Возлю́блене, а́ще отве́рглся еси́ жития́ сего́, и вни́деши во о́бщее житие́, мно́жайшую бра́тию, и хо́щеши с ни́ми жи́ти, и Бо́гу на́шему Иису́с Христу́ рабо́тати, и ви́деши не́кия бесе́дующа е́же неуго́дно есть Христу́, и ты не внима́й слове́с их, но оста́ви я́ глаго́лати к себе́. Глаго́лющеи бо неуго́дная Бо́гу, ти́и в ле́ности живу́т и уста́ их глаго́лют вы́ше вре́мене. Се́рдце бо развраще́но роди́т зла́я во вся́ко вре́мя. Ты же Бога имей пред очима. Пи́шет бо: «Предзре́х Го́спода пре́до мно́ю вы́ну, я́ко оде́сную мене́ есть, да ся не подви́жу», и да не научи́т тебе́ лю́тый змий глаго́лати: «Ста́рцы бо си́и зле живу́т, и что сотворю́, юн сый?». Но послу́шай Го́спода глаго́люща: «Мно́зи зва́ни, ма́ло же избра́нных». Люби́ у́бо спасе́н бы́ти, да бу́деши во избра́нных. Творя́щеи бо лука́вая, лю́бо во о́бщем житии́, лю́бо яко́м же то́кмо ме́сте – ти́и суть сы́нове лука́ваго, уподо́бишася пле́велом посреде́ пшени́цы. Бу́ди у́бо ты пшени́ца, да со́брана бу́деши в жи́тницу Госпо́дню. Да не я́ко пле́вел сгори́ши огне́м неугаса́емым. И ниже́ су́дим никому́же, не бо ве́мы ка́ко пребыва́ет кто в ке́лии свое́й или́ кото́рую боле́знь и́мать к Бо́гу, и ниже́ ви́дим смею́щаяся, или́ глаго́люща что. Те́мже подоба́ет кому́ждо вас себе́ внима́ти, ки́йждо бо вас за ся сло́во возда́ст Бо́гови. Вонми́ всем се́рдцем твои́м, пе́нием и чте́нием божес́твеных писа́ний: и испи́й от нея́ масть душе́ю си, я́ко младе́нец ссый сосца́. От того́ бо навы́кнеши стра́сти де́тельныя, и бу́дет ра́дость и весе́лие се́рдцу твоему́. Кро́ток бу́ди, и смы́слен, и послушли́в. Кро́ток же, да егда́ по́ймет тя отроча́, после́дствуеши ему́, и соверши́в дело молча́, возврати́вся в ке́лию свою́, молча́ же устна́ма, се́рдцем же моля́ся. Послушли́в же, да чистоту́ сохрани́ши телесе́ своего́ о Го́споде я́ко чи́стый би́сер. Ри́зами же не украша́йся, и роди́тели бога́тыми не возноси́ себе́. Хваля́йся о Го́споде да хва́лится. Вся́ка бо сла́ва челове́ча, я́ко цвет травны́й. И́зсше трава́, и цвет ея́ отпаде́т. Глаго́л же Госпо́день пребыва́ет во ве́ки. До́лу о́чи име́ти, а ду́шу горе́. Со блудни́цею не твори́ти бесе́ды. С жено́ю не ли́хо что глаго́лати. Со де́тищем не умно́жити слове́с. С пия́ницею же и с кото́рником, или́ с безчи́нником и со сме́шником не смеша́тися, но в стра́се Бо́жии стоя́ти весь день. Глаго́лет бо апо́стол: «В прему́дрости ходи́те искупу́юще вре́мя, я́ко дни́е лука́ви суть. Сего́ ра́ди не быва́йте несмы́слени, но разумева́юще, что есть во́ля Бо́жия, блага́я и уго́дная и соверше́ная. И не упива́йтеся вино́м, в не́мже есть блуд». Да постыдя́тся супроти́внии, никако́я же злы́я вещи имы́й глаго́лати о нас. Ами́нь.