СЛО́ВО К҃И. Ѡ҆ сщ҃е́ннѣй и҆ мт҃ри добродѣ̑телей, бл҃же́ннѣй мл҃и́твѣ: и҆ ѡ҆ ѹ҆́мнѣмъ въ не́й и҆ чꙋ́вственнѣмъ предстоѧ́нїи.
Мл҃и́тва є҆́сть по ка́чествꙋ ѹ҆́бѡ своемꙋ̀, сопребыва́нїе и҆ соедине́нїе человѣ̑ка и҆ бг҃а: по дѣ̑йствꙋ же, мі́ра состоѧ́нїе, бж҃їе примире́нїе, сле́зъ ма́ти и҆ па́ки дщѝ, ѡ҆ грѣсѣ̑хъ ѹ҆милостивле́нїе, и҆скꙋше́нїй мо́стъ, скорбе́й средостѣ̑нїе, бра́ней сокрꙋше́нїе, а҆́гг҃єлъ дѣ̑ло, безпло́тныхъ всѣ̑хъ пи́ща, бꙋ́дꙋщее весе́лїе, безконе́чно дѣ̑ланїе, добродѣ̑телей и҆сто́чникъ, дарова́нїй вино́вна, пред̾ꙋспѣѧ́нїе неви́димо, пи́ща дꙋшѝ, ѹ҆ма̀ просвѣще́нїе, ѿча́ѧнїю сѣки́ра, наде́жды ѹ҆каза́нїе, печа́ли рѣше́нїе, бога́тство мона́хѡвъ, безмо́лвникѡвъ сокро́вище, ꙗ҆́рости ѹ҆мале́нїе, зерца́ло пред̾ꙋспѣѧ́нїѧ, мѣ̑ръ ꙗ҆вле́нїе, ѹ҆строе́нїѧ и҆з̾ѧвле́нїе, бꙋ́дꙋщихъ возвѣсти́тель, сла́вы зна́менїе. Мл҃и́тва є҆́сть вои́стиннꙋ молѧ́щемꙋсѧ сꙋди́лище и҆ сꙋди́ще, и҆ прⷭ҇то́лъ сꙋди́ща гдⷭ҇нь пре́жде бꙋ́дꙋщагѡ прⷭ҇то́ла.
в҃. Воста́вше ѹ҆слы́шимъ сщ҃е́ннꙋю сїю̀ цр҃и́цꙋ добродѣ̑телей, къ на́мъ высо́кимъ гла́сомъ вопїю́щꙋ и҆ гл҃ющꙋ: прїиди́те ко мнѣ̀ всѝ трꙋжда́ющїисѧ и҆ ѡ҆бремене́ннїи, и҆ а҆́зъ ѹ҆поко́ю вы̀. Возми́те и҆́го моѐ на себѐ, и҆ ѡ҆брѧ́щете поко́й дꙋша́мъ ва́шымъ, и҆ и҆сцѣле́нїе ꙗ҆́звамъ ва́шымъ. И҆́го бо моѐ бла́го и҆ согрѣше́нїй вели́кихъ и҆сцѣли́телно є҆́сть.
г҃. Є҆ли́цы цр҃ю̀ и҆ бг҃ꙋ предста́ти и҆ свозглаго́лати грѧде́мъ, не непригото́ванни тече́нїе своѐ сотвори́мъ, да не ка́кѡ ѹ҆зрѣ̑въ на́съ и҆здале́ча не и҆мꙋ́щихъ ѻ҆рꙋ́жїй и҆ ѻ҆де́жды црⷭ҇ка предстоѧ́нїѧ, слꙋга́мъ и҆ слꙋжи́телємъ повели́тъ дале́че нѣ̑гдѣ ѿ лица̀ своегѡ̀ свѧ́занныхъ и҆згони́ти: и҆ молє́нїѧ на̑ша на лицѐ на́ше раздира́єма возпосыла́ти.
д҃. Да бꙋ́детъ ри́за твоѧ̀ дꙋше́внаѧ, пред̾ гдⷭ҇емъ предста́ти грѧдꙋ́щꙋ, всѧ̀ прѧ́жею, па́че же зало́гомъ непамѧтоѕло́бїѧ и҆стка́нна: а҆́ще ли же нѝ, то̀ ничи́мже ѿ мл҃и́твы сеѧ̀ спо́лзꙋешисѧ.
є҃. Да бꙋ́детъ тѝ ве́сь моле́нїѧ сегѡ̀ (поста́въ), неразли́ченъ: є҆ди́нѣмъ бо сло́вомъ мыта́рь и҆ блꙋдни́къ бг҃а примири́ста.
ѕ҃. Є҆ди́но ѹ҆́бѡ є҆́сть предстоѧ́щихъ предстоѧ́нїе, мно́гꙋ же въ себѣ̀ разли́чность и҆ ра́зность и҆́мать. Ѻ҆́ви ѹ҆́бѡ ꙗ҆́кѡ ко дрꙋ́гꙋ и҆ ко влⷣцѣ пристꙋпа́ютъ, и҆нѣ̑хъ ра́ди про́чее, а҆ не своегѡ̀ ра́ди застꙋпле́нїѧ, пѣ̑снь и҆ молбꙋ̀ сїю̀ приносѧ́ще: и҆́ни, бога́тства и҆ сла́вы и҆ дерзнове́нїѧ мно́гша привзыскꙋ́юще: и҆́ни, ѿ сопе́рника своегѡ̀ въ коне́цъ и҆зба́витисѧ просѧ́ще: нѣ̑цыи ѹ҆́бѡ са́нъ нѣ̑кїй прїѧ́ти ѹ҆молѧ́юще: и҆́ни же соверше́нно до́лга ѻ҆́нагѡ безпопече́нїе: нѣ̑цыи ѹ҆́бѡ, ѿ темни́цы свобожде́нїе: и҆́ни же ѡ҆бвине́нїй рѣше́нїе.
з҃. Пре́жде всѣ̑хъ въ хартїѝ моле́нїѧ на́шегѡ, бл҃годаре́нїе чи́сто ѹ҆чини́мъ: вторы́й же сті́хъ, и҆сповѣ̑данїе и҆ сокрꙋше́нїе дꙋшѝ въ чꙋ́вствѣ: по си́хъ проше́нїе на́ше всѣ̑хъ цр҃е́ви скажи́мъ: и҆зрѧ́днѣйшъ бо є҆́сть предрече́нный мл҃и́твы ѻ҆́бразъ, ꙗ҆́коже нѣ̑коемꙋ и҆з̾ бра́тїй ѿ а҆́гг҃ла гдⷭ҇нѧ пока́зано бы́сть.
и҃. А҆́ще ѹ҆́бѡ вино́венъ бы́лъ бы є҆сѝ нѣ̑когда ви́димомꙋ сꙋдїѝ, то̀ не востре́бꙋеши и҆но́гѡ ѻ҆́браза въ предстоѧ́нїи мл҃и́твы твоеѧ̀: а҆́ще ли же не ѹ҆̀ предста́лъ є҆сѝ, ни и҆стѧзꙋ́емыхъ ви́дѣлъ є҆сѝ, то̀ понѐ ѿ быва́ющїѧ ко врачє́мъ недꙋ́гꙋющихъ молбы̀ ѡ҆ таковѣ̑й ве́щи наꙋчи́сѧ, внегда̀ ѿ ни́хъ и҆́мꙋтъ рѣ̑жеми и҆лѝ жего́ми бы́ти.
[Статия 2]
ѳ҃. Не быва́й премꙋ́дръ въ мл҃и́твы твоеѧ̀ глаго́лѣхъ: дѣ́тска бо мно́жицею прѡ́ста шепєта́нїѧ и҆ неразли̑чна, ѻ҆ц҃а̀ и҆́хъ и҆́же на нб҃сѣ̑хъ ѹ҆поко́иша.
і҃. Не покꙋша́йсѧ многосло́вити, да не ко и҆спыта́нїю слове́съ расточи́тсѧ ѹ҆́мъ (тво́й): є҆ди́но сло́во мытаре́во, бг҃а ѹ҆ми́лостивило є҆́сть: и҆ є҆ди́нъ гл҃ъ вѣ̑ренъ разбо́йника ѻ҆́наго спасѐ. Многосло́вїе ѹ҆́бѡ мно́жицею въ мл҃и́твѣ ѹ҆́мъ и҆ возмечта̀ и҆ разлїѧ̀: є҆диносло́вїе же мно́жицею ѹ҆́мъ собира́ти ѡ҆бы́че.
а҃і. Ѹ҆слажда́емь и҆лѝ ѹ҆милѧ́емь въ сло́вѣ мл҃и́твы пребыва́й въ не́мъ: храни́тель бо на́шъ тогда̀ є҆́сть съ на́ми молѧ́йсѧ.
в҃і. Не дерза́й, а҆́ще и҆ чистотꙋ̀ стѧжа́лъ є҆сѝ: со мно́гимъ же па́че смиренномꙋ́дрїемъ пристꙋпѝ, и҆ мно́жае дерза́ти и҆́маши.
г҃і. А҆́ще и҆ на всю̀ лѣ̑ствицꙋ добродѣ̑телей возше́лъ є҆сѝ, ѡ҆ ѡ҆ставле́нїи грѣхѡ́въ моли́сѧ: слы́ша па́ѵла ѡ҆ грѣ̑шницѣхъ вопїю́ща: ѿ ни́хже пе́рвый є҆́смь а҆́зъ.
д҃і. заслажда́ти варє́нїѧ, є҆ле́й и҆ со́ль ѡ҆быко́ша: воскрилѧ́ти же мл҃и́твꙋ, цѣломꙋ́дрїе и҆ сле́зы.
є҃і. А҆́ще бо во всю̀ кро́тость и҆ безгнѣ̑вїе ѡ҆дѣ̑ешисѧ, то̀ не мно́гѡ и҆́маши трꙋди́тисѧ свобожда́ти ѿ плѣне́нїѧ ѹ҆́мъ тво́й.
ѕ҃і. До́ндеже мл҃и́твꙋ и҆звѣ̑стнꙋ нестѧжа́хомъ, то̀ ѡ҆бꙋча́ющымъ младе́нцы ходи́ти въ нача́лѣхъ, подо́бни є҆смы̀.
з҃і. Подвиза́йсѧ вспѧ́ть приводи́ти, па́че же затворѧ́ти мы́сль во гл҃ѣхъ мл҃и́твы: и҆ а҆́ще и҆знемо́гши за младе́нчественность паде́тъ, па́ки тꙋ̀ введѝ: сво́йственна бо є҆́сть ѹ҆мꙋ̀ нестоѧ́тельность: мо́щно же є҆́сть сего̀ сотвори́ти ста́ти всѧ̑ могꙋ́щемꙋ поставлѧ́ти. А҆́ще неѡскꙋ́днѣ по́двигъ се́й стѧжа́лъ є҆сѝ, прїи́детъ и҆ въ тебѐ мо́ре ѹ҆ма̀ (твоегѡ̀) ѡ҆предѣлѧ́ѧй: и҆ рече́тъ къ немꙋ̀ въ мл҃и́твѣ твое́й: до сегѡ̀ до́йдеши и҆ не пре́йдеши. Невозмо́жно є҆́сть дꙋ́ха вѧза́ти: а҆ и҆дѣ̑же є҆́сть дꙋ́ха сегѡ̀ созда́тель, то̀ всѧ̑ покорє́на сꙋ́ть.
и҃і. А҆́ще ѹ҆́бѡ со́лнце нѣ̑когда ѹ҆ви́дѣлъ є҆сѝ, то̀ возмо́жеши съ ни́мъ и҆ свозглаго́лати подоба́телнѣ: є҆го́же бо неви́дѣлъ є҆сѝ, ка́кѡ собесѣ̑довати нело́жнѣ мо́жеши;
[Статия 3]
ѳ҃і. Нача́ло ѹ҆́бѡ мл҃и́твы, прило́зи є҆динопо́мысленнѣ ѿгонѧ́еми ѿ са́мыхъ нача̑лъ: среда́ же, є҆́же во глаго́лемыхъ и҆ помышлѧ́емыхъ є҆ди́нѣхъ бы́ти ѹ҆мꙋ̀: соверше́нство же сеѧ̀, восхище́нїе ко гдⷭ҇ꙋ.
к҃. И҆́но є҆́сть ра́дованїе є҆́же въ мл҃и́твѣ во дрꙋжи́нѣ пребыва́ющымъ приключа́ющеесѧ: а҆ и҆́но є҆́же въ безмо́лвїи молѧ́щымсѧ прибыва́ющее: занѐ ѻ҆́но ѹ҆́бѡ, не́гли (и҆) возмечта́сѧ ма́ло: сїе́ же всѐ смиренномꙋ́дрїѧ и҆спо́лненно є҆́сть.
к҃а. А҆́ще при́снѡ ѡ҆бꙋча́еши ѹ҆́мъ тво́й не ѹ҆далѧ́тисѧ, то̀ и҆ въ предложе́нїи трапе́зы бли́зъ тебѐ бꙋ́детъ: а҆́ще ли же невозбра́ннѡ скита́етсѧ, то̀ никогда́же ѹ҆ тебѐ пребыва́ти мо́жетъ. Вели́кїй ѹ҆̀бо вели́кїѧ и҆ соверше́нныѧ мл҃и́твы дѣ̑латель, гл҃етъ: хощꙋ̀ рещѝ пѧ́ть слове́съ ѹ҆мо́мъ мои́мъ, и҆ прѡ́чаѧ: младе́нственшихъ же таково́е, чꙋ́жде є҆́сть: тѣ̑мже мы̀ съ ка́чествомъ, и҆ мно́жествомъ коли́чества, ꙗ҆́кѡ несоверше́нни мо́лимсѧ: второ́е бо пе́рвшагѡ вино́вно быва́етъ: даѧ́ бо гл҃етъ мл҃и́твꙋ чи́стꙋ без̾ лѣ̑ности молѧ́щемꙋсѧ скве́рненнѣ и҆ ѹ҆трꙋжде́ннѣ.
к҃в. И҆́но є҆́сть, скве́рна мл҃и́твы: и҆ и҆́но, потребле́нїе: и҆ и҆́но, ѡ҆краде́нїе: и҆ и҆́но, поро́къ. Скве́рна є҆́сть, бг҃ꙋ предстоѧ́ти, и҆ безмѣ́стна помышлє́нїѧ мечта́ти: потребле́нїе є҆́сть, є҆́же въ попечє́нїѧ неполє́знаѧ плѣнѧ́тисѧ: ѡ҆краде́нїе є҆́сть, є҆́же неѡщꙋ́тнѣ мы́сли пари́ти: поро́къ є҆́сть, прило́гъ ꙗ҆ко́въ либо тогда̀ къ на́мъ приближа́ющсѧ.
к҃г. А҆́ще ѹ҆́бѡ не наеди́нѣ є҆смы̀ во вре́мѧ предстоѧ́нїѧ, то̀ внꙋтрьꙋ́дꙋ ѻ҆́бразъ мол̾бы̀ сеѧ̀ воѡбрази́мъ: а҆́ще ли же не присꙋ́тствꙋютъ похва́лъ слꙋги̑, то̀ и҆ внѣ̑шнїй ви́дъ на моле́нїе воѡбрази́мъ: въ несоверше́нныхъ бо, мно́жицею ѹ҆́мъ тѣ̑лꙋ соѡбразꙋ́етсѧ.
к҃д. Всѝ ѹ҆́бѡ, наипа́че же ѿпꙋще́нїѧ до́лга ѻ҆́нагѡ прїѧ́ти къ цр҃ю̀ грѧдꙋ́щїи, неисповѣ̑дима сокрꙋше́нїѧ тре́бꙋютъ. А҆́ще въ темни́цѣ є҆щѐ є҆смы̀, ѹ҆слы́шимъ гл҃авшаго къ петрꙋ̀: препоѧ́шисѧ ле́нтїемъ послꙋша́нїѧ, и҆ и҆з̾зꙋ́йсѧ во́лей твои́хъ, и҆ на́гъ ѿ си́хъ, пристꙋпѝ ко гдⷭ҇ꙋ въ мл҃и́твѣ твое́й: є҆гѡ̀ то́чїю призыва́ѧ во́лю: и҆ тогда̀ прїи́меши бг҃а держа́щаго корми́ло дꙋшѝ твоеѧ̀, и҆ безбѣ̑днѡ ѹ҆правлѧ́ющаго тебѐ.
к҃є. Воста́въ ѿ мїролю́бїѧ и҆ сластолю́бїѧ, ѿве́ржи попечє́нїѧ, совлецы́сѧ помышле́нїй, ѿрецы́сѧ тѣ̑ла: ничто́же бо и҆́но є҆́сть мл҃и́тва, ра́звѣ то́чїю мі́ра ви́дима и҆ неви́дима ѿчꙋжде́нїе. Что́ бо мѝ є҆́сть на нб҃сѝ; ничто́же: и҆ ѿ тебѐ что̀ восхотѣ̑хъ на землѝ; ничто́же: но є҆́же безмо́лвнѣ вы́нꙋ въ мл҃и́твѣ прилѣплѧ́тисѧ къ тебѣ̀. Нѣ́кимъ ѹ҆̀бо, бога́тство: и҆нѣ́мъ, сла́ва: и҆нѣ́мъ же, стѧжа́нїе рачи́телно є҆́сть: мнѣ̑ же є҆́же прилѣплѧ́тисѧ бг҃ови, вожделѣ̑нно є҆́сть: и҆ полага́ти на́нь ѹ҆пова́нїе безстра́стїѧ моегѡ̀.
[Статия 3]
к҃ѕ. Вѣ̑ра мл҃и́твꙋ воскрилѝ: без̾ неѧ́ бо на нб҃о возлетѣ̑ти не мо́жетъ.
к҃з. Помо́лимъ встра́ственнїи пребыва́телнѣ гдⷭ҇а: вси́ бо встра́ственнїи ѿ встра́стїѧ въ безстра́стїе пред̾ꙋспѣ̑ша.
к҃и. А҆́ще и҆ бг҃а не бои́тсѧ сꙋдїѧ̀ ѻ҆́нъ (си́рѣчь бг҃ъ), но занѐ трꙋды̀ є҆мꙋ̀ твори́тъ, грѣхо́мъ и҆ паде́нїемъ ѡ҆вдовѣ̑вшаѧ ѿ негѡ̀ дꙋша̀, сотвори́тъ ѿмще́нїе є҆ѧ̀, ѿ сопе́рника є҆ѧ̀ тѣ̑ла, и҆ сꙋпоста́тѡвъ є҆ѧ̀ дꙋхѡ́въ. Бл҃горазꙋ́мныхъ ѹ҆̀бо бл҃гі́й се́й на́шъ кꙋпе́цъ ско́рымъ проше́нїѧ подаѧ́нїемъ, къ любвѝ свое́й привлека́етъ: неблагода̑рныѧ же псѡ́въ си́хъ дꙋ́шы, а҆́лчбою и҆ жа́ждою проше́нїѧ при не́мъ присѣдѣ̑ти мл҃и́твою сотворѧ́етъ: неблагода́рный бо пе́съ взе́мъ хлѣ̑бъ, а҆́бїе ѿхо́дитъ ѿ да́вшагѡ.
к҃ѳ. Не глаго́ли коснѧ̀ въ моле́нїи се́мъ ничто́же и҆спра́вити: ѹ҆же́ бо и҆ и҆спра́вилъ є҆сѝ: ко́е бо и҆ вы́шше бл҃го є҆́сть ѿ є҆́же ко гдⷭ҇ꙋ прилѣплѧ́тисѧ, и҆ во є҆́же къ немꙋ̀ соедине́нїи непреста́ннѡ претерпѣва́ти.
л҃. Не та́кѡ ѡ҆сꙋжде́нный бои́тсѧ ка́зни своеѧ̀ и҆зрече́нїѧ, ꙗ҆́коже ѡ҆ мл҃и́твѣ прилѣжа́й, тоѧ̀ предстоѧ́нїѧ: тѣ̑мже а҆́ще премꙋ́дръ кто̀ и҆ ѡ҆строꙋ́менъ є҆́сть, то̀ па́мѧтїю ѻ҆́нагѡ, всѧ́ко досажде́нїе, и҆ гнѣ̑въ, и҆ попече́нїе, и҆ неꙋпраздне́нїе, и҆ ско́рбь, и҆ насыще́нїе, и҆ по́мыслъ ѿвраща́ти мо́жетъ.
л҃а. Пред̾ꙋготовлѧ́йсѧ приснѡтекꙋ́щею въ дꙋшѝ мл҃и́твою, къ предстоѧ́нїю моле́нїѧ твоегѡ̀, и҆ вско́рѣ пред̾ꙋспѣ̑еши. Ви́дѣхъ въ послꙋша́нїи блиста́ющихсѧ, и҆ ѡ҆ сꙋ́щей во ѹ҆мѣ̀ є҆ли́кѡ возмо́жно є҆́сть па́мѧти бж҃їей не нерадѧ́щихъ, внеза́пꙋ на мл҃и́твꙋ предста́вшихъ, и҆ вско́рѣ ѹ҆́мъ сво́й превозше́дшихъ, и҆ пото́чнѣ сле́зы произлива́ющихъ: пред̾ꙋгото́вани бо ѿ прпⷣбнагѡ послꙋша́нїѧ бѧ́хꙋ.
л҃в. Ѱалмопѣ̑нїю ѹ҆̀бо є҆́же со мно́жествомъ, плѣнє́нїѧ и҆ парє́нїѧ припослѣ̑дствꙋютъ: ѻ҆со́бнꙋ же сꙋ́щемꙋ, не та́кѡ: но сїѐ ѹ҆́бѡ, ѹ҆ны́нїе ра́тꙋетъ: ѻ҆́номꙋ же ѹ҆се́рдїе содѣ̑йствꙋетъ.
л҃г. Любо́вь ѹ҆́бѡ во́инствꙋющагѡ къ цр҃ю̀, показа̀ бра́нь: любо́вь же мона́ха ко бг҃ꙋ, показа́ло є҆́сть мл҃и́твы вре́мѧ и҆ предстоѧ́нїе.
л҃д. Ѹ҆строе́нїе твоѐ, мл҃и́тва твоѧ̀ ꙗ҆ви́тъ тебѣ̀: зерца́ло бо тꙋ̀ мона́хово бг҃осло́ви ѻ҆́ни преда́ша бы́ти.
л҃є. И҆́же каково́либо ни приключи́тсѧ дѣ̑ло дѣ̑лаѧй, и҆ мл҃и́твы часꙋ̀ приспѣ̑вшꙋ приꙋпражнѧ́ѧйсѧ въ не́мъ, ѿ бѣсѡ́въ порꙋга́емь быва́етъ: намѣ̑ренїе бо та́тємъ си̑мъ є҆́сть ча́съ ѿ часа̀ ѿ на́съ ѹ҆кра́сти.
л҃ѕ. Не ѿрица́йсѧ про́симъ и҆ ѡ҆ (нѣ̑коей) дꙋшѝ моли́тисѧ, а҆́ще и҆ мл҃и́твы не стѧжа́лъ є҆сѝ: вѣ̑ра бо ѻ҆́на просѧ́щагѡ мно́жицею и҆ молѧ́щагосѧ съ сокрꙋше́нїемъ спасла̀ є҆́сть.
л҃з. Не возноша́йсѧ ѡ҆ и҆́нѣхъ молѧ́сѧ и҆ ѹ҆слышава́емь: вѣ̑ра бо ѻ҆́нѣхъ, дѣ̑йствова и҆ возмо́же.
л҃и. Ѻ҆́трокъ ѹ҆́бѡ всѧ́къ, всѧ́кїѧ премꙋ́дрости є҆́йже ѿ ѡ҆бꙋчи́телѧ наꙋчи́лсѧ є҆́сть, на всѧ́къ де́нь без̾ ѡ҆пꙋще́нїѧ ѿ негѡ̀ и҆стѧ́занъ бꙋ́детъ: ѹ҆́мъ же всѧ́къ си́лы, ю҆́же ѿ бг҃а прїѧ́лъ є҆́сть во всѧ́цѣй мл҃и́твѣ и҆стѧ́занъ бꙋ́детъ: тѣ̑мже внима́ти подоба́етъ. Є҆гда̀ тре́звеннѣ помо́лишисѧ, скорѣ̑е и҆ на гнѣ̑вы ра́тованъ бꙋ́деши: ра́зꙋмъ бо се́й є҆́сть врагѡ́въ на́шихъ.
[Статия 4]
л҃ѳ. Всѧ́кꙋ ѹ҆́бѡ добродѣ̑тель, наипа́че же мл҃и́твꙋ со мно́гимъ чꙋ́вствомъ сотвори́мъ всегда̀. Тогда̀ дꙋша̀ съ чꙋ́вствомъ мо́литсѧ, є҆гда̀ ꙗ҆́рости крѣ̑плша бꙋ́детъ.
м҃. Мно́гими молє́нїи и҆ лѣ̑ты стѧжава́ємаѧ, пребыва́тєлна сꙋ́ть.
м҃а. Стѧжа́вый гдⷭ҇а, нектомꙋ̀ въ мл҃и́твѣ сло́во своѐ ска́жетъ: дх҃ъ (дꙋша̀ и҆мꙋ́ща дарова́нїе мл҃и́твы) бо тогда̀ мо́литсѧ ѡ҆ не́мъ въ само́мъ себѣ̀ воздыха́нїи неглаго́лными.
м҃в. Всѧ́кагѡ чꙋ́вственна мечта́нїѧ въ мл҃и́твѣ да не прїи́меши, да не и҆зстꙋпле́нїе постра́ждеши.
м҃г. Всѧ́кагѡ проше́нїѧ и҆звѣще́нїе, въ мл҃и́твѣ и҆з̾ѧвлѧ́етсѧ. И҆звѣще́нїе є҆́сть, рѣше́нїе сꙋмнѣ̑нїѧ: и҆звѣще́нїе є҆́сть, безвѣ̑стности и҆з̾ѧвле́нїе незы́блемо.
м҃д. Ми́лостивъ быва́й ѕѣлѡ̀, ѡ҆ мл҃и́твѣ прилѣжа̀: то́ю бо мона́си стори̑чнаѧ прїи́мꙋтъ, про́чее же, въ бꙋ́дꙋщемъ.
м҃є. Ѻ҆́гнь ѹ҆́бѡ прише́дъ въ се́рдце мл҃и́твꙋ возста́ви: се́й же воста́вшей, и҆ на нб҃о возне́сшейсѧ, ѻ҆гнѧ̀ въ го́рницѣ дꙋшѝ, соше́ствїе бы́сть.
м҃ѕ. Гл҃ю́тъ ѹ҆́бѡ нѣ̑цыи, лꙋ́чшꙋ бы́ти мл҃и́твꙋ (па́че) па́мѧти и҆схо́да: а҆́зъ же є҆ди́ныѧ ѵ҆поста́си два̀ сꙋщєства̀ пою̀.
м҃з. Ко́нь ѹ҆́бѡ и҆скꙋ́сенъ, по превосхожде́нїю, разгрѣва́тисѧ, и҆ къ тече́нїю прилага́ти ѡ҆бы́че: тече́нїе же разꙋмѣва́ю бы́ти, пѣснопѣ̑нїе: конѧ́ же мꙋ́жественнаго ѹ҆ма̀: и҆здале́ча таковы́й ѡ҆бонѧва́етъ бра́нь: и҆ пред̾ꙋгото́ванъ сы́й пребыва́етъ про́чее ѿню́дъ непобѣди́мь.
м҃и. Лю́тѡ ѹ҆́бѡ є҆́сть и҆з̾ꙋ́стъ жа́ждꙋща, во́дꙋ и҆схи́тити: лю́тше же дꙋшѝ со ѹ҆миле́нїемъ молѧ́щейсѧ, пре́жде соверше́нїѧ тоѧ̀, себѐ ѿ предстоѧ́нїѧ ѻ҆́нагѡ многовожделѣ̑ннагѡ ѿто́ргнꙋти.
м҃ѳ. Да не ѿско́чиши, до́ндеже ѻ҆́гнь и҆ во́дꙋ сїю̀ смотри́телнѣ преста́вшѧ не ѹ҆ви́диши: не бо̀ прїи́меши вре́мѧ таково̀ ко проще́нїю согрѣше́нїй не́гли во все́мъ животѣ̀ твое́мъ.
[Статия 5]
н҃. Вкꙋси́вый мл҃и́твы, мно́жицею ѿ сло́ва є҆ди́нагѡ происходѧ́ща, ѹ҆́мъ ѡ҆скверни́лъ є҆́сть: и҆ на мл҃и́твꙋ предста́въ, вожделѣва́емое не ѡ҆брѣ̑те ѡ҆бы́чнѣ.
н҃а. И҆́но є҆́сть смотрѣ̑ти ча́стѣе на се́рдцѣ: а҆ и҆́но є҆пⷭ҇копꙋ бы́ти се́рдца ѹ҆мо́мъ кнѧ́земъ и҆ а҆рхїере́емъ, словє́сны жє́ртвы хрⷭ҇тꙋ̀ приносѧ́щимъ. Ѻ҆́вѣхъ ѹ҆́бѡ, ꙗ҆́коже гл҃етъ нѣ̑кто ѿ полꙋчи́вшихъ бг҃осло́вїѧ нарече́нїе, ст҃ы́й и҆ пренбⷭ҇ный ѻ҆́гнь приходѧ̀ ѡ҆палѧ́етъ, є҆щѐ скꙋ́дости ра́ди ѻ҆чище́нїѧ: ѻ҆́вѣхъ же напроти́въ, просвѣща́етъ, мѣ̑ры ра́ди соверше́нства: то́йжде бо и҆ ѻ҆́гнь поѧда́ющъ, и҆ свѣ̑тъ просвѣща́ющъ и҆менꙋ́етсѧ: тѣ̑мже и҆ нѣ̑цыи ѿ мл҃и́твы и҆зше́дше, ꙗ҆́кѡ ѿ ѻ҆гнѧ̀ пе́щна творѧ́тъ и҆схо́дъ се́й, ѡ҆блегче́нїе ѿ скве́рны нѣ̑кїѧ и҆ вещества̀ ѡ҆щꙋща́юще: и҆́ни же ꙗ҆́кѡ ѿ свѣ̑та просвѣще́ни, и҆ въ сꙋгꙋ́бꙋ ѡ҆де́ждꙋ смире́нїѧ и҆ ра́дованїѧ ѡ҆дѣ̑ѧни: кромѣ̑ бо двою̀ сею̀ дѣ̑йствꙋ ѿ мл҃и́твы и҆зше́дшїи, тѣле́снѣ, да не рекꙋ̀ жидо́вски помоли́шасѧ, а҆ не дх҃о́внѣ.
н҃в. А҆́ще тѣ̑ло тѣ̑лꙋ прикаса́ющосѧ, и҆змѣнѧ́етсѧ дѣ̑йствомъ, ка́кѡ же ѹ҆̀бо не и҆змѣни́тсѧ, и҆ бж҃їю тѣ̑лꙋ непови́нныма рꙋка́ма прикаса́ѧйсѧ;
н҃г. Мо́щно є́Ɠсть по и҆́же на земли цр҃ю, и҆ на́шего всебл҃га́го цр҃˝ uƓви́дѣти: ѻ҆вогда úƓбѡ собо́ю, ѻ҆вогда́ же чрез̾ дрꙋ́га: и҆ногда́ же чрез̾ раба̀: ѻ҆вогда́ же и҆ невѣ̑домѡ, да́ры своѧ̑ вѡ́инѡмъ свои̑мъ да́рꙋюща: про́чее же и҆ по ри́зѣ сꙋ́щагѡ въ на́съ смире́нїѧ.
н҃д. Ꙗ҆коже и҆́же на землѝ цр҃ю̀, предстоѧ́щїй пред̾ ни́мъ, и҆ лицѐ своѐ ѿвраща́ющїй, и҆ со врагѝ влады́ки (своегѡ̀) бесѣ̑дꙋющїй, ме́рзостенъ є҆́сть: та́кѡ (и҆) ѿ гдⷭ҇а ме́рзокъ быва́етъ, на мл҃и́твѣ предстоѧ́й, и҆ нечи̑сты по́мыслы прїе́млѧй.
н҃є. Приходѧ́ща пса̀ ѻ҆́наго, ѻ҆рꙋ́жїемъ си́мъ ѿгонѧ́й: и҆ є҆ли́жды безстꙋ́дствꙋетъ, не послаби́ши є҆мꙋ̀.
н҃ѕ. Просѝ пла́чемъ: и҆щѝ послꙋша́нїемъ: толцы̀ долготерпѣ̑нїемъ: та́кѡ бо просѧ́й, прїе́млетъ: и҆ и҆ща́й, ѡ҆брѣта́етъ: и҆ толкꙋ́щемꙋ, ѿве́рзетсѧ.
н҃з. őрани́сѧ не ꙗ҆́коже бы приключи́лосѧ ѡ҆ же́нстѣмъ по́лꙋ помоли́тисѧ въ мл҃и́твѣ твое́й, да не ка́кѡ ѿ десны́хъ ѡ҆кра́дешисѧ.
н҃и. Не хощѝ тѣлє́снаѧ дѣѧ̑нїѧ (по ча́сти) и҆сповѣ̑довати, ꙗ҆́коже сꙋ́ть: да не са́мъ себѣ̀ противонавѣ̑тенъ бꙋ́деши.
н҃ѳ. Да не бꙋ́детъ тѝ вре́мѧ мл҃и́твы, разсмотрѣва́нїѧ нꙋ́ждныхъ, и҆ дх҃о́вныхъ веще́й вре́мѧ: а҆́ще ли же нѝ, то̀ лꙋ́чшагѡ ѡ҆кра́денъ є҆сѝ.
ѯ҃. Держа́й непреста́ннѡ па́лицꙋ мл҃и́твы, не преткне́тсѧ: а҆́ще ли же и҆ слꙋчи́тсѧ, ѻ҆ба́че не паде́тъ до конца̀. Мл҃и́тва бо є҆́сть, бг҃а мꙋчи́телство бл҃гоче́стно.
ѯ҃а. По́льзꙋ сеѧ̀ ѿ бѣсо́вскихъ препѧтствова́нїй во вре́мѧ собра́нїѧ примѣчава́емъ: пло́дъ же сеѧ̀, ѿ вра́жїѧ побѣжде́нїѧ: въ се́мъ бо позна́хъ, ꙗ҆́кѡ восхотѣ̑лъ мѧ̀ є҆сѝ, ꙗ҆́кѡ не возра́дꙋетсѧ во вре́мѧ бра́ни вра́гъ мо́й ѡ҆ мнѣ̀ (ѱал. м҃, ві҃). Воззва́хъ, гл҃е́тъ ѱало́мникъ, всѣ̑мъ се́рдцемъ мои́мъ (ѱал. ри҃ї. рм҃е): то́есть, тѣ̑ломъ и҆ дꙋше́ю и҆ дꙋ́хомъ: и҆дѣ̑же бо є҆ста̀ два̀ послѣ́днѧѧ сѡ́брана, тꙋ̀ є҆́сть бг҃ъ посредѣ̀ и҆́хъ.
ѯ҃в. Нижѐ тѣлє́снаѧ, нижѐ дꙋхѡ́внаѧ, всѣ̑хъ всѧ̑ подѡ́бна сꙋ́ть: занѐ нѣ́кимъ ѹ҆́бѡ, кра́ткое: нѣ́кимъ же, ко́сншее въ ѱалмопѣ̑нїи схо́дно є҆́сть: занѐ ѻ҆́ви ѹ҆́бѡ, съ плѣне́нїемъ: ѻ҆́ви же съ невѣ̑жествомъ глаго́лютъ ра́товатисѧ.
ѯ҃г. А҆́ще непреста́ннѡ на врагѝ твоѧ̑ мо́лишисѧ къ цр҃е́ви ѻ҆́номꙋ, внегда̀ на тѧ̀ нахо́дѧтъ, дерза́й, не ѹ҆трꙋди́шисѧ: ті́и бо са́ми ѡ҆ себѣ̀ вско́рѣ ѿ тебѐ ѿстꙋ́пѧтъ: не бо̀ хотѧ́тъ непреподо́бнїи сі́и зрѣ̑ти тѧ̀, вѣне́цъ прїима́ти мл҃и́твою, ѿ ꙗ҆́же на ни́хъ ра́ти: къ си̑мъ же, и҆ ꙗ҆́кѡ ѿ ѻ҆гнѧ бїе́ми ѿ мл҃и́твы сеѧ̀, бѣжа́ти и҆́мꙋтъ.
ѯ҃д. Мꙋ́жество стѧжѝ всѧ́ко, и҆ и҆мѣ̑ти бꙋ́деши бг҃а ѹ҆чи́телѧ мл҃и́твы твоеѧ̀. Невозмо́жно є҆́сть зрѣ̑нїѧ сло́вомъ наꙋча́тисѧ, є҆стествꙋ́ бо послѣ̑дствꙋетъ: нижѐ мл҃и́твы добро́ты, и҆́нѣмъ ѹ҆че́нїемъ: та́ бо са́ма ѡ҆ себѣ̀ (ѹ҆чи́телѧ) бг҃а и҆́мать ѹ҆ча́щаго человѣ̑ка ра́зꙋмꙋ, и҆ дающаго мл҃и́твꙋ молѧ́щемꙋсѧ, и҆ бл҃гословлѧ́ющаго лѣ́та пра́ведныхъ (ѱал. ч҃г, і҃: а҃ црⷭ҇т. в҃, ѳ҃҃).