СЛО́ВО К҃З. Ѡ҆ сщ҃е́ннѣмъ тѣ̑ла и҆ дꙋшѝ безмо́лвїи.
Мы̀ ꙗ҆́коже при́снѡ кꙋпе́жни нѣ̑цыи непреподо́бныхъ страсте́й сꙋ́ще, и҆ рабѝ поддрꙋ́жни бы́вше, ѿ сегѡ̀ и҆ лє́сти, и҆ ѻ҆́бразы, и҆ повелѣ́нїѧ, и҆ кова̑рства ѿча́сти вѣ̑мы, дꙋхѡ́въ влады́чествовавшихъ ѡ҆каѧ́нною дꙋше́ю на́шею: и҆́ни бо сꙋ́ть дѣ̑йствомъ дх҃а ст҃а, и҆ ѿ си́хъ и҆збавле́нїемъ, ѡ҆ ко́знехъ и҆́хъ просвѣти́вшїисѧ: занѐ и҆́нъ ѹ҆̀бо є҆́сть ѿ сꙋ́щїѧ въ недꙋ́зѣ болѣ̑зни, поко́й здра́вїѧ разсмотрѣва́ѧй: а҆ и҆́нъ ѿ сꙋ́щагѡ во здра́вїи благодꙋ́шїѧ, сꙋ́щꙋю въ недꙋ́зѣ печа́ль разꙋмѣва́ѧй, и҆ примѣча́ѧй. Мы̀ ѹ҆́бѡ ꙗ҆́кѡ не́мощни сꙋ́ще, бои́мсѧ къ ва́мъ ны́нѣ ѡ҆ приста́нищи безмо́лвїѧ въ сло́вѣ се́мъ любомꙋ́дрствовати: вѣ̑дѧще при́снѡ предстоѧ́ти нѣ̑кого пса̀ ѹ҆ трапе́зы до́брыѧ сеѧ̀ дрꙋжи́ны: и҆ хлѣ̑бъ, си́рѣчь дꙋ́шꙋ ѿ неѧ̀ восхища́ти покꙋша́ющасѧ: и҆ сего̀ ѹ҆сты̀ носѧ́ща про́чее ѿтека́юща, и҆ въ безмо́лвїи сего̀ ꙗ҆дꙋ́ща. Тѣ̑мже да не псꙋ̀ семꙋ̀ мѣ̑сто сло́вомъ на́шимъ да́мы, и҆ винꙋ̀ и҆́щꙋщымъ: непра́ведно вознепщева́хомъ бы́ти къ на бра́ни се́й сꙋ́щымъ, бл҃годꙋ̑шнымъ цр҃ѧ̀ на́шегѡ ра́тникѡмъ, ѡ҆ ми́рѣ ны́нѣ бесѣ̑довати: ѻ҆́но же то́чїю гл҃емъ: ꙗ҆́кѡ крѣ̑пцѣ ра́тꙋющымсѧ, ми́ра и҆ тишины̀ соплето́шасѧ вѣнцы̀. Ꙗ҆коже разсꙋжде́нїѧ ѹ҆̀бо ѻ҆́бразомъ, а҆́ще ѹ҆го́дно є҆́сть, ма̑ла ны́нѣ гл҃имъ: є҆ли́кѡ не ѡ҆печа́лити нѣ̑кихъ, ꙗ҆́кѡ неѡбꙋче́нно є҆́же ѡ҆ си́хъ сло́во посредѣ̀ ѡ҆ста́влше.
в҃. Безмо́лвїе ѹ҆̀бо тѣ̑ла є҆́сть, нра́вѡвъ и҆ чꙋ́вствъ, вѣ̑жество и҆ ѹ҆строе́нїе: безмо́лвїе же дꙋшѝ, пѡ́мыслъ вѣ̑жество, и҆ неѡкрада́ема мы́сль.
г҃. Безмо́лвїѧ люби́тель є҆́сть, мꙋ́жественъ нѣ̑кїй и҆ же́стокъ по́мыслъ во две́рехъ се́рдца недре́мленнѡ стоѧ́щъ, и҆ приходѧ́щыѧ (по́мыслы) и҆лѝ ѹ҆бива́ющъ и҆лѝ ѿрѣва́ющъ. И҆́же въ чꙋ́вствѣ се́рдца безмо́лвствꙋѧй, вѣ̑сть рече́нное: а҆ и҆́же младе́нецъ є҆щѐ сы́й, то̀ сегѡ̀ невкꙋси́тель и҆ невѣ̑дѣтель є҆́сть.
д҃. Безмо́лвникъ разꙋмѣва́теленъ, не востре́бꙋетъ слове́съ: на словесѣ̑хъ бо дѣ̑лы просвѣща́етсѧ.
є҃. Нача́ло ѹ҆́бѡ безмо́лвїѧ, є҆́же ѿрѣва́ти то́поты, ꙗ҆́кѡ глꙋбинꙋ̀ смꙋща́ющыѧ: коне́цъ же є҆гѡ̀, є҆́же не боѧ́тисѧ мѧте́жей, но без̾ ѡ҆щꙋще́нїѧ бы́ти ѡ҆ ни́хъ. И҆сходѧ̀, сло́вомъ не и҆сходѧ́й, кро́токъ є҆́сть, ве́сь любвѐ до́мъ: неꙋдобоподви́жимь сы́й на сло́во, неподви́жимь на ꙗ҆́рость ѡ҆бы́че бы́ти: сопроти́вное же ꙗ҆́вственно є҆́сть.
ѕ҃. Безмо́лвникъ є҆́сть, и҆́же безтѣле́сное въ тѣле́снѣмъ домꙋ̀ ѡ҆предѣлѧ́ти любопрѧ́йсѧ, є҆́же пресла́вно є҆́сть.
з҃. Блюде́тъ ѹ҆́бѡ мы́шь, лови́телница є҆ѧ̀: мы́ша же мы́сленнаго, безмо́лвника мы́сль. Да не бꙋ́детъ тѝ ѿме́тенъ предрече́нный примѣ̑ръ: а҆́ще ли же нѝ, то̀ не ѹ҆̀ безмо́лвїе позна́лъ є҆сѝ.
и҃. Не та́кѡ мона́хъ, ꙗ҆́коже мона́хъ съ мона́хомъ: є҆ди́нственный, мно́га трезвѣ̑нїѧ и҆ непари́телна ѹ҆ма̀ тре́бꙋетъ: пе́рвшемꙋ ѹ҆̀бо, мно́жицею помо́же дрꙋгі́й: второ́мꙋ же, споспѣ̑шествова а҆́гг҃лъ.
ѳ҃. Ѹ҆́мны си̑лы сослꙋ́жатъ и҆ любо́внѣ пребыва́ютъ въ дꙋше́внѣ безмо́лвницѣ: сопроти́вное же ѹ҆молчꙋ̀ тебѣ̀.
[Статия 2]
і҃. Догма̑тъ глꙋбина̀ глꙋбока̀ є҆́сть, ѹ҆́мъ же безмо́лвника ска́четъ не безбѣ̑днѡ въ ни́хъ.
а҃і. Нѣ̑сть безбѣ̑дственнѡ со ѻ҆де́ждею пла́вати, нижѐ стра́сть и҆мꙋ́щꙋ, бг҃осло́вїѧ каса́тисѧ.
в҃і. Ке́ллїѧ безмо́лвника є҆́сть, ѡ҆бдержа́нїе тѣ̑ла: внꙋтрьꙋ́дꙋ и҆мꙋ́щи хра́минꙋ ра́зꙋма.
г҃і. Дꙋше́вною стра́стїю недꙋ́гꙋѧй, и҆ на безмо́лвїе покꙋша́ѧйсѧ, подо́бенъ є҆́сть въ пꙋчи́нꙋ и҆з̾ кораблѧ̀ и҆зскочи́вшемꙋ, и҆ на дсцѣ̀ къ землѝ без̾бѣ̑днѡ достиза́ти мнѧ́щемꙋсѧ.
д҃і. Є҆ли́цы съ бре́нїемъ си́мъ ра́тꙋютсѧ, си̑мъ во вре́мѧ своѐ безмо́лвїе прили́чно є҆́сть, а҆́ще и҆ наста́вника и҆́мꙋтъ: ѹ҆едине́нное бо, а҆́гг҃лскїѧ крѣ̑пости тре́бꙋетъ: мнѣ̀ сло́во є҆́сть, ѡ҆ и҆́стиннѡ безмо́лвницѣхъ тѣ̑ломъ и҆ дх҃омъ.
є҃і. Безмо́лвникъ разлѣни́всѧ, возглаго́летъ лѡ́жна: человѣ̑ки сотвори́ти є҆го̀ преста́ти ѿ безмо́лвїѧ гада́нїи побꙋжда́ѧ: ѡ҆ста́вль ке́ллїю, ѡ҆бвинѧ́етъ бѣ̑сы: неꙋвѣ̑дѣ же са́мъ себѣ̀ бѣ̑съ бы́въ.
ѕ҃і. Ви́дѣхъ безмѡ́лвникъ, и҆ пала́ющее своѐ ко бг҃ꙋ жела́нїе безмо́лвїемъ неисполнѧ́емѣ и҆спо́лнившихъ: и҆ ѻ҆́гнь ѻ҆гне́мъ, и҆ раче́нїемъ раче́нїе, и҆ вожделѣ̑нїемъ вождѣле́нїе породи́вшихъ.
з҃і. Безмо́лвникъ є҆́сть ѻ҆́бразъ а҆́гг҃ла назе́менъ, хартїе́ю вожделѣ̑нїѧ, и҆ тща́нїѧ пи́смены, мл҃и́твꙋ свою̀ ѿ лѣ̑ности и҆ нерадѣ̑нїѧ свободи́въ. безмо́лвникъ є҆́сть ѻ҆́нъ возопи́вый ꙗ҆́вственнѣ: гото́во се́рдце моѐ бж҃е. Безмо́лвникъ є҆́сть ѻ҆́нъ рѣкі́й: а҆́зъ сплю̀, а҆ се́рдце моѐ бди́тъ.
и҃і. затворѧ́й ѹ҆́бѡ две́рь ке́ллїи, тѣ̑лꙋ: а҆ две́рь ѧ҆зы́ка, вѣща́нїѧмъ: и҆ внꙋ́трь две́рь дꙋхѡ́мъ.
ѳ҃і. Тишина̀ ѹ҆́бѡ и҆ полꙋ́день со́лнца, терпѣ̑нїе кора́бленника и҆з̾ѧви́ста: скꙋ́дость же потре́бъ терпѣ̑нїе безмо́лвника и҆з̾ѧви́ла є҆́сть: ѻ҆́нъ ѹ҆́бѡ малодꙋ́шествꙋѧ, кꙋпа́етсѧ въ вода́хъ, се́й же ѹ҆ныва́ѧ, смѣшава́етсѧ со мно́жествы.
к҃. Не бо́йсѧ и҆́гръ то́потовъ, страхова́нїѧ бо пла́чь не вѣ̑сть, ни бои́тсѧ.
к҃а. И҆́хже ѹ҆́мъ наꙋчи́лсѧ є҆́сть вои́стиннꙋ моли́тисѧ, то̀ сі́и со гдⷭ҇емъ лице́мъ къ лицꙋ̀ гл҃ютъ, ꙗ҆́коже ко ѹ҆́хꙋ цр҃е́вꙋ: и҆́хже ѹ҆ста̀ мо́лѧтсѧ, сі́и пред̾ всѣ̑мъ сѷгкли́томъ къ немꙋ̀ припа́даютъ: є҆ли́цы въ мі́рѣ пребыва́ютъ, сі́и посредѣ̀ молвы̀ всегѡ̀ наро́да цр҃ѧ̀ мо́лѧтъ: а҆́ще хꙋдо́жествꙋ семꙋ̀ вѣ̑жественнѡ наꙋчи́лсѧ є҆сѝ, то̀ не невѣ̑си гл҃емое.
к҃в. Сѣдѧ̀ на высотѣ̀ блюдѝ, а҆́ще ѹ҆̀бо и҆ вѣ̑си: и҆ тогда̀ ѹ҆́зриши, ка́кѡ, и҆ когда̀, и҆ ѿкꙋ́дꙋ, и҆ коли́цы, и҆ кі́и та́тїе вни́ти, и҆ ѹ҆кра́сти гро́здїе грѧдꙋ́тъ.
к҃г. Ѹ҆трꙋди́всѧ стра́жь се́й, воста́въ помо́литсѧ, и҆ па́ки сѣ̑дъ пе́рвшагѡ дѣ̑ланїѧ мꙋ́жественнѣ держи́тсѧ.
к҃д. Восхотѣ̀ нѣ̑кто ѡ҆ си́хъ во и҆скꙋ́сѣ бы́въ по то́нкꙋ и҆звѣстноиспыта́ннѣ рещѝ: но ѹ҆боѧ́сѧ, да не ка́кѡ и҆ въ дѣ̑лателехъ лѣ̑ность сотвори́тъ, и҆ произволѧ́ющихъ звꙋ́комъ слове́съ си́хъ ѿжене́тъ.
к҃є. И҆́же ѡ҆ безмо́лвїи по то́нкꙋ и҆ разꙋмѣва́телнѣ сказꙋ́ѧй, воздви́же на сѧ̀ бѣ̑сы: никто́же бо и҆́нъ без̾ѻбра́зства си́хъ и҆з̾ѧви́ти мо́жетъ.
к҃ѕ. Пости́гнꙋвый безмо́лвїе, ѹ҆вѣ̑дѣ глꙋбинꙋ̀ та̑инствъ: не прише́лъ же бы въ сїю̀, а҆́ще не бы̀ пре́жде возмꙋще́нїѧ во́лнъ и҆ дꙋхѡ́въ вѣ̑тры, и҆ ѹ҆ви́дѣлъ и҆ ѹ҆слы́шалъ, не́гли же тѣ̑ми и҆ ѡ҆кропи́лсѧ: ѹ҆твержда́етъ рече́нное па́ѵелъ: а҆́ще бо не бы̀ въ ра́й ꙗ҆́кѡ въ безмо́лвїе восхи́щенъ бы́лъ, не бы̀ неизречє́нныѧ гл҃ы ѹ҆слы́шати мо́глъ. Безмо́лвїѧ ѹ҆́хо прїе́млетъ ѿ бг҃а преди̑внаѧ. Тѣ̑мже и҆ во і҆́ѡвѣ сїѐ (всепремꙋ́дрое) гл҃аше: не прїе́млетъ ли ѹ҆́хо моѐ преди́вныхъ ѿ негѡ̀;
к҃з. Безмо́лвникъ є҆́сть ѻ҆́нъ, та́кѡ всѣ̑хъ бѣ̑гаѧй безненави́стнѣ, ꙗ҆́коже и҆́нъ притека́ѧй ѹ҆се́рднѣ, ѿсѣче́нїѧ сла́дости бж҃їѧ прїѧ́ти не хотѧ̀.
к҃и. Ше́дъ расточѝ твоѧ̑ вско́рѣ: є҆́же бо прода́ждь твоѧ̑, вре́мене тре́бꙋетъ: и҆мѣ́нїѧ, и҆ да́ждь ни́щымъ да мл҃и́твою тебѣ̀ къ безмо́лвїю помо́гꙋтъ: (и҆) возмѝ крⷭ҇тъ тво́й, послꙋша́нїемъ сего̀ носѧ̀, и҆ тѧготꙋ̀ ѿсѣче́нїѧ во́ли твоеѧ̀ крѣ̑пцѣ терпѧ̀: и҆ грѧдѝ про́чее послѣ̑дꙋй мѝ, къ совокꙋпле́нїю бл҃же́ннѣйшагѡ безмо́лвїѧ: и҆ наꙋчꙋ́ тѧ ѹ҆́мныхъ си́лъ ви́димꙋ дѣ̑ланїю и҆ жи́телствꙋ. Не насы́тѧтсѧ сїѧ̑ во вѣ̑къ вѣкѡ́въ хва́лѧще творца̀: нижѐ на нб҃о безмо́лвїѧ возше́дый, воспѣва́ѧ созда́телѧ. Не попекꙋ́тсѧ ѡ҆ веществѣ̀ невеще́ственнїи, нижѐ ѡ҆ пи́щи ввеще́ственнїи невеще́ственни. Не ѡ҆щꙋтѧ́тъ пе́рвшїи снѣ̑ди, нижѐ вторі́и востре́бꙋютъ ѡ҆бѣща́нїѧ. Не попекꙋ́тсѧ ѻ҆́ни ѡ҆ пѣ̑нѧзехъ и҆ стѧжа́нїихъ, нижѐ сі́и ѡ҆ ѡ҆ѕлобле́нїи дꙋхѡ́въ. Нѣ̑сть въ го́рнихъ жела́нїѧ ви́димыѧ тва́ри, нижѐ дѡ́лнимъ гѡ́рнимъ, жела́нїе чꙋ́вственна зрѣ̑нїѧ. Никогда́же преста́нꙋтъ любо́вїю пред̾ꙋспѣва́юще ѻ҆́ни, нижѐ сі́и на всѧ́къ де́нь ко ѻ҆́нѣмъ ретѧ́щесѧ. Не невѣ̑домо ѹ҆ ѻ҆́нѣхъ є҆́сть пред̾ꙋспѣва́нїѧ сегѡ̀ бога́тство, нижѐ си̑мъ восхожде́нїѧ ѻ҆́нагѡ раче́нїе. Не ста́нꙋтъ до́ндеже серафі̑мъ дости́гнꙋтъ, нижѐ преста́нꙋтъ до́ндеже а҆́гг҃ли бꙋ́дꙋтъ. Бл҃же́нъ є҆́сть надѣ̑ѧйсѧ: требл҃же́нъ бꙋ́дꙋщїй: а҆́гг҃лъ дости́гнꙋвый.
[Статия 3]
Ѡ҆ разли́чїи и҆ раздѣле́нїи безмо́лвїй
к҃ѳ. Сꙋ́ть, (и҆ сїѐ всѣ́мъ зна́емо є҆́сть) во всѧ́кихъ наꙋ́къ ѹ҆строе́нїихъ, разꙋмѣ̑нїй и҆ совѣ́тъ разли̑чїѧ: не бо̀ всѣ́мъ всѧ̑ совершє́ннаѧ сꙋ́ть скꙋ́дости ра́ди тща́нїѧ, и҆лѝ недоста́тка ра́ди си́лы. Сꙋ́ть и҆́же въ приста́нище сїѐ, па́че же пꙋчи́нꙋ, и҆лѝ не́гли глꙋбинꙋ̀ входѧ́щїи, не́мощи ра́ди ѹ҆́стъ свои́хъ, и҆ тѣ̑ла предпрїѧ́тїѧ ра́ди: и҆́ни, неꙋде́ржни на ꙗ҆́рость сꙋ́ще, и҆ со мно́жествомъ ѹ҆держа́ти сїю̀ немогꙋ́ще ѡ҆каѧ́ннїи: и҆́ни, своечи́нїемъ па́че не́жели наставле́нїемъ ѿ возноше́нїѧ пли́ти ѹ҆смотрѣ̑вшїи: и҆́ни, немогꙋ́ще посредѣ̀ вещества̀ ѿ веще́ствъ ѹ҆далѧ́тисѧ: нѣ̑цыи ѹ҆́бѡ, да тщали́ви ѿ ѡ҆собножи́тїѧ бꙋ́дꙋтъ: и҆́ни, да невѣ̑домѡ себѐ ѡ҆ грѣсѣ̑хъ помꙋ́чатъ: нѣ̑цыи же, да си́мъ сла́вꙋ себѣ̀ стѧ́жꙋтъ: сꙋ́ть же и҆́ни, (а҆́ще прише́дъ сн҃ъ чл҃вчь ѡ҆брѧ́щетъ ли таковы́хъ на землѝ) наслажде́нїѧ ра́ди и҆ жа́жды любвѐ бж҃їѧ и҆ сла́дости съ прпⷣбнымъ си́мъ ѹ҆сꙋпрꙋ́жествовавшесѧ, не пе́рвѣе сїѐ сотво́рше пре́жде не́же всѧ́комꙋ ѹ҆ны́нїю кни́гꙋ распꙋ́стнꙋю да́ша.
л҃. По ра́зꙋмꙋ хꙋдо́мꙋ да́нномꙋ мнѣ̀, ꙗ҆́кѡ не премꙋ́дръ а҆рхїте́ктѡнъ, лѣ̑ствицꙋ восхожде́нїѧ и҆стеса́хъ: кі́йждо же про́чее да блюде́тъ, на ко́емъ степе́ни стои́тъ: ѿ своечи́нїѧ ли: сла́вы ли ра́ди человѣ̑ческїѧ; не́мощи ли ра́ди ра́ди ѧ҆зы́ка: неꙋдержа́нїѧ ли ра́ди пристра́стїѧ; Да мꙋчє́нїѧ ли прїи́мꙋтъ: да тщали́ви ли бꙋ́дꙋтъ: да ѻ҆́гнь ли ѻ҆гне́мъ прїи́мꙋтъ: бꙋ́дꙋтъ послѣ̑днїи пе́рви, и҆ пе́рвїи послѣ̑дни. Сїѧ̑ ѹ҆́бѡ (про́чее) се́дмь, седмери́цы ны́нѣшнѧгѡ сꙋ́ть дѣ́ланїѧ: ѻ҆́ва ѹ҆́бѡ, прїѧ̑тна: ѻ҆́ва же непрїѧ́тна: ѻ҆смо́е же, ꙗ҆́вѣ ꙗ҆́кѡ бꙋ́дꙋщагѡ вѣ̑ка зна́менателно є҆́сть.
л҃а. Наблюда́й ѽ мона́ше ѹ҆едине́нне, ѕвѣре́й времена̀: а҆́ще ли же нѝ, то̀ невозмо́жеши прили́чествꙋющѧ сѣ̑ти поставлѧ́ти. А҆́ще ѿстꙋпи́ло є҆́сть соверше́ннѣе, распꙋ́стнꙋю кни́гꙋ прїе́мшее, то̀ и҆зли́шне є҆́сть дѣ̑ло: а҆́ще ли же є҆щѐ продерза́етъ, то̀ невѣ̑мъ ка́кѡ безмо́лвствовати и҆́мамъ.
л҃в. Почто̀ не толи̑ка ѹ҆ прпⷣбныхъ тавенисїѡ̑тъ свѣти̑ла, є҆ли̑ка ѹ҆ скитїѡ̑тъ бы́ша: разꙋмѣва́ѧй, да разꙋмѣва́етъ: а҆́зъ бо гл҃ати немогꙋ̀, па́че же не хощꙋ̀.
л҃г. Ѻ҆́ви ѹ҆́бѡ, стра̑сти ѹ҆малѧ́юще: ѻ҆́ви же, пою́ще, и҆ мно́жайшее вре́мѧ въ то́мъ терпѧ́ще: ѻ҆́ви же въ мл҃и́твѣ претерпѣва́юще: ѻ҆́ви же къ видѣ̑нїю взира́юще во глꙋбинѣ̀ се́й пребыва́ютъ: по ѻ҆́бразꙋ лѣ̑ствицы, и҆спыта́но да бꙋ́детъ ве́щь предложе́на ко и҆спыта́нїю сїѐ: вмѣща́ѧй ѡ҆ гдⷭ҇ѣ да вмѣща́етъ.
л҃д. Сꙋ́ть лѣни̑ви дꙋ́ши во ѻ҆бщежи́тїе прише́дше, и҆ вещества́ми своеѧ̀ и҆́хъ лѣ̑ности ѡ҆богатѣ̑вше, въ соверше́ннꙋ поги́бель достиго́ша: и҆ сꙋ́ть напроти́въ, и҆́же своеѧ̀ и҆́хъ лѣ̑ности спребыва́нїемъ и҆нѣ̑хъ совлеко́шасѧ: не то́чїю же на неради́вѣйшихъ, но и҆ на тщали́выхъ мно́жицею сїѐ бы́сть.
л҃є. То́жде пра́вило и҆ на безмо́лвїи ѹ҆потреби́мъ гл҃юще: мно́гихъ и҆скꙋ́сныхъ прїе́мшо, ꙗ҆́кѡ неискꙋ́сныхъ ѿве́рже, чрез̾ своечи́нїе сластолюби́выхъ бы́ти тѣ̑хъ ѡ҆бличи́вшо: и҆нѣ̑хъ же прїе́мшо, стра́хомъ и҆ попече́нїемъ бре́мене своегѡ̀ и҆́хъ ѡ҆сꙋжде́нїѧ, тщали́выхъ нѣ̑кихъ и҆ горѧ́щихъ содѣ̑ла.
л҃ѕ. Никто́же ѿ ꙗ҆́рости и҆ возноше́нїѧ, лицемѣ̑рїѧ же и҆ памѧтоѕло́бїѧ стꙋжа́емь, слѣ̑дъ безмо́лвїѧ ѹ҆ви́дѣти да де́рзнетъ (когда̀): да не ка́кѡ и҆зстꙋпле́нїе то́чїю прїѡбрѧ́щетъ: а҆́ще ли же кто̀ ѿ си́хъ є҆́сть чи́стъ, то́й про́чее позна́етъ поле́зное: непщꙋ́ю же нижѐ то́й.
л҃з. Сло́вомъ безмо́лвїе преходѧ́щихъ зна́мєнїѧ и҆ пѡ́прища и҆ примѣча̑нїѧ, сꙋ́ть сїѧ̑: ѹ҆́мъ невла́емъ, мы́сль ѡ҆чище́нна, восхище́нїе ко гдⷭ҇ꙋ, мꙋ́къ представле́нїе, сме́рти налега́нїе, мл҃и́тва ненасыща́ема, стра́жа неѡкрада́ема, блꙋда̀ ѹ҆ме́ртїе, пристра́стїѧ невѣ̑дѣнїе, сме́рть мі́ра, чревоѡб̾ѧде́нїѧ возгнꙋше́нїе, бг҃осло́вїѧ вина̀, разсꙋжде́нїѧ и҆сто́чникъ, слеза̀ поддрꙋ́жна, многосло́вїѧ поги́бель, и҆ что́либо и҆з̾ таковы́хъ, и҆́мже мно́жєства ѡ҆быко́ша сопротивлѧ́тисѧ.
л҃и. Сло́вомъ же сїѐ не проходѧ́щымъ, сїѐ бога́тство ѻ҆́нагѡ є҆́сть ѹ҆бо́жество: гнѣ̑ва ѹ҆множе́нїе, памѧтоѕло́бїѧ полага́телна, любвѐ ѹ҆мале́нїе, киче́нїѧ привзѧ́тїе, а҆ про́чее ѹ҆молчꙋ̀.
л҃ѳ. А҆ поне́же та́кѡ сло́во сїѐ натечѐ, то̀ нꙋ́ждно є҆́сть и҆ ѡ҆ сꙋ́щихъ въ повинове́нїи здѣ̀ и҆зложи́ти, и҆ па́че же, къ тѣ́мъ бо и҆ сло́во сїѐ ꙗ҆́кѡ наимно́жае простира́етсѧ.
м҃. зако́ннѣ, непрелюбодѣ̑йственнѣ, и҆ нескве́рнѡ съ лѣ̑потнымъ си́мъ и҆ бг҃олѣ̑пнымъ ѹ҆сꙋпрꙋ́жествовавшихсѧ, сїѧ̑ зна́мєнїѧ и҆ сꙋ́ть и҆ ѡ҆предѣлѧ́ютсѧ ѿ бг҃оно́сныхъ ѻ҆тє́цъ: во своѐ ѻ҆ба́че вре́мѧ соверша́єма: ѻ҆ба́че на всѧ́къ де́нь, а҆́ще ѹ҆́бѡ и҆ гдⷭ҇еви принесо́хомъ де́нь, простира́емсѧ прило́гъ и҆ пред̾ꙋспѣѧ́нїе прїе́млюще: смире́нїе новонача́лна ѹ҆множе́нїе, ꙗ҆́рости ѹ҆мале́нїе, ка́кѡ бо, и҆ не бꙋ́детъ же́лчи и҆стощава́емѣй: помраче́нїй ѡ҆скꙋдѣ̑нїе, любвѐ привзѧ́тїе, страсте́й ѿчꙋжде́нїе, не́нависти и҆збавле́нїе, ѿ ѡ҆бличе́нїѧ блꙋдовожделѣ̑нїѧ ѹ҆мале́нїе, ѹ҆ны́нїѧ невѣ̑дѣнїе, тща́нїѧ привзѧ́тїе, милосе́рдїѧ любы̀, горды́ни ѹ҆стране́нїе, всѣ̑ми досто́йное и҆ско́мо бы́ти, а҆ ма́лѣми ѡ҆брѣта́емое и҆справле́нїе. Водѣ̀ не сꙋ́щей во и҆сто́чницѣ, несво́йственно є҆́сть и҆́мѧ сїѐ: а҆ про́чее разꙋ́мно є҆́сть ѹ҆́мъ и҆мꙋ́щымъ.
[Статия 4]
м҃а. Ѻ҆трокови́ца ѹ҆́бѡ не сохра́нши ло́жа, ѡ҆скверни́ла є҆́сть тѣ̑ло: а҆ дꙋша̀ не сохра́нши завѣ̑та, ѡ҆скверни́ла є҆́сть дꙋ́хъ: и҆ ѻ҆́нѣй ѹ҆̀бо, послѣ̑дꙋетъ ѹ҆ко́ръ, не́нависть, бїє́нїѧ, разлꙋчє́нїѧ, всѣ̑хъ ѡ҆каѧ́ннѣйшее: се́й же скве́рнє́нїѧ, сме́рти забве́нїе, чре́ва ненасы́тство, ѻ҆́чїю неꙋдержа́нїе, тщесла́вїѧ дѣ̑ланїе, сна̀ ненасыще́нїе, жестокосе́рдїе, нечꙋ́вствїе, пѡ́мыслъ полага́телна, и҆ сосложе́нїѧ приложе́нїе, плѣне́нїе се́рдца, смꙋще́нїѧ дѣ̑ланїе, непослꙋша́нїе, прекосло́вїе, невѣ̑рїе, неизвѣще́нїе, многосло́вїе, дерзнове́нїе всѣ̑хъ лютѣ̑йшее. А҆ є҆́же всѣ̑хъ є҆́сть ѡ҆каѧ́ннѣйше, неꙋмилѧ́емо се́рдце, є҆́же прее́мствꙋетъ въ невнима́ющихъ, непоболѣ̑нїе: є҆́же ма́ти паде́нїѧ є҆́сть.
м҃в. И҆з̾ дꙋхѡ́въ съ безмо́лвствꙋющими ѹ҆́бѡ, пѧ́ть (бѣ̑сы): съ повинꙋ́ющимисѧ же трїѐ и҆з̾ ѻ҆сми́хъ бо́рютсѧ.
м҃г. Безмо́лвствꙋѧй и҆ со ѹ҆ны́нїемъ ра́тꙋѧйсѧ, ѿщетева́етсѧ мно́жицею: вре́мѧ бо мл҃и́твы и҆ видѣ̑нїѧ, во ѹ҆хищре́нїихъ проти́вꙋ томꙋ̀ и҆стощи́тъ и҆ боре́нїихъ.
м҃д. Къ разлѣни́вшꙋсѧ мнѣ̀ нѣ̑когда въ ке́ллїи сѣдѧ́щꙋ, и҆ тꙋ̀ ма́лѡ не ѡ҆ставлѧ́ти помышлѧ́ющꙋ, мꙋ́жїе нѣ̑цыи прише́дше, дово́лнѣ ꙗ҆́кѡ безмо́лвника мѧ̀ ѹ҆бл҃жи́ша: и҆ скорѣ̑е по́мыслъ разлѣне́нїѧ сегѡ̀ ѿ тщесла́вїѧ ѿгна́нъ бы́въ, ѿи́де: и҆ ѹ҆диви́хсѧ, ка́кѡ всѣ̑мъ сопротивлѧ́етсѧ дꙋховѡ́мъ треѡкаѧ́нный се́й бѣ̑съ.
м҃є. зрѝ на всѧ́къ ча́съ сегѡ̀ сꙋпрꙋ́га (ѹ҆ма̀) твоегѡ̀ вѣ́ѧнїѧ, и҆ препарє́нїѧ, и҆ преклонє́нїѧ, и҆ преложє́нїѧ, є҆́же ка́кѡ и҆ гдѣ̀ преклонє́нїѧ сїѐ и҆́мать: и҆́же дх҃омъ ст҃ы́мъ тишинꙋ̀ стѧжа́вый, не невѣ̑сть сїѐ разсмотрева́нїе.
м҃ѕ. Дѣ̑ло безмо́лвїѧ предварѧ́ющо, є҆́сть безпопече́нїе всѣ̑хъ веще́й благосло́вныхъ и҆ безслове́сныхъ: пе́рвшымъ бо ѿверза́ѧй, во втора̑ѧ всѧ́кѡ впаде́тъ: второ́е, мл҃и́тва безлѣ̑ности: и҆ тре́тїе, дѣ̑ланїе се́рдца неѡкрада́емо. Невозмо́жно є҆́сть пи́сменъ ненаꙋчи́вшемꙋсѧ, є҆сте́ственнѣ во кни́гахъ ѡ҆бꙋча́тисѧ: невозмо́жнше же є҆́сть пе́рвшагѡ нестѧжа́вшемꙋ, два̀ сїѧ̑ сло́вомъ пройтѝ.
м҃з. Проходѧ̀ сре́днее, въ сре́днихъ бы́хъ: и҆ просвѣща́ше (мѧ̀) жа́ждꙋща: и҆ сѐ па́ки бѣ̀ во ѻ҆́нѣхъ: что̀ ѹ҆̀бо бѣ̀ пре́жде ви́димагѡ въ не́мъ зра́ка, ѹ҆чи́ти не можа́ше: ниже́ бо попꙋща́шесѧ кнѧ́зь се́й: ка́кѡ же ны́нѣ є҆́сть вопроша́хъ гл҃ати: во сво́йственныхъ ѹ҆́бѡ гл҃аше, а҆ не въ си́хъ: а҆́зъ же ко́е є҆́сть десно́е ѻ҆́но стоѧ́нїе и҆ сѣда́лище ѡ҆ вино́внѣмъ: невозмо́жно є҆́сть речѐ, слꙋ́хомъ тайнонаꙋчи́тисѧ ѡ҆ си́хъ: а҆ къ не́йже ве́щи менѐ вожделѣ̑нїе ѻ҆́но влеча́ше привестѝ ко вре́мени ѻ҆́номꙋ молѧ́хъ: не ѹ҆̀ ска́зоваше, прїитѝ вре́мени ѻ҆́номꙋ, скꙋ́дости ра́ди ѻ҆гнѧ̀ нетлѣ̑нїѧ: сїѧ̀ и҆лѝ съ пе́рстїю се́ю, невѣ̑мъ: и҆лѝ кромѣ̀ сеѧ̀, гл҃ати ѿню́дъ немогꙋ̀.
м҃и. Неꙋдо́бно є҆́сть полꙋ́денный ѿтрѧстѝ со́нъ, въ лѣ̑тнѧѧ наипа́че времена̀, тогда́ бо и҆ то́чїю не́гли рꙋ́чное нѣ̑сть ѿме́тно дѣ̑ло.
м҃ѳ. Позна́хъ бѣ̑са ѹ҆ны́нїѧ, предсотворѧ́юща и҆ предпꙋ́тїе творѧ́ща бѣ̑сꙋ блꙋда̀: да крѣ̑пцѣ тѣ̑ло разсла́бивъ, и҆ сно́мъ погрꙋзи́въ, а҆́ки наѧ́вѣ ѡ҆сквернє́нїѧ въ безмо́лвствꙋющихъ содѣ̑лаетъ: а҆́ще сопроти́вишисѧ тѣ́мъ крѣ̑пцѣ, то̀ ѿню́дъ ра́товати тѧ̀ и҆́мꙋтъ си́лнѣ: да ꙗ҆́кѡ никꙋ́юже по́лзꙋ и҆мꙋ́ща, преста́ти сотворѧ́тъ ѿ по́двигѡвъ: но ничто́же бѣсѡ́въ си́хъ побѣжде́нїе, ꙗ҆́коже ꙗ҆́же ѿ ни́хъ на ны̀ лю́таѧ бра́нь показа́ти мо́жетъ.
н҃. Во и҆схожде́нїихъ сѡ́браннаѧ хранѝ: две́ри бо ѿверза́емѣй, затворє́нныѧ пти̑цы и҆злета́ютъ: и҆ тогда̀ про́чее, ничи́мже ѿ безмо́лвїѧ сегѡ̀ спо́лзовахомсѧ.
[Статия 5]
н҃а. Ма́лъ вла́съ смꙋща́етъ ѻ҆́ко: и҆ ма́ло попече́нїе потреблѧ́етъ безмо́лвїе: безмо́лвїе бо є҆́сть, ѿложе́нїе помышле́нїй, и҆ ѿверже́нїе ѿ бл҃госло́вныхъ попече́нїй.
н҃в. И҆́же вои́стиннꙋ безмо́лвїѧ достигі́й, нижѐ ѡ҆ пло́ти свое́й пещи́сѧ и҆́мать: нело́женъ бо є҆́сть ѡ҆бѣтова́вый.
н҃г. И҆́же ѹ҆́мъ чи́стъ предста́вити бг҃ови хотѧ́й, и҆ попече́н̾ми смꙋща́ѧйсѧ, подо́бенъ є҆́сть но́зѣ своѝ крѣ̑пцѣ ѡ҆кова́вшемꙋ, и҆ ско́рѡ ходи́ти покꙋша́ющемꙋсѧ.
н҃д. Рѣ̑дцы ѹ҆́бѡ сꙋ́ть сꙋ́щемꙋ въ мі́рѣ любомꙋ́дрїю въ коне́цъ наказꙋ́емїи: а҆́зъ же гл҃ю, ма́л̾ши сꙋ́ть и҆́стиннагѡ безмо́лвїѧ любомꙋ́дрїе (по бг҃ꙋ) вѣ̑дꙋщїи.
н҃є. И҆́же не ѹ҆̀ бг҃а позна́вый на безмо́лвїе неискꙋ́сенъ є҆́сть, и҆ мнѡ́гимъ бѣда́мъ подверга́ющсѧ. Безмо́лвїе неискꙋ́сныхъ ѹ҆давлѧ́етъ: без̾ вкꙋ́са бо сла́дости бж҃їѧ сꙋ́ть на плѣнє́нїѧ и҆ ѡ҆крада̑нїѧ, и҆ ѹ҆ны̑нїѧ, и҆ парє́нїѧ вре́мѧ и҆ждива́юще.
н҃ѕ. И҆́же мл҃и́твы добро́ты коснꙋ́выйсѧ, бѣжа́ти и҆́мать ѿ нарѡ́дъ ꙗ҆́коже ѻ҆на́гръ: кто́ бо а҆́ще бы не сїѧ̀, ѡ҆ста́вила ѻ҆сла̀ ди́вїѧ свобо́дна бы́ти всѧ́кагѡ спребыва́нїѧ человѣ̑ческа;
н҃з. Ѡ҆блага́емый страстмѝ, при́снымъ ѡ҆ си́хъ размышле́нїемъ въ пꙋсты́ни пребыва́етъ: ꙗ҆́коже и҆ ста́рецъ мѝ ст҃ъ таково́е провѣща̀, и҆ наꙋчѝ, геѡ́ргїа гл҃ю а҆рсїлаі́та, є҆го́же и҆ че́стность твоѧ̀ нижѐ ѿню́дъ неꙋвѣ̑дѣ. Се́й непотре́бнꙋ дꙋ́шꙋ нѣ̑когда первонаꙋча́ѧ и҆ наставлѧ́ѧ къ безмо́лвїю, гл҃аше: во ѹ҆́трїе ѹ҆́бѡ, гл҃етъ, назна́менахъ ꙗ҆́кѡ наимно́жайше тщесла́вїѧ и҆ по́хоти приходи́ти бѣсовѡ́мъ: въ полꙋ́дни же, ѹ҆ны́нїѧ, и҆ печа́ли, и҆ гнѣ̑ва: въ ве́черъ же, мотылолюби̑вымъ и҆ мꙋчи́телємъ чре́ва.
н҃и. Лꙋ́чшїй є҆́сть послꙋ́шникъ ни́щъ, па́че безмо́лвника пекꙋ́щагѡсѧ.
н҃ѳ. И҆́же сло́вомъ безмо́лвїе проходѧ́й, и҆ приѡбрѣ̑тенїѧ є҆гѡ̀ на всѧ́къ де́нь не зрѧ́й, то̀ и҆лѝ сло́вомъ не безмо́лвствова, и҆лѝ мнѣ̑нїемъ крадо́мъ быва́етъ.
ѯ҃. Безмо́лвїе є҆́сть неѿверза́емаѧ бг҃ꙋ слꙋ́жба и҆ предстоѧ́нїе.
ѯ҃а. І҆и҃сова па́мѧть, да соедини́тсѧ съ дыха́нїемъ твои́мъ, и҆ тогда̀ позна́еши безмо́лвїѧ по́лзꙋ.
ѯ҃в. Паде́нїе ѹ҆́бѡ по́слꙋшникꙋ є҆́сть, сво́йственнаѧ во́лѧ: безмо́лвникꙋ же, мл҃и́твы разстоѧ́нїе.
ѯ҃г. А҆́ще ра́дꙋешисѧ ѡ҆ прихожде́нїихъ въ ке́ллїю, то̀ вѣ̑ждь себѐ во ѹ҆ны́нїи є҆ди́номъ, а҆ не въ бз҃ѣ ѹ҆пражнѧ́ющасѧ.
ѯ҃д. Прописа́нїе тѝ да бꙋ́детъ мл҃и́твы, вдова̀ ѻ҆́на ꙗ҆́же ѡ҆би́дима быва́ше ѿ сопе́рника своегѡ̀: безмо́лвїѧ же ѻ҆́бразъ, вели́кїй ѻ҆́нъ и҆ равноа́гг҃лный безмо́лвникъ а҆рсе́нїй. Помѧнѝ сы́й во ѹ҆едине́нїи, равноа́гг҃лнагѡ сегѡ̀ пребыва́нїе: и҆ зрѝ ꙗ҆́кѡ приходи́вшихъ мно́жицею ѿосла̀, да не бо́лшее погꙋби́тъ.
ѯ҃є. Позна́хъ бѣсѡ́въ ко сло́вомъ безмо́лвствꙋющымъ безсловє́сныѧ и҆з̾ ѡ҆бхо́дникѡвъ приходи́ти ча́стѣе наꙋща́ющихъ, да дѣ̑лателємъ тѣ́мъ понѐ чрез̾ ѻ҆́нѣхъ ма́лѡ препѧ́ти возмо́гꙋтъ: зна́менꙋй таковы́хъ, ѽ ты̀: и҆ не ѿрица́йсѧ ѡ҆печалѧ́ти бл҃гоче́стнѣ, лѣни́выхъ: не́гли бо ѿ ѡ҆печале́нїѧ сегѡ̀ ѿ є҆́же ѡ҆бходи́ти преста́нꙋтъ. зрѝ да не предрече́ннагѡ ра́ди ра́зꙋма, всꙋ́е ѡ҆печали́ши дꙋ́шꙋ, во́дꙋ ѿ жа́жды приходѧ́щꙋю почерпстѝ ѿ тебѐ: во все́мъ же свѣти́лника тѝ потре́бно є҆́сть.
[Статия 6]
ѯ҃ѕ. Житїѐ безмо́лвствꙋющихъ, па́че же мона́шествꙋющихъ, по со́вѣсти и҆ ра́зꙋмꙋ да быва́етъ. И҆́же сло́вомъ текі́й, то̀ тща̑нїѧ, и҆ провѣща̑нїѧ, и҆ помышлє́нїѧ, и҆ хождє́нїѧ, и҆ движє́нїѧ всѧ̑ по гдⷭ҇ꙋ и҆ гдⷭ҇а ра́ди тѣ́мъ наро́чнѣ твори̑маѧ, въ чꙋ́вствѣ дꙋшѝ и҆ пред̾ лице́мъ гдⷭ҇нимъ дѣ̑лаетъ: а҆́ще ли же ѡ҆крада́емь быва́етъ, то не ѹ҆̀ по добродѣ̑тели жи́телствꙋетъ.
ѯ҃з. Ѿве́рзꙋ гл҃етъ нѣ̑кто во ѱалти́ри гана́нїе моѐ, и҆ во́лю мою̀, за несоверше́нство є҆щѐ разсꙋжде́нїѧ: а҆́зъ же вознесꙋ̀ мл҃и́твою во́лю мою̀, и҆ ѿѻнꙋ́дꙋ и҆звѣще́нїѧ моегѡ̀ жда́ти и҆́мамъ.
ѯ҃и. Вѣ̑ра крило̀ є҆́сть мл҃и́твы: сегѡ́ бо не и҆мꙋ́ще, па́ки въ нѣ̑дро моѐ возврати́тсѧ. Вѣ̑ра є҆́сть несꙋмнѣ̑нно дꙋшѝ стоѧ́нїе, ниѿкоеѧ́же проти́вности коле́блемо. Вѣ̑ренъ є҆́сть, не непщꙋ́ѧй бг҃а мощѝ, но вѣ̑рꙋѧй всѧ̑ полꙋчи́ти. Вѣ̑ра є҆́сть, ненаде́жныхъ вино́вна: и҆ сїѐ разбо́йникъ ѻ҆́нъ показа́лъ є҆́сть. Вѣ̑ры ма́ти є҆́сть, трꙋ́дъ и҆ пра́во се́рдце: занѐ сїѐ ѹ҆́бѡ, несꙋмнѣ̑ннꙋ твори́тъ: ѻ҆́нъ же созида́етъ. Безмо́лвникѡмъ ма́ти є҆́сть вѣ̑ра: а҆́ще бо не и҆́мать вѣ̑ровати, ка́кѡ безмо́лвствовати бꙋ́детъ;
ѯ҃ѳ. Въ темни́цѣ ѡ҆кова́нный, стра́ха ра́ди мꙋчи́телева бои́тсѧ: въ ке́ллїи же безмо́лвствꙋѧй, стра́хъ гдⷭ҇ень породи́лъ є҆́сть: не та́кѡ пе́рвшїй сꙋди́лища сегѡ̀: ꙗ҆́коже вторы́й сꙋдїѝ ѻ҆́нагѡ сꙋди́ща бои́тсѧ. Стра́ха тѝ мно́га въ безмо́лвїи потре́бно є҆́сть, ѽ чꙋ́дне! ничто́же бо та́кѡ ѹ҆ны́нїе ѿгонѧ́ти мо́жетъ. Взира́етъ ѹ҆́бѡ ѡ҆сꙋжде́нникъ вы́нꙋ, когда̀ во ѹ҆зи́лище сꙋдїѧ̀ прихо́дитъ: и҆́стинный же дѣ̑латель, когда̀ скоропринꙋжда́ющаѧ (сме́рть) прїи́детъ: свѧза́сѧ съ пе́рвшимъ бре́мѧ печа́ли, со вторы́мъ же и҆сто́чникъ сле́зъ.
ѻ҃. А҆́ще стѧ́жеши терпѣ̑нїѧ же́злъ, то̀ скорѣ̑е преста́нꙋтъ тѝ ѻ҆́ни безстꙋ́дствовати. Терпѣ̑нїе є҆́сть, крѣ̑пка болѣ̑знь дꙋшѝ, ѿ бл҃госло́вныхъ кло́пѡтъ ника́коже коле́блемо. Терпѣли́въ є҆́сть дѣ̑латель непа́дателенъ, и҆ чрез̾ падє́нїѧ побѣ̑дꙋ творѧ́щъ. Терпѣ̑нїе є҆́сть ѡ҆предѣле́нїе ско́рби на всѧ́къ де́нь ѡ҆жида́емо. Терпѣ̑нїе є҆́сть и҆звѣ̑тѡвъ ѿсѣче́нїе, и҆ своѐ внима́нїе. Не та́кѡ пи́щи своеѧ̀, ꙗ҆́коже терпѣ̑нїѧ дѣ̑латель се́й тре́бꙋетъ: занѐ чрез̾ второ́е ѹ҆́бѡ, прїи́метъ вѣне́цъ: чрез̾ пе́рвшее же, поги́бель прїи́метъ. Терпѣли́въ мꙋ́жъ, пре́жде гро́ба ѹ҆́мре: гро́бъ ке́ллїю свою̀ сотвори́въ. Терпѣ̑нїе родѝ, наде́жда и҆ пла́чь: без̾ двою́ бо сею̀ сы́й, ра́бъ є҆́сть ѹ҆ны́нїѧ.
ѻ҃а. Вѣ̑дѣти подоба́етъ борцꙋ̀ хрⷭ҇то́вꙋ, кі́ихъ ѹ҆́бѡ и҆з̾ врагѡ́въ и҆здале́че гони́ти, кі́ихъ же боро́тисѧ съ ни́мъ попꙋща́ти: ѻ҆вогда̀ ѹ҆́бѡ борба̀ сїѧ̀ вѣнца̀ вино́вна бы́сть, ѻ҆вогда́ же борбы̀ непотре́бныхъ сотвори́ло є҆́сть. Нѣ̑сть дости́жно ѡ҆ таковы́хъ сло́вомъ нака́зоватисѧ: не бо̀ всѝ тѣ̑мижде, нижѐ та́кожде ѹ҆сво́йствовахомсѧ.
ѻ҃в. Є҆ди́наго и҆з̾ дꙋхѡ́въ си́хъ наблюда́й тре́звеннѣ: поне́же и҆ то́й тѧ̀ ра́тꙋетъ непреста́ннѡ, во стоѧ́нїи, и҆ прехожде́нїи, и҆ сѣда́лищи, и҆ движе́нїи, и҆ возлежа́нїи, и҆ мл҃и́твѣ, и҆ снѣ̀. Ѻ҆́ви ѹ҆́бѡ и҆з̾ въ тече́нїи се́мъ безмо́лвїѧ сѣдѧ́щихъ, предзрѣ̑хъ гдⷭ҇а предо мно́ю вы́нꙋ, въ себѣ̀ дѣ̑ланїе содержа́тъ.
ѻ҃г. Не бо̀ всѝ хлѣ̑би ѻ҆́ни дх҃о́внагѡ сегѡ̀ нбⷭ҇ныѧ пшени́цы дѣ̑ланїѧ, є҆динови́дни сꙋ́ть: и҆́ни же, въ терпѣ̑нїи ва́шемъ стѧжи́те дꙋ́ши ва́шѧ: и҆́ни, бди́те и҆ моли́тесѧ: и҆́ни, ѹ҆готовлѧ́й на и҆схо́дъ дѣла̀ твоѧ̑. И҆́ни, смири́хсѧ и҆ спасе́ мѧ. Нѣ̑цыи ѹ҆́бѡ, нѣ̑сꙋть достѡ́йна страда̑нїѧ ны́нѣшнѧгѡ вре́мене къ бꙋ́дꙋщей сла́вѣ: и҆́ни, па́ки, да не когда̀ похи́титъ и҆ не бꙋ́детъ и҆збавлѧ́ѧй: вы́нꙋ разсмотрѣва́ютъ: всѝ ѹ҆́бѡ текꙋ́тъ, є҆ди́нъ же и҆з̾ си́хъ прїе́млетъ по́честь без̾ трꙋда̀.
ѻ҃д. Не то́чїю бдѧ̀, но и҆ спѧ̀ пред̾ꙋспѣ̑вый дѣ̑лаетъ: тѣ̑мже нѣ̑цыи и҆ въ са́михъ тѣ̑хъ снѣ̑хъ бѣсѡ́въ приходѧ́щихъ ѡ҆безчеща́ютъ, и҆ блꙋ́дныхъ же́нщищъ ѡ҆ цѣломꙋ́дрїи ѹ҆ча́тъ. Не ѡ҆жида́й прише́ствїй, нижѐ пред̾ꙋготовлѧ́йсѧ ѡ҆ ни́хъ: про́сто бо є҆́сть всѐ и҆ свобо́дно безмо́лвїѧ сегѡ̀ ѹ҆строе́нїе.
[Статия 7]
ѻ҃є. Никто́же хотѧ̀ созда́ти сто́лпъ и҆ ке́ллїю безмо́лвїѧ, покꙋша́етсѧ, а҆́ще не пе́рвѣе сѣ̑дъ разчте́тъ и҆ и҆спыта́етъ мл҃и́твою и҆́мать ли свѡ́йства ѻ҆́на на соверше́нїе: да не когда̀ бꙋ́детъ по ѡ҆снова́нїѧ сегѡ̀ положе́нїи посмѣѧ́нїе врагѡ́мъ свои̑мъ и҆ препѧ́тїе дрꙋги̑мъ дѣ̑лателємъ.
ѻ҃ѕ. Смотрѧ́й приходѧ́щꙋю сла́дость, не ка́кѡ ли ѿ го́ркихъ вра̑чь, па́че же навѣ́тникъ, срастворє́на є҆́сть.
ѻ҃з. Въ нощѝ ѹ҆́бѡ, мнѡ́гаѧ мл҃и́твѣ дава́й: ма̑лаѧ же, ѱалмопѣ̑нїю: во дни́ же по твое́й па́ки ѹ҆готовлѧ́й си́лѣ.
ѻ҃и. Не ма́лѡ просвѣща́ти и҆ собира́ти ѹ҆́мъ, чте́нїе ѡ҆бы́че: словеса́ бо дх҃а ст҃а сꙋ́ть: и҆ прочита́ющихъ та̑, всѧ́кѡ наказꙋ́ютъ. Да бꙋ́дꙋтъ тѝ дѣ̑лателю сꙋ́щꙋ, прочита́єма дѣ̑ѧтєлна: си́хъ бо дѣ̑ланїе, и҆зли́шнее твори́тъ про́чїихъ прочита́нїе: трꙋды̀ па́че а҆ не кни́гами, здра̑ваѧ словеса̀ просвѣща́єма бы́ти и҆щѝ. Чꙋждеꙋ̑мна пре́жде си́лы дх҃о́вны, не проходѝ словеса̀: тмы́ бо сꙋ́ще глаго́ли, немощны́хъ помрача́ютъ.
ѻ҃ѳ. Є҆ди́на ча́ша мно́жицею, вїна̀ вкꙋ́съ и҆з̾ѧви́ла є҆́сть: и҆ є҆ди́но сло́во безмо́лвника, и҆скꙋша́ти могꙋ́щымъ, всѐ є҆гѡ̀ внꙋ́треннее показа̀ дѣ̑ланїе и҆ ѹ҆строе́нїе.
п҃. Непари́телно дꙋшѝ ѻ҆́ко стѧжѝ проти́вꙋ возноше́нїю, нѣ̑сть бо въ пре́лестехъ что̀ сегѡ̀ гꙋби́телнше.
п҃а. ŕадѝ ѧ҆зы́къ (тво́й) и҆сходѧ̀, вѣ̑сть бо ско́рѡ мнѡ́ги трꙋды̀ расточа́ти.
п҃в. Нелюбопы́тнꙋ ѡ҆бꙋча́йсѧ ѹ҆строе́нїю: ѡ҆сквернѧ́ти бо безмо́лвїе любопы́тство, ꙗ҆́кѡ ничто̀ и҆́но мо́жетъ.
п҃г. Приходѧ́щымъ потрє́бнаѧ предлага́й, тѣ̑лꙋ гл҃ю и҆ дꙋ́хꙋ: а҆́ще ѹ҆́бѡ премꙋ́дрши сꙋ́ть, то̀ молча́нїемъ любомꙋ́дрїе покажи́мъ: а҆́ще ли же бра́тїѧ сꙋ́ть ѹ҆строе́нїемъ, то̀ соꙋмѣ̑реннѣ две́рь сїю̀ ѿверзи́мъ: ѻ҆ба́че лꙋ́чше є҆́сть всѣ̑хъ превосходѧ́щихъ бы́ти непщева́ти.
п҃д. őотѧ́ща мѧ̀ ѿню́дъ возбранѧ́ти въ собра́нїихъ тѣле́сное дѣ̑ло є҆щѐ младе́нствєннымъ, ѹ҆держа̀ то́й и҆́же песо́къ во ѻ҆де́ждѣ всю̀ но́щь ноша́ше.
п҃є. Ꙗ҆коже сопротивлѧ́ютсѧ сло́вꙋ догма́тѡвъ ст҃ы́ѧ и҆ несозда́нныѧ и҆ покланѧ́емыѧ трⷪ҇цы ꙗ҆̀же ѡ҆ пло́тстѣмъ смотре́нїи є҆ди́нагѡ тоѧ́жде всепѣ̑тыѧ трⷪ҇цы: занѐ та́мѡ ѹ҆́бѡ мно́жєственнаѧ, въ се́мъ сꙋ́ть є҆ди́нствєнна: та́мѡ꙳ же є҆ди́нствєннаѧ, здѣ̀ сꙋ́ть мно́жествєнна : та́кѡ и҆́на безмо́лвїю, а҆ и҆́на послꙋша́нїю подоба̑ющаѧ сꙋ́ть ѡ҆бꙋчи́тєлства.
п҃ѕ. Бж҃е́ственный ѹ҆́бѡ гл҃етъ а҆пⷭ҇лъ, кто̀ разꙋмѣ̀ ѹ҆́мъ гдⷭ҇нь; а҆́зъ же гл҃ю, кто̀ разꙋмѣ̀ ѹ҆́мъ человѣ̑ка безмо́лвника тѣ̑ломъ и҆ дх҃омъ.
Держа́ва цр҃ю є҆́сть, бога́тство и҆ мно́жество: держа́ва же безмо́лвникꙋ, мл҃и́твы мно́жество.
꙳ Си́рѣчь, въ тро́ицѣ трѝ лица̀, а҆ во христѣ̀ ѻ҆дно̀ лицо̀: въ тро́ицѣ ѻ҆дно̀ є҆стество̀, а҆ во христѣ̀ два̀ є҆стества̀.