СЛО́ВО К҃Є. Ѡ҆ погꙋбле́нїи страсте́й вы́шнѣйшемъ смиренномꙋ́дрїи, въ неви́димомъ чꙋ́вствѣ быва́ющемъ: и҆́же восхожде́нїемъ (си́мъ) возмо́же, да дерза́етъ: ѹ҆чт҃лѧ бо хрⷭ҇та̀ подража́въ, спасе́нъ бы́сть.
И҆́же любвѐ гдⷭ҇ни сво́йственнѣ, и҆ смиренномꙋ́дрїѧ (ст҃а́гѡ) подоба́телнѣ, и҆ бл҃же́нны чистоты̀ вои́стиннꙋ, и҆ просвѣще́нїѧ бж҃їѧ ꙗ҆́вственнѣ и҆ стра́ха є҆гѡ̀ нело́жнѣ, и҆ и҆звѣще́нїѧ се́рдца чи́стѣ ѡ҆щꙋще́нїе и҆ дѣ̑йство сло́вомъ ви́димымъ ска́зовати хотѧ́й: и҆ не вкꙋси́вшихъ ѿ тогѡ̀, сказа́нїемъ ѡ҆ таковы́хъ, просвѣща́ти мнѧ́йсѧ: подо́бно нѣ̑что твори́тъ (мꙋ́жꙋ), не вкꙋси́вшымъ ме́да никогда́же, сла́дость є҆гѡ̀ словесы̀ и҆ приꙋка́зы ска́зовати хотѧ́щемꙋ. Но вторы́й ѹ҆́бѡ всꙋ́е любосло́витъ: да не рекꙋ̀ лишшесло́витъ: пе́рвшїй же, и҆лѝ не и҆скꙋ́сенъ ѡ҆ сказа́нїи свое́мъ є҆́сть, и҆лѝ ѿ тщесла́вїѧ лю́тѣ нарꙋга́емь быва́етъ.
в҃. Предложи́ло є҆́сть сло́во сїѐ, сокро́вище на и҆стѧза́нїе, въ скꙋде́лныхъ сосꙋ́дѣхъ, па́че же въ тѣлесѣ̑хъ соблюде́но сꙋ́ще: всѧ́комꙋ сло́вꙋ сво́йствомъ недоразꙋмѣва́емо пребыва́ющо. Є҆ди́но же свы́шнее надписа́нїе непостижи́мо ѡ҆блага́емо: мно́го и҆ безконе́чно сло́вомъ и҆́щꙋщымъ и҆спыта́нїе и҆ трꙋ́дъ подава́ющо: бѧ́ше же рече́нїе ѻ҆́но, си́це, ст҃о́е смире́нїе.
г҃. Є҆ли́цы дх҃омъ бж҃їимъ во́дѧтсѧ, сі́и съ на́ми на ѹ҆́мный се́й и҆ всепремꙋ́дрый да совни́дꙋтъ сосѣда́лище: скрижа̑ли ра́зꙋма бг҃опи̑санны съ собо́ю въ рꙋка́хъ приносѧ́ще ѹ҆́мнѣ: и҆ снидо́хомсѧ, и҆ соиспыта́хомъ, и҆ и҆стѧза́хомъ, честна́гѡ сегѡ̀ надписа́нїѧ си́лꙋ. И҆ ѻ҆́въ ѹ҆́бѡ гл҃аше, забве́нїе бы́ти и҆справле́нїй внима́телно: и҆́нъ же, є҆́же всѣ̑хъ послѣ̑дн̾ша и҆ грѣ̑шн̾ша себѐ вмѣнѧ́ти: и҆́нъ, позна́нїе ѹ҆мꙋ̀ не́мощи своеѧ̀ и҆ безси́лїѧ: и҆́нъ, є҆́же предварѧ́ти бли́жнѧго въ раздраже́нїихъ, и҆ разорѧ́ти пре́жде гнѣ̑въ: и҆́нъ па́ки, бл҃года́ти бж҃їѧ и҆ млⷭ҇рдїѧ позна́нїе: и҆́нъ, сокрꙋше́нны дꙋшѝ чꙋ́вство, и҆ во́ли своеѧ̀ ѿрече́нїе.
д҃. А҆́зъ же всѧ̑ слы́шавъ, и҆ въ себѣ̀ та̑ разсмотре́ннѣ же и҆ тре́звеннѣ и҆стѧза́въ, бл҃же́нное ѻ҆́нагѡ чꙋ́вство слꙋ́хомъ разꙋмѣва́ти не возмого́хъ: тѣ̑мже и҆ послѣ̑днїй всѣ̑хъ, ꙗ҆́кѡ пе́съ ѿ крꙋпи́цъ трапе́зы разꙋмѣва́телныхъ ѻ҆́нѣхъ и҆ бл҃же́нныхъ, па́дающихъ ѿ ѹ҆́стъ и҆́хъ собра́въ, ѡ҆ то́мъ ѡ҆предѣлѧ́ѧ, рѣ̑хъ. Смиренномꙋ́дрїе є҆́сть, без̾име́нна блгⷣть дꙋшѝ: въ є҆ди́нѣхъ и҆́менна, и҆скꙋ́съ ѻ҆́нъ прїе́мшихъ: несказа́нно бога́тство: бж҃їе и҆менова́нїе и҆ подаѧ́нїе: наꙋчи́тесѧ бо, гл҃етъ, не ѿ а҆́гг҃ла, не ѿ человѣ̑ка, не ѿ кни́ги, но ѿ менѐ: то́есть, ѿ моегѡ̀ въ ва́съ ѹ҆свое́нїѧ, и҆ ѡ҆сїѧ́нїѧ, и҆ дѣ̑йства: ꙗ҆́кѡ кро́токъ є҆́смь и҆ смире́нъ се́рдцемъ, и҆ по́мысломъ и҆ мꙋдрова́нїемъ: и҆ ѡ҆брѧ́щете поко́й ѿ бра́ней, и҆ ѡ҆блегче́нїе ѿ пѡ́мыслъ дꙋша́мъ ва́шымъ.
є҃. И҆́но є҆́сть прпⷣбнагѡ сегѡ̀ вїногра́да видѣ̑нїе въ зимѣ̀ страсте́й є҆щѐ: и҆ и҆́но въ веснѣ̀ про́чее плодѡ́въ: и҆ и҆́но є҆́же въ лѣ̑тѣ добродѣ̑телей: а҆́ще и҆ во є҆ди́но всѧ̑ тогѡ̀ видѣ́нїѧ стека́ютсѧ весе́лїе и҆ плодоно́сїе: тѣ̑мже и҆ а҆́ки сво́йствєнна зна́мєнїѧ и҆ примѣ́ты плодѡ́въ и҆́мꙋтъ: занѐ є҆гда̀ ѹ҆́бѡ въ на́съ гро́здъ прпⷣбнагѡ сегѡ̀ процвѣта́ти на́чнетъ, то̀ ненави́димъ а҆́бїе съ трꙋдо́мъ всѧ́кꙋ человѣ̑ческꙋ сла́вꙋ и҆ похвалꙋ̀, ꙗ҆́рость и҆ гнѣ̑въ ѿ себѐ и҆згонѧ́юще: пред̾ꙋспѣва́ющей же про́чее цр҃и́цѣ се́й добродѣ̑телей дх҃о́внымъ во́зрастомъ въ дꙋшѝ, въ ничто́же, па́че же въ ме́рзость, всѧ̑ ѿ на́съ сотворѧ́ємаѧ бл҃га̑ѧ вмѣнѧ́емъ, на всѧ́къ де́нь прилага́ти па́че къ бре́мени невѣ̑домымъ расточе́нїемъ непщꙋ́юще: ѡ҆ бога́тствѣ же приходѧ́щихъ въ ны̀ бжⷭ҇твенныхъ дарова́нїй, ꙗ҆́кѡ прило́зѣ мно́гшїѧ мꙋ́ки, ꙗ҆́кѡ не сꙋ́щымъ достѡ́йнымъ тѣ̑хъ (себѣ̀) зазира́емъ: тѣ̑мже тогда̀ пребыва́етъ и҆ ѹ҆́мъ некра́домъ, во влага́лищи смире́нїѧ себѐ затвори́въ, то́поты то́чїю и҆ и҆́гры та́тей си́хъ слы́ша, и҆ ѿ ниеди́нагѡ и҆з̾ си́хъ и҆скꙋше́нъ бы́ти могі́й: поне́же смире́нїе є҆́сть сокро́вищнаѧ хра́мина непокꙋша́емаѧ.
ѕ҃. Ѡ҆ цвѣтоно́сїи ѹ҆́бѡ про́чее и҆ пред̾ꙋспѣ̑ѧнїи ма́лѣ присноцвѣтꙋ́щагѡ сегѡ̀ плода̀ малосло́вїемъ любомꙋ́дрствовати дерзнꙋ́хомъ: ка́ѧ же є҆́сть про́чее соверше́ннаѧ ѻ҆́на по́честь сщ҃е́ннагѡ сегѡ̀, гдⷭ҇а сво́йственнїи гдⷭ҇ни вопроси́те. Ѡ҆ коли́чествѣ ѹ҆́бѡ про́чее бога́тства сегѡ̀, гл҃ати нѣ̑сть возмо́жно: ѡ҆ ка́чествѣ же, невозмо́жнѣе сказа́ти: ѡ҆ба́че ѡ҆ сво́йствѣ по тайновше́дшемꙋ въ ны̀ ра́зꙋмꙋ гл҃ати покꙋ́симсѧ.
з҃. Покаѧ́нїе, попече́нно ѻ҆ба́че, и҆ пла́чь ѡ҆чище́нъ ѿ всѧ́кїѧ скве́рны, и҆ всепрпⷣбное вводи́мыхъ смире́нїе, толи́кѡ ѿ дрꙋгъдрꙋ́га разли́чїе и҆ раздѣле́нїе и҆́мꙋтъ, є҆ли́кѡ и҆́мать ѿ хлѣ̑ба, ква́съ, и҆ мꙋка̀. занѐ сотрива́етсѧ ѹ҆́бѡ дꙋша̀ и҆ и҆стнива́етсѧ покаѧ́нїемъ и҆звѣ̑стнымъ: соединѧ́етсѧ же нѣ̑какѡ, и҆ да та́кѡ рекꙋ̀, смѣшава́етсѧ со бг҃омъ, водо́ю пла́ча нело́жна: ѿ негѡ́же и҆ возже́гшо ѻ҆́гнь гдⷭ҇нь, хлѣботвори́тсѧ и҆ ѹ҆твержда́етсѧ бл҃же́нное смире́нїе безква́сное и҆ без̾ дме́нїѧ: тѣ̑мже и҆ ꙗ҆́кѡ во є҆ди́нꙋ си́лꙋ и҆ дѣ̑йство стека́ющаѧсѧ съ собо́ю всепрпⷣбнаѧ сїѧ̀ треплете́ннаѧ вери́га, па́че же дꙋга̀, своѧ̑ нѣ̑какѡ и҆ дѣ́йства и҆ свѡ́йства и҆́мать: и҆ ко́елибо є҆ди́ныѧ ре́клъ бы є҆сѝ бы́ти зна́менїе, то сїѐ и҆ дрꙋгі́ѧ ѡ҆брѣ̑лъ бы є҆сѝ быва́ющо познава́нїе: тѣ̑мже и҆ вкра́тцѣ рече́нное ѹ҆каза́нїемъ ѹ҆тверди́ти покꙋшꙋ́сѧ.
и҃. Сво́йство бо до́брыѧ сеѧ̀ и҆ досточꙋ́дныѧ тро́ицы пе́рвое ѹ҆́бѡ и҆ и҆зрѧ́дно є҆́сть, безче́стїѧ под̾ѧ́тїе ра́достнѣйшо, воздѣ̑нныма рꙋка́ма дꙋшѝ прїе́млющей и҆ ѡ҆б̾е́млющей то̀ ꙗ҆́кѡ ѹ҆толѧ́ющо и҆ попалѧ́ющо недꙋ́ги дꙋшє́вны, и҆ грѣхѝ вели̑ки: второ́е же по ѻ҆́номъ є҆́сть, ꙗ҆́рости всѧ́кїѧ поги́бель, и҆ смире́нїе въ тоѧ̀ ѹ҆ме́ртїи: тре́тїй же степе́нь є҆́сть и҆зрѧ́днѣйшъ, свои̑мъ дѡ́брымъ невѣ̑рованїе вѣ̑рно, и҆ всегда́шнѧ наꙋче́нїѧ жела́нїе.
ѳ҃. Кончи́на ѹ҆́бѡ зако́на и҆ прⷪ҇рѡ́къ хрⷭ҇то́съ въ пра́вдꙋ всѧ́комꙋ вѣ̑рꙋющемꙋ: коне́цъ же страсте́й нечи́стыхъ, тщесла́вїе и҆ горды́нѧ, всѧ́комꙋ невнима́ющемꙋ: и҆́хже потреби́телница сꙋ́щи мы́сленнаѧ сїѧ̀ є҆ле́нь, храни́тъ сожи́телѧ своего̀ всѧ́кагѡ ꙗ҆́да смертоно́сна не прїима́телна. Гдѣ̑ бо въ не́мъ лицемѣ̑рїѧ ꙗ҆́дъ ꙗ҆влѧ́етсѧ; Гдѣ̀ клевєты̀; Гдѣ̀ ѕмі́й въ ꙗ҆́звинѣ кры́етсѧ; А҆ не па́че ѿ землѝ се́рдца и҆з̾ѧвлѧ́емь, и҆ ѹ҆мерщвлѧ́емь и҆ потреблѧ́емь быва́етъ;
і҃. Нѣ̑сть въ совокꙋпле́нїи є҆гѡ̀ не́нависти ꙗ҆вле́нїе, ни прекосло́вїѧ ви́дъ, ни непоко́рства вонѧ̀, ра́звѣ то́чїю и҆дѣ̑же сло́во ѡ҆ вѣ̑рѣ быва́етъ.
а҃і. И҆́же съ ни́мъ невѣ̑стнѣ соедини́выйсѧ, ти́хъ, кро́токъ, ѹ҆добоꙋмиле́нъ, милосе́рдъ, па́че не́же всѧ̑ ти́хостенъ, ра́достенъ, бл҃гопокорли́въ, безпеча́ленъ, бо́дръ, нелѣ̑ностивъ є҆́сть: и҆ что̀ подоба́етъ мнѡ́га гл҃ати, безстра́стенъ: є҆лма̀ во смире́нїи на́шемъ помѧнꙋ̀ ны̀ гдⷭ҇ь, и҆ и҆зба́вилъ ны̀ є҆́сть ѿ врагѡ́въ, и҆ страсте́й и҆ скве́рнъ на́шихъ.
в҃і. Мона́хъ смиренномꙋ́дръ, не возлюбопы́тствꙋетъ неизречє́нна: го́рдый же, возлюбопы́тствꙋетъ сꙋдбы̑.
г҃і. Нѣ̑коего и҆з̾ разꙋмѣва́телнѣйшихъ бра́тїй ѻ҆чеви́днѣ бѣ̑сове пристꙋ́плше ѹ҆блажи́ша: премꙋ́дрый же ѻ҆́нъ гл҃етъ къ ни̑мъ: а҆́ще ѹ҆́бѡ ѿ є҆́же похвалѧ́ти менѐ въ дꙋшѝ мое́й преста́ли бы́сте, то̀ ѿ ѿше́ствїѧ ва́шегѡ вели́ка бы́ти себѐ разꙋмѣ̑лъ бы́хъ: а҆́ще ли же похвалѧ́юще не престае́те, то̀ ѿ похвалы̀ ва́шеѧ, нечистотꙋ̀ свою̀ разсмотрѣва́ю: нечи́стъ бо пред̾ гдⷭ҇емъ всѧ́къ высокосе́рдъ. И҆лѝ ѹ҆̀бо ѿходи́те, и҆ сѐ вели́къ бы́хъ: и҆лѝ похвалѧ́йте, и҆ чрез̾ (мно́жае) ва́съ смире́нїе стѧжава́ю: и҆ ѹ҆жа́сшесѧ (а҆́бїе) ѡ҆ недоꙋмѣ̑нїи се́мъ и҆счезо́ша.
д҃і. Да не бꙋ́детъ дꙋша̀ твоѧ̀ ро́въ животворѧ́щїѧ сеѧ̀ воды̀, ѻ҆вогда̀ ѹ҆́бѡ сїю̀ и҆сточа́ющи, ѻ҆вогда́ же напроти́въ престаю́щи ѿ зно́ѧ сла́вы и҆ возноше́нїѧ: но и҆сто́чникъ безстра́стїѧ, рѣ̑кꙋ нищеты̀ и҆з̾ себѐ вы́нꙋ производѧ́щъ.
є҃і. Вѣ̑ждь, ѽ дрꙋ́же, ꙗ҆́кѡ ѹ҆дѡ́лїѧ сїѧ̑ ѹ҆множа́ютъ пшени́цꙋ, и҆ пло́дъ дх҃о́венъ въ себѣ̀. Ѹ҆до́лїе є҆́сть, дꙋша̀ смире́нна посредѣ̀ го́ръ, трꙋдѡ́въ и҆ добродѣ̑телей, без̾ возноше́нїѧ при́снѡ и҆ неподви́жима пребыва́ющи. Не пости́хсѧ, ни бдѣ̑хъ, ни на землѝ лега́хъ: но смири́хсѧ, (гл҃етъ), и҆ спасе́ мѧ ско́рѡ гдⷭ҇ь.
[Статия 2]
ѕ҃і. Покаѧ́нїе ѹ҆́бѡ, возставлѧ́етъ: пла́чь же, въ нб҃са̀ ѹ҆дарѧ́етъ: прпⷣбное же смире́нїе, ѿверза́етъ: а҆́зъ же гл҃ю и҆ покланѧ́юсѧ трⷪ҇цѣ во є҆ди́ницѣ, и҆ є҆ди́ницѣ въ трⷪ҇цѣ.
з҃і. Всѧ̑ ѹ҆́бѡ ви̑димаѧ, просвѣща́етъ со́лнце: всѧ̑ же сло́вомъ содѣва́ємаѧ, ѹ҆твержда́етъ смире́нїе. Не присꙋ́тствꙋющꙋ свѣ̑тꙋ, всѧ̑ мра̑чна сꙋ́ть: и҆ не присꙋ́тствꙋющꙋ смиренномꙋ́дрїю, всѧ̑ на̑ша сꙋ́єтна сꙋ́ть.
и҃і. Є҆ди́но во все́й тва́ри мѣ̑сто, є҆ди́ною ви́дѣло є҆́сть со́лнце: и҆ є҆ди́нъ по́мыслъ, мно́жицею смире́нїе роди́лъ є҆́сть. Въ є҆ди́нъ и҆ є҆ди́нственъ де́нь ве́сь мі́ръ возра́довасѧ: и҆ є҆ди́на є҆́сть сїѧ̀ добродѣ̑тель бѣ̑сы неподража́ема.
ѳ҃і. И҆́но є҆́сть є҆́же возноша́тисѧ, и҆ и҆́но є҆́же не возноша́тисѧ, и҆ и҆́но є҆́же смирѧ́тисѧ: занѐ, ѻ҆́въ ѹ҆́бѡ сꙋ́дитъ ве́сь де́нь: ѻ҆́въ же не сꙋ́дитъ, но не ѹ҆́бѡ и҆ себѐ ѡ҆сꙋжда́етъ: ѻ҆́въ же, неѡсꙋжде́нъ сы́й, вы́нꙋ са́мъ себѐ ѡ҆сꙋжда́етъ.
к҃. И҆́но є҆́сть, є҆́же смиренномꙋ́дрствовати: и҆ и҆́но є҆́же подвиза́тисѧ смиренномꙋ́дрствовати: и҆ и҆́но, є҆́же похвалѧ́ти смиренномꙋ́драго. Пе́рвое ѹ҆́бѡ, соверше́нныхъ є҆́сть, второ́е же, пѡслꙋ́шникъ и҆́стинныхъ: тре́тїе же всѣ̑хъ вѣ̑рныхъ.
к҃а. И҆́же внꙋ́трєннѧѧ смири́вый, ѹ҆стна́ма ѡ҆крада́емь не быва́етъ: чесогѡ́ бо не и҆́мать сокро́вище ѻ҆́но, две́рь сїѧ̀ не произно́ситъ.
к҃в. Ѹ҆едине́нъ ко́нь, мно́жицею тещѝ мни́тсѧ: соста́дствꙋѧ же, тогда̀ ко́сность свою̀ позна̀.
к҃г. А҆́ще не ктомꙋ̀ ѡ҆ є҆сте́ственныхъ по́мыслъ велехва́литсѧ, то̀ нача́ло здра́вїѧ є҆́сть зна́менїе (сїѐ): а҆ доне́лѣже смра́да ѻ҆́нагѡ ѡ҆щꙋща́етъ, то вонѝ мѵ́ра не ѡ҆щꙋща́етъ.
к҃д. Не ѹ҆кори́тъ, не и҆́мать сꙋди́ти, не и҆́мать нача́лствовати, не и҆́мать премꙋ́дрствовати рачи́тель мо́й, прпⷣбное сїѐ речѐ, до́ндеже мнѣ̀ совокꙋпи́тсѧ: по совокꙋпле́нїи бо мое́мъ, томꙋ̀ про́чее зако́нъ не лежи́тъ.
к҃є. Нѣ̑коемꙋ мꙋ́жꙋ подви́жникꙋ, и҆з̾ тща́щихсѧ къ бл҃же́нномꙋ семꙋ̀, похвалꙋ̀ въ се́рдцѣ непреподо́бнїи ѡ҆́тай всѣ̑ѧша бѣ̑сове: ѻ҆́нъ же ѹ҆хищрѧ́етъ ѿ бжⷭ҇твенна вдохнове́нїѧ дꙋхѡ́въ лꙋка́вство побѣди́ти бл҃гочести́вою хи́тростїю: и҆ воста́въ ѹ҆́бѡ, написꙋ́етъ на стѣнѣ̀ ке́ллїи своеѧ̀ высоча́йшихъ добродѣ̑телей наречє́нїѧ: гл҃ю же, соверше́нныѧ любвѐ, а҆́гг҃лскагѡ смиренномꙋ́дрїѧ, чи́стыѧ мл҃и́твы, нетлѣ̑нныѧ чистоты̀, и҆ таковы́хъ. Внегда̀ ѹ҆́бѡ того̀ по́мысли ѻ҆́ни похвалѧ́ти начина́хꙋ, гл҃аше къ ни̑мъ: грѧди́мъ ко ѡ҆бличе́нїю: и҆ приходѧ̀ про́чее, наречє́нїѧ ѻ҆́на чтѧ́ше: и҆ вопїѧ́ше къ себѣ̀: внегда̀ и҆ сїѧ̑ стѧ́жеши, ѹ҆вѣ̑ждь ꙗ҆́кѡ дале́че є҆сѝ є҆ще ѿ бг҃а.
к҃ѕ. Ка́ѧ ѹ҆́бѡ є҆́сть со́лнца сегѡ̀ си́ла и҆ сꙋщество̀, рещѝ мы̀ не мо́жемъ: ѿ дѣ̑йствъ же є҆гѡ̀ про́чее и҆ сво́йствъ, сꙋ́щее въ не́мъ сꙋщество̀ ꙗ҆ви́хомъ.
к҃з. Смиренномꙋ́дрїе є҆́сть, покро́въ бжⷭ҇твенъ ра́ди незрѣ̑нїѧ свои́хъ и҆справле́нїй. Смиренномꙋ́дрїе є҆́сть, бе́здна хꙋ́дости, всѣ̑ми та́тьми сꙋ́щи непокꙋша́емаѧ. Смиренномꙋ́дрїе є҆́сть, сто́лпъ крѣ̑пости ѿ лица̀ вра́жїѧ: не ѹ҆спѣ̑етъ вра́гъ на него̀, и҆ сы́нъ, па́че же по́мыслъ беззако́нїѧ, не приложи́тъ ѡ҆ѕло́бити є҆гѡ̀. И҆ и҆зсѣче́тъ ѿ лица̀ є҆гѡ̀, врагѝ є҆гѡ̀, и҆ ненави́дѧщыѧ є҆гѡ̀ побѣди́тъ.
к҃и. И҆́на сꙋ́ть стѧжа́телеви семꙋ̀ вели́комꙋ бога́тства своегѡ̀ въ дꙋшѝ познава́ємаѧ свѡ́йства, па́че всѣ̑хъ предска́занныхъ: ѻ҆́на бо всѧ̑ кромѣ̀ є҆ди́нагѡ, зрѧ́щымъ сꙋ́ть бога́тства сегѡ̀ знаменова́тєлна. Ѹ҆разꙋмѣ̑еши и҆ не прелсти́шисѧ въ тебѣ̀ само́мъ, сꙋ́щее въ тебѣ̀ само́мъ прпⷣбное сїѐ сꙋщество̀, во мно́жествѣ свѣ̑та неизрече́нна, и҆ мл҃и́твы раче́нїи несказа́ннѣ. Пре́жде достиже́нїѧ си́хъ, не клеве́тно се́рдце є҆́сть въ согрѣше́нїихъ чꙋ́ждыхъ: предте́чна всѧ́кагѡ глаго́лемагѡ тщесла́вїѧ не́нависть.
к҃ѳ. Позна́вый себѐ во всѧ́комъ чꙋ́вствѣ дꙋшѝ, на землѝ посѣ̑ѧлъ є҆́сть: нѣ̑сть бо мо́щно не та́кѡ посѣ̑ѧвшымъ, смиренномꙋ́дрїе процвѣстѝ.
л҃. Позна́вый себѐ, пости́глъ є҆́сть стра́ха гдⷭ҇нѧ ра́зꙋмъ, си́мъ же ходи́въ, во врата̀ любвѐ дости́же.
[Статия 3]
л҃а. Смире́нїе є҆́сть, црⷭ҇тва две́рь, приближа́ющихсѧ вводѧ́щи. Се́ю непщꙋ́ю, гдⷭ҇а рещѝ ѡ҆ вше́дшемъ: ꙗ҆́кѡ и҆ вни́детъ, и҆ и҆зы́детъ без̾ стра́ха ѿ житїѧ̀ сегѡ̀, и҆ па́жить ѡ҆брѧ́щетъ, и҆ зла́къ въ раѝ ѻ҆́нѣмъ: всѝ є҆ли́цы прїидо́ша и҆но́ю во ѻ҆́бразъ се́й (въ мона́шество), та́тїе сꙋ́ть своеѧ̀ и҆́хъ жи́зни и҆ разбо́йницы.
л҃в. Соистѧзꙋ́юще самѣ̑хъ себѐ пости́гнꙋти хотѧ́щїи, не преста́нимъ: и҆ а҆́ще въ чꙋ́вствѣ дꙋшѝ бли́жнѧго всѧ́каго превосходи́ти на́съ непщꙋ́емъ, то̀ бли́зъ є҆́сть ми́лость.
л҃г. Невозмо́жно є҆́сть ѿ снѣ̑га происходи́ти пла́мени, невозмо́жнѣе же во и҆носла́внѣмъ смиренномꙋ́дрїю бы́ти, вѣ̑рныхъ и҆ бл҃гочести́выхъ є҆́сть сїѐ и҆справле́нїе и҆ сїѐ ѡ҆чище́нныхъ є҆́сть про́чее.
л҃д. Мно́зїи ѹ҆́бѡ самѣ̑хъ себѐ грѣ̑шныхъ и҆ гл҃емъ не́гли и҆ и҆́мамы, безче́стїе же се́рдце и҆скꙋша́етъ.
л҃є. Не преста́нетъ спѣша́йсѧ къ приста́нищꙋ семꙋ̀ невла́емомꙋ, ѻ҆́бразы, и҆ словеса̀, и҆ помышлє́нїѧ, и҆ ѹ҆мышлє́нїѧ, и҆ и҆спыта̑нїѧ, и҆ и҆стѧза̑нїѧ, и҆ пребыва̑нїѧ, и҆ ѹ҆хищрє́нїѧ, и҆ молє́нїѧ, и҆ мл҃и̑твы творѧ̀ и҆ помышлѧ́ѧ и҆ ѹ҆мышлѧ́ѧ, доне́лѣже бж҃їимъ содѣ̑йствїемъ, и҆ смире́ншими и҆ безче́стншими пребыва̑нїи, ѿ приснобꙋ́рнагѡ мо́рѧ возноше́нїѧ свободи́тъ ладїю̀ дꙋшѝ своеѧ̀: и҆зба́вивыйсѧ бо ѿ тогѡ̀ ѡ҆ всѣ̑хъ про́чее грѣсѣ̑хъ, ѹ҆добоѿвѣ̑тенъ мыта́рь быва́етъ.
л҃ѕ. Нѣ̑цыи ѹ҆́бѡ, преждебы̑вшаѧ ѕла̑ѧ, и҆ по ѿпꙋще́нїи тѣ̑хъ, въ винꙋ̀ смиренномꙋ́дрїѧ, до конца̀ ѹ҆держа́ша: ѻ҆́нѣми, сꙋ́етное возноше́нїе заꙋша́юще. И҆́ни же, стра́сть хрⷭ҇то́вꙋ помышлѧ́юще, себѐ при́снѡ должникѡ́въ бы́ти непщꙋ́ютъ: и҆́ни, повседне́вныхъ ра́ди недоста́ткѡвъ, себѐ ѡ҆хꙋжда́ютъ: и҆́ни ѿ слꙋча́ющихсѧ и҆скꙋше́нїй, и҆ недꙋ̑гъ и҆ паде́нїй, возноше́нїю па́сти сотвори́ша: и҆́ни же, мл҃и́твою ѿложе́нїѧ дарова́нїй, мт҃рь дарова́нїй ѹ҆сво́иша: сꙋ́ть же нѣ̑цыи, сꙋ́ть ли и҆ ны́нѣ, гл҃ати не могꙋ̀: чрез̾ са̑мыѧ бж҃їѧ да́ры себѐ смирѧ́ющїи, недосто́йныхъ себѐ бы́ти такова́гѡ бога́тства непщꙋ́юще: и҆ ꙗ҆́кѡ на всѧ́къ де́нь къ до́лгꙋ своемꙋ̀ прилага́юще, та́кѡ завѣщава́ющесѧ: сїѐ є҆́сть, смире́нїе, сїѐ є҆́сть, бл҃же́нство, сїѐ є҆́сть соверше́ннаѧ по́честь. Внегда̀ кого̀ ѹ҆ви́диши, и҆лѝ ѹ҆слы́шиши, въ ма́лѣхъ лѣ̑тѣхъ высоча́йше безстра́стїе стѧжа́вша, то̀ не и҆нѣ̑мъ, но си́мъ бл҃же́ннымъ и҆ кра́ткимъ пꙋте́мъ пѣшеше́ствовавша того̀ непщꙋ́й.
л҃з. Сще́ннаѧ сїѧ̀ дво́йца є҆́сть, любы̀ и҆ смире́нїе: занѐ, ѻ҆́на ѹ҆́бѡ возно́ситъ: сїе́ же вознесє́нныѧ держа́що, никогда́же па́даетъ.
л҃и. И҆́но є҆́сть сокрꙋше́нїе, и҆ и҆́но позна́нїе, и҆ и҆́но, смире́нїе.
л҃ѳ. Сокрꙋше́нїе є҆́сть, паде́нїѧ поро́дъ: па́даѧй бо сокрꙋша́етсѧ, и҆ бездерзнове́нъ на мл҃и́твѣ съ похвалѧ́емымъ безстꙋ́дїемъ предстои́тъ: на жезлѣ̀ наде́жды ꙗ҆́кѡ сокрꙋше́нъ ѡ҆пира́ѧсѧ, тѣ̑мъ пса̀ ѿча́ѧнїѧ ѿгонѧ́ѧ.
м҃. Позна́нїе є҆́сть, и҆звѣ̑стно мѣ̑ръ свои́хъ постиже́нїе, и҆ ле́гкихъ согрѣше́нїй непари́телна па́мѧть.
м҃а. Смире́нїе є҆́сть ѹ҆че́нїе хрⷭ҇то́во ѹ҆́мно, ѹ҆́мнѣ сподоблѧ́ющимисѧ во клѣ̑ти дꙋше́внѣй черто́гствꙋемо, и҆ словесе́мъ чꙋ́вствєннымъ сꙋ́ще непристꙋ́пно.
м҃в. И҆́же всѧ́кѡ воню̀ такова́гѡ мѵ́ра въ себѣ̀ ѡ҆щꙋти́ти глаго́лѧй, и҆ во вре́мѧ похва́лъ, понѐ въ ма́лѣ се́рдцемъ движа́йсѧ, и҆лѝ си́лꙋ слове́съ ѻ҆́нѣхъ вѣ̑дый, то̀ да не прелсти́тсѧ, прелсти́лсѧ є҆́сть.
м҃г. Не на́мъ, гдⷭ҇и, не на́мъ, въ чꙋ́вствѣ дꙋшѝ нѣ̑коего слы́шахъ гл҃юща, но и҆́мени твоемꙋ̀ да́ждь сла́вꙋ: вѣ̑дѧше бо є҆стество̀ сїѐ, не ꙗ҆́коже бы приключи́лосѧ, ѿ неѧ̀ безвре́дно пребыва́ти: ѹ҆ тебѐ похвала̀ моѧ̀ въ цр҃кви вели́цѣй, въ бꙋ́дꙋщемъ: пре́жде бо ѻ҆́ныѧ, сїю̀ (бл҃гохвале́нїе) безбѣ̑днѣ терпѣ̑ти не могꙋ̀.
м҃д. А҆́ще се́й предѣ̑лъ и҆ вина̀ и҆ ѻ҆́бразъ послѣ̑днїѧ горды́ни є҆́сть, є҆́же не присꙋ́щыѧ добродѣ̑тєли, сла́вы ра́ди, лицемѣ̑рнѣ притворѧ́ти: то̀ ѹ҆́бѡ сїѐ зна́менїе глꙋбоча́йша смиренномꙋ́дрїѧ є҆́сть є҆́же не присꙋ́щыѧ на́мъ вины̑ пред̾ нѣ̑кими ѡ҆хꙋжде́нїѧ ра́ди притворѧ́ти. Та́кѡ и҆́же хлѣ̑бъ и҆ сы́ръ въ рꙋкꙋ̀ взе́мый сотвори́лъ є҆́сть: та́кѡ и҆́же ри́зы своеѧ̀ совлекі́йсѧ, и҆ безстра́стнѣ чистоты̀ дѣ̑латель гра́дъ ѡ҆бше́дъ. Не попекꙋ́тсѧ такові́и ѡ҆ человѣ̑честѣ претыка́нїи про́чее, прїе́мше си́лꙋ мл҃и́твою неви́димѡ всѣ̑хъ и҆звѣсти́ти. И҆́же ѡ҆ пе́рвшемъ прилѣжа́й, втора́гѡ скꙋ́дость и҆з̾ѧви́лъ є҆́сть: и҆дѣ̑же бо бг҃ъ къ проше́нїю гото́въ, всѧ̑ твори́ти мо́жемъ.
[Статия 4]
м҃є. Хощѝ па́че человѣ̑ки, а҆ не бг҃а ѡ҆печалѧ́ти: ра́дꙋетсѧ бо зрѧ̀ на́съ къ безче́стїю притека́ющихъ, да сꙋ́етное возноше́нїе ѡ҆скорби́мъ и҆ ѹ҆ѧзви́мъ и҆ погꙋби́мъ.
м҃ѕ. Стра́нничество кра́йнѣйшее, таковы́хъ по́честей вино́вно быва́етъ: вели́кихъ бо вои́стиннꙋ є҆́сть, є҆́же ѿ сво́йственныхъ терпѣ̑ти порꙋга́ємымъ быва́ти. Да не ѹ҆жа́снешисѧ ѡ҆ рече́нныхъ: никто́же бо на лѣ̑ствицꙋ є҆ди́ною когда̀ взы́ти возмо́же.
м҃з. Ѡ҆ се́мъ разꙋмѣ̑ютъ всѝ, ꙗ҆́кѡ бж҃їи ѹ҆ченицы̀ є҆смы̀: не ꙗ҆́кѡ бѣ̑сове на́мъ повинꙋ́ютсѧ, но ꙗ҆́кѡ и҆мена̀ на̑ша напи̑сана сꙋ́ть на нб҃сѝ смире́нїѧ.
м҃и. Безпло́дїе ѹ҆́бѡ, є҆стество́мъ на высотꙋ̀ вѣ̑твѣе гл҃емыхъ кі̑тръ возвыша́ти ѻ҆бы́че: наклоне́но же бы́вшо, скорѣ̑е плодоно́сно быва́етъ: ѹ҆вѣ̑дѣвый разꙋ́мнѣ, вѣ̑сть.
м҃ѳ. И҆́мать степе́нь прпⷣбнагѡ сегѡ̀ ѿ бг҃а на три́десѧть, и҆ на шестьдесѧ́тъ, и҆ на сто̀ восхожде́нїе. И҆ на послѣ̑днїй ѹ҆́бѡ, безстра́стнїи: на сре́днїй же, мꙋ́жественнїи: на пе́рвый же, всѝ взы́ти мо́гꙋтъ.
н҃. Ѹ҆вѣ̑дѣвый себѐ, никогда́же порꙋ́ганъ бы́въ на ꙗ҆̀жевы́ше себѐ покꙋси́лсѧ бы̀: но ѹ҆тверди́лъ є҆́сть про́чее но́гꙋ на бл҃же́ннѣй се́й стезѝ.
н҃а. Боѧ́тсѧ пти̑цы ꙗ҆́стребова ви́да, дѣ̑лателїе же сегѡ̀, гла́са прекосло́вїѧ.
н҃в. Без̾ прорица́нїй ѹ҆́бѡ, и҆ ѡ҆сїѧ́нїй, и҆ зна́менїй, и҆ чꙋде́съ, мно́зи спасе́нїе полꙋчи́ша: без̾ сегѡ́ же, никто́же въ черто́гъ ѻ҆́нъ вни́детъ: занѐ, пе́рвшихъ ѹ҆́бѡ, второ́е храни́тель є҆́сть: сегѡ́ же, мно́жицею пє́рвшаѧ, въ ле́гкихъ потреби́тєлна бы́ша.
н҃г. Ѹ҆смотри́лъ є҆́сть гдⷭ҇ь ѡ҆ на́съ, и҆ не хотѧ́щихъ смирѧ́тисѧ, и҆ сїѐ: никто́же бо ꙗ҆́звы своѧ̑, ꙗ҆́коже бли́жнїй, зрѣ̑ти мо́жетъ: тѣ̑мже нꙋ́ждно є҆́сть на́мъ, не себѣ̀, но ѻ҆́номꙋ ѡ҆ здра́вїи бл҃годаре́нїе и҆ бг҃ꙋ даѧ́ти.
н҃д. Смиренноꙋ́мный всегда̀ во́ли своеѧ̀ ꙗ҆́кѡ лестца̀ гнꙋша́етсѧ: и҆ въ проше́нїихъ свои́хъ ꙗ҆̀же ко гдⷭ҇ꙋ, вѣ̑рою несꙋмнѣ̑нною подоба́ющымъ наꙋчава́тисѧ, и҆ послꙋ́шати (та̑) ѡ҆бы́че: не жи́телствꙋ внима́ѧ ѹ҆чи́телей, но на бг҃а возложи́въ попече́нїе, и҆ ѻ҆сло́мъ при валаа́мѣ потрє́бнымъ наꙋчи́вшаго. А҆́ще и҆ всѧ̑ таковы́й дѣ̑латель по бг҃ꙋ, и҆ твори́тъ, и҆ помышлѧ́етъ, и҆ вѣща́етъ, ника́коже себѣ̀ возлага́етъ: ѻ҆сте́нъ бо и҆ тѧгота̀ є҆́сть смире́нномꙋ своевѣ̑рїе, ꙗ҆́коже го́рдомꙋ и҆ноглаго́лное.
н҃є. Мнѣ̀ мни́тсѧ а҆́гг҃лово бы́ти, є҆́же не ѡ҆крада́емꙋ бы́ти во грѣхѝ: слы́шащꙋ назе́мнаго а҆́гг҃ла гл҃юща: ничесо́же въ себѣ̀ свѣ̑мъ, но ни ѡ҆ се́мъ ѡ҆правда́юсѧ: востѧзꙋ́ѧй же мѧ̀, гдⷭ҇ь є҆́сть: тѣ̑мже до́лжни є҆смы̀ вы́нꙋ себѐ ѡ҆хꙋжда́ти и҆ ѹ҆корѧ́ти, да во́льнымъ ѡ҆хꙋжде́нїемъ, ѡ҆ нево́льныхъ грѣсѣ̑хъ словоизвине́мсѧ: а҆́ще ли же нѝ, то̀ всѧ́кѡ во и҆схо́дѣ лю́тѣ ѡ҆ ни́хъ сло́ва и҆стѧ́зани бꙋ́демъ.
н҃ѕ. И҆́же нижа́е досто́инства своегѡ̀ проше́нїй ѿ бг҃а просѧ́й, всѧ́кѡ ꙗ҆̀же вы́ше себѐ полꙋчи́тъ: и҆ сїѐ мыта́рь ѻ҆́нъ свидѣ̑телствꙋетъ: ѿпꙋще́нїѧ ѹ҆́бѡ проси́въ, пра́вдꙋ же прїе́мъ: помѧнꙋ́тїѧ є҆ди́на разбо́йникъ ѻ҆́нъ въ црⷭ҇твїи ѻ҆́нѣмъ проси́лъ є҆́сть, и҆ ве́сь ра́й наслѣ̑дствова.
н҃з. Нѣ̑сть возмо́жно во тва́ри се́й ма́лъ и҆ вели́къ ѻ҆́гнь ѹ҆ви́дѣти є҆стество́мъ: и҆ нѣ̑сть возмо́жно ѿню́дъ, въ непритво́рнѣмъ смире́нїи вещества̀ ви́дꙋ ѡ҆ста́тисѧ: доне́лѣже во́лею согрѣша́емъ, сегѡ̀ въ на́съ нѣ̑сть: и҆ сїѐ є҆́сть зна́менїе присꙋ́тствїѧ є҆гѡ̀.
н҃и. Вѣ̑дый влⷣка съ внѣ̑шнимъ пребыва́нїемъ соѡбразова́тисѧ дꙋше́внѣй добродѣ̑тели, взе́мъ ле́нтїй показа̀ на́мъ хꙋдо́жное и҆з̾ѡбрѣ̑тенїе пꙋтѝ смире́нїѧ: ѹ҆хищре́нїѧмъ бо тѣлесѐ, ѹ҆подоблѧ́етсѧ дꙋша̀: и҆ къ тѣ́мъ ꙗ҆̀же твори́тъ, воѡбража́етсѧ, и҆ къ ни̑мъ притворѧ́етсѧ. Нача́лство, и҆з̾ а҆́гг҃єлъ нѣ̑коемꙋ, бы́сть высокомꙋ́дрїѧ вина̀, не сегѡ̀ ра́ди прїе́мшꙋ то̀.
н҃ѳ. И҆́накѡ и҆́же на прⷭ҇то́лѣ, и҆ и҆́накѡ и҆́же на гно́ищи сѣдѧ́й, ѹ҆строе́нїе и҆́мать: и҆ не́гли сегѡ̀ ра́ди вели́кїй ѻ҆́нъ пра́ведникъ, на гно́ищи внѣ̀ гра́да сѣдѧ́ше: тогда́ бо соверше́нное смиренномꙋ́дрїе стѧжа́въ, речѐ въ чꙋ́вствѣ дꙋшѝ: ѹ҆кори́хъ себѐ са́мъ, и҆ и҆ста́ѧхъ: и҆ мню̀ себѐ зе́млю и҆ пе́пелъ.
[Статия 5]
ѯ҃. Ѡ҆брѣта́ю манассі́ю ѻ҆́наго въ человѣ̑цѣхъ, ꙗ҆́кѡ никого́же и҆но́го согрѣши́вша, и҆ хра́мъ бж҃їй і҆́дѡлы, и҆ всю̀ слꙋ́жбꙋ ѻ҆́нꙋ ѡ҆скверни́вша: занего́же а҆́ще бы (и҆) ве́сь мі́ръ пости́лсѧ, то̀ ничто́же бы досто́йно вознестѝ возмо́глъ: но возмо́же смире́нїе ѻ҆́но (и҆) неисцѣ́лнаѧ и҆сцѣли́ти въ не́мъ. Ꙗ҆кѡ а҆́ще бы восхотѣ̑лъ є҆сѝ же́ртвы, да́лъ бы́хъ ѹ҆́бѡ, ко бг҃ꙋ, гл҃етъ дв҃дъ, всесожже́нїѧ, тѣлеса̀ посто́мъ, не бл҃говоли́ши. Же́ртва бг҃ꙋ, и҆ про́чее разꙋмѣ̑но є҆́сть всѣ̑ми.
ѯ҃а. Согрѣши́хъ ко гдⷭ҇ꙋ, нѣ̑когда бл҃же́нное сїѐ смире́нїе ко бг҃ꙋ ѡ҆ прелюбодѣ̑йствѣ и҆ ѹ҆бі́йствѣ возопѝ, и҆ скорѣ̑е ѹ҆слы́ша: гдⷭ҇ь ѿѧ̀ согрѣше́нїе твоѐ.
ѯ҃в. Пꙋ́ть ѹ҆́бѡ сегѡ̀ и҆ винꙋ̀, тѣлє́сныѧ трꙋды̀, приснопомина́емїи ѹ҆ста́виша ѻ҆ц҃ы̀: а҆́зъ же гл҃ю, послꙋша́нїе и҆ пра́вость се́рдца: ꙗ҆̀же и҆ є҆сте́ственнѣ возноше́нїю сопротивлѧ́ютсѧ.
ѯ҃г. А҆́ще и҆ ѿ а҆́гг҃єлъ бѣ̑сы нѣ́кїѧ сїѐ сотвори́ло є҆́сть, то̀ всѧ́кѡ ѻ҆́но и҆ ѿ бѣ́съ а҆́гг҃лы сотвори́ти мо́жетъ. Тѣ̑мже па́дшїи, да дерза́ютъ.
ѯ҃д. Потщи́мсѧ все́ю си́лою на ве́рхъ сегѡ̀ взы́ти: а҆́ще же нѝ, то̀ понѐ несе́ни бы́ти на ра́мѣхъ: а҆́ще ли же чи́мъ хра́млемъ, то̀ понѐ ѿ ѡ҆б̾ѧ́тїй тогѡ̀ да не ѿпаде́мъ: и҆́же бо ѿѻнꙋ́дꙋ ѿпада́ѧй, чꙋждꙋ́сѧ а҆́ще полꙋчи́тъ нѣ̑кїй вѣ̑ченъ да́ръ.
ѯ҃є. Жи̑лы сегѡ̀ и҆ пꙋтїѐ, а҆ не ѹ҆́бѡ и҆ зна́мєнїѧ сꙋ́ть нестѧжа́нїе, стра́нничество неѧ́вственно, премꙋ́дрости ѹ҆тае́нїе, произноше́нїе неразли́чно, ми́лостыни проше́нїе, сокрове́нїе бл҃горо́дїѧ, дерзнове́нїѧ и҆згна́нїе, многосло́вїѧ ѹ҆дале́нїе.
ѯ҃ѕ. Ничто́же бо та́кѡ ꙗ҆́коже нище́тно ѹ҆строе́нїе и҆ проси́тель ко́рмлѧ, дꙋ́шꙋ смири́ти возмо́же когда̀: тогда́ бо тогда̀ любомꙋ́дри и҆ бг҃олюби́ви показꙋ́емсѧ, є҆гда̀ могꙋ́ще возвыша́тисѧ, высоты̀ тоѧ̀ ѿбѣга́емъ неѡбра́тнѣ.
ѯ҃з. А҆́ще воѡрꙋжа́ешисѧ когда̀ на нѣ̑кꙋю стра́сть каковꙋ́либо, то̀ сїѐ спобо́рника прїимѝ: на а҆́спїда и҆ васїлі́ска настꙋ́питъ, и҆ попере́тъ льва̀ и҆ ѕмі́ѧ: а҆́зъ же гл҃ю, на грѣ̑хъ и҆ ѿча́ѧнїе, и҆ дїа́вола и҆ ѕмі́ѧ тѣлесѐ.
ѯ҃и. Смиренномꙋ́дрїе є҆́сть, сме́рчь нб҃сенъ: ѿ бе́здны грѣхѡ́въ, на нб҃о возвестѝ дꙋ́шꙋ могі́й.
ѯ҃ѳ. Ѹ҆ви́дѣлъ є҆́сть нѣ̑кто въ се́рдцѣ свое́мъ добро́тꙋ сегѡ̀: и҆ ѹ҆́жасомъ ꙗ҆́тъ бы́въ, вопроша́ше ро́ждшагѡ ѹ҆вѣ̑дѣти нарече́нїе: ѻ҆́но же ра́достнѣ къ немꙋ̀ и҆ ти́хѡ ѡ҆скла́бившосѧ, гл҃етъ, и҆ ка́кѡ ро́ждшаго менѐ и҆́мѧ ѹ҆вѣ̑дѣти тщи́шисѧ, и҆ то́й є҆́сть без̾и́мененъ: не и҆́мамъ тѝ то̀ рещѝ, до́ндеже бг҃а стѧ́жеши: томꙋ̀ сла́ва во вѣ̑ки вѣкѡ́въ, а҆ми́нь.
И҆сто́чника ѹ҆́бѡ ма́ти бе́здна є҆́сть: разсꙋжде́нїѧ же и҆сто́чникъ, є҆́сть смире́нїе.