ̀ держи́тсѧ. Смѣ̑хъ ѹ҆корѧ́етъ, и҆ ѡ҆склаблѧ́ѧсѧ ѡ҆ пла́чи ѹ҆чи́тъ. Са́мъ себѐ ꙗ҆́кѡ тщесла́вна пред̾ нѣ̑кими ѹ҆корѧ́етъ, и҆ ѹ҆ко́ромъ тѣ̑мъ сла́вꙋ себѣ̀ сотворѧ́ти покꙋша́етсѧ. встра́ственнѣ на лицѣ̀ зри́тъ, и҆ ѡ҆ цѣломꙋ́дрїи бесѣ̑дꙋетъ. Безмо́лвствꙋющихъ въ мі́рѣ пребыва́ѧ похвалѧ́етъ, и҆ себѐ посрамлѧ́ѧ не разꙋмѣва́етъ. Ми́лостивыхъ сла́витъ, а҆ ни́щымъ поноша́етъ. Всегда̀ са́мъ себѣ̀ ѡ҆глаго́лникъ быва́етъ и҆ въ соѡщꙋще́нїе (самагѡ̀ себѐ) прїитѝ не хо́щетъ.

д҃. Ви́дѣхъ а҆́зъ мно́гихъ таковы́хъ ѡ҆ и҆схо́дѣ и҆ стра́шныхъ сꙋди́щахъ слы́шавшихъ и҆ слезѧ́щихъ: и҆ є҆щѐ слеза́мъ во ѻ҆чесѣ̑хъ сꙋ́щымъ со тща́нїемъ на трапе́зꙋ и҆дѧ́хꙋ: и҆ почꙋди́хсѧ, ка́кѡ и҆ пла́чь влады́чица сїѧ̀ и҆ смрадополо́жница побѣди́ти возмо́же, ѿ мно́га непоболѣ̑нїѧ ѹ҆крѣплѧ́ема.

є҃. По си́лѣ немощнѣ̑й сꙋ́щей во мнѣ̀, камени́стагѡ сегѡ̀ и҆ жестокосѣко́магѡ неи́стова и҆ бꙋ́ѧ, лє́сти и҆ стрꙋ́пы ѡ҆б̾ѧви́хъ: на мно́зѣ бо любосло́вити къ немꙋ̀ не терплю̀: могі́й же ѡ҆ гдⷭ҇ѣ ѿ и҆скꙋ́са положи́ти на стрꙋ́пы сїѧ̑ лѣ́чбы, да не ѡ҆блѣни́тсѧ: не бо срамлѧ́юсѧ ѡ҆ си́хъ не́мощь предлага́ѧ, ꙗ҆́кѡ ѿ негѡ̀ крѣ̑пкѡ содержи́мь: ниже́ бо лє́сти тогѡ̀ и҆ кѡ́зни, ѿ себѐ пости́гнꙋти возмого́хъ: а҆́ще не бы́хъ то̀ нѣ̑гдѣ пости́гъ нꙋ́ждею ѹ҆держа́лъ, и҆ предглагѡ́ланнаѧ мꙋ́чивъ то̀ и҆сповѣ̑дати сотвори́лъ: биче́мъ стра́ха гдⷭ҇нѧ, и҆ непреста́нною мл҃и́твою, би́въ то̀: тѣ̑мже и҆ глаго́лаше мꙋчи́тель се́й и҆ ѕлодѣ̑й. Спобѡ́рницы моѝ, ме́ртвыхъ зрѧ́ще смѣю́тсѧ: на мл҃и́твѣ предстоѧ́ще, каменнова́ти всѝ и҆ же́стоцы и҆ те́мни быва́ютъ: пред̾ сщ҃е́нною трапе́зою предстоѧ́ще, не чꙋ́вствꙋютъ: да́ра ѻ҆́нагѡ причаща́ющесѧ, ꙗ҆́кѡ ѡ҆ вкꙋ́сѣ про́ста хлѣ̑ба быва́ютъ. А҆́зъ ѹ҆милѧ́ющихсѧ зрѧ́що, рꙋга́юсѧ. Всѧ̑ ражда́ємаѧ ѿ мꙋ́жества и҆ любвѐ бл҃га̑ѧ а҆́зъ ѹ҆бива́ти ѿ менѐ ро́ждшагѡ ѻ҆тца̀ наꙋчи́хсѧ. А҆́зъ є҆́смь смѣ̑ха ма́ти: а҆́зъ сна̀ пита́тель: а҆́зъ насыще́нїѧ дрꙋ́гъ: а҆́зъ со лжеговѣ̑инствомъ сплета́юсѧ: а҆́зъ ѡ҆блича́емо не болю̀.

ѕ҃. А҆́зъ ѹ҆̀бо ѡ҆каѧ́нный ѡ҆ словесѝ неи́стовагѡ сегѡ̀ ѹ҆жа́ссѧ, вопроша́хъ ро́ждшагѡ то̀ и҆́мѧ ѹ҆разꙋмѣ̑ти хотѧ̀. Ѻ҆но́ же, рожде́нїе є҆ди́но не и҆́мамъ: смѣ̑сно же нѣ̑какѡ и҆ непостоѧ́нно моѐ є҆́сть зача́тїе. Менѐ ѹ҆крѣплѧ́етъ насыще́нїе, менѐ возрасти́ло є҆́сть вре́мѧ, менѐ ѹ҆тверди́лъ є҆́сть ѻ҆бы́чай лꙋка́въ, ѻ҆́наго содержа́й, не свободи́тсѧ менѐ. Пребыва́й размышлѧ́ѧ со мно́гимъ бдѣ̑нїемъ сꙋ́дъ вѣ̑ченъ, то̀ не́гли ма́лѡ посла́блю тебѣ̀. Смотрѝ мою̀ винꙋ̀ ѿкꙋ́дꙋ въ тебѣ̀ ражда́юсѧ, и҆ на мою̀ подвиза́йсѧ ма́терь: не бо є҆ди́нꙋ во всѣ̑хъ и҆́мамъ. Во гро́бищахъ моли́сѧ ча́стѡ: ѻ҆́бразъ си́хъ неизглажда́емь живописꙋ́ѧ въ се́рдцѣ твое́мъ: томꙋ́ бо не напи́санꙋ бы́вшꙋ писа́ломъ поста̀, не побѣди́ши менѐ во вѣ̑къ.