Возлю́блене, се предлага́ю ти друго́е предложе́ние о Го́споде. А́ще сохрани́ши е́, по́слежде даст ти весе́лие.
А́ще отве́рглся еси́ су́етнаго жития́ и вни́деши в о́бщее житие́ и мно́жайшую бра́тию, да тебе́ не прельсти́т враг изы́ти от о́бщаго жития́ пре́жде взя́тия оде́жды мни́шескаго о́браза, ни соверше́на же, зело́ бо раска́ешися. Но положи́ нача́ла бла́га и терпи́ со вся́кою смире́ною му́дростию. Находя́щых же искуше́ний вра́жиих не устраша́йся, но терпи́, да получи́ши блаже́нство. Пи́шет бо: «Блаже́н муж, и́же претерпи́т искуше́ния, я́ко искуше́н быв прии́мет вене́ц живо́тный, и́же обеща́ Госпо́дь лю́бящым И́» . Хо́щеши ли, да не бу́деши побежде́н иску́сом, всю во́лю твою́ отре́жи, и и́маши поко́й. А́ще ли мнит ти ся добра́ су́щи вещь настоя́щая тебе́, Го́сподом су́дится не су́щи добра́, покори́ся ему́ о Го́споде, е́же бо пре́тися и своему́ по́мыслу после́дствовати. Зна́мение есть на возвраще́ние, новонача́льный бо, непоко́рно име́я, ни во что же твори́т себе́. Пи́шет бо во псалме́: «Рабо́тайте Го́сподеви со стра́хом, и ра́дуйтеся Ему́ с тре́петом». «Приими́те наказа́ние, да не когда́ прогне́вается Госпо́дь и поги́бнете от пути́ пра́веднаго». Любя́й бо наказа́ние не поги́бнет, ненави́дяй же наказа́ния отщети́ся сам. Я́коже бо в череми́гу вли́ту бы́ти вину́ и о́цту, невозмо́жно есть, та́кожде и не наказа́ние, не мо́жет всели́ти де́тели мни́шескаго жития́. И препри́т мя апо́стол, глаго́ля: «Ко́е бо есть согла́сие Христу́ к лестьцу́ или́ ко́е обще́ние све́ту с тмо́ю?». Люби́ же целому́дрие до конца́, да всели́тся в тя Дух Бо́жий.
Егда́ же досто́ин бу́деши оде́жды мни́шескаго жития́, ни та́кожде полага́й по́мыслы, а́ще хотя́т разлучи́ти тя бра́тия. Да не когда́ от ю́ности твоея́ навы́кнеши скита́тися, а не во еди́ном ме́сте седе́ти. Блюди́ же ся, не мози́ погуби́ти гове́ния, в не́же вни́де, но име́й и́ до конца́. Злосло́вие же и кля́тва, да не имену́ется во устну́ твое́ю, я́коже подоба́ет святы́м, но стой смире́ние име́я во всех отве́тех свои́х, е́же рещи́ отпусти́ грехи́ моя́, я́ко да отъи́дут небла́зии обы́чаи мирсти́и. И пожи́вшу ти доброде́тельне, и́маши от Бо́га похвалу́.
Гряду́щу же ти в черне́ческий чин, да не тре́буеши зла́та, ни сребра́, но преди́ по́сле на небеса́ по за́поведи Спа́сове. Сия́ стяжи́ себе́: ве́ру, воздержа́ние, терпе́ние, смире́ние, и про́чая Бог от бла́гости Своея́ пода́ст ти. А́ще же кто от вели́ка оста́нка су́етнаго жития́ прии́дет в черне́чество, да соблюде́тся сам велича́ваго смы́сла, да не впаде́т в дух горды́нный и непокори́вый и отщети́тся сам. Возлю́бленне, несть ти́и се тебе́ на студ, а́ще еси́ в покоре́нии о Го́споде, ни е́же а́ще де́лает свои́ма рука́ма благ[о́е] есть. Си́и бо ма́лая печа́ль и скорбь, е́же терпи́ши Го́спода ра́ди, Ходата́й ти бу́дет ве́чней жи́зни. И что глаго́лю, вся печа́ль мни́шескаго жития́. Я́ко измену́я рукоя́ть на тме тала́нт зла́та, та́ко хотя́щая бы́ти скорбь, сря́щет творя́щая зла́я. Ма́ла у́бо подае́ши, вели́кая восприи́меши. Трезви́ся, возлю́бленне, я́ко до́брый во́ин и не лени́ся о свое́й благода́ти, да не когда́ ку́пно прии́дет на тя обое́, я́ко и челове́к оскорби́ши, я́же суть по пло́ти роди́тели твои́, и Бо́гу не угоди́ши. Но подвиза́йся, я́ко да и зря́щеи тебе́ просла́вят Бо́га о блазе́м твое́м житии́. Пи́шет бо: «Боя́щеися Тебе́ у́зрят мя и возвеселя́тся, я́ко на словеса́ Твоя́ упова́х». И па́ки: «Мир мног лю́бящым зако́н Твой, и несть им собла́зна». Те́мже храни́ся от высокому́дрия, и Госпо́дь даст ти часть со все́ми святы́ми. Тому́ сла́ва во ве́ки. Ами́нь.