СЛО́ВО К҃Г. Ѡ҆ безгла́внѣй горды́ни, въ не́мже и҆ ѡ҆ нечи́стыхъ по́мыслѣхъ хꙋ́лныхъ.

Горды́нѧ є҆́сть, бг҃а ѿверже́нїе: бѣсо́вско и҆з̾ѡбрѣ̑тенїе, ѹ҆ничиже́нїе человѣ́къ, ѡ҆сꙋжде́нїѧ ма́ти: похва́лъ и҆сча́дїе, безпло́дїѧ зна́менїе: по́мощи бж҃їѧ прогони́телство, и҆зстꙋпле́нїѧ предте́ча: паде́нїй вино́вна: бѣснова́нїѧ вина̀, ꙗ҆́рости и҆сто́чникъ. Лицемѣ̑рїѧ две́рь, бѣсѡ́въ ѹ҆твержде́нїе: грѣхѡ́въ храни́телница: немилосе́рдїѧ вино́вна: милосе́рдїѧ невѣ̑дѣнїе: словоистѧза́тель го́рекъ, сꙋдїѧ̀ безчеловѣ̑ченъ: бг҃а сопротивобо́рецъ: хꙋлы̀ ко́рень.

в҃. Нача́ло горды́ни, коне́цъ тщесла́вїѧ: среда́ же, ѹ҆ничиже́нїе бли́жнѧгѡ: трꙋдѡ́въ свои́хъ безстꙋ́дно и҆з̾ѧвле́нїе, хвала̀ въ се́рдцѣ: ѡ҆бличе́нїѧ не́нависть: коне́цъ же, ѿверже́нїе бж҃їѧ по́мощи, и҆ тща́нїѧ своегѡ̀ возноше́нїе: бѣсова́тъ нра́въ.

г҃. Ѹ҆слы́шимъ всѝ, ѿ ро́ва сегѡ̀ и҆збѣжа́ти хотѧ́щїи: ѿ бл҃годаре́нїѧ мно́жицею стра́сть сїѧ̀ па́жить ѡ҆бы́че прїима́ти: безстꙋ́днѣ бо ѿ нача̑лъ, бг҃а ѿверга́тисѧ не под̾ꙋща́етъ. Ви́дѣхъ бл҃годарѧ́щихъ бг҃ови ѹ҆сты̀, и҆ велехвалѧ́щихсѧ мꙋдрова́нїемъ: и҆ свидѣ̑телствꙋетъ сїѐ ꙗ҆́вѣ фарїсе́й ѻ҆́нъ, ре́къ (ле́стнѣ), бж҃е бл҃годарю̀ тебѣ̀.

д҃. И҆дѣ̑же паде́нїе дости́же, та́мѡ горды́нѧ предвсели́сѧ: возвести́тель бо пе́рвшагѡ, є҆́сть второ́е.

є҃. Предложи́ ми бы́ти двана́десѧть страсте́й безче́стїѧ: нѣ̑коего почте́нна слы́шахъ ре́кша. А҆́ще є҆ди́нꙋ и҆з̾ си́хъ, гл҃ю же возноше́нїе возлю́биши во́лею, то̀ ѻ҆на̀ и҆спо́лнитъ мѣ̑сто ѻ҆́нѣхъ є҆динона́десѧтихъ.

ѕ҃. Высокомꙋ́дръ мона́хъ, прекосло́витъ ѕѣлѡ̀: смиренномꙋ́дрый же, ника́коже прекосло́вити вѣ̑сть.

з҃. Не подкланѧ́етсѧ кѷпарі́съ, на землѝ ходи́ти: нижѐ мона́хъ высокосе́рдъ, послꙋша́нїе стѧжа́ти.

и҃. Мꙋ́жъ высокосе́рдъ, нача́лствовати жела́етъ: и҆́накѡ бо нѣ̑какѡ, поги́бнꙋти вконе́цъ, не мо́жетъ: па́че же не хо́щетъ.

ѳ҃. Гѡ́рдымъ гдⷭ҇ь проти́витсѧ: кто̀ про́чее си́хъ поми́ловати мо́жетъ; Нечи́стъ пред̾ гдⷭ҇емъ всѧ́къ высокосе́рдъ: и҆ кто̀ про́чее такова́го ѡ҆чи́стити мо́жетъ;

і҃. Наказа́нїе ѹ҆́бѡ го́рдꙋ є҆́сть паде́нїе: ѻ҆сте́нъ же бѣ̑съ: ѡ҆ставле́нїе же и҆зстꙋпле́нїе. И҆ ѿ пе́рвшихъ ѹ҆́бѡ, мно́жицею и҆ человѣ̑цы ѿ челѡвѣ̑къ и҆сцѣли́шасѧ: послѣ̑днее же, ѿ челѡвѣ̑къ неисцѣ̑лно є҆́сть.

а҃і. Ѿрѣва́ѧй ѡ҆бличе́нїе, стра́сть сїю̀ и҆з̾ѧви́лъ є҆́сть: притекі́й же, ѿ ѹ҆́зы сеѧ̀ разрѣше́нъ є҆́сть.

в҃і. А҆́ще без̾ и҆ны́ѧ стра́сти нѣ̑кто се́ю и҆ є҆ди́ною съ нб҃съ спадѐ, то̀ и҆спыта́ти подоба́етъ не ка́кѡ ли и҆ без̾ и҆ны́ѧ добродѣ̑тели смире́нїемъ на нб҃са̀ восходи́ти возмо́жно є҆́сть.

г҃і. Горды́нѧ є҆́сть, бога́тства и҆ по́тѡвъ поги́бель: воззва́ша, и҆ не бѣ̀ спаса́ѧй, всѧ́кѡ, занѐ съ горды́нею. Воззва́ша ко гдⷭ҇ꙋ, и҆ не ѹ҆слы́ша и҆́хъ: всѧ́кѡ, занѐ ви́нъ ѻ҆́нѣхъ на нѧ́же молѧ́хꙋсѧ не ѿсѣка́хꙋ. Бра́та гордѧ́щасѧ, ста́рецъ разꙋмѣва́телнѣйшъ, дх҃о́внѣ поꙋчѝ: ѻ҆́нъ же слѣпотствꙋ́ѧ, гл҃етъ: простѝ мѧ̀ ѻ҆́ч҃е, нѣ̑смь го́рдъ.

д҃і. Всепремꙋ́дрый же ѻ҆́нъ ста́рецъ къ немꙋ̀: и҆ ко́е, гл҃етъ, ча́до, ѹ҆каза́нїе ꙗ҆́вственше сегѡ̀ пода́лъ бы є҆сѝ на́мъ стра́сти сеѧ̀, па́че є҆́же рещѝ, нѣ̑смь го́рдъ.

є҃і. Ѕѣлѡ̀ таковы̑мъ прили́чествꙋетъ повинове́нїе, и҆ дебе́лше и҆ безче́стн̾ше пребыва́нїе: и҆ вышеесте́ственныхъ ѻ҆те́ческихъ и҆справле́нїй прочита́нїе: не́гли понѐ та́кѡ бꙋ́детъ недꙋ́гꙋющымъ си̑мъ ма́ла спасе́нїѧ наде́жда.

[Статия 2]

ѕ҃і. Сра́мъ є҆́сть ѡ҆ чꙋ́ждей ѹ҆́твари возноша́тисѧ: безꙋ́мїе же послѣ̑днее, ѡ҆ дарова́нїихъ бж҃їихъ кичи́тисѧ. Є҆ли̑ка тѝ и҆справлє́нїѧ пре́жде рожде́нїѧ твоегѡ̀ бы́ша, ѡ҆ тѣ̑хъ є҆ди́нѣхъ возноша́йсѧ: ꙗ҆̀же бо по рожде́нїи, бг҃ъ дарова̀, ꙗ҆́коже и҆ рожде́нїе. Є҆ли̑ка кромѣ̀ ѹ҆ма̀ добродѣ̑тєли и҆спра́вилъ є҆сѝ, то̀ ты̑ѧ и҆ є҆ди̑ны твоѧ̑ сꙋ́ть, ѹ҆́мъ бо бг҃ъ дарова́вый є҆́сть. Є҆ли̑ки кромѣ̀ тѣ̑ла показа́лъ є҆сѝ по́двиги, то̀ ѿ твоегѡ̀ тща́нїѧ и҆ то́чїю бы́ша, тѣ̑ло бо, нѣ̑сть твоѐ, но бж҃їе творе́нїе.

з҃і. Не дерза́й до́ндеже и҆зрече́нїе ѻ҆́но прїи́меши, зрѧ̀ ѻ҆́наго и҆ по возлежа́нїи въ черто́зѣ ѻ҆́нѣмъ рꙋка́ма и҆ нога́ма свѧзꙋ́ема и҆ во тмꙋ̀ кромѣ̑шнюю и҆згонѧ́ема.

и҃і. Не возвыша́й вы́ю, зе́мленъ сы́й: мно́зи бо и҆ съ нб҃съ све́ржени бы́ша, ст҃и и҆ невеще́ственни сꙋ́ще.

ѳ҃і. Є҆гда̀ вмѣще́нїе въ дѣ̑лателѣхъ свои́хъ бѣ̑съ се́й прїи́метъ, тогда̀ тѣ́мъ во снѣ̑хъ, и҆лѝ и҆ наѧ́вѣ ꙗ҆́кѡ во ѻ҆́бразѣ а҆́ки бы ст҃а а҆́гг҃ла и҆лѝ и҆ мч҃ника нѣ̑коего ꙗ҆влѧ́ѧсѧ, та̑инъ тѣ́мъ ѿкрове́нїе, и҆ дарова́нїй да́ръ подае́тъ: ꙗ҆́кѡ да прелсти́вшесѧ ѻ҆каѧ́ннїи сі́и, соверше́ннѣ ѿ ѹ҆ма̀ и҆спадꙋ́тъ.

к҃. А҆́ще и҆ безчи́слєнны смє́рти за хрⷭ҇та̀ претерпи́мъ, то̀ ни та́кѡ подоба́ющее и҆спо́лнихомъ: и҆́но бо є҆́сть кро́вь бж҃їѧ, а҆ и҆́но кро́вь рабѡ́въ: по досто́инствꙋ а҆ не по сꙋществꙋ̀.

к҃а. Соиспытꙋ́ще себѐ при́снѡ, и҆ и҆стѧзꙋ́юще къ бы́вшымъ пре́жде на́съ ѻ҆ц҃є́мъ и҆ свѣти́лѡмъ, не преста́нимъ: и҆ тогда̀ ѡ҆брѧ́щемъ себѐ ѿню́дъ ни слѣда̀ ѻ҆па́сна жи́телства настꙋпи́вшихъ, ни ѡ҆бѣ̑та сегѡ̀ преподо́бнѣ соблю́дшихъ: но є҆щѐ въ мїрстѣ̑мъ ѹ҆строе́нїи пребыва́ющихъ.

к҃в. Мона́хъ сво́йственнѣ є҆́сть, невы́симо ѻ҆́ко дꙋшѝ и҆ неподви́жно тѣ̑ла чꙋ́вство.

к҃г. Мона́хъ є҆́сть и҆́же сꙋпоста́тѡвъ а҆́ки ѕвѣре́й призыва́ѧй, и҆ раздража́ѧй внегда̀ бѣ̑гати ѿ негѡ̀.

к҃д. Мона́хъ є҆́сть, неразстоѧ́нно восхище́нїе ѹ҆ма̀, и҆ печа́ль жи́зни.

к҃є. Мона́хъ є҆́сть, ѹ҆сво́йствовавыйсѧ добродѣ̑тельми, ꙗ҆́коже и҆́нъ сластмѝ.

к҃ѕ. Мона́хъ є҆́сть, непреста́ненъ свѣ̑тъ, во ѻ҆́цѣ се́рдца.

к҃з. Мона́хъ є҆́сть, бе́здна смире́нїѧ, въ не́й всѧ́каго дꙋ́ха низри́нꙋвшъ и҆ потопи́вшъ.

к҃и. забве́нїе согрѣше́нїй, киче́нїе дѣ̑лаетъ: ѻ҆́нѣхъ бо па́мѧть, смиренномꙋ́дрїѧ вино́вна є҆́сть.

к҃ѳ. Горды́нѧ є҆́сть послѣ̑днее ѹ҆бо́жество дꙋшѝ, бога́тство (мечта́ющїѧ, и҆ свѣ̑тъ) мнѧ́щїѧ бы́ти во тмѣ̀.

л҃. Не то́чїю пред̾итѝ не ѡ҆ставлѧ́етъ скве́рнаѧ сїѧ̑, но и҆ съ высоты̀ сверга́етъ.

л҃а. Го́рдъ є҆́сть ши́покъ, внꙋ́трь ѹ҆́бѡ согни́вшъ, и҆з̾ внѣꙋ́дꙋ же красото́ю блеща́щсѧ.

л҃в. Мона́хъ го́рдъ, не востре́бꙋетъ бѣ̑са: са́мъ бо про́чее себѣ̀ бѣ̑съ и҆ сꙋпоста́тъ бы́сть.

л҃г. Чꙋ́жда ѹ҆́бѡ є҆́сть свѣ̑та тма̀: чꙋ́ждь же и҆ го́рдый, разли́чныѧ добродѣ̑тели.

л҃д. Въ сердца́хъ го́рдыхъ, роди́тисѧ и҆́мꙋтъ хꙋ̑лни глагѡ́ли: въ дꙋша́хъ же смире́нныхъ, нб҃сна видѣ́нїѧ.

л҃є. Гнꙋша́етсѧ со́лнца та́ть, го́рдъ же, кро́ткихъ ѹ҆ничижи́тъ.

л҃ѕ. Не ѹ҆вѣ̑дѣша са́мѣхъ себѐ не вѣ̑мъ ка́кѡ и҆з̾ го́рдыхъ мно́жайши: и҆ возмнѣ̑вшесѧ безстра́стни бы́ти, ѹ҆бо́жество своѐ во и҆схо́дѣ ѹ҆ви́дѣша.

л҃з. Се́ю ꙗ҆́тъ бы́вый, гдⷭ҇а востре́бꙋетъ: сꙋ́етно бо кромѣ̀ ѻ҆́нагѡ спасе́нїе человѣ̑ческо.

л҃и. Ꙗ҆хъ нѣ̑камѡ сїю̀ безгла́внꙋю преле́стницꙋ сꙋ́щꙋю въ се́рдцѣ мое́мъ, и҆ на ра́мꙋ ма́тере своеѧ̀ ꙗ҆здѧ́щꙋю: ꙗ҆̀же ѹ҆лови́въ ѹ҆́зою послꙋша́нїѧ, и҆ биче́мъ хꙋ́дости би́въ, вхо́дъ и҆́хъ въ менѐ и҆стѧ́зовахъ глаго́лати: тѣ̑мже и҆ бїє́мы сꙋ́ще глаго́лахꙋ: мы̀ нача́ла не и҆́мамы, ни рожде́нїѧ: нача̑лницы бо и҆ роди́тєлницы всѣ̑хъ страсте́й є҆смы̀. ра́тꙋетъ же на́съ не ма́лѡ сокрꙋше́нїе се́рдца повинове́нїемъ ражда́емо: нача́лствꙋємы же бы́ти ни ѿ чесогѡ̀ терпи́мъ: тѣ̑мже и҆ на нб҃сѣ̑хъ нача̑лницы сотво́ршесѧ ѿѻнꙋ́дꙋ ѿстꙋпи́хомъ: тѣ̑мже и҆ всѣ̑хъ соѡб̾ѧ́тнѣ рещѝ, сопротивлѧ́ющихсѧ смиренномꙋ́дрїю, мы̀ роди́тєлницы є҆смы̀: всѧ̑ бо ѻ҆́номꙋ содѣ́йствꙋющаѧ, на́мъ сопротивлѧ́ютсѧ: ѻ҆ба́че на нб҃сѝ возмого́хомъ, и҆ ка́мѡ ѿ лица̀ на́шегѡ ѹ҆бѣжи́ши; Мы̀ мно́жицею по безче́стїихъ, и҆ послꙋша́нїи, и҆ безгнѣ̑вїи, и҆ непамѧтоѕло́бїи, и҆ слꙋже́нїи, припослѣ̑дствовати ѡ҆быко́хомъ. На̑ша и҆сча̑дїѧ сꙋ́ть, падє́нїѧ дх҃о́вныхъ, гнѣ̑въ, клевета̀, го́ресть, ꙗ҆́рость, во́пль, хꙋла̀, лицемѣ̑рїе, не́нависть, за́висть, прекосло́вїе, своечи́нїе, непоко́рство. Є҆ди́но є҆́сть и҆ є҆ди́нственно, на не́же покꙋша́тисѧ не и҆́мамы си́лы, и҆ сїѐ тебѣ̀ бїє́мы сꙋ́ще глаго́лемъ: а҆́ще са́мъ себѐ пред̾ гдⷭ҇емъ чи́стѣ ѹ҆корѧ́еши, то̀ на́съ ꙗ҆́кѡ паꙋчи́нꙋ вмѣни́ши: занѐ, ко́нь ѹ҆́бѡ, ꙗ҆́коже зри́ши, горды́ни, є҆́сть тщесла́вїе, на не́же всѣдо́хъ: прпⷣбное же смире́нїе и҆ самоꙋкоре́нїе, посмѣе́тасѧ коню̀ и҆ вса́дникꙋ є҆гѡ̀, побѣ̑днꙋю ѻ҆́нꙋ пѣ̑снь со сла́достїю пою́ще: пои́мъ гдⷭ҇ви, сла́внѡ бо просла́висѧ: конѧ̀ и҆ вса́дника вве́рже въ мо́ре, и҆ въ бе́зднꙋ смире́нїѧ.

Два́десѧть тре́тїй степе́нь є҆́сть: возше́дый ѹ҆крѣпи́лсѧ є҆́сть, а҆́ще ѹ҆́бѡ и҆ взы́ти возмо́же.

[Статия 3]

Ѡ҆ несказа́нныхъ по́мыслѣхъ хꙋ́лныхъ.

л҃ѳ. Лю́та ко́рене и҆ ма́тере, лютѣ̑йшо и҆сча́дїе бы́ти въ предва́ршихъ слы́шахомъ: гл҃ю же, скве́рныѧ горды́ни, неизрече́нно хꙋлы̀ и҆сча́дїе: тѣ̑мже нꙋ́ждно є҆́сть томꙋ̀ на средꙋ̀ приведе́нꙋ бы́ти: не бо ѿ приклю́чшихсѧ є҆́сть, но ѹ҆́бѡ мно́гѡ и҆ всѣ̑хъ лю́тшъ вра́гъ и҆ сꙋпоста́тъ є҆́сть. и҆ є҆́же ѹ҆́бѡ лютѣ̑йшее, нижѐ ѹ҆до́бнѣ сказа́тисѧ и҆ и҆сповѣ̑стисѧ, и҆лѝ ѡ҆б̾ѧви́тисѧ могꙋ́що: тѣ̑мже мнѡ́зѣмъ мно́жицею и҆ ѿча́ѧнїе и҆ безнаде́жїе родило̀ є҆́сть: ꙗ҆́коже че́рвь во дре́вѣ всю̀ и҆́хъ наде́ждꙋ и҆стреби́вшо непреподо́бное сїѐ.

м҃. Сїѐ ѹ҆̀бо сїѐ всескве́рное ѡ҆бы́че мно́жицею, въ са̑маѧ та̑ ст҃а̑ѧ собра̑нїѧ, и҆ въ са́мый то́й стра́шный та̑инъ ѻ҆́нѣхъ ча́съ хꙋ́лити гдⷭ҇а, и҆ соверша́ємаѧ ст҃а̑ѧ. Ѿѻнꙋ́дꙋже наипа́че и҆ разꙋмѣва́емъ ꙗ҆́вѣ, не дꙋ́шꙋ на́шꙋ сꙋ́щꙋ беззакѡ́ннаѧ и҆ непостижи̑маѧ ѻ҆́на и҆ неизречє́нна словеса̀ внꙋ́трьꙋдꙋ провѣща́вшꙋю: но бг҃оненави́стнаго бѣ̑са съ нб҃съ бѣжа́вшаго: за є҆́же и҆ та́мѡ гдⷭ҇а хꙋла́ми по мнѣ̑нїю (своемꙋ̀) ѹ҆да́рити. А҆́ще бо моѧ̑ сꙋ́ть безчє́стнаѧ ѻ҆́на и҆ неподѡ́бнаѧ словеса̀, то̀ ка́кѡ да́ръ ѻ҆́нъ прїе́мъ покланѧ́юсѧ; Ка́кѡ ѹ҆корѧ́ти и҆ бл҃гослови́ти могꙋ̀;

м҃а. Мно́гихъ преле́стникъ се́й и҆ дꙋшетли́тель во и҆зстꙋпле́нїе ѹ҆ма̀ приведѐ мно́жицею: ниеди́нъ бо и҆́нъ по́мыслъ та́кѡ неꙋдобоисповѣ̑дꙋемь є҆́сть ꙗ҆́коже се́й: тѣ̑мже мно́жицею со мно́зѣми и҆ состарѣ̑лсѧ є҆́сть: ничто́же бо та́кѡ бѣсовѡ́мъ и҆ помыслѡ́мъ крѣ̑пость на ны̀ дае́тъ, ꙗ҆́коже є҆́же сїѧ̑ неисповѣ̑дꙋємы въ се́рдцѣ пита́ти и҆ таи́ти.

м҃в. Никто́же за по́мыслы хꙋ̑лны, себѐ вино́вна бы́ти да вознепщꙋ́етъ: сердцевѣ̑децъ бо є҆́сть гдⷭ҇ь, и҆ вѣ̑сть не на́шѧ бы́ти, но врагѡ́въ на́шихъ такѡвы́ѧ глаго́лы.

м҃г. Є҆́же ѹ҆пива́тисѧ, вино́вно є҆́сть сегѡ̀ є҆́же претыка́тисѧ: и҆ є҆́же гордѣ̑тисѧ, вино́вно є҆́сть неподо́бныхъ пѡ́мыслъ: и҆ за сїѐ ѹ҆́бѡ є҆́же претыка́тисѧ, непови́ненъ є҆́сть преткнꙋ́выйсѧ: за сїе́ же є҆́же ѹ҆пива́тисѧ, всѧ́кѡ мꙋ́ченъ бꙋ́детъ.

м҃д. На мл҃и́твѣ ста́вшымъ на́мъ, нечи́стїи и҆ неизрече́ннїи по́мысли ѻ҆́ни на ны̀ воста́ша: и҆ мл҃твꙋ и҆спо́лнившымъ, а҆́бїе ѿидо́ша: съ нера́тꙋющимисѧ бо съ ни́ми, не ѡ҆быко́ша ра́товатисѧ.

м҃є. Не то́чїю бг҃а, и҆ бжⷭ҇твєннаѧ всѧ̑ безбо́жный се́й хꙋ́литъ, но и҆ стꙋ̑днѣйша нѣ́каѧ и҆ неподѡ́бна словеса̀ въ на́съ вѣща́етъ мы́сленнѣ: ꙗ҆́кѡ да и҆лѝ мл҃и́твꙋ ѡ҆ста́вимъ, и҆лѝ са́мѣхъ себѐ ѿча́емсѧ.

м҃ѕ. Мно́зѣхъ ѹ҆́бѡ ѿ мл҃и́твы возбрани́лъ є҆́сть, мно́зѣхъ же ѿ та̑инъ ѿлꙋчи́лъ є҆́сть: нѣ̑кихъ ѹ҆́бѡ тѣлеса̀ печа́лїю и҆ста́ѧ, и҆нѣ̑хъ же посто́мъ ѹ҆мꙋ́чилъ є҆́сть лꙋка́вый се́й и҆ безчеловѣ̑чный мꙋчи́тель: и҆ ниеди́но тѣ́мъ послабле́нїе дадѐ.

м҃з. Не то́чїю въ сꙋ́щихъ въ мі́рѣ, но и҆ мона́шеское житїѐ проходѧ́щихъ сїѐ содѣ̑лавъ: ниеди́но тѣ́мъ про́чее спасе́нїе и҆мѣ̑ти совѣ̑тꙋѧ: но и҆ невѣ̑рныхъ и҆ є҆́ллинъ всѣ̑хъ ѻ҆каѧ́ншихъ бы́ти со и҆зрече́нїемъ глаго́лѧ.

м҃и. И҆́же дꙋ́хомъ хꙋлы̀ стꙋжа́емый, и҆ ѿ негѡ̀ и҆зба́витисѧ хотѧ́й, да позна́етъ и҆звѣ̑стнѡ, не дꙋ́шꙋ свою̀ вино́внꙋ бы́ти таковы́хъ помыслѡ́въ, но са́маго нечи́стаго бѣ̑са, нѣ̑когда ко гдⷭ҇ꙋ глаго́лавшаго: сїѧ̑ всѧ̑ тебѣ̀ да́мъ, а҆́ще па́дъ поклони́шимисѧ. Тѣ̑мже и҆ мы̀ ѹ҆ничижа́юще є҆го̀, и҆ ника́коже ꙗ҆̀же ѿ негѡ̀ глаго́лємаѧ въ радѣ̑нїи и҆мꙋ́ще, рце́мъ: и҆дѝ за мно́ю сатано̀, гдⷭ҇ꙋ бг҃ꙋ моемꙋ̀ поклоню́сѧ, и҆ томꙋ̀ є҆ди́номꙋ послꙋжꙋ̀: твоѧ́ же ѡ҆брати́тсѧ болѣ̑знь и҆ сло́во твоѐ на главꙋ̀ твою̀, и҆ на ве́рхъ тво́й хꙋла̀ твоѧ̀ сни́детъ и҆ въ ны́нѣшнїй и҆ въ бꙋ́дꙋщїй вѣ̑къ.

м҃ѳ. И҆́же кромѣ̀ предрече́ннагѡ ѻ҆́браза бѣ̑са хꙋлы̀ боре́нїемъ побѣди́ти хотѧ́й, подо́бенъ є҆́сть рꙋка́ма свои́ма мо́лнїю ѹ҆держа́ти покꙋша́ющемꙋсѧ: ка́кѡ бо и҆ пости́гнетъ и҆лѝ противорече́тъ, и҆лѝ боро́тисѧ и҆́мать со внеза́пꙋ въ се́рдцѣ а҆́ки вѣ̑тръ преходѧ́щимъ, и҆ мгнове́нїѧ скорѣ̑е сло́во глаго́лющимъ, и҆ а҆́бїе и҆счеза́ющимъ; Вси́ бо сꙋпоста́ти и҆ стоѧ́тъ, и҆ противобо́рютсѧ, и҆ коснѧ́тъ, и҆ вре́мѧ подаю́тъ проти́вꙋ тѣ́мъ боро́тисѧ подвиза́ющемꙋсѧ: се́й же нѝ, но кꙋ́пнѡ со є҆́же ꙗ҆ви́тисѧ, ѿстꙋпи́лъ є҆́сть, и҆ кꙋ́пнѡ со є҆́же съ ни́мъ проглаго́лати, пре́йде.

н҃. Мно́жицею въ про́стшихъ и҆ неѕло́бившихъ ѹ҆мѣ̀, таковы́й бѣ̑съ пребыва́ти ѡ҆бы́че: и҆́же и҆ наипа́че лю́тѣе и҆нѣ̑хъ, мѧтꙋ́тсѧ и҆ смꙋща́ютсѧ: въ ни́хже и҆ гл҃емъ, сво́йственнѣ не ѿ возноше́нїѧ, но ѿ за́висти бѣсѡ́въ всемꙋ̀ семꙋ̀ быва́ти.

н҃а. Ѿ є҆́же сꙋди́ти и҆ ѿ є҆́же ѡ҆сꙋжда́ти бли́жнѧго преста́нимъ, и҆ пѡ́мыслъ хꙋ́лныхъ не ѹ҆бои́мсѧ: вина́ бо и҆ ко́рень є҆́сть, втора́гѡ пе́рвшее.

н҃в. Ꙗ҆коже въ домꙋ̀ затворе́нъ сы́й, внѣ̀ преходѧ́щихъ словеса̀ слы́шитъ, са́мъ съ ни́ми не вѣща́ѧ: та́кѡ и҆ дꙋша̀ въ себѣ̀ пребыва́ющи, хꙋлы̑ бѣ̑са сегѡ̀ слы́шащи смꙋща́етсѧ, ꙗ҆̀же вѣща́етъ сквозѣ̀ тꙋ̀ преходѧ́щъ.

н҃г. Ѹ҆ничижи́вый сего̀, ѿ стра́сти сеѧ̀ свободи́сѧ: и҆́накѡ же съ ни́мъ боро́тисѧ ѹ҆хищрѧ́ѧй, въ коне́цъ подлежи́тъ. И҆́же словеса̀ дꙋхѡ́въ ѹ҆держа́ти хотѧ́й, подо́бенъ є҆́сть вѣ̑тры затворѧ́ющемꙋ.

н҃д. Мона́хъ тщали́въ, ѿ сегѡ̀ стꙋжа́емь бѣ̑са до двадесѧ́тагѡ лѣ̑та, плѡ́ти своѧ̑ поще́нми и҆ бдѣ̑нми и҆ста́ѧ. Да ꙗ҆́кѡ ниеди́нꙋ по́льзꙋ ѡ҆щꙋтѝ, ше́дъ и҆ стра́сть сїю̀ на хартїѝ написа́въ, ст҃ꙋ нѣ̑коемꙋ мꙋ́жꙋ подадѐ, на лицѣ̀ лежа̀ и҆ на него̀ взира́ти не могі́й: и҆ ꙗ҆́коже прочтѐ ста́рецъ ѻ҆́нъ, ѡ҆скла́бисѧ: и҆ возста́вивъ бра́та сего̀, гл҃етъ къ немꙋ̀: возложѝ ча́до рꙋ́кꙋ твою̀ на мою̀ вы́ю: и҆ ꙗ҆́коже сїѐ бра́тъ то́й сотворѝ, гл҃етъ вели́кїй ѻ҆́нъ: на вы́и мое́й бра́те грѣ̑хъ се́й да бꙋ́детъ, є҆ли̑ка лѣ́та и҆ сотворѝ, и҆ сотвори́тъ въ тебѣ̀: то́чїю ты̀ того̀ въ радѣ̑нїи не ктомꙋ̀ и҆мѣ̑й. И҆ и҆звѣ̑ствоваше таковы́й, ꙗ҆́кѡ не пре́жде и҆з̾ ке́ллїи ста́рца ѻ҆́нагѡ и҆зы́де, доне́лѣже стра́сть ѻ҆́на неви́дима бы́сть. Сегѡ̀ во и҆скꙋ́сѣ бы́вый, мнѣ̀ и҆сповѣ̑да бл҃годарѧ̀ хрⷭ҇то́ви.

Побѣ̑дꙋ стра́сти сеѧ̀ прїе́мый, ѿри́нꙋлъ є҆́сть горды́ню.