Возлю́блене, христиани́н ли еси́ Бо́жиею благода́тию, то соблюди́ за́поведи Го́спода на́шего Иису́са Христа́, и спасе́н бу́деши. Пи́шет бо, я́ко по и́стине разумева́ю: «я́ко несть лицеме́р Бог, но во всех язы́цех боя́йся Бо́га и де́лаяй пра́вду прия́тен Ему́ есть». А́ще ли хо́щеши на испыта́ние мни́шеское прия́ти житие́, я́ко да и лу́чшее получи́ти, а́ще не положи́ши на уме́ си я́ко уже́ преста́вился еси́ от жи́зни сея́ и не оста́виши ми́ра сего́, ни сла́вы его́ я́ко се́ни разоря́емы, не мо́жеши победи́ти страсте́й земны́х, ни ми́ра сего́ жела́ний, я́же погружа́ют челове́ки пло́тию во отпаде́ние и поги́бель. Нелжив бо есть, реки́й: «И́же хо́щет во след Мене́ ити́, да отве́ржется себе́ и во след Мене́ да и́дет. Хотя́й бо ду́шу свою́ спасти́, погуби́т ю́, а погуби́вый ду́шу свою́ Мене́ ра́ди, обря́щет ю́. Что у́бо успе́ет челове́к, а́ще весь мир приобря́щет, ду́шу же свою́ отщети́т? Или́ что даст челове́к изме́ну за ду́шу свою́?».
Не бо есть нача́ло труду́, е́же положи́ти основа́ние. Ели́ко бо возно́сится зда́ние, толи́ко же и труда́ зи́ждущему до сконча́ния де́лу. Послу́шаим Спасе́наго гла́са глаго́лющаго: «Кто у́бо от вас хотя́й созда́ти столп, то не пе́рвее ли сед сочте́т жи́то (име́ние), а́ще и́мать до сконча́ния, да не когда́ положи́вшу ему́ основа́ние и не возмо́гшу соверши́ти, вси же ви́дящии начну́тся ему́ руга́ти глаго́люще: я́ко сей челове́к нача́т зда́ние и не возмо́же его́ соверши́ти». Брань бо вы́ну мала́ есть, а мни́ху до оше́ствия своего́ е́же ко Го́споду. Сего́ ра́ди подоба́ет нача́ти делеса́ со вся́цем тща́нием, и бде́нием, и терпе́нием. А́ще у́бо возлю́блене, на́чнеши закала́ти льва, кре́пко приими́ его́, да не ка́ко сокруши́т ко́сти твоя́, я́ко сосу́д здан. А́ще ли же вве́ржешися в мо́ре, не круподу́шен бу́ди, до́ндеже изы́деши на су́хо, да не сни́деши в глубину́ я́ко и ка́мень.
Бра́те, а́ще вни́деши подвиза́тися, трезви́тель буд́и, да не ка́ко супроти́вный победи́в тя поруга́ется, и в венца́ ме́сто прии́меши супроти́вная. Всяк у́бо хотя́й бы́ти черне́ц, се да и́мать гото́во е́же терпе́ти до́бле. Еда́ когда́ вше́дшу ему́ рече́т: «Не ве́дех, я́ко си́це ва́ми хотя́т бы́ти». И се провозвести́ло ти ся есть бра́те, да и ты по́мысл свой утверди́ши, вед́ый, я́ко от сего́ ти ся яви́т искуше́ние. Разуме́ ли глаго́лемое, возлю́блене, да не днесь пред дверьми́ сый вопраша́емь, рече́ши: «У́тро вся терплю́», и утро отве́ржешися делесы́. А́нгели Бо́жии предстоя́т и слы́шат вся исходи́мая устна́ма твои́ма. Блюди́ ся возлю́блене, ты сам прихо́диши к Бо́гу Жи́ву И́стинну, и обещева́ешися. Блюди́ся, да не солже́ши, я́ко погуби́т Госпо́дь вся глаго́лющая лжу.
Си у́бо быва́ют приходя́щему к Бо́гу: пе́рвое у́бо искуше́нием, посе́м же скорбь. Что же у́бо пото́м? Труд, уны́ние, нагота́, страсть, печа́ль, уничиже́ние. Си́ми бо ся яви́т терпе́ние и искуше́ния ве́рных, и си́ми все́ми победи́т, да́вый себе́ всем се́рдцем Бо́жию наставле́нию и стерпе́вый во́лю Его́, поне́же бо соверше́наго предложе́ния от нас и́щет Бог и Сам ны подае́т кре́пость и побе́ду да́рует. Я́коже пи́шет: «И Защи́титель есть всем упова́ющым Нань». И па́ки глаго́лет: «Близ Госпо́дь всем призыва́ющым И́ во и́стинну, во́лю боя́щихся Его́ сотвори́т и моли́тву их услы́шит и спасе́т я́».
Моли́те же ся за мя, молю́ вы, да не лени́мся. Даждь вам Госпо́дь непоро́чно сохрани́ти сия́. Не бо у́бо я́коже дости́гше в сия́ чи́сла сове́тую вам, но Го́спода Иису́са Христа́ призва́вше, Да́вца и Мести́теля словеси́, начина́ем у́бо обнажи́ти словеса́, да по́льзуем по́льзующе. Не бо, но глаго́лемии пимента́рии приле́жно испыта́ша ко́рения и о́бразы бы́лием, и вписа́ния преда́ша. И се смотре́ние Бо́жие непщу́ю на утеше́ние боля́щых по пло́ти, то кольми́ па́че поле́зное есть нам открыва́ти сокро́вище благода́тное по да́ру Его́. Не бо убежа́ му́ки раб проны́рством, скрыв тала́нт господи́на своего́. Кто же ли не воздохне́т то по́мня, всу́е иму́ща и́мя черне́ческое? Кто ли не воспла́чется мене́, погу́бльшаго гове́ние и терпе́ние? И что сотворю́ егда́ посети́т Влады́ка Христо́с? Те́мже молю́ вы возлю́блении, моли́те за мя недосто́йнаго раба́, я́ко да изба́влюся от настоя́щаго ве́чнаго огня́, и благода́ть да отве́рзет ми устне́, на славосло́вие Святы́я Единосу́щныя Тро́ицы, Отца́ и Сы́на и Свята́го Ду́ха, я́ко в руку́ Его́ мы и словеса́ на́ша. Той бо есть уча́ челове́ка ра́зуму, Тому́ сла́ва во веќи ве́ков. Ами́нь.